Ka Nupepa Kuokoa, Volume XV, Number 21, 20 May 1876 — Page 4
KA NUPEPA KUOKOA ME KE AU OKOA I HUIIA.
DASH IT DOWN !
Brightest & Best. p 9.
1
Rama, ke'lii no ko po ; Hoolei ae ! Daimonio i no ; Hoolei ae ! Puka me ke kaulahao E hoopaa la ke lalau, A houia ka naau. Cho — Hoolei ae.— Hoolei ae.— Hoolei ae !
2
Waina ula ke nana, Hoolei ae ! Nahu nae la ke hoopa, Hoolei ae ! Gini wela ahi po. Awa ino, pailua no, Pota, Bia, Saida pu. Cho.— Hoolei ae — Hoolei ae, &c.
3
Baka puhi no ka po, Hoolei ae ! Baka nau, hohono no, Hoolei ae ! Pau ke dala a poho, Paa ka lolo o ke poo, Ino e ko loko ou, Cho.— Hoolei ae — Hoole, &c.
4
Pepa hoopau wa maikai, Hoolei ae ! Pahu kani hula nae, Hoolei ae ! Molowa, nunu ha e, Na olelo wahahee, Manuahi, mai Pake. Cho.— Hoolei ae — Hoolei ae, &c.
Hawaii
HAAWINA KULA SABATI.
HELU 10. SABATI, IUNE, 4
KUMUHANA — Na Lunaolelo iloko o ka
Halepaahao.
PAUKU BAIBALA — Oihana 5 : 12 — 26 12 UA HANAIA no hoi mawaena o ka-
naka, na hoailona a me na mea kupanaha
he nui loa, e na lima o ka poe lunaolelo.
(Lokahi ae la lakou a pau ma ka lanai o
Solomona.
13 Aohe mea o ka poe i koe i makau ole ke hui pu mai me lakou ; aka, mahalo aku la kanaka ia lakou.
14 Hui pu nui ia'e la i ka Haku ka poe i manaoio, na kane, a me na wahine he nui loa.)
15 No ia mea, lawe mai la lakou i ka poe mai ma na alanui, a waiho iho la ia lakou maluna o na moe hilinai a me na wahi moe, i malu ae paha ke aka o Petero maluna o kekahi o lakou, i kona hele ana ae.
16 He nui ka poe i hele mai i Ierusalema, no na kulanakauhale a puni, e lawe ana i ka poe mai, a me ka poe i loohia i na uhane ino ; a hoolaia lakou a pau.
17 Alaila ku ae iluna ke kahuna nui, a me ka poo a pau me ia, (he poe Sadukaio lakou,) ua piha loa lakou i ka ukiuki ;
18 Hopu aku la ko lakou lima i ka poe lunaolelo, a hahao iho la ia lakou maloko o ka halepaahao.
19 Wehe mai la ka anela o ka Haku i na puka o ka halepaahao i ka po, a lawe mai la ia lakou mawaho, i mai la,
20 E hele oukou, a e ku maloko o ka luakini, e olelo aku i kanaka i na huaolelo a pau o keia ola.
21 A lohe lakou, komo ae la lakou iloko o ka luakini i ke kakahiaka nui, ao ae la laua. A hiki mai la ke kahuna nui, a me ka poe me ia, hoakoakoa mai la lakou i ka ahalunakanawai, a me na lunakahiko a pau o ka Iseraela, a hoouna aku la ma ka halepaahao i laweia mai lakou.
22 A hiki ae la na ilamuku, aole loaa ia lakou maloko o ka halepaahao, hoi mai lakou, i mai. la,
23 Loaa ia makou ka halepaahao ua paa, ua malu loa hoi, e ku ana no ka poe kiai ma na puka ; a wehe makou, aohe kanaka oloko i loaa ia makou.
24 A lohe iho la ke kahuna nui, a me ka luna o ka luakini, a me na kahuna nui i keia olelo, kanalua iho la lakou, i ka hope o keia mea.
25 Alaila, hele mai kekahi kanaka, hai mai la ia lakou, i mai la, Aia hoi na kanaka a oukou i hahao ai iloko o ka halepaahao, e ku ana maloko o ka luakini, e ao aku ana i kanaka.
26 Alaila, kii aku la ka luna a me na ilamuku, a lawe malie mai la ia lakou ; no ka makau o lakou i kanaka o hailukuia mai lakou.
Pauku hoopaa, p. 20.
Mele.— Himeni 479. 8 — Leo.
1
E ko Iehova poe kauwa, E holo ae mai o a o, Aloha i na aina paa Iloko o ka naaupo. 4
No Iesu no na aina a pau, E nele e hoohuli mai ; E hoohaumana ia lakou, Na Iesu ke Lii e ola'i. Pule no ka misionari i wiwo ole lakou i ka hai aku i ka Iesu olelo, i huli nui hoi ko na aina e, &c.
NA NINAU A NA KUMU.
P 12. Heaha ka i hana ia mawaena owai ? o na lima owai ? Lokahi lakou mahea ? Mahea ia lanai ? Poina ka. Noonoo pono.
P 13. Owai keia poe i koe a makau i ka hoi pu me wai ? Pohihihi ea, Aka, oiai paha ka haina, o ka poe e manao ana e hoohalike me Anania ma ma ka huna ana i ke-
kahi hapa o ka loaa no na aina, a lawe i kekahi hapa, a haawi aku ia Petero ma, me ka olelo, o ka pau no ia o ka loaa. Ike lakou i ka hope weliweli o Anania ma, Makau loa lakou, a pau ka manao e hoi pu me na haipule oiaio. Pehea nae na kanaka ? Mahalo no i na haipule oiaio, me na Lunaolelo ; mahalo i ka make ana o Anania ma no ka wahahee.
P 14 Pehea ka poe i manaoio ? Nui loa anei lakou ? Owai hoi ?
P 15 — 16 Owai ka i laweia ma na alanui ? maluna o keaha ? No keaha hoi ? I kau ke aka owai maluna o lakou. Mana ka ke aka o Petero. Kuhihewa anei ? Heaha ka manao a me ka hana i ka wa kahiko ma Hawaii nei uo ke aka o ka Moi ? make ka ke kanaka ke ku oia ma ke aka o ka Moi ! Mahea ka like ole o ke aka o ka Moi me ke aka o Petero ? Mana io anei ke aka o Petero ? No hea ka mana ? Pehea ka olelo a kekahi wahine hee-koko ma Mataio 9.21 ? Nui anei ka poe i hele i Ierusalema e lawe ana i ko lakou poe mai me ka poe i loohia i na uhane ino ? No keaha ? A ua hoolaia anei ? Nawai i hoola ? Pela anei i ka wa ia Iesu ?
p 17 — 18. Huhu a ukiuki loa ka kekahi poe ia Petero ma, owai ia poe ? No keaha ka huhu ? Heaha ka hewa o na lunaolelo ? Ua'haia na lunaolelo ? He poe mana na lunaolelo, make Anania ma, ia Petero, ola na oopa, na lolo, na mai, mahikiia na uhane ino makau ole nae keia poe i ka hopu, i ka hahao ia Petero ma iloko o ka halepaahao ! Naaupo io ! Ka mua anei keia o ka hahao ia'na o Petero ma iloko o ka halepaahao ? Mahea ka mua ? A no keaha hoi ? Mok. 4 : 3
P 19,— 20 Paa anei lakou iloko o ka halepaahao ? Nawai i wehe i ka puka a lawe ia lakou mawaho ? Heaha hoi ke kauoha a ka anela ? Kanuia Iesu iloko o ka lua a paniia a paa loa i ka pohaku nui ; paa anei ? nawai i olokaa aku i ka pohaku ? Paa hou anei Petero mahope iloko o ka halepaahao ? A nawai hoi i hookuu ae ? Mok. 12 : 3 — 7.
p 21 — 23. Hoolohe anei na lunaolelo i ke kauoha a ka anela ? Ua lohe anei ke kahuna nui, ua hemo lakou iwaho ? Akoakoa ka aha hookolokolo e hookolokolo i na lunaolelo, i ka hoauna ana nae i na ilamuku e kii ia lakou, loaa anei ? Hoi mai lakou a olelo pehea ? Ua paa ka puka o ka halepaahao — ua malu hoi, e kiai waa no na kiai ma ka puka — i ka wehe ana nae aia, hoi aohe mea maloko ! Pehea la i hemo ai na lunaolelo me ka lohe ole, a ike ole o na kiai ? Pohihihi ea.
P 24 A lohe ke kahuna nui me kona poe pehea lakou ? Kanalua pilihua, pihoihoi no ke aha ? Aole anei lakou i ike e mamua i ke ala hou ana o Iesu, i kahi ole o na luna kiai ke pale aku i ke olai a me ke ala ana o Iesu ? Paakiki ka naau ?
P 25 — 26. I ko lakou lohe ana, aia no na paahao, Petero ma, iloko o ka luakini e ao ana i na kanaka, pehea ka luna me na ilamuku ? Lawe malie no keaha ? makau ka i na kanaka e hailuku ia !— aole ka i makau i ka mana nana i hookuu wale ae i na lunaolelo ! Naaupo hou !
Mele — Him. 496 7 — 6, Leo. Ke koaio. l
E na kiai o Iesu,
Mai makau, a hakanu,
E hookani i ka pu, Hoonui, a hoomau ;
Hele nui ae oukou,
Hai i ke kauoha hou,
Holo hoi mai o a o A huli keia ao.
NA NINAU A KE KAHU. Na makua. Hai mai i ka pauku hoopaa. Mahea na lunaolelo i ka wa i kauoha ia'i lakou e hele e hai i ka olelo o ke ola iloko o luakini ? No keaha lakou i hahao ia ai iloko o ka halepaahao ? He kumu pono anei ia ? Aole anei lakou i hahaoia mamua iloko o ka halepaahao a hookuuia'e no ka hewa ole ? A papaia me na olelo hooweliweli mai hai hou aku i ka olelo a Iesu a pane wiwo ole Petero pehea ? I ka lohe i keia olelo wiwoole, hopu hou ia, a hoolei hou ia ka iloko o ka halepaahao ! Ma keaha hoi i ikeia'i ka naaupo, ka paakiki, ka hehena o keia poe, o ke kahuna nui ma ? Ma ko lakou nana ole i ka mana o Petero make ola ano o ka mea oopa, ka make ana o Anania ma no ka wahahee, ke ola ana o na mai he nui wale, ka mahikiia'na o na daimonio, &c.
A mahope iho, ike lakou i ka nemo ana o na lunaolelo mawaho o ka halepaahao i ka mana i ike ole ia. Paakiki nae e kii, e hookolokolo, e hoahewa e hoopai. Mahea ka lua o keia naaupo ? Pehea ka hana a a Parao ? Aole anei i ike ia keia naaupo i keia wa ? Pehea ma na aina hoomanakii hoomana Pope, hoomana Mahometa, hoomana Iudaio ? Nui ka hoomaauia, hahaoia iloko o na halepaahao, hao wale ia, pepehi
ia, puhiia i ke ahi.
Na keiki. Makau anei Petero ma i ka haiolelo, i ka hoola ana i ka poe mai, o hoomaauia, a hahaoia iloko o ka halepaahao ? Ua hahaoia lakou iloko o ka halepaahao, a nawai i wehe i ka puka, a lawe ia lakou iwaho ! A kena ka anela ia lakou e aha ? mahea ? Hana anei lakou pela ? A ki na ilamuku ia lakou iloko o ka halepaahao, loaa anei ? Pehea ka puka ? e hamama ana anei ? Auhea na paahao ? Hiki anei i na anela ke malama ia oukou ke hoo-
lele iloko o ka halepaahao no ka pule ana ia Iesu ? Hiki anei ia oukou ke hai i ka Iesu olelo, a kokua i ka poe mai ?
Na kumu. Pehea ka pili ana o keia haawina i ka pule mahina hou ?
1 E makau i ke kokua hookamani, kokua pono ole, haumia, a ua, makemake ole, aloha ole, &c.
2 E makau ole i ka hele e hai i ka Iesu olelo.
3 Paa anei ka puka o kekahi mau aina, aupuni, kulanakauhale, ohana, kula, naau, hiki ke weheia. Nui na anela. Paa anei kekahi poe haipule iloko o na halepaahao ? hiki ke hemo na puka, a hookuuia, ma ke aha ?
4 E kii i ka poe mai, loohia i na daimonio, na hoomaloka, e lawe mai i kau ke aka owai maluna, i ola ?
5 Mana ole na aha hookolokolo, aole hiki ke keakea i ka lanakila ana o ka pono. Hoka wale, paa ole.
Mele — Him. 495 8 — 7 — 4 Leo.
4 Holo, e ka Euanelio,
Holo lanakila mau ; Nou e lilo ai na pio
I ohua no Iesu E ka Haku,
Nou na aupuni o ke ao. Pule no na aina e, &c.
HAAWINA KULA SABATI NO IUNE 11 Oihana 5 : 27 — 40 HAWAII.
HE
IWAKALUA TAUSANI LEGUE MALALO O KE KAI !
— NA MEA —
KUPANAHA O KA MOANA !
KE ALA O KA MEA HUNA,
— A O KA MEA —
POHIHIHI O KA 1866 !
MAHELE I.
MOKUNA XIII KA MULIWAI ELEELE.
Noho mumule iho la makou no kekahi manawa ; me ka ike ole i ka mea hou e hana ia mai ana no makou, he maikai, a he ino paha. He nakeke ka i lohe ia ma na aoao o ka moku, me he la e huki ia ana kekahi mau pani. Aka manao iho la au e hoomaka ana na pale papa oohu o na aoao e kokope.
" O ka hopena keia o na mea a pau !" i pane mai ai o Nede.
Aka, poha koke mai la ka malamalama ma na aoao o ka moku me he wailiula la ka alohi anapanapa, mailoko mai o na aniani poepoe loihi ma kela a me keia aoao. He mea hou keia ia'u, aole au i ike mua. Halo aku la au, he mea pahaohao ke ike aku i na wai e hoanapaia ana ; a he mau pale aniani wale no ka mea nana e paku nei mawaena o makou a me ka moana nui ma kela a me keia aoao. I kinohi ua haalulu au i ka makau, o poha auanei na papaa aniani no ke kaomiia o ke kaumaha o ka ea, a me ka wai ; aka, o na apo keleawe manoanoa e hoopuni ana ia laua, oia ka mea nana i kokua ikaika ia laua. Ua kuhihewa wau he mau apana lahilahi wale no, no ka moakaka launa ole ke nana aku, aka, ia'u i hele aku ai e hoao i kona manoanoa, ua hiki ia'u ke hoomaopopo, eha kapuai ka manoanoa. No keia mea, ua hoopau ae la au i ko'u pihoihoi makau, me ka hilinai ana i na olelo a ke Kapena i hai mua mai ai, no ka pua o ke aniani iloko o na kaomi ana o ke ea a me ka wai.
Hookahi mile maopopo a puni ka Nautilo ua hiki loa i ka maka ke ike aku i na mea a pau o ke kai, Lua ole ka nani ke nana aku ! Owai ka mea hiki e pena i ke ano o keia malamalama nana i hoanapu pahaohao i na kolamu wai manoanoa, a me kona mau hulili nopu ana mai ka welelau o luna a hiki i ka paa o lalo ? Heaha hoi ka peni nana e hoike pono ? Ke kilohi nei makou ma na aniani, ke nana nei hoi me ka hiaai pau ole i ke alohilohi o na kukuna, me he la ua hoopuniia makou e na weli a-a o ke dala a me ke daimana. O na mea minerala a me na mea kupu nani e ae e lapuu ana iloko o ka hohonu, ua hoopahaohao loa ia ko lakou mau waihooluu ke nana aku. E alohi mau ana i kela a me keia manawa, e loli mau ana hoi, mai ka ula ahiahi a i ka ula o ke koko ; a mai ka ula kai-ina a i ke omaomao a me ka uliuli ; a i kekahi wa, e pualena ae ana a me he pukohukohu la ke ano.
Ma kakahi mau wahi o ka moana ma na Anatile, he mea haohao loa ka ike lea ana iho i ka moakaka o ka ponaha one i ka papaku, nona na anana he kanahikukumamalima malalo iho o makou. A he mea hiki ke hoomaopopo iho, ua hiki ka palena o keia malamalama uila i na anana he haneri a me kanalima.
malalo iho o makou. Aka, iwaena o na pahola ana aku a keia malamalama a puni ka Nautilo, ua pii aku no ia a hiki i na ale paio o ka moana ; ua pau ko lakoa ikeia ama aku ma ko lakou mau waihooluu mau, a me he la, he mau nalu ahi ke popoi ae ana maluna iho o makou, a e lelehuna ana hoi i ke puhiia ae e ka makani me he mau huna'hi la.
Iwaena o keia mau malamalama a pau, aohe ia i ikeia, aole hoi kekahi mea ola o na wai, me he la ua auhee aku lakou i ka ike ana mai i ka Auwaalalua haehae moana.
He nakeke hou ana ka i loheia, a hamama hou mai la he mau pukaaniani lehulehu wale ma na aoao a pau o ke Keena ; a i keia wa, aohe makou e manao ana, ua hoomalamalamaia aku na wai e ka uila o ka Nautilo, aka, me he la he wai malamalama maoli ko makou e holo nei. He pouli maloko o ke keena hooluolu o ka moku, aka, he malamalama alohilohi mawaho a puni.
Ua nana aku makou a pau kuhihewa, a ua like hoi ko makou kulana e noho nei, me he la e nana ana i kekahi hale aniani nui i hoopihaia i ka wai.
" E ka hoaaloha Nede, ua makemake oe e ike, a eia ka wa e ike ai, a e nana aku."
" Kupanaha ! Kupanaha maoli keia mea !" i pane malie mai ai ua Kanediana nei, me ka hoopoina i kona manao inaina o ka wa mamua iho, a ua akakuu mai la kona mau helehelena ke nana'ku. " He mea keia a kekahi kanaka e mahalo ai — a aohe paha ona lua ma ke ao holookoa."
" Pela io no," wahi a'u, iloko o kuu naau. " Ke hoomaopopo nei au i ke ano o ke ola ana o keia kanaka ; aohe ona lua e like ai. Ua hookaawale oia iaia iho mai ko ke ao mai, a ua hoolilo i ka moana i aupuni nona, kahi i ahu ai o kona waiwai a me na mea kupanaha."
Iloko o na hora elua ma ia hope mai, hiki mai la he kaao okoa o na auna iune lehulehu wale ; e paani ana, a e lehai ana kekahi maluna o kekahi. Mai na ano puhikii liilii a hiki i na nenue nunui, ua makarela a me na ano amaama he nui; a me na ano ia a pau i ikeia ma na kai o Kina a me Iapana.
I keia wa, ua piha a hu makou i ka hauoli, uo ka ike aua i na mea kamahao o ka moana. Ke helu pakahi mai nei o Nede i ka inoa o na ia ana i ike aku ai, a ke helu papa mai nei hoi o Kosila, ma ke ano i hoonohonohoia ai e ka poe akeakamai, aka, ua nana wale aku la no au i ke ano o ka lakou mau onina a me ka holo palamimo ana i o a ia nei. Aolo e hiki ia'u ke hoike aku i ka nui o na ano ia i maalo ae imua o ko'u mau maka i hoolinolinoia. Ua oi loa aku ko lakou lehulehu mamua o na manu o ka lewa ; a me he la e alualu ana lakou i kahi a ka malamalama e holo nei.
Aole i emo, ua malamalama koke ae la o loko o ke Keena, a ua pau iho la hoi na pukaaniani o na aoao a pau o ke keena. Aka, he manawa loihi i hoauwana hele ia ai na noonoo o kuu poo, a hiki wale i ka wa i leha aku ai kuu mau maka maluna o na mea paahana e kau ana ma na paia. Ke hoike mai la ke panana, o ikinoliki no ka ihu e holo nei, a ke kuhikuhi mai la hoi ka manometa i ke kaumaha o ke kaomi ana o na ea elima, oia hoi, he iwakalua kumamalima ko makou hohonu malalo iho o ka ili o ka wai. O ka loga uila keia, ke hoaiai mai la ia, he umi kumamalima mile ka holo o ka moku i ka hora hookahi. Ua iini iho la au e ike i ke Kapena Nimo, aole nae oia i hoea hou mai. Ke hoike mai la ka wati, o ka hora elima ia o ka auwina la.
Hoi aku la o Nede Lana a me Kosila, i ko laua keena, a owau hoi, i ko'u keena iho. Aia nae i ko'u hiki ana aku, e hoomakaukau mai ana ke kuene i ko'u papaaina. O na mea ai e kau ana, he supa-honu, i hanaia me ke akamai nui, a he uhu-ula, i hookaawaleia ka iwi, a ua wahiia owaho o ka io me kekahi mea mokaekae palupalu a'u i ike ole ai, a na hana okoa ia hoi ke ake, me kona mau kuhinia ono momona, i hiki ole ia'u ke hoike aku i kona mea like. He mau io hui kekahi o ka emepera-holo kunatio, a o kona ea aala, ua oi loa aku mamua o ke samano a me ka ia lawalu.
Mahope iho o ko'u hoohialaai ana, ua hoolilo iho la au i na manawa ma ka heluhelu, ma ke kakau a me ka noonoo nui ana. Alaila, nihi aihue mai la ka make hiamoe, a upoi ae la i na lihilihi, waiho aku la au maluna o ko'u wahi moe, me ia ipo aloha a ka maka, he " kuluna lipo i ka hoolilipua," oiai ka Nautilo e pakelo olali nei iwaena o na heepuewai o ka muliwai Eleele.
MOKUNA XIV. KA PALAPALA POLOAI.
I KEKAHI la ae, oia ka la 9 o Novemaba, puoho ae la au me ka hooninipoia e na kuluipo a ka moe, mahope iho o ka hiolani ana no na hora he umi kumamalua, aia hoi, komo mai la o Kosila e lawelawe i kana mau hana mau no'u, me ka ninau mai, pehea la ke ano o ko'u moe ana ia po — me ka hai pu mai no hoi, haalele aku oia, aohe i ala ae o Ne-
de. Aohe au i pane nui aku iaia, no ka mea, ua haohao loa au no ka ike hou ole ia mai o Kapena Nimo, mai kona haalele ana mai ia'u ma ke awakea o nehinei a hiki ia kakahiaka ; ua manao wale iho la nae au, e ike ana au iaia i keia la. I ko'u wa i komo ai i ko'u mau kapa komo, komo ae la au i ke keena hookipa, aohe oia ilaila, " ua hala e ka puulena."
Au aku la au e loaa oia ia'u iloko o ke keena hali palapala a me ka museuma hoi, aole no. Ua noho iho la au, ua holoholo, a ua noonoo me ke ano kupilikii o ka manao.
Mai ia la a po, aole au i hoohanohano ia mai, ma ke kipa ana mai o Kapena Nimo e ike ia'u. Aohe no hoi i wehe hou ia na pani o na aoao o ka moku, me he la, aole paha o lakou makemake e hooluhi hou i ko makou mau maka me na mea nani o ke kai.
O ikinoliki no ka ihu o ka Nautilo e holo nei, he umi kumamalua mile kona holo i ka hora hookahi, a o kona hohonu malalo iho o ka ilikai, mai ka iwakalua kumamalima anana a hiki i ke kanakolu.
I kekahi la ae, oia ka la 10 o Novemaba, aohe no oia i ike hou ia mai ; ua noho hookahi iho la au me ke ano mehameha, me ke ake nui e ike ia Kapena Nimo ; aohe no hoi he luina e ae o ka moku i ike ia mai, aka, ua hoolaukanaka ia mai au e ko'u mau hoa alo malihini o na kai, oia no o Nede a me Kosila. O laua pu no hoi kekahi i haohao no ka nalowale loihi o ke Kapena. Ua mai anei ua kanaka kamahao nei ? Ua loohia anei oia i kekahi pilikia, a i ole, o ka pau ae la anei ia o kona manao ana e launa hou mai me makou ?
Aka nae, ua hauoli akea makou e like me ko makou makemake, ua hanai maikai ia makou a lawa i na mea e makemake ai. Ua mau no ka malama maikaiia ma na mea e oluolu ai ke kino. Aohe a makou mea e hoohalahala ai, koe wale no na nune ano e i kupu ae iloko o makou, pehea la auanei ka loihi o keia noho paahao ana.
Ma keia la, ua hoomaka iho la au e kakau i keia moolelo o ko makou holo ana a me ka noho ana iloko o ka Nautilo, i mea e hiki ai ia'u ke hoakaka aku i ko ke ao i ka moolelo piha o ko makou noho pio ana iloko o ka hohonu o ka moana. Ua kakau iho la au maluna o na pepa i hanaia noloko mai o ke zotera merina o ke kai.
(Aole i pau.)
No Puakailima.
E KA NUPEPA KUOKOA E ; Aloha oe :—
Ma ka la 12 o Aperila o keia makahiki, ku aku la makou i ke awa o Puakailima, a lele aku la makou i kuia na lima hana a pau, a me na haole luna, a hoomaka iho la makou e hana ia la ma ka hoopae ana mai i ko makou mau wahi pono kino a me na ukana e ae, i kela manawa nae a makou e lawe nei i na ukana, ua hakaka pu aku la makou me ke kai e kailiili ai i o a ianei, ka ua mea o ka nalu a me ke kai mimiki hoonaueue i na puu one o na ailana nei. Aole no hoi i kana nui o ua hana aloha ole a ke kai, e lumilumi ia mai ai ke kanaka ilalo o ke kai loaa mai la hoi i na iwi papaua kole na iwi, kuu iho la o Haleakala i kona mau kukuna wela, uwe o Kanepuniu. Ua mahalo au i na luna hana o keia aina no ko lakou oluolu maikai, ua oi loa'ku ko'u mahalo piha i ke alii waa no kona hookele ana me ke akamai nui a pulu ole na ukana maka mae o makou. Aole hoi oia wale o na keiki hoe waapa kekahi i ko lakou eleu i ka puloheki, hooikaika mai iloko o ka puao o ka nalu. Nani ka Huro ! huro !! huro !!! ana no lakou.
Ua holo mai makou me kekahi kauka haole akamai i ka nana ana o ka lepo manu maikai eia oia ke hoomau nei i kana mau wai hoailona lepo manu. Ua uleu no a mikioi ma kana hana i maa ke kuekaa nei nae makou i ka loa a me ka laula o ka aina nei he nui na ono lepo e loaa nei. He ma-u ia wahi mea hou o na ailana nei, ua eki, ke walaau mai nei na manu i ka lewa, ke kani mai nei kahi bele o Kaniku, ke kau mai nei ke ano ahiahi, ke welo nei ka hae o Anemanu. No ka Lunahooponopono ko'u aloha a me na keiki hooulele hua kepau ka mahalo. S. KALUA. Puakailima, Aperila 17, 1876.
HE WAHI PAHU UALA PUKA.— E nana ae oe i kela mau huaolelo e kau ae la maluna o keia pahu, ua piha i ka uala awaawa, a inuia, ona elima kanaka, eha kane a hookahi wahine, oia ka mea nana i kawili, ona lakou a pau, hoopii ka makai i ka lunakanawai, apana o Puna, T W Kumahoa, hookolokoloia a ku ka hewa ma ka ike a na hoike, hoopaiia o Wahinenui (w) he $27. 60. Nakahaina (k) he $12 30 Kahula (k) he $7.30, Kipi (k) he $7 30 Ikeole (k) he $7 30, i ka hui ana, he $61 80, ina e piha i ka poi kalo. $1 00 wale no wahi dala ; puka ino keia wahi pahu, i ka hooulu ana i ka mea a kanaka i makemake ai, eia ko'u manao e hoopau kakou mai hana o puka auanei e like me keia pahu uala puka me ka ino. O keia mau dala e kuaiia ma ka lole, loaa ka mea aahu T P MANAMANA
Waawaa, Puna, H, Aperila 18 1876
KA HUNT'S LAAU OLA
(HUNT'S REMEDY)
HE LAAU LAPAAU HOU, MAI AMERIKA MAI !
He Laau Maikai keia no
Na mai pehu o ka opu,
Na mai o ka puupaa a me ka opu mimi,
Mimi-paa, Mimi-eha, Mimi-helelei,
Ka lepo gravel iloko o ka opu-mimi,
Ka mana ole, kapalili, hui ono ole ka ai.
Na Mai Wahine,
NAWALIWALI O KE KINO,
LEPO ULA ILOKO O KA WAI MIMI,
MANOANOA PAHA KA WAI E like me keokeo o ka huamoa,
Like paha me na kaula silika keokeo, eleele, lenalena paha ; a i ole ua like paha me
ka lepo i anaiia i na iwi keokeo, a i ka mimi ana, ua wela oioi ka
mai, me ka eha nui o ke kikala a me ka puhaka.
HE NUI NA HOIKE e ola nei, ka poe i loohia i keia mau mai i haiia maluna ae,
ua pau lakou i ke ola maikai, no ka inu ana i ka
HUNT LAAU OLA. ("HUNT REMEDY)!"
UA HAAWI mua ia keia laau, e kekahi kahuna lapaau naauao, i ke kanaka mai
pehu o ka opu, e noho ana me ka ohana a Mr. Hunt ; John Hunt kona inoa, he 45 kona
mau makahiki, he kanaka nui poepoe, ua loohia i ka mai pehu. Ua haawiia kela me
keia laau no keia mai, aole nae oluolu ; ua mahuahua mau kona pilikia, ua pau loa ke
kino a me na wawae i ka pehu ; ua kokoke paa loa ka mimi ; kokoke pau loa ka hanu
ana ; a ua mahuahua loa ka wai iloko o ke kino. Aole hiki iaia ke moe ilalo ma ka
moe, nolaila, ua noho wale no iluna i ka po a me ke ao. Pela mau kona popilikia a hi-
ki i kona hoao ana i keia laau, a ke kahuna i kuhikuhi mai ai. A i kona inu ana i ke-
ia laau, ua hoomaka koke ka oluolu. Ua paipai koke ia ka puupaa i ka laua oihana ;
ua puka hou ka wai mimi a nui wale ; ua emi koke mai la ka pehu o na waewae ; a ua
oluolu hou ke ake-mama i ka hanu ana ; ua oluolu a maikai ka io o na lala, a e hoi nui
mai ana ke ola maikai, alaila, me ke kuhihewa, ua waiho oia i ka laau i kekahi mau
la. Ua pono ole nae ka waiho ana ia manawa, no ka mea, aole i ola io maoli kona mai
pehu. Ua molowa hou na puupaa i ka laua oihana, a ua mahuahua hou ka wai iloko o
ka opu, a ua popilikia hou e like me mamua. Alaila, ua inu hou oia i ua laau la, a ma
ka hoomanawanui ana, ua lanakila hou auanei maluna o ka mai, a ua ola io maoli, a
ua hoomaka hou oia i kana oihana mawaho o ka hale.
Oia ka lapaau mua ana me keia laau ; a mai ia wa mai, (he 25 makahiki) ua ha-
hanaia keia laau e like me ka hana ana o Mr. Hunt, a ua haawi na kahuna lapaau i ke-
ia laau i ka poe mai pehu a me na mai like.
Mai ia manawa mai, ua ikeia, e mahaloia hoi keia laau, mai o a o, e na kana-
ka, a ua inu ia hoi ma ke ao ana a me ke ao ole ana mai o na kahuna lapaau ; oia ka
mea i hoola mai i na kanaka he nui, ka poe pilikia i ka mai pehu, a kokoke i ka make.
Na kuhikuhi no ka inu ana :
E INU I KE PUNA TI PIHA, a hala na hora 4, alaila, e inu hou. E mahuahua
liilii nae a hiki i elua puna ti piha — a hiki hoi auanei i puna nui piha.
NO KE KEIKI hookahi makahiki a hiki i na makahiki eono, e haawi 5 kulu, a hi-
ki i na kulu 20 ; eha hora nae mawaena o ka haawi ana.
KUMUKUAI, he - - $1.50 no ka omole.
DILLINGHAM & CO.,
735 3m 748 Na Agena no ka Pae Aina Hawaii.