Ka Nupepa Kuokoa, Volume XV, Number 21, 20 May 1876 — Page 1
NUPEPA KUOKOA :
KE KILOHANA POOKELA NO KA LAHUI HAWAII.
BUKE XV. HELU 21. HONOLULU, POAONO, MEI 20, 1876. NA HELU A PAU 755.
MAIKAI KA HOI KA PAPA !
— A ME —
Ka Laau o kou Hale ! No Hea la ?
KA I NO HOI NO KAHI O
WAILA MA !
Nana aku no hoi ia la,
OHI KA IO O KA LAAU O MAKAWAO, i ka ua mea o ka nani o
Na Papa, Na Laau
— A ME —
NA PONO KUKULU HALE
O NA ANO NO A PAU,
— MA KE KIHI O —
Na ALANUI PAPU a me MOIWAHINE,
...... Honolulu ......
MALAILA E LOAA AI E LIKE ME KA makemake, no ke
Kumukuai makeponoloa. PAPA, PAPA, PAPA
Na PAPA huluhulu,
Na PAPA manoanoa, Na PAPA i kahiia, Na PAPA kepa,
PAPA holo keokeo, PAPA holo ulaula.
NA LAAU! LAAU!
NA KUA.
NA KAOLA, AAHO,
MOLINA,
PEAPEA, PINE HULUHULU,
PINE I KAHIIA,
Na Papa a me na Laau Ulaula ! PILI ULAULA
PILI KEOKEO, PANI PUKA,
PANI PUKA ANIANI IPUKA ANIANI,
OLEPELEPE.
PENA O NA ANO A Pau
Hulu Pena mai ka liilii a ka nui !
AILA PENA ! AILA HOOMALOO,
WANIKI, PATE
NA LAKO
o kela a me keia ano. NA AMI-PUKA HALE,
NA AMI-PUKA PA.
ANIANI !
Pepa Hale me na lihilihi
E LOAA NO MALAILA
KA PAAKAI Helu 1,
O KAKAAKO a me PUULOA
No ke Dala kuike, e loaa no na mea a pau i haiia ae la no ke kumukuai emi loa.
O na kauoha a pau mai Hawaii a Niihau, e loaa'ku ana ia lakou, e hooko koke ia mai ana no ia me ka lawa pono.
E kipa nui ilaila, i ike i ka oiaio
749 3m 760
Ke Kau Ahaolelo o M.H.1876.
LA HANA 11.— Poaha, Mei, 11.
[Koena o ka Poaha.]
Hoike mai ke Kuhina o ko na aina e, ua pau i ke paiia he 250 kope o ke Kuikahi Panailike.
Hoolaha mai o Naukana he bila e hoololi ai i na Pauku 783 a me 784 o ke Kivila. Na Birch e hoololi i ka mokuna 25 o ke kanawai e hooponopono i ka Papa Hoonaauao, e pili ana i ka uku o na kumukula.
Waiho mai o Mr Kalaukoa he olelo hooholo e noi aku i ka Loio Kuhina e waiho mai imua o ka Ahaolelo i na lilo no ka oihana makai. Aponoia.
Na Mr. Waterhouse, he olelo hooholo e noi ia aku na komisina o na Aina Lei Alii, e waiho mai imua o ka Ahaolelo i na loaa o na Aina Lei Alii no na makahiki elua i hala a me ka nui o na aina e hoolimalima ole ia nei. Aponoia.
Na Mr. Pilipo he olelo hooholo, e kauoha ia ke Kuhina Kalaiaina e hoike mai imua o ka Ahaolelo i na loaa o ka oihana Kakau kope. Aponoia.
Na Mr. Pilipo he olelo hooholo e kauoha ia ke Kuhina Kalaiaina e waiho mai imua o ka Ahaolelo i ka moolelo o ka Ahakukamalu e pili ana i ka mahele aina i ka wa o Kamehameha III.
Hoolaha mai o Mr. Pilipo he bila e papa ana i ke Kuhina Waiwai aole e haawi i kekahi oihana i na lunamakaainana oiai e noho ana iloko o he kau kanawai, Na Hon Kuihelani he bila e pili ana i ke koho lunamakaainana ana.
Waiho mai o Mr. Nawahi he olelo hooholo, e kauoha ana i ka Loio Kuhina e hoopii i ka Papa Nana o Waimea, Kauai, no ka wehe ole ana i ka pahu balota ma ka Poakolu mua o Feberuari. Waihoia ma ka Papa.
Waiho mai o Mr. Pilipo he olelo hooholo e koho okoa no na Alii a me na lunamakaainana no na ninau a pau imua o ka Hale. Mahope o ka hoopaapaa loihi ana, ua hoopanee loa ia ka olelo hooholo, he 23 ae, a he 22 hoole.
Waiho mai o Mr. Birch he olelo hooholo, e kauoha ia ke kakauolelo e hoike aku i ka Papa Nana Koho Balota o Honolulu, e malama ia ona koho balota hou ma ka noho i hoohakahaka ia e Mr. Kamakau mamuli o kona mai loihi. Hoopaneeia a Poakahi.
HANA O KA LA.
Heluhelu alua ia ka bila e hoemi ana i ka auhau lio. Waihoia i ke komite o na Aha Hookolokolo.
Heluhelu alua ia ka bila e hooponopono ai i na hora hana o na paahana ma ka 9 hora o ka la. Waihoia i ke Komite, Mahiai, Kalepa a me Hanalima.
Heluhelu alua ia ka bila e hookomo dute ole mai ai i na waiwai ekalesia. Waihoia a hala he 14 la, noonoo.
Heluhelu alua ia ka bila e hoololi ai i ka Pauku 1420 o ke Kivila. Waihoia ma ka papa a noonoo pu me kekahi bila i ano like me ia.
Heluhelu aina ia ka bila e ae ana i na paahana e malama i na la kulaia o ke aupuni. Waihoia i ke komite Kalepa, Mahiai, a me Hanalima.
Heluhelu alua ia ka bila e hoololi ana i ka Pauku 215 o ke Kivila. Waihoia i hana no ka Poalua e hiki mai ana.
Heluhelu alua ia ka bila e hoopau loa ai i ka Pauku 216 o ke Kivila. Waihoia i hana no ka Poalua e hiki mai ana.
Heluhelu alua ia ka bila e hoopau ai i ka Pauku 1 mokuna 41 o ke Karaima. Waihoia i hana no ka Poakolu e hiki mai ana.
Heluhelu alua ia ka bila e hoopau loa ai i ka lalani hope o ka Pauku 1 mokuna 34 o ke Karaima i hooponopono hou ia. Waihoia i ke komite o na Aha Hookolokolo.
LA HANA 12 — Poalima. Mei 12.
Hoomaka na hana e like me ka mau. HELUHELUIA NA HOOPII A WAIHOIA.
Na Helekunihi mai Hana mai, e hoonoa ia na kai lawaia. Na Hana mai no, e hookuuia ke dute maluna o na waiwai ekalesia komo mai. No Hana mai no, e hoemiia ka auhau lio i 50 keneta. No Hana mai no, e ae ia na Kauka Hawaii e lapaau laikini ole. Na Mr. Kahaku mai na Kaulalii, e noi mai ana, e haawi aku ka Ahaolelo i Palapala Sila no ka aina i haawiia e Ka-
mehameha III i kona makuakane. Na Mr Birch mai Wailuku mai, e hoohuihuiia kekahi mau oihana aupuni i hookahi. HOIKE A NA KOMITE.
Hoike mai ke komite Malama Ola e hoihoi i na hoopii o Hilo, Wailuku a me Honolulu e noi ana e lapaau laikini ole na kanaka Hawaii, i ka poe nana i waiho mai, i hana ai lakou i mau bila o ia ano ; e hoihoi aku no hoi i ka Papa Ola, i ka hoopii o Hamakua e noi ana e hoopau i ke Kauka Kaahele o Hawaii ; e hoihoi aku no hoi i ka mea nana i waiho mai i ka hoopii a ko Lahaina, e hoololi loa i ke kanawai hookamakama. Aponoia.
Hoike mai ke komite o na Aha Hooko-lokolo i ka palapala hoopii e ko Honolulu e hoololi i ka hae Hawaii, e hoomoe ma ka papa. Ae ia.
NA OLELO HOOHOLO A ME NA BILA.
Heluhelu mua mai o Mr. Naukana he bila e hoololi ana i ka Pauku 783 o ke Kivila. Waihoia no ka heluhelu alua. Nana no he bila e hoololi ai i ka Pauku 1478 o ke Kivila. Waihoia no ka heluhelu alua.
Hoolana mai o Hon S K Kaai he bila e laikini ai i na banako maluna dala.
Waiho mai o Mr. Gay he olelo hooholo e kauoha ia ke Kuhina Kalaiaina e waiho mai imua o ka Hale i na aina aupuni i ana ole ia. Hooholoia.
Hoolaha mai o Mr. Kauai he hoololi Kumukanawai i ka Pauku 45. Na Mr Halemanu he bila hooponopono ai i ka pili ana o na ohana.
Waiho mai o Mr. Preston he olelo hooholo, e hoike mai ke Kuhina Waiwai i na loaa o ke aupuni mai 1864 mai. Aponoia.
Hoolaha mai o Halemanu he bila e hoololi ai i ka Pauku 1284 o ke Kivila, i hoololi mua ia ai a aponoia i Iulai 18, 1870. Na Mr. Birch he rula e pili ana i ka " ninau ano."
Waiho mai o Mr Kalaukoa he olelo hooholo, e halawai ka Ahaolelo ma na Poaono a pau i ka hora 10 A. M. a e hoopanee ma ka hora 12 M
Heluhelu mua mai o Mr Halekunihi he bila e hoopau ai i ka mokuna 23 o ke kanawai o 1874. Hoopanee a halawai i ka hora 10 A. M Apopo.
LA HANA 13 — Poaono Mei 13.
Halawai ka Ahaolelo i ka hora 10 A. M. HELUHELUIA NA HOOPII A WAIHOIA.
Na Helekunihi mai Hana mai, e ae ia na Kauka Hawaii e lapaau wale ; e hoopauia ka hana ma ke alanui no ka auhau alanui, a e uku dala ; e ae ia na paahao e hana ma na alanui ; e hookaawale ia i $3,000 no na alanui o Hana.
Na Lilikalani no Honolulu mai, e hoomoe ia i ona piula wai nui ma ke Alanui Puowina, mawaena o na Alanui Moi a me Moiwahine.
Na Kanealii mai Wailuku mai, e hoopau ia ke Kahukula Nui.
Na Aholo mai Lahaina mai, ina e loaa kekahi o ka poe i mare ia i ka lepera, e manao ia ua kaawale, a e ae ia e mare ka mea i koe.
HOIKE A NA KOMITE
Hoike mai ke Komite Waiwai no ka huli ana i na helu o na kakauolelo mua, a ua loaa aku no ua pololei, a waiho mai i kekahi mau manao. Kauohaia e pai. NA OLELO HOOHOLO.
Waiho mai o Mr Pilipo he olelo hooholo e ninau ana i ko ka Loio Kuhina manao no ke kanawai e hoomana ana i ka Moi e hana i kuikahi a mau kuikahi paha, me ka hai mai i ke kulana o ke kuikahi i keia wa. Hoopaapaa a hoopanee wale ka Hale.
LA HANA 14 — Poakahi Mei 15. HELUHELUIA NA HOOPII A WAIHOIA.
Na Helekunihi mai Hana mai, e kuaiia na aina aupuni no ka $1 00 o ka eka.
Na Barenaba, mai Koolaupoko mai, e hookuuia na paahana i hoopaa aelikeia ina ua hoohanaia lakou a umi hora hana.
Na Helekunihi, mai Hana mai, e mau no ka mana o na makua maluna o na keiki i oo.
Na Nawahi, mai Puna mai, e hooliloia ka olelo Hawaii i olelo kumu, aole ka olelo Haole.
HOIKE A NA KOMITE.
Hoike mai ke Komite o na Aha Hookolokolo no ka hoopii e ku-e ana ia S M Kamakau e hoonoa i ke koho ana, e noho no ia ma ka noho. Aponoia. Na ia Komite hookahi no, no ka hoopii a ko Koolauloa ia J L Naili e hoonoa, ua manao ke Komite e hoopaa no. Aponoia. Na ia Komite
no, no ka hoopii a ko Honolulu e hoonoa i ko A P Kalaukoa kohoia ana, manao ke Komite e noho no ia ma kona noho. Aponoia.
Hoike mai ke Komite wae i waihoia aku ai ka bila e hoololi ana i ka pauku 1 mokuna 37 o ke Karaima, e waiho ma ka papa, a e lawe mai ana lakou i bila hou. Ae ia.
Heluheluia no ka manawa mua loa ka bila pakui a ke Komite no ka hoololi ana i ka pauku 1 mokuna 37 o ke Karaima. Waihoia no ka heluhelu alua.
NA OLELO HOOHOLU A ME NA BILA.
Waiho mai o Mr Halemanu he olelo hooholo e hookaawaleia i $800 no ka hana hou ana i ke awa o Honokaa ma Hamakua. Waihoia ma ka papa a noonoo pu me ka bila Haawina.
Na Halemanu hou no, he olelo hooholo e kauoha aku ke Kuhina Kalaiaina i na Kiaaina pakahi, e ana ia na alanui a e kau ia na hoailona mile, e like me ka hooholo ana o ke kanawai o 1874. Waihoia oia ka pepa.
Nonoi mai o Mr Kalaukoa, e hookaawaleia i $800 no ke alanui o Pauoa mai ka halepule aku hele i uka o Pauoa. Waiho ia ma ka papa a noonoo pu me ka Bila Haawina.
Na Mr Kalaukoa no, e hookaawale i $300 no ke alanui mai Waikahalulu aku a hiki i Alanui Liliha. Waihoia ma ka papa a noonoo pu me ka Bila Haawina.
Heluhelu mua mai o Mr Lilikalani he hoololi Kumukanawai i ka Pauku 56 e hoololi ana i ka uku o na lunamakaainana. Hooleia, no ka hemahema o ka hanaia ana.
Waiho mai o His Ex W L Green he olelo hooholo e aoia aku na kakau moolelo o ka nupepa P C Advertiser e hoopololei i na mea i hanaia maloko o keia hale, a e akahele loa hoi kona lunahooponopono ma ka hoolaha ana i na mea i hana ole ia maloko nei. Hoihoi hou ia.
Hoolaha mai o Mr Nahaku he bila e hooluli ai i ka pauku 7 o ke kanawai i aponoia i 1868.
Heluhelu mua mai o Hon H Kuihelani he kanawai e hooponopono ai no ke koho balota lunamakaainana ana, e hookaawale ana i 30 iwilei ka mamao mai ka pahu balota aku, alaila hele mai ka mea koho, aole e aeia kekahi luna hooikaika maloko o ia wahi. Waihoia no ka heluhelu alua.
Noi mai ka Loio Kuhina e pai i ka bila e pili ana i na mai lele maluna o na hipa. Ae ia.
HANA I HOOPANEEIA.
Hapaiia ka hana i hoopaneeia oia ka bila e hoololi ana i ka pauku 1 mokuna 34 o ke Karaima, a e hoopau loa i na lalani hope. Waihoia i ke Komite wae nona na inoa : Birch, Nawahi, Lilikalani, Mahoe, a me Matina.
Hapaiia ka hana i hoopaneeia, oia ka hoopau loa ana i ka mokuna 23 o na kanawai o 1874, oia ka haawi ana i ka laikini i ka poe hana wai ona mailoko mai o ke kopaa. Hooleia.
HANA O KA LA.
No ka olelo hooholo e hoonoa ana i ke kohoia ana o Mr Kamakau. Hoihoi hou ia.
Heluhelu akolu ia ka bila e hoololi ana i ka mokuna 14 o na kanawai o 1870, e hoo-mahuahua ana i na laikini awa. Hooholoia.
Hoopanee ka hale, e halawai hou i ka hora 1 P M.
LA HANA 15 — Poalua, Mei 16.
Halawai ka Hale ma ka hora 1 P M
Noi mai ka Hon. Kaai e hapai ia ka noonoo ana no ka olelo hoike a ke komite hookolokolo e pili ana i ke kuleana noho o ka hoa hanohano mai Koolaupoko mai. Ma ke koho ana ua haule ke noi.
Noi mai o Hon. Kaai, e hapai hou ia ka noonoo ana no ka olelo hoike a ke komite e pili ana i ke kuleana noho o ka hoa hanohano A. P. Kalaukoa mai Honolulu mai. Ma ke kohu ana mahope iho o kekahi mau hoakaka, ua haule.
NA PALAPALA HOPII.
Mai Hamakua mai, e noi ana e aponoia ke kuikahi, e ae ia ka hoopae lima hana o ka poe ano like me ka lahui Hawaii koe na pake kinikiu, a he 13 mau noi e aku.
Mai Koolaupoko mai, e hoololi ia na la hana o ka poe lima hana i ka 20 la hana no ka mahina. E hoemi ia ka uku o ka Moi i ka $20,000 no ka makahiki. E lapaau na Kahuna Hawaii me ka laikini pu $500.
Mai Waimea mai, e hoemi ia ka uku o ka Moi i ka $20,000 no ka makahiki ; e
hoemi ia ka uku o na Kuhina i ko $4,000 no ka makahiki ; e hoemi ia ka uku o na lio i hapaha dala, a me kekahi mau kumu lehulehu wale aku.
Mai Hana mai, e auhau ia ka waiwai o na luna o ke aupuni i hapalua dala no kela me keia $100.
Mai Kohala mai, e hooleia ka dala pepa, e auhau ia ua loaa o na luna aupuni i 1/3 keneta no ke dala.
HOIKE A NA KOMITE
Waiho mai ke Komite pai i ka olelo aelike mawaena o ke aupuni Hawaii a me ka mea malama Hotele Hawaii i maheleia a i pai ia ; a me ka hoike no na lilo a me na loaa o ka Mokuahi Kilauea.
HOIKE A NA KOMITE WAE.
Komite no ke kanawai e pili ana i ka ohi ana mai i na mai lele mawaena o na hipa, noi mai i manawa hou. OLELO HOOHOLO.
Heluhelu nui o Mr Kuihelani he olelo hooholo e kauoha ana i ke Kuhina Kalaiaina e kauoha aku i na luna alanui e pena hou i na huahelu ma na pohuku hoailona mile. Hoohololi.
Hoike mai ka Hon. Mr. Smith i kona manao e lawe mai he rula hou no ka hale, i kapaia he rula no ke kakau ana i na haule a me ka ae ma kekahi ninau.
Waiho mai ka Loio Kuhina he pepa hoike o na uku o na makai e like me kekahi olelo hooholo.
Hoike mai o Mr. Birch i kona manao e lawe mai i kanawai e pili ana i ke koho balota luna makaainana.
Hoike mai o Mr. Aholo i kona manao e lawe mai he hoololi i ka Pauku 1423 o ke kanawai Kivila, e pili ana i ka Papa Ola.
Hoike mai o Mr. Kanealii i kona manao e hoololi i ke kanawai e pili ana i ka metala ilio, a e hoololi hoi i na Pauku 6, 7, 8, 9, 10, o ke kanawai i aponoia ma ka la 24 o Iulai, 1870, a e hoololi hoi i ka Pauku 1419 o ke kanawai Kivila.
Heluhelu mua mai ka Hon. Martin i ke kanawai e pili ana i ka hooulu lahui. Ma ke noi ua kauohaia e pai.
Hoike mai o Mr. Barenaba, e lawe mai ana oia he hoololi no ka pauku 4, Mokuna 9 o ke kanawai i aponoia ma ka la 13 o Iulai 1874.
Heluhelu mai o Mr Birch, he kanawai e hoopau ana i ka pauku 25, mokuna 10 o ke kanawai i aponoia ma ka la 10 o Ianuari 1865, e pili ana i ka uku o na kumu kula. Waihoia no ka heluhelu alua ana.
Heluhelu mai o Mr. Barenaba, he olelo hooholo, e kauoha aku i ke Kuhina Kalaiaina, e waiho mai i ka Papa hoike o ka Papa Ula a me ka hoike o ka huina o na dala i hooliloia no ke ola o ka lehulehu no na makahiki elua i hala.
Heluhelu akahi mai o Mr. Kamauoha he kanawai e hoololi ana i ka pauku 1 o ke kanawai i hooholo ia ma ka la 18 o Iulai, 1874 e pili ana i ka pepehi ana a me ke kuai ana i na io bipi. Hooholoia no ka heluhelu alua ia ana.
Heluhelu mai o Mr. Birch, he olelo hooholo, e hookaawaleia i $1,500 no ke kukulu ana i halepaahao ma Ulupalakua, Maui. Ma ke noi, ua hoomoeia a noonoo pu me ka Bila Haawina.
Heluhelu akahi mai o Mr. Kamauoha he kanawai e hoemi ana i ke kanawai holoholona. Waihoia no ka heluhelu alua ana.
Heluhelu mai o Mr. Birch, he hoololi i ka rula 38 o ka Hale, e hoololi ana i ka ninau "ano" mahope iho o ka ninau hoopanee. Hooholoia.
Waiho mai ke Kiaaina Dominis, i ka palapala hoike o ka Oihana Koa, no na makahiki elua i hala ae. Waihoia i ke Komite Oihana Koa.
NA HANA O KA LA.
Heluhelu akolu ia ke kanawai e hoololi ai i ka pauku 215 o ke kanawai Kivila, e papa ana, aole loa e hana na paahao ma na hana mawaho ae o ka ke aupuni mau hana. Komite ka hale, Mr Mahelona ma ka noho.
Mahope o ka hoopaapaa loihi ana, ua hoopaaia ke Komite o ka hale, a ua waiho ia ka bila i kekahi Komite Wae, oia ke Kuhina Green, Mr. Walakahauki, Preston Nawahi a me Wana.
Hoopanee ka hale, a halawai hou i ka la apopo, hora 1 P M
LA HANA 16,— Poakolu, Mei 17.
Halawai ka ahaolelo i ka hora 1 auina la, e like me ka hoomaka ana.
HELUHELUIA NA HOOPII A WAIHOIA.
Waiho mai o Mr Helekunihi, he palapala hoopii mai Hana mai, e noi ana e kukuluia i Halemai ma na apana Kiaaina pakahi. Mai Koolaupoko, e noi ana e aeia na kauka Hawaii e lapaau wale, a e hoemiia na la hana o na poe paahana ma na mahina ko i 20 la i ka malama.
Waiho mai o Mr Barenaba, he hoopii mai Honolulu mai, e noi ana, e aeia aku i eono ohua ma na kaa hoolimalima.
Waiho mai o Mr Kauai, he hoopii mai Waimea, Kauai mai, e noi ana e hookuuia ka auhau o na makua i loaa ekolu keiki, a i 1 Kiaaina mai Hawaii a Kauai, a e hoololiia ke kanawai o na Luna Aupuni, a e hoemi i ka uku o na luna aupuni mai na Kuhina a hiki ilalo.
Waiho mai o Mr Nakaleka, he hoopii mai Molokai mai, e noi ana, e hoemiia na koina o na aha i 1 dala ina he kanaka ilihune ; e auhauia ka bipi i 20 keneta, o ka hipa a me kao i 5 keneta, o ka lio, miula, hoki, kao, hipa, puaa, a me bipi e laweia ana i na aina e 10 keneta, a e kauia ke dute i hookahi keneta no ka paona, no ke kopaa, malakeke, pulu e laweia ana iwaho ; na waiwai e ae o loko nei e laweia aku ana iwaho, e dute ia.
HOIKE A KE KOMITE.
Waiho mai ke Komite Waiwai i ka lakou olelo hoike no na palapala hoopii mai Honolulu mai e noi ana e hookiekie ae i ka uku o na makai i $30 no ka malama, a me ka palapala hoopii mai Makawao mai, e noi ana, e hana ia ma ke kanawai ka uku o na makai, ua waiho ia a noonoo pu me ka Bila Haawina ; a pela hoi me ka palapala hoopii mai Hana mai e noi ana e hoomahuahua ae i ka uku o na makai o Honolulu, i $30 i ka malama, ua waiho ia no a noonoo pu ia me ka Bila Haawina ; o ka palapala hoopii mai Honolulu mai e noi ana, aole e auhau ia na miula a me kekake, ua hoopanee loa ia ; o ka palapala hoopii hoi mai Wailuku mai e noi ana, e hoohui i kekahi mau oihana aupuni, ua waiho ia no ma ka papa, no ka mea, he bila kanawai ke hana ia ana no ia mea imua o ka Hale ; o ka hoopii mai Hana mai, e hoemi i ka auhau lio ; aole e auhau ia na makua keiki lehulehu ; a e hoopau i ka auhau kino ; a o ka hoopii hoi mai Hana mai e noi ana e hoonoa i ke dute o na waiwai pili ekalesia, ua waihoia ma ka papa. Aponoia,
Hoike mai ke Komite Pai, ua paa i ka paiia ka hoike a ke Komite Waiwai, e pili ana i ka ninaninau ana i na ano i lawe ai ke Kakauolelo mua o ka Ahaolelo i kona uku, a me na hoolilo e ae. Hoike pu mai no hoi aole i paa ka bila hooulu lahui i ke paiia no ka nui o ka hana i keia wa ma na Halepai. Aponoia.
NA OLELO HOOHOLO A ME NA BILA.
Heluhelu mai o Mr Halstead no ka manawa mua i ka bila e hoololi ai i ka Pauku 1417 ; ka bila e hoololi ai i ka Pauku 1419 ; a me ka bila e hoololi ai i ka Pauku 1420 o ke Kanawai Kivila, a waihoia no ka heluhelu elua ana malalo o na rula.
Noi mai ka Hon J M Smith, e hapai hou ia ka noonoo ana no ka bila hooulu lahui a Mr Martin, a e kauohaia e pai.
Mahope iho o ka hoopaapaaia ana, na kaheaia na ae a me na hoole no ke pai ana i ua bila nei, a ua hooholoia e pai he 23 ma ka ae, a 18 ma ka hoole.
Heluhelu mai o Mr Nahaku no ka manawa mua, he bila e ae ana e kuai akea i ka opiuma. Iloko o ka wa e kulu ana ke oe o ka mea nana ka bila, ua noiia, a aeia e hapai i
NA HANA O KA LA.
Hapaiia ka noonoo ana i ka bila e hoopau loa ai i ka Pauku 216 o ke kanawai Kivila, imua o ke komite o ka Hale. O ka Mr Nahaku ma ka noho.
Ma ke noi a ke Kuhina o ko na aina e, ua hoopauia ke komite me ka nonoi aku i ka Hale e haawi aku i keia bila i ke komite wae i koho ia no ka noonoo ana i ka bila e hoololi ai i ka Pauku 215 o ke kanawai Kivila. Aponoia.
Hapaiia ka noonoo ana i ka bila e hoopau loa ai i ka Pauku 1 o ka mokuna 41 o ke kanawai Karaima, imua o ke komite o ka Hale. Kahea ia o Mr. Pilipo i Lunahoomalu no ke komite ; heluhelu ia ka bila imua o ke komite no ka lua o ka manawa a o ke ano nui o keia bila, oia no ka hoonoa ana i ka rama.
Noi mai o Mr Wana e hooholo loa ia keia bila no ke kakau poepoe ana.
Noi mai hoi ke Kuhina o ko na aina e, e hoopanee loa ia ka bila.
Mahope iho o ka hoopaapaa ana, ua hoopanee ia me ka hooholo ole ia, a noho hou ke komite ma ka la apopo. Hoopanee ka Hale.