Ka Nupepa Kuokoa, Volume XV, Number 17, 22 April 1876 — Page 4
KA NUPEPA KUOKOA, ME KE AU OKOA I HUIIA.
How Lovely are the Woods !
Cheerful Voices p. 98.
1 Maikai na waolaau !
Na waolaau omao !
Paapu i na manu melemele,
Na manu ku ku a lelele
A puni na waolaau,
Na waolaau omao.
Tra la la la la la la la la la la la, Tra la.
2 Maikai na waolaau !
Na waolaau omao !
Hio na laau i ka ino,
A luli na lau a olino,
Na lau o na waolaau,
Na waolaau omao.
Tra la la la la, &c.
3 E pii i na waolaau,
Na waolaau omao ;
E pii a mama i na piku,
E pii a paani e aku
Na pua o na waolaau,
Na waolaau omao,
Tra la la la la la, &c.
4 E pii i na waolaau,
Na waolaau omao ;
Huro a hooho, hooho,
A kani na leo a olo
A puni na waolaau omao.
Tra la la la la la la, &c.
Hawaii
HAAWINA KULA SABATI.
HELU 6. SABATI, MEI, 7.
KUMUHANA — Ka mana o ko Iesu Inoa.
PAUKU BAIBALA — Oihana 3 : 12 — 26
12 A ike mai la o Petero, olelo mai la ia i ua poe kanaka la, E na kanaka o ka Iseraela, no ke aha la i kahaha mai ai ko oukou naau i keia mea ? No ke aha la oukou e haka pono mai ai ia maua me he mea la na maua no, i ko maua mana, a me ko maua hemolele iho, i hana aku ai ia ia e hele ?
13 O ke Akua o Aberahama, a o Isaaka, a o Iakoba, o ke Akua o ko kakou poe kupuna, ua hoonani mai la ia i kana Keiki ia Iesu, i ka mea a oukou i kumakaia aku ai, a hoole aku ia ia imua i ke alo o Pilato, i ka wa i manao iho ai oia e hookuu ia ia.
14 Ua hoole aku oukou i ka Meu Hoano a me ka Pono, a ua nonoi aku oukou e hookuuia ka mea pepehi kanaka na oukou ;
15 Ua pepehi hoi oukou i ke Alii e ola'i, ua hoala mai ke Akua ia ia mai ka make mai ; he poe ike maka no hoi makou ia mea.
16 Aka, o kona inoa iho, i ka manaoio ana i kona inoa, oia ka mea i hoola ai i ke kanaka a oukou e nana aku, a e ike nei : o ka manaoio ana ia ia, oia ka mea i haawi mai ai i ke ola io no ia nei imua i ke alo o oukou nei a pau.
17 Ano hoi, e na hoahanau, ua ike no au, no ka naaupo i hana aku ai oukou i keia, a pela no ko oukou poe alii.
18 Aka, o na mea a ke Akua i hoike mua mai ai, ma ka waha o kona poe kaula a pau, e make ana ka Mesia, ua hooko mai ia pela.
19 No ia mea e mihi oukou, a e huli mai, i pau ko oukou hewa i ka holoiia, i ka hiki ana mai o na manawa hoomaha, mai ke alo mai o ka Haku :
20 A hoouna mai hoi oia ia Iesu Kristo, i ka mea i hai mua ia mai ia oukou.
21 He pono ke hookipa aku ka lani ia ia, a hiki aku i ka wa e hooponoponoia mai ai na mea a pau i oleloia mai e ke Akua, ma ka waha o na kaula hemolele ona, mai kinohi mai.
22 Ua hai mai o Mose, i ka poe kupuna, E hoopuka mai ana ka Haku, ko oukou Akua i Kaula e like me au mailoko mai o ko oukou poe hoahanau ; a e hoolohe oukou ia ia ma na mea a pau ana e olelo mai ai ia oukou.
23 A o ka mea hoolohe ole i ua Kaula la, e okiia ia, mai kona poe kanaka aku,
24 A o na kaula a pau, mai ka wa mai o Samuela a me ka poe mahope ona, o na mua olelo, ua hoike mai no lakou i keia mau la.
25 O oukou no na keiki a ka poe kaula, a me ka berita a ke Akua i hana mai ai i ko kakou poe kupuna, me ka olelo ana mai ia Aberahama, E hoopomaikaiia'na ko na aina a pau i kou hua.
26 Ua hoala mai ke Akua i kana Keiki ia Iesu, a ua hoouna mai ia ia io oukou nei mua, e hoopomaikai ia oukou i ka hoohuli ana ia oukou a pau, mai ko oukou hewa mai.
Pauku hoopaa p. 26.
Mele — Him. 115 8 — 6. Leo.
1 Hookani i ke Lii maikai,
E mee na anela ;
E lawe mai i lei alii
No Iesu ke Lii mau.
5 Na kanaka mai o a o,
Na aina hoi a pau,
E hoalii mau ia ia no,
E hapai i ke Lii mau.
Pule no na aina naaupo, i hiki aku ka Iesu olelo ilaila, i lohe kanaka i ka inoa mana o Iesu, a huli mai a ola.
NA NINAU A NA KUMU.
P 12. Heaha ka hana kupanaha i hana ia i ka mea oopa ? A i ka akoakoa ana o kanaka a ike ia hana a kahaha loa, a haka pono na maka ia Petero ma heaha ka Petero i ninau aku ai ? E kuhi ana paha lakou nawai i hana, hoola i ka mea oopa ? Kuhihewa ea.
P 13. Pehea ko Petero wehewehe ana i pau ko lakou kuhihewa ? Ke Akua owai ? Ua aha oia i kana keiki ? Ua'ha lakou i ke keiki a ke Akua ? Lakou a pau anei ka i kumakaia ia Iesu ? Na Iuda Isekariota ka i kumakaia, pehea i pili ai ia hewa ia lakou a pau ? Ma ko lakou kokua, ko lakou hoapono ana. Owai ka i nonoi e hookuu ia Iesu ? Mat. 27 : 20. Io. 18 : 40. 19 : 15.
P 14 Ae anei lakou i ko Pilato nonoi ana ? Ua noi lakou ia Pilato e hookuu ia wai ? a e aha ia Iesu ?
P 15 Ua'ha lakou ia Iesu ke Lii e ola'i, ka mea Pono ? Na lakou ponoi anei i pepehi ia Iesu ? Na lakou paha i hooho e kau ia ia ma ke kea. Owai na ike maka no ko Iesu make ana ?
P 16. Na ke aha i hoola i ka mea oopa ? Na ka mana o ko Iesu inoa na ka manaoio ia mana. Nowai keia manaoio ? No ke kanaka oopa anei ? no Petero ma paha ? Aole i manaoio ka mea oopa mamua, kona manao mua e loaa ana kekahi makana, he apana dala, he apana gula paha. A mahope koke iho, ia ia i lohe ai i ke kauoha ; ma ka inoa o Iesu Kristo no Nazareta, e ku oe a e hele, manaoio no oia, a ala, a ae e kokua Petero ia ia, a ku a hele no. No Petero ka manaoio mua, a no na kanaka oupu nei ka manaoio hope.
P 17 — 18. Heaha ke kumu o ko lakou pepehi ana ia Iesu ? Ka naaupo, nowai ia naaupo ? no lakou a pau anei ? aole paha, ua hana kekahi poe me ka naauao, me ka ike pono no, o Iesu no ia, ke Lii, ka Mesia. Heaha ka Iesu pule ? Luk. 23 : 31. Pili anei ia pule i na kahuna nui ? Heaha kekahi kumu no ko Iesu make ana ? I hookoia ke aha ? Hal. 22. Isa. 53 : 5. Dan. 9 : 26.
P 19 — 21. Heaha ke kauoha ? E mihi, e huli, i aha ? Na manawa hoomaha — heaha ia ? Pili ia i keia ao kekahi, a i kela ao ka nui. Ka poe i hele aku io Iesu la me ko lakou luhi a kaumaha, nana lakou e hoomaha. Pili ia i na wa i hiki mai ai ka Uhane Hemolele, e hoohuli nui i na kanaka, e hoopau i na hewa, i na kaumaha a e hoohauoli mai. Pili ia i ka wa make, a komo iloko o ka lani, ilaila ka wa maha mau loa. Owai ka i hoounaia mai ? Na ke aha e hookipa ia Iesu ? a hiki i ka wa hea ? Ka wa hope paha ia. Elua nae wa hooponopono. I ka wa e lanakila'i ka pono, ke aupuni o Iesu ma keia ao. 2 Ka wa e pau ai ka honua — ka wa hookolokolo nui — ka wa lanakila loa ma ka lani.
P 22 — 26. Heaha ka wanana ? Kan. 18 : 15, 18, 19. Owai ia kaula ? Pehea ka poe hoolohe ? Pehea hoi ka poe hoolohe ole ? Uu aha na kaula mai ia Samuela mai ? Owai na keiki a na kaula a me ka berita ? Owai ka hua ma o na la e hoopomaikai ia'i ko na aina a pau ?
P 26. Hai paanaau mai i keia pauku.
Mele. Robina Gula mele 59.
1 Kuu kalahala Iesu,
E pau kuu hewa nei ;
Kuu maamaama Iesu,
E hee kuu pouli e —
Kuu punawai no Iesu,
Ilaila e auau ai
Kuu uhane paumaele,
I pau ae a maemae.
Me ka pauku elima.
NA NINAU A KE KAHU.
Ke kula a pau. Mahea ka pili ana o keia Haawina i ko na aina e ! Iesu ka hua e aha ia'i ? Owai ka inoa mana loa ? Ma keaha e mana ai kona inoa ! Hai mai. Rom. 10 : 13 — 17. E lilo kekahi mau minute ma ka hoike ana i na nuhou maikai no na aina e mai, no Maikonisia, Fatuhiwa, Iapana &c.
Mele — Him. 493. 8 — 6. Leo.
1 Hauoli e na aina e,
Iesu ke Lii maikai,
He ahi kona kanawai,
Hehee na mauna nei.
4 Hai mai na kaula no Iesu,
E lilo nona mau
Na aina e mai o a o,
Me keia ao a pau.
Pule i huli nui mai ko na aina, &c.
HAAWINA KULA SABATI NO MEI 14. Oihana 4 : 8 — 22. HAWAII.
Moolelo o ka Ahahui Euanelio o Hawaii Hikina.
Halawai ka Ahahui Euanelio o Hawaii Hikina ma ka Luakini o Puula, Puna, Hawaii ; ma ka Poakolu. Maraki 15, 1876. Hora 1 P. M. Eia na lala i hiki mai :
EKALESIA, KAHU, ELELE.
Hakalau, Rev. S. Kukahekahe, J. Lanikele.
Onomea, " J. H. Pahio, J. Kalepa.
Haili, " T. Coan, J. L Kekuahau.
Puula ; " (ST) J. M. Kamoku, M K Kealawaa.
Kalapana Huiia, — S W Kaikuahine.
Kapaliiuka, — —
Lala mau — Rev. P. Barenaba
Keiki a ka Aha — E. Kanoe, B. Manoa.
Koho ka Hale ia Rev. J. W. Kanoa i Lunahoomalu, a ia Eperaima Kanoe i Kakauolelo. Hoomakaia na haua me ka pule.
Ma ke noi a S. W. Kaikuahine, ua apo ka Hale ia Rev. A. O. Forbes, Rev. J W Kanoa, S. P. Kaaia, D. Kapahee, G. K. Maka, E. H. Umiamaka, J. W. Kumahoa, G. W. K. Ai, S. W. Kamakahiki, J W. Kipi, J. Paakaula, J. Keahi, K. Paulo, A. D. Alapai, Piimaiana, J. B.Huaai, i mea Hoakaka.
Koho ka Lunahoomalu ia Rev. T. Coan Rev. J. H. Pahio, J. N. Kamoku, i Komite Imi Hana. Haipule ka hale i ka wa i kaawale aku ai ke Komite Imi Hana. Makaukau ke komite, a waiho mai la ke-i ia mau kumuhana :
I. Halualua hora haipule i na la hana a pau.
II. Hoike kihapai.
Hapaiia. Heluhelu mai o Mr Kukahekahe i kona hoike no Laupahoehoe me Hakalau, " Ua ala iki mai na hana, a ua hanai pono ia ke Kahu."
Heluhelu mai o Mr. Pahio i ka hoike o Onomea, "ua emi na kokua, a palaka na hoahanau he 5 mau pope me moremona i hoi mai, he 53 mau nupepa Kuokoa me Lahui Hawaii.
Hoopaneeia ka hoike " Ekalesia Makua," apopo.
Heluhelu mai o Mr. Kamoku i ka hoike no Puula. " Ua mau ka makaala o ka Ekalesia — ua kokoke e paa ka Halehalawai o Olaa — Ua mau na Kula Sabati — ua hanai pono ia ke Kahu — He mau nupepa, he 29 Kuokoa, 5 Lahui Hawaii.
Hoopaneeia ko " Kalapana Huiia" hoike apopo.
III. Komite Imi Hana.
Koho ka Lunahoomalu ia T. Coan, Pahio, Kukahekahe, i Komite.
Ma ke noi a Mr. Coan, ua hoopanee ia na hana a hui hou i ka hora 9 A. M., apopo — Hookauia me ka haipule ana i hapaha hora.
La hana 2, Poaha, Mar. 16.
Halawai ka Aha i ka hora 9 A. M. O ka Lunahoomalu ma ka noho — Haipule — Kaheaia na inoa — Heluheluia ka moolelo o ka halawai i halawai i hala a aponoia.
Hapaiia ke Kumuhana elua, " Ka hoike kihapai."
Heluhelu mai o Mr. Coan i kona hoike no ka Ekalesia Makua. " Ua mau na hana a me ke Kula Sabati ; a ma ka la mua o Ianuari i hoikeia'i. He mau nupepa, he 60 Kuokoa, a he 40 Lahui Hawaii. A ua hoike pu mai i ko laua kaahele ana me kana wahine, a me Mr. Pahio ma na ekalesia o Hilo Pali-ku.
Heluhelu mai o S. W. Kaikuahine i ka hoike no Kalapana Huiia. " Ua mau na hana, mai ka wa e ola ana ke kahu a make walo no, oia hoi na Kula Sabati a me na hoomaikai e ae e holomua iloko o ka Ekalesia. Ua hoike huiia na Kula Sabati ma ka la hope o Dekemaba, a me ka la mua o Ianuari ; a ua nui ka hua,— he mau nupepa, he 20 Kuokoa a he 4 Lahui Hawaii.
Ma ke noi a Mr. Kamoku, ua hoike waha mai la o Mr. Polepe i ke kulana o ka ekalesia haole o Hilo. " Ua malama maikai ia ka mahinahou i kela a me keia mahina ; mai ka $15 a ka $17 o ka lulu hookahi ana. He 2 ano o ke kokua ana ; 1 Kokua mahinahou. 2 Kokua i na hemahema o ka luakini. Ua mau na Kula Sabati, a he hapa nae na haumana, i ka laha ana ae o ka mai fiva."
IV. Na palapala hoopii.
1. Waiho mai o Mr. Coan he elua mau palapala hoopii na Rev. J. Hanaloa, mai Kaanapali mai. 1 He palapala noi e hookuu iaia mai ka noho hoa lala ana no keia aha. 2 He palapala noi no i keia aha e hooponopono i ke koena aie o ka ekalesia o Laupahoehoe iaia, oia he $21 ; a ma ka noonoo ana o ka aha, ua hooleia ke noi e hookuu iaia, a ua kauohaia ke kakauolelo e kau leta aku iaia no ke kumu i hooleia. A no ka lua o ke noi, ua hooholoia, na Mr. Pahio ke komite e hui pu aku me ka ekalesia o Laupahoehoe, a e kuka pono no kela aie.
Waihoia mai he palapala kahea na ka ekalesia o Puula, e noi ana e hookahuna a e hookauwa o J. N. Kamoku no lakou. A ma ka noonoo akahele ana o ka aha, ua hooleia ke noi, no ka lawa ole o na inoa a me ka hemahema o ka palapala ; a ua hoopaneeia apopo, hapai hou.
V. Heluhelu Haawina.
Heluhelu mai o Mr. Kukahekahe i kona haawina ma Mat. 4 ; 10.
Heluhelu mai o Mr Pahio i kona haawina ma 1 Tim. 6 ; 10 — 12.
Heluhelu mai o Mr. Barenaba i kona ma Hoik. 20 ; 11 — 15.
Hoopaneeia ke Kumuhana VI.
VII. No ke Kula Kaikamahine.
Waiho mai o Mr. Coana he palapala hoike na Rev. E. Bond, ka Agena o ke kula, e hai mai ana i ke kulana o ke kula, na kumu, na haumana, ua ikea ke holomua nei. A ua hoike pu mai no hoi i ka Bila Dala, na lilo a me na loaa, a e koe nei i ka waihona iloko o ka makahiki i hala ae nei. &c. A ua kauoha pu mai i keia aha e paipai i ko Puna poe, e hoouna i ko lakou mau kaikamahine i kela kula, a na ka makua e uku na lilo a pau. A i ole pela, e hoounaia na kaikamahine kupono malalo o ka hanai ana a ka ekalesia, a ua hooholo ia pela.
Ma ke noi a Mr. Kuahau, ua hoopaneeia na hana a hui hou i ka la apopo, hora 9 A. M. Haipule iho la ka hale i hapa hora, a hookuuia ka hana.
La hana 3, Poalima, Mar. 17.
Halawai ka aha ma ka hora mau, o ka lunahoomalu mau ma ka noho. Hoomaka ia na hana me ka pule. Kaheaia na inoa. Heluheluia ka moolelo o ka halawai i hala. Aponoia.
Waiho mai o Mr. Coan he palapala hoalohaloha na keia aha ia Rev. Samuel Kamelamela, kekahi o na hoa lala, penei :
Hooholoia.— Ma ka lawe ana 'ku o Iehova i ka hoa'loha maikai, (Rev. Samuel Kamelamela) ke hoomaopopo nei keia aha i kana hana hemolele maikai, me kona ao ana i kela a me keia lala e noho makaukau, a e hana hoi i na hana a ka Haku i haawi mai ai ia kakou me ka ikaika a me ka oiaio, oiai, e kau ana ka la, aole kakou i ike pono i ko kakou manawa. No kela olelo hoolana, e i ana penei : " He mea manao nui ia ka make ana o kona poe haipule" Nolaila, aole i poho ko makou manaolana.
Hooholoia, " Ke uwe aku nei makou no ka Ekalesia Huiia o Puna Komohana, no ko lakou nele ana i ke kahu, a no ko lakou uwe aloha nui loa i ke kumu ikaika, A no kela olelo hoolana, e hoooauia no ko lakou kaamahu, penei : " Aole loa wau e haalele ia oukou a nele."
Hooholoia. A ke uwe pu aku nei no hoi makou no ka wahine make, na keiki makua ole, a me na pilikoko o ka mea i make i kona wa ui me ka ikaika. A no kela olelo hoolana e hoopauia paha ko makou pili-hoa penei : " E hele e ana wau e hoomakaukau i wahi no oukou, a hoi hou mai no wau."
Hapai hou ia ke kumuhana 5. " Heluhelu Haawina."
Heluhelu mai o Mr. Coan i kona Haawina, penei : " No ke ano o ka hana, a me ka uku o ke kahunapule ponoi. Hooholoia e hoouna i na nupepa, ke Kuokoa me ka Lahui Hawaii.
Heluhelu mai o Mr. Kamoku i kona haawina ma Hoikeana 2 : 11.
Heluhelu mai o Mr. Kanoe i kona haawina ma Iakobo 4 : 11.
VIII. Na Nupepa.
Na Mr. Coan i hoakaka mai, a kamailio ka Hale.
IX. No ke Kula Kahana.
Na Mr. Coan i hoakaka mai, a i paipai nui mai e huli keia Aha i mau keiki nana, a houna aku i ke Kula Kahuna.
Hapai hou ia ke Kumuhana 4. " Na Palapala Hoopii."
Heluhelu hou ia mai ka " Palapala Kahea" a ka Ekalesia o Puula ia J. N. Kamoku ; a no ka hemahema no, ua noi ia kekahi mau hoahanau o ka Ekalesia i akoakoa mai : e ae mai e hui pu aku ka " Aha E. o H. H., ma ka hooponopono pu ana i kela palapala e like me na alakai o ka Buke Lawe Lima." A ua hooholoia, na ke Kakauolelo e kakau pololei i kela palapala.
Koho ka Lunahoomalu ia Mr. Coan, Pahio, Kukahekahe ; i Komite hooponopono i na hana o ka la Sabati, e pili ana i ka hookahuna ana ia J. N. Kamoku, a me ka Ahaaina a ka Haku.
X Na Kula Sabati.
Ua kamailio nui ka hale, a na Mr. Coan i paipai nui mai i na Kahu, na Elele, na Kahukula Sabati, na kumukula, a me na makua e lawe a hana a hooko aku.
Mahope o keia, ua heluhelu mai ke Kakauolelo i ke Kope o ka Palapala Kahea ia J. N. Kamoku. Aponoia.
XI. Na Misiona.
Na Mr. Kanoa, a me Mr. Kaaia i hoike piha mai i na Misiona elua o Gilibati a me Makala — Ua holo na hana a ka Haku — Ua mau no ka ikaika o na paahana — He 200 a oi aku na haumana ma ke Kula Sabati hookahi — A ua hoala ia ae he elua mau luakini ma ia Paeaina.
XII. No ka Mahina hou.
Na Mr. Kaaia i hoike lea mai i ka manao o ke Kauleta o ka Papa Hawaii, penei : He pono i na Ekalesia mai o a o e ala like mai a lulu dala no ka mahina hou. A na Mr. Coan a me Mr. Forbes i paipai nui mai.
XIII. Ka Hoomaemae Ekalesia. Ua kamailio nui ka hale, a na Mr. Coan. i hoakaka nui mai.
XIV. Hoolaha Baibala.
Ua kamailio nui ka hale, a na Mr. Coan i wehe nui mai.
Ma ke noi a Mr. Coan, ua hoopaneeia na hana a hui hou i ka la apopo, Hora 9 A. M. Haipule iho la ka hale i hapa hora a hoopaneeia.
La hana 4, Poaono, Mar. 18.
Halawai hou ka aha ma ka hora mau. O ka lunahoomalu mau ma ka noho. Hoomakaia na hana me ka pule. Kaheaia na inoa. Heluheluia ka moolelo o ka halawai i hala. Aponoia.
XV. Ka hana nui a ka Ekalesia.
Ua lawe ka hale a hana, a o ka hooko wale no koe.
XVI. Ka hele ana o na Kahu i ka Aha Kaapuni.
Ua nui ke kamailio ana o ka hale ma keia kumuhana, a ua hooholoia. Aole he pono i na kahu a pau malalo o keia aha ke holo lunamakaainana no ka Ahaolelo o ke aupuni.
XVII. Ka pule mua o Ianuari.
Hooholoia.— E mau no ka malama ana i ka haipule no na la 8 iloko o ka pule mua o Ianuari, 1877.
XVIII. Ka manawa a me kahi e hui hou ai ka aha.
Hooholoia — E hui hou keia aha ma ka luakini o Haili, Hilo, ma ka Poakolu ekolu o Sepatemaba. 20, 1876, hora 1 P. M.
XIX. Na Elele o na Aha.
Kohoia o J. L. Kekuahau i elele no Hilo, a o J. Lanikele kona hope ; no Puna hoi, o John Keahi, a o J. Paakaula kona hope.
Manao Kuikawa.— Waiho mai o Mr. Kukahekahe i kona noi. No ka hale o ke kahu a me ke ola kahu.
Kohoia o Mr Pahio i komite e hui aku me lakou, (ekalesia o Hakalau) a e hooponopono no ke ola o ke kahu a me kona ola.
Ma ke noi a Mr. Coana, e hoopaneeia ka hana a hui hou i ka la apopo, Sabati. hora 1 P. M. Haipule ka hale i hapa hora, a hookuuia. La hana 5, Sabati, Mar. 19.
Halawai ka aha ma ka hora 1 P. M. O ka Lunahoomalu mau ma ka noho. Hoomaka ia na hana me ka pule. Kaheaia na inoa. Heluheluia ka moolelo o ka halawai i hala. Aponoia.
Waiho mai la ke komite hoomakaukau i keia mau kumuhana :
No ka Hookahuna, a Hookahu ana ia J. N. Kamoku.
(a) Pule, Baibala, Himeni, ia Rev. J. W. Kanoa.
(e) Pule Hookahuna, ia Rev. P. Barenaba.
(i) Olelo ao i ke Kahu, ia Rev. T. Coan.
(o) Olelo ao i ka ekalesia, ia Rev. J. H. Pahio.
(u) Lima akau aloha o ka ekalesia, ia Rev. S. Kukahekahe.
(h) Himeni, (S. T.) ia S. P. Kaaia.
(k) Pule hookuu, ia Rev. J. N. Kumoku.
2 Ahaaina a ka Haku.
(l) Berena, ia Rev. P. Barenaba.
(m) Kiaha, ia J. N. Kamoku.
(n) Himeni, ia J. H. Pahio.
(p) Pule hookuu, ia Rev. T. Coan. O ka pau no ia.
Hooholoia.— Ke waiho aku nei na hoa malihini a pau i ko lakou mahalo a aloha piha i na kamaaina, no ko lakou kokua a hooluolu ana mai i na mea e pono ai ke kino, e laa ka ai, ka ia a me kahi e noho ai A ke noi pu ae nei makou i na Lani e hoomauia mai ka oukou mau hana aloha a hiki i ka hopena. Ma ka lokomaikai mai o ka Haku Iesu Kristo e ola'i kakou. Amene. Hookuu loa ia na hana a hui hou ma Haili. Hilo, Poakolu, Sept. 20, 1876, hora 1 P. M. Me ka welina.
EPHRAIM KANOE. Kakauolelo.
KA HUNT'S LAAU OLA
(HUNT'S REMEDY)
HE LAAU LAPAAU HOU, MAI AMERIKA MAI ! He Laau Maikai keia no Na mai pehu o ka opu, Na mai o ka puupaa a me ka opu mimi, Mimi-paa, Mimi-eha, Mimi-helelei, Ka lepo gravel iloko o ka opu-mimi, Ka mana ole, kapalili, hui ono ole ka ai. Na Mai Wahine, NAWALIWALI O KE KINO, LEPO ULA ILOKO O KA WAI MIMI, MANOANOA PAHA KA WAI E like me keokeo o ka huamoa, Like paha me na kaula silika keokeo, eleele, lenalena paha ; a i ole ua like paha me ka lepo i anaiia i na iwi keokeo, a i ka mimi ana, ua wela oioi ka mai, me ka eha nui o ke kikala a me ka puhaka.
HE NUI NA HOIKE e ola nei, ka poe i loohia i keia mau mai i haiia maluna ae, ua pau lakou i ke ola maikai, no ka inu ana i ka HUNT LAAU OLA. ("HUNT REMEDY)!"
UA HAAWI mua ia keia laau, e kekahi kahuna lapaau naauao, i ke kanaka mai pehu o ka opu, e noho ana me ka ohana a Mr. Hunt ; John Hunt kona inoa, he 45 kona mau makahiki, he kanaka nui poepoe, ua loohia i ka mai pehu. Ua haawiia kela me keia laau no keia mai, aole nae oluolu ; ua mahuahua mau kona pilikia, ua pau loa ke kino a me na wawae i ka pehu ; ua kokoke paa loa ka mimi ; kokoke pau loa ka hanu ana ; a ua mahuahua loa ka wai iloko o ke kino. Aole hiki iaia ke moe ilalo ma ka moe, nolaila, ua noho wale no iluna i ka po a me ke ao. Pela mau kona popilikia a hiki i kona hoao ana i keia laau, a ke kahuna i kuhikuhi mai ai. A i kona inu ana i keia laau, ua hoomaka koke ka oluolu. Ua paipai koke ia ka puupaa i ka laua oihana ; ua puka hou ka wai mimi a nui wale ; ua emi koke mai la ka pehu o na waewae ; a ua oluolu hou ke ake-mama i ka hanu ana ; ua oluolu a maikai ka io o na lala, a e hoi nui mai ana ke ola maikai, alaila, me ke kuhihewa, ua waiho oia i ka laau i kekahi mau la. Ua pono ole nae ka waiho ana ia manawa, no ka mea, aole i ola io maoli kona mai pehu. Ua molowa hou na puupaa i ka laua oihana, a ua mahuahua hou ka wai iloko o ka opu, a ua popilikia hou e like me mamua. Alaila, ua inu hou oia i ua laau la, a ma ka hoomanawanui ana, ua lanakila hou auanei maluna o ka mai, a ua ola io maoli, a ua hoomaka hou oia i kana oihana mawaho o ka hale.
Oia ka lapaau mua ana me keia laau ; a mai ia wa mai, (he 25 makahiki) ua hahanaia keia laau e like me ka hana ana o Mr. Hunt, a ua haawi na kahuna lapaau i keia laau i ka poe mai pehu a me na mai like.
Mai ia manawa mai, ua ikeia, e mahaloia hoi keia laau, mai o a o, e na kanaka, a ua inu ia hoi ma ke ao ana a me ke ao ole ana mai o na kahuna lapaau ; oia ka mea i hoola mai i na kanaka he nui, ka poe pilikia i ka mai pehu, a kokoke i ka make.
Na kuhikuhi no ka inu ana :
E INU I KE PUNA TI PIHA, a hala na hora 4, alaila, e inu hou. E mahuahua liilii nae a hiki i elua puna ti piha — a hiki hoi auanei i puna nui piha.
NO KE KEIKI hookahi makahiki a hiki i na makahiki eono, e haawi 5 kulu, a hiki i na kulu 20 ; eha hora nae mawaena o ka haawi ana.
KUMUKUAI, he - - $1.50 no ka omole.
DILLINGHAM & CO.,
735 3m 748 Na Agena no ka Pae Aina Hawaii.
J. PORTER GREEN,
" KEIKI O KAUAUKIUKIU."
LOIO !
E HELE MAI NA MAKAMAKA A PAU IO'U nei, a na'u no e kokua ia oukou imua o ka Aha Hoomalu a me ka Aha Kiekie, me ka uku haahaa makepono loa. Aia kuu Keena ma kahi o ka Lunakanawai Hoomalu o Honolulu nei, oia ka " Aiko," ma Alanui Kalepa. 741 ly 792
C. H. DICKEY (Kalekika).
LOIO !
MA HAIKU, MAUI.
UA MAKAUKAU E HANA PALAPALA Kuai, Palapala Moraki a me na mea a pau e pili ana ma ka Oihana Loio. 743 1y 794
WING SING & Co.
Puhi Palaoa,
E waiho mau ana palaoa a me na berena palupalu. Kihi o na huina alanui NUUANU A ME BERITANIA. 703 1y 755
KE HOIKEIA aku nei i na kanaka a pau, aole lakou e komohewa ma ka Aina o ke Kula, ma Wahiawa, Waialua, Oahu, ma ke kua ana i na laau, a pepehi hoi i na Bipi hihiu, a alualu i na holoholona ma ua aina la ; aole hoi lakou e hookuu wale i na bipi a me na holoholona e ae maluna o ua aina la. W C JONES, Honolulu, Novem. 29, 1875 731 ts
NO KA MEA, ua koho mai ka Aha Kiekie ia'u i Kahu Malama Waiwai no HOOMOEAPULE w, i pupule, nolaila, ke papa nei au i na mea a pau loa, aole e hoolimalima aina me ia a me kana keiki me Hanaumaikai k. Aole pono e hookaa aku ia laua ka uku hoolimalima, aka, e lawe koke mai ia'u.
J. PORTER GREEN,
Luna Malama Waiwai no Mele Hoomoeapule.
Honolulu, Dek 22, 1875. 734 6m
NA MEA NANI E HIEHIE AI
NAUWE MAI * NAUWE MAI
MAHEA LA E LOAA AI NA PAPALE WAHINE AUlii kolomanu ano hou loa, a me na pua nani e kinikohu ai e kau ai ka iwa, he la makani e hao ai na polena o Haupu, kapakahi manuia o Keokoi ka moku, ma kahi o L. ASEU, Aia pu no malaila na HAINAKA SILIKA liilii LEI AI kae weluwelu, a me na LIPINE SILIKA puapua weluwelu, e kuwelu ai i ka makani. NA KALAKOA ANO HOU LOA i like oleia mamua, Na KAEI SILIKA Nani, NA MAKALENA KALAKOA me ka PUAKEA, na ALAPIA HULUHULU o na ano a pau, na KIHEI UHI hou a kohu ai ka lino ana, na mea ala waianuhea, e ku ai ka hoomau, a me na aila lukini e puia ai ka lauoho i ke ala. Na lilina ume naau o kela ano keia ano, na kamaa wahine o na ano a pau. Na lole kane o kela a me keia ano, na palule kalakoa a me ke keokeo, i humuia me ka mikioi loa. He makepono loa no hoi ke kuai i na mea i hoikeia ae nei maluna ke kuike. I mea e pau ai ke kuhihewa, e naue mai no e na makamaka ma kuu Hale kuai HIKIKIIKAUOENA. L. ASEU.
Kihi ma Ewa o Alanui Nuuanu mauka o Alanui Moi.
Honolulu, Aug. 27, 1875, 717 lyr 768
E. STREHZ, (AILUENE,)
HAAWI A KUAI
LAAU LAPAAU.
AIA.MA MONIKAHAAE, KIHI O NA HUINA o na Alanui Papu a me Hotele. Aia malaila na Wa Ala a me na Wai Rukini maikai loa e loaa ai.
E hamama mau ana i na ahiahi Poaono a pau.
741 1y 792
E naue mai ! E naue mai !!
KE POLOAI IA AKU NEI OUKOU E NA keiki lalawai o na pali hauliuli, a me na kaikamahine puukani nohenohea o na pali Koolau, e naue mai ma ko makou mau Hale Kuai ma KAALAEA a me KANEOHE, malaila e loaa'i oukou na nuhou o na ano a pau. Na Lole Kane, Wahine a me na kamalii, Na Kamaa Na Hou. Na ano Papale a me na mea liilii o kela ano keia ano he nui wale. E loaa no ia oukou ke kumukuai makepono loa. E naue mai ! E naue mai !! E hoao i pau ko oukou kuhihewa. AKANA & KONGER & Co.
Koolaupoko. Maraki 23, 1876. 747 6m* 771
ANOAI I KA LEHULEHU,
E kipa mai a e nana i kumaka ka ike i na waiwai nani i loaa mai nei iloko o na La Kulaia iho nei.
Penei ke ano o ua mau waiwai la : Na wati a me na kaula gula, a na Ledee a me na Keonimana ! NA KAULA OPELE A NA LEDE NA KOMO GULA NANI O KELA A ME KEIA ano o na Lede a me na Keonimana ! NA KUPEE GULA, NA LIPINE GULA, Na gula pepeiao o na wahine ! e oaka ai i na pepeiao, a e hulali ai hoi na manamana lima, a e kilipohe ai hoi na ai. Na komo humuhumu gula a me ke kala Na pihi pulima gula wahine a kane, Na laketa gula lei wahine nani, Na komo daimana o na Lede. Na kaula laketa, Na pine omau kihei, Na laketa aniani, Na huka gula wahine. NA LAKO HALE. NA PUNA, NA PAHI, NA KIAHA, KALA, NA APO KALA, NA KAWELE holoi lima, NA O DALA o kela a me keia ano, a me na mea nani e ae no he nui wale.
E kuaiia aku ana no ma ke kumukuai haahaa loa i ko na wahi e ae o ke taona nei.
UA MAKAUKAU NO HOI NA mea nani no kanaka makua a me na kamalii. Na Kamaa Paa Loa, e loaa no maanei e like me ka makemake ; a ina e loaa koke ka ino, he hiki no ke hoihoi mai.
M. McINERNY.
Kihi o Alanui Papu a me Kalepa. 750 3m 749