Ka Nupepa Kuokoa, Volume XIV, Number 13, 27 March 1875 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

E PAU NA PUPUPU KAHIKO!
E pani me na Hale Laau!
PAPA! PAPA! PAPA!
O KELA ME KEIA ANO,
---A ME---
NA LAKO KUKULU HALE
O KELA ME KEIA ANO, MA KA
PA-PAPA O S. G. WAILA MA!
---KIHI O---
ALANUI PAPU me ALANUI MOIWAHINE, no ke Kumukuai HAAHAA
LOA! ae like ka nui me ka makemake.
-----
LAAU NOUAIKI!
NA LAAU KAOLA,
                         NA PAPA MANOANOA,
                       NA PAPA HELE,
                       NA KUA,
                                       AAHO,
                                        AAHO LIILI, &c.
           LAAU ULAULA!
LAAU KAOLA,
NA PAPA MANOANOA,
NA PAPA HELE,
NA KUA,
AAHO, POU,
AAHO LIILII,
MOLINA, &c.
Pili Cida keokeo, Pili Laau ulaula,
Na Puka Hale, o na ano a pau,
Na puka Aninni, o na ano a pau,
Na Olepelepe Puka, o na ano a pau,
--------
Pepa Hale me na Lihilihi.
--------
NA LAKA PUKA!
NA AMI-PUKA,
                       NA-AMI PUKA LIILII,
                  NA KUI NAO.
----- ---
PENA, AILA-PENA, VANIKI,
WAI HOOMALOO.
---------
- PAAKAI Helu 1,
O PUULOA.
-----
E lawe wale ia no na mea i kuaiia mai keia Pa-papa aku a i kahi o ka mea kuai mai, ina ma ke kaona nei, a ma na Awa o keia Paeaina e like me ka aelike.
-----
Aia maanei ke Keena o ka
                 MOKU MAHU "KILAUEA,"
         D. TAYLOR, KAPENA.
-----
S G. Waila Ma.
614-3m
683 3m 696

HE MOOLELO KAAO
..NO..
RAIANAHU,
---KA---
HUHUI HOKU NANI O PEKINA!
unuhiia no ke "kuokoa" mai ka Olelo Pake a i ka Olelo Hawaii.
HELU 13.

            A MAMULI o ka ianei hana maikai a me ka pepehi ana i kela mau akua puaa ino, pakele ai makou, nolaila, ua kokua makou iaia e like me ko makou lokomaikai, a oia keia mau eke piha i ke dala a makou i lawe mai nei.  A ia wa, haawi mai la o Liu Fata i ka hoomaikai ana maluna o kana keiki a me ka poe kanaka i hele pu mai me ia.  Moe iho la lakou malaila ia po, a i ke ao ana ae, hoi aku la lakou ma ko la wahi.
            A hala kekahi wa o ko Raianahu noho pu ana me kona mau makua, a i kekahi la, nonoi aku la oia i kona makuahine, me ka i ana aku, E Mama, e hookuu mai oe ia'u e hele au i ka makaikai a pau kuu makemake, e hoi mai no au.  Pane mai ka makuahine, Ua ae no au e hookuu aku ia oe, aka, mai hele nae oe me ka hoomanao hou ole mai ia maua aka, ua oi loa aku nae ka maikai o kou hele ole ana, no ka mea, o kou kino he opopio loa, a aia ma ke ala au e hele aku ai, he nui na mea e poino ai oe.  Pane koke mai o Raianahu, Auwe!  ua poina koke iho la no ka paha ia oe kuu pepehi ana i kela poe puaa akua?  Pane mai ka makuahine, Ina pela, e hana aku no oe e like me ka mea i pono i kou manao.
            Mamua ae nae o ko Raianahu makaukau ana e hele ma kana huakai, wehe ae la oia i kekahi ahaaina nui, a ua kono ia na mea a pau e hele mai.  A mahope o ka hookuuia ana o ka ahaaina, haawi ae la o Raianahu i kona aloha hope loa, a hele aku la.  A hala na la elua ia ia ma ke alanui, halawai mai la me ia kana wahi iole, a hui aloha iho la laua me na waimaka e kahe ana.  Pane aku la o Raianahu, Pehea kou noho ana, pilikia paha oe?  Pane mai kahi iole, Aohe o'u pilikia no na mea ai, he nui loa na mea ai ma kela wahi, aka, hookahi no o'u pilikia nui o ke aloha ia oe, a no ke aloha hele mai nei au e halawai kaua, a e haawi aku hoi i ka'u wahi makana ia oe, i uku no kau mau hana maikai ana ia'u a o ua makana la a'u eia mai no ia; huki ae la oia i ke kapa hulu iole, a haawi aku la ia Raianahu.  Pane mai la o Raianahu, Heaha ka waiwai o keia mea?  I mai la kahi iole, He waiwai nui ka ianei, eia iloko o ianei na mea a pau au e makemake ai, no ka mea, i kou wa e ike ai i kekahi mea, a ua iini loa nae kou manao e loaa ia oe, e komo koke iho oe i keia kapa, a e like auanei oe me he iole la, aka, e hana nae oe ma ia ano a hiki i ka haneri, a i na e oi aku mamua o ka haneri. alaila, e komo ana oe iloko o ka pilikia, aohe kokua e ae e pakele ai oe, ke ole nae au e ike mai, nolaila, ma na wahi a pau au e hele ai, mai poina oe i ka hoomanao ana i keia olelo kauoha a'u ia oe.
            Mahope o ko laua hookuuia ana me ke aloha, hoi aku la o iole ma kona aupuni kuahiwi, a o Raianahu hoi ma kana huakai makaikai, aka, iaia i hiki aku ai mawaho o ka pa o kekahi kanaka waiwai, a aia mawaena o ka mala pua a ua kanaka la, e pua ana kekahi pua nani loa, i oi ae mamua o na pua a pau, a ua oleloia o ka Moi o na pua; a o ua pua la, he mea minamina loa na ua kanaka la, a ua hoolilo oia i ua pua la i akua nona, a e mohai mau ana oia no ua pua la i na wa a pau, a ua hoonohoia kekahi mau kiai e malama i ua pua nei, i ole e kikoia a kau ia paha e na manu; aka, no ko Raianahu makemake loa i ua pua nei, ua hakilo oia me ka hoomakaulii ana i wahi e loaa ai, aole nae e hiki, oiai e noho mau ana na kiai malaila i na wa a pau o ka la a me ka po, a ua like ua pua la i ke Raianahu manao, me he ipo aloha la nana i paa i ka pulamaia; aka, hoomanao ae la nae ia i na olelo a kana wahi aikane, nolaila, lawe ae la keia i ua kapa iole nei a komo iho la, a ku'a iole ae la keia.  komo aku la iloko o ka pa, a pii ae la iluna o ke kumu laau nona ua pua la, a lawe ae la i ka pua nani, me ka ike ole mai o na kiai, aka, aia nae a alawa ae na maka o ke kiai iluna a ike aku la aole ua pua nei, ike aku la na kiai i kekahi iole e holo ana, me ua pua la ma kona waha, a i ke alualu ia ana aku, nalowale loa aku la, nolaila ua haiia aku la ia mea i ka mea nana ka pua, minamina loa iho la ia a lilo iho la ka iole i enemi nona, a kauoha ae la ia e luku ia na iole a pau maloko o kona pa a me na wahi a pau ana e ike ai i ka iole; hoopau ae la oia i ka hoonoho ia ana o ke kanaka kiai, a hoolaka mai la oia i na owau (popoki) a nui wale, no ka mea, ua ike oia, he enemi ka iole no ke owau.
            Ua ike ae la oe e ka mea heluhelu, ua lilo aku la ka pua nani ia Raianahu ma ke ano kino iole, aka, e huli ae kakou a nana i na pua e ae ma ka mala pua, ua hala ko lakou nani, a ua mae wale lakou a liko i mea ole, no ka mea, o ko lakou nani a me ko lakou ikaika, mai kela pua nani no ia i lilo aku la, no ka mea, ma ia pua wale no ka molia a me ka mohaiia ana, ua laahia wale na pua e ae a pau malalo ona, a no iala ka make, ua make wale na pua e ae a pau, nolaila, ua piha loa ka mea nana ka pua nani a me ka mala pua holookoa i ka minamina, no ka mea, he mau tausani dala kona lilo no ia mala pua, aia hoi malila kona poho nui loa ana, a ua lilo ka minamina i mai nui nona, a make aku la.
            Lawe ae la o Raianahu i ua pua nei a malama iho la, a no ka hiki ole iaia ke malama ma ka hele pu ana a me ka pau ole hoi o kona makemake ma kana huakai, hoi hou aku la oia i hope, a haawi aku la i ua pua nei i kona makuahine, me ka i aku, Eia kuu pua, e malama loa oe me ka makaala, a ina e ike oe i kekahi lihilihi e mae ana, e hoomanao iho oe ua make au; a eia hoi, i na oe e makemake ana i kekahi mea, e honi iho oe i keia pua, a ina e holo mai kekahi iole a ku imua ou, a ninau mai, Heaha ka'u i kahea ia ae nei?  E hai koke aku no oe, a o ka manawa no ia e hooko ia mai ai me ka hakalia ole.  Pane mai ka makuahine.  E aho e hoao mai oe, i ike ai au a hoopau koke ia ko'u kuhihewa.  Ia wa honi iho la o Raianahu i ua pua nei, aia hoi, holo mai la kekahi iole, a ninau mai la, Heaha ka'u i kahea ia ae nei?  I aku o Raianahu, I mea ai na maua, i paina pu ae ai maua a hele aku au.  Pau no ka ianei pane ana, kukuku ana ka mahu o na mea ai; aia nae, puiwa ae la kona makuahine, a hiki ole iaia ke ai i na mea ai kupanaha a kana keiki.
            E ka mea heluhelu, ua ike ae la kakou, o ka pua nani ka helu akahi i loaa iaia ma ka mana o ke kapa iole, a mahope aku, ua hana aku oia ma kela a me keia ano ana i makemake ai a hiki i ka piha ana o ka haneri, me ka hooko wale ia no, aole i nele kekahi mea ana i makemake ai, aka, pau ae la nae kona palena i olelo ia mai ai e kana wahi aikane iole, nolaila, hele aku la no keia ma kana huakai makaikai, a hiki mawaho o ka pa o ka Lunakanawai Kiekie, ike aku la oia i kekahi kaikamahine ni, i he kaikamahine hoi oia na ua Lunakanawai la, komo iho la iloko o Raianahu ka iini no ua kaikamahine la aka, noonoo iho la nae oia no na olelo a kana aikane, a no kona manao, aole i pili ia papa ana no ka mea kino, no ka mea, na hoopila oia i ka haneri ma na mea e ae, aole nae oia i hoao no kekahi mea kino, aka, no ka halialia wale mai no iaia o na olelo a kana wahi aikane, nolaila, hookahakaha ae la oia mamuli o kona ano kanaka maikai a ni hoi, aole nae he lua o kona nini i ike ia malaila; aka, i ka ike ana mai nae o ua kaikamahine nei ia iane, kokoe iho la kona mau maka, a nalo aku la, a ia wa i puana ae ai paha o Raianahu i keia mau lalani mele:
"Hokai ua manu hoena
Pili ipuka hale ole mai."
            Pinepine kona hoikeike ana iaia iho mamuli o kona ano kanaka maikai maoli, aole nae o iala mea a pilipili aina mai, hookaawale aku la me he i-a la no ka hohonu, aka, ma ke ahiahi liula o kekahi la oiai ua kaikamahine la ma ka rumi hookipa, e nanea ana i ka paani piana,  aua pani kunihiia mai la ke pani puka o kona keena moe, a ia wa, komo iho la o Raianahu i kona kapa hulu iole, a ku-a iole ae la, holo aku la a komo ma ka rumi o ua kaikamahine nei, a noho iho la malalo o ka moe, a ma ka hora 10 o ka po, hoi mai la ua kaikamahine nei e hiamoe, a iaia e makaukau ana e hoi aku maluna o kona wahi moe, aia hoi, oili ae la o Raianahu a ku ana, me kona nani i hele a piha pono.
            Aia nae i ka ike ana mai o ua kaikamahine nei ia ianei,
"Haki e na pua o ke kula,
I ko ia la hele wale a nohea."
aka, he mea haohao loa nae ia i ke ka makuahine ike ana i ka hiamoe mau o kana kaikamahine, nolaila, ma kekahi la, ninau aku la ka makuahine i kana kaikamahine, Heaha ke kumu o kou hiamoe mau ana i na la a pau, aole no hoi oe pela mamua aku nei?  A no ka hiki ole i ua kaikamahine nei ke hai aku i ka oiaio, pane aku la oia, He makemake no paha no'u e hiamoe, oiai ua ike no au aole a'u hana, a o ka hiamoe wale no ka hana kupono ia'u, no ka mea, ua hoomalu olua ia'u ma na mea a pau. Aka, nana mai la ka makuahine i na hoailona o ke keiki iluna o kana kaikamahine, i mai la oia.  E kuu keiki, eia no oe iloko ko maua poli, a malalo hoi o ko maua malu, nolaila, ke noi aku nei au ia oe e hai mai oe me ka oiaio, oiai o kaua wale no.  Pane mai ke kaikamahine, Aohe maopopo o kau mea e nonoi mai nei, a o ka mea hea la ia?  Pane aku ka makuahine, Ina ua ike ole oe ia mea, na'u no e hai aku ia oe, a e hoike mai oe me ka oiaio.  Ae mai la ke kaikamahine.  Pane hou aku ka makuahine, Eia me oe kekahi ui e noho nei i keia manawa, a ua piha oe i ke aloha.  Ae aku la oia me ka hookamani ole.
            A lohe ka makuahine i na olelo a kana kaikamahine, piha loa ae la oia i ka haalulu, ai i aku la, Lokoino maoli no hoi oe e kuu kaikamahine, aole hoi maua i pauoaho i ka malama ana ia oe, a mamuli o ko maua ano makee ia oe, ua hooikaika loa maua e malama i kou maluhia a hiki i ka wa kupono, no ka mea, ua upu maua a noa ko kino ia Raianahu; ke keiki a Liu Fat e kaulana mai nei, no ka mea, o ua keiki la, he keiki oia na ke kaikamahine a ka Moi e noho nei ma ka Nohoalii i keia wa, eia ka ua hana iho nei oe i ka mea kupono ole, a heaha la ka manao o ko makuakane, i na oia e lohe ana no keia mea, ua ike no au, e hoopai ana kela ia oe, e like me kau hewa i hana ai, aka, eia wale no paha ka pono, ina e hoi mai ua ui la au i ke ahiahi, a pauhia ia oia i ka hiamoe, alila e lawe ae oe i ke kapa hulu iole ona a haawi mai ia'u, i moe ia a ala ae i kakahika, aohe ke kapa hulu iole ona, alaila, hopu koke ia oia a paa, a laweia imua o ka Papa e hookolokolo ia ai.  Ae mai la ke kaikamahine me ke kanalua, a no kona pakela aloha i kanaa ui, aole oia i hoohalua ma ka po mua.
            Mahope iho o ko ka makuahine kamailio ana me ke kaikamahine, hoi aku la oia a hai aku la i kana kane, a i kona lohe ana, he mea kaumaha loa ia i kona manao, nolaila, ua kauoha koke ae la ia i ka Ilamuku, e hai aku i ka lohe i na makai, e hele mai me ko lakou makaukau no ke kiai ana, a he manawa ole ua akokoa mai la na mea a pau, aka, ma ke kali ana ia po, aole i hele mai ua kaikamahine la.  Aia nae, ma ke ao ana ae, komo aku la ka makuahine ma ka rumi o kana kaikamahine, a ninau aku la, Aole nae paha i hele mai na ui la au i ka po nei?  Pane mai la ua kaikamahine la me ka lokoine, Aole, oi kali wale aku a u a aohe hoi mai, a ke manao nei nae au e hoi mai ana i keia po.
            Ma kekahi po ae, hoi mai la o Raianahu, a mahope o ko laua hoonanea ana haule aku la o Raianahu iloko o ka hiamoe kulipolipo; aia nae iloko o ia wa, lawe ae la kana wahine i kona kapa hulu iole, a haawi aku la i kona makuahine, a iloko o ia wa, ua kahea kokeia ae la na makai, a poai ia ae la ka hale a puni.
            Ma ke kakahika nui, ala ae la o Raianahu e like me kona mau, aia nae, aole kona kapa hulu iole, noke wale keia i ka huli aoha nae he loaa iki, ninau aku la hoi i ka wahine, hoole mai la kela, wehe aku la i ka puka, aole nae ke ki, pau ae la ko ianei manao no ka holo ana a pakele, hiki mai la na makai a hopuia iho la keia, a alakai ia aku la imua o ka Lunakanawai, ka makuahonowai no hoi o ua o Raianahu.
            I ke kukuluia ana o ka Aba, noho ae la ua Lunakanawai nei ma kekahi poo o ke pakaukau, a o ka wahine no hoi ma kekahi poo mai, a o Raianahu no hoi ma kekahi aoao, a o ka wahine no hoi a Raianahu ma kekahi aoao mai.  Lawe ia mai la nae ua kapa hulu iole nei a hiki imua o ka Aha; a o na Lunakanawai la, he maka ahewa oia, lalau iho la oia i ua kapa hulu iole nei, a no ka aheaw o kona maka, lena kapakahi ae la oia ma ka nana ana; aia nae ia wa lalau ino aku la o Raianahu i ua kapa hulu iole nei ona, a komo iho la a ku-a iole ae la keia, a ike hoi na makai a me na mea a pau loa, alualu aku la lakou me ka manao e loaa, aka, holo aku la keia a pii ae la iluna o ka pahu hae, a noho iho la maluna pono o ke poheoheo o ka pahu hae, noke ae la na mea a pau i ke ki i ka pu, aohe nae o ianei wahi mea a ku iki; a no ka nui loa o ka huhu o ka Lunakanawai, kauoha ae la oia e oki ka pahu hae.  Aia nae iloko o ka wa e okiia ana ua pahu hae nei, nana mai la o iole a ike i ka pilikia o kana aikane, nolaila, hoouna mai la oia i kekahi manu; aia nae ia ua manu la e lele mai ana, ua ike ia mai la no e na mea a pau, aole nae i manao ia aku, he manu e kii mai ana i ua iole nei, aka, i kona hookokoke ana iho maluna o ka pahu hae, he manawa ole ia mio ana iho, o ka lilo aku la no ia o ua iole nei i ka manu, a hooho ae la na kanaka me ka leo nui, me ka manao nae e make ana ua iole la i ka manu, aia nae lawe loa ia aku la keia a ke Aupuni Dala, a malaila keia i hoonohoia ai; he moo nui ke kanaka o ia aina, aohe kanaka o ia aina, aohe kanaka maoli, a o ka lepo a pau malaila he dala wale no, he lepo nae ma kau nana iho aia nae a hehi aku oe, e lohe no oe i ka owe o ke dala; a ina e moe kou mau maka a haha iho na lima, e loaa ana no ia oe na auka a me na apana dala, aka, aia a owaka ae kou mau maka, aia ka he lepo wale no.
(Aole i pau).

HE KUPU INO ALOHA OLE.

E KA NUPEPA KUOKOA E, Aloha oe :---
            Ma na malama i hala aku nei, ua hoowalewale aku kekahi kanaka i kekahi kaikamahine a kekahi haole o ka Ahahui Mahiko o Kohala nei. A ua hoomahuka pinepine ia eia, a ua hai aku ua kaikamahine nei na keia kupu ino aloha ole, Nia kona inoa.
            A ma ka la 10 o keia malama (Maraki), ua makaukau mai na lima lawelawe o ke Aupuni e hana i ka lakou hana, e like me kuhikuhi a ke Kanawai, a ua lawe aku lakou iaia a kokoke ma ka halepaahao, holo aku la kela a nalowale iloko o ke ko, a o na makai hoi keia ku hoa-a wale iho la no, me he kii la no Kahua.
            A ma ka po ana iho, ua hiki hou aku la oia ma kahi noho o ka Hope Ilamuku, a ua noi aku iaia e noho pu me kana wahine i hoowalewale ai, a ua ae mai ka Hope Ilamuku ia mea i wahi e paa ai oia.  Aole nae oia i hooke e like me kana noi, ua huli hou aku oia i hope no ka manawa mahope aku.  A ua hele mai e ki i ka Hope Hamuku a me kona ohana i ka pu, aole nae i kani ka pu, a holo wale aku la no oia ma ia po.
            A ma ia po no, ua wawahiia ka hale kuai o ka Ahahui Mahiko o Kohala, a ua lawe ia he mau wahi kenikeni.  O ka nui o na wahi kenikeni i lawe ia he $14.00, a ua koe no na bila dala.
            Ua lawe ia aku no hoi he mau mea e ae o loko o ka hale kuai.  A ma ia po no hoi, ua lilo aku elua lio o ka Hui a me ka noho Italia o Geo. C Williams ka Luna Nui o keia Mahiko, a me ka pu a ka haole wiliki, aole i akaka ka mea nana i lawe, aka, he manaolana ko'u aia no i kela kupu ino aloha ole i kokua ia mai e kekahi mau mea e ae.
            Nolaila, e na makamaka mai hoomahui i ka hewa, ano e maliu mai, a hoopono, i wahi hoi e ike ole ai i kela wahi ehaeha o ka noho ana.  Aole oia i loaa iki a hiki i keia la a'u e kakau nei.
Me ka mahalo.
J.W. M. NOHOIKAIU.
Kohala, Mar 18 1875.

UA LAUPAI KEIA HANA O KA HULA MA KAU NEI.

E KA NUPEPA KUOKOA E, Aloha oe:---
            Me ka manao minamina a kaumaha o ka naau, i piha i ka aloha i kuu mau kiai aloha o ka pupuu hookai, e ume ia nei e keia hana uko ole o ke au Hooulu Lahui, i kukala akea ia e ko kakou Moi.
            Ma keia apana o Kau nei, eha pa hula penei: Ekolu pa hula ma Waiohinu nei; hookahi ma Makaka, a ma keia mau pa hula, he poe opiopio wale no ka nui, ua kupono wale no keia poe i ka nana aku i mau maku no keia lahui, ma ke ano hooulu i ka lahui.  ma ko'u ike ia lakou, ua hana hilahila ole lakou, kuhi na lima a walaau ka waha, palu hoi ke alelo me ka oni pu hoi o ke kino, ua like na keikikane me na kaikamahine ma keia hana, me ka poe aea haukae, ke kai hele i ko hai ipuka hale e hana ai.  Ma ka lakou olelo, o ka lakou ai ia a me ka lakou i-a, ola ka la pololi o ka palaualelo o ka hana keia, haalele ia ka hana lima, oiai he hana ia na ka oiwi ponoi iho.  A ma ka Poaono iho nei o keia malama, ma ka hale o J Kaauakapu, ua kuupau iho ka hula ma ia ahiahi Poaono, ma ka hora 6 ahiahi a hiki i ka hora 10 o ke aumoe.  Ua lawe ia mai kekahi hapa o ka wa hooluolu i manawa no keia hana, ma ko'u ike, a hoomaopopo i ka nui o na makaikai ma ia po, ua piha paha ke kanalima a oi aku, ke hui pu ia na kane, wahine a me na keiki.  Ke manao nei au aohe Kanawai o keia hana, ina paha he kanawai hopu ia la hoi?  Kuhi au he au Hooulu Lahui keia, eia ka!   he au hooulu hula, ua puni ae nei keia Pae Aina holookoa i keia hana he hula.
            Auhea oukou e na kanaka o ke Aupuni, e makaala oukou e kinai i keia kana, e hooko oukou i ka mana o ke Kanawai, a i oleia e ao aku e like me ko oukou Karisiano oiaio, a i na lakou e hookuli, alaila, o ka uku o ka hewa o ka make.
R.P. KUIA.
Kau, Hawaii, Mar 18 1875.

            KE KAIKAMAHINE ALII SAMOA.---Ma ke ku ana mai o ke kuna Peerless ma ka Poalima aku nei i hala, ua kau mai maluna ona kekahi kaikamahine i lohe ia ae, he kaikamahine alii, aka, aole i paulehia loa kekahi poe i ka hilinai ana aku, he alii maoli io oia mai ka po mai, e like la me ko kakou mau alii.  Ua lilo nae kona mau la pokole i noho iho nei ma ke kaona i mea hoeueu ae i kekahi poe o ke kaona nei, e uhai a holo i kahi e ike aku ai i kona mau hiohiona.  He helehelena maemae kona i ka nana aku, aka, he wahine kanemake nae oia i keia wa, no ka mea, he eiwa malama ae nei i hala ka loihi o ka make ana o kana kane haole ma Amerika.  Ma ke ahiahi Poalua iho nei, ua huli hoi aku oia no Samoa maluna o ia moku hookahi ana i holo mai ai.