Ka Nupepa Kuokoa, Volume XV, Number 4, 22 January 1876 — Page 1

NUPEPA KUOKOA
KE KILOHANA POOKELA NO KA LAHUI HAWAII
BUKE XV. HELU 4. HONOLULU, POAONO, IANUARI 22, 1876. NA HELU A PAU 738.

E Pau na Pupupu Kahiko !
E pani me na Hale Laau !

                PAPA, PAPA, PAPA O KELA ME K EIA ANO, A ME NA LAKO KUKULU HALE O KELA ME KEIA ANO, MA KA PA-PAPA O S. G. WAILA MA ! KIHI O ALANUI PAPU me ALANUI MOIWAHINE, no ke Kumukuai HAAHAA LOA ! ae like ka nui me ka makemake. UAU NOUAIKI! NA LAAU KAOLA, NA PAPA MANOANOA, NA PAPA HELE, NA KUA, AAHO, AAHO LIILII. &c LAAU ULAULA! NA LAAU KAOLA, NA PAPA MANOANOA, NA PAPA HELE, NA KUA, AAHO, POU, AAHO LIILII, MOLINA, &c Pili Cida keokeo, Pili Laau ulaula, Na Puka Hale, o na ano a pau, Nu Puka Aniani, o na ano a pau, Na Olepelepe Puka, o na ano a pau. Pepa Hale me na lihilihi NA LAKA PUKA NA AMI-PUKA, NA AMI-PUKA LIILII. NA KUI NAO PENA, AILA-PENA,VANIKI, WAI HOOMALOO, PAAKAI Helu 1, O PUULOA. E lawe wale ia no na mea i kuai ia keia Pa Papa aku a i kahi o ka mea i kuai mai, ina ma ke kaona nei, a me na Awa o keia Paeaina e like me ka aelike. Aia maanei ke Keena o ka MOKUMAHU " KILAUEA," L. MARCHANT, Kapena.
S. G. Waila ma.
709 3m 721

HE
IWAKALUA TAUSANI LEGUE
MALALO O KE KAI !
— NA MEA —
KUPA NAHA O KA MOANA !
K E ALA O KA MEA HUNA,
— A O KA MEA —
POHIHIHI O KA 1866 !
MAHELE I. MOKUNA VI.
KUUPAU IA KA MAHU.

                I KA pa-e ana o keia leo, ua naholo aku la na mea a pau i kahi o ke o i-a i ku ai, ke Kapena, na alii moku, na luina a me na kapena-boe, a hiki loa aku i na wiliki a me na poe pao lanahu o lalo.
            No ka mea, ua kauoha kokeia ae la, hoopaaia, ka mahu, a k e hele wale nei no ka moku ma kona momenetu ponoi. Ua aaki iho la ka pouli, he keu no hoi o Nede Lana a ka ike iloko o ia pouli : he haohao ko'u i ke ano o kona ike ana me ka hiki ana i kona maka ke a hulili iloko o ia pouli. Ua kapalili ino kuu puuwai, me he mea la e naha ae ana. Aka, aole no i kuhihewa ko Nede Lana ike, no ka mea, ua ike paka aku la makou ma kahi ana e kuhikuhi ana. He elua kaulahao ka mamao mai ka moku aku ma ka aoao akau, aia malaila kekahi mea malamalama a puni. Aka, o kona a ana, aole no ia i like me ka weli maoli o ke kai. He mau anana ka hohonu o ua pilikua nei malalo o ke kai, a mai laila mai no i puka ae ai ka malamalama ano e, i hoakaka ole ia iloko o na olelo hoike a na Kapena moku he nui wale. Me he la ua puka mai keia weli malamalama, mailoko mai o kekahi mea a i oi aku ke olinolino. O ka lihi malamalama e hoopuni ana i ka ili-kai, ua like no kekahi poepoe nui loihi, a ololo no hoi, a o waena konu kahi oi aku o ka malamalama, me he hao enaena la, a e ano pio iho ana i kekahi wa, me he anapa ana la o ka wailiula, alaila a-a hou ae la a like me mamua.
            Olelo a e la nae kekahi o na aliimoku, " He mea a wale iho no keia, aole o ke kupua a kakou e noke nei i ka huli."
            I aku la au, " Aohe e hiki i na unahi weli o ka i-a a me na maka a o ka niuhi, ke hoike mai i ka malamalama olinolino e like me keia. Ua like ka lilelile o ka a ana o keia mea, me he uwila maoli la. Ke nee la, ke holo la imua a i hope, a ke holo pololei mai nei ia kakou !"
            O ka auwe like ae la hoi ia o na poe a pau o luna o ka moku. Nolaila, pane mai la ke Kapena, " Ua oki ! Iluna ka hoe, a e hoopaa loa ia ka mahu !"
            Ua hoopaa loa i a iho la ka mahu, a ke pokakaa ae nei ka moku ma ke ano hapalua poepoe.
            Kahea ho u mai la no ke Kapena, me ka leo ikaika, " Iluna ka hoe! Paa ia ka hoe iluna !"
            Ua hooko kok e ia mai la keia mau kauoha — aole no hoi i emo, ua huli hiki wawe ae la ka moku mai kahi mai o ka mea a.
            He kuhihewa nae ko'u, e hoao ana la e hou i ua pilikua nei, eia ka auanei e hoao ana e holo mai ka pilikua aku, no ka mea, o ua pilikua la, ke hookokoke loa mai la, me ka oi palua o kona mama i ko ka moku.
            Ua hoomama wale ae la no ko mako u hana ana — he eehia iho la ko makou, aole he maka'u maoli. Meha iho la na mea a pau, aohe pane leo ae, aohe no hoi he wahi mea oni. Ua hiki mai la ka holoholona ia makou, a ke paani mai la kela me na ale. Ke kaapuni la i ka moku, oiai makou e holo ana he 14 mile i ka hora hookahi, ua hoopuniia oia me na apo uila malamalama, me he lepo aiai la, a holo aku la no na mile elua a ekolu paha ke kaawale mai a makou aku, me ka waiho iho i ka welowelo lilelile mahope me he uwahi la o ke kaaahi ka moe kololio. Aohe no hoi i emo, me he mea la ua hiki aku kela i ka huina aouli, a i ole i ka palena pau paha o kona momenetu iho, a ua hoi hou mai la oia me ka hikiwawe loa, i oi aku ka holo i ko na ia e ae a pau i ike ia, a he iwakalua wale no kapuai i koe mai ka moku aku, o ka pio iho la no ia o ka malamalama, me ka luu ole ilalo o ka wai, no ka mea, aohe i emi aku ka malamalama a hiki i ka pio ana — aka, me ka hikiwawe emoole i nalowale ai, me he la ua pio maoli. Aohe i emo, ua ike hou ia ma kekahi aoao o ka moku, me he la ua mio iho la malalo o ka moku a puka ma ia aoao. O na sekona o ka manawa e nee nei, he wa pihoihoi loa ia o hookuiia mai makou. Aka hoi, ua kahaha iho la au i ke ano o ka holo ana o ka moku. Ke hohe wale nei oia me ka pipika ana i o a ianei, aole i hoouka aku.
            Ma na helehelena o ke Kapena, aole i ike ia ke a no wiwo a me ka hohe wale, aka, he hiohiona nae o ka pahaohao. I mai la oia ia'u, " E Mr. Aronaka, aole i maopopo ia'u ke ano o ka enemi a'u e hoouka aku ai, aole no hoi au e hookuu ana i kuu moku i luahi nana iloko o keia pouli. Pehea la e hoouka aku ai i keia mea ike ole ia ? A pehea la auanei au e malama ai i ka moku mai kona hookuiia ana mai ? He pono hoi e kali a ao i ike pono ia."
            Pane aku la au, " E Kapena Faraguta, aole paha ou wahi kanalua i koe no ke ano o keia holoholona ?"
            I mai la o Kapena Faraguta, " Aole, ua maopopo ia'u, he a-u nui launa ole keia, a he uila ko loko ona."
            I aku la au, " Malia he hiki no paha ke hookokoke aku iaia me ke topedo a me ka mea hoopahu."
            " Pela no, ina he topedo kekahi o ka moku, o ka oi keia o na holoholona weliweli loa i hana ia mai ai ; a no ia mea, he pono ia'u e makaala, a e malama hoi i ka moku mai a iaia mai."
            I ku wale ia no e na luina ia po a ao. Aole hookahi i manao ae i ka hiamoe. A o ka moku Aberahama Linekona nei, no ka hiki ole iaia ke hookela aku i kona mama mamua o ko ka holoholona, ua hooakakuuia mai la kona holo, e naue malie ana i ka hapalua o kona mama. E like me kona holo malie i keia wa, pela no i hoohalike mai ai ua a-u nei, e hoohuliia ana oia e na ale e like me ko lakou makemake, a ke nana aku, me he mea la aohe ona manao e haalele mai i ke kahua kaua. Aka hoi, i ka hiki ana ae i ke aumoe, ua nalowale aku la kela, a ma ka olelo maopopo ana hoi, ua emi aku la kona malamalama, mai ka nui a i ka maawe puahilohilo ana. E auhee hohe wale ana anei oia ? He halia wale no i haupu ae pela, aole nae pela ka oiaio maoli. Aka, ehiku minute i koe hiki ae i ka hora 1 o ke kakahiaka he po-o kani paiakuli ka mea i loheia, me he nalu poipu la me ka ikaika i ka pueone.
            Ia wa, e noho ana au ma ka oneti hope o ka moku, a malaila pu no me ke Kapena a me Nede Lana, me ka lena ana aku i ko makou mau maka iloko o ka pouli panopano. Ninau ae la ke Kapena, " E Nede Lana, ua lohe pinepine anei oe i ka halulu o ka pupuhi ana a na kohola ?"
            I mai o Nede Lana, " Ua lohe pinepine no au, aka, aole nae he kohola i like me keia ka ikaika launa ole o ke kani, ka mea nona na tausani dala elua i hoikeia mai ma o'u la. Ina e hiki ana au ke hookokoke aku i ona la, no eha hapuna ke kaawale."
            Pane mai ke Kapena, " Aole au e hookokoke aku i kuu moku i ona la ; a ina he moku okohola keia, e waiho aku no au iaia, malalo o kau kauoha."
            " Pela ea ?"
            " Ae, mamuli poino ke ola o kuu mau kanaka."
            " A me ko'u ola pu kekahi," i pane mai ai ua keiki o-ia nei.
            I ka aneane ana ae e hiki i ka hora 2 o ke kakahiaka, ua ike hou ia aku la ka a ana mai o ka malamalama, aole no hoi i emi iho i ko ka wa mua i ike ia ai, me he la elima mile ke kaawale mai a makou aku ma ka aoao hema. Aka nae, iloko o ia kawa, a iloko hoi o ia owe o ke kai a me ka halulu o ka makani, ua lohe maopopo aku la makou i ke kani o kona pewa hiu, a me he mea la e hookuu ana i kona ea ; a me he mea la no hoi, ua pii ae la iluna o ka ili o ka wai e hanu ai ; a o ke komo ana o ke ea iloko o kona mau ake mama, ua like me ka ho-ho ana o ka mahu o kekahi mekini, nona na ipuhao nunui, i hiki aku i ka elua tausani lio ka ikaika.
            I wale iho la no au, " O ke kohola i ike ka ikaika me na tausani poe kaua lio, heaha la ka hoa e like ai o ia kohola ?"
            Ua lu-la wale iho no makou, m e ka ike ole i kahi e holo aku ai a hiki i ke ao. Ia wa i hoomakaukauia ai ka hoouka ana. Ua waihoia na o-ia a me na hapuna a pau iluna o ka anini maka upena. Ke hoopiha mai nei ka Lutanela elua i na pu hoolei poka puoa a me ka pu kiola o me ka pauda pahu iloko, no ka mile hookahi ka mamao, a pela hoi me na pu loloa hoolei lu poha e make koke ai kekahi holoholona ikaika loa iloko o ka wa pokole. Ke noke nei no hoi o Nede Lana i ka hookala i kana hapuna, he o nui loihi.
            I ka hora 6 o ke kakahiaka, i ka wa e hoomaka mai ana ke alaula o ka malamalama, ia wa i nalowale koke iho ai ka malamalama uila o ua a-u nei. I ka hiki pono ana ae i ka hora 7, aole i hohola pono mai na eheu o ke kakahiaka, no ka mea, ua alai ia mai la e ka noe ko makou mau ike, a ua hiki ole i ka makou mau ohenana hoonui ike ke lena a nana aku i kahi mamao. No keia hoohoka ia ana mai, ua ukiuki loa makou.
            Pii a e la au iluna o ke kia hope, a o kekahi mau aliimoku, aia no hoi iluna o na kia mua kahi i lalama ai.
(Aole i pau,)

K a poe kupono a kakou e koho
ai i mau lunamakaainana no
ka makahiki 1876.
[Koena mai kela pule mai].

                Aole ka ! M e he mea ala oia iho la ka maua ahaolelo, a ao mai la i na makaainana, e auhau hou ia ana lakou ; ina hoi ha pela, i aha ai hoi ha kona noi ana mai e hoouna aku kakou iaia i ka ahaolelo, oiai ua holo ae la no wahi ana, a ua auhau ia mai la kakou.
            Ea, i na aole iloko ona ka ike a na, i kahi e hemo ai, a me kahi e hoopihaia ai, keia hakahaka o ka waihona dala o ke aupuni, (aia no a kauia maluna o ke poo pakahi a i ole maluna o ka waiwai o kakou o na makaainana,) alaila, aole oia i kupono e lilo i lunamakaainana no kakou. E aho e imi hou ae kakou, i kanaka okoa ae, (a i na o ka oukou kauwa nei), aia no ia ia oukou. E koho kakou i ke kanaka a mau kanaka paha, e imi ana i wahi okoa ae, e paniia ai keia mau hakahaka o ke aupuni. Penei au e kalai aku ai, a e kuhikuhi aku i na kuhina o ka Moi, a i keia kau ahaolelo ae, ke hana, a e pani ia ai, ka hakahaka o na dala o ka waihona aupuni he $57,902.50, oia hoi ka nui o na dala hakahaka o ka waihona, mai na dute i weheia ae ; ke holo ke kuikahi.
            E kauia ka auhau papalua maluna o na waiwai, e hoowehiwehi wale ana no ; aole i kupono no ka pono ponoi o ke kanaka, a i komo ole iloko o na waiwai i weheia ma ke Kuikahi Panailike me America. Oia no ka ela, porter, bia, cider a me na waina mama a pau. Na kaa nani ; holo lealea o ka poe waiwai ; na moena veleneta ; na moena veleneta pale waewae ; na kiaha nani oki ; na lako hoowehiwehi hale ; na gula pepeiao, na wati gula ; na lilina ume naau, lilina lihilihi hoowehiwehi, na kii pena, na kii i paiia, na kahakaha pohaku, na kii mabala, na pakaukau mabala, a pohaku a pau. Na waiala, na ipu pake, na kika, na paka kika ; na pila hookanikani, piano, melodiano, ogana, akodiana, na pila a me na mea kani hoonani o kela ano keia ano. Na pa gula, a me na pa dala, a he lehulehu ae o na waiwai, i kau ia ma ka aoao o na mea hoowehiwehi wale no, a he mea lu-ai wale aku no na ka poe waiwai O keia mau waiwai ke kupono, ke kauia ma ka palua a pakolu, na uku keneka o ke Dute, me ke kaumaha ole o ka poe e ake ana, a e lua-ai ana iloko oia mau mea.
            H e mau mea keia aole e pomaikai ponoi ana ke kanaka aka ; he mau mea hoowehiwehi wale no na ka poe loaa ; ame ka poe waiwai, a e poino ole ai kakou ka poe ilihune. Ma keia kau papalua ana o ka Auhau, e piha ana ka hakahaka o ka $57 902.50 dala i wehe ia o na Dute a oi wale aku. I na pela auhea ihola ka pilikia o na makaainana ? A, auhea ihola ka hiki ana i ke Aupuni ke kalele hou i ka auhau maluna o na makaainana ? Aole loa. Kupanaha ka ke kanaka akamai o G. W. Pilipo i ike ole ai oia i keia mau mea, a ; i na aole oia i ike he hoike ana ia i kona naaupo maoli, a i na ua ike oia, alaila, ua huna oia i ka oiaio a me ka pololei ia kakou e na makaainana : a, i na he huna kona i ka oiaio, alaila, ua loaa iloko ona ka hookamani nui, elike me kona ano mau, kupono ole ai ia kakou ke koho aku iaia i Luna Makaainana no ke kau Ahaolelo e hiki mai ana. He Kamalii ke kalaiaina ana, he pohue pakepake, a he ipukai puka okomo, na ka nele i ka ahaniu i lalau ai i ka uhaloa.
            He mau kumu e ae no kekahi, aka, ua lawa paha ka mea i hoike ia maluna ae ; i iki ai hoi ke hai, a hoike aku ia kakou iho na makaainana, mai hopohopo a makau i na hooweliweli a (G. W. P.) i hoike ai ma na kolamu o keia nupepa i kela mau pule i hala ae nei, e auhau ia ana kakou na makaainana. He mau Luna Aupuni hawawa loa keia mau Kuhina o ka Moi, i na pela ihola ko lakou hana, aka, e lana ae ko kakou manao, aole e hookau hou ia mai ana, he auhau maluna o kakou no ka Kuikahi Panailike, elike me na kumu i hoike ia ae nei maluna ; aole loa !

N O KA AIE MILIONA

                Ua olelo au mamua ae nei, he hookahi no keia mau mea, a okoa nae ma ko lakou wehewehe ana ; Aka, aole e holopono na hana o ke Kuikahi Panailike, na hana hou kuloko, a me ka Hoopau Lima hana, ke ole e loaa ke dala nana e kokua ; oiai aohe mahuahua loa o ke dala o ka poe kalepa o keia aupuni ; a e hiki ai ke komo aku ma ke ano hana, a hookuu aku i ka lakou dala, e hana no na hana nui i like aela meia mai luna ; nolaila ua hilinai ia na ke aupuni, e na kalepa, a me ka poe mahiko, e hana ia mau mea. He kalai pono ana no hoi keia na kakou e na kanaka Hawaii, i keia kau ahaolelo ae e haawi, a e puili mai i na hana hou kuloko, i mau pomaikai no ko kakou aupuni ; a i hoomahuahua, a hoopuipui ia kona mau waihona ; a penei na hana
            Akahi — O ka hana ana i na luawai ma Hawaii a Kauai, no ka lawe ana i ka wai maluna o na kula-palahalaha, kupono i ke kanu ko.
            Alua — O ka lawe ana mai i ka wai i na luawai, ma na wahi a pau e hookio ia ana e na kanaka ma ke ano noho kulanakauhale.
            Akolu — O ka hoohohonu ana i ke awa o Honolulu, Puuloa, a me ke kukulu ana i na uwapo loihi iloko o ke kai, ma na awa o Kahului, Maalaea, a me Hilo &c.
            Aha — O ka hoomaikai ana i na alanui, a me ka hoohoihoi a kono ana mai i ka poe kukulu uwaea Telegraphy, a me na alanui hao kaa ahi.
            Alima.— O ka hoopae ana mai i na Lima hana, na Inia, Iapana, a Kina paha, i mahuahua ai na kanaka iluna o ka aina. I na kakou e hookuu aku ana na ka mea dala, e hana i na luawai, me ke kii ana i na wai o na kuahiwi i ka poe Hui e manao ana e hana noia mea, alaila, e lilo ana ia mau pomaikai ma ko lakou lima ; a nui ka pilikia o na makaainana no ko lakou kuleana wai ; aka, i na na ke aupuni e hooponopono ia mau mea, alaila, o ka hana nui a ke aupuni, e malama pono i ke kuleana wai o kela a me keia.
            E lawe kakou i ka luawai o Kahookane, a me Kapena, ma Honolulu nei, i kumu hoohalike no keia wehewehe manao ana. Aia hoi, i na he poe hui ka poe i lawelawe mua i ia hana ana i keia luawai ma Honolulu nei, he mea maopoopo, e nui ana na hoopilikia waleia o na makaainana ma ko lakou kuleana wai, aka, i keia manawa, oiai o ke aupuni ka mea nana ka wai, ua oluolu no oia e hoopaki iki aku i kau wahi huna wai iloko o kela a me keia aupapalai o na makaainana a he mau kumu oluolu noia me ka hoopilikia ole o ko aupuni iaia iho.
            E lawe hou mai kakou i ka luawai o Honolulu nei, i oleloia aela maluna i kumu hoike no ka loaa, alaila, e ike auanei kakou o kekahi keia o na hana a na makaainana i haawi aku ai i ke Aupuni, e hoohana aku ai iaia iho ma ka ae ana o ke kau ahaolelo o ka makahiki 1847 & 1852, a ua hoi na lilo apau ; a, o ka puka wale no ka ke aupuni e ai nei, i kela a me keia makahiki, i na dala he $70,000 tausani na loaa. a me ka pomaikai o ke aupuni no loko mai o ua luawai nei. A e like me ko na makaainana ae ana aku ma o ko lakou mau Luna makaainana la, iloko o kela mau kau ahaolelo i hala, aole anei hoi e malamalama hou ae na makaainana a o i aku i ko lakou mau Luna makaainana, e hele a hooikaika aku iloko o ka Hale Ahaolelo e hiki mai ana, i ka Aie Miliona dala, hiki ke lawe ia mai ka wai o na kuahiwi, a me na kualono, a hiki i na wahi palahalaha, a kula panoa hoi, mai Hawaii a Kauai ; i hiki ke hooulu ia ke ko, a me na mea ulu o kela a me keia ano ; a loaa mai ka poe mahiko a me ka poe mahiai, na paa lima hana, a me na makaainana pu i ke gula & ke dala, ka uku kupono no ka hooluhi ana aku i ko kakou aupuni e kokua ia kakou ma keia hana waiwai. A i loko o keia mau hana i hoohana ia ai ke aupuni, e koe ana no i na makaainana o ia wahi apau i hoohanaia na wai, ke kuleana e hiki ole ke hoonele ia lakou ma ka pomaikai like e pili ana i na pono wai.

NA POMAIKAI O KA A IE MILIONA.

                Ua ike na Luna makaainana , a me ka Hale o na 'Lii o ke kau Ahaolelo 1874, a i aponoia e ka Moi, he pomaikai nui ko ke aupuni ma keia mau hana, nolaila ; ua hooholoia keia kanawai i hiki ai i ke aupuni i ka wa kupono ke hana i keia mau hana. He mea hoohilahila loa i na makaainana, ka makala hou ana ae i kekahi kanawai a lakou no i hooholo ai, i ike ole ia, a i hoao ole ia kona pono, a me kona mau pomaikai, a, i hoao ole ia hoi kona mau poino, a me kona mau kino. I hoopau ia a i hoololiia na kanawai i ikeia ma kona hoohana maoli ia ana aku, a i ikeia he hewa ; aka, aole i ikeia he hewa, a aole hoi i hoaoia, ke pau e nei no nae kakou i ka makau, me he mea la, ua kau io ia mai ka lili, a me ka inaina o ka Aie miliona maluna o kakou.
            Ua like ka G. W. Pilipo ma kahua, a me ka lakou mau wehewehe manao me he keiki nui'la, e hoomaka'uka'u ana i ke keiki uuku, a e olelo ana, Apau i ke akua ! Auwe, apau i ke akua ! ! aia hoi ua puiwa na keiki liilii loa, a holo akula e pee i keia mau olelo hoomaka'uka'u i ka Aie Miliona, me he akua lapu la ; aka, heaha ka hana a na keiki nunui, i ano a oo ae, aole lakou i makau i keia mau olelo hoopuiwa ano ole i na akua lapu lapuwale, a pela no ka manao o na makaainana ano ku oo e nana malie ana me ke ano akahele, noonoo, me ka wae, a me ke kaupaona i na mea apau e pili ana i ka Aie miliona, a me na kumu o ka maka'u wale ana. A i na no paha e komo ana na Luna makaainana, e manao ana e hoopau i keia kanawai, e pono e hoike maopoopo lea loa lakou i na kumu kupono, i huli mai ai ka Hale o na 'Lii, e lokahi like me lakou ma keia manao ana ; aka, ua hoike ae nei au i ke kumu e paakiki ai ka hale o na 'Lii, oia no ka ike ole ia, a me ka hoao ole ia o na kanawai 'la ; i hooholoia i ka makahiki 1874. No ka mea, o na Alii no oia kau Ahaolelo, oia no na Alii o keia kau Ahaolelo, aole lakou e ae ana, e hoohanaia, a hoololiia ka lakou mau hana oia kau ahaolelo i mea paani wale la, o loaa auanei la lakou ka hilahila ma ka lakou hana kamalii ana. Nolaila, o ka mea pono i na Luna makaainana a kakou e hoouna ai, aole o ka hoopau i ke kanawai " Aie miliona," aka ; o ka hooponopono hou ae, a e hilinai kakou i ke aupuni, i ka hooko pono ana i na hana pomaikai, a me kakou pu na makaainana.
            I na no i holo mai ka hoololi ana o ke kau Ahaolelo o America, i na kanawai Dute ona no ke Kuikahi Panailike i keia makahiki 1876 a hooholo ole paha, e pomaikai ana no ke Aupuni, ma ka Aie ana aku i ka miliona dala, a e hoohaaaia ua Aie miliona dala nei, Penei ;—
(Aole i pau)