Ka Nupepa Kuokoa, Volume XIV, Number 6, 9 February 1875 — Page 4

This text was transcribed by:	Kawena Komeiji
This work is dedicated to:	Winifred Kapukini Ching

KA NUPEPA KUOKOA, ME KE AU OKOA I HUIIA.

Ka Nupepa Kuokoa.

HE HIMENI!

Children's Rallying Song.

Silver Song. p. 8

Ala, ala, na kamaiki

Ala a hoomakaukau;

Ala, hui ma ka bana,

Bana nani o Iesu

O oukou na koa ona,

Hui, hui, oli pu;

Naue like, naue aku

I ka aina ao mao.

Cho. Ala, ala, hui oli pu kakou

A e naue pu iluna

I ka aina ao.

Ala, ala, na kamaiki,

Hui mai ka poe lalau;

Laula kahi waena konu

Ma ke aupuni o Iesu -

Komo a hoopiha pono,

Makemake ia oukou;

Komo, komo, naue like

I ka aina ao mao.

Cho. Ala, ala, hui oli pu kakou, &c.

Hui, hui na kamaiki,

Ma ka bana o Iesu;

Paio, paio i na ino,

Hui mai a naue pu -

Naue, naue i ka lani,

Kahi o ka poe maemae,

Hui me ia kini nani

Ma ka aina maluna'e.

Cho. Ala, ala, hui oli pu kakou, &c.

HAWAII.

HAAWINA KULA SABATI

HELU 8. SABATI, FEB. 14

KUMUHANA - Ebala me Gesirima

PAUKU BAIBALA, Iosua 8:30-35.

30 Alaila, hana iho la o Iosua i kuahu no Iehova, no ke Akua o ka Iseraela ma ka mauna ma Ebala,

31 E like me ka Mose, ke kauwa a Iehova i kauoha mai ai i na mamo a Iseraela e like hoi me ka mea i palapalaia iloko o ka buke o ke kanawai o Mose, he kuahu pohaku i kalai ole ia; aole hoi i kauia ka hao maluna iho. Kaumaha aku la lakou maluna iho i na mohaikuni ia Iehova, a kalua iho la i na mohaihoomalu.

32. Palapala hou iho la ia malaila, ma na pohaku, i ke kanawai a Mose, ana i palapala ai imua i ke alo o na mamo a Iseraela.

33 Ku mai la ka Iseraela a pau, a me na lunakahiko, a me na alii, a me na lunakanawai o lakou, ma keia aoao a ma kela aoao o ka pahu, imua i ke alo o na kahuna o na mamo a Levi, ka poe i lawe i ka pahu berita o Iehora, o ka malihini a me ke keikipapa: o ka hapalua o lakou ma ke alo o ka mauna Girizima, a o ka haplua ma ke alo o na mauna Ebala; e like me ke kauoha mua ana mai a Mose, ke kuwa a Iehova, e hoomaikai lakou i kanaka o ka Iseraela.

34 A mhope iho heluhelu iho la ia i ka olelo a pau o ke kanawai, o ka hoomaikai ana a me ka hoino ana, e like me na mea a pau i palapalaia ma ka buke o ke kanawai.

35 Aole i koe kekahi o na olelo a pau, a Mose i kauoha mai ai; ua pau i ka heluheluia e Iosua, imua o ke anina a pau o ka Iseraela, a me na wahine pu a me na kamalii, a me na malihini i hele pu me lakou.

PAUKU GULA. "Ua wai aenei au imua ou i ke ola a me ka make, i ka pomaikai a me ka poino." Kanawailua 30:19.

MELE Him. 195, 8-6 Leo.

3 Ke waiho nei ka lani mau

Imua o oukou;

Gehena hoi, ke waiho pu,

Mahea la ka manao?

4 Mahea oukou e koho ai?

Na makamaka e,

Ma ko ka lani pomaikai?

Ma ko ka po anei?

PULE no na haumana, i noonoo pono a nana pono i na mea elua e waiho ana imua o lakou, ke ola, ka make, ka lani, Gehena, e koho pono ano, e koho i ke ola, aole i make.

NA NINAU A NA KUMU.

P 30. Alaila; Ma keia Sabati, ua lohe kakou i ka lanakila ole o ka poe Iseraela, ke kumu, oia hoi ka hewa o Akana, ka hoopai ana ia Akana ma, ka pau ana o ko ke Akua huhu, a huli hou e kokua i ka poe Iseraela. A ma keia mokuna 8, kena ke Akua ia Iosua e hele a kaua hou aku ia Ai, &c. p1,2. Hoolohe no Iosua a ala a hana me ka noonoo, me ka maalea, a hele aku i ke kaua, &c., p 3-8. Heluhelu hoi p 9-29. Heaha ka hope o keia kana hou ana aku la Ai? Lilo Ai i ka poe Iseraela, a hoohalikeia me Ieriko. Ehia tausani kai luluia? p. 25. Heaha ka mea i ae ia ai e hookoia no ka poe Iseraela? p 27. Ma hope o ka lanakila ana, ka pau ana o Ai i ke ahi, heaha ka Iosua hana? p 30. Mahea i hanaia'i? Mahea ke kauoha? Kanawailua 27:4,5.

P 31. Ehia makahiki mai ka wa a Mose i kauoha ai a hiki i ka hooko ana? Ke ano o ke kuahu, heaha? Puk. 20:24,25. Heaha ka hana maluna o keia kuahu? Kanawailua 27:6,7.

P 32. Heaha na kanawai a Mose i haawi mai ai e kakauia ma na pohaku? Kan. 27:8. Elua mahele o na Kanawai. Mahele hoopoino, mahele hoopomaikai. Na olelo hoopoino ma mauna Ebala e heluhelu ai. Kan. 27:13-26. 28:14-68. Na olelo hoopomaikai ma mauna Ebala e heluhelu ai. Kan. 27:12. 28:1-13.

P 33-35. Mai hea ka hele ana o ka poe Iseraela, na luna, na kane, na wahine, kamalii, malihini, kahuna, Levi, pahu berita? Mai Gilegala a i ke komohana akau a hiki i na mauna Ebala me Gerizima ma Samaria, 30 paha mile a oi. Owai ka mauna ma ka akau? Ebala. He mau puu wale no laua a elua Gerizima me Ebala, aole paha he 1000 kapuai ke kiekie. Owai na ohana ma Ebala? Owai ma Gerizima? Kan. 27:12,13. Na wai e heluhelu? Pehea na kanaka? E Amene lakou. He hana aha keia? He hana berita, he hana hoohiki iwaena o ke Akua, me ka poe Iseraela. Ina e mau ko lakou malama ana i ke Akua e mau ko lakou pomaikai. Ina hookuli lakou a haalele ia Iehova, e kau mai ana keia mau poino a pau. Ua mau anei ka malama? Ua hiki mai anei na poino? Na pomaikai, na poino a Iesu i hai mai'i he aha? a mahea i kakauia'i? Mat. 5:2-11. Luka 6:24-26.

MELE Mele hou, 8-7 Leo.

1 Ma ka mauna o Ebala

Na poino i hai ia'i;

Ma ka mauna Gerizima

Na olelo hoomaikai.

Pili nae ia mau poino,

Me na olelo hoomaikai

I ke ao nei, i na kino,

Pili i ke kanawai.

2 Pau ke kanawai ia Iesu,

Hiki no ke loaa mai,

Mai ka puu o Kalevari,

Na pomaikai oi ae -

Ma ka mihi manaoio,

Ola mau na uhane nei;

Mihi ole, e poino,

Make no a mau loa'e.

NA NINAU A KE KAHU.

NA KANE. I ka hale hou ana o Iosua ma e kaua aku ia Ai, ua lanakila anei? Ma ke aha? A hoopau kakou i na Akana, ua lanakila anei? A huli nui mai na kanaka kamalii, a holo pono na hana a ke Akua? Hana maalea Iosua ma i lanakila, he aha ka Iesu kauoha ma Mataio 10:16? Ua'ha ia o Ai, me kona alii? Heaha na mea i hookoeia? Nowai?

NA WAHINE. Ma ka pau ana o Ai, heaha ka Iosua i hana ai? No ke aha ke kukulu ana i kuahu, i ahu pohaku? Mahea ke kauoha? Mahea Mose ia wa? Ua lohe anei Iosua ma ia kauoha? Ehia makahiki mamua aku? Heaha ka i kakauia ma na pohaku?

NA KEIKIKANE. Pehea ke ku ana o ka poe Iseraela i ka wa i kakau ai a heluhelu ai na kahuna, na Levi, i na Kanawai? Ku kekahi hapalua o na ohana ma mauna hea? kekahi hapalua ma mauna hea? Na poino, mahea i heluheluia ai? Mahea na pomaikai?

NA KAIKAMAHINE. Mahea i kakauia'i na poino, a me na pomaikai? Kan. 27,28 mokuna. Ka heluna hea ka i oi, heluna poino, pomaikai nei? Mahea keia mau mauna Ebala, Gerizima? Ehia mile mai Gilegala aku? 30 paha? He mau mauna nui anei? Pehea ke kiekie?

NA POKII. Ma ka mauna hea i haiia mai ai na poino? Ebala. Heluhelu mai i kekahi mau poino. Kanawailua 27:15,16,18,19,26. Ma ka mauna hea i haiia mai na pomaikai? Girizima. Heluhelu i kekahi mau pomaikai. Kan. 28:3-5, 11-15. Hai mai Mat. 5:3-9.

NA KUMU. Heaha ka mea kupanaha ma keia Haawina? Ka hele ana o ka poe Iseraela i ka aina o na enemi, ia Gerizima ma me ka hoopilikia ole ia. No ke aha? Hai mai i kekahi mau poino ma Kan. 28:15 a hiki i ka pauku ehia? Ua kau mai anei keia mau poino maluna o na Iudaio mahope no ka hoolohe ole? A pehea ke hoopilikiaia i ka Lahui Hawaii?

MELE Mele hou 8-8-6 Leo Sinai.

1 He leop hoopoina e

Mai luna mai Ebala mai;

Haalulu no kakou;

He leo hoopomaikai nae

Mai o mai Gerizima mai,

Hoolana na manao.

2 Hamau! he leo maikai e,

Mai Kalevari i pa mai,

Hoolohe e ano;

Kahea ia leo kakou,

Nana, paulele ia Iesu,

A ola no a mau.

PULE hoomaikai no ka loaa ana o ka Olelo maikai a Iesu, &c.

HAAWINA KULA SABATI no Feb. 21 Iosua 14:6-15. PAUKU GULA. Ioane 12:26.

HAWAII.

Ka noho ana o na Moremona ma Laie.

Ua noho mai na Alakai o na hoahanau moremona ma ka aina o Laie, he aina houluulu wahi a lakou, ma ka la 6 o Aperila, M.H. 1865.

He aina i kuaiia e George Nebeker a me Hamana, he mau haole laua no Maunapohaku mai, i hoounaia mai e ke Kaula Brigham Young, a ua kuai aku no laua me ka ona mua nona o Laie, no na dala 14,000 ia lakou nae i noho ai ma Laie, aole nui mai na hoahanau kanaka maoli ma ia wa. Mahope iho oia mau la mai, ua kauohaia kekahi poe kanaka, he poe hoahanau o ua aoao hoomana la, - e akoakoa mai ma ka luakini o lakou, no ke koho ana ia poe i mau Lunakaahele ma na mokupuni a pau o Hawaii nei. E hele aku lakou iwaena o na kanaka Hawaii, haole, pake, &c. Me ka hoikeike pu ana aku ia lakou ma na mea e hilinaiia mai ai; oia hoi ko lakou lawelawe nui ana i ka poe mai o kela ano o keia ano, ma ke kau lima ana maluna o lakou, me kekahi mau huaolelo e papa loa ana i na uhane ino. A i keola io ana o ka mai, ina he makapaa, oopa, lo'o, &c. A o ka hilinai koke mai la no ia o kekahi poe, a babetizo koke ia iho la no ia iloko o ka wai nui, a i ke kai paha. He poe ikaika no keia ma ka hoohuli ana, no laila, ua mahuahua loa na hoahanau Moremona i keia wa. Aia ma ka hoike makahiki o lakou i ka malama o Ocatoba, ua lohe au i ka nui o na hoahanau mai Hawaii a Niihau, ua kakoke e piha ka elima tausani; a o ka poe nae e noho ana ma Laie i keia wa, ekolu haneri paha, me na alakai, ehiku ko lakou neui, me ka lakou mau wahine, a me ka lakou mau keiki. Noloko o keia poe ehiku, hookahi Peresidena no na hoahanau mai Hawaii a Niihau, oia hoi o F.A. Mitchel, oia ka mea nui nana e hooponopono ma na mea a pau e pili ana i ko lakou aoao hoomana, a me na mea a pau e pili ana i ko lakou mahiko. Eia na mea a pau i ko lakou noho ana. Aia nae malalo o ka hooponopono ana a keia Peresidena hou no na mahina 6. Ua ano kuee kekahi poe, a ano e mai na hana o keia wa. Ua maheleia ka ai a na hoahanau i kanu aku ai ma ka aina o ke Konohiki. Aole nae ia mai mua mai i ka wa o Geo Nebeker ka Peresidena mua, ua hana oia me ka oluolu i na hoahanau, nolaila, ua nui ke aloha o na hoahanau iaia. Eia kekahi, ke noho nei na hoahanau ma ka lakou la mau hana me ka hoolimalima ia, he umi dala no ka mahina, a pau ka mahina kii aku ke kanaka, aole loaa mai o ke dala maoli, he bila wale no a ohi aku la ma ka lole. Nolaila ke noho nei na hoahanau ma Laie ma ke ano ohumu, Pela iho ke ano i loaa ia'u ma ka nana ana i ko lakou noho ana. Me ke mahalo. JOSEPH W. KAHAIAO.

Laie, Oahu, Ianuari.

He oiaio anei mamuli o ka hana ka manao nui; aole ma ke dala.

E ike oukou e na hoa o'u mai ka la hiki a ka la komo i keia mau huaolelo e kau ae la ma ke poo o ko kakou kumu-manao, ua ulu mai ia mai ko'u lohe ana a me ka hauwawa nui ia iwaena o na Kumukula o ke kula kumu o Hilo nei i ka malama o Ianuari nei, a nolaila he mea pono ia'u e hoomaikeike iki aku iwaena o oukou e na hoa i hele a lae puikaika i ke akamai a me ka naauao.

He leo keia mai ka waha ponoi mai o ke Kahukula Nui ma ka Halekula hui o Hilo nei, i kona hele hope ana e ike i na kumu no ka lakou mau hana, oiai o ka la ia e manaoia ana e hoopauia ka hana. Mamua nae o kona hele hope ana mai, ua kipa mua oia i ka Halekula i ka la i hoomakaia ai ka hana, a ua pane aku imua o na kumu e kope i mau "bila hoike hana" ma ka Poakahi ae; i maopopo ai ua hookoia kona manao no ka hoohana ana i na keiki mai ka la hiki a ka la komo; malalo o kana kauoha i na Kumukula.

Nolaila ma keia hele hope ana ae a ua Kahukula Nui 'la, ua hooikaika nui loa ka ia ma ka paipai ana i na kumu, e hoko aku lakou i ka lawelawe ana i ka oihana mahiai ma ko lakou mau hale kula iho i na haumana; me ka olelo ana'ku i na kumu penei, "aole pono ia oukou e na kumukula ke manao nui mamuli o ke dala, aka, mamuli o ka hana ka manao nui ana." Ina pela io ka manaoio maoli o ke Kahukula Nui, alaila, he pono maoli no e hoemiia kona uku makahiki a mau makahiki paha, no ka mea, wahi ana, o ka hana ka manao nui ana.

No ke aha la hoi ko ke Kahukula Nui manao nui ana ma ke dala, a hooi aku i kona uku no na ka puu dala hewahewa nui launa ole? Ka inoa hoi o kana puni ia o ke dala, aole no ka hana, he hapa ka hana, o ke dala ka mea i oi, a oia ka mea e pono ai, nolaila, kaulele hou iho ana he tausani dala i uku kaahele. Ola ole a e la paha ua Kahukula nui pokeokeo la i na tausani elua, haawe hou iho ana, aia ka pono a loaa na kaakauo he miliona, i mea hoouka i kana dala, alaila, lawa ka makemake a i ole, i hakohako ae kela iluna i ka lewa, a eia kana huaolelo e pane iho ai maluna; Heaha kau? E hele koke oe! Hele pela! - aohe ai ala hana, a ia ae la keia i ka noho'na haka lewa.

Ae, akahi au a manaoio i kona puni ma ka hana, ke hele ole la a ua kupapanui ka ke dala. Pehea la ia e manao nei pela? Ua kau paona pono anei ke "Kahukula Nui Pokeokeo" i ka hana me ka uku, e ike ai oia ua emi ka uku a oi ka hana? Aole. No kona ike ua nui ka hana, nolaila, i oleha oe ai kona lehelehe, a wikiwiki i ka ae i eha tausani kona uku maoli, a i hookahi tausani ka uku kaulele, aole o kanamai ke kani hooeoe a ka manu pelehu. Nolaila ma keia makahiki aku, e hoemiia ka uku o ke Kahukula Nui manaoio puu dala nui ole.

O na kumukula, ka poe nana e hookele nei i ka nani o ke aupuni, i ka naauao, i ke akamai, ka hanohano a me na mea a pau o na lako aupuni mao na keiki la, ka hanauna mua a me ka hanauna hou e hoea mai nei, a oia iho ka mea a ke Kahukula Nui manaoio hana e waha palolo ai aohe haawi iho a nui ka uku ia lakou ana e i ae nei, "mamuli o ka hana ka manao nui aole ma ke dala." Oia ka paha ke kumu i mau ai ka uku o na kumukula i ke kanalima keneta o ka la? He mea kupanaha keia ia'u.

He poe hana na kumukula, aole i like ko lakou hana me ko he Kahukula hana. Eia nae ua hoemiia a uuku loa ko lakou uku, aole nae lakou i kioekihe au@ha i ka lakou hana no ia wahi uku omilumilu; ua hoomanawanui loa. O ka inoa ko lakou i like me ko na ao kalelewa nani e hele nei maluna ae o kakou ke kiekie, ka hanohano, a me ka mao! - he uuku nae kahi ola. Aloho ino na Kumukula.

No ke aha la hoi ke kumu o ka haalele ana a kona kaikuaana ma ka lawelawe ana i ka "Oihana L. Hoomalu" o Hilo nei, e i mai paha auanei ua kahukula nui la, no ka "manaonui mamuli o ka hana aole ma ke dala," ae, pela no kuu hoomaopopo ana iho. Akamai no hoi ka haole maka alohilohi o Tahiki, o ka hanau ana ae ia Hawaii nei.

Mai olioli loa au i kona manao ina e hoohalikeia ana kona uku ma ka hapalua dala no ka la e like me kona kumukula, ina no la ua pono, a ilaila e ikeia ai kona manaoio hana. E - o ka'u mea aiwa manao nui hana aku hoi ia o ka haole. Ua maopopo maoli no ke ano maoli o ke Kahukula Nui no kana mau hana a pau mai ka la hiki a ka la komo i lehua. Ua oki au maanei me ka mahalo. GEORGE W. AKAO HAPAI.

[Ke manao nei makou, ua lalau loa ko makou mea kakau nupepa ma ka pinana ana ma ka lapa manu ole no ka mea e pili ana i ke kanawai e hoomaamaa ana i na kamalii kula ma ka hana lima, a hoahewa wale aku i ke Kahukula nui no ka uku dala ia. L.H.]

Nui loa ka hopuhopuia ana o ka poe hana waiona, a nui no hoi ka hoopaiia Ke mahalo nei makou i keia mikiala mai.

Laikini anei? Laikini ole paha?

I kekahi halawai makaainana ma Peniselavenia, ua waihoia keia ninau imua o ka Aha. "Pono anei i keia aha, ke haawi i na laikini e kuai liilii i na wai ona?"

I ko lakou kuka ana ma keia ninau, kekahi kahunapule, kekahi diakona ekalesia, a me kekahi kahuna lapaau, ua pau lakou ekolu i ka ae - pono no ke haawi i ka laikini e kuai liilii i ka rama, no ka mea, he mea maikai ka rama, ke inu liilii; o ka inu nui ka hewa.

Hookahi wale no kanaka i ku, a hoole; aole ona makemake e haawiia na laikini e kuai i na wai e ona ai. No ka mea, wahi ana, o ka inu liilii, oia ke kumu o ka inu nui ana. Wehewehe mai oia i ka poino o ka poe inu rama, a me na wai e ona ai, a me ka poino o ko lakou poe ohana.

A kokoke mai ka wa o ka luna hoomalu e ninauai i ka Aha; ku koke mai kekahi wahine poino ma ke kihi o ke anina; he inoino kona lole; a i ka nana'ku, ua kokoke mai kona manawa. O aku la oia i kona mau lima wiwi, a hookiekie ae la i kona leo, a kauoha ae la i na mea a pau e nana mai ia ia. "Ae," wahi ana, "e nana mai oukou ia'u, a e hoolohe mai hoi ia'u." Ea! O na mea a pau a kela kanaka i olelo mai no ka inu liilii ana, oia ka makuakane o ka ona. O ka inu liilii aloha, i ka wa mai ole, he ino no ia.

E nana mai oukou ia'u. Ua ike oukou a pau, ua oi aku ka maikai o ko'u aina, i ko na aina a pau ma keia kulanakauhale. Ua ike hoi oukou, he kane maikai ka'u kane mare; a ia'u na keiki kane maikai elima, ua maa lakou i ka hana. Auhea lakou i keia manawa? Ua ike no oukou! e moe lalani ana lakou, e pili aoao iloko o ka ilina kupapau pau loa, kela mea keia mea o lakou e moe ana iloko o ka luakupapau o ka mea ona!! Ua aoia lakou a pau, he mea maikai ke inu liilii, o ka inu nui ka hewa. Aole lakou ae mai, ua inu nui, ua inu liilii wale no. Hoike mai lakou, o oe ke Kahunapule; a o oe ka Diakona; a o oe ke Kauka lapaau, oukou ka i ao mai ia lakou, aole hewa ke inu liilii; a manao lakou aole paha pilikia, ke hoolohe i keia mau kumu.

Aka, owau, ua ike au i ka poino e hiki mai ana maluna o ko'u ohana, a me ko'u waiwai. A ua imi ikaika e pale aku i ka ino e hiki mai ana, a e pepehi mai ana i ka'u kane, a me na keiki kane. Ua nonoi au, a ua pule ikaika aku au; aka, aole hiki. Olelo mai ke kahunapule, o na wai ona, na mea e pepehi ana i ka'u kane, a me na keiki kane, he mau mea maikai no na ke Akua.

O ka Diakona, ka mea e noho kokoke ana i ka awai, oia ka mea i lawe i ko makou aina, i mea e hookaa i kona mau Bila Rama, oia ka mea i kuai mai ia lakou i ka wai make. Olelo ke Kauka, he mai ke inu liilii, o ka inu nui ka hewa. Ua haule ka'u kane, a me na keiki kane iloko o ka pahele, aole hiki ke pakele; a ua laweia lakou kekahi mamuli o kekahi, a waiho ia ma ka lua kupapau o ka mea ona.

"Ea! E nana hou mai oukou ia'u! Aole paha oukou e ike hou mai ia'u. Kokoke mai ko'u manawa. Ua kauo mai au i ko'u kino nawaliwali, mai ko'u wahi home mai, e ao aku ia oukou a pau - ia oe e Diakona! ia oe hoi e ke Kumu oiaio ole o ka ke Akua olelo! Alaila, me ka leo ikaika wiwo ole, i aku la oia penei; "Aole liuliu, a e ku no au imua o ka noho hookolokolo o ke Akua - e halawai no au me oukou malaila; oukou na kumu a me na alakai oiaio ole; a e hoike kue au ia oukou a pau loa!'

Hoi koke o ua wahine poino la, - malia loa ke anaina; ua kulou na poo o ke Kahunapule, ke Diakona, a me ke Kauka.

Ninau ae la ka Lunahoomalu penei; "Ea! E haawi anei kakou i na Laikini e kuai wai ona?" Pane lokahi mai lakou, "Aole!"

Moolelo o ke Kula Ao Kumu o na Kona ma Napoopoo, Hawaii.

La hana 1. Dek, 26, hora 9 A.M.

O Rev H. Manase ke Kahu alaki o ke Kula ao kumu; a o D. Alawa ke Kakauolelo. Ua weheia na hana me ka himeni a me ka pule, mahope o ka hea inoa ana, ua hoomaka ke kula ana ma ka Helunaau mokuna 12. Ua nui ka manawa i pau ma keia Buke. Hora 12, hoomaha i hapalua hora.

Hora 1 auina la, hoomaka hou ke kula ma ke Ao Heluhelu, Haawina CXXII. E like me ka paakiki o ia Haawina, pela ka manawa i pau i ke kula ana. A ma ka hora 2 i hookuu ia ai na hana me ka himeni a me ka pule.

La hana 2. Dek. 28, hora 9 A.M.

Hoomaka na hana me ka himeni a me ka pule a Kalawaiaopuna. Heluheluia ka moolelo o ka la hana mua a aponoia. Ua kula ma ka Arimatika Mokun V. Hora 12 hoomaha i hapalua hora.

Hora 1 auina la; kula hou ia ma ke koena o ka mokuna 12 o ka Helunaau, a me ka mokuna 13, koe ka 14; me ka hoi hou ana ma ka Haawina CXXII o ke Ao Heluhelu.

Na Haawina o ka la 29. Arimatika, koena o ka mokuna V a me ka mokuna VI Hoikehonua, ma ka Mahele 1, Haawina 1, 2, 3. Hookuuia na hana me ka himeni a me ka pule a Kalaukoa.

La hana 3. Dek. 29, hora 9 A.M.

Weheia na hana me ka himeni a me ka pule ana a ke kahu, Mr. Manase. Heluheluis ka moolelo o ka i hala a aponoia. Hoomaka ke kula hou ana i ke koena o ka mokuna 5 a me ke 6 o ke Arimatika. Hora 12 hoomaha i hapalua hora.

Hora 1 auina la. Hoomakaia na hana me na ninau kuwaho. Hoikehonua, Haawina 1,2,3, o ka mahele I., a me ke Ao Heluhelu Haawina V. Hookuuia na hana me ka himeni a me pule a Kanakaole.

La hana 4. Dek. 30, Hora 9 A.M.

Hoomakaia na hana me ka himeni a me ka pule a ke Alakai. Kuhea ia na inoa. Heluheluia ka moolelo o ka la i hala a aponoia. Kula ia ma ke koena o ka mokuna 6, me 7. Hora 12 hoomaha.

Hora 1 auina la, hoomaka hou na hana ma ka mokuna 14 o ka Helunaau. Hookuuia na hana me ka himeni a me ka pule.

La hana 5. Dek. 31. Hora 9 A.M.

Kuhea ia na inoa. Himeni me ka pule a Kini. Heluheluia ka moolelo o ka la i hala a aponoia. Hoomakaia ke kula ma ke koena o ka mokuna 14 a 15 Helunaau, Hoikehonua, haawina 4, 5, 6, 7, 8 o ka mahele 1. Hora 12 hoomaha i hapalua hora.

Hora 1 auina la. Hoomaka na hana ma ka Heluhelu Kumumanao ana, penei: "E pomaikai ana anei keia Lahuikanaka i keia miliona dala, e aie ia ana?"

La hana 6. Ian. 2, 1875. Hora 9 a.m.

Kuhea ia na inoa. Hoomakaia na hana a me ka himeni a me ka pule. Heluheluia ka moolelo o ka la i hala a aponoia. Hoomakaia ke kula ana e ke kahu ma ke koena o ka mokuna 7 a 8 o ka Arimatika. Hora 12 hoomaha i hapalua hora.

Hora 1 auina la. Hoomaka hou ke kula ana ma ke koena o ka mokuna 15 o ka Helunaau, Hoikehonua, haawina 9-11.

La hana 7. Ian. 4. Hora 9 A.M.

Kaheaia na inoa. Weheia na hana me ka himeni a me ka pule ana. Heluheluia ka moolelo a aponoia. Kula ia ma ka mokuna 8 o ka Helunaau hou, (i ike nui ia ma na buke kahiko.) Hora 12 hoomaha i hapalua hora.

Hora 1 auinala. Hoomaka hou na hana ma ka heluhelu Kumumanao ana, a penei: "E ulu hou ana anei keia Lahuikanaka? Aole paha? Mahope o ka pau ana o ka heluhelu kumumanao, he mau manao paipai ka ke Kahu i waiho mai ai. Penei ke ano nui: "E na hoa Kumu; ua hiki mai kakou i ka la e hookuu loa ia ai o ka kakou mau hana, a ke hoike aku nei au i ko'u mahalo no oukou, ma keia mau mea elua. 1. Ka makaukau o oukou e na kumu, ma na haawina a kakou i kula ia iho nei e kakou. 2. Ko oukou ahonui i ka malama pono ana iho nei i keia hana iloko o na la loihi ehiku. A ke kauoha aku nei au ia oukou, e hoi oukou e ao aku i na keiki o ka oukou mau kula, e like me ka ike i loaa ia oukou. &c. &c.

Heluheluia ka moolelo o keia la a apono ia. Ma ke noi, ua aponoia e hoouna i ka moolelo i ke Kuokoa. Kuu ia na hana me ka himeni a me ka pule a ke Kahu.

D. ALAWA - Kakauolelo.

Holualoa, N. Kona, Hawaii. Ian. 8, 1875.

Ahahui Hooulu Lahui ma N. Kohala.

Ma ka la mua o Ianuari o keia makahiki; ua halawai ka "Ahahui Hooulu Lahui o Kohala Akau" ma Halawa, Kohala Akau, Hawaii.

Koho ia na Luna o keia Aha, no ka manawa, o W. Kapaona i Lunahoomalu, a o S. Molale i Kakauolelo.

Ma ke noi a D.B. Mahoe, e koho ia ke Komite, a ua Hooholoia.

1. Komite Imihana.

2. " Imi Kumukanawai.

Eia na Lala o ke Komite Imihana: S. Kahaaheo, D.W. Kaawa a me W. Kapaona ma Kohala - waho, A o Z. Kalai, D.B. Mahoe a me S. Molale, ma Kohala - loko. Na lakou no e imi i mau Hoa no keia Ahahui, i waena o ka poe e makemake mai ana e lilo i mau Lala no keia Ahahui.

Komite Imi Kumukanawai, ekolu no lala, o Z. Kalai, D.B. Mahoe a me S. Molale,

Ma ke noi a D.B. Mahoe, e hoouna ia i ka nupepa KUOKOA ka moolelo o keia Aha. Ua hooholoia.

Ma ke noi a Z. Kalai e hoopanee keia Halawai a hui hou ma ka la 13 of Feberuari o keia makahiki, (Hora 12 awakea,) ma Halawa Kohala Akau.

Ua hookuuia na hana o keia Halawai me ka maluhia. Me ka mahalo.

S. KOLALE

Kakauolelo.

Halawa N. Kohala, Hawaii Ian. 1875

J.D. HALAI, KA LOIO KAULANA. - Ma ka wanaao o ka la 27 o Dek. o ka makahiki i pau. Ua hoi aku la ka mea kaulana J.D. Halai i ka aoao mau o ka honua. Ekolu wale no hebedoma o ka mai ana, oia hoi, he kunu, aka i ka nana ana, aole ia ka mae e make ai. Aole nae pela ko ka Haku manao. I ka wa no ana e olelo ana i kona koolua, he maikai wale no, ua hina koa aku oia, a lele loa aku la ke aho, a hala'ku la ma kela aoao o ka muliwai eleele. Auwe! aloha ino. Ua waiho iho i na hoa'loha e pai-au-ma aku ma neia aoao, me ke kanikau, a me ka pilikia. He loio naauao, i aloha ia, e ko Kohala, ka aina ana i noho malihini ai, Aloha ino. S.M.

Halawa, N. Kohala, H. Ianuari 1875.

Ke Kuokoa no 1875.

E IKE auanei na kanaka a pau, mai Hawaii a Kauai, ma keia, ke hoike aku nei au, e hoomauia aku ana no ke pai ana o ke KILOHANA POOKELA O KA LAHUI HAWAII i ka makahiki 1875; a e hoounaia ana na pepa i ka mea a mau mea i uku mua wale no maloko o ke ope a ma ka wahi pakahi paha e like me ka makemake o ka mea i hookaa mai. O ka uku nupepa o ka makhiki, e mau ana no ia e like me ko keia wa, he

Elua Dala wale no!

ma ke kuike nae, oia ka rula.

Kii Makana o Kamehameha I!

No ka poe hookaa mua iloko o Ianuari, he Elua Dala o ke kope no ka makahiki, e haawi makana wale aku ana makou i ke kii o ka Na-i Aupuni Kaulana KAMEHAMEHA I. Aia ma Nu Ioka kahi i hoomakaukauia ai a nani loa, aka, e hiki mua mai ana maanei mamua o ka hoomaka ana o kaa makahiki hou. Aole loa e hoounaia'na i kekahi mea ina aole hookaa mai, aole hoi i kekahi kauoha me ke dala pu ole mai.

E hoomaopopo ka poe lawe nupepa, ina aole e ukuia kekahi nupepa e hoounaia ana mamua iho o ka la 1 o Feberuari, alaila, e hoopaaia ana ia pepa me ka hooloihi ole. O ko makou rula keia i lohe ka lehulehu, no ka mea, aole e hiki ia makou ke pai i na nupepa me ko oukou uku ole.

E hoonaniia ana ka pepa me na wehewehe manao maikai, naauao, nu hou o na Aina e, na nu hou kuloko, na palapala ano naauao, na kaao a me na mea ano like. E hooikaika ana makou e oi ae ko keia makahiki mamua o kela i hala. A oiai hoi, e hoihoi ia mai ana ia makou ka hooponopono o ka Aoao 4, ma ka la 1 o Ianuari, nolaila, ke manao nei makou, e nui loa ana na mea heluhelu i keia makahiki 1875 ae, a e makepono ana ke dala ke lilo no ka ai a ka noonoo.

Ke paipaiia aku nei na Luna a me ka poe Lawe Kuokoa, o keia makahiki 1874, e hookaa mai i ko lakou mau koena aie i keia manawa me ka hookaulua ole, o nele auanei lakou i ka nupepa ole no ka makahiki hou.

H.M. WINI,

Luna Hoopuka.