Ka Nupepa Kuokoa, Volume XIV, Number 34, 21 August 1875 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

E Pau na Pupupu Kahiko!

 

E pani me na Hale Laau!

 

PAPA, PAPA, PAPA

 

O KELA ME KEIA ANO

 

- A ME-

 

NA LAKO KUKULU HALE

 

O KELA ME KEIA ANO, MA KA

 

PA-PA O S. G. WAILA MA!

-KIHI O-

ALANUI PAPU me ALANUI MOIWA-

HINE, no ke Kumukuai HAAHAA

LOA! ae like ka nui me

ka makemake.

 

LAAU NOUAIKI!

NA LAAU KAOLA,

            NA PAPA MANOANOA,

                        NA PAPA HELE,

                                    NA KUA,

                                                AAHO,

                                                            AAHO LIILII, &e

 

LAAU ULAULA!

NA LAAU KAOLA,

            NA PAPA MANOANOA,

                        NA PAPA HELE,

                                    NA KUA,

                                                AAHO, POU

                                                            AAHO LIILII,

MOLINA, &e

 

Pili Cida keokeo, Pili Laau ulaula,

Na Puka Hale, o na ano a pau,

Na Puka Aniaui, o na ano a pau,

Na Olepelepe Puka, o na ano a pau.

 

Pepa Hale me na lihilihi.

 

NA LAKA PUKA

NA AMI-PUKA,

            NA AMI-PUKA LIILII,

                                    NA KUI NAO

 

            PENA, AILA-PENA, VANIKI,

                        WAI HOOMALOO.

 

PAAKAI Helu 1,

O PUULOA

 

            E lawe wale ia no na mea i kuai ia keia Pa Papa aku a i kahi o ka mea i kuai mai, ina ma ke kaona nei, a me na Awa o keia Paeaina e like me ka aelike.

 

Aia maanei ke Keena o ka

            MOKUMAHU “KILAUEA,”

                        L. MARCHANT, Kapena.

 

                                    S. G. Waila ma.

                                    709 3m 721

 

 

HE KAAO GEREMANIA

-NO KE-

KAIKAMAHINE NENE

-MA KA-

PUNAWAI.

 

[Unukiia no ke Kuokoa.]

 

            Mahope iho o kona hiamoe ana no kekahi manawa, hele mai la ka luahine a hooluliluli ae la iaia a hiki i ka wa a ke Couna i ala ae ai.  “E ku ae iluna,” wahi a ka luahine, “aole e hiki ia oe ke noho maanei.  He oiaio ua hana oolea aku au ia oe, eia nae, aole i liko kou ola.  Ano, ke haawi aku nei au i kou uuku makana; aole nae ia he dala, aole no hoi he waiwai, aka, he mea i oi ae ka maikai.”  Me keia mau huaolelo i waiho iho ai he wahi buke nuku iloko o kona mau lima, i okiia mailoko ae o ka momi hookahi, me ka huaolelo, “E malama maikai oe i keia, a nana e hhawi mai i kou pomaikai.”

            Ia wa, ku ae la ke Couna iluna, a ike iho la ia ua pau kona maluhiluhi, a hoi hou mai la kona ikaika a me ka oluolu pu iho; no ia mea, kunou aloha aku la ia i ka luahine no ka makana, a huli aku la hele ma kana huakai hele me ka nana hou ole loa i hope no ke kaikamahine ui.  A iaia i hele aku ai a loihi, lohe aku la ia i ke kakani o na nene ma kahi mamao aku.

            Ku haohao iho la ke Couna iloko o ka ululaau no na la ekolu mamua o ka loaa ana iaia o ke alanui e puka aku ai, alaila, hele mai la ia a hiki i kekahi kulanakauhale nui, kahi ona i alakaiia aku ai i ka Hale Alii kahi a ka Moikane a me Moiwahine e noho ana maluna o na noho alii, no ka mea, aohe poe i ike iaia.  Malaila oia i kolo aku ai a imua o ka Moiwahine, unuhi ae la i kana buke makana, a waiho iho la ma na kapuai o ka Moiwahine.  Kahea mai la ka Moiwahine iaia e ala iluna a haawi mai la i ke buke; aohe i hemo lea ae ka buke i ka wehe ana a ka Moiwahine a nana iho ia loko, haule iho la ia me he mea make la maluna o ka lepo.  No keia mea, hopuia mai la ke Couna e na kauwa a ka Moi, a mai lawe ia oia i ka hale paahao ina aohe  I leha ae ko kaMoiwahine maka a noi mai e hookuu iaia, no ka mea, ua makemake ia (Moiwahine) e kamailio malu me ia, a no ia mea, e haalele ka poe e ae i ke keena.

            I ka wa i koe hookahi iho ai o ka Moiwahine, hoomaka iho la ia e uwe haaloulou me ka olelo kaukau mai, “Heaha la ke kumu o keia mau hanohano a pau e poui mai nei ia’u, oiai i na kakahiaka a pau e kaumaha a e kumakena mau ana au!  Ua hanauia mailoko aku o’u he ekolu mau kaikamahine, a o ka hope loa o lakou, ua nani loa; ua kuhihewa ke ao holookoa he mea kupanaha.  Ua keokeo ia e like me ka hau, na ulaula hoi e like me ka pala ana o ka ohia, a o kona lauoho, ua like me ke aiai o ka la lilelile. Ina e uwe, ua like kona mau waimaka me he mau momi la e helelei ana.  I kona wa i umikumamalima ai makahiki, kauoha ae la ka makuakane iaia a me kona mau kaikuaana e hele mai imua o ka noho alii, a ia wa i kaakaa pono mai ai na maka o na makaainana i kona wa i komo mai ai, no ka mea, ua like kona helehelena me ko ka la.  Alaila, pane aku la ka makuakane i keia mau olelo:  “E kuu mau kaikamahine, aole au i ike i ko’u mau la i koe, a nolaila, i keia la e koho aku ana au i ka oukou mau hana pakahi i ko’u wa e make ai.  E aloha mai oukou a pau ia’u, a o ka mea oi o ke aloha o oukou ia’u, iaia e lilo ai ka hapa maikai loa o ke aupuni.”  Olelo like aku la no nae lakou pakahi, ua aloha like no lako iaia; alaila ninau aku la ka Moi ia lakou i ka hiki ia lakou pakahi ke olelo ponoi mai me ka makemake io, pehea la ka nui o ko lakou aloha, alaila hiki iaia ke noonoo.  Nolaila pane mai la ka hanau mua, ua aloha au ia oe e like me ke kopaa momona, i ka lua iho, ua aloha au e like me ka aahu nani; aka o ka muli loa, noho mumule iho la ia.  Ninau aku la ka Moi i ka muli loa, “E kuu kaikamahine aloha, pehea ka like o kou aloha no’u?  Pane mai la ia, “aole au i ike, a ina e hoohalike ae ua like me ka ole.”  Hookikina aku la kona makuakane iaia e pane mai, a mahope loa pane mai la ia, “o ka mea ai oi loa, he mea ono ole ia ia’u ke nele ka paakai, a no ia mea, ke aloha nei au ia oe e like me ka paakai.”  No keia pane, ua huhu loa ka Moi, a hooho mai la, “ina i aloha mai oe ia’u me he paakai la, e ukuia aku no oe me ka paakai.”  No ia mea, mahele iho la ia i ke aupuni wawaena o na kaikamahiine mua elua; a kauoha ae la ia e hikiia one eke paakai ma na kipoohiwi o kana kaikamahine muli loa, a na na kauwa kuapaa elua e alakai aku iaia a iloko o ka ulunahele hookuu aku iaia e hele auwana.  Uwe iho la makou a pau me ke noi ikaika aku i ka Moi, aka aole i hoomaaliliia kona huhu.  Eia ka mea haohao, aole oia i uwe mai, i hookoloia aku ai la hoi ma na wahi a kona mau waimaka momi e haule iho ai!  Mahope iho, mihi iho la ka Moi i kona hewa, a kauoha ae la e huliia kana kaikamahine, aka aohe nae loaa iki.  A oiai e ku nei au i keia manawa me ka manao malia ua pau aku la ia i ka ai ia e na holohholona hihiu, aole nae au i ike i ka mea e hoomaalili ai no keia kaumaha, aka, he nui nae na manawa a’u i hoao ai e hooluolu ae i keia kaumaha me ka manao hoolana, aia no la ia ke ola maikai la ua hunaia iloko o kekahi ana, a aia la malalo o ka malama maluhia ana a kekahi mea i loaa ai ia.  Aka ia’u i wehe ae nei i ko buke momi, ike koke iho la au i kekeahi lau momi i like loa me kona waimaka, a he mea e ka ehaeha o ko’u naau i ka ike ana i ka hiohiona o keia momi.  Ano, ke koi aku nei au ia oe, pehea la i loaa mai ai ia oe keia momi.” 

Hai aku la ke Couna i ka Moiwahine, i loaa mai ia’u keia momi mai kekahi wahine luahine mai e noho ana iloko o ka ulunahele, he mea la, he ano kupua; aka o kahi o ko kaikamahine e noho la, aole oia i ike, a i lohe nona.  Nolaila, hooholo iho la kaa Moikane a me ka Moiwahine e imi aku i kahi e loaa ai o ka luahine, malia o loaa mai iaia kekahi mea hou e pili ana i keia momi.

            Aia no ka luahine ke noho la iloko o kona hale waonahele e hookaakaa huila lopi ana.  He poeleele e no ia wahi, a o ka pu-a wahie e a ana malalo ae o ka honua, ka mea nana e haawi i ka malamalama uwiuwiki.  He wawa wale no mawaho; e hoi mai ana na nene mai na kio wai mai, me ke kakani o na nuku.  Aole e liuliu iho mahope o ka loheia aua aku o keia mau mea, komo mai la he kaikamahine, aka aole nae e ikeia aku ka luahine e awihi aloha aku ana, a o ka oni wale no o ke poo.  Noho iho la ke kaikamahine, hooniniu ae la i kana huila hana lopi, a hana aku la e like ka hikiwawe me ka kamalii wahine liilii.  Me ia ano laua i noke ai no elua hora, me ke kamailio ole aku o kekahi i kekahi, a hiki i ka wa e nakeke mai ai ma ka puka aniani o kekahi mea, a ina e nana aku, he elua mau maka nui hulili e leha mai ana mawaho.  O ia mea, he pueo, ekolu ana kani ana mai, alaila, nana ae la ka luahine iluna, a olelo mai la, “Ano ka manawa e kuu kaikamahine, nou e hele aku ai i waho, a hoomaka aku i kau hana.

            Kua ae la ke kaikamahine a hele aku la i na wahi kio wai e waiho ana iloko o na awawa hohonu.  A mahope hiki mai oia i kekahi kahawai ma kahi a na laau ota ekolu e ku ana, a ia wa e puka mai ai ka mahina piha maluna ae o na kuahiwi, a pa konane iho la maluna olaila, e like kona malamalama me ka hiki i ke kuikele ke lalauia iho a lawe ae mai kona malamalama ae.  Wehe ae la ia i kona uhimaka, ka mea e palulu ana i kona mau maka, alaila, lele aku la iloko o ka wai, a kaulai ae la i ka wa a ka mahina e konane ana.  A pehea ko kaikamahine hihiona!  E like me ka nui o kou iini.  Haule mai la kona mau owili lauoho gula me he mau kukuna la o ka la, a i ka wa ana e wehe ae ai i ke kapu ana e uhi ana, alaila ua puni loa kona kino holookoa. O kona mau maka wale no ke ike ia aku e amo mei ana iloko o ia paa, me he mau hoku la e amoamo mai ana iloko o na aouli o ka lani, a o kona mau papalina, e like me ka lehua ula o na kuahiwi.

(Aole i pau.)

 

KA HAOLE HOOMOE WAEA

OLELO.

 

            Ua haalele aku o Cyrus W. Field, ka haole hoomoe waea moana kaulana ia Ladana, a ua hole mai i Nu Ioka.  Ua haha iho nei oia i ka pana o ko Beritania lehulehu me ka moana Pakipika, ka mea ana e lia nei, oia kaa misiona e hoomoe aku ai o keia mau makahiki iho.  No keia waea ke makemake nei oia i puu dala he umi miliona ka nui, a aohe kanaluaia, e loaa ana no iaia kela puu dala.  Malia paha aole e liuliu aku ana, ke manao la na kanaka o Enelani, o Mr. Field wale no ke kanaka e hiki pono ai iaia ka hana me ka hololea.  Iloko o ia wa, he lehulehu wale no hana waea olelo e ae ana e hoopapau ai i kona manawa.  O ka holomua ana o ka Ahahui Hoomoe Waea Olelo mua loa o ka Atelanika mahope o kona hoemi ana i ka uku huaolelo waea, aole ia he mea e hoopohihihi aku ai i ko ka Ahuhui manao maikai a me kona poe kuleana io a me na alakai-oia paha me ka Ahahui Hoomoe Waea Olelo pololei.  Ua hoomaopopo, ua hoomaka keia Ahahui maluna ae la, ma ke silina o ka huaolelo hookahi.  I keia wa, ke olelo ia mai ne aia he wahi hapakue o keia waea, ma kahi he tausani anana ka hohonu o ka moana ma keia huli o Nu Founalani, a oia ka Parade i holo aku nei e hana hou.  Ina e paa ae keia i ka hanaia, alaila, e ike auanei kakou i kekahi mau uku hoemi, no ka pomaikai o ka lehulehu a me kona poe kuleana io.  O ka uku elua silina o ka huaolelo, he uku kiekie loa ia.  Aole e hiki ana i ke kane kakai pokole ke ae e uku i hapalua dala no ka huaolelo hookahi i kela a me keia kakahiaka no ka ninau ana i ke ola o kana wahine e noho ana ma kela aoao o ka Atelanika.  O ka hiki iaia ke uku i ka uku hapa iho malalo o kela, he ninau ia e noonoo ia ai.

 

HE PANE IA HULALI-KA-PU.

 

E KA NUPEPA KUOKOA E:  Aloha oe:-

            E ae mai e kamailio hou o Gomera Kauanaulu, me Hulali-ka-pu:  oiai, ke ekemu mai nei kela pepa Buke I Helu 33, no ka loaa o ka laau i ko-o ae i ka waha ona; a ke koi mai nei, e hiki no ka ke kapaeia ka rula o na wahi kiai, “hiki io no ia oe no Kahikinui.”

            E Hulali-ea-pu-e, aole e hiki ke kapaeia ka rula o kahi kiai, i lohe palua oe; oiai ua hoike aku au ia oe mamua.  O ka alua o ka manawa, a me na ‘lii koa, ka mea nana e pale i ka nana o ke koa kiai, me kahi kiai.  O ka makou ia la; o ke kapa rula no kau, la?

            Ke kamailio hooniole hou mai nei oe, me he opu kee moa ala, ke olelo mai, “E ko-o ka waha akea, a kuhea i keia mea e laina koe ia no koa.”

            Ua manao anei oe, o ke koa kiai e ku ana ma kona wahi kiai, ua nele oia i ka pane leo ole, a me ka papa ana kau.  Ua hana ke koa e like me ia mea, ua pepa aku, me ka leo hoomalu, i ka ike ana i ka hakaka, aole i hoolohe mai na mea hakaka na ka eha hikiwawe i loaa i kekahi o laua, ka pau koke ana.  O ka’u ia i lohe oe.  O kau e kamailio mai nei, “aia wale no i Puna i ke au a ka hewahewa,” a ua koho no oe me ko kii i kalai ai.  Hulali io no ko pu.

Oia ka mea i hiki ai ke ninau ia ia oe, a eia ka ninau; mahea ka Buke rula koa, o na koa Hawaii nei, e olelo mai ana, he hiki ke kapaeia na rula, o kahi kiai, e like me kau e liki nei, kapae rula?

E hoike mai oe me ke kuhikuhi pololei loa, i loaa ka pono ia oe, ke olelo mai nei oe, “o kekehai kaho-aka e ae paha, i wai no iau hoailona no ka poino e hiki mai ana.”  Auhea oe e Hulali-ka-hinu-hinu?  O ka makou ia, aole ia o kau, ke ike makou e kokoke aku ana i kahi o ke kahoaka, na makou ia hana, aole ia nau; eia nae, ia oe ka mahaoi o ke ao mai.  Heaha kou kuleana ma ka makou hana?  O oe anei ko makou Generala, a me ko makou Kapena, a o oe anei kekahi o ko makou mau alii koa?  e hiki ai ia makou ke hoolohe i kou makemake, “kapae rula? He wini ia la, i lohe oe, nana iho.

Auhea oe e Hulali-ole-wale, ke pane mai nei oe, “he nana maka, he hoowahawaha i ke maluhia o ka pa Alii,” a me ko makou mana kiai, e hoike maoli ana i ka lolo i oi aku mamua o ko kii i kalai ai Ea, poho io iho la ka oe, lilo kekahi lihi o ko aina o Hamohamo; ia Punana me, pela anei?  Ae, oiaio, oia no.  Ua waiho aku au i ka ninau ia oe makua, no kahi lilo o ka pa lii ia Hika ma, e heaha mai kau? Auhea ka haina oia ninau?  Like no oe me ko kii ka leo ole.  E! hiamoe oe, haule ko pu ilalo, pau ka hulali.

Ke nome hou mai nei ko wahi waha, ua maopopo wau ia oe, a he ake nui e kalai malalo o na rula kuaaina.  Haliu mai ko pepeiao a hoolohe, aole a makou buke rula i paiia ma kuaaina, no Honolulu nei no ka makou.  O kau Buke Rula no kuaaina ia, I ka wa o Lonoikamakahiki, i ke au ia Kakuihewa, i kau ia ka inoa mawaho:  “Kapae Rula”

Ke ao aku nei au ia oe, e waiho i kela buke rula au ma kuono, mai kilohi hou i kona mau aoao; o maa oe i ke kapae rula koa, poino oe, malia o hiki mai8 oe ia-nei, a kapae ae i na rula o ka makou hana.  lohe mai o Kauai i ka uina o ko lae, aloha wale oe.  E oki au maanei, hoolono aku o ka pane ia mai.  GOMERA KAUANAULU.

Hale Koa Augate 16 1875.

[Auhea oe e Gamero K., ua hala loa kau pane mawaho ae o ka mea i kamailio muaia-a ke kuawili mai nei oe no ka hulali o ka pu, ua eha konikoni paha-a ke hoohalahal loa nei hoi oe no kahi i paiia ai ka buke rula, he lalau ia o oukou.  Ina no i kuaaina kahi i paiia’i a ua akamai na hooponopono ana, ua alo alii ia buke; a ina i kahi alii ke paiia’na, a hemahema na hana, ua kuaaina loa ia buke rula, mai noho oe e hookaumaha ma ia mau lala, o hai no ka mea he maloo,  Aka, o ko makou manao maoli, aohe e hookomo hou i kau opala ma keia hope aku  No ka hoa lea e kalai mai ia oe e kanai-kanana ma keia pule ae, oiai ua lohe makou ua makaukou oia.  L. H. ULELE.]

 

NO KA HOOULU LAHUI.

 

He mea keia na kakou i kamailio nui ai iloko o keia au e hele nei, mamuli o ke alakai ana o ka poe kalai manao; nui wale na kumu i hoikeia e ka poe manao: A me ka poe noiau, no ka nana ana i ke kumu no ka ulu ana o ka Lahui, a me kona emi ana, aka, o ka mea i ninau anui ia i keia wa, “O ka Hooulu Lahui.”

Oiai ka Moi Kalakau ma ka noho alii i keia wa, ka Moi hoi nana i hoolaha ae i kona manao aloha Lahui he aupuni Hooulu Lahui kona.

A na ia manao i kono mai ia’u e kamailio aku no kekahi kumu paakiki, a mamuli o na kumu, ua lilo ia i ki nana e hoopaa i ka ulu ana o ka Lahui, nolaila, e na makamaka mai Hawaii o Keawe a Kauai o Mano Kalanipo.  Ka poe noiau ma ke kalai manao; ke kuhikuhi puuone no na puuwai aloha Lahui, aloha ‘Lii; e nana pu mai kakou i keia kumu ino nana e lumai nei i ka Lahui.

Eia no ia, o ka hoomanakii oia ka hiki mua, o ka haawi ana, oia kona ukali.  O keia iho la kekahi kumu nana i kaohi i ka ulu ana o keia Lahui.

He aupuni hoomanakii keia i ka wa o Kamehameha I a mamua aku a make o Kamehameha, lilo ke aupuni i kana keiki ia Liholiho, a ia Kaahumanu ka malama aupuni.  Ia wa hiki mai o Binamu ma me ka olelo a ke Akua, huli nui na ‘lii i ka palapala a me na makaainana, aoia lakou e hoopau i ka hoomanakii, mahope iho hoohioloia na akua kii, mai Hawaii a Kauai, pau na heiau, me na kuahu, na kapu, pau loa lakou, na mohai kanaka e kauia’i i ka lele, puaa, niu, maia, a pela aku.  Aoia hoi keia Lahui e malama ia Iehowa ke Akua hookahi, ia ia wale no, aole inoa e ae, aole kaula, aole lunaolelo.

            Oia iho la na hana no ka wa i hala, o ke keia wa koe.

            E huli ae kakou e nana i ka ukali o keia kumu manao-Oia hoi ka haawi ana.  I ka wa i hoopauia ai ka hoomanakii, oia ka wa a Kaahumanu i haawi ai i ke aupuni o kana mau keiki a me kaua mau moopuna i ke Akua, me ka olelo iho, he aupuni palapala ko a’u moopuna mahope aku; hookahi wale no Akua o Iehova o na kana.

            Ia wa apo mai no ke Akuo i keia aupuna a paa i kona poho lima me kona haawi ana mai i kona kanawai paa no keia Lahui, mai hana oe i ke kii i kalaiua nou aole hoi e hoomana ia lakou hali ae kakou a nana i ke kumu a me kona ukali.  Oia iho la ke kumu a kakou e noonoo ai.

            O ka hoomanakii i ka wa o Kaahumanu ua emi iho ia i ko keia wa, O a hoi ka kakou e kamailio nei, ua oi palima ko keia wa i ko kela wa.

            Ninau mai paha auanei o’u mau makamaka i ka hoomanakii o keia wa, ke hai aku nei au me ke kanalua ole, oia hoi keia, i na iho no na wahi akua unihipili e anee i@o la i na wahi hale e makilo ai i na wahi apu awa, oia kekahi hoomanakii paakiki mai kahiko mai a hiki i keia wa.  E nana ae i na kuakini Pope e ku nei mai Hawaii a Kauai, me na kuahu, me na kii me ka hoomana ia Maria, Petero e? e? e Hawaii ponoi, huli aku a nana i ka wa o Kaahumanu, ka mea nana i hoohiolo i na kii, e koe no ka ke kii a hiki i keia wa.  O ka hoohioloia ana o na kii, ua lilo i hoohiki paa i ke Akua.

            E nana aku i ka wa o ka Iselaela, hoomana lakou i na Akua kii huhu ke Akua, a haawi mai i ka mai luku, pela no keia Lahui ke hai aku nei au i na e pau keia kumu a huauki a maloo, alaila, oluolu mai no ke Akua, alaila e ulu no ka Lahui e pau ka hoomanakii, wahi a ke Akua ia Kaahumanu.        Owau no me ka aloha.

J. KAAHAMOA.

Kalaupapa Molokai, Augate 3 1875.

 

 

HE HANA KOHU OLE.

 

            Eia ma Haleaha, Koolauloa, kahi i ku ai o ka luakini Katolika, ua kokoke no i ko maua hale noho a no ko maua hele ole me ka’u wahine i ka pule, a koi mau mai ia maua e hele, aole nae o maua hele aku, a no ko maua hele ole aku, olelo mai la kela ia maua, “ina aole komo ma ko makou ekalesia, kipaku no ka hale olua, makou no keia wahi, ina olua huli mai pau no, kahi o ka hale o maua i ku ai no maua ia, o ka nui aku o ka aina no lakou ia.

            Ma ka la 25 o Iulai 1875, hopu kino iho la i na holoholona o maua no ka huli ole aku ma kona hoomana, oia ke kohu ole i hoike ia maluna, e nana pu mai kakou i keia hana uko ole a ke kumu pope i ke koi wale mai no a ka huli ole aku imi mai e hoopilikia.

J B KAIEWE.

Haleaha, 26, Iulai 1875.

 

 

KA LIMA I MAA I KA HANA.

. . . .

E KA NUPEPA KUOKOA E; Aloha oe:-

            Ma na la aku nei o ka mahina i hala, a hiki i keia la a’u e kakau nei i keia leta no na hana a ka luna hou o ka halemai Pupule, ke hana nei oia me ka hoomaemae i na hale a me ka hana ana i na wahi a pau i pau i ka popopo, me ka hooulu ana i na mea kanu, a me ka nana ana i ka@a mau hana ua ku maoli no i ke noiau, a me ke miki ala, ke hana nei oia (W B Wright) me kona mau lima ponoi, ma kekahi mau mea.  Aka, aole pela ke kanaka i na e noho ae ana maia kulana, alaila ina paha e noho ae ana kekahi maia wahi, alaila e lawe mai ana paha oia i kona puriti me kona uwati pakeke a hele mai i mua o ka poe i loaa i ka mai e like me kia (Pupule) aka, aole pela koia nei noho ana, ma keia kulana iloko o keia mau la.  Eia paha ke kumu, no kona maa i ka hana mamua, e like me neai.  O ka mea molowa e mau no kona molowa, a ka mea hana e mau no kona hana; no ka lawa o ko’u wahi manao, ke hooki nei au.  Me ka mahalo.

G W KAHOOHULI.

Halepupule, K. D. Aug 5 1875.