Ka Nupepa Kuokoa, Volume XV, Number 29, 15 July 1876 — Page 1
NUPEPA KUOKOA :
KE KILOHANA POOKELA NO KA LAHUI HAWAII.
BUKE XV. HELU 29. HONOLULU, POAONO, IULAI 15, 1876. NA HELU A PAU 763.
MAIKAI KA HOI KA PAPA !
— A ME —
Ka Laau o kou Hale ! No Hea la ?
KA I NO HOI NO KAHI O WAILA MA ! Nana aku no hoi ia la, OHI KA IO O KA LAAU O MAKAWAO, i ka ua mea o ka nani o Na Papa, Na Laau A ME NA PONO KUKULU HALE O NA ANO NO A PAU, MA KE KIHI O Na ALANUI PAPU a me MOIWAHINE, Honolulu MALAILA E LOAA AI E LIKE ME KA makemake, no ke Kumukuai makeponoloa. PAPA, PAPA, PAPA Na PAPA huluhulu, Na PAPA manoanoa, Na PAPA i kahiia, Na PAPA kepa, PAPA holo keokeo, PAPA holo ulaula. NA LAAU! LAAU! NA KUA. NA KAOLA, AAHO, MOLINA, PEAPEA, PINE HULUHULU, PINE I KAHIIA, Na Papa a me na Laau Ulaula ! PILI ULAULA PILI KEOKEO, PANI PUKA, PANI PUKA ANIANI IPUKA ANIANI, OLEPELEPE. PENA O NA ANO A Pau Hulu Pena mai ka liilii a ka nui ! AILA PENA ! AILA HOOMALOO, WANIKI, PATE NA LAKO o kela a me keia ano. NA AMI-PUKA HALE, NA AMI-PUKA PA. ANIANI ! Pepa Hale me na lihilihi E LOAA NO MALAILA KA PAAKAI Helu 1, O KAKAAKO a me PUULOA No ke Dala kuike, e loaa no na mea a pau i haiia ae la no ke kumukuai emi loa.
O na kauoha a pau mai Hawaii a Niihau, e loaa'ku ana ia lakou, e hooko koke ia mai ana no ia me ka lawa pono.
E kipa nui ilaila, i ike i ka oiaio
761 3m 773
" Owai o Honolulu City ?" wahi a
J. Nawahi ma ka " Lahui Hawaii" o ka la 29 o Iune M. H. 1876.
O Honolulu City, oia no ka mea ike a maopopo i na pomaikai ole wale o na makaainana o Puna, a pakeo ae mawaho, e like ma kana (Honolulu City) i hoolaha ai ma ka " Nupepa Kuokoa" o keia pule aku, oiai na J. N. ma na kau ahaolelo mua elua i hala.
O Honolulu City, oia no kekahi iloko o ka la i hoomaka ai na hana o keia kau, a ike pono ai i ke keiki o Puna e pehi ana i ka ala o Kaneleau i na lae o na kuhina o ka Moi, me ka manao e nahoahoa e like me ka haunaele o ka la 12 o Feberuari M. H. 1874, a na o lakou ma ; aka, aole nae e pa, no ka mea, ua lilo mua ka makana i ke 'lii Waila malalo o na rula, a puehu wale iho la no ua pohaku la i ka papa-hele no ka halahu ana.
Aohe eu i ka hana o ke anu Ua oni wale i ke oho o ke kupukupu, I ka ua mea o ka hu-maopopo. Ke hoomanao ae nei au, ina he poe lawe nupepa ka lae o Kumukahi
Ka milo holu i Waiakea Ka wai weluwelu i Kukii Ka lae hala o Puaakanu Ka niu moe o Kalapana, a me ka Papa lohi o Apua e puana mai no lakou ma keia mau lalani mele, Ua hala ua hala oi — e Ua hala mawaho oi — e Mawaho o ka rula oi — e O ka ahaolelo oi — e Ko makou luna oi — e O J. Nawahi oi — e.
Eia kekahi, ke ake mai nei e hoopaapaa me Honolulu City malalo o ke kahua ana i paio iho nei me " Nupepa Kuokoa," ina e hai aku ana i kona inoa maoli ; ua makau ka ? paha ia H. C. E ka makamaka mai ake mai oe e hookomo i kou wawae i ke kakini wale no, mai manao oe he mea kohu nou ka hookau ana aku i ka pahu ko i ka papale no kou poo. Aole e paa ka H. C. peni i ka hoike i ka oiaio, me he mea la o ka hapa nui o na hoa o ka Ahaolelo kai kuikahi pu me a'u, H. C. a me Kuokoa, koa walo iho no o lakou ma, oukou ma,— aole o'u manao a me Kuokoa e kauai ia oe i ka la no na puu a me na kee i na kau mamua ; o kou hoolilo ana i ka oiaio a Kuokoa i mea ole a i ka pololei hoi i ana puni.
Aka, ina e a-a mai oe me a'u H. C. ua lawa au no'u iho e pale i kau mau kauna alapahi a me ka palau.
E oki au maanei, e nana maikai aku i ka pehi mai a ke keiki o Puna i kana hua ulu honina HONOLULU CITY. Iulai 4 1876.
Mr. LUNAHOOPONOPONO ; Aloha oe :—
Ua ike ia iloko o ka Hale Ahaolelo o ko Hawaii Pae Aina kekahi palapala hoopii a ko Iwilei poe, e koi ana e hookaawale ia na hale lole pipi e ku nei ma Kaholaloa mai ko lakou ku ana malaila, a hoonee ae ma kahi e, no kekahi mau kumu a makou i ike ai he pilikia penei ia :
Akahi.— No ka hiki mai i ka wa makani Kona a Aoaoa paha, ua ino loa ke ea e holo ana ma o a maanei o keia kauhale o Iwilei a me ka poe hele wawae kekahi.
Alua.— No ka ike ia o kekahi mau kino kanaka e hele ana malaila, mai pilikia i ka bipi i lele mai loko o ka pa mai ; a me ke ano hopohopo maoli no o ka hele ana o ka poe elemakule a me na keiki liilii hele kula haole ma Honolulu, oiai na bipi e ho-a ia mai ana, a e lawe ia mai ana paha.
Akolu.— Ina ua ikea a ua manao paha ka Ahaolelo kau kanawai, he mea pilikia ka hoonee ana ae o ua mau hale lole bipi nei ma kahi e, alaila, e noonoo lakou i puu dala kupono e wehe ia i alanui no makou mawaena o ka pa o Kimo Pelekane e alai mai nei mamua i maa i ka hele mau ia, ua alai ia nae e Kimo Pelekane keia pa nui, a lalau wale makou makai kahi kokoke i ua mau hale lole bipi nei.
Aha.— Ina aole e wehe ia ma ia wahi o Kimo Pelekane, alaila, e wehe ia makai o ka pa halepaahao o Kawa. a holo pololei i ke komohana akau kupono i kua pa o ka loko o Kuawili.
Alima.— E wehe ia kekahi alanui hele wawae, a holo kaa mai Iwilei aku nei kupono e holo ana i ka hikina akau a hiki i Kapalama-uka, a loaa aku ke Alanui Alii e hele ana i Ewa.
Oia ke ano nui o ka makou palapala hoopii i hoopii aku ai i ka Hale Ahaolelo, a ma ko makou nana aku nae me he mea liilii wale la no i ka poe komite o ka Papa Ola, oiai oia ke komite i haawi ia ai ua palapala hoopii la.
Nolaila ke kauoha ia aku nei oukou e na lunamakaainana ekolu o ka apana o Honolulu nei, oia hoi o Hons H. Walakahauki, A. P. Kalaukoa. E. K. Lilikalani, e hooikaika no ko makou pono iloko o ka Hale Ahaolelo, a iloko o ka wa e hana ia ana ka Bila Haawina, oiai ka wa e haawi ia ana ka puu dala o na alanui. Me ka mahalo. Na na makaainana o Iwilei &c
Iwilei, Honolulu, Iulai 5, 1876.
Ke Kau Ahaolelo o M. H. 1876.
LA HANA 51 — Poaha Iulai 6.
Hoomaka na hana e like me ka mau.
HOIKE A NA KOMITE WAE.
Hoike mai ke Komite o na Aha Hookolokolo no ka bila e hookuu akea ana i na kai lawaia, a noi mai i ka wa e heluhelu akolu ia ai ka bila, alaila, e hoopanee loa ia ka bila. Aponoia ka hoike.
Heluhelu mai o Mr Helekunihi he olelo hooholo e halawai mau ka hale ma ka hora 10 kakahiaka o na la a pau, a e hoopanee i ka wa e noiia mai ai, aole e hoomaha ma ka hora 12 awakea, a ma ka Poaono, ma ka hora 12 o ka auina la e pau ai. Hooleia.
Heluhelu hou mai no ia he olelo hooholo e noonooia ka Bila Haawina ma ka Poalima la 7 o keia malama, a mahope aku ma na Poakolu a me na Poalima a pau e noonooia ai. Hooleia.
Ha ke noi, ua kapaeia na rula, a hoike mai ke Kuhina Kalaiaina i kana hoike no ka olelo hooholo e ninau ana i ka nui o na manu ai laiki i pepehiia, ua hoike mai oia he 83,326 manu ai laiki i pepehiia. Apono ia.
Heluhelu mua mai ke Kuhina Waiwai he bila e hoololi ai i ka pauku 500 o ke Kanawai Kivila. Waihoia no ka heluhelu alua ana.
Heluhelu hou mai no ia he bila e hoololi ai i na pauku 483 a me 484 o ke Kanawai Kivila, i hoololiia i ko M H 1870, e hoomahuahua hou iho ana i hapalua keneta ka auhau hou maluna o kela dala keia dala o ka waiwai paa a me ka waiwai lewa.
Noi mai o Mr Waterhouse e hoopanee loa i ka bila, oiai he bila keia e hookaumaha ai i na makaainana, a eia au ke ku nei ma ka aoao o na makaainana a hoopanee loa i ka bila.
Noi mai hoi o Mr Aholo e hooholo loa aku i ka bila no ka heluhelu alua ana, i ka ninauia ana, ua waihoia ka bila e pai no ka heluhelu aluaia ana.
Ma ke noi, ua kapaeia na rula, a heluhelu mai ke'lii Kuihelani he palapala hoopii mai ke Komite 13 mai o Kalawao e noi mai ana, e hoomauia ke Kauka Kaahele o ka mokupuni o Maui. Waihoia i ke Komite malama ola.
Heluhelu mua mai o Mr Birch he bila e hoololi ai i ka Lunakanawai Apana o Wailuku i Lunakanawai Hoomalu. Hooleia ka bila.
Heluhelu mai o Mr Kamauoha he olelo hooholo i $2,000 no ke alanui o Kona Hema, mai Kealakekua a i Kahahawai ma Kau.
Heluhelu mai o Mr Pilipo he olelo hooholo, aole e haawiia ua oihana aupuni i kekahi lunamakaainana, mahope o ko lakou hoi ana aku.
Oiai e hoopaapaaia ana, ua hoopanee ka Hale a halawai hou ma ka hora 1 auina la.
Halawai hou ka Hale ma ka hora 1.
Mahope o ka ninauia ana ka olelo hooholo, me ke kakau ana i na ae a me ka hoole. Eia ka poe makemake e hoopanee loa i ka olelo hooholo : Kanoa, Kapena, Moehonua, Walker, Kakela-makua, Kuihelani, Parker, Kahanu, Martin, Kamika, Kaai, Paulo, Aholo, Kamauoha, Kauai, Naili, Birch, Helekunihi, Barenaba, Halemano, Nahaku, Wana, Naukana, Nakaleka. Eia ka poe kokua i ka olelo hooholo : Kahuila, Kaiue, Kanealii, Pilipo, Lilikalani, Gay, Kalaukoa, Nawahi, Mahoe, Waterhouse, Preston, Mahelona a me Kaina, nolaila, ua hoopaneeia ka olelo hooholo.
Hoolaha mai ke'lii Kaai he bila e hookapu ana i na luna aupuni aole e kohoia i lunamakaainana.
Heluhelu mua mai mai he bila e hookapu ai i na manu Iiwi, apapane, o-o o na kuahiwi, aole pepehi waleia, aka, e hoomaluia na ke'lii ia mau manu. Waihoia no ka heluhelu alua ana.
NA HANA O KA LA.
Hapaiia ka noonoo ana no ka pauku 1 o ka bila e hoonoho ana i na Kiaaina i ke Kahukula Nui.
Noi ke'lii Kamika e hoopanee loa i ka pauku 1 o ka bila. Noi mai o Mr Mahelona e hooholo loa, i ka ninauia ana ua hooholo loa ia ka pauku 1.
Heluhelu ia ka pauku 3 o ka bila. Kamailio loihi mai ke'lii Kamika a me Kakela makua ma ke kue.
Hoololi mai o Mr Birch, i ka wa e pilikia ai ke Kiaaina o ko lakou mau hope ke kaapuni i na mokupuni, mahope o ka ninau ia ana, ua hooholoia ka pauku 2 me ka hoololi.
Heluheluia ka pauku 3 o ka bila a hooholoia.
Heluheluia ka pauku 4 o ka bila a hooholoia.
Heluheluia ka bila ma ke poo a hooholo loa ia no ke kakau poepoe. Ma ke noi e heluhelu akolu ia i keia Poakahi ae.
Hoopaneeia a ka hora 10 apopo.
LA HANA 55 — Poalima, Iune 7.
Halawai ka Ahaolelo e like me ka mau
Heluhelu mai o Mr Preston he olelo hooholo, e kauoha ana i ke Komite Waiwai, e nana i na dala o ka waihona aupuni a e hoike mai i keia manawa. Hooholoia.
Hoolaha mai o Mr Kanealii he bila e hoololi ai i ka pauku 496 o ke kanawai kivila.
Heluhelu mai o Mr Mahoe he bila e hookaawale ana ia Hilo Akau i Apana Hookolokolo okoa. Waihoia no ka heluhelu alua ana.
Heluhelu mai o Mr Halemanu, he olelo hooholo, e kauoha ana i ka Makai o ka hale, e hoolako mai i berena a me ka waiu bata nana hoa o ka Hale. Hooleia.
Heluhelu mua mai o Mr Birch he bila e hoololi ai i ka pauku 393 o ke Kanawai Kivila. Waihoia no ka heluhelu alua ana.
Heluhelu mua mai o Mr Naili he bila e hoololi ai i ka pauku 434 o ke Kanawai Kivila, i hoololiia i ka M H,1868, e pili ana i ka hookupa ana. Waihoia no ka heluhelu alua ana.
Heluhelu mua mai o Mr Birch, he bila e hoololi ai i ka pauku 1, 4, a e hoopau loa ai i ka pauku 2 o ka mokuna 84 o ke Kanawai Hoopai Karaima. Waihoia no ka heluhelu alua.
Heluhelu mai o Mr Kalaukoa, he olelo hooholo, e kauoha ana i na hoa o ka Hale, e hele e nana i na hale aupuni, aole hoi e hoohanaia na paahao ma ka la apopo, i ka wa a na hoa e hele ai e ninau ia lakou. Ua hoihoi hou ia.
Heluhelu mua mai o Mr Birch i kana hoololi no ka pauku 61 o ke Kumukanawai. Waihoia no ka heluhelu alua.
Hoolaha mai o Mr Gay he bila e hoakaka ana, ina e kuaiia na aina aupuni, alaila e kudalaia.
Heluhelu hou mai o Mr Kalaukoa i kana olelo hooholo i hoihoi ai, e kauoha ana i ka Makai o ka Hale, e hoolako mai i na kaa emi, hookahi dala no na hoa o keia hale, e hele ai e nana i na hale aupuni, ma ka la apopo, Iulai 8, ma ka hora 1 o ka auina la, a e auaia na paahao ma ia la.
Hoololi mai o Mr Aholo, ma kahi o ka hora 1, e hooko malaila, hora 2.
Hoololi mai o Mr Nakaleka, i Komite Wae, i 13 lala.
I ka ninau ana, ua kohoia i Komite Wae ke hele e nana i na Hale Aupuni, oia hoi o Mr Nakaleka, Hon. Kaai, Hon. Kapena, Mr Lilikalani, Mr Aholo, Mr Kalaukoa, Mr Kaina, Kuhina Kalaiaina, Mr Mahoe, Nahaku, Kuhina o ko na aina e, Mr Nawahi, Mr Wana.
Hapaiia na hana o ka la, oia ka heluhelu alua ana i ka bila e hoololi ai i ka pauku 6 o ke kanawai o 1870, e pili ana i ka auhau holoholona.
Noi mai o Mr Kalaukoa, e hapai hou i ka noonoo ana no ka olelo hooholo, e hoouna ana i ke Komite Wae e nana i na hale aupuni. Hooholoia.
Noi mai o Mr Birch, i 5 lala o ke komite wae, a e kohoia na lala pakahi mailoko mai o na Komite ku mau.
Hoololi mai o Mr Aholo, o na hoa no a paa ke hele e nana i na hale aupuni.
I ka ninauia ana, ua hooholoia ka olelo hooholo, me ka hoololi a Mr Aholo.
Hoopanee a ka hora 1.
Halawai ka Hale ma ka hora 1 P. M
Heluhelu alua ia ka bila e hoololi ai i ka pauku 1 o ka mokuna 23 o ke kanawai i aponoia ma ka 1872. Hoopanee loa ia.
Heluhelu alua ia ka bila e hoopaa ana i ka pauku 3 o ka M H 1870, a e haawi ana i ka poe inu awa, e kuai awa me ka palapala ae ole a na kauka. I ka ninauia ana, ua kakauia na ae a me na hoole. Eia na poe ae e kuu akea ia ka inu awa : Kanoa, Dominis, Kapena, Moehonua, Waila, Kuihelani, Kahanu, Martik, Isenberg, Kaai, Kamauoha, Lilikalani, Kauai, Naili, Halemanu, Barenaba, Helekunihi, Nahaku, Wana, Nakaleka, Mahelona,— huiia he 20 Eia ka poe hoole i ka inu akea ana i ka awa : Walker, Kakela makua, Parker, Aiwohi, Aholo, Kahuila, Kanealii, Kalaukoa, Pilipo, Nawahi, Mahoe, Perston, Nawahi, Waterhouse — huiia he 14. Nolaila, ua hooholoia, e inu akeaia ka awa.
Noi mai o Mr Birch, e heluhelu akoluia keia bila ma ka Poakahi e hiki mai ana. Hooholoia.
Ma ke noi, ua kapaeia na rula, a heluhelu mai la o Mr Pilipo he olelo hooholo, o iawe hou ia oiai imua o ke Komite o ka Hale, ka bila e pili ana i na kai lawaia, a e noonooia ma ka Poakahi e hiki mai ana. Hooleia.
Noi mai o Mr Aholo, e kapaeia ka rula 41, a e hapai hou ia ka noonoo ana no ka hoike a ke Komite o na Aha Hookolokolo, e hoopanee loa i ka bila e hookuu ana i na kai lawaia. I ki ninauia ana, ua hooleia. Heluhelu alua ia ka bila e hoololi ai i ka Mokuna 42 o ke kanawai o l874, Ua waihoia a Poakahi.
Heluhelu alua ia ka bila e hoololi ana i ke kanawai no ka piliwaiwai. Waihoia a Poakahi.
Heluhelu akoluia ka bila e hoopau ai i ka mokuna 28 o na kanawai o 1874, e pili ana i na olelo hooholo, e apono ana i na hoolilo waiwai paa a na Kahu. Hooholoia e kakau poepoeia, a heluhelu akoluia ma ka Poakolu.
Heluhelu alua ia ka bila e hoopili ai i ka Mokuna 4 o na kanawai 1874, e pili ana no ka mare ana o na wahine Hawaii me na pake. Hooholoia e kakau poepoe, a heluhelu akolu ia ma ka Poakolu.
Heluhelu akoluia ka bila e hoololi ai i ka pauku 101 o ke kanawai Kivila, e pili ana i na laikini hoehoe waapa. Hooholoia. Hoopanee ka Hale.
LA HANA 56 — Poaono Iulai 8
Halawai ka Hale e like me ka mau. Noi mai ke Komite Wae no ka bila e pili ana i na laikini o na mahiko i manawa hou, ae ia.
Heluhelu mai o Mr Kanealii he olelo hooholo, e kauoha ana i ke Kakauolelo o ka Hale, aole e haawi mai i na dala i emi kona waiwai io, a e kauoha ana i na dala i haawi mua ia oia ano e hoihoi aku i ke Kakauolelo. Waihoia ma ka papa a hoike mai ke Komite Waiwai.
Heluhelu mai o Mr Pilipo he olelo hooholo e kauoha ana i ke Kuhina Waiwai e kukala aku ma ka inoa o ke aupuni, o na dala i hoemiia, e lawe ke aupuni nona a me ka poe malalo o kona hoomalu ana he mau dala piha ia he 100 keneka. Hoopaneeia a ka Poakahi.
Heluhelu mai ke'lii Kaai he olelo hooholo e kauoha ana i ka Loio Kuhina e huli aku i ka poe na lakou i hoolaha mai keia mau dala, a ina ua ikeia ua emi ka waiwai io, alaila e hoopiiia lakou.
Hoololi mai o Mr Birch, na ke Komite o na Aha Hookolokolo e imi aku, aole na ka Loio Kuhina. Hooholoia ka olelo hooholo me ka hoololi. Hoopanee ka Hale.
LA HANA 57.— Poakahi Iulai 10.
Halawai ka Hale e like me ka mau. Heluhelu mua mai o Mr Preston he bila e pili ana i na mea hoike. Waihoia e pai no ka heluhelu alua ana.
Ma ke noi, ua kapaeia na rula a heluhelu mai o Mr Kaina he hoopii mai Puna mai, e noi mai ana i mau tausani dala no ke ala nui mai Kahekahe a hiki i Kaohe ma ka apana o Puna. Waihoia a noonoo pu me ka Bila Haawina.
NA HANA O KA LA.
Heluhelu akolu ia ka bila e hoopau ana i na pauku 11, 12, 13 o ke kanawai e hoopau ana i ka mokuna 10 o ke Kanawai Kivila, e hoonoho ana i na Kiaaina i mau Kahukula Nui, a e hoopau ana i ke Kahukula Nui.
Noi mai ke'lii Paulo e hoopanee loa i ka bila.
Hoololi mai o Mr Aholo, e hookomo aku, mahope o na Kiaaina, a na lakou e koho i mau hope no keia oihana. Hooholoia.
Hoololi mai o Mr Preston na ka Papa Hoonaauao e koho i na Kahukula Nui no na apana Kiaaina a pau. Hooleia. Ninau ia ka hooholo loa i ka bila me ka hoololi. Eia ka poe ma ka ae e hooholo i ka bila me ka hoololi : Na Kiaaina Kanoa, Kapena, Hon Kuihelani, Moanauli. Martin, Kaai, Aholo, Kahuila. Kaiue, Pilipo, Kauai, Lilikalani, Birch, Naili, Halstead, Aiwohi, Gay, Helekunihi, Barenaba, Kalaukoa, Nawahi, Mahoe, Nahaku, Wana, Naukana, Nakaleka, Mahelona, Kaina, huiia he 28. Eia ka poe ma ka hoole : Green, Moehonua, Walker, W R Castle, S N Castle Parker, Waila, Ake, Paulo, Kamauoha Waterhouse, Preston, huiia he 12 no, nolaila ua hooholo loa ia ka bila me ka hoololi.
Ma ke noi, ua kapaeia na rula a heluhelu mai o Mr Aholo he olelo hooholo, e kauoha ana i ke Komisina i kauohaia e ka ahaolelo o 1874 e hooponopono i na kanawai, e hoike mai i keia ahaolelo. Hooholo ia.
Heluhelu aluaia ka bila e hoala hou ai i na pauku 1 a me 2 o ka mokuna 86 o ke Kanawai Hoopai Karaima i hoopauia e ka mokuna 40 o na kanawai o 1874, a e hoololi i ua mau pauku la i kulike ai me ka pauku 62 o ke Kumukanawai i hoololiia, a e hoololi ai i na pauku 5. 6, 12, a e hoopau loa ai i na pauku 9, 10 o ka mokuna 86 o ke Kanawai Karaima imua o ke Komite o ka Hale, noho ke Kiaaina Kapena ma ka noho.
Noi mai ka Loio Kuhina, e noonoo pakahiia na pauku. Hooholoia.
Mahope o ka noonooia ana, ua hoopauia ke Komite, a hai aku i ka Hale, ua hoopanee loa ia ka pauku 1, o ka bila, a o na pauku e ae o ka bila, e noonooia imua o ka Hale. Aponoia ka hoike a ke Komite. Heluheluia ka pauku 2, 3, 4, 5, 6, 7. Hoopaneeia.
Ninauia ka hoopanee loa i ka bila. Hooholoia.
Nonoi mai ke alii Kaai, e noonoo hou ia ka bila e hoololi ai i ka pauku 12, o ka mokuna 86 o ke kanawai Karaima, ma ka Poakolu e hiki mai ana.
Heluhelu alua ia ka bila e hoololi ai i ka pauku 18, o ka Mokuna 86 o ke kanawai hoopai Karaima. Waihoia ma ka papa.
Heluhelu alua ia ka bila e hoololi ai i ke kanawai no ka pili waiwai. Waihoia ma ka papa.
Heluhelu aluaia ka hoololi no ka pauku 61 o ko kumukanawai. Hoopanee loa ia.
Heluhelu alua ia ka bila e hoololi ana i ka pauku l o ke kanawai e kauoha ana i na mea a pau e lawelawe ana i na Oihana Aupuni, e hookupaia. Waihoia no ke kakau poepoe, a e heluhelu akoluia ma ka
Poaha. Hooholoia.
Heluhelu aluaia ka bila e kauoha ana i ke Kuhina Waiwai, aole e haawi i ke dala i na Luna Aupuni e holo wale ana i na aina e, no kona makemake iho, ke ole i pili i kana oihana. Waihoia no ke kakau poepoe, a e heluhelu akoluia ma ka Poaha.
Heluhelu aluaia ka bila e hooponopono ai i ke kuai ana i ka opiuma iloko o keia aupuni. Hoopanee loa ia.
Hoopanee ka Hale.
LA HANA 58.— Poalua, Iulai 11.
Halawai ka ahaolelo i ka hora 10 A. M.
Noi mai ke Komite o na Aha Hookolokolo no ka noonoo ana i ka olelo hooholo a ke'lii Kaai, e kauoha ana i ka Loio Kuhina e hoopii i ka mea nana i hoopae mai iloko o keia aupuni i na dala e hoemiia nei i 90 keneta wale no, e hoopanee iki aku a hiki ka hora 1 o ka auina la, i paa na hoa i ke kakau inoa, ae ia.
Hoike mai ke Komite Wae no ka noonoo ana i ka bila e laikini ana i na mea malama Banako iloko o keia Aupuni. Ua hooponopono lakou i ka bila mua, a heluhelu mai i ka bila me ka hoololi i hooponopono hou ia.
Hoololi mai o Mr Birch ma ka $1,000 ke kumukuai no ka laikini hookahi. Hoole ia. Nolaila, waihoia ka bila i hooponopono ia no ke kakau poepoe, a e heluhelu akoluia ma ka Poakolu e hiki mai ana.
Hoolaha mai o Mr Kalaukoa, he mau bila, l E hoololi i ka pauku 56 o ke Kanawai Kivila. 2 E hoololi i ka pauku 57 oia Kanawai Kivila no.
Heluhelu mua mai o Mr Gay he bila e kauoha ana i ke Kuhina Kalaiaina, ina e kuaiia na aina aupuni, alaila ma ke kudala e kuai ia ai. Waihoia no ka heluhelu alua ana.
Heluhelu mai o Mr Kanealii he olelo hooholo e kauoha ana i ke Komite Wae, i waihoia aku ai na bila e pili ana i na haku a me na kauwa, e hoike mai i ka lakou hoike.
Hoololi mai ke'lii Kaai me ka bila e pili ana i ka Hoopaa Ola, ua hoihoi hou ia.
Hoololi mai o Mr Birch o na bila a pau i waihoia aku ma ka lima o na komite mau a pau o keia hale, a e hoike mai i ka lakou hoike mawaena o keia la a me ka Poakahi e hiki mai ana. Hooholoia ka olelo hooholo a me ka hoololi.
Heluhelu mai ke Kiaaina Kapena he olelo hooholo, e kauoha ana i ke Kuhina Waiwai, e uku aku i $2,200 ia Severance, no kona kokua ano i ka hoouna ana ma i i na pake.