Ka Nupepa Kuokoa, Volume XV, Number 23, 3 June 1876 — Page 1

NUPEPA KUOKOA :
KE KILOHANA POOKELA NO KA LAHUI HAWAII.
BUKE XV. HELU 23. HONOLULU, POAONO, IUNE 3, 1876. NA HELU A PAU 757.

MAIKAI KA HOI KA PAPA !
— A ME —
Ka Laau o kou Hale ! No Hea la ?

                KA I NO HOI NO KAHI O WAILA MA ! Nana aku no hoi ia la, OHI KA IO O KA LAAU O MAKAWAO, i ka ua mea o ka nani o Na Papa, Na Laau A ME NA PONO KUKULU HALE O NA ANO NO A PAU, MA KE KIHI O Na ALANUI PAPU a me MOIWAHINE, Honolulu MALAILA E LOAA AI E LIKE ME KA makemake, no ke Kumukuai makeponoloa. PAPA, PAPA, PAPA Na PAPA huluhulu, Na PAPA manoanoa, Na PAPA i kahiia, Na PAPA kepa, PAPA holo keokeo, PAPA holo ulaula. NA LAAU! LAAU! NA KUA. NA KAOLA, AAHO, MOLINA, PEAPEA, PINE HULUHULU, PINE I KAHIIA, Na Papa a me na Laau Ulaula ! PILI ULAULA PILI KEOKEO, PANI PUKA, PANI PUKA ANIANI IPUKA ANIANI, OLEPELEPE. PENA O NA ANO A Pau Hulu Pena mai ka liilii a ka nui ! AILA PENA ! AILA HOOMALOO, WANIKI, PATE NA LAKO o kela a me keia ano. NA AMI-PUKA HALE, NA AMI-PUKA PA. ANIANI ! Pepa Hale me na lihilihi
                E LOAA NO MALAILA KA PAAKAI Helu 1, O KAKAAKO a me PUULOA No ke Dala kuike, e loaa no na mea a pau i haiia ae la no ke kumukuai emi loa.
            O na kauoha a pau mai Hawaii a Niihau, e loaa'ku ana ia lakou, e hooko koke ia mai ana no ia me ka lawa pono.
            E kipa nui ilaila, i ike i ka oiaio
749 3m 760

HE
IWAKALUA TAUSANI LEGUE
MALALO O KE KAI !
— NA MEA —
KUPANAHA O KA MOANA !
KE ALA O KA MEA HUNA,
— A O KA MEA —
POHIHIHI O KA 1866 !
MAHELE 1.
MOKUEA XIV.
KA PALAPALA POLOAI.

                I KE kakahiaka nei o ka la 11 o Novemaba, ua komo mai la a pahola ae la iloko o ka Nautilo he ea hou huihui, na ia mea i hoike mai ia'u, ua pii ae makou i ka ilikai, e hoopiha hou i ka moku me na ea okigene maemae. Ua kapio koke aku la ko'u mau kapuai i kahi e hiki aku ai i ke alapii hao, a pii ae la a hiki iluna, a iwaho hoi o ka Nautilo.
            O ka hora eono ia o kakahiaka, ua kaumaha ka lewalani i na ao, a he ano pohina ke kai ke nana aku, aka, he malino nae. Aohe aui ale i ike ia ma kona hokua. O ke Kapena Nimo, ka mea a'u i iini nui ai e halawai hou, eia anei oia maanei ? Aole. Aohe kanaka e ae a'u i ike ai malaila, o ke kanaka ku hoe wale no iloko o kona pahu aniani. Noho iho la au ma na pale o ka pa hao, a hoomoani mai la i ke ehu wainohea o ke ea kai.
            Aole i emo, hoomaka liilii ae la ka noe pohina e nalowale no ka hoea ana mai o ka wena o ka la, oiai kona mau kukuna e oili ae ana ma ke kua aku o ka huinaaouli i ka hikina. Ua lalapa loloa ae la ka ilikai i kona mau weli, me he lalani pauda la e pulumi ia ana e ke ahi. O na ao hoi keia i houluulu ae ia lakou ma kahi hookahi, ua pualena mai la i na waihooluu kinohinohi, no ka pa ana aku i na eheu o ka malamalama, a maokioki mai la hoi ke ao hulu hipa loloa a me na ao opua hookiikii ; e hoike mai ana ko lakou mau helehelena, he makani ino ke hookokoke mai ana ia la. Aka, heaha la ia makani i ka Nautilo, ka mea nana o alo hopo ole na ino me ka maka'u ole o kona mau luina.
            E hoohihi ana ka manao i ka hauoli o ka puka'na mai a ka la, me kona nani molale i ka hikina, ia wa i lohe ae ai au i kekahi mau kapuai e hele mai ana mahope o'u, huli ae la au e aloha aku, me ka manao o Kapena Nimo la, eia ka auanei o kona kokoolua, ka mea a'u i ike ai me ke kapena i ka la mua loa o ko makou launa ana. Hele mai la oia imua ma ka papahele hao o luna, me he mea la, aole i ike mai ia'u. Me ka ohenana i kau ae ai oia i kona maka, a hakilo aku la i ka huinaaouli a puni. I ka pau ana o kana nana pela, hele aku la i ka puka a puana ae la i kekahi hopunaolelo ano e i akaka ole ia'u ke ano ; aka ua hiki nae ia'u ke hoomanao pono i ua mau huaolelo la, no ka mea, o ka huaolelo mau ia e kahea ia ai i kela a me keia kakahiaka, a penei ka olelo ana :
            " Naotron respoc lorni viroh."
            Heaha ke ano o ua mau huaolelo nei, aole e hiki ia'u ke hoike aku i ko lakou ano.
            Mahope iho o kona puana ana ae pela, iho aku la oia i lalo. Manao iho la au o ka luu hou koe o ua Nautilo nei ilalo, wikiwiki koke aku la au i ka puka, a iho iho la, a hele loa aku la i ko'u keena.
            Elima la i hala ae la me ka hoano e hou ole ia o ko makou kulana e holo nei. I kela a me keia kakahiaka, e pii mau ana au iluna o ka papahola o waho. I kela a me keia kakahiaka, e lohe mau ana no hoi i ka puana ia o ia huaolelo hookahi e na kokoolua nei o ke kapena, aka, o Kapena Nimo, eia la i hea ? aohe ike ia.
            Ua hooholo iho au i ko'u manao aole au e ike hou ana ia ia, a i ole, ua hoopale mai paha oia i ka ike ana me a'u, a i ka la 16 o Novemaba, ia'u i komo aku ai i ko'u keena, me Nede a me Kosila, loaa iho la ia'u kekahi palapala i kakau ia ma ko'u inoa, e waiho ana iluna o ka papakaukau. Wehe koke ae la au me ka pihoihoi nui. Ua kakau ia me ka lima moakaka, he ano oioi nae ke ku ana o na hua, i like loa ma na palapalalima ana a ka poe Geremania. Penei na olelo o loko o ua palapala nei :
            " I KE KUMU ARONAKA ma ka moku Nautilo
            " Novemaba 16, 1867.
            " Ke poloai aku nei o Kapena Nimo i ke Kumu Aronaka e hele pu me ia i ka hahai holoholona, ma na ululaau o ka Mokupuni Keresepo. Ua manao oia, aohe mea nana e kaohi aku i ua kumu la mai kona hiki kino ana ae ; a ua oluolu no hoi oia, e hele pu mai kou mau hoaaloha iloko o keia huakai.
            " KAPENA NIMO," " Ke Kapena o ka Nautilo."
            " He hahai holoholona !" i hooho mai ai o Nede.
            " Ae, aia iloko o na ululaau o ka Mokupuni o Keresepo !" i pakui mai ai o Kosila.
            " O ! e hele ana ua keonimana nei i ka aina maloo ?" i ninau mai ai o Nede Lana.
            " Pela ke ano o ka olelo," wahi a'u, a nana hou iho la au i ka palapala.
            " E ae aku kakou," i pane mai ai o Nede. " I hookahi o kakou manawa i koe e kau ai i ka aina maloo, ilaila e ike pono ai kakou i ka kakou mea e hana ai. He oiaio aole au e hopo ke ai kohana i ka io dia maka."
            Me ko'u hoomanao mua ole i ka Kapena Nimo mau olelo mua, aole oia e keehi hou ana maluna o na ainapuni ole, a me na mokupuni, ua hoomaka iho la au e huli i ka aina i haiia maloko o ka palapala, ilaila makou e hahai holoholona ai, me ka olelo aku i ua mau hoa nei o'u ; " E pono kakou e imi mua, aia la mahea ka Mokupuni o Keresepo ?"
            Nana iho la au iluna o ka palapala aina, a ike iho la au, aia ma ka latitu Akau 32 deg. 40 min., a ma ka lonitu Komohana 157 deg. 50 min., ua wahi mokupuni uuku nei ; o Kapena Keresepo ka mea nana i ike mua i ka makahiki 1801, a ua kapa ia kona inoa ma na palapala aina kahiko a ka poe Sepania, o " Rocca de la Plata," o ke ano o ia, o " Ka Pohaku Kala." He umikumamawalu haneri mile ko makou kaawale i keia wa, mai kahi mai o ka hoomaka ana, a ua hoololi iki ia ae la ka ihu i ka aoao hikina hema.
            Hoike aku la au i ua mau hoa nei o'u, " o keia mokupuni i olelo ia, ua nalowale kahiko iloko o ke kai o ka Moana Pakipika Akau ; a ina e manao ana o Kapena Nimo e hehi hou i ka aina maloo, e koho ana paha oia i kekahi mokupuni mehameha kanaka ole."
            No keia mea, luliluli iho la o Nede Lana me ka pane ole mai, a aole i liuliu, haalele mai la laua ia'u.
            Noho hookahi iho la au me ka hakanu, a i ka wa i pau ai ko'u paina ahiahi, ua hoi aku la au e moe, me na lia ana o ka manao no kekahi la ae, a no ka halawai hou ana hoi me ua kapena nei.
            I ke kakahiaka ae, oia ka la 17 o Novemaba, ia'u i puoho ae ai, aia hoi e waiho oni ole ana ka moku, aohe halulu i lohe ia no ke kokope ana o ka huila nao. Komo wikiwiki iho la au i kuu mau kapa komo, a puka aku la iwaho o ko'u keena moe, a iloko o ke keena hooluolu.
            Aia hoi e noho mai ana o Kapena Nimo iloko, e kakali ana no'u. I kona ike ana mai ia'u ku ae la oia iluna, a kunou aloha mai la me ka waipahe, me ka ninau pu mai, ina ua makaukau au e hele pu me ia ma kana huakai. Pane aku la no hoi au, ua makaukau au a me ko'u mau hoa e hele pu me ia ; aka, aole ana wahi olelo iki i pili no kona nalowale ana, a me kona wahi i hele ai iloko o na la ewalu i hala ae.
            Komo ae la maua i ke keena paina, aia hoi, na makaukau ka aina kakahiaka.
            " E Mr. Aronaka," wahi a ua kapena nei, " e ai me ka hoomenemene ole ; oia ka'u noi, a iloko o ko kaua wa e ai ana e kamailio pu kaua. No ka mea hoi ua hai aku au ia oe, e hele pu ana kaua iloko o na ululaau, kahi e loaa ole ai ia oe he mau hale hotele no ka paina awakea. Nolaila, e ai oe me ka manao iho aole oe e paina ana i kou aina awakea, a hiki paha i ke ahiahi loa ana."
            Na iala ka olelo pela, na'u hoi ka noke. Makena wale na pa o kela a me keia ano i-a, a me na apana lalahi maikai o ka holoturide ; a me na limu he nui. He wai maemae wale no ko maua mea inu i na manawa a pau, aka, i keia wa, ua paipai iho la ke kapena i ka wai me kekahi mau kulu i hoawaawa ia, no loko mai o ka limu kai i kapa ia, he " Rodomenia pama" (Rodomenia palmata). Me ka olelo hou ole mai o Kapena Nimo, ua hoomaka iho la oia e ai. Aka, i ka hala ana ae o kekahi mau minute ua hoomaka mai la oia e kamailio penei : (Aole i pau.)

Ke Kau Ahaolelo o M. H. 1876.
LA HANA 21 — Poalua, Mei 23

                Halawai ka Ahaolelo e like me ka mau.

HELUHELUIA NA HOOPII A WAIHOIA.

                Na Nahaku mai Kaanapali mai keia mau hoopii malalo iho : e hoopauia ka aie miliona. Waihoia a noonoo pu me ka bila e hoopau ana ia kanawai. Nana no, e hookaa wale i $1,000 no ke alanui pali. Waihoia a noonoo pu me ka Bila Haawina.
            Na Pilipo mai Kalihi, e hoopauia ka Papa Ola a e hookuuia na mai lepera.
            Na Birch mai Wailuku, e haawiia ka mana i na Papa Kula Apana e hoike pololei mai i ka Papa Hoonaauao.
            Na Helekunihi mai Hana, e hoopauia ke kanawai metala ilio.

NA OLELO HOOHOLO A ME NA BILA.

                Na Mr Waterhouse he olelo hooholo, e kauohaia ke Kuhina Kalaiaina e waiho mai i mua o keia hale i na bila o ka hana hou ana i ka pa alii. Hooholoia.
            Heluhelu mua mai o Hon S K Kaai he bila e hoololi ana i ka pauku 1 mokuna 41 o ke Karaima, oia hoi ka papa pu ana i na kanaka maoli a me ka poe i hookupaia aole e inu rama. Waihoia a heluhelu alua.
            Heluhelu mua mai o Mr Kanealii he bila e hoololi ai i ka pauku 1477 o ke Kivila. Waihoia e heluhelu alua.
            Heluhelu mua mai o Hon W T Martin he bila e kapa ai i na lepera i hoihoiia i Kalawao ua make.
            Noi mai o Mr Barenaba e noonoo hou i ka bila e hoololi ai i ka mokuna 4 o na kanawai o 1874. Ae ia. A ma ke noi, ua waihoia i kekahi komite wae nona na inoa : W R Castle, Preston, Aholo, Barenaba, Wana.
            Hoolaha mai o His Ex W R Castle he bila e hoololi ai i ka rula 50 o ka hale, a e lawe mai i rula hou e kapaia rula 60.
            Noi mai o Mr Aholo e kohoia i Komite e nana i ka palapala hookohu o Mr Kamakau. Waihoia i ke Komite o na Aha Hookolokolo.
            Noi mai o Mr Kaai e kauohaia kekahi o na lunakanawai kiekie e hele mai e hoohiki ia Mr Kamakau. Hiki mai ka lunakanawai Harris a hoohiki iaia.
            Hoolaha mai o Hon Kaai he mau bila e hoololi ana i ka pauku 1 mokuna 34 a me na pauku 17, 18 a me 19 o ka mokuna 41 o ke Karaima.
            Waiho mai o Mr Waterhouse he olelo hooholo, e halawai keia hale i ka hora 9 A. M o ka la apopo a e hoopanee i ka hora 11 A M no ka hoomanao ana i ka la hanau o ka Moiwahine Victoria. Hoololi mai o Hon J M Smith, e hoopanee no a ka hora l P M o ka Poaha. Hooholoia ka olelo hooholo me ka hoololi.
Pane mai ke Kuhina o ko na aina e no ka ninau o ka olelo hooholo a ka luna haole o Lahaina no ke ku-e ia paha o ka hoololi i ka pauka 4 o ke Kuikahi Panailike e kekahi luna aupuni o na aupuni e maanei, aole mea ku-e.
            Pane mai ke Kuhina Waiwai no na lilo i ke Komisina Hooponopono Kanawai a ka Ahaolelo o 1874 i hookaawale ai, oia he $1,604.
            Waiho mai o Mr Kalaukoa he olelo hooholo, aole e paiia na bila a oi aku mamua o ka heluna o na hoa o ka Hale. Hooholoia.
            inau mai o Mr Kalaukoa, No ke aha la i lawe ole mai ai ka luna paahao i ka hoike no na loaa a na paahao. Haule pu.
            eluhelu mua mai o Mr Aholo he bila e hooponopono ai i ka auhau ana o na waiwai i morakiia. Waihoia no ka heluhelu alua a kauoha pu ia e pai.
            Waiho mai o Mr Kalaukoa he olelo hooholo, e kauohaia ke Kuhina Kalaiaina e hoike mai i na loaa a na paahao. Ae ia.
            Pane mai ka Loio Kuhina, he $14,597. 55 na loaa a na paahao iloko o elua makahiki i hala.
            Hoolaha mai o Mr Waterhouse he rula hou a e kapaia rula 85
            Heluhelu mua mai o Mr Mahoe i ka bila i hoopau loa ana i ke dala Hoopololei o Keoneula. Waihoia no ka heluhelu alua.

NA HANA O KA LA.

                Heluhelu aluaia ka bila e hoololi ai i ka pauku 1334 o ke Kivila. Waihoia i ke Komite o na Aha Hookolokolo.
            Heluhelu aluaia ka bila e hoololi ana i ka pauku 12 mokuna 86 o ke Karaima. Waihoia i ke Komite Wae nona na inoa : Nahaku, W R Kakela, Kauai, Waterhouse Halemanu.
            Heluhelu alua ia ka bila e hoololi ai i ka pauku 783 o ke Kivila. Hoopanee loaia.
            Heluhelu aluaia ka bila e hoololi ai i ka pauku 1478 o ke Kivila. Hoopanee loaia.
            Heluhelu aluaia ka bila e hoololi ai i ka pauku 1 mokuna 37 o ke Karaima. Hooholoia e kakau poepoe a e heluhelu akolu ia i ka Poakolu.
            Hoopanee a ka Poaha, hora 1 P. M.

LA HANA 22.— Poaha, Mei, 25.

                Hoomaka na hana e like me ka mau.

HELUHELUIA NA HOOPII A WAIHOIA.

                Na Mr Kalaukoa, mai ke komite 13 mai o Honolulu, e noi ana e hoopau i ke Kula o Keoneula. Na ia komite hou mai no, e hoopau ia ka haawina no ka Hotele Hawaii a me ke " Kilauea." Na ko Iwilei poe mai, e hoonee ia na hale pepehi pipi ma Koholaloa. Na Mr. Kaiue mai Honolulu mai, e haawi ia na Palapala Sila o na aina i loaa ole, a e ana hou ia. Na Mr. Nahaku mai Kaanapali mai, e hoopauia ke Kauka Kaahele o Maui ; nolaila mai no, e hoemiia ka auhau lio ; nolaila mai no, e hoolimalimaia i ona lawe leta mai Lahaina aku a i Kaanapali a hala loa aku i Waihee.
            Na Mr Aiwohi mai Kohala mai, e hoopauia ke Kahukula Nui. Waihoia mai ka papa a noonoo pu me ka bila. No Kohala mai no, o na lawehala i hoopaiia malalo iho o ka eono malama, e hoohanaia ma na wahi i hoopaiia ai ; nolaila mai no, e hoolimalimaia ke koena aina a kuai paha i na kanaka ; e hoopauia na Kiaaina, a na na luna makai e lawelawe i ka lakou hana ; e kapiliia i ona mokuahi nui a hou i oi ae maluna o Kilauea ; e hoomahuahuaia i elua lunamakaainana no Kohala ; e uku na halekuai kukaa i $100 no ka laikini ; e hoonoaia na kai lawaia.

HOIKE A NA KOMITE.

                Hoike mai ke Komite Waiwai no na palapala hoopii lehulehu e waiho i kahi ma ka papa, a hoopanee loa i kahi, a o kekehi e hoihoi aku i na luna nani i lawe mai, malia o hanaia mai i mau bila. Aponoia.
            Hoike mai ke Komite o na Aha Hookolokolo i waihoia aku ai ka hoopii a ko Waialua e noi ana e hoonoa i ke kohoia ana o ka luna malaila mai, ua huli loihi lakou i keia hoopii a ua hooholo e hoonoa.
            Noi mai o Hon S K Kaai e lawe mai ka hale i ka hoike a ke Komite a noonooia. Kokuaia.
            Noi mai o Mr Kahuila e apono i ka hoike a ke Komite. Kokuaia.
            Noi mai o Mr Birch e hoopanee loa i ka hoike a ke Komite. Kokua mai o Mr Lilikalani me ka noho no o ka mea nana i kokua mai iluna o ka noho. Hoohalahala mai o Mr Nawahi i ke kamailio ana o Mr Birch, no ka mea, aole i lilo kana noi i mea i mua o ka hale, oiai aole i ku ka mea nana i kokua iluna, noho no i lalo. Rula mai ka noho, ua pono no. Hoopii o Mr Nawahi i ka rula ana, aka ua aponoia ka rula ana.
            Ninauia ke noi e hoopanee loa a haule.
            Ninauia ka hoapono a hooleia.
            Noi mai o Mr Birch e waiho i keia hoike a noho ke Komite o ka Hale i ka la apopo. Aponoia.
Hoihoi mai ke Komite Wae i waiho ia aku ai e noonoo i ka bila e hoololi ana i ka Aha Kaapuni o Oahu me kekahi mau hoololi me ke noi mai e kakau poepoeia. Aeia.
            Ma ke noi, ua waihoia ka heluhelu akolu ana a ka Poaono.
            Hoihoi mai ke Komite Wae i waihoia aku ai ka bila e hoololi ana i ka pauku 1 mokuna 34 o ke karaima, me kekahi mau hoololi. Laweia ka hoike a ke Komite.
            Heluhelu mua mai o Hon S K Kaai i ka bila e laikini ana i $250 no ka Ahahui pani hakahaka a poho. Waihoia no ka heluhelu alua.
            Hoolaha mai o Mr Pilipo he bila e koho ia na Luna Alanui ma ke koho balota o na apana nona iho na luna alanui.
            Hoolaha mai o Mr Kanealii he bila e hoopau ai i ke kanawai e hoemi ana i na mai i loaa ma ka hookamakama.
            Heluhelu mua mai o Hon. S K Kaai he bila e hoouku ui i na Banako i $1,000 laikini. Waiho ia no ka heluhelu alua.
            Hoolaha mai o Mr Helekunihi i keia mau bila malalo iho : e kukulu ia ona mau halemai ma na apana Kiaaina ; e hookomoia ka hana lima ike ma Lahainaluna ; e kukuluia ona Kula Kauka no na keiki Hawaii, a e paiia ona buke rula no ka malama ola no na ohana Hawaii.
            Waiho mai Mr Kalaukoa he olelo hooholo, e halawai ka Hale ma na hora 10 A M ; a ma ka Poaono e hoopanee ma ka hora 12 M.
            Hoolaha mai o Mr Lilikalani he bila ma ke ano olelo hooholo, e lawe mai ana i olelo hooholo ma ke ano bila i ka Poaono la 27 o Mei no ke koho ana i mau elele hana Kumukanawai a no ka hoihoi mai paha i ke Kumukanawai o Kamehameha III.
            Waiho mai ke Kuhina Kalaiaina i ka nui o na aina aupuni i pau ole i ke aua ia e like me ka olelo hooholo a ka luna o Koloa.
            Waiho hou mai ke Kuhina Kalaiaina i na bila o ka ahaaina ma Aliiolani Hale.
            Waiho mai o Mr Halstead he olelo hooholo e kauoha ana i ka Loio Kuhina e waiho mai i na lilo o ka oihana makai. Ae ia.
            Hoolaha mai o Mr Kauai he bila e hoololi ai i ka Pauku 13 mokuna 36 o ke karaima ; he bila hou no, e pakui ana i pauku hou i ka mokuna 56 o ke karaima, a e kapa ia Pauku 5 a ; he bila hou no e hoololi ana i ka Pauku 2 mokuna 10 o ke karaima.
            Heluhelu mua mai o Mr Waterhouse i kana rula hou, a e kapa ia rula 85, eia ke ano, e kahea ia na inoa ma na hua piapa.
            Hoopanee.

LA HANA 23 — Poalima, Mei 20.

                Halawai ka Hale i ka hora 1 P. M. HELUHELUIA NA HOOPII A WAIHOIA.
            Na Mr. Helekunihi, no Waialua mai, e hoopiiia ka Papa Nana o Waialua. Waiho ia ma ka papa. Na Mr. Kalaukoa no Honolulu, e hoemiia ka uku o ka Moi i $25,000, a no na Kuhina, pa $5,000 pakahi, a na lakou no e uku i ka lakou mau Kakauolelo. Na Mr. Nawahi, mai a Kaopua a me kana wahine, e hoihoiia aku ko laua aina.

NA OLELO HOOHOLO A ME NA BILA.

                Waiho mai o Hon. Mr. Rhodes, he olelo hooholo, e hoahewa ana i na Kuhina.
            Hoololi mai ke Alii Kapena, e hoapono aku keia Ahaolelo i ka hana a ka Moi a me ke aupuni no ke Kuikahi Panailike,
            Lilo ka hale i ka hoopaapaa., a kokua o Messrs Rhodes, Pilipo a me Nawahi i ka olelo hooholo a kue mai na alii Kapena a me Smith.
            A i ka makaukau ana o ka hale e koho, olelo mai ka luna hoole o Lahaina, aole loa e hiki ke hooholoia ka hoololi, no ka mea, ua kue ia i ke Kumukanawai. Hoihoi ke alii Kapena i ka hoololi.
            Ninauia ka hoopanee loa, a ae ia. He 14 kue, a he 25 ae.
            Hoopanee ka hale, a halawai hou i ka la apopo, hora 1 P M.

LA HANA 24.— Poaono Mei 27,

                Halawai ka Hale ma ka hora 10 A. M.
            Mamua o ka apono ana i ka moolelo, ua hapaiia ka noonoo hou ana i ka olelo hooholo a ke alii Kapena Roke.

HELUHELUIA NA HOOPII A WAIHOIA.

                Na Mr. Kalaukoa mai Honolulu, aole e hooiia na haawina mamua o na hana. Ua hoopanee loa ia. Nana no, aole e hookaawaleia i puu dala no ka Hoopaa Lima Hahana. Waihoia ma ka papa.