Ka Nupepa Kuokoa, Volume XV, Number 18, 29 April 1876 — Page 1

Page PDF (1.61 MB)

NUPEPA KUOKOA:
KE KILOHANA POOKELA NO KA LAHUI HAWAII.
BUKE XV. HELU 18. HONOLULU, POAONO, APERILA 29, 1876. NA HELU A PAU 752.

                    MAIKAI KA HOI KA PAPA ! A ME Ka Laau o kou Hale ! No Hea la ? KA I NO HOI NO KAHI O WAILA MA ! Nana aku no hoi ia la, OHI KA IO O KA LAAU O MAKAWAO, i ka ua mea o ka nani o Na Papa, Na Laau A ME NA PONO KUKULU HALE O NA ANO NO A PAU,   MA KE KIHI O Na ALANUI PAPU a me MOIWAHINE, ...... Honolulu ...... MALAILA E LOAA AI E LIKE ME KA makemake, no ke Kumukuai makeponoloa. PAPA, PAPA, PAPA Na PAPA huluhulu, Na PAPA manoanoa, Na PAPA i kahiia, Na PAPA kepa, PAPA holo keokeo, PAPA holo ulaula. NA LAAU! LAAU! NA KUA. NA KAOLA, AAHO, MOLINA, PEAPEA, PINE HULUHULU, PINE I KAHIIA, Na Papa a me na Laau Ulaula ! PILI ULAULA PILI KEOKEO, PANI PUKA, PANI PUKA ANIANI IPUKA ANIANI, OLEPELEPE. PENA O NA ANO A Pau Hulu Pena mai ka liilii a ka nui ! AILA PENA ! AILA HOOMALOO, WANIKI, PATE NA LAKO o kela a me keia ano. NA AMI-PUKA HALE, NA AMI-PUKA PA. ANIANI ! Pepa Hale me na lihilihi E LOAA NO MALAILA KA PAAKAI Helu 1, O KAKAAKO a me PUULOA No ke Dala kuike, e loaa no na mea a pau i haiia ae la no ke kumukuai emi loa.
               O na kauoha a pau mai Hawaii a Niihau, e loaa'ku ana ia lakou, e hooko koke ia mai ana no ia me ka lawa pono.
E kipa nui ilaila, i ike i ka oiaio
749 3m 760

HE
IWAKALUA TAUSANI LEGUE
MALALO O KE KAI !
— NA MEA —
KUPANAHA O KA MOANA !
KE ALA O KA MEA HUNA,
— A O KA MEA —
POHIHIHI O KA 1866 !
MAHELE 1.
MOKUNA XII. NO KEKAHI MAU HUAHELU.

                    " O ka mana i hiki wale no i ka uwila ke hana," i pane koke mai ai o Kapena Nimo. " Ke pakui hou aku nei au i ka olelo ana, o ka ikaika hoonee o kuu mau enegini, he mana ko lakou, i aneane au e puana ae, aohe palena. O na pauma o ka Nautilo, he mana ikaika loa ko laua, ua hiki paha ia oe ke hoomaopopo iho ma ka hoomanao ana ae i na kolamu wai i hooleiia aka ai iluna o ka manuwa Aberahama Linekona, ua like lakou me ka wili ana a kekahi waipuilani ikaika loa. Aka, he mau luawai e ae kekahi a'u i malama ai no ka luu ana a hiki i ka hohonu o na anana he 1000 a keu. I ko'u wa i makemake ai e iho iloko o ka hohonu o na wai nona na mile elima a eono ke kiekie, malalo iho o ka iliwai o luna, he mau ano okoa ae no kekahi e hiki ai ke iho malie me ka maikai." " Heaha ia mau mea e ke Kapena ?"
               " I ko'u hoike ana no ia mau mea ia oe, o kou ike ana no ia i na ano a pau i hanaia ai ka Nautilo."
               " Ke ake nei au e lohe no ia mau mea."
               " Oia no ka hookele aoao ana i ka moku i ka akau a i ka hema ; oia hoi, o kona huli ana i o a ianei, aole me ka pokaa ana o ka ihu imua a i hope, aka e iho wili ana ma na aoao i o a ia nei e like me kou hookuu ana i kekahi mea pakiikii iloko o ka wai, a e hahai mau ana i ka laina ili wai like o ka ihona me ka pilikia ole o na mea paahana o loko o ka moku. I ko'u wa e hoao ai e iho pela, he hoeuli okoa no ka i hoomakaukauia no ia ano, aia ma ke kua mai o ka pou hope o ka moku. I ka hookele ana me keia hoouli, hookahi wale no huila nana e kokope, a me kekahi une aoao. Aka, he mau mea e ae no kekahi i hanaia no ka iho hikiwawe ana o ka Nautilo ilalo, a pela hoi me ka pii emoole ana iluna, ma ke ano kupololei ; he mau papa kila kope oohu elua i hoopaa ia ma na aoao, mamua pono mai o ke kikowaena o na mea nana e hoolana kaulike i ka moku, a e hiki no hoi ia laua ke kope ma na aoao a pau loa, mamuli o ka hoonee ana a kekahi mau une ikaika iloko o ka moku. Ina e kulike ka niniu ana o ua mau pale oohu la me ka waiho ana o ka moku, alaila, e holo pololei auanei ka moku ma ka luina iliwai like. Ina hoi e hoohuli kue ia ua mau pale oohu la mai ka moku aku, a e like me ka hio kue ana o ua mau pale nei, me ka alakai ia e ka huila nao, pela no e pii ai ka moku iluna a e iho paha ilalo e like me ko'u makemake. Ina hoi au i makemake e hoopii hikiwawe loa i ka moku iluna, alaila, e hoopaa no au i ka huila nao, na ka ikaika o ka wai i hookuu ia aku i waho o ka moku, e pale iho ilalo,a pela e pii pololei ae ai au me he baluna la i hoopihaia i ka ea mama a hiki i ka iliwai o luna. O ka huipu ana o ka ikaika o ka wai i hookuuia aku i waho, a me ka hoomama ia ana o ka moku, ka mea e oi loa aku ai ka hikiwawe o ka pii pono ana iluna ma ka pololei."
               " A ! hopo ole oe e ke Kapena. Eia keia ninau. Pehea e hiki ai i ke kanaka ma ka hoeuli ke hookele pololoi i ka moku iloko o ka wai, ma ka ihu i makemakeia ?"
               " O ke kanaka ku hoe aia oia iloko o kekahi pahu i hookiekie ia ae maluna o na pale o ka Nautilo, a ua hoolakoia me na aniani hoonui ike ma kona mau aoao a pau."
               " Aole anei e naha keia mau aniani hoonui ike no ke kaumaha o ke kaomi ana o ke ea ?"
               " Aole, he oi loa aku kona paa. He mea naha wale no ke aniani ke kuia me kekahi mea oolea, aka, aole nae e naha no ke kaumaha o ke kaomi ana. Iloko o kekahi mau hoao ana a'u i ka M. H. 1864, ma ka lawaia ana ma na kai Akau, me ka malamalama o ka uwila, ua maopopo ia'u, aole e naha ke aniani, ina he 1/3 iniha kona manoanoa, i ke kaumaha o na ea he umi kumamaono. O ke aniani hoonui ike ma kahi o ke kanaka ku hoe i keia manawa, he umi iniha kona manoanoa."
               " Pela ea ! Pehea hoi e hiki ai ke ike iloko o ia manoanoa o ke aniani, oiai iloko oe o ka uliuli konoele o na wai ?"
               " Aia mahope o ke kanaka ka hoe kekahi kukui uwila, i hoanapuia e ka mea hoolele malamalama, na na kukuna o keia mea e hoomalamalama i ke kai no ka hapalua mile ka loihi ma ke alo o ke kanaka, oia hoi, pela ka loa o kahi ana e hiki ai ke ike pono aku me kona mau maka."
               " A ! wiwo ole ! He lua ole kou noonoo o ke Kapena. Akahi no a maopopo ia'u ke ano o ka weli malamalama, oiai makou e kuhihewa ana he A-u nui kou moku holo kai. Ano, ke ninau aku nei au ia oe, no ke aha hoi i hookui ai ka Nautilo me ka mokumahu Socotia, ina he hiki i ka mea ku hoe ke ike pono aku ia mua ?"
               " Ma ke ano ulia wale ia hookui ana. E holo ana au hookahi wale no anana malalo iho o ka ili o ka wai, i ka wa o ia hookui ana. Aohe no nae i nui loa ka poino ma ia hookui ana."
               " Aolo no i nui. Aka, heaha hoi ke kumu o kou hookui ana i ka moku kaua Aberahama Linekona ?"
               " E ke Kumu, ua minamina au i ka poino ana o kekahi o na mokukaua maikai loa o ke aumoku o Amerika Hui ; aka, no kona hoouka ana mai ia'u, he pono ia'u ke malama ia'u iho, a e pale aku hoi. Ua hoouka aku au iaia me ka manao e hoohoka i kona hahai hou ana mai mahope o ko'u meheu ; aole au i manao e hoopiho iaia a e hoopoino i ke ola o ka lehulehu maluna ona. Nolaila, ua haawi iki aku au he wahi poino nona, a e paa koke no i ke kapiliia ma ke awa mua ana e ku aku ai."
               " A ! o kou Nautilo e ke Kapena, ka mea kamahao o na moku holo moana a pau."
               " Ae, e ke Kumu ; a nolaila, ua aloha au iaia, me he la o kekahi hapa ia o kuu kino. Ina ua hooweliia kekahi o ko oukou mau moku e ka poino ma na kai akea, e loohia like auanei ia hauli poino a me na weli maka'u maluna o na mea a pau mawaho a maloko a ka moku, oiai hoi, mai na kanaka a i ke kino o ka moku. Aka, maluna nei o ka Nautilo, aohe poino a kona poe kanaka e weli maka'u ai. Aohe liu a lakou e hopohopo ai, no ka mea, ua paluaia kona mau wahi owaho, a ua ikaika hoi me he pauku hao olokaa la ; aohe a lakou mau kaula rigini e lawelawe ai ; aohe pea no ka makani ; aohe ona mau ipuhao e maka'u wale ai no ke pahu ana ; aohe hoi he ahi nana e hoopau, oiai ua hanaia ka moku he hao wale no, aohe laau ; aole no hoi e hopohopo no ka pau e o ka lanahu, no ka mea, o ka uwila wale no ka agena mekanika nana e hoohana ; aohe hopohopo ana no ka hookui aku me kekahi moku, no ka mea, ua hanaia oia no na wai hohonu ; aohe makani ino nana e hoolele hauli iaia ; no ka mea, i kona wa e luu ai iloko o ka hohonu, e hiolani malie auanei oia iloko o ka lai. Maloko o ka opu o ka moana, kahi i oi loa aku ke kupono nona mamua o ka ilikai ! A ina ua oi ae ka paulele o kekahi eneginia i ka moku mamua o ka mea nana ia i kukulu, a o ka mea hoi nana i kukulu mamua o ke Kapena, alaila, he pono ia oe ke hoomaopopo, pela iho la ke ano i hilinai ai au me ka paulele nui maluna o kuu Nautilo, no ka mea, owau ka mea nana i kukulu, a owau hoi kona enekinia."
               " A pehea i ike ole ia ai kou kapili ana i keia moku kupanaha ?"
               " E Mr. Aronaka, mai na wahi mai a pau o ka poepoe honua, i laweia mai ai kela a me keia apana kaawale ona. Ua hooheeia kona kila olalo ma ka hale hana hao i Keresota, o ka iho o kona huila nao, ma ka hale hana hao o Peni & co. i Ladana, a o kona mau papaahao owaho, ma Laida i Livapulu ; a o ka huila nao, ma Sekotia, i Galasago ; a o na lua wai a me na keena hao no ka ea, ua hanaia lakou o Kaila & Co., ma Parisa ; a o na enegini, na Krupp, i Perusia ; o ka ihu hookui, ma ka hale hana hao o Motala, i Suedena kahi i hanaia ai ; a o kona mau mea paahana huihui helu, ua hanaia lakou e na Hoahanau Hart o Nu Ioka ; a pela aku ke kauoha liiliiia ana o na mea a pau o ka moku ma kela a me keia wahi o ka poepoe honua. Ua hoouna aku au i ku'u mau kauoha malalo o na inoa ano okoa."
               " A i hea kahi i hoopilipiliia ai o keia mau mea a pau a lilo i moku hookahi ?"
               " E ke Kumu, maluna o kekahi mokupuni neoneo iwaena konu o ka moana, i kukulu ai au i ko'u hale paahana. Malaila i akoakoa ai ko'u poe paahana, oia hoi, na poe kanaka wiwo ole o luna nei o ka moku, ka poe a'u i ao aku ai a i hoonaauao pono ia e a'u ma na mea a pau ; a na'u iho no a me lakou i kukulu i ka Nautilo. I ka wa i pau ai ka makou hana ana, ua puhi au i ka hale hana i ke ahi, a me na mea e ae a pau e ike ia ai ke kauwahi meheu o ka noho ia ana o ia mokupuni o ke kanaka, a lele aku la makou iloko o ke kai."
               " Aole paha i kaua mai ka nui o ke kumukuai o keia moku," i ninau aku ai au me ke ano hoohuahualau.
               " E Mr. Aronaka, ua ike no oe i ke kumukuai o ka moku hao, he L45 no ke tona hookahi, (oia hoi, $225)). O ke kaumaha a me ka nui o ka hao maluna nei o ka Nautilo, he 1,500 lona no ia, nolaila, he $337,500 ke kumukuai no ka hao walo no. O na lilo e ae no ke kukulu ana, he $400,000, a $1,000,000 no na oihana akamai a me na mea e ae a pau i hoiliiliia no ka hoolako ana i ka moku. Nolaila, o ka huina pau o na lilo no ka moku, he $1,737,500."
               " I hookahi a'u ninau i koe e Kapena Nimo."
               " E ninau mai e ke Kumu."
               " He nui anei kou waiwai ?"
               " Nui aole i kana mai ! E hiki ia'u ke hookaa i ka aie lahui a pau o Farani, me ko'u ike ole, ua emi iho ko'u waiwai ma ia hana ana."
               Ua hikilele ae la au me he la he mau leo hihio ka'u e lohe nei, a nana pono aku la i ua kanaka kupanaha nei. E olelo alapahi wale mai ana anei oia i mea e punihei ai au ? Na ke au o ka manawa e hiki mai ana e hoike mai i ka oiaio.
(Aole i pau.)

NA PALAPALA I KE KUOKOA.

E KA NUPEPA KUOKOA E, Aloha oe :—
               He olelo ike maka, ka makou e waiho aku nei imua ou. Oia keia. He mahalo ka makou i ka lana ana o ka manao o na opio a me na elemakule, i ka hapai ana i ka pono, ma Maemae nei. Ua lohe mai makou, ke ao ae la no ka mea ma mea aku, mea iho. He ao maikai maloko o ka olelo a ke Akua. Olioli no hoi makou a pau, a o ko makou manao no ia, he mahalo piha. Ke olelo mai nei o mea ma, mai nana iki aku oe i ka pula iki iloko o ka maka o kou hoahanau, he kaola nui no ka ka i loko o kou maka iho. Ke i mai nei o mea iho e ae ke ao aku ia hai, aole ka ae e eo iho ia oe iho, ke pane mai. Ia mea aku o oe ke ao aku mai moe kolohe oe, moe kolohe no ka oe, o oe ke ao aku mai aihue oe, aihue no ka oe, o oe ke ao aku mai hoike hoopunipuni oe, hoike hoopunipuni no ka oe.
               Kahaha !! heaha keia leo, a mea aku, he aha hoi eia ka, he haalulu, no ke ku ana e haiolelo, a puka hewa keia huaolelo. Aia ka o (A) ke olelo mai la mai lawe, i na ilio iloko o ka luakini a ke Akua, e hoohaunaele ai i ka wa pule, a me na hoino wale i ka hale o ke Akua, aia ka paka, aole pono ke kuha paka ma ka papahele a me na paia o ka hale. A e ino io no, o ko kakou manao hookahi no ia, aole pono e hookuli ke pane mai la o (J) heaha keia, heaha ka hoi kau o ke kui o ka nao o ka ohi o ka hoka. Aia hoi he leo ano e i puoho ae, eia ka he leo e papa ana mai hana i ka naaupo, kui mai la kekahi mea a ao mai la mai hana i ka hewa iloko o keia halepule a mawaho aku o keia hale, no ka mea, mamuli hoohalike na keiki a kakou i ka kakou mau hana. Ke mahalo aku nei makou, i ka olelo ao maikai, oia mea i ku mai la, o ko makou manao no ia he kokua nui.
               Eia kekahi, lohe mai makou he kula ao kalai olelo ka (A) a me (E), na laua ka e ao mai nei i na elemakule a me na opio. He mahalo piha ko makou a pau, e hooikaika pono ma ia alakai ana a (A) a me (E) Aia hoi he leo i pae mai ma ke kihi o ka hale e i mai ana, mai alakai kahi makapo i kahi makapo, o haule laua i ka lua hookahi. Ke maikai ala no. Pono ia. Eia kahi ano ma ka makou ike aku, o ka lilo e ke anaina haipule i wa holoholo iwaho.
               Aole o ia wale no, eia kekahi, he kohu makika ke ano, hauwalaau, hawanawana, haukamumu, ano ole i ka wa e pule ai, aole malama i ka maluhia o ke auaina haipule, aole ua hiki no malia paha, o ke ano ana no ia, a F a me E. Pela no paha lakou i hoohalike ai, ua pono no ia, mahalo piha ka makou a pau no keia hana.
               Kahaha !! heaha keia, heaha mai ka hoi kau, ua manao kanaka aku la o mea ma. Pane mai la hoi kekahi, ua ku aku la i ko a-u, i ka i-a lele o ka moana, ua ike no la he manao kanaka, heaha la ka mea i hele mai ai e hoolohe i ka haiolelo kalai'a na na keiki noeau o kaua popo kapa o Nuuanu.
               Ae, maikai no keia mau manao, he wahi ano iki ka makou i ike aku la, o na wahi hipa i lele aku la mawaho o ka pa, aia la laua ihea, aloha ino ia mau hipa. Ke haawi aku nei au i ko'u aloha i na keiki ulele hua kepau a me ka luna hooponopono. Owau no, S. HUALALAI.
Kawaiki, Honolulu.

" Eia mai ka oiaio."

E KA NUPEPA KUOKOA E ; Aloha oe :—
               E oluolu kou lunahooponopono e ae mai i na mea i hoopukaia o J K Pilialoha, ma ka Lahui Hawaii, Helu 14, Maraki 30. I kakauia ka inoa maluna, " Hoomaliuole." Aole he oiaio kana mea i hoolaha ai, e pili ana i ka honee ana i na palena aina me ke kupono, pela ka olelo a kamaaina oia wahi aole i hooneeia e Hoomaliuole.
               O ka mala pineti a Hoomaliuole, ua nui loa ka poino i na holoholona i-a, ia mai ai e ka poe Paniolo, a ma ke ahonui o Hoomaliuole, ua kuka ia mawaho o ka aha. E uku mai na Paniolo i elima dala no ka poino me ke poho, aka, ua hoopaakiki nae na Paniolo me ka hoole mai, a ua hoopiiia i ka Aha Hookolokolo, a ua hoopaiia he umi dala ka uku o na Paniolo, ua hana aloha aku no o Hoomaliuole, aohe nana ia mau dala be $10.00. Na ka Lunakanawai no i hoopai mai e like me ka hoike ana i ka pololei a me ka oiaio ma ka olelo ike a na hoike imua o ka Aha.
               O ka upena i kuaiia ai, aohe no i makemake aku, aka, ua kii mai ia'u e kuai i ka upena no na dala he $600, no kona pilikia, a mahope ua kii mai me ka hoihoi pu mai i na dala $6.00, me akahi dala me ka hapalua ma ka manao no o ka Aha Luna, ua olelo mai nei kela ua luhi ka Aha Luna, aohe i luhi o ka hana a ka enemi, aia ka pono a nui kai nei palau ana.
               Ke palalau ae nei ka waha no ka hoki, he eha mua ka ! I eha i hooheiia o Keoni me Kaauaana, he mau kino nui puipui ai halale, na ko laua mau lima no i hoohei a eha ai ka a-i o ka hoki ; a hoopoino ai i ko hai waiwai a ulakolako hoi. Aohe no hoi i ukuia laua ma ia hana ino i pili i ke Kanawai o ka aina, i ka hoopoino holoholona loa nae he mau kaaka naauao ina ua ike i ke Kanawai, hokai no hoi ua u-a ; he naaupo no ka waapae.
Aohe o'u manao e pane aku, aka, o manaoio ia e ka lehulehu mai o a o, he oiaio ka mea i hoikeia ae nei e ka mea i huna i kona inoa maoli, a kakau iho la o J K. Pilialoha, e pono e kapaia ka inoa hou iho maluna ona, o Pilinakeke. E hamau e ke hoa, e huli hoi hope aku ka enemi i ka home me ka maluhia, mai nee hou mai i mua, o loaa ia " Kahuelepo i ka hauna laau a Kawelo."
" O ke aloha ko'u makemake.
Aole o ka mohai,"
               Me ke aloha i na keiki ulele hua kepau o ka " Nupepa Kuokoa" Me ka mahalo. D K HAIOLA.

Puhi Rama ma Hamakua.

                    Ua nui loa ke kaulana o kekahi mau kanaka ma Kaupakalua, Hamakua, Maui, i ke " Puhi Okolehao," a ua nui no hoi ka hooikaika ana o na luna aupuni e kinai, aole nae he loaa — aka, ma ka wanaao o ka Poaono Feb. 19, 1876, ua haalele mai o Kule (k) kekahi o ua mau kanaka kaulana nei, ia Hamakua nei, a ua hele aku i Lahaina me kana wahine, me na mau omole okolehao he lehulehu wale. A ua lohe mai au, ia laua i hiki ai ma Lahaina, ua haawi aku oia i kekahi mau omole i kana kaikamahine a kuai, a ua paa kana kaikamahine, a ua hoopaiia e ka Lunakanawai Hoomalu o ia apana, no ka haawi a kuai waiona i na kanaka Hawaii. Ua hoopii pu ia o Kule (k) no ka haawi a kuai waiona i na kanaka Hawaii, a me ke puhi rama — nolaila, ua hoounaia mai o John Kahoiwai, ke keiki a ka Makai Nui o Maui, e kii i na hoike ma ka aoao o ke aupuni e pili ana i ua hihia nei. Iaia i hiki mai ai maanei, ua loaa pono aku iaia o Kaupena (k) e puhi ana i ka okolehao maloko o kona hale ponoi, a ua hopu aku oia iaia — ua hoopii pu aku o John Kahoiwai ia Naha (k) a me J D Kalakaua no ia hewa hookani, a ua hoopaiia o Kaupena a me J D Kalakaua he $300 pakahi, a ua hoopau wale ia ka hihia a ke'lii ku-e ia Naha no ka hoike kupono ole.
               O keia poe kanaka i oleloia ae la maluna, oia hoi o Kule, Kaupena, Naha, a me J D Kalakaua, he mau kanaka makau ole, a he hana no hoi me ka manao ole he hopena ko na mea a pau.
               Ke lana nei ko'u manao o ka hoopaiia ana o keia mau kanaka he mea ia e kinai mai ai i keia hana ino ma ka apana o Makawao nei. Maluna oia kanaka o ke aupuni ko'u hoomaikai, a me ke noi pu aku i na Lani e hoopomaikai mau mai iaia, a e kokua mau mai iaia ma ka hooko ana i na Kanawai o ka aina a me ka malama ana i ka maluhia, a me ka pono o ka lehulehu.
Owau me ka oiaio. HAWAII PONOI.
Kuiaha, Mar. 1876.

He wahi moolelo no kekahi Kaikamahine Alii Rukini.

                    Ua noho iho kekahi keiki Rukini ui ma ke kula o Leipsic e imi i ka ike o na mea akamai me ka naauao aapo. O ua kanaka ui nei, no ka ohana alii a ua loaa iaia na hoaloha a me na aikane ka poe i launa mai iaia. Mahope iho nei, puka aku la oia mai ke kula aku me ke akamai nui a me ka haawi pu ia o ka inoa hoohanohano iaia, he M. A oia hoi, he kanaka ike i na mea helu. Aohe i liuliu mahope iho, kipa ae la kekahi kaikamahine ui ma ka hale o ke kahi o na kumukula o na hale kula nei, a pane aku la i ke kanaka naauao penei : " Ke makemake nei au e ke Kumuao, mamua o ko'u haalele ana iho ia Leipsic, e haawi e aku i ko'u hoomaikai ia oe." Pahaohao iho la ke Kumuao, a ninau mai la, " Hoomaikai mai oe ia'u no keaha ?" " E hoolohe mai e ka haku. Ua mareia au me kekahi Keiki Alii kahiko. Ua make kuu kane he mau makahiki aenei i hala. Ua make ilihune ia, a nolaila, ua haaleleia au e ola me ke akaka ole o ka loaa o kahi berena o ka la. Ua hooholo au e imi i kahi e loaa ai na kumu e hiki ai ke malamaia ko'u ola ma na hana ike." " Ae, e ka wahine maikai, aka aole nae au i ike pehea la oe i hoomaikai mai ai ia'u." Alaila hoomau aku la ka lede i ke kamailio, " e nana mai, ua ekolu aenei makahiki i hala mai keia manawa aku, ma Leipsic nei au e noho ana he haumana kula. O ka haumana i puka hope aku nei ma ka hoikeia ana, ka mea hoi au i manao ai e kaulana ana ia no kona akamai, aole ia he mea e ae owau no."

               AUANEI PAIO.— Ua lohe mai makou, ke malamaia nei he ahahui paio maloko o ka hale halawai o Kapalama malalo o ke alakai ana a Mr. Keau a me Mr. J Alapii. Mahalo no makou i keia hana ina he hana manawa ka oukou, aole ka hoololoiahili wale aku a au moe, e like me ka mea i lohe pinepineia ma kekahi hale halawai o kakou.