Ka Nupepa Kuokoa, Volume XIV, Number 35, 28 August 1875 — Page 1
| This text was transcribed by: | Shavonn Matsuda |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XIV. HELU 35. HONOLULU, POAONO, AUGATE 28, 1875. NA HELU A PAU 717.
E Pau na Pupupu Kahiko !
E pani me na Hale Laau!
PAPA, PAPA, PAPA
O KELA ME KEIA ANO,
A ME
NA LAKO KUKULU HALE
O KELA ME KEIA ANO, MA KA
PA-PAPA O S. G. WAILA MA!
KIHI O
ALANUI PAPU ME ALANUI MOIWAHINE, no ke Kumukuai HAAHAA LOA ! ae like ka nui me ka makemake.
LAAU NOUAIKI!
NA LAAU KAOLA,
NA PAPA MANOANOA,
NA PAPA HELE,
NA KUA,
AAHO,
AAHO LIILII, &c
LAAU ULAULA!
NA LAAU KAOLA,
NA PAPA MANOANOA,
NA PAPA HELE,
NA KUA,
AAHO, POU,
AAHO LIILII,
MOLINA, &c
Pili Cida keokeo, Pili Laau ulaula,
Na Puka Hale, o na ano a pau,
Na Puka Aniani, o na ano a pau,
Na Olepelepe Puka, o na ano a pau.
Pepa Hale me na lihilihi.
NA LAKA PUKA
NA AMI-PUKA,
NA AMI-PUKA LIILII.
NA KUI NAO
PENA, AILA-PENA, VANIKI,
WAI HOOMALOO.
PAAKAI Helu 1,
O PUULOA.
E lawe wale ia no na mea i kuai ia keia Pa Papa aku a i kahi o ka mea i kuai mai, ina ma ke kaona nei, a me na Awa o keia Paeaina e like me ka aelike.
Aia maanei ke Keena o ka
MOKUMAHU “KILAUEA,”
L. MARCHANT, Kapena.
S.G. Waila ma.
709 3m 72@
HE KAAO GEREMANIA
NO KE
KAIKAMAHINE NENE
MA KA
PUNAWAI.
[Unuhiia no ke Kuokoa.]
AKA, o ka wahine ui, aole ona naau ehaeha ; a noho iho la ia ilalo a uwe mao ole. E kulu ana he waimaka mai kona mau maka iho, a kahe aku la a hiki i ka lepo mawaena aku o na owili lauoho ; a iaia e noho iho ai, e loihi ana kona noho nanea ana ina aole e hooluliluliia kekahi o na lala o ia mau kumu laau. Aka ina e hooluliluliia ana, alaila e lele ana oia me he hulu manu la i puehu i ka poka a ka mea hahi holoholona ; a ia wa koke no e ikeia aku ai kekahi ao e keakea ae ana i ke konane a ka mahina, a malalo o ia malumalu i uhi hou ae ai oia i kona uhi maka, a nalowale aku la me ka hikiwawe. Holo mai la oia i ka hale kahi a ka luahine e noho ana, me ka haalulu ; iaia i hai aku’i i ka luahine i ka mea i ulia mai maluna ona, akaaka mai la ka luahine me ka olelo mai, ua ike e no ia i na mea a pau i ulia iho maluna ano. Alaila, alakai aku la ka luahine i ka wahine ui iloko o ke keena, a hoaa ae la i ka pua wahie, aka mamua o ka noho ana iho o ua ui nei e hookakaa i kana hulia hana lopi e like me ka hana mau, lawe mai la ka luahine i ka burumi a haawi mai la i ka ui e hoomaemae i ka lepo. “E hoomaemaeia a pau loa me ka maikai,” wahi a ka luahine i ka ui. “E ka makuahine,” wahi a ka pane aku, “no keaha la oe e hoomaka nei e burumi i keia hora aumoe loa o ka po? Heaha keia ou?”
“Ua ike anei oe o ka hora hea keia o ka po?” wahi a ka ninau a ka makuahine.
“Aole i aumoe loa, aka ua pau nae ka hora umikumamakahi,” wahi a ke kaikamahine.
“Aole anei oe i hoomanao,” wahi a ka luahine, “i keia la i piha ai na makahiki ekolu o kou noho ana me a’u? Ua pau kou manawa e noho ai me a’u ; aole e hiki ia kaua ke noho pu hou aku a loihi!”
“Auwe! e kuu makuahine aloha, e kipaku ana ka paha oe ia’u,” wahi a ka wahine ui me ka leo kaumaha, “i hea aku auanei au e hele ai? Aohe o’u hale, aohe no he mau hoaloha, a i hea la auanei au e moe ai? Ua hana aku au i kau mau hana a pau me ke pakike ole, a ua lawa oe no ka’u mau hana a pau ; mai kipaku oe ia’u e hele!” Aole i hoike e aku ka luahine i ka mea e hiki mai ana, aka eia kana olelo hookamaemae, “aole e noho loihi aku ana au maanei, pela no hoi au e kali aku ai a hiki i ka pau ana o ka hale i ka maemae, nolaila mai hoopohala mai oe i ko’u manawa hana, a e hoopau i kou manao no kau mau hana mua, e loaa ana ia oe he hale nou e noho ai a me ka makana a’u e makana aku ai ia oe, a e makemake pu ana no oe.”
“Heaha ka mea e hiki mai ana,” wahi a ka ninau a ka wahine ui.
“Ke olelo aku nei au ia oe, o ka lua keia, mai hoopohala mai oe i ko’u wa hana. Mai kamailio mai oe i hookahi huaolelo i koe, aka, e hoi oe iloko o kou keena iho, a wehe ae i kou uhi maka, a e komo i ka aahu maikai au i hele mai ai oe ia’u, alaila, noho malie iho oe maloko o laila, a hiki i ka wa a’u e kahea aku ai ia oe.”
Maanei e huli ae kakou i ka mea i ulia iho maluna o ka Moikane a me ka Moiwahine, i ka wa a laua i hoomakaukau ai e hoouna aku iloko o ka ulunahelehele e huli i ka luahine. Ua hoouna e ia ke Couna mamua i ka po, a he elua la ana i huli ai mamua o ka loaa ana o ke alanui pololei e hiki ai i kahi o ka luahine. Ma keia ala oia i hele aku ai a hiki i ka lanakila ana mai o ka po maluna o ka malamalama ; alaila, pii ae la ia iluna o kekahi kumu laau e moe ai, no kona makau o nalowale auanei ke ke alanui ke hele ia i ka po. I ka wa i puka ae ai o ka mahina, e pii mai ana maluna o ka puu he aka, aole nae he laau ma kona lima, aka aole nae ona kanalua o ke Kaikamahine Nene no kela ana i ike mua ai e noho ana me ka luahine ma ka hale. “Oho!” wahi a ke Couna iloko iho ona ; “ei ae keia wahine kupua, a ina e loaa ana ia ia’u, e loaa wale aku no auanei ka lua!” Aka he mea e kona kahaha i ka ike ana aku i ka mea ana i ike mua ai, e ku ana ma kae o ke kahawai, wehe ae la i kona uhi maka a lele aku la iloko o ka wai e holoi ai iaia iho, me ke kuuwelu ana mai o kona mau owili lauoho gula, a oia ka mea nana i hooi ae i kona nani mamua o na mea nani e ae a pau ana i ike ai mamua! Aole oia i hanu lea iho, kiei aku la oia a loihi kona a-i me ka haka pono o na maka maluna o ua ui nei. No kona kiei loa ana aku a aui ke kaumaha, e hai iho ana he lala laau, a iloko o ia manawa koke no, o ka nalowale aku la no ia, a ike hou ole ia, na ke ao nae hoi i papalu ae i ke konane o ka mahina i hololea ai ka hele ana aku a ua ui la a i ka wa i aiai hou ai ka mahina, ua nalowale loa aku la ia mai ka ike aku a na maka. Nolaila, awiwi iho la ke Couna i ka iho ino ilalo, a alualu aku la mahope o ka ui me ka awiwi ino e ake o ka lea aku ; aka mamua o kona hala lea ana aku, ike aku la ia he elua mau aka e auwana ana mawaena o na kio wai i uluia e ka mauu. O ia no ka Moikane a me ka Moiwahine, ua ike e aku laua i ka malamalama o ke kukui mai kahi mamao aku mawaho o ka hale o ka luahine, a e hele awiwi ana laua o ka hiki aku ilaila. Hai aku la ua Couna nei i ka mea ana i ike ai ma kapa kahawai, me ka manao, o ke kaikamahine nalowale no ia a laua. Me ka piha i ka olioli, hele pu aku la lakou a hiki i ko lakou hiki ana aku i ka hale o luahine, a mawaho ae o ua hale la, e moe ana na nene, me ko lakou mau poo e pepee ana malalo o na eheu, a aole he manu i puoho ae i ko lakou hiki ana aku. Kiei like aku la lakou a pau iloko o ka hale, e niniu ana no ka huila hana lopi a ka luahine me ka leha ole ae o kona maka ma o a maanei, aka e ku nou ana imua a ihope. O ua keena nei, ua hele no hoi a maemae, me he mea la ua noho ia e kanaka o luna o ke ao, ka poe hoi aohe lepo o ko lakou wawae ke hele ; a no kekahi mau minute, ua ike maopopo lakou i na mea a pau o loko ; aka mahope loa, ike iho la lakou, o ko lakou wa laki loa ia, a no ka piha hoi i ka manao aa, kikeke liilii aku la lakou ma ka puka aniani. Ia wa, ea ae la ke poo o ka luahine iluna a nana mai la ia lakou me na maka oluolu, oiai e noho ana oia me ka manaolana e hiki mai ana lakou, a me ka leo nahenahe, kahea mai la, “komo nui mai, ua ike no au ia oukou a pau.”
I lawa no i ke komo ana aku o ka Moikane, ka Moiwahine a me ke Couna iloko o ka hale, o ka pane mai la no ia o ka luahine, “mai hooluhi ole ia olua ma keia huakai hele mai nei, ina aole oe i kipaku i ko kaikamahine ui a aloha iloko o ka waonahele i keia mau makahiki ae nei ekolu. Ua hele mai oia me ka hewa ole, a iloko o keia mau makahiki ekolu i hala ae nei, nana i hanai a malama na nene a’u; aole oia i lohe i kekahi leo ino, a aole hoi ona wahi kiko eleele, ua maemae oia a me ka maluhia. Aka, ua hoopai ponoia olua mamuli o ke kaumaha a me ka popilikia a olua i auwana mai nei.”
I ka pau ana o keia mau olelo, hele aku la ia i ka puka o ke keena a kahea aku la ia i ka puka o ke keena a kahea aku la i ke kaikamahine e puka mai i waho, a i ka wa o ke Kaikamahine Alii i puka mai ai, me ke kahiko silika nani, me kona mau owili lauoho gula a me na maka nonohea, ua like ia me ka anela e komo ana iloko o ke keena.
Pii aku la ia iluna, kahi a ka makuakane a me ka makuahine e noho ana, a haule iho la ia malalo o na a-i o laua me na honi hoomau ana, a piha ae la lakou a pau i ka hauoli a me ka olioli no keia hui hou ano, mahope o ke kaawale ana no na makahiki loihi. Aka i ko ke Kaikamahine Alii ike ana aku i ke Couna e ku pu ana me laua, puai mai la ka ula o kona mau papalina.
“E kuu kaikamahine,” wahi a ka Moi i ke kaikamahine, “heaha ka’u e haawi aku ai ia oe, no ka mea, ua hoolilo e aku nei au i kuu aupuni?”
“Aole ana mea e makemake ai,” wahi a ka luahine, “no ka mea, ua makana aku au iaia me na waimaka ana i uwe iho ai, a ua oi aku kona nani mamua o na momi e ae a pau i loaa ma ka honua nei, a ua oi aku kona waiwai io mamua o kou aupuni holookoa a pau. A no kana mau hana a pau, ua haawi hou aku aku au i keia hale nona.”
I ka pau ana o ka olelo a ka luahine, o kona nalowale aku la no ia, a mahope o ka loheia ana aku o ke kikeke malie ma na paia, ia wa i lilo ae ai ua hale nei i hale hanohano maikai, a o ke keena keia a lakou i noho ai, he hale nui iho la malaila, a mawaenakonu o laila, e ku ana he pakaukau nani me na lako a pau, me na kauwa e holo ana i o a ia nei.
Ma keia wahi i pau ai keia kaao, no ka mea, o kuu kupunawahine keia, ka mea nana i kaao mai ia’u, ua nalowale aku kekahi wahi mamuli o ka poina o kona noonoo, a nolaila i manao ai oia, o ka hopena iho la ia. Manao nae au, ua mare aku la ke Kaikamahine Alii ui me ke Couna, a ua noho la laua ma kela Halealii nanai, e like ka loihi me ko ke Akua makemake e hoola loihi ai ia laua. Aka, he haohao ko’u, malia o kela poe kuene e hio ana i o a ia nei, o na nene no paha ia a ua Kaikamahine Alii la e malama ana, ua hooliloia e ka luahine i mau kino kanaka, aole paha, aka, ua koho aku nae au, oia no. Nolaila, ua maopopo, aohe he kupua ka luahine e like me ka kanaka e manao aku nei, aka he wahine naauao maoli no. A me he mea la, oia no kekahi i ka wa i hanau ai ke Kaikamahine Alii, ka mea nana i hoo i ka mana e uwe mai i momi, aole ka waimaka maoli. I keia mau la nae, aohe ike ikiia o keia mau mea, a ina i hoomauia mai a hiki i keia wa, ina la ua lilo ka poe ilihune i poe waiwai.
KOHUOLE.
AUWE! ALOHA INO.
E KA NUPEPA KUOKOA E ; Aloha oe :–
Ma ka hora 9 o ka po o ka Poalua Aug. 10, 1875, ua kii mai na lima menemene ole o ka maka ia G W Kini he kanaka i aloha nui ia oia no ka miki ma na hana. Ua hanau ia oia i ka la 15 o Mei 1830 o ka nui o kona mau makahiki 45 me 4 malama 24 la, ua hala aku la ia no kana wahine ko’u aloha a me na keiki a me na moopuna. O ka nui o na keiki a ka mea i make eono. He kanaka i malama pono i na oihana a ke aupuni, ua malama oia i ka oihana kumu kula i na M H 20 a oi ana ka make i hoopau i kana oihana oia no hoi ke kahu kula Sabati o Konawaena a ua mahalo ia oia no ka makaukau ma ke ano kahu kula Sabati, aka nae hoi, ua olelo ia ma ka Baibala, Pomaikai ka poe make iloko o ka Haku. O ka mai i make ai he nahu he mai mau no ia iaia, a ua lawe palanehe ole aku la ka make iaia ma kela aoao o ka moanawai eleele a waiho iho la i ka ukana nui he aloha. E hoomanao i ka make e kau mai ana. Me ka mahalo,
J K KAIWIPUNAKEA.
Konawaena Augate 16, 1875.
KA MANA O KA PAPA PAI.
Ua hapai ae ka nupepa Kalepa o keia Kulanakauhale i ka manao, e hoolakoia kekahi o ko kakou mau oioi o ka luakini me na bele e hoolea ana i ke akea, me he mea la e himeni maoliia ana e ka leo kanaka, a ua kokua kekahi nupepa e ae ia manao, me ke kuhikuhi, o ka oioi o Kawaihao wale no kahi kupono. Ua hanaia keia ma na aina kahiko o kakou, a ua hoomau mai lakou a hiki i keia manawa. Nolaila i ike ai kamalii o keia mau nupepa, hoolaha aenei. He mea hou keia i kanaka Hawaii hele ole i ka pule.
Eia ka olelo a ka nupepa Mokupuni o ka la 20 o Augate i hala, “oiai e hoomakaukau ana o Amerika Huipuia no ke kulaia ana me ka olioli piha, no ko lakou lanakila ma na kaua no ko lakou kuokoa iho, i ka puni ana o na makahiki he haneri i keia 1876 ae, no keaha hoi kahi “Hawaii uuku” e hoomanao ole ai i ka la 18 o Ianuari 1878, no ka mea, oia no ka puni ana o na makahiki he haneri mai ka wai mai i ike muaia ai kakou e Kapena Kuke. Nolaila, aole anei he pono ia kakou e hoomanao ia la, ma ke kukulu ana i pa hoikeike lahui o na mea a pau, ma Kulaokahua, a malaila, e hoikeikeia ai na mea a pau o Hawaii nei, me ka pakui mai paha i na mea lealea, e laa ka oo-ihe, ke kinipopo, ka puhenehene, ka heihei waa, ke kukini, na hookahakaha koa a me na mea hooikaika kino e ae. Aohe mea kanalua e komo pu ole mai ana na kanaka maoli a me na haole ma keia mea ? oki loa.”
HE MOKUHAO KAUA BERITANIA PAA.
Ua hoolanaia kekahi moku hao kaua Beritania paa loa i kekahi mau malama aku nei i hala, mai Chatham mai, mawaena o ka 20,000 paha poe makaikai. O ka inoa o ia moku, o Alexandria. O kekahi keia o na moku paa loa mawaena o ko Enelani mau moku kaua, no ka mea, ma kekahi mau wahi, ua umikumamalua iniha ka manoanoa o kona pale hao, a o ka nui iho, ma kahi o ka eiwa iniha a hiki i ka umi. Ua kokoke e ekolu makahiki ka loihi o ka manawa o ke kapiliia ana o keia moku. Ua kapiliia keia moku no ka holo ma ka moana akea, me ka holo kupono a me ka lawe pu ana i na lako kaua kaumaha. Ke manaoia nei, e hookauia ana maluna o kona oneki elua he elua mau pukuniahi pa 25 tona ke kaumaha o ka pu hookahi, a he elua mau pukuniahi pa 18 tona pakahi ; a ma ka oneki o luna loa, mai ka ewalu ka umi paha tona ke kaumaha o ka pu hookahi ; a mamua a mahope i ka moku, he elua a eha paha mau pu kuniahi no ke alualu ana. Ua manaoia, ina e holo ana keia moku i ka wa malie, alaila aole e emi kona holo i ka 14 mile i ka hora. Ua olelo ka nupepa Manawa o Ladana, aole moku oi e ae mawaena o na aumoku e holo nei maluna o ka moana, koe wale no ka mau moku kaua Geremania, Kaizer a me Deutschlana, noka mea, ua hoolakoia keia mau moku kaua Geremania me na pu nunui a Krupp, ma ka pa 22 tona ke kaumaha o ka pu hookahi.
NA MAKE O KE AO NEI ILOKO O KA
hapalua mua o ka M.H. 1875.
O ka nui o na ola kino i make no ka wai halana, pau ahi, olai, ahulau, moku ili, makani ino, a pela aku, iloko o na malama mua eono o ka 1875, eia iho no ia malalo nei : no ka wai halana ma Farani, he 215, ( malia paha ua oi aku, aka o na ola kino wale iho la no ia i loaa aku) ; mai ka mai puupuu ulalii mai ma Fiji, he 50,000 ; no ka wai halana o Danube ma Pesth 600 ; mai ke olai mai ma Nu Gerenada, he 16,000,–no ke olai ma Asia Uuku, he 2,000 ; no ke olai ma na mokupuni ma Loialta, 2,000,–no ke olai ma Kalikohala Mekiko, he 70 ; mai ka wi mai ma
Asia Uuku, he 20,000 ; mai na moku poino mai ma ka moana,–oia o Sikila, 350,–Gotenabuga, 116,–Cadika 62,–Fu Sing 50,–Violette 42,–Vickburg 40,–Thornabia 29,–Cortes 26,–Keoki Batters 21,–Bride, Berar, Berelina a me ka Alice, he 20 pakahi, Lochnagar 16. He poino e ae no kekahi o na ola ma na wahi e ae, aole nae i haiia mai ka heluna ma na huahelu.
Mai na makani ino mai, ua make na ola e like me penei : Ma Honokaona, 500 ; Georia 317 ; Kile 60 ; Lousiana 20 ; Farani ; Misouli 6 ; Misisipi 11 ; Akanasau 5; Mikigana 3; Wiseconasina 3; Ilinoi 3; Karolina Hema 2 ; a ma Kanasa 1. O ka huina pau o na make i loaoia mai nei no na mea i hoikeia maluna, he 78,812, iloko o eono malama wale no, aka aole nae i pau pono loa.
I ka Poalima iho nei, ua hele aku kekati hapa nui o na kanaka o Honolulu nei e hookupu i ka Adimarala Beritani e ku ana ma ka nuku o Mamala. O keia poe, oia no ka hapa nune e noho naaupo.
Nu Hou o na Aina E .
Ma ke ku ana mai o ka mokuahi lawe leta Cyphrenes i ka auina la Poakahi iho nei, iloko o 23 la mai Kikane mai, ua loaa mai keia mea hou hoohikilele manao ina hoi he oiaio, oia ka hooholo loa ana o ka Ahaolelo o Kikane i ke kokua ana i ka Laina hou me ke kipa ole o na mokuahi ma Honolulu nei.
I ke kakahiaka Poalua nei, komo mai la ka Mikako mai Kapalakiko mai me na nu hou malalo iho :
Ua make emoole o Auaru Ioanekana ma ka la 31 o Iulai.
E holo ana o Col. Forney i Rusia e hoomalimali ai i ka Emepera o Rusia e komo mai i ka hoikeike nui.
Ua hoonauenaue iho ma Hatafoda, Konetikuta he olai, i ka hora 4:10 A M. o ka la 28 o Iulai.
Ua poho kekahi Hui Kalepa Nui o Nu Ioka, oia o Duncan Sherman ma. O ke poho mawaena o ka $5,000,000, a me 6,000,000, a o ka waiwai io, ua emi iho. He mau hui e ae no kekahi i puehu.
SEPANIA.
Maderida, Aug. 7 – Ke hole nei ke aupuni i kona ae i ka hoolala ana e aie aku i $7,000,000, e like me ka mea i olelo wale ia no ka uku huikala i na haku kauwa kuapaa o Poto Rico.
Ladana, Aug. 10 – Ua hiki mai kekahi lono mai Miranada, Sepania, e olelo ana, o na kauhale Kalisa a me na Kula o Alava, ua ae aku e hoi e noho malalo o ka malumalu o ka Moi Alafono.
Ke houluulu hou nei na koa Kalisa ma Navarre.–Aia o Don Carlos ma Estell.
Ua maalo ae he 5,000 koa Kalisa malalo o Genrala Dorregaray mawaena ae o Berga inehinei, ma kahi e kokoke aku ana i Organya, me ka manao e hoopuiwa aku i na koa aupuni imua o Seo de Urgel. O kekahi mau koa kipi ma ka akau e nee pu ana. Ua puka iki mai na koa o ia wahi e hoohahana hakaka i keia la, aka, ua hookuemi hope ia aku lakou e na koa aupuni, me kekahi poe i make a eha.
Aug. 10.–E hoopuka kokeia aku ana ae olelo kuahaua, e ohi hou i 100,000 koa hou, me ka manao e hoahikiwawe i ka hoopau ana i ke kaua.
Aug. 11.–Ua hiki mai na lono pili aupuni, i ka loaa ana aku o lako kaua e hiki ai ke hoopuni ia Leo de Urgel. He elima mau batari pukuniahi a na koa aupuni i hooleleia aku ae poka a pahu ae la ka lua waiho pauda o na koa Kalisa.
Parisa, Aug. 11 –Ua hiki mai na lono mai Bourg Madame e olelo ana, e ku ana koa kiai e pale ia Leo de Urgel a hiki i ka hopena loa, a ia wa e ike iho ai ka poe koa aupuni i ka lohi loa o ka lakou hana.
NO BERITANIA NUI.
Nui ka popilikia o na haua kuloko ma kekahi mau wahi o ke aupuni hui. Ma Oldham, he eono wale no wili hana lole, e hana nei, a he haneri kanalima kumamaono wili noho wale ; ma Dundee, he kanakolu mau hale hana i panikuia, a no ia mea, ua hoonoho hana ole ia he 30 000.
He hoopaapaa ikaika maloko o ka Hale Ahaolelo o na Makaainana ma kekahi o na la mua o Augate, no ka bila Kanawai a Piiimsol i waiho mai ai imua o ka Hale, oia ka bila e hoahewa ana i na poe ona moku popopo no ka nui loa o na kino ola i kanuia ma ka lua hohonu o ke kai mai na moku poholo, nahaha a ili hoi. No ka ikaika o na olelo a keia haole iloko o ka hale, e kepa ana i ke aupuni ma na huaolelo oo, lea loa, nolaila, ua kauoha ka lunahoomalu o ka Hale, e lawe iaia mailoko aku o ka Hale. Iaia i puka ai, he keu aku o kona makemakeia e ka poe e makee ana i na ola i kanuia ma ka opu anuanu o ke kai. Ua huli pau loa na nupepa mahope ona a pela hoi ke poe makee i na ola i naauauwaia ma keia ano. I kekahi la ae, ua komo hou mai o Piimsol iloko o ka Hale, a mihi mai la no ka haihai ana o na rula o ka hale iaia, aka, aole nae ia i hoahewa no kana mau kumu i waiho mai ai i ka bila. Na ke Kuhina Nui Disrieli i noi mai penei : “Ke noi aku nei au, e laweia o Mr. Piimsol iwaho o ka hale.” Ua lilo keia mau huaolelo i kauna koma ia, i mea hoohenehene na na nupepa pai ka hoohenehene o Amerika Huipuia.