Ka Nupepa Kuokoa, Volume XIV, Number 5, 30 January 1875 — Page 4
| This text was transcribed by: | Pualei |
| This work is dedicated to: | Apolei Kahaʻi Bargamento |
Ka Nupepa Kuokoa
KE KILOHANA POOKELA NO KA LAHUI HAWAII.
Ka Nupepa Kuokoa
Ka Papa Kuhikuhi Manawa o na
mea Kaulana o Hawai nei.
Ka Mookuauhau a he Papa Hoomanao, i na mea Kaulana o na Moolelo o Hawaii nei.
1822 Pae mai o Mr. Kaeleiki Ap.
1822 Hoomakaia ke Pai palapala ma Hawaii nei.
1822 Mare o Hopu me Delia ma Honolulu Aug. 11
1823 Hoi mai o Kaahumanu mai Hawaii mai Ian.
1823 Pae mai ka lua o ka poa Misionari Ap. 27.
1823 Make o Keopulani Sep. 16
1823 Holo o Liholiho I Kamehameha II me Kamamalu Kana ʻ lii wahine i Enelani Nov. 26
1824 Make o Kaumualii Mei. 26
1824 Make o Kamamalu, ma Ladana, Iur. 8
1824 Make o Liholiho I, i Ladana Iur 13.
1824 Ao nui ko Hawaii nei i ka olelo a Ke Akua
1824 Kipi o Humehume ma Kauai Aug 8.
1825 Pae mai o Poti me na kupapau o na ʻ lii. Mei 4.
A noho o Kaahumanu i kahu malama aupuni a hala elua na makahiki paha, ua hookohu ia o Kamehameha III. Iune 6.
1825 Kolohe ke kane a Leoiki ma Lahaina Oct. 7
1825 Make ka moku ma Lanai. Dek.
1826 Komo ana i ka Halepule ma Kailua Sep. 22
1826 Kolohe ka moku kialea i ka hale o Kalaimoku
1826 Make o Kahaleia
1827 Kipu ana o Kapena Pa@ ma Lahaina. Oct 27
1827 Make o Kalaimoku. Feb 8.
1827 Mare ia o Kinau me Kekuanaoa.
1828 Pae mai ke kolu o na Misionari Mar. 30.
1828 Homakaia ka Luakini pohaku ma Lahaina.
1828 Make o Keeaumoku. Mar. 23.
1829 Komo ana i ka Halepule ma Honolulu. Iur.
1829 Kaua ma Kauai a make o Kiaimakani. Sep.
1829 Holo o Poti ma a nalowale.
1829 Make o Pia.
1830 Kaapuni o Kaahumanu ia Maui me Hawaii.
1830 Hanau o Lota Kamehameha Dec 11.
1831 Make o Naihe.
1831 Hoomakaia ke Kula Nui o Lahainaluna.
1831 Pae ma ka ha o na Misionari.
1831 Kukuluia ka Papu o Lahaina.
1831 Hookukeia na kahunapula Katorika e na ʻ lii e haalele ia Hawaii nei.
1832 Make o Kaahumanu. Iune 5.
1832 Pae mai ka lima o na Misionari
1832 Komo ia ka Halepule ma Lahaina. Mar.
1832 Hoomaka ana o ka haunaele ia Kaomi. Sep.
1833 Hoi o Kuakini i Hawaii, a noho Kinau ma ka Papu o Oahu.
1833 Pae mai ke ono o na Misionari.
1834 Hanau ka Moi Alexanedero Liholiho. Sep. 2.
1834 Make o Kamanele.
1834 Make o Keola.
1835 Hanau o Lunalilo. Ianuari 32.
1835 Mare o Nahienaena me Leleihoku.
1835 Pae ma ka hiku o na Misionari.
1836 Hanau ka Moiwahine Ema. Ian. 2
1836 Make o Nahienaena
1836 Hookumuia ke kula Nui kaikamahine ma Wailuku Maui.
1836 hanau o D. Kalakaua. Nov. 16.
1837 Puhi ia ka hae ma Kalamakini.
1837 Homaka ka hana ana i na alanui ma Honolulu.
1837 Pae mai ka walu o na Misionari.
1837 Hoomaka ia ke kula wae o Laimana ma Hilo.
1837 Hoi hou mai na kahuna Pope; a hoole hou na ʻ lii i ko lakou noho ana ma Hawaii nei. Ap. 17.
1837 Popoi mai ke kai nui launa ole ma Hawaii nei. Nov. 7.
1837. Holo aku o L. Makale ma i ka aina e Nov. 23.
1838 Hoomakaia na ʻ lii e ao i ke kalaiaina.
1838 Hanau o V. Kaahumanu Kamamalu Nov. @
1838 Huli mai na kanaka o Hawaii nei i ka pono.
1839 Hiki mai ka moku Lupelaka.
1839 Make o Kinau. Ap. 4.
1839 Make o Kaikioewa. Ap. 12
1839 Lilo o Kekauluohi i Kuhinanui. Iune 8.
1839 Pai mua ia ka Baibala ma Hawaii nei Mei. 8
1840 Hoomakai ke kula no na ʻ lii Opio ma Honolulu o Cook ke kumu.
1840 Kumukanawai a Kamehameha III. Oct 8.
1840 Make o Kamanawa i @. Dec 20.
1840 Make o Hoapili kane
1841 Make o Kapiolani. Mei.
1841 Pae mai ka iwa o na Misionari.
1841 Hoomakai ke Kula Nui o Kapunahou no na keiki ao i ka olelo Beritania.
1842 Make o Hoapili wahine.
1842 Holo o Haalilio ma e imi i ke Kuokoa Iur. 8
1843 Ka ae ana mai o Amerika i ke kuokoa o Hawaii nei.
1844 Make o Haalilio.
Ka ae ana mai o Belegiuma i ke kuokoa o Hawaii nei. Mar. 26.
1844 Ka ae like ana mai o Beretania laua Farani i ke kuokoa o Hawaii nei.
1845 Make o Kekauluohi
1845 Pae mai o Mr. Likeke me ke kupapau o Haalilio.
1846 Hoi o G. L. Kapena i Kiaaina no Hawaii Nov. 27
1846 Hoonohoia ka poe koona kuleana aina Feb.
1847 Make o Likeke Nov. 7
1848 Make o Leileiohoku, o Mose, me Kaiminaauao.
1849 Ke kolohe wale ana o ka Farani i ka Papu o Honolulu.
1851 Kukulu ia ka Hale Hookolokolo ma Honolulu Iune.
1852 Make o Kaliokalani. Ap. 22.
1853 Luku ia keia lahui e ka mai Hepela.
1854 Wawahiia ka Papu ma Lahaina.
1854 Make ka Moi Kamehameha III. Dek. 15.
1855 Make o A. Paki. Hanau o Leleiohoku Ianuari. 10.
1855 Make o Mr. Hikikoki.
1856 Mare ka Moi Kamehameha IV, me Ema, Iulai 2.
1856 Mare o J. Aikake me Luka Keeliikolani.
1857 Wawahiia ka Papu o Oahu.
1857 Make o L. Konia.
1857 Make ka mea kiekie Keoni Ana.
1857 Make o William Lee.
1857 Holo aku o Limaikaika i Amerika Huipuia.
1857 Holo aku o Rev. A. Kaukau i Fatuhiwa.
1857 Hanau o ka Haku o Hawaiii. Mei 20.
1840 1852, 1855, 1867 Ka hu wale ana o na ahi Pele ma Hawaii.
1852 Hooponopono hou ia ke Kumukanawai a Kamehameha III
1859 Kukalaia o Kamehameha IV i Moi. Novemaba.
1859 Make o J. Piikoi (o Kinau). Ap.
1859 Hoopuka mua ia ke Kanawai Kiwila Iulai.
1859 Hanaia ke kukui mahu ma Honolulu Sep.
1860 Make o J.W. Maikai Ioane Mei 27.
1860 Kukuluia ka Hale Dute hou ma Honolulu Mar.
1860 Kukuluia ka Hale Dute ma Lahaina Feberuari.
1860 Kukuluia ka Hopitala o ka Moi Wahine ma Honolulu Iulai 25.
1861
1861
1862 Make ka Haku o Hawaii.
1863 Make ka Moi Kamehameha IV. Iloko o na makahiki 29 me 9 malama me na la 21 ma Nov. 30.
A noho ʻ lii iho la o Kamehameha V.
1864 Hookahuli o Kamehameha V., i ke Kumukanawai a Kamehameha III o ka A.D. 1852.
1864 Make o L. Haalelea.
1865 Kamaikui (w) a me Kapaakea make Nov.
1866 Make o Vitoria Kamamalu.
1867 Make o Robisana.
1868 Make o M. Kuanaoa.
1869
1870 Make o H.K. Kalama
1871
1872 Hooholo ka Ahaolelo no ka Hotele dala nui $116000.
1872 Hanaia ka Hale Aupuni hou.
1872 Make o Kamehameha V. Dek. 11.
1873 Ianuari 1. Koho Palota ka Lahui Hawaii ia Lunalilo 1253 o na p ʻ lota
1873 Koho ka Ahaolelo ku i ka wa ia Lunalilo i Moi. Ianuari 8.
1873 Poniia ma ka Halepule o Kawaiahao Ianuari 9.
1873 Ka huakai mua a Lunalilo a noho ma Kailua no ka mai.
1873 Hoi mai ka Moi Lunalilo mai Hawaii mai.
1874 Make ka Moi Lunalilo ma Honolulu Feb. 3, hora 8 me 59 minute.
1874 Akoakoa ka Ahaolelo ma Honolulu a koho ia o Kalakaua i Moi ma ka palota ana; Kue kekahi poe makaainana, a eha na
Lunamakaainana he 13 ko lakou nui 39 palota Feberuari 12.
1874 Hoohikiia ka Moi Kalakaua ma Kinau Hale no ka haunaele Feb. 13.
1874 Hoolahaia o W.P. Leleiohoku i Hooilina Mai a i keiki Alii ka mea kiekie. Feb. 14.
1874 hookiekie ia o P. Nahaolelua i Kuhina Waiwai, o J.M. Kapena i Kiaaina no Maui.
1874 Ka huakai mua o ka Moi D. Kalakaua i Kauai i ke Au o kona noho Alii ana. Feb. 16.
1874 Hoi mai ka Moi Kalakaua mai Kauai mai.
1874 Holo ka Moi Kalakaua i Hawaii Mar. 30. Ku i Lahaina Mar. 31, ku i Hilo Ap. 1, a i Kau, Kailua a Kawaihae a hiki i
Kohala Ap. 7. Hiki i Ulupalakua i la 10 i na wai eha Ap. 13. Mai na wai a i Lahaina; mai Lahaina a i Pukoo, a Kalawao,
hiki hou i Honolulu Poalua Ap.
1874 Kaapuni ka Moi D. Kalakaua ia Oahu Ap. 20.
1874 Ka Ahaolelo mua o ke Au o Kalakaua Ap 30.
1874 Make o Williama Hoapili Kaauwai Aperila.
1874 Make o G.W. Lilikalani Ap. 16.
1874 Make o Lonoaea kekahi o na Lunamaainana i hoeha ia ma ka la koho Moi.
1874 Make o Miss Ogana 88 mak. Ap.3.
1874 Hooholoia ka Pila puhi Rama Iune.
1874 Aie dala nui 1 miliona Iune.
1874 Ka hoowahawahaia o ka nupepa P.C. Advertiser e ka poe pono ke noho Luna Aupuna ma hawaii nei iulai 3.
E. HELEKUNIHI.
HANA Iulai 1874.
Let the good angels come in
Fresh Laurels p 122.
1.
Ke ke a kokoke na anela maikai
E kai i ka nani mao;
Wehea ka puka, e na kamalii,
I komo iloko lakou,
Na Iesu lakou la i hoouna mai
E Kiai maikai ia kakou;
A moe kakou la lakou na kiai
A moe a malu a ao.
Cho.- Komo mai e, komo mai e,
Na anela maikai, komo mai;
Komo mai e, komo mai e,
Komo na anela maikai;
E ko-mo Na-anea-la maikai
2.
He poe hoolu a hookupea mai,
He poe kokua a mau,
A lohe a kai i na pule oonei
I luna imua o Iesu.
E ae la e komo ia poe maemae e,
He launa maikai ko lakou,
A hai i na mele i pa maluna ' e,
Na mele maikai ia Iesu,
Cho.- Komo mai e, komo mai e, &c.
3.
Ae, ae, ke ae ae la e komo makou
A launa pu me na pokii,
Ke ae nae oukou la e haalele ae
Na ino, na hana kue,
A noho aloha a pane maikai,
A kula a hai pololei,
A pili a mau i ka Haku Iesu,
A pau ae na hua wahahee.
Cho.-Komo mai e, &c.
HAWAII.
Love for Jesus.
Fresh Laurels, p 22.
1.
Aloha au ia Iesu,
Inoa maikai e
A lakou ma ka lani
E mele nani nei,
Ma ona kuu paulele,
Kuu oli nui ae,
II : A nona no kuu mele,
A nana i ao mai :II
Ref.-Iesu, Iesu, Iesu, Inoa nani,
Inoa maikai, maikai,
Inoa nani e.
2.
Aloha au ia Iesu,
Inoa maikai e,
Ke ala au, a moe,
Nona kuu hoomaikai.
Kau kuu manao ia Iesu,
Kau hoa makamae,
II : Ke kula, ke paani,
Ke hele, ke maha'e. :II
Ref. -Iesu, Iesu, &c-
3.
Aloha au ia Iesu,
Inoa maikai e;-
E mau kua hana nona,
E mau kuu mele ae.
Aloha mai no oia,
A lilo oia no'u,
II: I mohai kala hale,
I ola mau loa au. :II
Ref.-Ieus, Iesu, &c -
HAWAII.
HAAWINA KULA SABATI
HELU 8. SABATI, FEB. 21.
KUMUHANA - Ka aina hooilina o Kaleba.
PAUKU BAIBALA, Iosua 14; 6-15.
6 ¶ Alaila hele mai la ka poe mamo a Iuda ia Iosua la ma Gilegala ; a olelo ae la o Kaleba ke keiki a Iepune no Keneze penei, Ua , ike no oe i ka mea a Iehova i olelo mai ai ia Mose ke kauwa a ke Akua no'u a nou hoi ma Kadesabanea.
7 He kanaha makahiki ko'u i ka wa i hoounaia mai au e Mose e ke kauwa a Iehova mai Kadesabanea mai e makaikai i ka aina ; a hoike aku au e like me ia iloko o ko'u naau.
8 Aka, o ko'u poe hoahele, ka poe i pii pu me au, honawaliwali lakou i ka naau o kanaka ; owau ka i hahai oiaio mamuli o Iehova o ko'u Akua.
9. Ua hoohiki o Mose ia la, i ka i ana ae, He oiaio, o ka aina a kou wawae i hehi ai, nou no ia,a no kou poe mamo no hoi kekahi i hooilina mau loa, no ka mea, ua hahai oiaio oe mamali o Iehova o ko'u Akua.
10 Ano, aia hou, e like me kana olelo ua malama mai o Iehova i ko'u ola ana, i keia mau makahiki hookahi kanaha a me kumamalima mai ka wa a Iehova i olelo mai ai i keia mea ia Mose, a i auwana ai ka Iseraela ma ka waonahele aia hoi, i keia la, elua o'u kanaha makahiki a me kumamalima.
11 A ua ikaika au i keia la, e like me au i ka la a Mose i hoouna mai ai ia'u : me ko'u ikaika ia manawa, pela ko'u ikaika i keia wa, no ke kaua, a no ka puka ana iwaho, a me ke komo ana iloko.
12 Ano, e haawi mai ia'u i keia mauna, ka mea a Iehova i olelo mai ai i keia la; no ka mea, ua lohe oe ia la i ka noho ana ilaila o ka poe Anakima, a ua nui ko lakou mau kulanakauhale, a ua paa i ka pa; ina e kokua mai o Iehova ia'u, e kipaku auanei au ia lakou i waho i like me ka olelo a Iehova.
13 Alaila, hoomaika mai o Iosua ia ia, a haawi anei ia Kaleba ke keiki a Iepune ia Heberona i ainahooilina nona.
14 No ia mea, ua lilo o Heberona i ainahooilina no Kaleba ke keiki a Iepune no Keneze a hiki i keia la, no ka mea, ua hahai oiaio oia mamuli o Iehova ke Akua o ka Iseraela.
15 O ka inoa o Heberona mamua, o Kiriatareba no ia; he kanaka nunui [o Areba] no ka poe Anakima. A hoomaha iho la ka aina i ke kaua.
PAUKU GULA. "Ina e hookauwa kekahi na'u, e hoomaikai ka Makua iaia." Io. 12:26.
MELE "What must it be to be there."
Leo Hoomana p 16.
1 Ua haina, ua lohe kakou,
He aina laelae maluna'e;
A oli, hauoli pu no,
A ake e ike maka ae.
Cho.- A ike maka'e, oli e,
A ike maka'e, oli e;
E oli a mau ma ka lani me Iesu;
A ike maka'e, oli e.
3 Ua haina he maha mao,
Ua pau ae ka lulu, ka uwe,
Na hewa na mea o nou;
A ake a ike maka'e.
Cho.-A ike maka'e e oli e &c.
PULE i lilo kakou a pau i mau hooilina no ka aina maikai ma ka lani. &c.
NA NINAU A NA KUMU.
P I. Alaila, &c He mau makahiki mai ka wa i haalele ai kakou ia Iosua ma ma ka mauna Ebala &c. Mok. 8:30-35, a hiki i keia pauku. Nui na kaua a Iosua ma me na enemi me ka lanakila no. Hai mai i kekahi kaua nui a kupanaha, oi hoi ka hui ana o na alii he nui me Adonezideka, e kaua aku i ko Gideona. Heaha ke kumu o keia kaua? A kii ko Gideona ia wai e kokua? I ke kokua ana o Iosua ma, ua anakila anei oia? Owai ka i kokua ia Iosua ma? Mok. 10:10,11. Heaha ka pule a Iosua i ka la, me ka mahina? Ko anei ka pule? 10:12-14. He mau kaua no mahope. Apau ke kaua, a malu iki ka aina, heaha ka hana mahope? Ka mehele ana i ka aina e like ma ke kauoho ma Nahelu 26:52-65. Ma ke aha ka mahela ana? Heaha ke ano o ka hailona? Owai na ohana ma ka hikina o Ioredane? Owai hoi ma ke komohana? Owai ka i hoopii ia Iosua no ka iana hooilina ao Kalepa? mok. 14:6. Heaha ka Kalepa olelo? Mahea o Mose ia wa? Nahelu 14:24,30. 32:12. Kanawailua 1:36, 38.
P7 Ehia o Kalepa makahiki i ka wa hea? Mai hea aku? A hoi mai hoike oia pehea? Nahelu 13: 1-6, 30.
P8 Pehea na hoahele o Kalepa? Nah. 13:31, 32.
P9 Pehea ka Mose hoohiki no Kalepa? No ke aha?
P10, 11 Ehia makahiki mailaila mai? Ehia makahiki a pau o Kaleba? Pehea kono ikaika i keia wa elemakule?
P12 Heaha ka Kaleba noi? Owai malaila? He poe aha na Anekina? A pehea ko lakou mau kulanauhale? A ma ke aha oia e hoopau ai, a e kipaku ai?
P13-15 Pehea o Iosua? He aha kana i haawi aku ai ia? Mahea Heberona? No ke aha? Owai ka inoa mua o Heberona? Kinohi 23:2. Nohea ia inoa? A aha ka aina? Pehea ka hoopili ana?
MELE the Land beyond the River. Hae Hoonani p 27.
1 He aina nani kamahao,
Mao, mao, maluna;
Uli na awawa me na puu,
Mao, mao, maluna.
Ane hoea mai la
Ko laila kahakai la,
Me kona ao laelae la,
Mao, mao, maluna
Cho,-E hoe kakou, E hoe a mau,
Kokoke pau ka ino,
A komo i ke awa a ka
Ma ia kahakai olino.
4 A ku ma ko Ziona puu
Mao, mao, maluna;
E mau na oli o kakou
Mao, mao, maluna;
A me na rila lani
E mele a hookani
A mau no ka hoonani
Mao, mao, maluna.
Cho.-E hoe kakou, E hoe a mau, &c.
NA NINAU A KE KAHU.
NA KANE. Haalele kakou ia Iosua ma e aha ana? A pau ia hoohiki ana ua aha lakou? Ua hele hou i ke kaua. A hoohiki kakou e malama ia Iehova heaha ka pono? Nui anei na kaua, nui anei na makahiki i kaua ai? Pehea ka aoao enemi, aole anei makau a moi ia Iosua ma o kuikahi pu me lakou? Ke kulanakauhale hea kai noi pela? A ua ae ia anei? A heaha ka hope o keia ae ana? A pilikia loa ko Gibeona, hoopii lakou ia wai? No ke aha ka hoopii ana ia Iosua?
NA WAHINE. Ua ae anei o Iosua ma e hele e kokua i ko Gibeona? Ikaika loa ke kaua ma na aoao elua, ma ko wai aoao ko Iehova kokua ana? Me ke aha mai ka lani mai ko Iehova hoauhee ana aku me ka luku ana i na enemi. Pomaikai ka poe hewa i kekahi manawa no ka huipu me wai? Pomaikai anei lakou ma ka hookolokolo ke huipu me ka poe pono? Aole paha.
NA KEIKIKANE. Hai mai i ko Iosua olelo i ka la ame ka mahina. mok. 10:12 Ua hookoia anei? Nawai i hana a kau ka la me ka mahina ma ka lani? He mea hiki ole anei i ke Akua? he kaua hoi ko oukou i na enemi, ina hewa ia Satana ma, nawai e kokou i lanakila?
NA KAIKAMAHINE. I ka pau ana o na kaua, hoomaka Iosua ma e puunene i ka aina i lilo ia lakou, iaia i puunene ana. owai ka i hoopii i aina hoolina nona? Owai Kaleba? Heaha kana hana mua i kumu kumu no kei hoopii ana? Oia kekahi kiu maikai i hele e makaikai i ka aina. Nahelu 13:6, 25, 30. Owai ka aina i haawiia nona? Heaha Heberona mahope? He kulanakauhale puuhonua. he aina hooilina ma ka lani, pehea la oukou e hana'i i loaa ia aina ia oukou?
NA POKII. Owai ke kanaka maikai ma keia Haawina? Heaha kana hana maika? Hoike maikai oia no Kanaana. Owai kona kokoolua? Iosua. Heaha ka uku i loaa ia Kaleba? he kulanakauhale maikai o Heberona. Nui na pono ma keia ao, oi nui nae na pono ma ka lani. Pehea la e hiki ai ia oukou ke hele a huipu me Kalepa ma ka lani?
NA KUMU. Nowai ka nui o na aina i kea? Ina no Satana, heaha ka oukou hana? Ehoohalike me Iosua ma ke aha? Ahea pua ke kaua a hoomaha? He mau haumana ka oukou, he mau Kaleba anei lakou a hiki ke hoopii ia Iesu i aina hooilina no lakou ma Kanaana hou? Ina aole heaha ka pono?
MELE "Owai no Iesu." Leo Hoomana p 19.
1 Ala a holo, paipai Iesu,
Owai ke ae e huipu?
Owai ke ala a holo no,
A imi i na oli mau?
Cho.- Ku ku no Iesu, Ku ku no Iesu;
Ku, ku a kai i kona hae;
Ku, ku no Iesu, Ku, ku no Iesu,
Ku, ku a kai i kona hae.
(E mele pu i ka pauku.)
PULE i ku a hahai kakaou a pau ia Iesu a lilo i mau hooilina pu me ia no ka waiwai ma ka lani.
HAAWINA KULA SABATI no Feb. 28 Iosua 18:1-10. PAUKU GULA. Halelu 16:6.
HAWAII
He hoomaloka i huli mai.
He hoomaloka paakiki loa keia, e hoole ana aole Akua, aole lani, aole po. Olelo hooino oia i ka poe haipule, a me Iesu Kristo.
He wahine haipule kana. Ua noho pu a nui na makahiki. Ua loohia ka wahine i ka mai nui, a kau ka make maluna iho ona. Ia ia e make ana, kahea oia i kana kane a olelo; "E Kimo, ua pule au nou no na makahiki he nui. E ae mai oe ano, e lilo i kanaka haipule, a e hoomakaukau e noho pu me au ma ka lani." Ua hoolohe no ke kani i keia noi ana, aole nai oia i ae. Holo aku la oia mai ka wahine aku, a make iho la ka wahine, a paa no ke kanie iloko o ka hoomaloka.
He kaikamahine hookahi ka keia kane, o Alice kona inoa. he kaikamahine haipule no, e like me kona makuahine. He nawaliwali no kona, he pua rose e mae koke ana. A kokoke oia e make, lawe oia i ka lima o ka makuakane, a olelo hawanawana, "E kuu makuakane, aloha au ia oe, a ua pule au nou. Pele hoi kuu makuhine nou. E ae mai oe, ano, e hoomakaukau e hele e noho pu me maua ma keia hope aku. Pehea la e hiki ai ia'u ke haalele ia oe, ke ae ole oe i keia?" Aole nae oia i ae. Hoole loa kona nnaau paakiki. Ua kaumaha loa nae oia no ka make ana o ke kaikamahine, a a ne nahae ka naau.
Nalu iho la oia, "ina no he Akua, no ke aha la oia i hoonele mai ia'u?'
Nalo aku la ke kupapau o Alice me ko ka makuahine. Hoi mai la ka makuakane i kona hale. Mehameha lua ole ka hale. Paumako ka naau. Lilo loa oia i ke kaumaha. Ua paapu wale ae mea a pau o keia ao i ka pouli. Aohe mea iki e lana ai ka manao. Ninau oia iloko ona, He lani io anei? He haipule io anei?
I kekahi ahiahi, e maalo ana oia ma kahi i hele pinepine ai kana wahine me Alice no ka pule; koi ikaika ko loko ana e komo iloko. Ke ae no ia e komo. ia ia i komo ai, e himeni ana lakou i ka himeni e hoomaka ana--
"E Iesu ka mohai no,u"
Ka himeni ia i himeni ia ma ka hoolewa ana ia Alice, e like me kana kauoha.
Hoolohe pono oia i ke mele ana. A olelo iloko ona, He oiaio no, e make ana au. Heaha la ka'u e hana ai? I na e hoi hou mai Mele me Alice, e pule laua no'u. E pule paha au no'u iho. E noi paha i keia poe haipule e pule no'u. Ane pau ke mala ana, a ku ae oia a olelo. E na hoa, ua ike oukou ia'u, he kanaka hewa. Ae, he kanaka hewa loa au, e pono ia oukou ke pule no'u. Noi mai ka'u wahine, me ka'u kaikamahine Alice, a ae au e hoomakaukau e hui pu me laua ma ka lani. hoole nae au. Aka, ano, ke ai nei au imua o ke Akua, a imua o oukou hoi, e imi ia Iehova. E pule oukou no'u. Ua pule paha oukou no'u mamua; Aka, no ke aha i hele ole mai ai kekahi o oukou, paipai mai ai'u, mahope o ka make ana o Alice? Makau anei oukou i ka'u mau olelo hooino? Aole pono ke makau. Nui ka hooino ia o Iesu no kakou. Aole nae oia i makau.
Ka hina iho la no ia o keia kanaka hoomalaka, a hiki ole ke olelo hou, Hele no ke kahunapule, a kukuli pu me ia. A lilo na haipule a pau i ka uwe mei me ka wai maka; a pule ikaika nona i ola oia. Kona huli mai no la ma ka pono, a nui hoi na mua huli pu ma kona kaona.
HAWAII
HUNAHUNA MEA HOU
Me he mea la i ka nana aku, e hoihoi mai ana ka Ahaolelo e Amerika Hui i ke dute maluna o ke ti lau a me kope, i keia Kau Ahaolelo.
Ua kokoke e pau pono loa ka ke Kuhina nui Fish a me ka na Komisina Hawaii hana no ka hooponopono ana i ke kuikahi panailike mawaena o Amerika a me Hawaii.. E makaukau ana no ka hoouna aku iloko o ka Ahaolelo mahope koke iho o ka pau ana o na la hoomaha, aka, e auaia ana nae paha ka noonoo ana, a hiki i ka wa a ka Moi e haalele iho ai ia Kapalakiko no ka hoi aku i kona home mokupuni.
Ua hiki ka lono i ka Hale Nana La o Ladane mai ka poe nana hoku Amerika ae ma Nu Kilani, ua holo pono ka lakou ha kilo ana ia Hokulua; ua 237 mau kii i hooleleakaia ma ka manawa pokole o ka ike mua i ana aku o Hokuloa ma ke kaekae maluna o ka La.
Ua hoole o Enelani, aole e komo aku iloko o ka Ahaelele a rusia e manao nei e kukulu, no ka noonoo ana i kekahi kanawai lahui no ke kaua.
Ua hiki aku i Ladana ka lohe no ka pau ana i ke ahi o kekahi moku lawe kanaka e laweia ana mai Enelani a i Nu Kilani, oiai e holo ana ma ka moana. He eha haneri kanaono ka nui o na ola i poina, a o ka moku a me ka ukana, aohe mea lawe.
Ke Kuokoa no 1875.
E ike auanei wa kanaka a pau, maui Hawaii a Kauai, ma keia, ke hoike aku nei au, e hoomauia aku ana no ke pai ana o ke KILOHANA POOKELA O KA LAHUI HAWAII i ka makahiki 1875; a e hoounaia ana na pepa i ka mea a mau mea i uku mua wale no maloko o ke ope a ma ka wahi pakahi paha e like me ka makemake o ka mea i hookaa mai. O ka uku nupepa o ka makahiki, e mau ana no ia e like me ko keia wa, he Elua Dala wale no! ma ka kuike nae, oia ka rula. Kii Makana o Kamehameha 1!
No ka poe hookaa mua iloko o Ianuari, he Elua Dala o ke kope no ka makahiki, e haawi makana wale aku ana makou i ke kii o ka Nai Aupuni Kaulana KAMEHAMEHA I. Aia ma Nu Ioke kahi i hoomakaukauia ai a nani loa, aka, e hiki mua mai ana maanei mamua o ka hoomaka ana o ka makahiki hou. Aole loa e hoounaia'na i kekahi mea ina aole i hookaa mai, aole hoi i kekahi kaoha me ke dala pu ole mai.
E hoomaopopo ka poe lawe nupepa, ina aole e ukuia kekahi nupepa e hoounaia ana mamua iho o ka la 1 o Feberuari, alaila, e hoopaaia ana ia pepa me ka hooloihi ole. O ko makou rule keia i lohe ka lehulehu, no ka mea, aole e hiki iamakou ke pai i na nupepa me ko oukou uku ole.
E hoonaniia ana ka pepa me na wehewehe manao maikai, naauao, nu hou o na Aina e, na nu hou kuloko, na palapala ano naauao, na kaao a me na mea ano like. E hooikaika ana makou e oi ae ko keia makahiki mamua o kela i hala. A oiai hoi, e hoihoi ia mai ana ia makou ka hooponopono o ke Aoao 4 ma ka la 1 o Ianuari, nolaila, ke manao nei makou, e nui loa ana na mea heluhelu i keia makahiki 1875 no, a e makepono ana ke dala ke lilo no ka ai a ka noonoo.
Ke paipaiia aku na na Luna a me ka poe Lawe Kuokoa, o keia makahiki 1874, e hookaa mai i ko lakou mau koena aia i keia manawa me ka hookaulua ole, o nele auanei lakou i ka nupepa ole no ka makahiki hou.
H. M. WINI,
Luna Hoopuka.