Ka Nupepa Kuokoa, Volume XV, Number 14, 1 April 1876 — Page 1
NUPEPA KUOKOA:
Ke Kilohana no ka Lahui Hawaii.
BUKE XV. HELU 14. HONOLULU, POAONO, APERILA 1, 1876. NA HELU A PAU 748.
E Pau na Pupupu Kahiko ! E pani me na Hale Laau. PAPA, PAPA, PAPA O KELA ME KEIA ANO, A ME NA LAKO KUKULU HALE O KELA ME KEIA ANO, MA KA PA-PAPA O S. G. WAILA MA ! KIHI O ALANUI PAPU me ALANUI MOIWAHINE, no ke Kumukuai HAAHAA LOA ! ae like ka nui me ka makemake. LAAU NOUAIKI ! NA LAAU KAOLA, NA PAPA MANOANOA, NA PAPA HELE, NA KUA, AAHO, AAHO LIILII, &c LAAU ULAULA ! NA LAAU KAOLA, NA PAPA MANOANOA, NA PAPA HELE, NA KUA, AAHO, POU, AAHO LIILII, MOLINA.&c Pili Cida keokeo, Pili Laau ulaula, Na Puka Hale, o na ano a pau, Na Puka Aniani, o na ano a pau, Na Olepelepe Puka, o na ano a pau. Pepa Hale me na lihilihi. NA LAKA PUKA NA AMI-PUKA, NA AMI-PUKA LIILII. NA KUI NAO PENA, AILA-PENA, VANIKI, WAI HOOMALOO. PAAKAI Helu 1, O PUULOA. E lawe wale ia no na mea i kuai ia keia Pa Papa aku a i kahi o ka mea i kuai mai, ina ma ke kaona nei, a me na Awa o keia Paeaina e like me ka aelike.
Aia maanei ke Keena o ka MOKUMAHU " KILAUEA," L. MARCHANT, Kapena.
S. G. Waila ma,
709 3m 721
HE
IWAKALUA LEGUE
MALALO O KE KAI !
— NA MEA —
KUPANAHA O KA MOANA !
KE ALA O KA MEA HUNA,
— A O KA MEA —
POHIHIHI O KA 1866 !
MAHELE 1. MOKUNA X.
UA HOIKEIA mai o Rafela ma o ka Madona la ana i penu ai ; o Leonado da Vinici, oia o ke kii la o ka Viregine ; ka wahine moe wai o Koregio, ka wahine ulaia o Titiana, ka hoolaa ana a Veronese, ka hoohalike ana a Mulilo, ke kii hooleleaka o Holebeni, ka moneka o Velakueza, ka matia o Ribeira, ka ui kilohana a Rubena, na kii aina elua a Tenira no Falanadera ; he ekolu mau kii liilii a Gerara Dow, ka Meteau a me ka Paulo Potera ; he elua mau kii na Gerikaula a me Peruduhona, a me kekahi mau kii moana e ae a Bakahusena me Verenete. Mawaena hoi o na poe akamai o ke au hou, ua ike au, na Delakoroi kekahi, na Inigere, na Dekoma, Tirouano, Meisonia, Danbiguni a me kekahi poe e ae.
Ma na kihi o na keena nei, ne mau kii pohaku mabela a me na kii keleawe kekahi, e ku ana lakou maluna o na ku nioniolo i hookinohinohiia, a o ko lakou kalaiia ana, ua like me na kii kalai o ka wa kahiko loa. Ua hoomaka mai la ke kahaha e hookahua iloko o'u, i ka wa i pane mai ai ke Kapena o ka Nautilo :
" E ke Kumu, e kala mai ia'u, no ko'u hookomo ana mai ia oe iloko nei o keia keena, ma ke ano ku ole i ka hanohano, oiai e waiho mokaki ana na ukana o loko nei."
I aku la hoi au, " Mai manao oe no ia mea. Aka, me ko'u ninau ole aku, e hoike mai oe, ua hiki ia'u ke kapa aku, he kanaka noeau oe ma ke kaha kii."
" He mea wale no i akahi a hoomaka, aohe akamai io. Mamua, ua iini nui au e hoiliili i keia mau kii nani i hanaia e ka lima o ke kanaka. Me ia ake nui o'u i huli ai au a i imi ai hoi a hiki i ka loaa ana o kekahi o lakou, me ka nui o ke kumukuai. O keia ka'u mau mea hope e malama nei no ke ao i haaleleia e a'u. I ko'u mau maka, ua like ko oukou poe pena kii akamai o ke au hou, me he poe kahiko la ; me he la elua a ekolu tausani makahiki ko lakou punahelu. Ua hoopilikiaia ko'u noonoo ana no lakou. Aohe oulihiki no na poe akamai i ke pena kii."
" Pehea hoi keia mau buke mele ?" i olelo aku ai au, me ke kuhikuhi ae i na buke mele a Weber Rosini, Mozata, Beetovena, Haidena, Meerebia, Herola, Wagena, Auber, Gonuoda a me na poe olohe mele e ae, e waiho liilii ana iluna o ka piano oagana nui, ma na pale uwai o ke keena.
" O keia mau buke leo mele," i pane mai ai o Kapena Nimo, "o lakou na hoa kuilima o Orupeo ; no ka mea, i ka hoomanao ana ae no ka poe i make, na keia mau mea e hoonalonalo iho i ka uluaoa walohia ana mai o ko lakou mau la kanikau. A ! e ke Kumu !" Puapuai koke mai la ka ula ma kona mau papalina haikea, a kokolo ae la hoi ka weo koko i kona mau onohi ; a ia wa koke no, ua hoohuai mai la kona mau luauhane i na mapuna wai kahe i ka lihilihi. Hoomaloeloe wale ae la no iaia iho, me ka puana hou mai i keia mau huaolelo ku i ka walohia ; " E ke Kumu, he kanaka make au, he kanaka i haaleleia, a i kana hunakeleia hoi malalo iho o na eka lepo, e like me kou mau hoaaloha e hiamoe la no na kapuai eono malalo iho o ka ili honua."
Hamau koke iho la kona leo, a huli aku la i ka paia, me na waimaka e kulu pakahi ana ; a ia wa, ua hoalii iho la ka walohia eehia maluna o'u. No ka mea, ma o kana mau hopunaolelo la, ua akaka e wale mai la no ia'u, ua hookupilikiiia kona puuwai e ke aloha no na mea i hala e aku mamua ona ; he hoaaloha a mau hoaaloha paha, nona ke aloha i hoomomoaia iloko o na wahi poliuliu o kona puuwai. Owau kekahi i hului pu ia aku iloko o ka hoonaku, a me he la e mahele like ana ia haawina hookahi i loaa iaia. Kalele iho la kekahi kuekue ona ma ke kihi o kekahi pakaukau mosaica (kinohinohi) ; a ia wa, me he la ua kailiia aku kona noonoo kanaka, i ike ole mai ai oia ia'u, a i ole ua poina paha oia ia'u, me kona manao oia wale no ke ku nei me ke kokoolua ole.
Aole au i hoopilikia aku i kona mau hoalii eehia ia ana e ke kaumaha ; huli ae la nae au e makaikai i na mea kamahao e ae i piha ai ua keena la i ka nani.
Malalo iho o kekahi mau pahu aniani maemae i hoopaaia me na niao keleawe, ua hoonohonoho pono ia na mea nani kamahao o loko o ke kai, a ua palapala wale ia no hoi me ko lakou mau inoa pakahi. E hoike mai ana lakou, aohe mea a kekahi kilo o na mea kino i ike ai e like me ia. Mamuli o ko'u ano, he kumu imi no ia mau mea, he mea e ko'u hoohihi pau ole a me ka iini i ka makemake. Ma kahi i hookaawaleia no na mea kino, i komo pu ai ke aupuni holoholona a me ke aupuni o na mea ulu, e like me na huahuakai a me na akoakoa, he mau mea ano e loa ka'u i ike ai o ua ohana elua, ka ohana poo nui a me ka ohana pupupu piipii. Ma ka lalani mua, na poe pukapuka loloa, i hoonohonoho kalaihiia, e like me ke ku ana o ka peahi, na huahuakai palupalu makalii o Suria, na isise o ke ano lolikae, na mea laumanamana, ka virigularia kaulana o na kai o Norewai, na ano popohe me he pua la ka ula weo, a me na ano paakiki e ae a pau me he pohaku la, na mea i kapaia e ka'u kumu ao Miline Edewada, ma ka papa inoa o na pohaku akoakoa me ke akamai nui, a mawaena o lakou, he mau falabelina kamahao kekahi ; o ka okuline kekahi o ka mokupuni o Bourebona, ko " Nepetune kaa" o Anetile, na ano lehulehu e ae o na akoakoa, a o ka pokole, o na ohana kolo no a pau loa o loko o na wai, ke mea i hookumuia ai na mokupuni, a mai loko mai hoi o lakou i puka mai ai na aina puni ole i kekahi la e hiki mai ana. O ka ekonodereme kekahi ; ka mea nona na kokala ooi, na ateri, na hoku o ke kai, ka opeapea o ke kai, panatarine, ke comatule, aseopona, ekini, holoturi a me na mea e ae he nui ma ko lakou papa hookahi.
O ka mea kilo pupu kai makahehi wale, e maule koke auanei oia imua o kekahi mau ano o ae, a pehea la oia i na e leha aku kona mau kii onohi maluna o keia mau mea i hoiliiliia. No'u iho, ua hiki ia'u ke olelo ae, o ke kiekie keia o na mea i hoiliiliia, aka, no ka loihi o na manawa i nane ae, ua ane hiki ole ia'u ke hoike aku i na mea liilii a pau e pili ana i na ano pupu. Mawaena o keia mau mea, he mau mea kekahi i poina ole ia'u, oia ka ia-hamare kaulana o ka Moana Iniana, ka mea nona na kiko kaokeo moe papa e pua wini ae ana iloko o ke kahua ula lilelile a me ka makue ; a no keia mau mea, aole e hiki ia'u ke koho pono i ko lakou kumukuai. He riponodaile nui kekahi, hinuhinu a panio kona mau waihooluu, me na kokala kuku oioi, a he kakaikahi loa ko lakou ikeia maloko o na museuma o Europa. (O kona kumukuai i ko'u manao, aohe i emi malalo iho o ka $5,000). He ia-hamare hoi o na kai o Nu Holani, a he mea paakiki loa ka loaa ana o keia ano i-a. He laau huakadia manamana kekahi o Senegala ; he mau ano pupu nona na pani hoomaha keokeo, a i ko lakou wa e hanu ai, e puapuai ae he mau olopu keokeo e like me ka hu'a poepoe o ke sopa ; he lehulehu wale na ano pupu asipigiluma o Iava, a he mau ano papu loloa oheohe kekahi me na pani wahi lahilahi, he mea i hoopaapaa nui ia e ka poe ao hou no ka ouli o na mea kai ; na ano a pau loa o ke toroki, o kekahi he lena omaomao, i loaa ma na kai o Amerika, a o kekahi hoi mai ke Kaikuono mai o Mesiko, na mea i kaulana he mau iwi pupu kaola ; he setari kekahi i ike ia ma na Kai Hema wale no ; a o ka mea hou loa o na mea e ae a pau, he kuia nani no Nu Zilani, a me na ano pupu e ae a pau i kupono na ka poe akamai e kapa i ko lakou mau inoa.
Ma kahi okoa aku, ua hookaawaleia kekahi mau wahi no na momi oi loa o ka nani, a e alohi ae ana lakou no ka pa ana iho o ka malamalama uwila me he mau hunahuna ahi la ; he mau momi poni ulaula kekahi, noloko mai o na papaua pipi i loaa ma ke Kai Uli ; he mau momi omaomao, lenalena, uliuli a me ka eleele, na mea ano e i loaa noloko mai o na io papaua o na moana a pau o ke ao nei ; aliali kekahi me he aniani la, noloko mai lakou o na wai o ka Akau. He nui wale na momi nunui a pii o ke kumukuai, o kekahi o lakou, ua oi aku ka nui mamua o ka hua manu nunu, i oi loa aku hoi ke kumukuai mamua o ka momi a ke kanaka kaahele Taverenia i kuai aku ai i ke Shah o Peresia no ka ekolu miliona, a ua oi aku no, hoi ka nui mamua o ka momi a ka Imauma o Musekata. I ko'u manaoio, aole ona lua ma ke ao nei.
Aka hoi, i ke koho ana i ke kumukuai o keia mau mea a pau i hoiliiliia, he mea ane hiki ole ia'u ke hoike aku. A ma ka nana aku, me he la he mau miliona dala lehulehu wale ka ke Kapena Nimo i hoolilo aku ai, no ka hoiliili ana i ua mau mea la, a oiai au e nune ana iloko o'u i ke ano i loaa ai iaia ua mau mea la, i mea e hoolawa pihaia ai kona mau iini no ka houluulu ana mai i na mea kamahao o ke ao nei, ua alai koke ia mai la au e kona puana ana mai i keia mau huaolelo :
" Ke makaikai nei ka oe e ke Kumu i kuu mau pupu ? Ua hiki, no lakou e hiaai ai kekahi kumu kilo oulikino, aka, ia'u nei, he mau halia iini makee ana ko'u no lakou, i oi loa aku mamua o kou mau lia ana, a no ia mea, ua huli au, ua ohi, a ua hoiliili mai hoi ia lakou a pau me ko'u mau lima ponoi ; aole he kai ma ka papalina o ka poepoe i hooneleia e a'u i ka huliia."
" E ke Kapena, ke ike nei au, he mea e ka hauoli o ka manao e auwana i o a ianei iwaenakonu o keia mau mea nani. O oe kekahi o ka poe kakaikahi nana i huli ponoi ko lakou mau waiwai nui palena ole. Aohe museuma maloko o Europa, i loaa ai na mea a pau o ka moana e like me keia. Aka, aohe pono ia'u ke kuupau loa i ko'u mau mahalo ana no keia mau mea, o loaa ole ia'u kekahi koena no ka moku nana e lawe nei ia lakou. Me kuu ake ole e noii aku i kou mau mea huna a pau, he pono ia'u ke hai aku i ka oiaio, o ka Nautilo nei, me kona ikaika oni i hoopaaia iloko ona, me na kumu i hiki kupono ai iaia ke hana, a me ka agema ikaika nana e hoonee nei iaia, oia ke kilohana hookahi o ka'u mau mea a pau i kahaha ai. Ke ike nei au ma na paia o keia keena, he mau mea paahana kekahi i maopopo ole ia'u ka lakou hana."
" E ke Kumu, e loaa ia oe kekahi mea paahana o keia ano maloko o ko'u keena ponoi, malaila, e oluolu no au e hoakaka aku i ke ano o ka lakou mau hana ia oe. Aka, e hele mua kaua e nana i ke keena i hookaawaleia nou ponoi. A pela e hookamaaina mua ai oe i ke ano o ka launa ana me ka moku Naukilo a me kou hookipa maikaiia ana ?"
No keia mea, ua ukali aku la au mahope o Kapena Nimo ; ma kekahi puka awai o ka museuma, e hele aku ai iwaenakonu o ka moku, a mailaila aku i alakai ai oia ia'u a hiki i ka ihu, aia malaila kahi o ko'u keena, aka, aole nae i like me na keena moe oololi o na moku maoli, he keena nui akea maoli no keia, he moe a me ke pakaukau nui e ku ana, a me na mea hoonani e ae o loko o ke keena. Ua oluolu maikai ka nanaina o loko, nolaila, hookahi wale no a'u hana kapono, o ka haawi aku i ko'u mau hoomaikai ana i ka haku mea hale.
" Ua pili kou keena me ko'u," wahi ana a wehe ae la oia i ka puka, "a mai ko'u keena aku e komo ai a i ke keena hookipa a kaua i haalele aku nei."
Komo aku la maua i kona keena, aia hoi, he ano eehia i ka nanaina, aole he mau mea hookinohinohi o loko, ua ane like me ke keena moe o na moneka. He wahi moe hao uuku ke ku ana, a me kahi pakaukau, a o na kapa moe a me kahi mau lole komo e kakau ana ma ka paia, aohe mau mea e ae.
Kuhikuhi mai la o Kapena Nimo i kekahi noho, me ka i mai, " E hoolaulea ia oe e noho iho." Noho iho la no hoi au, a hoomaka mai la no hoi kela e kamailio, penei : (Aole i pau.)
KE ANO KA HANA, ME KA UKU O KE KAHUNAPULE PONO.
He mea nui ka oihana a ke Kahunapule. I ka manao he oihana ia i oi aku mamua o na oihana a pau ma ka honua nei, no ka mea, he hana ia e pili ana i ke aupuni o ke Akua, a i ke ola mau loa. Nolaila, ua wae mai ke Alii Mana Loa i na Kahunapule, a ua hookaawale ia lakou i mau luna, i mau kahu, i mau kuhina, a i mau elele nana, e hele ma kona inoa, a e kukala i kona kanawai, a e hai aku i kona manao i na lahuikanaka a pau, a puni ka honua. Nolaila, ua pono ke hoomaopopo i ke ano o ke Kahuna a ke Akua i a pono ai, no ka mea, aole no ke kanaka e koho i ke kanaka i kahuna, aole hoi e pono i ke kanaka e lawe wale i keia oihana nana iho. Pela ka olelo ma Heb 5 : 4. " Aole hoi e lawelawe kekahi i keia nani nona iho, aka, ua hookaawaleia mai ia e ke Akua, me Aarona hoi." Nolaila hoi e like me ko Iehova hookaawale ana i na kahuna pono, pela hoi kona hoomaopopo ana i ke ano pono o ua mau kahuna la — a ua hoikeia kekahi mau ano ma 1 Tim 3 : 1 — 7.
I. Eia ke ano mua. " He hala ole" me he mea la, he hemolele ka pono — aole kina, aka he maikai wale — he pono loa — he oiaio maoli — naauao, he ike pono, aole lalau, a kuhihewa, aole aie, aole hoopunipuni, aole hana, aole hoi olelo lapuwale — aole hele pu me ka poe lalau. He kanaka malama i kona kino me ka maemae, kona waha me ka oiaio, kona poo me ka noonoo, kona lima me ka lalau ole, kona wawae me ka hina ole, kona pepeiao me ka hoolohe ole ka olelo keekee, kona maka me ka niua ole i ka hewa, kona naau hoi me ka hoonioniolo i kona manao.
II. He mea pono hoi i ke kahuna e imi i wahine pono, i kokoolua nona — no ka mea, ua olelo mai ka Haku, " Aole pono i ke kane e noho wale"— he hemahema ia. Ua like ia me ka hapalua o ka upa, aole kupono ia i ka okioki lole. Aia a loaa i ke Kahuna i wahine haipule, a naauao maoli, e lilo ua wahine la i kumu a i makuahine pono no na wahine a me na kamalii o kona kihapai, a he mea e kokua nui ai i kana kane ma ka hana a ka Haku. Aole nae i hoahewa mai ka Haku i ke kahuna i nele i ka wahine ole, no ka mea, ua pilikia kekahi kahuna e like me Paulo, i ke kaapuni hele mau ana, a o kekahi hoi ua pilikia no ka loaa ole o ka wahine kupono.
Eia nae ka mea i ahewa ia, o na mea moe lehulehu e like me na Moremona, no ka mea ua olelo ia ma I Tim. 3 : 2, no ke kahuna —" He kane ana ia na ka wahine hookahi."
III. O ke kiai hoi kekahi ano o ke kahuna pono. Ma 2 Tim. 4 : 5 Ua kauoha aku o Paulo ia Timoteo penei ; " E kiai oe ma na mea a pau, e hoomanawanui i ka pilikia." Ua kauoha hoi i na hoahanau e " hoolohe i ka oukou mau kumu, a e noho mamuli o lakou ; no ka mea, ua kiai lakou i ko oukou mau uhane me he poe e hoike ana la i hoike lakou me ka olioli, aole me ke kaumaha."
Ua like ke kahuna me ke kahuhipa, he mea kiai na kanaka me he kahuhipa la, i malu na ekalesia, a i ole make na uhane i kela enemi nui o ka diabolo, e holoholo ana e like me ka liona uwo e imi ana i kana mea e ale ai.
IV. Eia hoi kekahi ano pono o ke kahunapule. " He noho malie, he akahai."— me nei, aole wikiwiki — aole huhu, aole hoopaapaa ino, aole he ino, aole kuamuamu, aole uhauha, aole lealea.
V. " He hookipa." He hana aloha, a he hana lokomaikai ia. He hana maikai ia no na mea a pau, e like me ka olelo ma Heb. 13 : 2 " Mai hooki i ka hookipa ana ; no ka mea, malaila no kekahi poe i hookipa ai i na anela me ka ike ole aku." Aka, eia ke ano nui o ka hookipa ana — E kokua mau i ka poe pilikia me ke aloha, ka lokomaikai a me ka hoomanawanui, e like me ka malama ana o kela kanaka no Samaria i ka mea i powaia a aneane make.
VI. " He akamai hoi i ke ao aku." Nui na kanaka aloha ia Iehova, a ua noho haahaa me ka hoolohe. A ua pono lakou ke noho hoahanu me he haumana la — Aole nae pono ke hoolilo ia lakou i mau kumu, a he mau kahunapule no ko lakou ike hapa, a no ka hemahema a me ka hawawa i ke ao ana'ku. Nolaila keia olelo paipai ia Timoteo, " e hooikaika nui oe e hoike ia oe iho imua o ke alo o ke Akua me ka aponoia mai, he pahana hoi aole e pono ke hilahila, e puunaue pono aku ana i ka olelo oiaio."
VII. Aole hiki ia'u ke hoike aku i na ano pono a pau a ke kahunapule e pono ai o loihi loa ka'u olelo ; aka, ina ua hanau hou ia, ua piha mau i ka Uhane Hemolele, ua ae pono ia ma ka olelo a ke Akua ; ua akahai, ua haahaa, ua haalele i na mea ano ino a pau, aole puni waiwai, aka ua piha loa i ke aloha i na uhane o kanaka, a ua ikaika mau ike ao ana, i ka hoohaumana ana, a i ke alakai ana i na kanaka oia ke ala pololei, alaila ua lilo ia i kauwa a ponoia e ke Akua, a ua hoohua hoi i ka hua maikai.
KA HANA A KE KAHUNA.
" Hookahi no hana nui." O ke alakai aku i na kauoha io Iesu la — E ao i ka poe naaupo — E hoohuli i na mea e hele hewa ana ; e hoohaumana na kanaka na Iesu, e hoonaauao ia lakou ma na kanawai a me na hana a ke aupuni o ka Haku ; a e hooikaika mau e alakai ia lakou iloko o ka lani.
E ao ia lakou ma ko lakou ano hewa ma ko Iehova kanawai, o ao ia lakou, e mihi, me ka wehewehe pono, a akaka loa i ke ano o ka mihi e ola ai.— E hoike hoi i ka uku o ka hewa, a me ke ano o ka make mua loa.
E kuhikuhi hoi i ka Puuhonua e malu ai, o Iesu ke Kalahala io. E hoakaka hoi i ke kanawai e ola'i, o ka manaoio ia Iesu. E hoomaopopo hoi i na hua o ka manaoio oiaio, e ola'i, o ka haalele loa i na hewa a pau me ka hoopailua aku, ka hoohaahaa i ka naau, ka hoolohe lea i ka olelo a ke Akua, a e hana oluolu i kana hana me ka molowa ole, ka hanai i na hipa me na keiki hipa a Iesu i ka ai ola me ke aloha a me ka ahonui a hiki i ka hopena.
KA UKU O KE KAHUNA PONO.
" He lei mae ole" wahi a Paulo I Kor. 9 : 25 " Ua paio aku au i ka paio maikai, ua hoopaa no hoi au i ka manaoio ; a e waiho mai ana no'u he lei o ka pono, ka mea a ka Haku — e haawi mai ia'u i kela la." wahi a Paulo. 2 Tim. 4 : 8.
Ua olelo o Petero i na kahu ekalesia, ina hana lakou me ka haahaa, alaila, " A hiki i ka wa e hoike ia mai ai ke kahuhipa nui e loaa ia lakou ka lei nani loa, aole loa e mae." I Pet 5 : 1 — 4
Ke olelo nei ka Haku ma Hoik. 2 : 10 " E ku paa oe ma ka pono a hiki i ka make a na'u no e haawi aku ia oe i ka lei o ke ola." Eia hoi keia olelo ma Dan. 12 : 2. " O ka poe naauao e alohilohi lakou e like me ka malamalama ma ke aouli ; a o ka poe i hoohuli i na lehulehu ma ka pono, e alohilohi lakou e like me na hoku ia ao aku ia ao aku.
Pomaikai loa na kauwa a ka Haku i malama pono i kana olelo a hiki i ka hopena. T COAN.
I ka la 14 o Maraki, ua koho ka Ahaolelo Senate o Farani ia Duke d'Audffret i Peresidena no ka ahaolelo Senate ; a ia Martel a me Duclere o ka aoao Ripubalika a me Generala l'Admirault a me Kerdrel o ka aoao akau, i mau hope Peresidena. Ua lilo keia mau koho ana i mea nune nui na ka aoao Ripubalika, no ka mea o ka makemake nui o ka poe Ripubalika, o ke koho ia o Jules Simon i hope Peresidena.
He keu ko Tiera kaulana me Parisa, a no ia mea, ua koho aku na makaainana ia ia i elele no lakou ma ka 7,000 ka oi aku mamua o kona hoa paonioni.