Ka Nupepa Kuokoa, Volume XV, Number 14, 1 April 1876 — Page 2

Page PDF (1.82 MB)

KA NUPEPA KUOKOA, ME KE AU OKOA J HUIIA.

MAKE KAUOHA.

                    Ua hookohuia o William O. Smith i keia la, i Hope Loio Kuhina no ke aupuni. W. R. CASTLE. Mar. 28, 1876 Loio Kuhina.
               Ma keia e ike ia ai, i ke koho balota ana o na makua, a kahu mea keiki e hele ana i na kula aupuni ma ka olelo Hawaii, i malama ia i ka Poakahi, la 27 o Maraki i kaa hope ae nei, ua koho hou ia o Rev. Herman Koekamanu i Hoa Ekolu no ka Papa Kula Apana o Honolulu, Mokupuni o Oahu. W. JAS. KAMIKA.
Aliiolani Hale, Maraki 20, 1876. 2ts

               OLELO hoolaha i na makua a Kahu mea keiki e hele ana i na Kula Aupuni, ma ka olelo Hawaii, iloko o ka Apana o Kona, Honolulu, mokupuni o Oahu.
               I kulike me ke Kanawai, e malamaia ana ke Koho Balota no ke koho ana i ka Hoa Ekolu o ka Papa Kula Apana o Honolulu, ma ke Keena o ka Papa Hoonaauao, ma Aliiolani Hale, iwaena o ka hora 10 o kakahiaka me ka hora 2 o ka auwina la o ka Poakahi, la 27 o keia malama o Maraki 1876.
               O na makua, a kahu paha i paa ko lakou inoa i na papa helu inoa i waihoia mai i ka Lunakula, e na kumu kula, ka poe e ae ia ana e koho. O ka poe i paa ole ko lakou inoa i na kumu kula, e hoole ia ana lakou e like me ke Kanawai. W. JAS. KAMIKA,
Luna Kula o Honolulu.
Aliiolani Hale, Mar 14, 1876. 743 2ts

               I ko Ewa & Waianae.— e malamaia ana ke koho Balota no ka Hoa Ekolu o ka Papa Kula o ia mau Apana, ma Waiawa, Ewa ; i ka la, ka malama a me ka hora e like me ko Honolulu i hoomaopopo ia ae la maluna.
W. JAS. KAMIKA.
Lunakula no ka manawa no ka Apana o Ewa & Waianae.
Aliiolani Hale, Mar 14, 1876. 745 3ts

Olelo Kuahaua.

                    O MAKOU, KALAKAUA ma ke ahonui o ke Akua Moi o ko Hawaii Pae Aina, ke hoolaha nei. I ko makou makemake a i mea hoi e kulike ai me ka hoakaka ana o ko makou Kumukanawai, e hoakoakoa ae na Hoa o ka Ahaolelo Kau Kanawai o ko makou Aupuni ma ka Hale Ahaolelo, ma ko Makou Kulanakauhale o Honolulu, noa ka lawelawe ana i na hana ku i ka pono o ka lehulehu, ma ka hora Umikumamalua o ke Awakea, o ka Poaono, la Iwakaluakumamaiwa o Aperila, i ka Makahiki o ko kakou Haku. Hookahi Tausani Ewalu Haneri me Kanahikukumamaono.
               Haawiia malalo o ko Makou Sila Alii, ma ko Makou Hale Aia ma ke Kulanakauhale o Honolulu i keia la Iwakaluakumamaiwa o Feberuari Makahiki Hookahi Tausani Ewalu Haneri me Kanahikukumamaono, a i ke Kolu hoi o ka Makahiki o ko makou noho Alii ana.
L. S. (Sign) KALAKAUA R.
Ke kuhina Kalaiaina,
(Sign) W. L. MOEHONUA.

Ka Nupepa Kuokoa.
— ME —
Ke Au Okoa
I HUIIA.
Published every Saturday, $2 a year.
HONOLULU. APERILA 1, 1876.

                    O KO MAKOU makamaka o ka maka peni paonioni, oia hoi Ka Lahui Hawaii, ua huai puka nui mai nei oia i na kumu kue i ka hookomo hou ia ana mai o na pake iloko nei o ka aina malalo o ko ka lahui waihona dala no na kumu, I. aole o ka lahui pake ka lahui e hiki ai ke kukulu hou i kaupoku o ka lahui Hawaii. 2. Ke noho nei ko na pake hapu nui e like no me ko lakou hiki mua ana mai, aohe hoomaopopo i ka noho ana keristiano, a he mau wahi kauna wale no i ike.
               Oiai Ka Lahui Hawaii e hooia ana, " ua ikeia ka waiwai o ke aupuni ma kekahi mau mea a lakou (pake) i hooulu ai," aka ke kue nei nae oia ia pomaikai o ke aupuni, a ke makemake nei e pani aku i ke komo ana mai o ia lahui malalo o ka mana o ka Papa Hoopae Lima Hana. Aole paha he mea na kakou e kanalua ai, o ko kakou hana alakai mua loa o loko nei o ka aina, oia no ka paeli ana i ko kakou lepo waiwai nui e waiho mai nei, e ohi ae i na gula a me na kala a e hookuonoono no kakou iho. Aole o kakou mau lima hana maloko nei o ka aina i makaukau e lawe i na hana mahiko, mahi laiki a me na hana nui e ae me na lima lehulehu e hiki ai ke hapai. Aole no hoi makou i manao he hana pono na kekahi mea e ku ana ma ka hoeuli o ka hookele lahui e hapai i kona leo e kue i ka hookomo hou ana mai o na pake i na aole ia he kumu e hoemi mai ai i na uku hana o na lima hana ponoi o loko nei, aka, o ia wale no ke kumu e kiiia nei na pake, no ka hana ole maoli no o na kanaka Hawaii. Auhea ko kakou mau kanaka ui e noho haaheo wale mai nei, a na na wahi makua palupalu e imi i ke ola. Auhea na kanaka no lakou na makahiki mawaena o ka umikumamalima a me ke kanaha i hiki aku ko lakou huina i ka umikumamakolu tausani a keu ? Ei ae no ke noho palaualelo mai nei, e moe ana i ke ao a po, alaila, auwana hele i ka pepa, na hale lealea, a me ka pili waiwai.
               Ina ua kuo ko makou makamaka aole keia o ka lahui e hooulu hou ia ai kakou alaila, ke a-a nei makou e kuhikuhi aku ia ia, o ka poe pake i mare me ko kakou mau wahine, ua hoohua mai lakou i na keiki, a e ikeia ka oiaio ke nana aku i na hapa pako lehulehu loa ma Hilo i Hawaii, Maui, Oahu nei a me Kauai. Pehea, aole anei keia mau keiki i hanauia e na pake a me ko kakou mau wahine i mareia he mamo e " kukulu hou ai i kaupoku o ko kakou lahui ?"
               Ke lawe mai nei hoi makou i ka ike o kekahi luna aupuni e hakilo mau nei i ka nee ana o keia lahui, oia keia, o na kanaka o na lahui e i komo mai iloko nei o ka aina a noho me ko kakou mau wahine, ke hanau nui nei ka lakou mau mamo, a ma kona manao, ke pii nei ko lakou mau hanau ma ke kanalima hapa haneri. Pehea, aole ia he hooulu lahui ? Ua akaka ka makou pane ma ka ae.
               Ke olelo hou mai nei hoi ko makou makou makamaka ma kona kumu kue alua, he poe hoomaopopo ole na pake i ka noho ana pono a keristiano. Oia paha keia, noho huikau a malama ole i ka maluhia o na ohana. Oiaio paha keia, aka o lakou wale anei kai paumaele ma keia hewa. Aole anei o ka lahui pu kekahi nona ka pono e imiia nei i haule pu ia lua mimilo o ka noho huikau ana. Ehia la poe maemae mawaena o keia lahui e noho ana e paa i ka ihiihi o ke berita mare ? Aole anei kakou i hewa, i ke komo ana mai o na lahui naaupo iloko nei o kakou, i ka hoomaopopo ole ana o kakou e malama i ko kakou noho ana maemae i kumu na na lahui naaupo e hahai mai ai mahope o ia mau kapuai ? Ke olelo mai nei kekahi kanaka nana i koho, he ekolu hapalima o keia lahui e noho huikau ana. Ua haalele ke kane i ka wahine, a pela hoi ka wahine i ke kane. Ua wawahi wale ia ka maluhia o ka mare a nahaha liilii. Nolaila, o ko kakou hoopalaleha ana i keia hema nui maluna ae, ua lilo i mea na na lahui e e noho nei me kakou, e hoopili mai ai.
               He nui ko makou manao no keia, a malia o kamailio hou oukou mahope.

No ke Kuikahi Panailike.

                    Ua hoike aenei oukou malalo o ke poo nu hou mai na aina e mai, i na mea hou e pili ana i ke Kuikahi Panailike, aka, he mau palapala e ae no kekahi i loaa mai ia makou mai na makamaka mai e hoolana aana i ka manao, a aole hoi e hookuihe no kona holo ana. Aka, o keia hookaulua wale ana i ka hooiaioia o ke kuikahi e ka ahaolelo, ke hoopuipui mai nei ia i na manao koho aku malia paha e nele ana i keia akoakoa ana, aka aole nae ia i hoonaueue i ko makou manaoio e hooholoia ana i keia kau no. He ulolohi no ka noonoo ana o keia ahaolelo, aka ina paha i hoouna like ia no na Komisina a i elua i holo ai, ina ua puipui loa na ikaika e hooholo koke ai.

Ka nunu ahai lau Paina o Puget Sound.

                    I ke Kapena o ka Baluna ahaiolelo o ka moana Pakipika, a me na Pailata hookomo manao o ke Kuokoa, a me na hoa ike nupepa e noho ana mai ka la hiki a ka la kau, a naue wale mai ma na aina e nei. ALOHA KAKOU :—
               Ua nui na la i hala ia makou o ka naue hele ana iloko o na ululaau loloa a me na kapakai anu o Washington Terr, nei. I ke kau ua wela i ka la, a i ka hooilo hui ua pue i ke anu, a i keia manawa, ke kokoke mai nei e o na kukuna wela o ka la i o makou nei. Aka, o kahi manao, ua hauoli no. A malaila no ka halialia ana mai o kahi manao, e hoouna aku i ko makou mau inoa pakahi imua ou a nau hoi ia e lawe hoikeike aku imua o ko oukou mau kini makamaka, e noho ana mai ka wai Koolihilihi i ka lae o Kumukahi, a pulelo wale aku i Lehua o ka wai huaa a ka Paoo. A naue wale mai hoi ma na aina e nei ; Penei.
               G. W. E Keamohuli, no Waipio, Hamakua, Hawaii. Keo, Mrs Malia Rorse, no Hilo. J W. P. Kalehuanui, Keawehaku, J D Kaili, no Puna. J Kealoha, W Keawe I, Kaui, B P Kahaawinui, A Maluae, no Kona Hema. J W Kanehailua, J Kupu, J Kumukahi, no Kona Akau. J W Kamaihui, J P Kamaikaaloa, J Pualoke, H Nahale, no Kohala Hema. L Maihuki, J Kapula, Andrew, no Kaupo, Maui. David, J Kahoomana, no Waikapu. James Kaai, no Waiehu, Maui. M Kamakahiki, no Ukumehame. C J Halape, no Lahaina. W B Kane, no Molokai. W H D Kahou, J D Noa, P D Wahiawa, J Wahineaea, E Kailikakio, no Honolulu, Oahu. J B Kalaiaina, no Ewa. J H Keahialaka, J H Kahalaala, no Mahaulepu, Kauai. J Kaawa, P Kiko, no Waipake, Kauai. C Maalo, S Keawe 2, T Kane, no Hilo Hawaii. J Kini, no Kona, Hema, Hawaii. J Haili, no Kula Maui.
               Oia ae la na inoa pakahi o makou i hai ia ae la maluna. Malia e oluolu i na hoa ike nupepa ke alawa iho, ina o kekahi o ko lakou mau ohana ka poe i make, no lakou na inoa pakahi malalo iho nei.
               S Kaliloa, J Naukana, no Puna, Hawaii. S Kalama, Ulii, no Kau, Hawaii. J P Kailikula, no Hilo, Hawaii. J Kiko, Lewi, Kapu, Kamai (k), H Kamai (w), no Kona Hema, Hawaii. P Kaloheaulaui, no Kohala Hema, Hawaii. Mrs. Pua, no Honuaula, Maui. Lucy Lukia, J Kahili, S Polena, Mahina, no Kaupo, Maui. C Kuahonui, no Kipahulu, Maui. Mr. Wainee, no Lahaina Maui. C Haiponi, no Kalae, Molokai. Mrs. W Pau Kaoo, Eluene, John Kahananui, H Mauli, Kalua, Kekaula, F. Kaanaana, Kapahi, no Honolulu, Oahu. Samuela, no Waimea, Kauai. Kekaa, no Moloaa, Kauai. Lihilihi, no Haulepu, Kauai.
               O ka nui keia o ko makou poe i hala aku ma kela kapa o ke awawa malu o ka make, a eia no makou nei ke u nei i ko lakou aloha, Oia hoi keia.
" Nakulu owa oloko,
Helelei hiolo ka pua o ka waimaka
E uwe aku ana ia oukou,
Ma ka Hiki ku, ka hiki moe,
Moe lolii i ke one o Kahualoa,
Loa ke ala a oukou e hele 'la."
G. W. E. KEANOHULI,
Kakauolelo. Kisap, Count, Feberuari 25, 1876.

                    Eia ka olelo a kekahi Keiki Alii ia Rabbi Gameliel : " O kou Akua he aihue, ua hoopuiwa oia i ko Adamu wa e moe ana, a aihue ae la i kekahi iwi aoao mai iaia aku."
               I ka lohe ana o ke Kaikamahine a Rabbi i keia olelo, hawanawana mai la oia i ka pepeiao o kona makuakane, e ae aku nana e pane i keia manao ano e. Ae aku la kona makuakane.
               Hele mai la ke kaikamahine i mua, a ua punia oia i ka ula a me ke kahaha ; puliki ae la oia i kona mau lima me ka pule, hooho ae la, " E kuu Akua, kuu Akua ! hoopono ! e hoopai mai i ka hala !"
               " Heaha ka mea i uha iho nei i" wahi a ka ninau a ka Keiki Alii.
               " He aihue ino loa," Wahi a ke kaikamahine. " Ua komo malu mai kekahi powa iloko o ko makou hale, a lawe aku la he kiaha kala, a waiho iho ma kahi o ke kiaha i laweia, he kiaha gula !"
               " He keu hoi ha a ka aihue hoopono !" wahi a ka hooho a ke Keiki Alii. " He hiki mau mai nei anei na aihue o ia ano ?"
               " E nana e ke ali, o na ano aihue la, o ko kakou mea nana i nana ; ua aihue oia i kekahi iwi aoao mai Adamu mai, a haawi aku la i wahine nani a maikai ma kahi o ua iwi aoao la i lilo."
               " Wela ka !" wahi a ka pane a ke Keiki Alii.

Nu Hou Kuloko.

                    Ua lohe mai makou, ua lilo aenei ia Kimo Pelekane ka hoolimalima o Kakaako a me na aina paakai.
               Ua pouli io no ka la ma ke kakahiaka o ka Poaono aku nei i hala e like me ke kilokilo ana a ka poe nana lani i o ka lilo loa.
               Ke hoi mai nei na la loloa o ke kau, ke mehana mai nei hoi ka hora 7, a pau no hoi i ka hora o ka hana o ka la me ka pumehana.
               Ua lohe mai makou ke kaniuhu nei ko Kamoiliili poe i ke ke mau o ka bele i na po a pau. A e pau ke kauna o ke kani ana i ka po hookahi.
               Eia ma na pali wai ole nei o Puna, Hawaii, kekahi mau kanaka e hoomakaulii nei ma ka hana puhi okolehao. He ike ole paha i ke kanawai, a he manene ole paha i ka hoopaiia ana o kekahi kanaka malaila no ka elima haneri dala.

               J. K. KAUMEHEIWA.— Aole o makou manao, he palapala ano nui kau e ka mea nona ka inoa maluna e ninau ana i kahi i noho ai o " Na'u No," oiai ua ike makou ia mea, a ua hookomoia kaua i mea hoolealea, aole no ka manao ino pilikino.
               Ua lohe mai makou, ua holo aku nei o W D Alekanekero e ana i na aina o Lanai, aia maloko o ia moku, he 11 ahupuaa. He 1 a   2 paha no Keelikolani, I no Fane Iana, 1 no Kipikona, a o ke koena no ke aupuni, aina lei alii a no Lunalilo paha.
               Ua lohe mai makou, ua hele mai nei kekahi Komite mai na makaainana mai o Haneoo, Hana, Maui Hikina e hoolimalima i ka aina o Haneoo no lakou, aka hiki mai nei nae, ua lilo aku la i ka mea dala. E kipakuia ana na kanaka e noho la ma ua aina la, pela ka hoonuinui mai a ua Komite la.

               HOOMAOE OLELO PALAHU.— Ua laweia mai i o makou nei ka lono, ke makemake nei na luaui o ka ahahui paio o Kamoiliili e ao i ka olelo palalu. Mamua koke iho nei no ka hoole ana i ko pono ole o ka olelo palalu e lilo i poo, aka ke makemake nui la e ao, a me he mea la, e lilo ana ka olelo hope i mua.

               MAU LUNAMAKAAINANA OMAIMAI.— Ua lohe mai makou, ke waiho nawaliwali mai nei o Hon. S. M. Kamakau i ka mai. Nohea ole mai no hoi i ka houpuupuia, e hoopii no ka waiwai ole.
               — O Hon. Rev. S. Aiwohi, ka lunamakaainana i kohoia no Kohala, ke loheia mai nei, he omaimai no.

               HALAWAI MAKAAINANA NUI.— Ua konoia mai makou e hoolaha aku ma ke akea, e malamaia ana he halawai makaainana ma Kaumakapili i ka hora 7 o ke ahiahi Poalua e hiki mai ana no ka noonoo ana i ka hoike a ke Komite no ka hooulu lahui. Nolaila, e hele nui ae oukou, o kapaia auanei he hana a kamalii.

               AIWAIWA LOA AKU I KA HALE PAA RULA.— Ua waihoia mai ma ko makou pakaukau e kekahi makapo, he leta nona kela poo maluna ae, a penei na olelo malalo iho : " Ua ikeia ka halahu o kekahi o na lunamakaainana o Honolulu nei maloko o ka halawai makaainana o Honolulu nei i Kaumakapili i kaheaia ai i ka po Poaha i hala no ke kumu manao hooulu lahui." [Owai keia lunamakaainana. L. H.]

               UA HALA.— I ka Poalima, Maraki 10, ma Kaonoulu, Kula, Maui Hikina, ua hala aku la o Paakuku w. i ke ala hoi ole mai, mahope o ke kaa mai pokole ana no na hebedoma elua. He wahine oia i aloha nui ia e ko Kula poe, a i ka wa i laweia ai kona kino make e kanu, ua nui na kini makamaka i hele mai e ukali aku. Ua waiho iho oia ma keia ao, he waiwai paa nona ka waiwai io paha i hiki i ka iwakalua tausani dala maluna o kana kaikamahine.

               KAMAA HAAHEO.— Mamuli o ke kauoha a ka aea haukae nui o keia kulanakauhale, ua humuhumuia he paa kamaa nona ke kumukuai he eono dala. No ka lawa ole o kona puni haaheo ia maikai, o ka ili wale no, ua kuai oia i pohaka poepoe maluna iho no ka hapalua dala a ua kauia maluna iho ; a no ka hinuhinu ole me ka panio ole, nolaila, ua kauoha ia kekahi keiki pena, e peni panio i ua paa kamaa la no ke dala hapalua. I keia Poaono aku nei i hala, ua hoao ia ua paa kamaa nei, a eia ke lino hele nei, aole i na la e ae, aka, i na Poaono a me na Sabati.

               PALAPALA HOOPII I KA MOI :— Ua halawai mai me makou kekahi palapala hoopii i ka Moi me na inoa lehulehu he 817 e kau ana, a mawaena o ia mau inoa, he poe haole hana mikiala kekahi. O ke kumu nui, e hoapono ana i ka ua Kuhina pane ana iho nei i ka palapala kalokalo a na haole i ka Moi, me ka nune no ke dala ole o ke aupuni, aka, o ke ake nui, e hoouluia ka lahui mailoko aenei o ka aina.

               MAU PALAPALA ANO NUI — No ka piha loa o ka pepa o keia la, ua hookauluaia kekahi mau palapala, oia, ka palapala a ke Kuhina W. L Green e pine ana i na haole nana i kakau i ka palapala hoopii i ka Moi.
               — Na Hoa E K. Lilikalani hoi he palapala, a keia pule he puka aku.
               — He kanikau hoi no J W Keawehunahala a keia Poaono aku.
               — Ka olelo hooholo a ka aha no ka hihia o Lawai, Kauai.
               Ma ka Poakahi iho nei, ua malama ia ke koho balota ana o na makua mea keiki o ka apana o Kona, Oahu nei, no ka hoa ekolu o ka Papa Kula Apana, a ua kohoia o Rev. Heremano Koekman ma ia wahi. Eia ka ninau, ua hookupaia anei o Heremano i kanaka Hawaii elike me ke kanawai o ka 1874, aole paha. Malia paha, e ia no oia ke noho nei malalo o ka malamaia ana mai e ke aupuni Geremania a Farani paha.

               HE MANU KAKA OPIO EHA WAWAE — I kekahi la o keia pule iho nei, ua kiko ae la kekahi hua kaka, he wahi manu opio kupanaha, eha ona mau wawae, elua mamua, a elua mahope, he ano opili nae na wawae. Ma na wahi e ae a pau o kona kino, ua like no me ke ano mau o na keiki kaka, koe wale no kona mau hoe eha. He hua keia no loko mai o na ano ohana kaka keokeo, a na ka moa wahine i hoomoe. Ke ola nei oia a hiki i keia wa, ma Kamanuwai i Honolulu nei.

               HE IMU AHA LA ?— Mai ka peni mai a J. K. Apuakehau i ike iho ai makou, i ke awakea kukonukonu o ka la Sabati koke iho nei no i hala, ma Pakole, Koolau aenei, ua ike aku oia e huai ana kekahi kane a me elua wahine i kekahi imu kalo paha, uala paha a ki paha, (no ka mea, ua poina ko makou mea kakau i ka hoomaopopo malaila.) He keu aku a ka makau ole a me ka nana. Aole ka paha e mo-a ka lakou nei imu i na la eono, aia i ka hiku o ka la e mo-a ai. E uoki ka hana pekena.

               MAU LOIO HAWAII PAHA HEAHA LA — Ua lohe mai makou, ua wehe ae o W. H. Uaua a me C. W. Kenui i keena oihana kanawai no laua makai iho o ka halekuai a Kimo e noho nei ma Wailuku. Aole no makou i lohe he mau keonimana paa kanawai. Ua ike makou ia laua, he mau kanaka kino puipui nui, e pau ai kahi mau kuauna loi i ka mahi ia ina e hoopapau ana malaila. Aka ina e manao laua, ma ia oihana laua e pomaikai ai, e malama i ka oihana a me ka inoa. Aole ka luaiele wale a hoowahawaha paha, no ka mea, e hana olua i ka hana i loaa ia olua.

               PIKO PAU I KA IOLE.— Alua aenei hebedoma piha o ko makou kali makamaka ana, me ka manao ua lawe la ko makou mau hoaloha i kekahi mau lako kakau mai ko makou pakaukau aku me ka manao a hoihoi mai, aka, aole nae i hana pela. Oia hoi keia, ua laweia aku he maka peni gula a he penikala inika. O ka makamua keia a ka " piko pau i ka iole" i komo ai a lawe kolohe aku i ko makou mau lako kakau, aka iaia e kakau ana ia mau peni, ke nana iho la no na maka nunui maluna iho a ke kali la a piha ke kiaha o kona inaina, alaila, hoohina iho iaia ma ke alanui e make kuhewa.

               HE WANANA HOOPUNIPUNI.— Ua kau leta mai o R. H. H. Pele o Kapaahu, Puna, Hawaii penei : " mamua ae o ka la 1 o Maraki, ua wanana ae kekahi wahine o ka aoao Katolika Roma, ma ka la 1 o Maraki elima kui ana o ka hekili, elima olai, olapa ka uila, pio ke anuenue, a pau keia mau hoailona, ia wa kakou e ike aku ai i ka Haku e noho mai ana iluna o ke kaa ahi, oia a me ka Malu (Kahapuu) kekahi wahine kaulana mamua no Kahaualea, Puna. Ua makau kahi poe e hoakoakoa ae la i ko lakou mau ohana. O i kali wale aku a po ka la, aohe ko iki o ka wanana. I ke ko ole ana o keia wanana, e hoopupule loa iho ana keia wahine.

               NO KA HULA HAWAII.— Ua loaa mai kekehi leta ia makou mai Laie Oahu mai, e hoike ana, aia ma Laie he elima mau pa hula. O ka mua, elua mea hookani puniu a he ekolu haumana e ku ai iluna ; o ka lua, he ekolu hoopaa, elua wahine a hookahi kane olapa ; ma ke kolu, elua hoopaa o lalo i kahi wa, a.hookahi i ka wa nele loa, a elua no hoi olapa ; ma ka ha o ka pa hula, he hookahi hoopaa a he elua mau kaikamahine liilii ; a ma ka elima o ka pa hula, he olua hoopaa, a he elua olapa. He elua mau kaikamahine i komo i keia mau hula i haawi loaia mai e na makua e ao a ike i ka hula, a o ka laua ai ia a me ka ia. Like loa me na keiki e hoounaia ana i ka hoonaauao. Ke ao aku nei makou i na makua o keia mau kaikamahine a me ka poe e puni wale ana i keia hana hope ole, e hooki lakou, a e hoi e malama i ka noho ana e ola ai me ka hilahila ole.

               HAULE I KA LIO A MAKE - No ka nui o na makamaka o keia pepa ma na paia a pau o keia aupuni, ua hiki ke loaa ia makou na nuhou o kela a me keia ano. I ka la 17 o Maraki, ma Honuapo uka, Kau, Hawaii, ua hele kekahi keiki o Beni ka inoa i ke alualu lio a ua loaa no ka lio. A iaia e hoi ana i kauhale, haule iho la ia iloko o ka luaki ua eliia a hamamama, a o kona make no ia me ka ike ole o kekahi mea. I ke kakahiaka ka pii ana i ke alualu lio a i ka auina la ka loaa ana aku o kona kino make. Aloha ino ia, O ka loihi o kona mau la ma keia ao, he 15 makahiki, 3 malama a me 17 la. O na inoa o na makua, o Holohua a me Kaai.

               KEIKI HANAU KUPANAHA — Ma ka la 27 o Maraki, ma Wailuku, Maui,— ua hanau mai na Puu k. me Ki w. he kaikamahine — eono manamana o ka lima akau, a pela hoi ka lima hema, a na paono ia no hoi na manamana wawae, a o lakou a pau, he 24 manamana. Hookahi no puka ihu ma ka aoao hema, a o ka aoao akau o ka ihu, oia no ka lehelehe luna, ua hakahaka pu hoi ke nana aku. O ka piko, ua like me ka hapalua o ka puupuu lima ka nui, a ua make ua keiki la mahope iho.
               — Ua koho pono ia o Rev. W. P. Kahale i hoa ekolu no ka Papa Kula o Wailuku, he 35 balota ; aohe inoa e ae.
Maraki 29 1874. MALUIKEAO.

               MAI HILO MAI.— Eia ka olelo a kekahi leta mai Hilo mai i kakauia ma ka la 22 o Maraki, " o ka mai ka hapa nui ma Hilo nei. Nui ka poe mai a me ka poe make hikiwawe i kela pule aku nei (oia paha ka pule e pau ana i Maraki 18). Eha poe i make i ka la hookahi. E kani mau ana ka bele kupapau.
               —" Ua waiho iho nei o Miss Richardson i ka noho kumu ana no ke kula hui o Hilo nei, a me he mea la, oia ke Kilauea o keia kakahiaka e ku mai ai o Miss Ingraham, ke kumu hou.
               —" He mau la maikai loa keia o Hilo nei, ua hala hope aku la hoi na la a ka ua i anee mai ai.
               —" Hookahi wahi moku okohola e ku nei ianei, a hookahi haole o luna i make, a ua hooleleia mai i uka nei."

               HOOPAIIA KE KOLOHE — I ka Poaha iho nei, ua hoopaiia o Kealakaa o Nuuanu, he holona lawelawe i ka oihana lapaau me ka laikini ole, i mua o ka aha Hoomalu, he kanalima dala a me ekolu dala koina. Nui ka poe i kaukoo ae e hoopiha i ke keena hookolokolo mahope o ua kaula nei, a o lakou a pau, he poe i puni iaia ma kana hooio lapaau ana. E piha mau ana ka kona wahi i na po a pau i keia poe, a o ka lakou hana ka uwa o ka po a paia kuli. Eia kekahi mea kupanaha, i ka wa e hookolokolo ia ana o Kealakaa, e oli ana kekahi wahine pupule mawaho me ke kahea ana i ka inoa o na akua hoomanamana, e kokua mai i ke kahuna a e hoopakele iaia. I kona wa e oli ana, poohu ana ke poo o ke kahuna i ka poohina me ke aoia mai ina e lawelawe hou, alaila e hoopii pakahiia aku ana ia ma na mai ana i lapaau ai. Ua oki e ke kanaka ui, a e hoopau i ka aea haukae a hoi ma ka paeli.

               MAI HOOLOHE IA J. S K.— Ua hoopuka ae nei o J S K ma ka " Lahui Hawaii" o ka Poaha iho nei i kona manao ma ke ano luna hooikaika balota no S W Kaai, a kilokilo hoi i ua la mamua ae. He kamaaina au ia J S K mai Kona mai a i Honolulu, o kona ano he hilinai ole ia. Nui na olelo a me na kilokilo ma kona elelo laka ole i hoopuka ai me ka oiaio ole. Pela no ma keia mau itemu elua ana i hoopiha ai. He hoa holo balota a paonioni no o D H Nahinu no K Kamauoha a me S W Kaai i ke koho balota o Kona Hema i ka la 2 Feberuari. E ikeia ka oiaio o keia ma ka loaa ana ia D H Nahinu o na balota, he 35 ; ia Kamauoha, he 87, a ia S W Kaai, he 87. — No ka ninau a J S K i ke Kuokoa., " Owai la ka i paewaewa ?" a pela aku, ke hai aku nei au, o ka Lunakanawai o Kona Hema, no ka mea, ua hookolokolo oia i ka hihia aole i kaa malalo o ka mana o kana aha. He ake wale no ka J S K e hewa o Kamauoha, alaila koho hou o Kona Hema, holo hou e hooikaika no S W Kaai. Oia ko'u ike ma ke ano o kana kamailio ana. Aole au e hilinai iki ia J S K no ka oiaio ole o kana mau kamailio a me kana hana. He elelo lua o J S K.
MAKAMAKA O KONA.

               HOOKUUIA O K. KAMAUOHA — Ua loaa mai ia makou keia leta malalo iho mai ka peni mai o kekahi makamaka o makou e noho ana ma Kona, a penei kana hoike ana no ka hookuuia ana o Hon. K. Kamauoha, ka lunamakaainana i kohoia no Kona Hema : " O ka'u i hoike aka ai ia oe ma ka la 15 o keia malama (Maraki) no na mea e pili ana i ka hana pono ole a kekahi Lunakanawai Apana o makou (Kona), a hoopai ai ia K. Kamauoha no na malama elima, me kuu hoike pu aku hoi ia oe i ke ku ole o ia olelo hooholo i ke kanawai, e ikeia ka oiaio malalo iho. Ma ka la 22 iho nei o Maraki, ua noho iho la ka Aha e nana no keia hihia imua o Hon. F. S. Lyman. O ka makai nui ma ka aoao o ke alii, a o D. H Hikikoki ma ka aoao o ka mea hoopiiia. Ia noho ana i ninaninau pono, ua ikeia ka huhewa o ka olelo hoopii mua, me ka olelo mai, ua hookaaia oe e Kamauoha, a o ka hoopai ana a ka aha apana o Kona Hema ia oe, aole i kulike me ke kanawai. [O ko makou lohe mawaho ae, he lili maoi no kekahi kumu o ka hoopaiia ana, no ka mea, ua noi ke kokua o ka aoao o ke aupuni oia ka Luna Makai o na Kona, e hookuu ia K. Kamauoha, aka, hoopaneeia ka olelo hooholo, a he ekolu la, haawiia e hoopaahao, a i Kona Akau hoi ka Luna makai ia manawa.]

               EIA HOU UA MAU KUPUNA HANAU NUI — Ke hoike aku nei au i keia kumulau, a " hooulu lahui." Aia ma Kanaio, Maui, o Keaumiki ke kane, o Apuakahei ka wahine, na laua i hanau mai na keiki 8, Elima kaikamahine, 3 keikikane. O Paukahili ka mua he wahine ia, nana na keiki elua, o Kamaka wahine kona muli mai, nana mai na keiki 7, eono kaikamahine, hookahi keiki kane. O Arekoolani k. kona muli mai ; nana na keiki kane 2 a e 3 kaikamahine, Pupule k. kona muli mai 2 ana keiki, o Auekoolani kona muli mai aole ana keiki, o kona muli mai o Kalama w. 3 keiki, a ke hapai nei no ia, na Pelekila w. muli mai o Kalama hookahi keiki. O Makuahine w. ko lakou muli loa, aole oia i moe kane. O ka huina o na keiki i hanau ia e keia poe he 20. A ke hui puia na keiki me na makua nana i hanau mai keia poe keiki, he 33, a ina e hui mai me 2 keiki hanau keiki ole 35, hui pau loa me ke kupuna e ola nei he 38 ka huina. Aole nae i hanau mai na moopuna i mau kualua. No ko'u manao, o kekahi keia o na kupuna hanau nui, e like me ka'u e hoike nei. He mau kupuna hanau nui, a " hooulu lahui" hoi ; ka makia hoi o ke aupuni o ko kakou Moi, he hooulu lahui D. N. MANU OPIO.
K. H. Maui, March 22, 1876.

NU HOU O KA AINA E !

KU MAI KA BONANZA.

                    Ma ke ku ana mai o ka moku kuna Bonanza i ka hora 4 o ke ahiahi Poalua iho nei, iloko o na la holo he 11 mai Kapalakiko mai, ua loaa mai ia makou na nu hou a hiki i ka la 17 o Maraki.

Ke Kuikahi Panailike.

                    I ka Poakahi la 6 o Maraki, ua Komite ka Hale Ahaolelo nui o lalo o Amerika Huipuia, no ka noonoo ana i ka Bila e hoomana ai i ke Kuikahi Panailike me Hawaii o Mr. Sayler ma ka noho luna hoomalu. Na Mr. Wood o Nu Ioka ka haiolelo hope e kokua ana i ka bila e hooholo. Eia na lunamakaainana i puka a maka na manao i waho i mua o ka hale ma ka aoao kokua i ka bila, o Luttrell o Kaleponi, ka mea nana ka bila, Page, Lawenworth. A o ka mea hookahi i puka ka manao i waho ma ka aoao kue, o Mr. Kelly o Peniselavenia, he Ripubalika ikaika ma ka hooemi i na lilo o ke aupuni, ka mea hoi i kapa iho i keia kuikahi, he mea imi waiwai.
               Ke palapala mai nei o Col. Spalding ka hunona a Kapena Ki, malalo o ka la 17 o Maraki mai Kaleponi mai, eia ke Kuikahi ke lupalupa ia la e ke ahi e kau nei iloko o ka Hale, aka o kona mau holomua he maikai no.
               O ka Luttrell haiolelo ka oi o ka maikai ma ko kakou aoao, a ua mahalo nui ia, a hoole aku oia i ka ke kanaka kue inoa kapakapa i ke kuikahi. Olelo hoi o Page ke kahi o na haiolelo ma ka aoao kokua, ina aole e hooiaioia e Amerika keia Kuikahi, alaila, e pau ana ke kalepa ana mawaena o Kapalakiko a me Hawaii iloko o ka makahiki hookahi. Aole oia i kokua ma ke ano o na dala a me ke keneta. O ke Kuikahi, aole wale no ka pomaikai o na aina ma na kapakai o ka Pakipika, aka no ka aina holookoa. He wahi hana naauao na kakou, ke keehi e ana maluna o na Pae Aina Hawaii, ke hooholoia keia kuikahi, a mai noho kakou a ae aku malalo o kekahi mau kumu e lilo aku ia pae aina i kekahi mana e aku.

No Amerika.

                    Ua waiho mai ke Kuhina Noho o Amerika Huipuia ma ke alo alii o Ladana i kona palapala hookohu Kuhina no ke komo ana iloko o kekahi hihia hoopukapuka lua mineminerala. Ua waiho aku ka Peresidena i ka mea e pani ia hakahaka, o R H. Dana jr. aole nae ae mai ka Ahaolelo Senate ia inoa.
               Ua hoopauia ke Kuhina kaua o Amerika Huipuia oia o Belknap no ke kuai ana i kekahi wahi oihana hoopukapuka ma Papu Sill a me kekahi mau mea e ae ma ka palena o ia wahi. Ua waiho koke oia i ka oihana ia wa, a ua ae aku ka Peresidena e lawe, aka ua hoahewa loa ia ka Peresidena. Ua hoopii luna nui ia ua Kuhina kana la e ka Hale o na makaainana ; a ma ka la 8 o Maraki, hopu kinoia iho la ua Kuhina la i pau a laweia imua o ka aha hoomalu ma Wasinetona. Mahope iho o ka hora 4 o ia ahiahi, belaia aku la ia e W M Rapley no ka $25,000. Ua hookohuia o Lunakanawai Taft o Ohio i Kuhina kaua no Amerika Hui, ma kahi i Belknap i hoopauia.
                    Ke maumaua loa mai nei ka hookolokoloia o kela kahunapule kaulana Henere Wata Bita, aka ke hoohewa nei ka Ekalesia Plymouth, ka ekalesia ana e noho kahu ana i ka hana a ka Aha Kuka.

No Europa.

                    He nui ka nune ma Enelani no ka ae ana o ka Moiwahine Victoria i ka inoa hoohanohano, he Emepera wahine no Inia. Ke mau mai nei no ke ano pohihihi no ke ano kuloko ma kekahi mau okana aina ma Tureke iho. Ke manao nei o Helene e komo aku e kokua ia Serevia a me Roumania ma ke kaua kue aku a ma ke kaua pale mai e kue ai ia Tureke.