Ka Nupepa Kuokoa, Volume XIV, Number 16, 17 April 1875 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA KUOKOA, ME KE AU OKOA I HUIIA.

 

Ka Nupepa Kuokoa

HE HIMENI!

OVER YONDER

Royal Diadem, p 51.

 

1. He mau leo mele e!

Kupinai mao, maanei,

Ma ka aina aloha no,

Na ka aina mele ma@

 

Ref.     Ma-o ae la––ma-o ae la,

            Pa na leo oli no,

            Haleluia! Haleluia!

            Haleluia ia Iesu.

 

2. Kani no na mele nei

Ma ka muliwai lailai,

No ka poe hana mau,

No ka Haku, no Iesu.

 

Ref.     Ma-o ae la––&c.

 

3. Hui ma ia mele nei

Na paahana ikaika e

I ka paio no ka lei,

Lei olino nani e.

 

Ref.     Ma-o ae la &c.

 

4. Ku lakou a poai no

I ka noho o Iesu,

Mele lanakila e

I ka Haku i ke Lii.

 

Ref.     Ma-o ae la - &c––

 

5. Ho@ikaika na pokii,

Na haumana kula nei,

I loaa ka makaukau

No k@ ku a mele pu.

 

Ref.     Ma-o ae la––&c––

 

HAWAII.

 

HAAWINA KULA SABATI.

HELU 5.  SABATI, MEI 2.

 

KUMUHANA––Ka make ana o Samesona.

 

PAUKU BAIBALA.  Lunakanawai 16:25-31

            25. A i ka wa i lealea ai ko lakou naau, i ae la lakou, E kii aku ia Samesona, i hula mai ia no kakou.  Kii aku la lakou ia Samesona ma ka halepaahao, a hula mai la ia imua o lakou.  A hooku iho la lakou ia ia i waena o na kia.

            26. I ae la o Samesona i ke keiki e paa ana i kona lima, E hoomaha mai oe ia'u i haha aku au i na kia e paa ai ka hale, i hilinai hoi au ma ia mau mea.

            27. Ua piha ka hale i na kanaka, a me na wahine.  Malaila no na'lii a pau o ko Pilisetia.  Ekolu tausani kanaka a me na wahine maluna o ka hale i nana mai i ko Samesona hula ana.

            28. Hea aku la o Samesona ia Iehova, i aku la, E ka Haku, e Iehova e, e hoomanao mai oe ia'u ; ke nonoi aku nei au ia oe, e hooikaika mai oe ia'u, e ke Akua e, i keia manawa hookahi no, i uku koke ia mai e ko Pilisetia, no ko'u mau maka elua.

            29. Lalau iho la o Samesona ma na kia waenakonu elua, a oia hoi na mea e paa ai ka hale.  Hilinai iho la oia ma ia mau mea, o ka lima akau ma kekahi, a o ka lima hema ma kekahi.

            30. I iho la o Samesona, E make pu au me ko Pilisetia.  Kulou iho la me ka ikaika nui, a hina iho la ka hale maluna o na alii, a maluna o na kanaka a pau maloko.  Ua nui ka poe make, ana i luku ai i kona make ana, he hapa ka poe ana i luku ai i kona wa i ola'i.

            31. Iho aku la kona poe hoahanau, a me ko ka hale o kona makuakane, lalau iho la ia ia, a lawe ae la, a kanu iho la mawaena o Zora, a me Esetaola, ma ka ilina o Manoa, o kona makuakane.  He iwakalua makahiki ana i hooponopono ai i ka Iseraela.

 

            PAUKU GULA.  "O ka mea hele pu me ka poe akamai, akamai no ia ; o ka hoalauna o ka poe lapuwale, e mahuahua ka hewa."  Solomona 13:20.

           

            Mele.  Him. 460, 8-6.  Leo––Waialua.

 

            1. Kakoo, e ke Lii mana e,

            I pahikaua nau,

            E o i kou mau enemi,

            I lohe mai lakou.

 

            2. E holo lanakila ae,

            Me kau olelo mau ;

            Kau pahikaua mana nei

            E malu ai ke ao.

 

            PULE, no na aina naaupo no na lahui hoomana kii, no ka olelo a ke Akua i holo lanakila ia i pau ka hoomana kii, & c.

 

NA NINAU A NA KUMU.

 

            No k@ k@ ana o Gideona ka Haawina i k@la Sabati me kona lanakila ana.  A @ maluhia ka aina i ehia makahiki malalo ae o Gideona?  8:@.  Mahope o kona make ana owai na Lunahooponopono a hiki ia Samesona?  Me ka loihi o ko lakou hooponopono ana?  Me na enemi a me ka loihi o ka hooluhi ana @ na enemi i ka poe Iseraela?  9:1, 22.  10:1, 2, 3, 6, 7, 8, 9.  11:1, 4-6, 11, 29, 32, 33.  12:7, 8-14.  E hia Luna?  1 Abimeleka, 3 makahiki.  2 Gola, 23 mak.  3 I@ira, 22 mak.  4 I@pet@, 6 mak.  5 Ibezar@, 7 mak.  6 Elona, 10 mak.  7 Abedona, 8 makahiki.

            Owai na enemi i ka wa i hanau ai Samesona?  13:1.  Owai ka makuakane o Samesona?  13:2.  Nawai i hai ia ia e hanau ana he keiki kane nana, a me ke ano o ke keiki?  13:3, 5, 13, 24, 25.  Aia mahea ka ikaika o Samesona?  Hai mai i kekahi mau hana mana a Samesona, 15:8, 15, 16.  16:3.  Heaha ka mea i pau ai kona ikaika, a hopuia e na enemi, a poaloia kona mau maka, a hooleia oia ihea?  A hoohanaia pehea malaila?  16:19-21.  Ua ulu hou anei kona lauoho mahope?  p, 22

            P 25.  Owai keia poe lealea?  lealea i keaha?  Ia lakou e lealea ana, hana lakou pehea ia Samesona?  Hana ino, hoomaewaewa, hoaikola, aka-henehene.  Aia lakou ihea?

            P. 26.  Noi Samesona ia wai e kokua?  Ehia kia?  Elua, mawaena kon@ paha o ka hale, e kau ana ke kaumaha o ko luna o ka hale maluna o keia mau kia nui elua.  He mau kia e ae paha e kokua ana.

            P. 27.  Aia mahea na kanaka?  E hia maluna?  E aha ana?  Lokoino, hoomauhala?

            P. 28-31.  Hai mai i ka pule, i ka hilinai ana o Samesona i na kia elua, i ka hope o kana pule, ka nui o ka poe i make, ka hana a kona poe hoahanau, ka nui o na makahiki o kon@ hooponopono ana.  Make pono anei oia?  Heb. 11;

 

Mele.  Mele hou.  8-7.  Leo.

 

            1. Auhea la na Samesona,

            Koonei poe ikaika e?

            Ala, ala, uluhia

            I ka mana mai luna'e.

            Naue aku, naue aku,

            Kaua i na enemi;

            Hoopaa a hooluliluli

            I hina'e na heiau, kii.

           

            2. Ma ka mana o ka Uhane

            Hina wale na haiau,

            Pau na lehu i ka make,

            Lanakila no Iesu.

            Kaua, kaua, mai pauaho,

            Lilo i ka make e;

            Make no ka pono io,

            No ka pono e e ola'i.

 

NA NINAU A KE KAHU.

 

            Na kane.  He haawina lelele keia, mai hea a i hea ka lele ana?  Mawaena o Gideona me Samesona ehia makahiki?  Ehia Luna hooponopono i ka poe Pesala?  E hia makahiki o ka hooponopono ana o kela, a o keia luna?  Owai na enemi i hoopilikia ia lakou?  No ke aha hoi ka hoopilikia ana?  Ka loihi hoi o kela, a o keia hoopilikia ia ana?

            Na wahine.  Elua wahine kaulana, kaulana kekahi no ka pepehi ana i kekahi alii mahope iho o Gideona, owai ia a@i?  a pehea ka pepehi ana?  A o kekahi wahine, he makuahine ia no kekahi keiki kupanaha, Owai ia keiki?  A nawai i hai i kona ano?  Owai hoi kona makuakane?  A o kekahi wahine he wahine kumakaia i kana kane, Owai ia?  a pehea ke kumakaia ana?  A heaha hoi ka hope o ke kumakaia ana?

            Na keikikane.  Heaha kekahi hewa o Gideona?  Heaha kekahi hewa o Gideona?  Heaha ka@a i hana'i a lilo ia i mea hoowalewale, i mea hoomana kii?  Pono anei ia oukou ke hana i na mea hoowalewale?  Mai kuai me ko oukou mau dala i na mea alakai hewa i na kamalii.  Hai mai i ka nane a Samesona i hoopuka aku ai ma ka ahoaina mare, me ka haina.

            Na kaikamahine.  Heaha ka Samesona i hana'i i kekahi liona?  a me ka iwi a o ka hoki?  a me ke pani puka o Gaza?  Heaha ka hana ino ana a ka poe Pilesitia ia Samesona?  Poalo lakou i kona mau maka elua a hoolei ia ia mahea?  a kii ia ia e aha maloko o ko lakou luakini kii?  Hoohula ka lakou ia ia, a aka-henehene.  Hewa loa e.  No ke aha i hopu ia'i oia?  Lilo kona ikaika ma ke aha?  Loaa hou anei ka ikaika ia ia?  Pehea kona hoopai ana i na Pilesitia no ka lilo ana o kona mau maka?  Pehea ka Iesu olelo ma Mataio 5:38, 39, 44.

            Na pokii.  Owai ke kanaka ikaika loa?  Samesona.  Mahea kona ikaika?  ma kona lauoho.  Ma ke aha i emi ai kona ikaika a like oia me na kanaka e?  ma ka akoia'na o kona lauoho e ka@a wahine aloha ole, i lilo oia i na enemi a poalo ia na maka a make.  Mahea ko oukou ikaika?  Ma ka pule paha.

            Na manao pili.  1 Nui loa na Pilesitia i keia wa, oia hoi na lehulehu o ka poe hoomanakii, hoomana Mahometa, hoomana Pope––&c––

            2 Owai na Samesona?  Pono anei i na Samesona o keia wa ke hoohalike me Samesona kahiko?  aole paha.  He wa naaupo kela, lalau no na luna hooponopono no ka hiki ole mai o Iessu e ao i na Rula pololei.  He wa naauao keia, mai huikau ka poe pono me ka poe hewa, mai mare na luna, na kahuna, me na wahine pono ole, o lilo lakou i mau pahele, i mau mea keakea i ka pono.

            3 Naauao kekahi ano make no ka pono a no ke aupuni o Iesu.  Naaupo nae kekahi ano make no ka pono.  E malama i aponoia @ Iesu ke make oe nona.  Mai pepehi @ oe ia oe iho mamua o ka manawa kupono no ka hoonui ana i ka hana, a ma ka malama ole i ke ola kino.

 

Mele.  Him. 3@9––6-8.  Leo.

 

E ku na koa e, Kae@ i makaukau,

Ma o Iesu la e koa'i, E k@ ik@ka mau.

 

5. E paio ikaika no, Pule a hakoko.

E @e@ ae i ko ka po, A lanakila mau.

Pule i hiolo na heiau kii, a kukuluia ke aupuni o Iesu ma na wahi a pau.

 

HAAWINA KULA SABATI  no Mei 9.  Luka 1:16-22.  PAUKU GULA.  Luka 1:16

 

HAWAII.

 

HE PANE

 

            Ma kekahi "Itamu" o kou helu 12, o Marati iho nei, a ma ka aoao 2, kolamu 3 ma kahi o na "Nuhou Kuloko" i lima kuhi ia penei.––  Ua lohe mai makou, ua haalele kekahi Kahu Ekalesia Hawaii no kona makemake iho e lilo i Luna Aupuni no ka Apana kahi ana e noho ana.  I haakei loa nae hoi i ka paipai ia e na Kahuna o kekehi aoao hoomana iho.  Ua minamina a'@ no kou alakai hewa ia e kou mea a mau mea paha nana i olelo aku ia oe; a eha ai kaua.  E hikiwawe oe ma ka lohe––E lohi hoi.  Eia ka mea i hooholoia ma kekahi halawai kuikawa ana o na Luna Ekalesia a me na hoahanau a me ke Kahu pu, a hooholoia.  @, E hoomaha ke Kahu i ka lawelawe ana ma ke ano Kahu, a pau ka aie o ka Ekalesia i ka hookaa ia.  Ke ae mai nei ke Kahu, ina aole ia e hele ana ia wa hoomaha.  Ua ae like na aoao elua i keia, ku mai kekahi komite kahea a ninau i ke Kahu.  E hele ana anei oe mahope o kou hoomaha ana?  Pane.  Aole i maopopo iau ka hele aku, aka, ina i konoia a'u e ka pomaikai i oi aku ke hele, alaila, e hele no a'u.  O ke k@lu keia, o na malama mai ka la mai o kona hooholoia ana, aole i hookaa ia mai ka aie o ka Ekalesia, a heaha la hoi ina e konoia ana oia e na pilikia, e lawelawe ma kekani hana e ola ai oia me kana Oihana.  No ka mea, he mea hilahila iaia ka lohe i na olelo na ke kamailio pinepine ia no ke dala hanai Kahu a puni ka makahiki, me ke kaa ole, a ma kekahi ano hana i loa ai iaia i wahi hapa oia dala e pauai kekahi pilikia.  A mai mea iki aku oe i na Kahuna o kekahi hoomana iho, au i hapala ae nei.  No ka mea, e hana ana laua no ka pono, ke ola, a me ka maluhia o ka lehulehu.  A e hookupaa ana hoi i ke Aupuni o Kalakaua.  "O ka Hooulu Lahui"  "E mau ka ea o ka aina i ka pono"  Me oe i kokua mai nei ma kou manao ponoi ma a helu no, oia keia.  "He mea hoopau koolaau wale no keia kamailio ana ma ke akea, ke ole e hoololi ia ke ano o ke kulana ma ko ke Aupuni koho ana i na luna Aupuni mai loko mai o ka poe ona rama  ole ina lakou e hooko aku i ke Kanawai, a me ka oiaio."  A ke manao nei a'u, aole oe i kokua iki i na luna Aupuai ona rama, a nana lea hoi i ka laha ana ae me ke keakea ole ia mai o a o.  E hapala aku ana i keia ona ma keia mau Apana i ka inoa Ihiihi a me ke Kiaaina pu o ka Mokupuni.  E like me ka hana ana a na Kupuna o kakou i ka wa a ke Akua i hookolokolo ai ia laua, wahi a Ewa, na ka Naheka i olelo mai iau e ai au, na ka wa@ine hoi, wahi a Adamu.

           

            Pela hoi koonei poe ona e hapala aku nei iluna o na Laahia ahu kuaanaha a ka la i Mana, kau e ke Kuokoa.

 

Kekahi Kahu Ekalesia Hawaii.

 

            E hoakaka ana i ka Nuhou Kuloko i lohe ia a i hoopukaia ma ka Helu 12 o ke Kuokoa aoao 2, kolamu 3 na Nuhou Kuloko, penei.  Ua lohe mai makou, ua haalele kekahi Kahu Ekalesia Hawaii no kona makemake iho e lilo i Luna Aupuni no ka Apana kahi e noho ana.  I haakei loa nae hoi i ka paipai ia e n@ Kahuna o kekahi aoao hoomana iho.  1, Aole i haalele keia Kahu i ka Oihana, aka, hooholoia ma kekahi ahahui e hoomaha ana a pau ka aie a na hoahanau i ka hokaa ia ana.  Aole no e manao na hoahanau e kokua mai i ke Kahu, a ke noho nei me ka pilikia.  Auhea oukou, e na hoahanau o keia Apana aloha ole!  Aole anei oukou i hooholo i ka olelo ae like me ke Kahu nana e lawelawe ana ma ka Oihana Kahu Ekalesia a na oukou no e kokua mai i ke ola kino.  Nolaila, e hooko oukou i ka olelo i hooholo ia.  Heaha ke kumu o keia maalili o ka manaoio a me ke aloha a me ka mehameha o ka Luakini ma na la Sabati?  Haina o ka inu uala i hookuu waleia e ka Ho@, Makua o ka Apana a me ka hula i hapaia a i kokua ia e ka Ho@, Makua a me kana poe aikane ili keokeo e noho hookae nei, me he la, he wa keia e heihei ai ka poe ili keokeo o keia Apana me ka papa haahaa loa o ka poe lapuwale o Hawaii oia ae la ke kumu enemi o ka Ho@, Makua na aikane ili keokeo a o ka poe hoopilimea ai ma kekahi aoao.  A me na kahunapule me ko lakou puali koa makee maluhia ma kekahi aoao.  Ua hoopukaia na olelo hooweliweli e pepehi a make i na kahuna.  He poe kom@ ka ! ma Hawaii nei.  Aka, mahope paha e lilo ana keia mau ilio hih@ hae i mau hipa oluolu.  Ua akaka no hoi, aole i kupu keia mau manao weliweli ma ka naau o ke kanaka Hawaii, na kekahi mea @ i hoala.––A i keia poe hoopilimea ai paha, ko@ lohe ana @ haalele kekahi i ka Oihana ke hai aku nei au ia oe, ua alakai hewa ia oe e ka makua o ka wahahee;––2.  Aole i paipai na Kahuna o kekahi hoomana iho i ke Kahu Hawaii e haalele a e no@ Oihana Aupuni, mai ka mak@ o ka wahahee m@i keia.  Aka, no ka ike ana i ke ano kupono ole o ka Ho@. Makua e noho nei m@ ia Oihana, @ ake n@i ia e ka poe makee maluhia aloha Lahui e ike ma ia wahi i ka mea makau i ke Akua a hana pololei ma ke Kanawai a @a hoike ia keia makemake o ka lehulehu.  Pomaikai ka Apana k@ ae ia mai Hooulu Lahui oia e la ka olelo i alakai ia lakou, he olelo i hoohenehene i@ m@ kekahi mau poai o na ili keokeo hoopoino Lahui.  E ka hoaloha maikai, ka nupepa Kuokoa, ke i aku nei au ia oe, ua nui ka poe enemi i ka pono ma keia mau Apana kuaaina a na lilo lakou i poe enemi no na kahuna o na aoao elua, oia hoi @a hoomaha.  Nolaila, mai hoolohe oe i ka lakou mau olelo, e paipai mai oe me kou leo mana na hoahanau o keia mau Apana e aloha i na Kumu a e kokua e like me ka me i hooholo ia.  Me ka mahalo.

 

PUUIKI.

 

MAKE I ALOHA NUIIA.

 

E KA NUPEPA KUOKOA E.  Aloha oe:––

            E oluolu oe, e hookomo iho i ka'u wahi puolo ma na kolamu kaawale o kou kino holookoa.  No kela mau hua e kau ae la maluna.  "He make i aloha nuiia."  Ua hanau o Kepohoni ma Keei, Kona Hema Hawaii, i ka la 20 o Dec. 1825, a ua lawe aku la ke Akua i kana o ka uhane, a waiho iho la i ke kino lepo, a hoi aku no ia i ka lepo ma ka la 28 o Maraki 1875, oia ke awakea la Sabati, a nolaila, o kona mau la ma keia honua, he 49 mak. me 3 mal. me 8 la.  A nolaila, ke noho nei makou na keiki me ka wahine na kaikuaana, na pokii, na moopuna, a me na kini lehulehu no a pau, me ka u me ka minamina paumako ia ia.  A ke haku iho nei makou i wahi kanikau aloha nona, oia keia.

 

Kanikau aloha keia nou e Kepohoni,

Aloha ke kane ka hoapili o ke kino,

Hoa ohumu o ke kuluaumoe,

Moe a huli ae, aole iho nei oe,

Hopu hewa ana au i ko kinowailua,

Elua au hana e u nei,

O ka minamina pau ole i kuu kane,

Kuu kane mai ke kai malino a Ehu,

Mai ka makani kupa o ka aina la he Eka,

Aloha ka wai i ka maka o ka opua,

Ke h@i ia mai la i luna o Alanapo,

Poniu kuu maka i ke aloha o kuu kane,

Kuu kane mai ke pili enaena i ka la,

Mai ka uka anuanu o ka Aone,

Aloha ia wahi a kaua e noho ai,

O mai nei ke anu o ka uka o na ulu Waeli,

Weliweli wale hoi ke aloha ke hiki mai,

O kuu pua rose ua hale e,

Auwe! kuu kane hoi e;

 

DEB@RA. NAHLOA.

 

Kanikau aloha keia nou e papa Kepohoni,

Kuu makuakane mai ka moku lewa i ke kai,

Mai na ale huli lua la o Alenuihaha,

Haha hewa ana au i ko kino wailua,

Ei aku nei paha oe me Lilinoe i ka uka,

Me ka wahine aahu kapa o-u holowai o Laa,

Laahia au i ke aloha o kuu makuakane,

Kuu makuakane mai ka malu hale o Halehui

Oia home lai a kaua i noho ai,

I alo aku ai kaua ina po anu o ke kehau,

Au ae nei kuu maka o kahi e ike ai,

Ei aku nei paha oe me Laieikawai,

Me ke kupueu la o Paliuli

Uli ko ili wela i ka ipo ahi,

Kuu makuakane mai ka malu lau o ka manako,

Ua ko aku la hoi ka inaina a ka make,

Ake aku ka manao e ike i ka lai o ke kaona,

Ona wale mai no ke aloha o kuu makua,

Aloha ka Nekina i ka hooke a na haole,

Aloha Polelewa i ka huikau o na kanaka,

Aloha Ulakoheo i ka ia mili lima,

Ake aku ka manao e ike i ka hono o Piilani,

He lani nui ka makua he lei mae ole nau e,

Auwe! kuu makua e; kuu puarose ua hala;

 

MEKA. MANINI.

 

Kanikau la he aloha nou no e Kepohoni,

Kuu makuakane mai ka hale paa i ka ohu,

Mai ka malu inia la o Pauoa,

Aloha ia wahi a kakou i noho ai,

Kuu makuakane mai ka hau pupuu anu,

Hoopumehana i ka wai a ka haole,

Kuu makuakane mai ka ihona la o Koleaka,

Hoomaha aku i ka olu o Kawaiahao,

Haohao iho nei au i ko kino wailua,

Mahea la oe i nalowale iho nei,

Kuu makuakane mai ka malu niu e Hauiki,

Aloha ia wahi a kakou e noho ai,

Kuu makuakane mai ka pali kaulana o Manuahi,

Ahí mai nei loko i ke aloha o kuu makua,

Kuu makuakane mai ke kai nehe e Akiahala

Hala oe ka makua kaumaha au i ko aloha,

Kuu maku'kane mai ka la wela o Puuokapu

Mai ka lepo ula la e Kaneinuwai,

Kuu maku'kane mai ka ai hakina a ka manu

Uwe helu mai hoi o Rebeta,

Aloha ino no o kupunakane,

Auwe! kuu makuakane e; kuu pua-rose hoi

 

LUCY. KALAI.

 

Kanikau aloha keia nou e Kepohoni,

Nou paha ka uhane iluna o Puoina,

E kilohi ana i ka hono o na moku,

Moku kaua e ka makua la kaawale oe,

Pau ko'u lohe ana i kou leo,

Kuu makuakane mai ka wai puka iki a ka haole,

Oia wai kaulana o ke aupuni,

Ua puni au i ke aloha e noho nei,

E hoona ae ana i kahi e nalo ai,

Kuu makuakane mai ka piha uwa o ka uapo,

Ua apo mai la na lima o ka make ia oe,

Auwe! kuu makua e, kuu pua-rose ua hala.

 

ACHEONG PAKE.

 

Kanikau aloha keia nou e Kepohoni,

Kuu makuakane i ka hale kaupoku ole la he

Oia hale malu i ka leo a ke aloha,

Aloha ka malu o ka wi a kakou e noho ai,

E hoona ae ai i ke awakea la wela,

E luana ai hoi ina po mahina konane,

He nane ka kuu maku'kane he huna nalo e,

Kuu makuakane mai ke one lohi o Kalia,

Aloha ia @ula loa a kakou e hele ai,

E noho aku ai kakou i ka hale kanaka ole,

I hoolau kanaka i ka leo o na keiki,

I hoomanawanui ai i ke anu o ka makani,

Oia anu ua mehana i ko poli @ ka makua,

Kuu makuakane mai ka aina makua ole,

Kuu makuakane hoi i ka hale makua ole,

Kuu makua mai ka ua popo kapa o Nuuanu,

Anu au maeele i ko aloha e noho nei,

Ke hoope ae ia ka ua i ke kawelu o Lanihuli

I @uli ae nei i ko aloha, aohe e loaa,

Ua lilo aku la paha oe me Poliahu,

Me ka wahine @ kapa hau o kanahele,

Hele aku la oe i ka huakai hoi hou ole mai,

Manao ole mai hoi ina keiki,

I ka wahine hoi me na moopuna,

Auwe! kuu makua hoi e, kuu pua-rose na hala.

 

ANE. KEKAULEO.

 

Kanikau he aloha keia nou e Kepohoni,

Kuu makuakane mai ke kai hone i ka nuku

Mai ka makani wehe lau niu o ka le@e,

Ua ikiiki au i ke aloha o kuu makuakane,

Kuu makua mai k@ @a hoala hiamoe o ka'ina

Mai ka ia maka liilii o Puuhele,

Hele hookahi ka uhane aohe lua,

Elua @ aloha a'u e @ nei,

O ka minamina pau ia oe,

Kuu makuakane mai ka uka o Kakala,

E kala no la oe i uwe mai,

I aloha mai ai ia makou,

Ina keiki me ka wahine,

Ina moopuna hoi me na pokii,

Aloha i ka aina e; Auwe oe,

Auwe! kuu makuakane e kuu pua-rose ua hala.

 

HATTIE. KAAIHUE.

 

Kanikau aloha keia nou e Kepohoni,

Kuu kane mai ka ua i ka maka o ka opua,

Mai ka ai hua lewa la i ka makani,

Mai ke kai nae oni ole la e Halama,

Mai ke one lohi la o Pelekane,

Aloha ka Hae Hawaii i ka welo ae,

Welo aku la oe i ka 28 o Maraki,

Noho iho nei makou me ka @, kaumaha i ke aloha

O kuu pua i mohala i ke awakea,

I nohea hoi i ka aluna a ka la i Lehua,

Auwe! kuu kane hoi e, kuu pua-rose ua hala

 

SARAH. KALEO.

 

Kanikau la he aloha,

Nou no e Kepohoni,

He uwe helu mai o Manini,

Aloha ino no kuu makuakane,

Mai ka malu hale o Halehui,

Huihui au i ko aloha,

Ua hoi aku la oe i ka aoao mau o ka honua,

Haohao ka uhane i luna o Mililani,

A he lani nui no ka makua, na'u e hapai nei

Hamo hewa ana hoi au, ua hala iho nei oe,

I ka hora akahi o ke awakea,

Auwe! kuu puluna e, kuu pua-rose ua hala..

 

IOANE, ADAMU, KAPELA.

 

Kanikau la he aloha e,

Nou no e Kepohoni kuu makuakane e,

Ua hala e aku nei hoi oe la,

I ke ala hiki ole ke hoi mai e,

Au iho nei au aole i loaa e,

Ke hoaa nei au i ke makua ole la,

O ka makua no oe i noho ai au ianei e,

A hala aku @a oe luuluu au la,

Hele hookahi au he keiki makua ole e,

Ahea hoi oe e o mai ia'u la,

Auwe! kuu mea aloha he makua,

O kuu pua-rose hoi ua hala e.

 

SAM W.K. HALUAPO.

 

Kanikau la he aloha, he uwe! he uwe!

Nou no e Kepohoni he uwe! he uwe!

Ua hala e aku oe he uwe! he uwe!

I ka hora o ke awakea he uwe! he uwe!

Haalele mai nei oe he uwe! he uwe!

I ka pili la he keiki he uwe! he uwe!

Aia paha ka uhane he uwe! he uwe!

I ka lai o Kona Hema he uwe! he uwe!

Hemahema hoi ka noho ana he uwe! he uwe!

O ka hale makua ole he uwe! he uwe!

Hookahi hoi makua he uwe! he uwe!

O ka ili kea o Kina he uwe! he uwe!

Me oe ke aloha hope he uwe! he uwe!

O kuu pua-rose ua hala he uwe! he uwe!

 

D.W.K. Kepohoni.

 

Apua Honolulu, Aperila 7 1875.

 

            OLELO PANE IA HAILOHE––He makemake Oihana paha kou, a i ole he hilahila no ko hoohoka mau ia, ko mea i hilahila ai, a hele ai oe e hai i ka lohe hoopunipuni, i hoolaha ia ma ke kumu kula o Kahaluu ma na mea lealea, oia hoi (pepa pili ahi koe,) ua ike anei oe, o ka puke keia a ke kumu kula e ao nei i kana mau haumana?  He hai hoopunipuni ana keia au, a hoopihapiha ina olelo wahahee, i kumu e haule ino ai ke kumu e malama nei i ka Oihana.  E ke mea i ike eia kona hewa e ka papa kula, no kou nele olelo anei kou mea i @ai ai i ka lohe hoopunipuni, a i ole, he hilahila no ko ho@hoka ia ana iho nei, mai hooikaika ana e lilo oe i kumu kula, pehea la oe e lilo ai i kumu kula ? he hoopunipuni.  A ua hai pu aku no hoi oe i k@ haule ana o ka la 22 aole i kula ia e ka mea i noho ole mamua o keia au naauao hou, ina oe h@ kumu kula e ike ana paha oe i kahi puke a ke Kahu kula Nui i hoomakaukau ai (Alakai kumu kula,) mai hoopunipuni hou, a olelo w@h@hee, i ka maikai a me ka ino o keia kumu kula, no ka mea, aole na pepa lealea kekahi e ao ia nei ma keia hale kula.

 

J.J. KAUAPOAIHALA.

 

Kahaluu, K. Apr. 10, 1875

 

KA NUPEPA KUOKOA

E HOOPUKA MAU IA MA HONOLULU

I KELA POAONO KEIA POAONO

 

$2.00 no na mahina Umikumamalua

$1.00 "    "        "     Eono

 

ME KA HOOKAA MUA MAI.

 

NA OLELO HOOLAHA––aole e oi mamua o 10 laina no ka hoopuka hookahi ana, $1.00; alua puka ana he $1.50 hookahi malama, $2.00.  E UKU MUA ia mai ke dala o na Olelo Hoolaha e hoou@na@a mai ana e pai.

 

O NA UKU A PAU E HO@KAA MUA MAI NO––aole e kau @a ka inoa o kekahi haole a kanaka maoli paha, ma ka inoa o ka poe lawe pepa ke ol@ @ hookaa e mai mamua.  E pono e hiip@ kela mau rula, no ka mea, he emi no ka auhau no ke@a nupepa.

 

AIA KE KEENA O "KE KUOKOA" MA KA HALE LETA HOU.

H. M. WINI.

Luna Hoopuka.

 

KO KALEPONI

LAAU KUNU OLA!

A ME KA MAI HANO.

 

He nui na Palapala mai na Haole e ae e hooiaio mai ana i ke Ola io maoli o keia Laau Kunu a Hano.

 

O KEIA KA LAAU OLA A MR. F. L. SUCH NO NA MAI

––MA KE––

Ake-Mama, ka Ha o ka Leo,

Ke Anu, ke Kunu, Kunu Kalea,

Na Eha a pau ma ka Puu.

 

E OLA NO HOI NA MAI HANO IKAIKA, KA UMII I KA HAUPO

A o ka poe Mai Ai-ake e loaa no ka oluolu nui ia lakou, ke ai i keia Laau.

NO LOKO MAI O NA LAU NAHELE KEIA LAAU, AOHE MEA INO O LOKE NA KA POE E LAWE ANA E IKE I KA OIAIO.

 

Na Rula o ka inu ana:

            No Kanaka Makua––2 puna nui, i ekolu inu ana i ka la.

            No Kamalii––1 puna nui, i ekolu inu ana i ka la.

            No Kamalii Aiwaiu––1 puna ti, i ekolu inu ana i ka la.

A ina e mau ana no ke koii o ke Kunu, inu iki no mawaena o na inu ana ekolu.

            No ka Hano––e inu i ka wa e hiki ai ka ho, a mahope iho.

            No ke Anu––Aia no i ka wa e inu ai, o ka po a me ke ao.

            No ka Puu Eha––E hoonui a e inu pinepine a hiki i ka emi ana o ka eha.

            No ka Eheehe––E inu liilii me ka hana mau nae.

            No ke Kunu Kalea––E inu no e like me ka ikaika o ke Kunu.

            No ke Kaniai Eha––He pono inu no, a aole e emi o ka pau no ia o ka eha, a poha maikai ka lea.

 

            E loaa no keia laau lapaau ma ka Hale Kuai o

DILLINGHAM & CO.,

 

Ahikoe Ano hou.

 

Ma ka Hale Kuai Mea Hao o DILLINGHAM & Co., e loaa ai keia Ahikoe maikai.

He Hookahi Tausani a me na Haneri keu no ka KENIKENI.  Nani maoli no keia Nuhou o ka Haole.

 

DILLINGHAM & CO.

Alanui Alii