Ka Nupepa Kuokoa, Volume XV, Number 17, 22 April 1876 — Page 1
KA NUPEPA KUOKOA :
Ke Kilohana Pookela no ka Lahui Hawaii.
BUKE XV. HELU 17. HONOLULU, POAONO, APERILA 22, 1876. NA HELU A PAU 751.
MAIKAI KA HOI KA PAPA !
— A ME —
Ka Laau o kou Hale ! No Hea la ?
KA I NO HOI NO KAHI O WAILA MA ! Nana aku no hoi ia la, OHI KA IO O KA LAAU O MAKAWAO, i ka ua mea o ka nani o Na Papa, Na Laau A ME NA PONO KUKULU HALE O NA ANO NO A PAU, MA KE KIHI O Na ALANUI PAPU a me MOIWAHINE, ...... Honolulu ...... MALAILA E LOAA AI E LIKE ME KA makemake, no ke Kumukuai makeponoloa. PAPA, PAPA, PAPA Na PAPA huluhulu, Na PAPA manoanoa, Na PAPA i kahiia, Na PAPA kepa, PAPA holo keokeo, PAPA holo ulaula. NA LAAU! LAAU! NA KUA. NA KAOLA, AAHO, MOLINA, PEAPEA, PINE HULUHULU, PINE I KAHIIA, Na Papa a me na Laau Ulaula ! PILI ULAULA PILI KEOKEO, PANI PUKA, PANI PUKA ANIANI IPUKA ANIANI, OLEPELEPE. PENA O NA ANO A Pau Hulu Pena mai ka liilii a ka nui ! AILA PENA ! AILA HOOMALOO, WANIKI, PATE NA LAKO o kela a me keia ano. NA AMI-PUKA HALE, NA AMI-PUKA PA. ANIANI ! Pepa Hale me na lihilihi E LOAA NO MALAILA KA PAAKAI Helu 1, O KAKAAKO a me PUULOA No ke Dala kuike, e loaa no na mea a pau i haiia ae la no ke kumukuai emi loa.
O na kauoha a pau mai Hawaii a Niihau, e loaa'ku ana ia lakou, e hooko koke ia mai ana no ia me ka lawa pono.
E kipa nui ilaila, i ike i ka oiaio
749 3m 760
HE
IWAKALUA TAUSANI LEGUE
MALALO O KE KAI !
— NA MEA —
KUPANAHA O KA MOANA !
KE ALA O KA MEA HUNA,
— A O KA MEA —
POHIHIHI O KA 1866 !
MAHELE 1.
" He kakaikahi wale no ka Bunesena mau mea paahana, aka, he ikaika nae a me ka nui, pela i manao ai au, oia ka oi aku o ka maikai.
" I ka hoopuka ana mai i ka uwila mai loko mai o keia keena, ua holo aku no iu i kela keena, kahi nana ka hana me na hao maganeta nunui, na une a me na huila nihoniho, nana e hookaa i ka iho o ka huila nao. O keia huila nui, he umikumamaiwa kona ana waena, a he iwakalua kumamakolu kapuai ka loa o ka lopi nana e hookaa i hookahi haneri me ka iwakalua manawa iloko o ke sekona hookahi."
" A pehea ka holo o ka moku, ina pela ke poniniu o ka huila ?"
" He kanalima mile iloko o ka hora hookahi."
" A ! ua ike io au i ka holo ana o ka Nautilo me ka Hikiwawe loa, imua o ka Aberahama Linekona ; ua koho wale au, he kanakolu mile kona holo i ka hora hookahi, eia ka aole ia o ka palena o kona holo. Aka, aole i pau ko'u pohihihi. Aohe maopopo ia'u, pehea la i ike ia ai kona wahi e holo ana ? Pehea la hoi i hiki ai iaia ke holo i ka Akau a i ka Hema, i ka Hikina a i ke Komohana ? Pehea la hoi i hiki ai ia oe ke luu iloko o ka hohonu lipolipo loa o ka moana, kahi e hoomahuahua loa ia ai ke kaumaha o ke kaomi ana o ke ea a hiki i ka pahaneri ana o na ea ? Pehea hoi e hiki ai ia oe ke pii hou ae i ka ili o ka moana, mailoko mai o ka hohonu ? A pehea hoi e hiki ai ia oe ke holo pololei mawaena konu o ka papaku a me ka wai like o luna me ka mau ? Ua nui loa anei ka'u mau mea e ninau nei ?"
Pane mai la o Kapena Nimo, me ke ano kuihe, " E ke Kumu, aohe i nui, oiai aole oe e haalele mai ana i ka moku holo-kai. E hele kaua iloko o ke keena nui, o ko makou wahi mau ia e imi ai, a e kuka ai ; malaila e ike ai oe i na mea a pau au i makemake ai e ike no ka Nautilo."
MOKUNA XII. NO KEKAHI MAU HUAHELU.
NO KEKAHI manawa mahope iho o ko maua noho ana maluna o kekahi noho pulu akea, iloko o ke keena huli palapala ; a oiai maua e puhi kika ana, hoike mai la ke Kapena i ke kii i hoolalaia ai ka Nautilo, kona mau keena a me ka hookumu ana iaia. Alaila, hoakaka mai la me keia mau huaolelo : " Eia na mahele niu i hoolalaia ai ka moku au e holo nei : Ho ano poepoe loihi oia, a puoa na welau. Ua ane like me ke kika ; he ano i hoao mua ia ma Ladana iloko o ke kapili ana i kekahi mau moku no keia ano. O ka loa o keia poepoe loihi olowi o na poo, mai hope a hiki imua, he 232 kapuai maopopo, a o kona akea ma kahi laula loa, he 26 kapuai. Aole oia i kukuluia e like me ke ano o ko oukou mau mokumahu holo loihi ma ka moana, aka, ua hooloihi kupono ia kona mau laina wai e like me ka hiki pono no ka moku o keia ano, a ua hooloihiia hoi ka laina hoopio, i mea e pakika koke ai iloko o ka wai, me ka hookuemi hope ole ia e na mea keakea e ae ma kona alanui hele. Ma o kona loa a me ka laula, e hiki no ia oe ke noonoo iho i ka nui o kona mau kapuai kuea ma ka ili o waho, a pela hoi i kona mau kapuai paailiono ma ka paa o loko. O kona ili ma ke ana ana, 6,032 kapuai kuea, a o kona paa o loko, he 1,500 iwilei paailiono ; oia hoi, i kona wa e komo ai iloko o ka wai A pau loa kona kino holookoa, he 50,000 kapuai paailiono o ka wai i hookaawaleia e ia, ua like me ke kaumaha o na tona he 1,500.
" I ko'u wa i hoolala ai no keia moku holo moana, ua manao au i eiwa hapaumi o kona nui e komo ai iloko o ka wai ; a o ke kumu o ia manao ana o'u pela, i mea e nui ole ai ka hana ma ka luu ana iloko o ka hohonu, oiai o na eiwa hapaumi o ka moku, ua like pu me ia ka nui o na wai i hookaawale e ia, nona ke kaumaha, he 1,500 tona, nolaila, aole pono ia'u ke hoomahuahua hou aku mamua o ia kaumua, a oi aku mamua o ka mea kupono i ka loa a me ka laula i hoike mua ia aku nei ia oe.
" O ka Nautilo nei, ua kapili papalua ia oia ma kona mau aoao a pau, he pale maloko iho o ka pale o waho, a ua hoohuipuia keia mau pale e na kua hao i like me ke T ke ano, a oia kona koo i paa ai. He oiaio, mamuli o keha hoohui ia ana o na pale o waho me na kua hao o loko, ua like oia me he pauka hao hookahi la, a ua like hoi kona ikaika a me ka paa me he pauku paailiono la, nona ka nui i like me ka Nautilo nei, a me he la aole he olohaka o loko. Aole e hiki ke maihiia kona mau pale o waho a me na aoao, ua pili pono loa kela a me keia poo i na pale hao, a me kona mau ho-ai, kekahi i kekahi ; a no keia pilipono ana a me ka like loa o ka hoohuiia ana o kekahi i kekahi, he hiki no iaia ke a-a me ka hopo ole iloko o na uluku ino a pau o ka moana a me na kai oolea.
" O keia mau pale elua, he mau papaahao kila wale no, a na laua hoi e kiki ia aku ka wai mai ka ehiku a hiki i ka ewalu hapaumi. O ka pale hao kila mua, aole i emi iho malalo o elua ihihaa me ka hapa kona manoanoa, a 394 wale no tona ke kaumaha. O ka pale elua ku mea nana i wahi ke kila o lalo, no na iniha he iwakalua ka manoanoa, a he umi ka laula, he kanaonokumamalua wale no tona ke kaumaha. O na enegine ka mea hookaumaha, a me na mea hana e ae a pau, na pale manoanoa o kela a me keia keena o ka moku, na lako e ae a pau o na keena a me na kiwi hao ikaika, ke huiia ko lakou mau paona a pau, ua like me 961.62 tona ke kaumaha. Ke hoomanao nei anei oe i keia mau mea a pau ?"
" Ke hoomanao nei au," wahi a'u.
" Nolaila, i ka wa e lana ana ka Nautilo malalo o keia kaumaha, hookahi wale no ona hapaumi e koe ae maluna o ka wai. Ano, ina wau e hana i mau lua wai e like ka nui me keia hapaumi maluna o ka wai, alaila, ua like ia me 150 tona ka nui o na wai e piha ai ua mau lua wai la ; a ina hoi wau e hoopiha i keia mau lua wai i hiki i ka 1,507 tona, e nalowale auanei ka moku holookoa a pau iloko o ka wai. Pela iho la ke ano e ke Kumu. He mau lua wai o keia ano ma na wahi malalo o ka Nautilo. I ko'u wehe ana i na pani i hoopaaia ai keia lua wai, e piha koke no lakou i ka wai, a e piho iho auanei ka moku, a hiki i ka iliwai like ana ma ka laina wai."
" Ae, e ke Kapena, oia ka mea paakiki maoli i ko'u noonoo ana. Ua maopopo ia'u kou hiki ana e pii ae iluna o ka wai ; aka, i ka luu ana iloko o ka wai, aole anei e loohia kou moku i ka poino no ke kaumaha o ke kaomi ana o ka wai a me ke ea, a heaha la ka hopena e loaa mai ana no keia mea, oiai ua maopopopo ia oe, hookahi ea no kela a me keia kanakolu kapuai malalo iho o na wai, a he 15 paona ke kaumaha o ke kaomi ana maluna o ka iniha huinahalike hookahi ?"
" Pela no," i pane mai ai o Kapena Nimo."
" Nolaila, ina aole e hiki ia oe ke hoopiha loa i ka Nautilo me ka wai — aole au i ike, pehea la i hiki ai i kou moku ke luu ilalo loa o ka hohonu ?"
Pane mai la o Kapena Nimo, " E ke Kumu, mai hoopilikia i kou noonoo ana no na mana hoonee a me ka ume kaumaha, o komo oe iloko o kekahi kuhihewa nui. He oiaio, mamuli o ka huli maopopo ana i ke ano o ke kaomi ana o ke ea, aole i piha loa e like me na mea i manao wale ia, ua koe he .000436 o ke ea no kela a me keia 30 kapuai hohonu malalo iho o ka ili o wa wai. He uuku loa ka hana ma ka hooiho ana i ka moku a hiki i ka hohonu lipolipo, no ka mea, ua ike oe, o na mea kino a pau i poho iho malalo o ka ili o na wai, he mau ume kaumaha ko lakou no lakou iho e poho ai a hiki i ka papaku o lalo loa. I ko'u wa i makemake ai e huli i ka nui o ke kaumaha e hoopiho ai i ka Nautilo, e nana mua no au i ka hohonu a'u i manao ai e hoopiho i ko'u moku, a e like me ka hohonu o ka wai a'u i manao ai, pela no auanei ka nui o ka mea hookaumaha nana e hoopiho i ka moku ilalo."
" Ua akaka ia."
" Ano, ina aole he mea kaomi kaumaha ka wai, alaila, e hiki ia'u ke olelo ae, aohe ikaika nui o kona kaomi ana. Ua hoike mua aku nei au ia oe, he .000436 ko ke ea no kela a me keia kanakolu kapuai hohonu malalo iho o ka ili o na wai. Ina wau e makemake ana e hoopiho i ka moku a hiki i ka 3,000 kapuai ka hohonu, a e noonoo pu no hoi au i ka nui kupono o ka mea hookaumaha, me he mea la aia oia malalo o ke kaomi ana a ke kolamu wai, nona na kapuai he tausani ke kiekie. He mea hiki loa keia ke hoanoe ae. Ua hoolako au i kuu moku me kekahi mau lua wai kaa wale, i hiki ke hoopihaia i 100 tona. Ma ia mea e hiki ai ia'u ke hoopiho a hiki i ka hohonu lipolipo. A i ko'u wa i makemake ai e pii ae a hiki i ka ili o na wai, e hookuu hou aku au i ka wai i malamaia maloko o na luawai ; a ina hoi e makemake e hoolana loa i ka akahi hapaumi o ka Nautilo maluna o ka ili o ka wai, e hookuu pau loa aku no au i ka wai iwaho."
Aohe a'u mea e pane aku ai no kana mau mea i hoakaka mai ai, aka, i aku la nae au, " E ke Kapena, ke lawe nei au i kau mau hoakaka ana, a he mea makehewa wale no ia'u ke hoopaapaa aku ia oe, oiai na kou mau hoao paka ana i kela la keia la i hooiaio mai i keia mau mea. Aka, aole i pau ko'u kanalua no kela pilikia a'u i ike mua ai."
" Heaha ia ?"
" Eia ; i kou wa e hiki ai i ke tausani anana ka hohonu malalo iho o ka ili o na wai, ia manawa hookahi, e auamo pu ana na paia o ka Nautilo i ke kaumaha o ke kaomi ana o na ea he haneri. Nolaila, ina oe e makemake ana e hookuu aku i ka wai iwaho, oiai ka moku iloko o ia hohonu, no ka pii ana ae i ka iliwai o luna loa, a i mea hoi e hoomamaia ai ka moku, he mea ane hiki ole i ka ikaika o kou mau pauma ke alo iloko o na kaomi ana a na ea he 100 a he 1,500 paona ke kaumaha maluna o kela a me keia iniha ili huinahalike. Heaha la ka mana e hiki ai ke alo iloko o ia kaumaha ?"
(Aole i pau.)
Ko Kona Akau mau kumuhana
iloko o keia Kau Ahaolelo, i
noii noelo noiau ia e ko laila
Lunamakaainana.
No kuu manao, o na halawai makaainana o Kona Akau, mai o ke kakauolelo Luna makaainana mai o ia apana nana i hoomakaukau mua na mea a pau, a pela no hoi i hooholoia'i kona mau iini, me ka lokahi ia mai o kona mau Koo — o J Waiaonau ma, Kaiakolii ma, a pela aku.
O makou kekahi e mahalo nei, i ke kakauolelo no na kumu a pau i hoolahaia mai nei, ma ke Kuokoa Helu 14 o Aperila, M H 1876 iho nei, nani ! nani !! Haleluia !!!
1 " E waihoia mai imua o ka Ahaolelo ke Kuikahi Panailike ma waena o keia aupuni me Amerika Huipuia." Maikai kela ! hulali o waena, koe na maha laau o Huehue. Hooholoia.
2 E hoomauia na Kanawai dute me ka hoololi ole a pela aku. Ke pono la no — naauao a wili pu me ka po. Hooholoia,
3 E hoopau loaia ke Kanawai e hoomana ana i ka Moi e aie i miliona dala, ae, pono no ua o John — e mana ana no ia. Hooholoia.
4 E hoole aku i ka hoopau lima hana, mai waho mai, o nele auanei na kupa ponoi o na Kona, ae, maikai kela. O na paahana maikai io no ko loko nei, nui loa na mahina ko, ehia la auanei o ua apana la o Kona e makemake ana i ka hana, e like no paha auanei me ko lakou L M ka nui o ka hana, lewalewa. Hooholoia.
5 E hoole aku i ka hookomo ana mai i ke dala pepa a pela aku. Ae, mahalo piha na kamalii ia manao, no ka mea, ua oi aku ka maikai o ke dala pohue & opihi & hakue mamua o ke dala pepa. Hooholoia.
6 E hoemiia ka uku o na Luna Aupuni mai ka Moi, na Kuhina, na Lunakanawai Kiekie, a me na Luna Aupuni e ae i kiekie ka uku, Makapaa iho la nae ua L M la o Kona Akau aohe kuhikuhi aku i ua mau halawai la a lakou, " e hoemi pu ia me ko'u uku i kanalima dala o ke Kau Ahaolelo hookahi." Ae no paha ! a e holo ana no paha a !! He akamai ka i ka hoemi ana. Hooholoia.
7 E hoohuihuiia kekahi mau oihana aupuni malalo o ka mea hookahi, ae, " O makou pu kekahi ilaila (na L M), ina no o ka Lunamakaainana o Kona Akau ka luna nana e hooko ia hana, ina ua pakele. Hooholoia.
8 E hoopauia kekahi mau hana a ke aupuni e malama nei, i ikeia ke poho o ke dala, ae no paha, ke ao mai nei keia kumu manao i kekahi poho nui i hana ia mamua iho nei ma ka Ekalesia o Kaumakapili i ka wa o ka la e lilelie ana i ka pono Keristiano ; poho maoli na ilihune o laila.
8 E ae hou ia ka laikini opiuma me ka hana kanawai ana, aole e haawiia ka opiuma i na kanaka Hawaii ma na ano a pau — pela no paha a ! Melu io ana no ia. ke lilo ae na L M i Ilamuku Nui no ka Pae Aina o Hawaii nei, ma na maha ka helei ! Hooholoia.
10 E kauia ka auhau hapalua keneta maluna o na uku o na luna aupuni, pakele aku ka L M o Kona Akau no ka nele, Hooholoia.
11 E hooleia ka uku ana i na lilo o ka holo ana o ka Moi a me kona mau ukali na Komisina no ka hana ana i kuikahi me Amerika Huipuia. Ae no paha ! pela no paha !! Ua piha loa o loko i ka manao ino a me ka hoino i ka Moi ; ma keia kumu manao e luliluli malie ae a nana malie aku i ka eleu o ka ike o ka L M o Kona Akau. Hooholoia.
12 E hoole i na uku hoomau hou ina e noi hou ia mai ana imua o ka Ahaolelo ; eia paha ka pono e lawe malu ae ea ! Hooholoia.
13 E maheleia e like me na Kanawai na aina Lei Alii a pau loa, no ka Moiwahine kane-make " Kukaeleike," a e hoopauia kona haawina hoomau. Pono no, lokomaikai wale, a hilu hoi ko Kona Akau L M i ka hapai memene ae i ke'lii a na Kona i makemake ai. E maheleia ana no ia he ike ka i ka hana Kanawai, aole e ole ana ia. Hooholoia.
14 E hoololiia na Pauku 4, 20, 45, o ke Kumukanawai, i loaa ka niu, i pala ka ohia. Uhu ! he mea ole ia ia Kona a hiki i Lehua. Hooholoia.
15 E hookaawaleia i $3,000 no na alanui o Kona Akau. He Luna alanui mai nei ka ua L M nei o Kona, e loaa ana no ia, ka, no hoi he makemake ua luna nei i ka hoi emi i na lilo, eia ka i ko hai e ko'u ai ka waha i ka hoemi, aole no hoi he olelo aku i mua o na makaainana ona o Kono Akau e haalele ana au i ko'u uku L M e like la hoi me Kukahaoa o Honolulu, e aho la hoi ia. Hooholoia.
16 O na lawehala a pau i hoopaiia ma ka hana, o na hihia hewa, e hoohanaia lakou ma na alanui o ko lakou apana iho, a na ka L M o Kona e malama ia lakou ma kela a me keia mokupuni me ka uku ole, nani kela, hulali o luna.
17 E hanaia i Kanawai e hookuu ia na makua mea keiki nui i na auhau pilikino mai ka eha keiki aku, maikai no. O ka pau ana iho nei ka hewa o kekahi mau keiki a makou i ka make, ka mea i hewa ai. Hooholoia.
18 E hoonoa loaia na kai o na Konohiki a me na ia hoomalu no ka lehulehu, ae ! pono no ia ! o ka aina ole wale no ka hewa o ua L M nei, a me kona mau kokoa e lewa wale nei no ma Kahaluu, malaila noa mua ke kai o ko lakou nei mau aina, ae no paha aole e ole. Hooholoia.
19 E hoemiia ka waiwai paa 1 25 — 160. Na ia nei e pani iho kekahi hapaha i koe, aole e hiki i na Luna Helu ke hooi wale aku i ka helu waiwai paa me ka ae ole o ka mea waiwai, maikai kela, o ka lewa ka hewa o ka waiwai paa o ua L M nei i na Molaki. Hooholoia.
20 E hookuuia na auhau pilikino o ka poe mai ma Kalawao. I ko ianei ike ana he auhau pilikino kekahi oia poe, hupo wale ! Hooholoia.
21 E hoopauia ke Kanawai o ka Papa Ola e lapaau wale na kanaka Hawaii. " E ia no la hoi ka pono i ua L M nei o makou o ka i mai o kuu kaikuaana wale no ke Kahunalapaau a puni ke aupuni, Ina ua hu ka lea." Hooholoia.
22 E hoopauia ke kula hoopololei ma Keoneula, Kapalama, Oahu. Ae, e hoihoi ka hale kula i ka lae o Keahole, owau ke kumu i ike na keiki i ka lawelawe ! ae, e pau ana ia.
23 E hoopauia ke kokua ana o ke aupuni i na kauka kaahele o na mokupuni. Ua pono ia, e noa o Hawaii no kua K—a. Hooholoia.
24 E aeia na koena aina aupuni e kuai a hoolimalima me kanaka Hawaii ponoi e noho ana i luna o ua mau aina la ; ae no paha ! aka, eia ka hewa o ke dala ole a makou, no ka mea, aole i papaia ke kuai a me ka hoolimalima ana mai me makou. Hooholoia.
25 E hoemiia ka auhau o na lio i $ 50 a e auhau mai ka elua makahiki aku. Nani no ! poina paha ka auhau o na iole labaki ia L M nei. Hooholoia.
26 E weheia ke awa o Kailua no na moku Kahiki, " i pololei mai no kuu mau moku a ku ana i Kailua nei," loihi loa wau holo ma Hononunu. Hooholoia,
27 E hooleia na moku popopo e holo ana ma na kai o Hawaii nei, no ka lawe ukana ana, a ohua paha. Ae, pono kela ! no ka mea, ua koi inoino loaia kela e ke kupakako o ka moku popo ahi, me na olelo hoohilahila no ke kaa ole o na dala elua wale no. Ua pono io ke hoopau ko lakou holo ana, he kai inoino. Hooholoia.
28 E hoopauia ko ke aupuni kokua ana i ka hale mai pupule. Ae, pono ia, pono no lakou ke puhi wale i na hale i ke ahi, Naauao no ! nani kela !! Hooholoia.
29 E hoopau ka auhau metala ilio, e kau maluna o ua a-i o iole, nuhou ia. Hooholo ia.
30 E hoemiia na koina o na oki mare, pela io hoi anei ka makemake o ka L M o ua Kona nei ? I mea nae paha e hiki ai ke oki oia i kana maikai mamuli aku nei ea ! oia anei ? O ka makemake anei e hoala mai i ka hoomahuahua ana i ka nui o na wahine a ke kane, a me na kane a ka wahine ? Keu no ka ike, mahalo piha, nani ka naauao. Hooholoia.
31 E hoopauia ke kanawai e hoemi ana i na mai i loaa ma ka hookamakama. " Ua pono ia, pela no ke kaokao, a ma ka pala e ulu ai." Naauao makou o Kona Akau nei.
32 E hanaia i kanawai e auhau ana, i $25 no na auhau pilikino o na lahui e komo mai ana ma keia aupuni i kuikahi ole ko lakou aupuni me Hawaii nei. Auwe ! hehe !! e like paha me na pukiki la, he keu wale anei no paha makou o Kona Akau nei ke akamai i ka hana kanawai pilikino ka ilikiia ae la ka ia o ke Pukiki a me ke Paniolo, a hakake ka auhau pilikino Naauao maoli no makou. Hooholoia.
33 E hanaia i kanawai aole e lawe na Loio i ka uku ke ko ole ka aoao a lakou i kokua ai. Pela iho la no hoi ka waawaa iki naaupo ma hanaua. Pehea la ka auanei e loaa ai ko ianei Loio o Kaumakapili ? Hooholoia.
O keia iho la ka makou mau kumuhana i waihoia mai e ko makou L M no ka ahaolelo e hiki mai ana la. A pehea hoi ka oukou e na apana e ae, hoopukaia ae hoi ka oukou. He mahalo piha makou i keia la ! Olelo mai he ko wale no. Aohe wahi mea e nele ana. Pela paha, ae no paha, aole e ole, he nui ka na makamaka o ka hale ahaolelo. Aloha no oe e L M o makou, o kakou no KALAIOKONA.
Aperila.12, 1876.
Ma ke koho balota luna aupuni ana o ka mokuaina o Nu Hamesire, ua puka ino ka aoao Ripubalika, a me ke koho balota ana hoi o Konetikuta, ua puka ino ka aoao Democarata.