Ka Nupepa Kuokoa, Volume XV, Number 27, 1 July 1876 — Page 4
KA NUPEPA KUOKOA, ME KE AU OKOA I HUIIA.
AFTER TOIL COMETH REST.
Pase Diamonds p 114.
1 He wahi hoomaha ma o ma ka lani
No koonei poe luhi a kaumaha e,
He home i hoolakoia a nani
No koonei poe ikaika a hana maikai
Cho — Ma o ae (ma o ae) e maha'i (e maha'i)
Ma o ae (ma o ae) e maha'i, e maha'i,
Ma ke ao, ke ao o ka poe maikai,
Ma o ae, oia o ae e maha'i.
2 He wahi hoomaha ke pau nae ka hana.
Ka hana ma kahi e auwana nei ;
Ka hana no nei, e kokua a hooana
I koonei poe hune, luuluu a uwe.
Cho.— Ma o ae, &c.
3 E hoonaauao i na kaikamahine,
E hapai iluna i na kini kulou,
E hooluolu i na kumakena,
E hooauhee ae i na ao pouli no.
Cho.— Ma o ae, &c.
4 Mai hele a uu a ane pauaho,
A ake e pau koke koonei luuluu ;
E ao a e kuhi i o i ke ola
I koonei poe ui, i koonei poe hou.
Cho.— Ma o ae, &c.
5 Ua lohi anei, e na hoa aloha
No ko kakou imi ikaika ana'e ?
E oli hoolana, e ia'e ka hoomaha,
Hoomaha a maha, e kula hou ae.
Cho.— Ma o ae, &c.
HAWAII.
HAAWINA KULA SABATI.
HELU 3. SABATI, IULAI, 16.
KUMUHANA — Ka luakini o Solomona. PAUKU BAIBALA — II Oih. 'Lii 3 : 1 — 17
HOOMAKA iho la o Solomona e kapili i ka hale o Iehova ma Ierusalema, ma ka mauna o Moria, ma kahi i ikeia mai ai oia e Davida, kona makuakane, ma kahi a Davida i hoomakaukau ai i kahi hehi palaoa o Orenana ka Iebusa.
2 Hoomaka iho la oia e kapili hale, i ka makahiki eha o kona noho alii ana, i ka malama elua, a i ka la elua o ia malama.
3 Eia ka hookumu ana o ka hale o ke Akua a Solomona i kukulu ai : o na kubita o ka loa e like me ke ana mua ana he kanaoao kubita, a o ka laula he iwakalua kubita.
4 A o ka loa o ka lanai ma ke ala, ua like ia me ka laula o ka hale he iwakalua kubita, a o kona kiekie hookahi haneri kubita a me ka iwakalua, a uhi iho la oia ia mea maloko me he gula maemae.
5 A o ka hale nui, kapili no ia i ka laau paina, a uhi iho la i ke gula maikai, hoonoho iho la maluna olaila i na lala loulu i kalaiia a me na kaula.
6 A hoonaniia ka hale i na pohaku maikai a me ke gula, i ke gula o Parevaima.
7 A uhi no hoi ia i ka hale, i na kaola, a me na paepae, a me na paona, a me kona mau puka i ke gula, a kalai oia i na kerubima maluna o na pa.
8 Hana iho la oia i ka hale hoano loa, o ka loa ua like pu ia me ka laula o ka hale, he iwakalua kubita, a o kona laula he iwakalua kubita, a uhi iho la oia ia mea i ke gula maemae eono haneri talena.
9 A o na kui ma ke kaupaona ana he kanalima sekela gula ; a uhi iho la oia i na keena maluna i ke gula.
10 A iloko o ka hale hoano loa, hana iho la oia i na kerubima elua, mamuli o ka hana kalai kii, a uhi iho la oia ia mau mea i ke gula.
11 O na eheu o na kerubima he iwakalua kubita ka loa ; o ke eheu o kekahi elima kulala e pa aaa ma ka paia o ka hale ; a o ka eheu o kekahi elima no kubita e pa ana i ka eheu o kela kerubima.
12 O ka eheu o kekahi kerubima elima no kubita e pa ana ma ka paia o ka hale ; a o ka eheu o kekahi elima no kubita e pa ana i ka eheu o kela kerubima.
13 O na eheu o keia mau kerubima i hoholaia he iwakalua kubita ; a ku laua ma ko laua mau waewae, a maloko ko laua alo.
14 Hana iho la ia i ka paku lole uli, a me ka ulaula ahiahia, a me ka ulaula maoli, a me ka lole pulupulu maikai, a hana iho la oia i na kerubima maluna ona.
15 Hana iho la oia no ke alo o ka hale i na kia elua he kanakolukumamalima kubita ka loa, a o ka papale maluna o kona poo elima kubita.
16 Hana iho la no hoi oia i na kaula iloko o kahi lae, a kau maluna o na poo o na kia, a hana no hoi ia i na pomegerane hookahi haneri, a kau aku maluna o ua mau kaula la.
17 Kukulu iho la oia i na kia ma ke alo o ka luakini ma ka aoao akau kekahi, a ma ka aoao hema kekahi ; a kapa aku la ia i ka inoa o ka mea ma ka akau o Iakina, a i ka inoa o ka mea ma ka hema o Boaza. Pauku hoopaa. 1 Na Lii 6 : 11 — 13, Mele,— Him. 401 8 — 7 — 4. Leo.
2 Hele mai i kona hale,
Kona luakini nei,
E hoolohe i kana olelo,
Ka olelo e ola'i ;
Noonoo pono
I ko Iehova kanawai.
3 Noho me ka weliweli,
Hopohopo na naau —
Eia ko Iehova maka,
E kau pono ana no,
E haalulu,
Huli mai i ola mau.
Pule no na luakini i lako na wahi i nele, i hoopihaia, i hoolohe pono kanaka, kamalii i na olelo e ola'i, &c.
NA NINAU A NA KUMU.
P 1. Hoomaka Koke anei Solomona e kukulu i ka luakini ? 1 Na'lii 2, 4, 5. Nui na hana mamua, kona mare ana me ke kaikamahine a Parao ke lii o Aigupita, ke kukulu ana i hale nona, a nona iho, ka hoopaa ana i ka pa o Ierusalema a puni, ka hooponopono ana iwaena o na wahine elua no ke keiki i make, ka hoomahuahua ana me ka hoomalu pono ana i kona aupuni mai ke Kai-waena-honua ma ke komohana, a i ka muliwai o Euperate ma ka hikina, ka hooponopono ana i kona mau luna, ka palapala ana ia Harama ke lii o Turo e kokua ia ia i ke kukulu ana i hale no Iehova. Mahea i kukuluia'i keia hale ? Owai ka i hele ia mauna mamua ? Kin. 22 : 2, 14 Owai mahope ka i ike ia wahi ? 2 Som. 24 : 18.
P 2. I ka makahiki ehia o ko Solomona alii ana i hoomaka'i oia e kukulu i ka hale o Iehova ? Ma ka malama ehia ? Owai ka inoa oia malama ? 1 Na'lii 6 : 1. Ehia makahiki mamua o ko Iesu puka ana mai ? Heaha ka hale o Iehova mamua ? He hale lole ea.
P 3. Ehia kubita ka loa, ehia ka laula O keia hale ? Pehea ka loa a me ka laula o ka hale lole ? He hapalua ia o keia, 1 kubita = 1 1/2 kapuai
P 4. Ka loa ke kiekie o ka lanai, ehia kubita ? ka laula ? 1 Na'lii 6.3.
P 5. Ka hale nui, oia ke keena hoano mawaena o ka lanai a me ke keena hoano loa, 40 kubita kona loa, 20 kona laula. He mau laau paina o na aoao a uhiia i ke gula a he mau mea hoonani i kalaiia maluna.
P 6. Nohea ke gula i uhiia ka hale ? Aia la ihea Parevaima ? Pohihihi ea, ua like paha ia me Opisa. Na pohaku aha keia ? ka pohaku nani loa paha ma Hoikeana 21 : 19 — 21.
P 7. Pehea na kaola, na paepae, na pa, na puka ? Heaha ka i kalaiia maluna ? Na Kerubima, heaha ia ? he mau kii ano lua ole, he mau mea hoonani i ka hale.
P 8. Hale hoano loa, ke keena kapu elua ia kahi i komo ai ke kahuna nui wale no, hookahi komo ana i ka makahiki hookahi. Ua like ka loa me ka laula, oia hoi 20 kubita. Ua uhiia i ke aha ?
P 9. Pehea na kui ? Sekela gula, ehia dala ma ka Sekela hookahi ? 9 dala. Hookahi talena gula = 27,320 dala.
P 10. Heaha kekahi mau mea iloko o kahi hoano loa ? a uhiia i ke aha ?
P 11 — 13. Na eheu o na kerubima. E ka ana keia mau kerubima elua kekehi ma kekahi aoao, a o kekahi ma kekahi aoao o ka pahu berita. Eha eheu, palima kubita ka loa a na eheu 4 = 20 kubita oia hoi ka laula o ke keena hoano loa. E nana ana laua i ke alo, oia hoi e nana ana kekahi kerubima, i kekahi kerubima.
P 14. Ka pahu lole, heaha ke ano ? mahea hoi ? ma waena o na keena hoano elua, e like me Pukaana 26 : 31. He mau kii kona mau kerubima i kakauia ma ka lole. He mau kii i kalaiia na kerubima elua o ka pahu berita.
P 15 — 17. Elua kia. Nana 1 Na'Lii 7 ; 13 — 22. 2 Na'Lii 25 ; 16 — 18. Ieremia 52 ; 20 — 23. Ka hooponopono ana i like, 18 kubita ke kiekie o ke kino o ke kino o ke kia hookahi. Maluna'e o ke kino, ke poo, ka papale, na pomegerane, na mea hoonani, ua like paha ia me na kubita 9. A malalo he paepae, he kumu, he kahua kahi i ku ai ke kia, ua like paha ia me na kubita 8, 18 +9 + 8 = 35 kubita. A pela hoi ka loa o ke kia, owai na inoa o ua kia ? Iakina, Boaza. Kupaa — ikaika. Mahea laua i kukuluia'i ? He mea aha ? He mea hoonani paha. Nui na mea ano hoonani wale iho no e pili ana i keia luakini. Na ke Akua i kuhikuhi i kekahi mau mea, a na Solomona i noonoo i kekahi mau mea. Nui na mea a ke Akua i hana'i no ka hoonani wale iho no i ke ao nei, i mea hoike hoi i kona mana, kona aloha, ko.na nani.
Mele — Him. 407. 8 — 7.
1 Nani loa kou kauhale,
Eia Iehova kuu Moi ;
Iini wale kuu uhane
Me ke Lii e noho ai.
2 Pomaikai kou mau haipule
Ma kou hale malu nei ;
Nui ko lakou mahalo
I kou lokomaikai mai.
NA NINAU A KE KAHU.
Na makua. Heaha ka hana nui a Solomona i hana'i ? Nowai ka manao mua e kukulu i hale no Iehowa ? No keaha ko ke Akua ae ole ia Davida e kukulu ia hale ? Heaha ka ke Akua olelo hooluolu ia Davida ? Heaha ka Davida i hoomakaukau ai no ka hale o Iehova ? Heaha ka hana mua a Solomona, a mahope iho hoomaka e kukulu i ka hale o Iehova ? I ka makahiki ehia o kona alii ana i hoomaka'i oia e kukulu i keia hale ? Ehia makahiki mai ia Adamu a hiki ilaila ? Ehia makahiki mai ke kukulu ana o keia hale a hiki mai Iesu ? Ehia makahiki mai ke kukulu ana i ka halelewa ma ka waonahele a hiki i ka wa i hana ia'i ka luakini o Solomona ? Huli ikaika o ka mea i loaa, he naauao loia.
Na keiki. Mahea i kukulu ia'i ka luakiniki o Solomona ? Ma ka mauna o Moria, he pohaku paha ia. Nawai i kuhikuhi ia wahi ? Heaha ka Aberahama i hana'i malaila ? Heaha ko Davida i hana'i malaila ? no keaha kona mohai ana ? i oki ko ke Akua hoopai ana. A pehea oukuu e pakele ai i ko ae Akua hoopai ana ?
Hai mai i ka loa, me ka laula, i ka lanai, i na keena elua o ka luakini, 60 kubita ka loa, 20 kubita ka laula, 20 kubita ka laula o ka lanai, 10 kubita ka loa, oia hoi 10 kubita ma ke alo o ka hale mai ka hale aku, oia hoi 70 kubita ka loa o ka hale me ka lanai, 20 ka laula, lilo kubita ke kiekie o ka lanai, 40 kubita ka loa o ke keena hoano ; 20 ka laula, 20 kubita ka loa o ke keena hoano loa, 20 ka laula 30 paha kubita ke kiekie o ka hale. Ua uhiia ka hale i keaha ? Ehia kerubima makahi hoano loa ? Pehea ka loihi o na eheu ?
Na kia hoonani, hai mai i ke kiekie, ke anapuni, ka naai maluna, na inoa o laoa, ke ano.
He mau luakini anei ko oukou naau ? Pono ke hoopiha ia i keaha ? Heaha ka pauku hoopaa ? Hai like ke kula a pau.
Mele. Him. 404. 8 — Leo going home.
1 He pono no kakou maanei
Me Iesu pu e noho ai,
A lilo ko kakou naau
I luakini nona mau.
3 Hoike i kou nani mau
Ma keia luakini ou,
I pumehana na naau
Me ke aloha nui nou.
Pule i iho mai ka Uhane Hemolele iloko o ka luakini, a o kela, o keia naau.
HAAWINA KULA SABATI NO IULAI 23 1 Na'lii 8 : 5, 21 &c. HAWAII.
MAU MEA I ANOIIA.
E KA NUPEPA KUOKOA E ; Aloha oe :—
Nou ka welina maikai o ko'u manao, a me ka iini pau ole o ko'u puuwai e hue ae nei ia loko hana nui, oia ia e lia nei i ka po a me ke ao ; no ia mea, ke noi aku nei au i kou lokomaikai nui, e ae mai ia'u e hai aku i na mea i anoiia iwaena o ko makou noho ana, a kaulele mai na mea e ae. Ma ka A. D. 1866 a mamua ae hoi, ua hai aku au ia oe i na inoa o na Hawaii ma Wasinetona Terr. nei, aole huina o na make malaila ; ua lono aku la nae paha oe, ma na mea i loaa mai a lakou mai, malaila au e hai aku ai penei :
NA MEA PILI HAWAII.
No ka pili ana'ku o na Hawaii me na wahine kupa o keia aina, nolaila, ua loaa mai na lakou na hua makamae maikai, a kapa iho no i na inoa ma ko lakou aoao, oia hoi keia malalo nei : John Kahoohuli, M Kahananui, J W Davis, K J Kamaha, Kumano, Keola, Kaai, P. Wahiawa, Keawehaku, Keo. Misses A Akahi, Loe, A Kamahiai, A Aloha, M Waipio, Kini 1, Kini 2, Panaewa, Kilia, Alakai, Mereana, Kamokuhiwa, Maraea. Oia ae la na hua i loaa ia lakou no ka pili ana aku ilaila, no lakou, ka olelo hapa kanaka ana maanei.
Ma ka makahiki i hai ia maluna, 1866, ua hele auwana ahu au a hala na makahiki eiwa.
I o ianei au,
Ka pii'na i ke kuahiwi,
Ka iho'na i ke kuahiwi,
Na alu lua meki,
Kula ulu-laau.
Kahawai i auwai,
Hau oki o ka aina,
Mea ole ia i anei.
Ia hoi ana mai a Yeekalet nei, hui hou me kekahi mau hoa o'u, no'u no ke aloha ia lakou a uwe helu aku la. Aloha nui oukou.
O'u hoa naaua o ka mila,
O'u hoa i ka wela o ka la,
O'u hoa i ke anu o ka ua,
O'u hoa i ke hau oki o ka aina,
O'u hoa kalolia ai ole.
Ka hou o ka lae kau dala,
Pipili mai no mea a pau,
Ike ole iho oe o na hoa
Inea o ka noho ana.
Ninau aku au, auhea o mea ma a me mea ma, i mai lakou nei, o mea ma ua holo aku i ka aina e. A o mea ma ua hala aku i ke ala hoi ole mai. Ia manawa komo hou mai la no ia'u nei, ke aloha, a ke puana ae nei me ka menemene, a uwe helu aku la.
Auwe o'u hoa luhi,
Inea onei kahe,
Kakou i alo aku ai,
I ke kau me ka hooilo,
La wela ma ke koekoe,
Mau kuahiwi mauka,
Na ale huli lua makai,
Na pali laumania,
No kahawai liolio,
No ulu-laau loloa.
Ka muliwai kaieie,
Ka moana kai lipolipo,
Ko hohonu i ka ino.
Mea ole ia kakou
Ka pii'na me ka iho'na,
I ka loa me ka laula,
O Amerika Akau nei,
Ka aina puni ole Hikina,
Ka au aku a ko leta i ka moana,
Ku-ho-ku-ho i na ale o ka Pakika.
Pulu i ka ua kualau,
Ka lele mai a ka opua i ka lewa,
E ola ! E ola !! Kalani,
Kalani hooulu lahui ;
A kau i ka. puaneane,
E mau ! E mau !!
Kuu puka ana,
E ka Nupepa Kuokoa e,
A kanikoo a palalauhala.
J W D K. Yeekalet Wasinetona Terr. Apr. 1876.
HANAU.
Ma Yacoma Mill, Wasinetona Terr. Mar. 31, hanau o Kalohelanui, he kaikamahine na Akahi me Keawe.
MAKE.
Ma Yacoma Mill, Wasinetona Terr. Apr. 1, make o J M Kamakahiki, he hokii kona mai i make ai.
MAU MEA ANO HOU O NA KAPAKAI ANU NEI.
KA ULU-LAAU PAINA. KA LEO UALO.
E hele ana kekahi kanaka me kana pu ki manu, a ku iho la malalo o kekahi kumu laau paina, ike aku la ia he moa e kau ana ma ka lala laau, ki aku la a make. Anehe keia e kii aku i ka manu, ia manawa no i haule iho ai ka lala-laau a pa ma kona poo, a o kona make iho la no ia. Hele mai la hoi kekahi o kona hoa a ike iho la i keia kino make e waiho ana, pa-e mai la na leo mai na lala-laau mai, i mai la ia ia nei, e kuemi hope aku a kaawale mai ia wahi au e ku la, no ka mea, he wahi make no ia. Huli ae keia nana iluna, me ka manao e ike kino i ka mea nona ka leo, haule hou iho ana he lala-laau a ku ma kona umauma a make iho la ia. Hanu hele mai la hoi keia ilio a ike iho la i keia mau kino make e waiho ana, hanu loa aku la a ka moa, lawe mai la a waiho pu me na kino make, noke iho la i ka hae. Holo aku la a mua o kona kahu, me he mea la e hai aku ana i kana mea i ike ai, hoi mai la a kahi ana i ike mua ai, hae iho la. Hele mai la hoi ke kahu e ike i ka mea a ka ilio e hae nei ; hehe mai la ka akaaka iluna o na lala-laau. Hoomau no keia i ka hele a ku ana i ua kumu paina nei ; ike iho la i na kino make e waiho ana a me ka moa. Pa-e hou mai la na leo mai na lala-laau mai, e i mai ana ia ia nei, e huli aku oe i hope ma ke ala au i hele mai la, e wiki ; huli aku keia, a holo aku la. Pualu aku la na leo kahea mahope ona. E wiki oe ! E wiki oe !! E wiki oe !!! Wikiwiki aku keia i ka holo ku ia kona wawae i ka omuku laaau a hina aku la, ku kona maka i ka laau, a eia no ia ke hele maka hookahi nei.
KAMAAINA ME KA MALIHINI.
E holo ana kekahi waa mai Seattle aku, a kaalo ae mawaho o Nu Ioka Lae, ike aku la ke kamaaina he lio e au ana mamua aku o laua, i aku i ka malihini, hooiho ae ka waa o kaua i ka aina ; makemake au e ike i ke ano o kela lio wahi a ka malihini. I aku ai kona hoe, o kela lio he kupua no ia no nei kai ; ina e ike mai ia kaua o ka luu no ia a make kaua ma nei moana. O keaha ka mea e make ai wahi a ua malihini la ? He wiliau ikaika a he makani lauwili i o a ianei, a heaha kau hana ilaila ? lele aka ana no keia au ana i uka, a ku na wawae i kaha-one. I nana mai ka hana ua huli ka waha o ka waa ilalo, aole ua malihini nei, ua iho aku i ka opu ana ole o ka moana He kuli ka make, a he lohe ke ola. Kuli no ia a ua hala aku la.
KANAKA ME KA PIKA PIA.
E inu ana kekahi mea i ka pika pia ma ke alanui, hele mai hoi kekahi o kona hoa a peku aku ma ka lemu o ka pika pia, hina aku la ia a komo ka pia ma ka ihu, ma ka pepeiao ; ala mai la ia iluna e kihe ai, ike aku la ia i ka makai e hele mai ana, o ke ala ae la no ia, ku no holo ana. Hooho aku hoi kamalii mahope ona, Ona oe ! Ona oe !! Ona oe !!! a hina aku la ia. Hopa ke owau no ka hemahema.
MAKUA ME KE KEIKI HANAI WAHINE I-A KAI.
E holo ana kekahi waa mai P. Y. aku me ka manao i ka hale olo papa o Port D, a ma ka hapalua o ia wahi, i aku ke keiki i ka makua, hooiho ae ka waa o kaua i ka aina ; mai keia lae a kela lae ka pololei wahi a ka makua. I aku ke keiki, o kela aina mauka, o ko'u one hanau no ia, a ma keia kuono, he kupua, he wahine. Ina e lohe mai i ka kaua walaau, hoea mai a luu aku o ko kaua make no ia.
Ke aheahe nei ka makani ma kumu pali, ke poho pono la ka pea o laua i ka makani, ke kohakoha la ka ihu o ka waa i ka ale, hoea ana ua wahine nei mauka o lakou. Kahea aku la ua keiki nei ma ka lakou olelo e ola au. Lele aku la ua keiki nei haule i ke kai ; nana aku na makua nei ua hala loa i hope ; huli iho la ka waa ilalo ke alo, mimilo iho la ke au, mimilo pu ia'ku ua makua nei nalo. Lana ae la ka waa aia ka waha ilalo, au aku la ua keiki nei a kau ma ke kua o ka waa, hoea ana na wahine. Kahea aku ua keiki nei, e ola au ; pa mai la ka makani me ka ikaika, puhi ia'ku la ka waa a pae ana i ka honua, ku ae no keia holo ana. Oiai o ko ianei one hanau no ia.
KA HALE OLO PAPA ME WAHINEAEA.
Hele aku la o Wahineaea a ku iho la ma kahi e kakaa ana ka huila, hihia ae la kona wahi palule i ka nao a kaa ai ka mea ahai oka, wili pu ia'ku la a paa loa. Holo aku hoi o Kane e kokua ia ia, ua oki laua e pupue ana. Holo aku o Hakape a wehe ae i ka ili i kaa ai. Ina aole o Halape, ina ua poino kekahi o laua.
KANEHAUILA ME MARY.
E noho ana o Kanehailua me Mary kana wahi eva no na la pokole, hiki hope aku hoi o Eerena he hapa kanaka, a lilo mai ke kane a kela puukani mua, i ke ahiahi, hoomanao mai kela i ka poli pumehana o nei mea he kane, a hoa kaana hoi o na po anu o na aina a ke anu i noho ai ; i aku ke kane, e hele oe, ua loa ae nei ka'u wahine. Komo kino mai no kela, a hookuke ke kane. I mai kela, e like me kou hookuke ana mai nei ia'u, pela no hoi au e haalele aku ai ia oe a mau loa aku, mamuli oe ike i ka io o kau hana. I kekahi manawa ae, hele aku ia i ka hana i ka mila, loaa iho la i ka mai pupule a make aku la.
J. W. D. KALEHUANUI
Yeekalet, Wasinetona Terr Apr 1876
He wahi moolelo no Charles Petero Keliihoino Petero.
E KA NUPEPA KUOKOA E ; Aloha oe :—
E oluolu oe, a e ahonui hoi i ka hoike ana aku, i ka lawe ana aku o ka Mea Mana Loa, i kekahi o ka maua mau keiki i aloha nui ia, oia hoi Charles Petero Keliihoino Petero. Ua hanauia oia ma Honokaupu, Honolulu, ma ka la 8 o Feberuari, M H 1874, a haalele mai la ia makou i ka hora 8 A M., o ka la 5 o Mei, M H 1876 He keiki oia i aloha nuiia e maua kona mau makua, kona mau kupuna a me kona mau kini lehulehu wale, a me kona mau kaikuahine hanau mua, oia o Miss Kekelani Makulu a me Miss Helene Petero, a ke paiauma nei makou ma ke kae o ka luakupapau, no kona haalele ana mai ia makou, a hele aku la oia ma ka aoao mau o ka honua. Nolaila, " E hoomaikaiia ka inoa o Iehova ma na lani kiekie loa. He malu hoi ma ka honua, a he aloha no i kanaka." " A nana no i haawi mai, a nana no i lawe aku, a e hoomaikaiia kona inoa." Nolaila, ke hoike aku nei maua i ko maua aloha keiki, ma na wahi lalani kanikau malalo iho :
He kanikau aloha no Chas. P. Keliihoino,
Kuu keiki mai ka malu hau o Hopenui,
Aloha ia wahi a kakou luakaha ai,
Me ou kaikuahine hanau mua,
Kuu keiki mai ka wai huihui o Kehoiwai,
He waimaka ka ke aloha e hoohanini nei,
Kuu keiki mai ka ua kuahine o Manoa,
Manomano wale hoi ke aloha o kuu keiki,
Kuu keiki mai ka hau kololio i ke aumoe,
A kaua e pupuu ai i ke anu a ke kehau,
I hoopumehana hoi i ka poli o na keiki,
He keiki hoi ma ke kua,
He mau keiki hoi ma ke alo,
Auwe kuu keiki — e.
Kuu keiki mai ka wai huihui o Waiakekua,
Mai ka pii'na ikiiki o Puu o Manoa.
A oha ke kula la wela o Kahua,
Oia kula a kaua e holoholo ai i uka i kai e,
Aka, ua hala, ua hala oe me ka hala ole,
Ua ike ole oe i na hana haumia o keia ao inea.
Ua noho aku la oe ma ka poli o keiki hipa,
Ke ike la oe i ko laila Paredaiso nani.
Auwe kuu keiki —; kuu minamina pau ole,
Kuu keiki mai ka huikau kanaka o Ulakoheo,
Mai na kikee alanui o ke kaona,
Kuu keike mai ka lai o Ewa,
Mai ke kai halailai o Kapaakea.
Aloha ia wahi a kakou e noho ai,
Kuu keiki hoi, kuu minamina pau ole.
MR PETERO.
He u he aloha ia oe e Charles Petero Keliihoino,
Kuu kaikunane mai ka pono o ka haku,
Mai ka hale ihi kapu a kaua e hele ai,
E haawe ai ma ke kua ke hele,
Auwe kuu kaikunane — e.
I kuu poli no kuu kaikunane a hele e,
Haalele mai nei oe ia'u,
Me na makua aloha o kaua,
Eia makou ke noho nei me ka u,
Me ka minamina haumako ia oe,
Elua olua i haalele mai ia makou,
Elua hoi maua i koe,
Kuu kaikunane mai ka leho ala o Ewa.
MISS KEKELANI MAKULU.
He u he aloha ia oe e Charles Petero Keliihoino,
Kuu kaikunane mai ka ua liilii o Manoa,
Mai ka malu hau o Hopenui,
Oia wahi a kaua e holoholo ai,
E luana ai kaua i ka malu hale o ka makua,
Kuu kaikunane hoi — e,
Kuu pokii aloha i haalele mai ia'u,
Me na makua aloha o kaua,
Kuu minamina pau ole ia oe.
MISS HELENA PETERO.
He kanikau aloha nou e Charles Petero Keliihoino,
Kuu keiki mai ka hale anu a ka noe.
Ke paa mai la e ka ohu e,
Me he wai la ke aloha o kuu keiki,
E haale mai nei a pulu au e,
Pulu ke kino maeele i ke aloha,
Hui loku i ka manawa.
O kuu manawa e au wale nei,
E au wale ana au ia oe e kuu keiki,
Ua hele ka pili aloha o kuu lei e,
Auwe kuu keiki e,
Kuu minamina paa ole e,
Kuu keiki mai ka ua loku mai uka,
Ke kahiko mai la iluna o ka laau e,
Kuu keiki mai ka laau hihi i ka nahele,
Mai ka wai o Kahoiamano e,
Kuu hoa mai ka malu ki,
Malu kukui o Hopenui e,
Auwe kuu keiki — e,
Kuu minamina pau ole.
Kuu keiki mai ka makani kukalahale,
Mai ka i-a milimili i ka luna o Ulakoheo,
Mai ka la wela o Kawanonoula,
Mai ka malu hale o kaua e noho ai.
Ke noho nei au me ka u,
Me ka minamina pau ole ia oe,
Kuu keiki mai ke kula o Kaiwiula,
Mai ka lepo ula o Ewa, ke hele e,
Oia aina malihini a kakou e noho nei,
Me oukou hoi na keiki,
Me maua hoi na makua
Auwe kuu keiki — e
Kuu minamina pau ole.
MRS. KAILI PETERO.
MRS. WELEALII.
Honokaupu, Honolulu, Iune 22 1878
KA HUNT'S LAAU OLA
(HUNT'S REMEDY)
HE LAAU LAPAAU HOU, MAI AMERIKA MAI ! He Laau Maikai keia no Na mai pehu o ka opu, Na mai o ka puupaa a me ka opu mimi, Mimi-paa, Mimi-eha, Mimi-helelei, Ka lepo gravel iloko o ka opu-mimi, Ka mana ole, kapalili, hui ono ole ka ai. Na Mai Wahine, NAWALIWALI O KE KINO, LEPO ULA ILOKO O KA WAI MIMI, MANOANOA PAHA KA WAI E like me keokeo o ka huamoa, Like paha me na kaula silika keokeo, eleele, lenalena paha ; a i ole ua like paha me ka lepo i anaiia i na iwi keokeo, a i ka mimi ana, ua wela oioi ka mai, me ka eha nui o ke kikala a me ka puhaka.
HE NUI NA HOIKE e ola nei, ka poe i loohia i keia mau mai i haiia maluna ae, ua pau lakou i ke ola maikai, no ka inu ana i ka HUNT LAAU OLA. ("HUNT REMEDY)!"
UA HAAWI mua ia keia laau, e kekahi kahuna lapaau naauao, i ke kanaka mai pehu o ka opu, e noho ana me ka ohana a Mr. Hunt ; John Hunt kona inoa, he 45 kona mau makahiki, he kanaka nui poepoe, ua loohia i ka mai pehu. Ua haawiia kela me keia laau no keia mai, aole nae oluolu ; ua mahuahua mau kona pilikia, ua pau loa ke kino a me na wawae i ka pehu ; ua kokoke paa loa ka mimi ; kokoke pau loa ka hanu ana ; a ua mahuahua loa ka wai iloko o ke kino. Aole hiki iaia ke moe ilalo ma ka moe, nolaila, ua noho wale no iluna i ka po a me ke ao. Pela mau kona popilikia a hiki i kona hoao ana i keia laau, a ke kahuna i kuhikuhi mai ai. A i kona inu ana i keia laau, ua hoomaka koke ka oluolu. Ua paipai koke ia ka puupaa i ka laua oihana ; ua puka hou ka wai mimi a nui wale ; ua emi koke mai la ka pehu o na waewae ; a ua oluolu hou ke ake-mama i ka hanu ana ; ua oluolu a maikai ka io o na lala, a e hoi nui mai ana ke ola maikai, alaila, me ke kuhihewa, ua waiho oia i ka laau i kekahi mau la. Ua pono ole nae ka waiho ana ia manawa, no ka mea, aole i ola io maoli kona mai pehu. Ua molowa hou na puupaa i ka laua oihana, a ua mahuahua hou ka wai iloko o ka opu, a ua popilikia hou e like me mamua. Alaila, ua inu hou oia i ua laau la, a ma ka hoomanawanui ana, ua lanakila hou auanei maluna o ka mai, a ua ola io maoli, a ua hoomaka hou oia i kana oihana mawaho o ka hale.
Oia ka lapaau mua ana me keia laau ; a mai ia wa mai, (he 25 makahiki) ua hahanaia keia laau e like me ka hana ana o Mr. Hunt, a ua haawi na kahuna lapaau i keia laau i ka poe mai pehu a me na mai like.
Mai ia manawa mai, ua ikeia, e mahaloia hoi keia laau, mai o a o, e na kanaka, a ua inu ia hoi ma ke ao ana a me ke ao ole ana mai o na kahuna lapaau ; oia ka mea i hoola mai i na kanaka he nui, ka poe pilikia i ka mai pehu, a kokoke i ka make.
Na kuhikuhi no ka inu ana :
E INU I KE PUNA TI PIHA, a hala na hora 4, alaila, e inu hou. E mahuahua liilii nae a hiki i elua puna ti piha — a hiki hoi auanei i puna nui piha.
NO KE KEIKI hookahi makahiki a hiki i na makahiki eono, e haawi 5 kulu, a hiki i na kulu 20 ; eha hora nae mawaena o ka haawi ana.
KUMUKUAI, he - - $1.50 no ka omole.
DILLINGHAM & CO.,
748 3m 761 Na Agena no ka Pae Aina Hawaii.