Ka Nupepa Kuokoa, Volume XV, Number 27, 1 July 1876 — Page 1
NUPEPA KUOKOA :
KE KILOHANA POOKELA NO KA LAHUI HAWAII.
BUKE XV. HELU 27. HONOLULU, POAONO, IULAI 1, 1876. NA HELU A PAU 761.
MAIKAI KA HOI KA PAPA !
— A ME —
Ka Laau o kou Hale ! No Hea la ?
KA I NO HOI NO KAHI O WAILA MA ! Nana aku no hoi ia la, OHI KA IO O KA LAAU O MAKAWAO, i ka ua mea o ka nani o Na Papa, Na Laau A ME NA PONO KUKULU HALE O NA ANO NO A PAU, MA KE KIHI O Na ALANUI PAPU a me MOIWAHINE, Honolulu MALAILA E LOAA AI E LIKE ME KA makemake, no ke Kumukuai makeponoloa. PAPA, PAPA, PAPA Na PAPA huluhulu, Na PAPA manoanoa, Na PAPA i kahiia, Na PAPA kepa, PAPA holo keokeo, PAPA holo ulaula. NA LAAU! LAAU! NA KUA. NA KAOLA, AAHO, MOLINA, PEAPEA, PINE HULUHULU, PINE I KAHIIA, Na Papa a me na Laau Ulaula ! PILI ULAULA PILI KEOKEO, PANI PUKA, PANI PUKA ANIANI IPUKA ANIANI, OLEPELEPE. PENA O NA ANO A Pau Hulu Pena mai ka liilii a ka nui ! AILA PENA ! AILA HOOMALOO, WANIKI, PATE NA LAKO o kela a me keia ano. NA AMI-PUKA HALE, NA AMI-PUKA PA. ANIANI ! Pepa Hale me na lihilihi E LOAA NO MALAILA KA PAAKAI Helu 1, O KAKAAKO a me PUULOA No ke Dala kuike, e loaa no na mea a pau i haiia ae la no ke kumukuai emi loa.
O na kauoha a pau mai Hawaii a Niihau, e loaa'ku ana ia lakou, e hooko koke ia mai ana no ia me ka lawa pono.
E kipa nui ilaila, i ike i ka oiaio
749 3m 760
HE
IWAKALUA TAUSANI LEGUE
MALALO O KE KAI !
— NA MEA —
KUPANAHA O KA MOANA !
KE ALA O KA MEA HUNA,
— A O KA MEA —
POHIHIHI O KA 1866 !
MAHELE 1.
MOKUNA XIV.
KA PALAPALA POLOAI.
" I KO'U wa i kono aku ai ia oe e hele i ka uhai holoholona iloko o kuu mau ululaau o lalo o ka moana, ma Keresepo, manao paha oe ua hehena au ia wa, a ua lalau ko'u noonoo. Ina pela kou manao ana, mai noonoo kuhihewa oe no ke ano o ua kanaka la."
" E ke Kapena e manaoio mai i ka'u —"
" E oluolu oe e hoolohe mai, a e ike auanei oe ina he kumu kekahi e hoahewa mai ai oe ia'u,"
" Ke ae nei au e hoolohe aku."
" E ke Kumu, ua maopopo ia oe, he hiki no i ke kanaka ke ola malalo o na wai, ina ua lawa oia i na mea kupono, nona e hanu ai, a ke lawe pu hoi oia i ua mau mea la me ia. Ma ia ano no i hana ai au. I ka hana ana malalo o ka moana, ua komo ke kanaka i kapa holopuni nona, me ka papale metala ma kona poo, a o kona ea e hanu ai, ua hookomo ia iloko mai luna mai me kekahi pauma, a me na mea nana e hooponokono i ko holo ana o ke ea a me ka hele ana."
" Ae, oia ke kapa luu ;" pahi a'u.
" Pela no ; aka nae, malalo o na kapa o ia ano, aole e hiki i ke kanaka ke hele lanakila ; ua hoopaa ia oia i ka pauma me kekahi ha laholio, kahi o ke ea e holo aku ai i kona kino ; a ina pela ko kakou ano e hoopaa ia'i i ka Nautilo, aole e hiki ia kakou ke hele no kahi loihi."
Ninau aku la au, "a pehea e hiki ai ia kakou ke hele lanakila ?"
" O ke kapa luu Roukuairola, i hanaia ai e na kanaka elua o ko aina hanau, oia ka'u i lawe mai ai a hooponopono hou i kapa luu no'u iho, a no ka'u mau mea i makemake ai no ka'u hana ; a oia auanei ka'u e haawi aku ai ia oe, i mea nou e komo ae ai iloko o ke ao hou i kamaaina mua ole ia oe ; a oiai oe e hele ana malalo o ia kapa luu, aole he wahi o kou kino e loohia i ka poino. No ka mea, o kona mau mea i hanaia'i, he pahu hao ea manoanoa kahi a'u i hoahu ai i ke ea nona ke kaumaha o ke kaomi ana o na ea he kanalima. Ua hoopaa ia keia pahu ea ma ke kua me ka haawe ai ma ke kua o ke kanaka koa hele i ke kaua.
Ma kona aoao maluna, ua hana ia he wahi pahu, malaila i malamaia'i ke ea, e kekahi mau u-pa makani, a nolaila, aole he ea e puka wale mai iwaho, ke ole e hoohana ia ma kona ano mau. O ke kapa luu Roukuairola e like me ka makou e komo nei, aia maloko ona elua mau paipu laholio, mai keia paha ea aku ko laua holo ana, a hui pu me ke kau wahi pale lole ka mea e hoopaa ai i ka waha a me ka ihu ; hookahi he mea nana e hookomo mai i ke ea hou maemae ole a na ke elelo e hoopaa i kekahi, a me kekahi, e like me ka makemake o ka mea e hanu ana. Iloko o ko'u alo ana i na ea kaumaha o ka papaku o ka moana, he papale keleawe poepoe ka mea pale i kuu poo, a maloko o keia pale keleawe na paipu ea elua, ka mea nana e hanai, a me ka mea hoopaa."
(Aole i pau.)
[ No ko makou pilikia i keia pule, nolaila, ua uuku na mea i unuhiia no ka kakou Moolelo ; a no ko makou manao ua lawa oukou no keia mau la, ke haawi aku nei no makou, aohe minamina no ka uuku, aka, makemake no e hoolawa like ia kakou a pau.— L. H].
Na Mea Hou o Kona Hema.
E KA LUNAHOOPONOPONO, Aloha oe :—
He wahi ukana hauoli ka'u e hooili aku nei ia oe, e ke kukini mama o ka Pae Aina Hawaii nei ; ke oluolu oe. Ma ke Sabati la 7 o keia malama i ka hoomaka ana o ka pule nui awakea, hoomaka aku la ka moe o kekahi kaikamuhine o Kaaumoana kona inoa. I ka haiolelo ana o ke kahunapule a pau hookuu ka halawai, ala mai la kona hiamoe a hoomaka'la ia e ku, kikiwi oia a ku ke poo i ka pale o hope o ka noho. Nona paha ka mea i olelo ia he kanono ke pao ae. Eha hina ana ua leleliilii ka papale i kahi e, a ua kii mai kona kaikuaana e kokua ia ia.
— Ma ia la no pau mai la kekahi hale i ke ahi, he hale hou o ka paa ana iho no ia. E wehe iki aku i ka moolelo o ka mea nana i puhi ; he wahi keiki uuku no, malalo paha o eono makahiki. I ka wa a na makua i pii ai i ka ai a iho mai kahumu a kalua ka umu iho na makua i ka auau. I ka hoi ana mai o na makua a nana mai i ka hale e pu a ana kauwahi i kahi o ka umu ; i nana mai ka hana e kolekole aku ana ka noa. Ua pau kauwewe i ha huaiia. " Ea ku i ka olioli na moku. Mai laila mai no ka hoomaka ana a hiki i ua la Sabati nei, hana io ka haole. Eia ka mea apiki ; puhi aku nei ua wahi keiki nei i ka hale a a aohe kii aku i na makua e hoala aole no hoi he holo o ua wahi keiki nei, ku malie no i kahi hookahi. Na kekahi poe i hele mai a hoala. Ka ! Mai pau peapea i ke ahi.
— I ka Poakahi ae a ma ia po, naue aku la kekahi mau elemakule i ke kamokoi upapalu a ua nui no na wa i loaa mua ia laua. Aka, mahope iho o io manawa, apo iho la i kekahi elemakule ka i-a nui. Ua kaualako ia oia e ua i-a nei a kokoke e haule i ka pali me kona hapapa ae mahope i wahi e paa'i, aole nae e hiki. Ua lilo aku ke komokoi mai kona lima'ku ; ua nalowale ke komokoi a hiki i keia la a'u e kakau nei. Ua manao ia ina e paa loa ke komokoi ina ua make. O ka inoa o keia wahi elemakule o Kahala. Nolaila, ke hoolana aku nei au ina elemakule mai hoomahui e hele i ka po. E papapau auanei he aa ko ka hale.
Z. P. KALOKUOKAMAILE.
Napoopoo S Kona Hawaii Mei 22 1876.
Ke Kau Ahaolelo o M. H. 1876.
LA HANA 44.— Poaha Iune 22.
Hoomaka na hana e like me ka mau.
HOIKE A NA KOMITE WAE.
Hoike mai ke Komite Wae no ka noonoo ana i ka bila e pili ana no ka maluhia o ka la koho balota, a waiho mai he pakui mahope o ka bila. Hoihoi hou ia ka hoike e hooponopono me ka pakui o ka bila.
Heluhelu mua mai ke'lii Kamika he bila e huikala aku ai i ke Kuhina Waiwai. Waihoia no ka heluhelu alua. Heluhelu mai o Mr Mahoe he olelo hooholo, e auaia ka mokuahi Kilauea a pau pono ka hana a ke Komite no ka nana ana i na mai lepera, alaila haalele ia Kalawao.
Hoololi mai o Mr Aholo, e haalele ke Kilauea ia Honolulu ma ka hora 9 o ke ahiahi o ka Poalima, a e ku hou ma Honolulu i ke ahiahi o ka la Sabati, ua hooholo ia ka olelo hooholo me ka hoololi.
Ma ke noi, ua kapaeia na rula, a heluhelu mai o Mr Mahoe he mau hoopii. 1 I Lunamakaainana okoa no Hilo Akau. Waihoia i ke Komite Wae no ka noonoo ana i ka bila e hoololi ai i ka pauku 780 o ke Kanawai Kivila e pili ana no ka hoomahuahua ana i na Lunamakaainana. 2 I Luna auhau okoa no Hilo Akau. Waiho ia i ke Komite Waiwai. 3 I Luna helu okoa no Hilo Akau. Waihoia i ke Komite Waiwai.
Hoolaha mi o Barenaba he bila e hoololi ai i ka uku o na kumukula.
Heluhelu mai o Mr Nahaku he olelo hooholo i $600 no ka lawe leta mai Kaanapali a i Waihee. Waihoia a noonoo pu me ka bila haawina.
Nana no he olelo hooholo i $800 no ke alanui pali mai Honokohau a hiki aku i Waihee. Waihoia a noonoo pu ma ka bila haawina.
Heluhelu mai o Mr Kahuila he olelo hooholo i $2,000 no na hawai no ke kulanakauhale o Waiohinu ma Kau.
Heluhelu mai o Mr Kalaukoa e holo pu o Kahui i kauka kanaka no ka nana ana i na lepera. Ae ia.
NA HANA O KA LA.
Hapaiia ka noonoo ana no ka bila e hoololi ai i ka pauku 1419 o ke kanawai kivila ma ka heluhelu alua ana. Waiho ia i ke komite wae ka noonoo ana i na bila oia ano.
Hapaiia ka noonoo ana no ka bila e hoololi ai i ke kanawai e hoohaiki ana i ka lawe ana a me ke kuai ana i ka opiuma, i apono ia ma ka M. H. 1874, ma kona heluhelu alua ana. Waiho ia no ke kakau poepoe.
Hapaiia ka noonoo ana no ka bila e hoololi ai i ke kanawai e hoololi ai i ka pauku 1423 o ke kanawai kivila i aponoia ma ka la 29 o Iulai 1872 ma kona heluhelu alua. Waihoia no i kela komite wae mai.
Hapaiia ka noonoo ana no ka bila e hooponopono ai i na kai lawaia ma kona heluhelu alua ana.
Kamailio mai ke'lii Kaai ma ka aoao koe i ka bila, a ua hoopanee loa ia.
Kamailio mai hoi Mr Waterhouse ma ka aoao kokua i ka bila. Ma ka ninau ia ana, ua kakau ia na ae a me na hoole. Eia ka poe ma ka aoao hoopanee loa i ka bila : Dominis, Kanoa, Kapena, Green, Moehonua, Walker, W. R. Kakela, Kuihelani, Waila, Kahanu, Moanauli, Martini, Ake, Paulo, Kamauoha, Halstead, Gay, Preston, he 18. Eia ka poe aloha i na makaainana a e kokua ana i ka bila, Kahuila, Kaiue, Kanealii, Pilipo, Kauai, Birch, Naili, Helekunihi, Barenaba, Kalaukoa, Aiwohi, Nawahi, Halemanu, Mahoe, Waterhouse, Nahaku, Wana, Naukana, Nakaleka, Mahelona, Kaina. Mahope o ka pau ana o ke koho ana, ua hoohui mai o Kaai ma ka aoao hoole loa i ka hoopanee loa, huiia he 22. Nolaila ua hoole ia ka hoopanee loa i ka ninau ia ana no ka hooholo loa i ka bila no ke kakau poepoe ana, ua hooholoia.
Hapaiia ka bila e hoomana ai i ke Kuikahi Panailike. Kamailio mai ke Kuhina o ko na aina e, a noi no e ninau ano Hoopaapaa ka Hale, a noiia mai e Hoopanee ka Hale.
LA HANA 45 — Poalima, Iune 23.
Halawai ka Hale i ka hora. 1 P M.
NA OLELO HOOHOLO A ME NA BILA.
Heluhelu mua mai o Mr Kanealii he bila e mahele ai i ka wai ma ka Apana o Wailuku. Waihoia no ka heluhelu aula ana.
Heluhelu mai o Mr Kalaukoa he olelo hooholo. E halawai ka Hale Ahaolelo ma keia hope aku, i ka hora 10 kakahiaka, me ka hoomaha ma ka hora 12, a hoomaka hou ma ka hora 1 auina la. Hooholoia.
Hoolaha mai o Mr Naili he bila e hoololi ai i ka pauku 6 a me 7 o ke kanawai i aponoia ma ka la 23 o Augate 1862.
Heluhelu mai o Mr Kanealii he olelohooholo, e kauoha ana i ke Kuhina Waiwai, e waiho mai i ka Bila Haawina imua o keia Hale ma ka Poakahi.
Kamailio mai ke Kuhina Waiwai, e lawe mai ana oia imua o ka Hale i ka Poalua, ke makaukau.
Hoolaha mai o Mr Naili, he hoololi no ka pauku 53 o ke Kumukanawai.
Ma ke noi, ua kapaeia na rula, a heluhelu mai o Mr Mahoe he hoopii mai Hilo mai, i $600 no ka Lunakanawai Apana o Hilo Akau, ke hooholoia ka bila.
Heluhelu mua mai o Mr Kanealii he bila e hookuu aku ai i ka auhau kino o na makua i hanau mai i na keiki eha, a e ola akoakoa ana. Waihoia no ka heluhelu alua.
Heluhelu mai o Mr Barenaba he olelo hooholo, e kauoha ana i ke Kakauolelo, e haawi mai ma ka lima o ke Komite e holo ana i Kalawao, i ka palapala hoopii a na mai lepera. Hooholoia.
Heluhelu mua mai o Mr Birch he bila e hoololi ai i ka pauku 112 o ke kanawai e pili ana i ka hooiaio ana i na olelo aelike mawaena o na haku me ke kauwa hana. Waihoia no ka heluhelu alua.
Heluhelu hoa mai no ia no ka manawa mua he bila e pili ana no ka hoomalu ana i na ululaau. Waihoia no ka heluhelu alua ana.
Hoolaha mai ke'lii Waila i ke Komite no ka holo ana i Kalawao e haalele ana ka mokuahi ia Honolulu nei i ka hora 9 o ke ia ahiahi.
Ma ke noi ua hookaaia o Messrs Kaina a me Martin mai ke Komite aku no Kalawao a pakui ia o Mr Mahoe a me ke Kiaaina Kanoa.
Heluhelu mai o Mr Kahuila he olelo hooholo i $2000 no na alanui a me na alahaka o Kau, Hawaii,
NA H ANA O KA LA.
Hapaiia ka noonoo ana no ka hoopii a ke Kuhina o ko na aina e i ka Peresidena i kana olelo hooholo e kue ana i ke noi " e ninau ano."
Mahope o ka noonoo nui ia ana, ua hoohewaia ka olelo hooholo a ka noho.
Ninauia ka hooholo loa ana i ka bila e hookoia ai ke Kuikahi -Hooholoia.
Hapaiia ka noonoo ana no ka hoike a ka hapa nui a me hapa uuku o ke Komite Hoonaauao e pili ana i na hoopii lehulehu wale. Oiai e hoopaapaa ana, hoopanee iho la ka ahaolelo a halawai hou i ka hora 10 A M o ka Poakahi.
LA HANA 40 — Poakahi Iune 26.
Halawai ka Hale ma ka hora 10 A M.
Heluhelu mai o Mr Kauai he hoopii no Waimea, e noi ana e hooholo ia ke Kuikahi. Waihoia ma ka papa.
Waiho mai o Mr Barenaba he olelo hooholo, e hookaawale ia i $3,000 no ka palekai o Waiahole. Waihoia a noonoo pu me ka Bila Haawina.
Ku mai o Mr Waterhouse no kekahi mea pilikino, oiai ua hoolaha ia ma ka nupepa haole, P C Advertiser o ka Poaono i hala malalo o ka mana paha o ke Kuhina Waiwai, ua koho au ma ka aoao kue i ke Kuikahi, ke hai aku nei au, aole.
Hoole mai ke Kuhina Waiwai, aole nana ia Waiho mai o Mr Wana he olelo hooholo e hookaawaleia i $300 no ke kao ma Ka lihiwai, Kauai. Waihoia a hiki mai ka bila haawina.
Waiho mai o Mr Helekunihi he olelo hooholo e hiki e mai na hoa i ka hora 10 A M Hooleia.
Waiho mai o Mr Nahaku he olelo hooholo, e noonooia ka Bila Haawina ma na la a pau mahope aku o keia la.
Oiai e hoopaapaa ana, ua
HAPAIIA NA HANA O KA LA.
Oia ka noonoo ana i na hoike a ka hapa nui a me ka hapa uuku a ke Komite Hoonaauao me na bila Kanawai e pili ana i ka oihana hoonaauao, iloko o ke komite o ka Hale. Nahaku ma ka noho.
Oiai e hoopaapaaia ana, hoomaha ka Hale i ka hora 12 awakea, a hoomaka hou i ka hora 1 auina la.
Mahope o ka hoopaapaa loihi ana, ua hoopauia ke Komite, a hooholoia ka hoike a ka hapa uuku o ke Komite.
Hoopanee ka Hale.
LA HANA 47.— Poaha, Iune 27.
Halawai ka ahaolelo i ka hora 10 A. M.
Hoolaha mai o Mr Aholo he bila e hoololi ai i ka pauku 913 o ke Kivila.
Waiho mai o Birch he olelo hoohola, e hoopaa ana i ka wa halawai o ka Hale, i ka hora 10 A M. me ka hoomaha i ka hora 12 awakea, a hoomaka hou i ka hora 1 P M. a aole hoi e hoopanee mamua o ka hora 5 o ke ahiahi.
Ma ke noi, ua hooholoia ka olelo hooholo, me ka hoole ia hope o ka olelo hooholo.
Hoolaha mai o Mr Kauai he bila e hoololi ai i ka pauku 3 mokuna 50 o ke Karaima.
Waiho mai o Mr Halstead he olelo hooholo, e kauohaia ke Kuhina Waiwai, e hookomo iloko o ka Bila Haawina, i $10,000, i uku no ke kauka lapaau e hoonohoia ai ma Kalawao, no na makahiki elua.
Mahope o ka hoopaapaaia ana, ua waiho ia ka olelo hooholo, a laweia mai ka bila o ia ano.
Heluhelu mua mai ke Kuhina Waiwai i ka bila Haawina o na makahiki elua e hele nei, no ka huina i hiki aku i ka $1,223,979.79. Kauohaia e pai.
Hoomaha ka Hale i ka hora 12 awakea.
Hora 1 auina la, hoomaka hou na hana.
Waiho mai ka Noho i ka palapala kono a ka Lunahoomalu E P Adams o ke Komite Hooponopono o na hana o ka la 4 o Iulai, i na hoa o ka Ahaolelo, no na hana ma Kawaiahao, i ka hora 11 A. M. a me ka ahaina ma Kehehuna i ka hora 3 auina la.
Ma ke noi, ua kohoia o Green, Castle, Birch, Halemanu a me Barenaba i Komite e pane aku ai i ko ka Hale ae ana.
Heluhelu mua mai la o Mr Naili i kana hoololi i manao ai no ka pauku 58 o ke Kumukanawai. Hoopanee loa ia.
Waiho mai o Mr Helekunihi he olelo hooholo, e hoounaia i na hoa pakahi o keia kau, i hookahi Buke Kanawai o keia Kau, i hookahi Kivila i hooponopono hou ia, a i hookahi buke o na olelo hooholo o ka Aha Kiekie, Ae ia.
Me ke kapaeia ana o na rula, ua ae ia o Mr Kalaukoa e heluhelu mai he hoopii na kanakolu poe, e noi mai ana i $1,000 no ko lakou hana ana i ke Alanui Kula a hiki i ke Alanui Liliha. Waihoia i ke Komite Wae — Pilipo, Kalaukoa, W. R. Kakela, Kaai, Aholo, na lakou e noonoo.
NA HANA O KA LA.
Heluhelu alua ia ka bila e hoololi ai i ka pauku 1, mokuna 41 o he Karaima, e papa ana i ke kuai ana i ka waiona a me ka lawe ae i ka huaolelo " kanaka maoli," a e hookomo malaila " na kanaka kupa."
Mahope o ka hoopaapaaia ana, ua hoopauia ke Komite, a ua hooholoia ka bila me ka lilo i kanawai, mahope aku o Mei, M H 1877. Waihoia no ka heluhelu akolu.
Heluhelu alua ia ka bila e hookuu ana i ke dute maluna o kahi mau waiwai komo mai, a hoopanee loa ia.
Heluhelu alua ia ka bila e hoololi ai i ka pauku 239 o ke Kivila, a waihoia i ke Komite wae Birch, Mahoe, Waterhouse, Kalaukoa, Preston.
Heluhelu alua ia ka bila e laikini ana i ka Banako, a waihoia i ke Komite Wae.
Hoopanee ka Hale.
LA HANA 48.— Poakolu, Iune 28.
Heluhelu mua mai o Mr Aholo he bila e hoololi ai i ka pauku 913 o ke Kivila. Ua waihoia no ka heluhelu alua.
Heluhelu mua mai o Mr Kanealii he bila e hoololi ai i ka pauku 57 o ke Kivila, e hooemi ana i ka laikini Halekuai, a i ka $2 no kela a me keia $200. kumu waiwai, a i $10. no kela ame keia $1,000 kumu waiwai. Waihoia no ka heluhelu alua.
Hoolaha mai o Mr Naili he bila e hoololi ai i na pauku 118, 119 & 120 o ke Kivila, i hoololiia a aponoia i Iune 22, 1868.
Heluhelu mua mai o Mr Kanealii he bila e hoololi ai i ka pauku 174 o ke Kivila. Waihoia no ka heluhelu alua.
Waiho mai o Mr Pilipo he olelo hooholo, e hoolakoia mai keia Hale me 5 paona hau i na la a pau e noho ai ka Hale. Hoololiia mai i 10 paona. Ninauia a hooholoia ka olelo hooholo, e like me ia i hoololiia.
Waiho mai o Mr Barenaba he olelo hooholo, e hoolako mai ka Makai o ka Hale me na poo leta 100 elua keneti pakahi i na hoa. Hoololiia mai i 50 poo leta. Hooholoia ka olelo hooholo pela.
Ma ke noi, ua hapaiia
NA HANA O KA LA.
Oia ka heluhelu alua ana i ka bila e laikini ai i na Hui Panihakahaka a me na Agena e uku i laikini $250 o ka Makahiki. Waihoia i ke Komite Wae : Walker, Isenberg, Kaai, Green, Waterhouse.
Heluhelu aluaia ka bila e hoololi ai i ka pauku 233 o ke Kivila. Hooholoia ka bila e kakau poepoe me ka hoololi a ke Komite o na Aha Hookolokolo i waiho mai ai.
Hoomaha ka Hale i ka hora 12 A M, a hoomaka hou i ka hora 1 auina la.
Heluhelu aluaia ka bila kanawai e hoopau loa ana i ka hapa hope o ka pauku 1 o ka mokuna 34 o ke Kanawai Karaima, e pili ana i ka hoopai maluna o na kanaka ona, a me ka noonoo ana i ka hoike a ke Komite Wae ma ia kanawai. Hooholoia me kekahi mau hoololi e kakau poepoe.
Heluhelu elua ana o ke kanawai hooulu lahui. Hoopanee loa ia.
Ka heluhelu elua ana o ke kanawai e hoololi ai i ka pauku 7 o ke Kanawai i aponoia i ka la 18 o Feb. 1859, e pili ana i na pa aina. Hoopanee loa ia.
Ka heluhelu elua ana o ke kanawai e hoopau loa ai i ke kanawai hookamakama. Waihoia i ke Komite Wae, Messrs Birch, Kaai, Halemanu, Kanealii a me Ake.
Noi mai o Mr Pilipo e hapai hou ia ka noonoo ana i ke kanawai e hoololi ai i ka pauku 1 mokuna 41 o ke Kanawai Karaima, e pili ana i ka haawi ana i ka waiona i na kanaka Hawaii, i hooholoia i nehinehi. Hooleia he 22 hoole a he 16 ae.
Heluhelu elua ana i ke kanawai e hoololi ai i ka pauku 2 o ka mokuna 10 o ke Kanawai Karaima, e pili ana i ka hoopaahao hewa. Hoopanee loa ia. Ka heluhelu elua ana o ka hoololi i manao ia o ka pauku 45 o ke Kumukanawai, a koho okoa na'lii a e koho okoa na lunamakaainana e noho ana maloko o ka Ahaolelo. Hoopanee loa ia.
Ka heluhelu alua ana o ke kanawai e hooponopono a e hoolawa ai i na ano lapaau me na laau. Waihoia i ke Komite Wae nana e noonoo nei na kanawai oia ano. Hoopanee ka Hale.