Ka Nupepa Kuokoa, Volume XIII, Number 32, 8 August 1874 — Ka lei aloha he keiki, ua hala aku la ma kela aoao o keia ola ana. [ARTICLE]

Ka lei aloha he keiki, ua hala aku la ma kela aoao o keia ola ana.

E ke Kuokoa e ; Aloha oe :— E oluolu kou Luna Hooponopono, e hookomo iho ma kahi kaawale o kou mau ko ramu, i kela mau hua e kaa ae la maluna, i ike mai ai na makua, na kupuna a me na pilikana a pau o ka mea i make, kuu kaikamahine aloha hoi i haalele mai la i ka pili aloha me ka makua. Ua hanauia o Hariata Lota, ma Keauhou, N, Kona, H., na Ana K Lota a me J K Lota, ma ka la 10 o Novemaba 1872. Ua noho pu oia me kona mau makua a me ka ohana a pau o ka makuakane iloko o ka makahiki hookahi a me 5 malama, a ma ka malama hoi o Aperila, pule elua paha, ua haalele aku la oia a me kona makuahine, kona pokii uuku loa elua pule, i ka ohana a pau o kona makuakane, a holo aku la no Honolulu. Ua noho no me ka oluolu maikai o kona ola ma ka aina malihioi no ka pule hookahi a oi, a mahope o ka pule hookahi a oi, ua loaa iho la i ka mai hikoko a me ka nao. Nui kona uwe i ka mea o ka eha. Ua haawiia ka laau hoopaa-hi, aole nae he oluolu iki. Ua kaa oia i keia mai no na la he 10, a ma ka la 12 o Mei 1874, make iho la oia, ma Mana, Honolulu, koe na makua a me kona pokii uuku. He kaikamahine keia i aloha nui ia e maua a me ka ohana a pau, a ke noho nei makou me ka minamina pau ole nona. He oiaio, "Na ke Akua i haawi mai, a nana no i lawe aku. E hoomaikaiia kona inoa." No ka nui o ke aloha a me ka minamina nona, nolaila, ua haku iho makou i wahi kanaenae aloha nona. He kanikau aloha keia nou e Hariata Lota, Kuu kaikamahine mai ka malu hale o Mana E hoonana ae ana i ko aloha aole e nalo, Haiia mai e ka waimaka, i ikea no i ka ue ana iho, Kuu kaikamahine mai ka la wela o Kona e Mai ka makani wehe launiu la he eka, Wehe oe i ka pili aloha me na makua la kaawele, Pau hoi ka ikena i kou mau helehelena, Pan hoi ka lohe ana i kou leo i ka hea mai e "Papa."

Auwe kuu mea'loha o kuu kaikamahine e, Kuu kaikiamahine mai ka la hulili mai i ke kula Mai ka piina ikiki o puu o Mauela, Hoomaha'ku kakou i ka uka anu o ka aina Oia wahi a kakou e noho kokookolu ai, Kuu kaikamahine mai ka malu hale o Ha-lerose, Mai ka wai huihui o Mahiwai, A he waiwai nui ke aloha nau e hiipoi nei, auau ai, E lia mau ai o ka po me ke ao, Aloha wale ia wahi a kuu kaikamahine e Auwe kuu mea'loha o kuu kaikamahine e, Kuu kaikamahine mai ka uka anu o Puuhinahina, Oia uka hoolaukanaka i ka leo o na manu, Aloha ia uka ohia loloa a kakou e hele ai, Elua maua hookahi hoi oe e ke keiki, Aloha no oe ka lei haule a maua o ke keiki Kuu hoa hele ai ka la wela o Kona - e Hoomaha aku i ka malu niu o Waikuaaala Kuu kaikamahine mai ka malu o Helani, A he lani nui ke aloha na'u e lia mau nei, Auwe kuu mea'loha o kuu kaikamahine - e. J. LOTA. He kanikau 'loha keia nou e Hariata Lota, Kuu kaikamahine mai ka pohu lai o Kona, Mai ka ua nihi ae mauka o Helani, Mai ka makani wehe launiu o ka aina, Mai ka nalu haimuku la o Kaulu, Mai ka malu launiu la o Huia, Aloha wale ia wahi a kakou e hele ai e, Elua maua na makua hookahi oe ke keiki Auwe kuu kaikamahine e, kuu aloha pau ole ia oe e, Kuu kaikamahine mai ka iliili nehe la o Keauhou, Aloha wale ia wahi a kuu kaikamahine e holoholo'i Eia wahi a kaua e auau kai ai Kuu kaikamahine mai ka wai pumehana o Koalalua, O ia wai a wili pu me ke kai, Kuu kaikamahine mai ka hale hoolaunaka i na keiki, Mai na leo kupinai o ka hale imi naauao, Kuu kaikamahine mai ka makalae o Keau-hou, Mai ke kai leo nui o Haikaua, Kuu kaikamahine mai ke a maka uliuli o Kona, Mai ka bele kuilua o Helani, He lani nui ke aloha na'u e hiipoi nei, E kuko ai o ka po lia i ke ao, E ake ana o kahi e ike lihi aku ai ia oe, Auwe kuu hoapili o kuu kaikamahine e, Kuu kaikamahine mai ka wai huihui o Waipunakaa, Oia wai a kuu kaikamahine e auau ai a, E walea'i i ka malu o ka loulu, Kuu hoa moa o ka poe kane ole he keiki, Kuu hoa noho o ka hale e, Kuu kaikamahine mai ka uka anu o ka aina Mai ka malu inia o Halerose, Mai ka wai huihui o Mahiwai, Oia wai anuhea a kuu kaikamahine e auau ai e, Aloha wale ia uka anu a kakou e noho'i e, Ka hoa pupuuanu o mana he kaikamahine, Ka hoa hele o maua o ka nahele, Elua maua na makua, hookahi hoi oe ke keiki, Auwe kuu lei aloha o kuu kaikamahine, Kuu kokoolua o ka hale kane he keiki, Kuu hoa hele o ka ohia loloa o Puuhinahina Oia uka anu a ke aloha i noho ai e, Auwe kuu kaikamahine, kuu minamina pau ole ia oe e, Kuu kaikamahine mai ka malu niu o Kahaluu, Oia wahi a kaua e hele kokoolua ai, Kuu hoa aukai o na keiki, Aloha wale ko leo i ka hea mai, e Mama e Kuu kaikamahine mai na kai elima, Mai ka ale kuehu o Alenuihaha, Mai ka poebele i ka nuku o Mamala, Kuu kaikamahine mai ka la wela o Honolulu, Mai ka huikau lua o ke kaona e, Akahi la a ko aloha i hiki mai ai, Ke koi mai nei ia'u e uwe, e uwe no au e, Auwe kuu kaikamahine, kuu minamina pau ole ia oe e, Aloha wale ka leo o kuu kaikamahine i ka uwe mai i ka eha, Wehe oe i ka pili hookoo me ka makua, Anuanu kuu poli ua hele oe e, Ua haalele i ka pili a kaua e, Auwe kuu kaikamahine e, kuu aloha pau ole ia oe e. A KAPAHUPIULA. He kanikau aloha keia noe e Hariata, Kuu kaikamahine mai ka pohu lai o Kona, Mai ka piha kanaka o Keauhou. Aloha ia wahi a kakou e noho ai, Pau ka makou lohe ana i kou leo, Ua haalele mai oe i ka pili aloha he makua Kuu kaikamahine mai na iliili nehe o Ke-auhou, Mai ka la hulili mai ika ilikai, Kuu hoa pupuuanu o ke kula aumoe, Moe au hoolono ana o ko leo, I ka uwe kapalili mai hoi e, [ole ia oe e, Auwe kuu kaikamahine e, kuu aloha pau Kuu kaikamahine mai ka malu niu o Kahaluu, Aloha ia wahi a kakou e hele ai, Kuu mea minamina nui hoi e noho nei, Kuu lei nani mae ole o kuu kaikamahine, Ua ahi wela paila loko i ko aloha e noho nei He aloha ke kai halana o Keauhou, Ia wahi hoi a kaua e auau ai e, He aloha ka malu o ka hale, Oia wahi au e holoholo ai ma uka ma kai, He aloha ka lau niu luli mai i ka makani, Auwe kuu kaikamahine e! Kuu kaikamahine mai ka ihu o ka moku, Kuu hoa alo ehukai o ka moana, Aloha ka hae kowelo o — ? Me he mea la e hea mai ana e hoi mai no kaua Kuu kaikamahine mai ka huikau o ka ua-po, Mai ka huikaulua o ke kaona, Mai ka la wela o Honolulu, Pale ka hoea aku e holoholo mai ana oe, Mahea hoi oe i niau hele iho nei, Ka mea poina ole a kuu manao o kuu kai-kamahine, Auwe kuu kaikamahine e ! KINI KAHOOHULI