Ka Nupepa Kuokoa, Volume XV, Number 33, 12 August 1876 — Page 1
NUPEPA KUOKOA :
KE KILOHANA POOKELA NO KA LAHUI HAWAII.
BUKE XV. HELU 33. HONOLULU, POAONO, AUGATE 12, 1876. NA HELU A PAU 767.
MAIKAI KA HOI KA PAPA !
— A ME —
Ka Laau o kou Hale ! No Hea la ?
A I NO HOI NO KAHI O WAILA MA ! Nana aku no hoi ia la, OHI KA IO O KA LAAU O MAKAWAO, i ka ua mea o ka nani o Na Papa, Na Laau A ME NA PONO KUKULU HALE O NA ANO NO A PAU, MA KE KIHI O Na ALANUI PAPU a me MOIWAHINE, Honolulu MALAILA E LOAA AI E LIKE ME KA makemake, no ke Kumukuai makeponoloa. PAPA, PAPA, PAPA Na PAPA huluhulu, Na PAPA manoanoa, Na PAPA i kahiia, Na PAPA kepa, PAPA holo keokeo, PAPA holo ulaula. NA LAAU! LAAU! NA KUA. NA KAOLA, AAHO, MOLINA, PEAPEA, PINE HULUHULU, PINE I KAHIIA, Na Papa a me na Laau Ulaula ! PILI ULAULA PILI KEOKEO, PANI PUKA, PANI PUKA ANIANI IPUKA ANIANI, OLEPELEPE. PENA O NA ANO A Pau Hulu Pena mai ka liilii a ka nui ! AILA PENA ! AILA HOOMALOO, WANIKI, PATE NA LAKO o kela a me keia ano. NA AMI-PUKA HALE, NA AMI-PUKA PA. ANIANI ! Pepa Hale me na lihilihi E LOAA NO MALAILA KA PAAKAI Helu 1, O KAKAAKO a me PUULOA No ke Dala kuike, e loaa no na mea a pau i haiia ae la no ke kumukuai emi loa.
O na kauoha a pau mai Hawaii a Niihau, e loaa'ku ana ia lakou, e hooko koke ia mai ana no ia me ka lawa pono.
E kipa nui ilaila, i ike i ka oiaio
761 3m 773
HE
IWAKALUA TAUSANI LEGUE
MALALO O KE KAI !
— KA MEA —
KUPANAHA O KA MOANA !
KE ALA O KA MEA HUNA,
— A O KA MEA —
POHIHIHI O KA 1866 !
MAHELE 1.
MOKUNA XVII.
MALALO O KA MOANA PAKIPIKA.
IA KAKAHIAKA AE, la 18 o Novemapa, ua pau loa ae la ko'u mau maluhiluhi o ka la i hala aku, pii aku la au ma ka oneki, a o ka wa ia a ka hulipahu e hoike ana i kana mau hana o ka la e like me ka mea mau.
A i ko'u ike ana aku ia Kapena Nimo, hoomanao ae la au i na mea kupanaha o ke kai. Aole nae o ia la i ike mai i ko'u mau helehelena ano hauoli, a hoomaka aku la no oia i na hana e pili ana i ka mea nana La. I ka pau ana o nei hana a ke Kapena, hele aku la oia a kalele aku la ma ka pahu o ke kukui kiai, me ka nana pono ana iloko o ka moana ; a ma ia wa no i pii mai ai na sela o ka Nautilo, he poe ikaika, a he poe hoi no kela a me keia lahui mai, a o ko lakou ano, a o ko lakou ano, he poe Beritania i ka nana aku ia lakou a pau loa, oiai hookahi wale no a lakou olelo e olelo ai iwaena o lakou ; a aole no hoi a'u mea e nieniele aku ai no ka olelo pakahi a kela a me keia mea o lakou.
Lalau iho la nae lakou i na kaula kawelewele o ka upena, a huki mai la, aia hoi, ua hei mai la na ia o kela a me keia ano, oia hoi ke aku, ke ahi, ka mahimahi, ka naia, ka hihimanu, a o ke kaluka ka ia nui wale ma na kapakai o Norewai a me na ia nui e ae he nui wale ; a iloko o ia nui ia, mai i no hoi kau e, e lilo pu aku na kanaka i ka hukia, aka, ua lilo ia mea nui i mea ole loa i na sela kino nui a pauhakaki o ka Nautilo.
I ko'u hoomaopopo ana iho, ua oi aku i ka 900 paona ke kaumaha o na ia a pau iloko o ka upena ; a oia mea makemake aku ia a'u, o ke ku-kuku o ka ehu o ke kai, i ka ua mea o ka nui o ka ia, a owai la hoi ka mea e nele i ka makemake i keia koana nui.
No keia mea, aole makou i nele i ka ai ana i na mea hou, a o ka holo o ka Nautilo a me ka lako i ka malamalama uila, oia kekahi mea i ai mau ai makou i na mea hou.
O keia mau mea a pau a ke kai mai, ua waiho ia aku la ma ke keena o ke kuene, e kopiia ai kekahi mau ia, a o ke koena iho, ua waihoia aku ma ka lima o ke kuke, no ka hoomoa ana i mau mea na makou e ai iho ai.
I ka pau ana o ka lawaia, manao ae la au, e hoomau hou aku ana no la hoi ka Nautilo ma kana huakai, a hoomakaukau iho la au e hoi ma ko'u rumi, aka, lohe e aku la au i ka leo o ke Kapena, i ka puana ana ae, me ka i mai : " E ke Kumu, aole anei keia moana i manawaleaia me ke ola maoli ? Oiai ua lako no i na ea oluolu, a aole mea e ae e hopohopo ai ke kanaka no na pilikia i ke ea ole. Inehinei, ua moe oia e like me ko kakou moe ana, a ano ua ala ae, mahope iho o ka moe malie ana i ka po. Nana aku oe ! ke ala ae la malalo o na hooipo ana a ka la, e hoomaka ae ana i kana hana mau. He mea nani loa hoi ke nana pono aku i kana mau mea hana, oiai he pana, he mau aa-lele, a he mau aa-koko ; a ua like ko'u manao me ko Maure, ka mea nana i huli mua a loaa ka holo ana o ke ao, e like me ka holo ana o ke koko maoli iloko o na holoholona."
A hooia aku la au, " ae, he oiaio, he holo io ana no iloko o ka moana, mamuli o ko ke Akua hana ana i na mea o loko o ka moana, a mahuahua ae la ia mau mea iloko ona — ka paakai, na mea ola hanu a me na mea ola kupu."
Iloko o ko Kapena Nimo wa e olelo ana no keia mau mea, ke nalu e wale la no oloko o'u me ka nauki loa, no ka ia la wehewehe mai, " O ke ola o na mea o ke kai, ua hiki iaia ke ike aku ia mea, ma ka hoomaopopo ana i ke kahua o ke kulanakauhale moana, ka pukuikui o na hale malalo o ke kai, a ua like hoi me ka Nautilo ka pii iluna o ka ilikai i kela a me keia kakahiaka e hanu ai — a eia hoi, he mau kulanakauhale kuokoa. Aka, ea, owai la ka i ike, he ulii nui ko ia kulanakauhale ?"
A pau kona hahai ana i keia mau mea, ninau mai la oia ia'u, " E Mr. Aronaka, ua ike no anei oe i ka hohonu o ka moana ?"
Pane aku la au, " E Kapena Nimo, o ku'u wahi ike oia no, ka ike nui i ao ia mai ia kakou, e na poe aua hohonu o ka moana."
Nonoi maila o Kapena Nimo, " E hahai mai hoi ha oe i kekahi o ia mau mea au i ike ai, i lawe mai ai hoi au ia mau mea, a hoohui iloko o ka'u hana."
A pane aku la au, " Eia kekahi mau mea a'u i hoomanao ai, ke ole nae hoi au e kuhihewa, ua ikeia ma ka Atelanika Akau, he 8,000 iwilei ka hohonu, a he 2,500 iwilei ka hohonu ma ke Kaiwaenahonua. O na ana kaulana loa nae i ikeia, aia ma ka Atelanika Hema, e kokoke ana ma ka latitu 30 o , a penei no ia ; he 12,000 iwilei, 14,000 iwilei, a he 15,000 iwilei. Ina e huiia keia mau mea a pau, alaila, ua loaa ka hohonu maoli o ka moana, he hookahi a me ekolu hapaha legue, ina nae he iliwai ka papaku o lalo."
" Ua pono no hoi kau e ke kumu, aka hoi, he hiki ia'u ke hoike aku ia oe, o ka hohonu maoli o ka moana nei ea, he 4,000 iwilei."
I loa no i ka pau ana o nei mau olelo, o ko Kapena Nimo kaha aku la no ia, a owau aku no hoi, a ku ana iloko o ka rumi kakau, a he kui kolu, hoopaa aku lu ke Kapena, alaila, ua hoikeia mai ma na huahelu o ka papu huihui helu, he 20 mile i ka hora hookahi.
Iloko o na la he nui a me na hebedoma i hala, hookahi no hele ana a Kapena Nimo iloko o ia wahi e nana ai. A he kukaikahi loa ko'u ike ana iaia e hele ana malaila. A o ka malamamoku no hoi, ma ka palapala aina wale no kana e nana ai no ka ihu o ka moku ; a pela iho la au i hoomaopopo au i hoomaopopo mau ai i ke ala holo o ka Nautilo.
I ka wa e hele ai o Kapena Ninio iloko o ka rumi kakau, aole loa oia e molowa ana i ke komo ana iloko o laila e nana ai i na mea kupanaha o ka honua moana.
O ka ihu mau a ka Nautilo e holo ai, oia no ka hikina hema, a mawaena o ka 100 a me 150 iwilei ka hohonu mai ka moku a i ka papaku. A i kekahi la, ua ike ole au i ke kumu, a o ka pa ae la no ia o ka iwikaele o ka Nautilo, ia lalo o ka papaku.
A ma na loina o na mea ana kiekie a hohonu, ua ike ia, mai ka hohonu poopoo makou i holo ai a hiki i ka piiku ana o ka papaku iluna, a oia iho la ka mea i pa ai ka iwikaele.
Ma ka hora 3 o ke kakahiaka, o ka la 26 o Novemaba, hiki ka Nautilo ma ka Poai Oluolu Akau, ma ka lonitu 174. A ma ka la 27 ae, ike ia ka Pae Aina Hawaii, kahi i make ai o Kapena Kuke, ma ka la 14 o Feberuari 1779.
Ma keia wahi, i piha ai ia makou ka 4,860 legue, mai kahi i hoomaka mai ai. A ma ke kakahiaka, pii ae la au ma ka oneki, ike aku la au he aina ma ka hikina, he elua mile ka loihi o keia aina, oia no o Hawaii, ka mokupuni nui o na mokupuni ehiku, a ma o kona inoa la i kapaia ai ka inoa o na mokupuni a pau loa. Ike maopopo aku la au i na kualapa olohelohe, a me na lalani mauna e moe paralela ana (kaulike) ma ka aoao o Mauna Loa, a ma kona piko he lua pele, a o kona kiekie, he 5,000 iwilei mai ka ilikai ae. A o kekahi mau mea nani a'u i ike ai, o na mea i loaa mai i ku upena, oia hoi na ia o kela a me keia ano, a o ku mea uui ia oia ia aoao o ka honua. A o ka ihu o ka Nautilo i keia wa, aia no i ka hikina hema ; a ma ku la l o Dekemaba, hiki ana ka Nautilo i ka Poaiwaena, ma ka lonitu 142 ; a ma ku la 4 o ia mahina no, ikeia aku la ka pae aina o Nuuhiva. Ioko o 5 mile ko makou mamao, ma ka latitu hema, he 8 o 57', a ma ka lonitu komohana, he 139 o 32', ike aku la au i ka mokupuni o Nuuhiva, oia ka mokupuni nui o ia mau mokupuni, a Farani e noho haku nei i keia wa. O ka'u mea nae i ike aku, oia no ka ohu e uhi paapu ana i na kuahiwi ; a o ke kumu o keia, no ka makemake ole o Kapena Nimo e hoopiipii i ka moku i ka makani, a iihi launa aku la hoi ka moku ia uka, alaila la hoi ike lea ia aku la hoi o uka, aka, o na ia wale no o ke kai ka mea ike ia, mamuli o ka hei ana ae 1 ka upene, a ike ia ae ka uku, ka ulaula, ke kahala, ka mano, ka naia a me kekahi mau ano ia e ae he lehulehu.
Mahope iho o ka haalele ana o makou i keia mau mokupuni, mai ka la 4 a hiki i ka la 11 o Dekemaba, ua holo loa aku ka Nautilo he 2,000 mile. O keia holo ana, ua halawai pinepine makou me na pukoakoa he lehulehu ; a o na mea hoi a'u i ike ai ma keia mau pukoa, oia no ke a-u a me na ia lele e ae he lehulehu wale.
Ma ka la 9 o Dekemaba, hiki makou ma ka pukoa Molaka, aia ma keia wahi, he mau miliona molaka i hei, oia hoi na ia hahai i na makiawa, ma na wahi a pau a na makiawa e hele ai, me ke poi hele aku i na mea liilii e loaa ana ia lakou. O ko'u mea e ike ai i keia hana, o ka nana aku ma na aniani ma ka aoao o ka Nautilo, a he mea menemene no hoi ke ike aku i na ia liilii e puehu liilii ana i ka holapuia e na ia nui ano e loa, oia no ka nahesa e wilinau ana i o a ianei.
O na ia hoi i loaa ae i ka upena, nana pono iho la au, a ike iho la i na ano ia eiwa, a D'Orbigny i hoike ai o ka moana Pakipika. O na mea kupanaha loa a'u i ike ai, oia na ia nui me na manamana he umi ma ke poo, a me ia mau mea e puka ia mai ai na mea liilii a pau i komo mai iloko o kona poai ; a leha ae la ko'u mau maka i ka ulukua, aie ku i ana, "Ka i ke kupanaha o kau mau huna, a pela io no i kapaia ai oe o Kupanaha."
Ma kekahi hora o ke la 11 o Dekemaba, hoonanea loa ia iho la au i ka heluhelu palapala ana, maloko o ke keena hooluana nui, aia hoi o Nede Lana a me Kosila, e nanea ana i ka nana i ka weli malamalama o ke kai, oiai hoi ia wa, e ku malie ana ka Nautilo me ka naue hele ole, no ka mea, e hoopihaia ana kona mau ipu ea.
A i ka piha ana o na ipu ea, ua emi iho la ka Nautilo no 1,000 iwilei ka hohonu malalo o ka ilikai. He wahi ike pinepine ole ia keia o ka moana, a he kakaikahi loa ka ike ia ana o ua ia nui ma keia wahi.
O ka'u mea e heluhelu ana, oia ka buke a Jean Mace, i kapaia " Na kauwa a ka opa ai ai," a kahea mai la o Kosila ia'u, e hele aku ma kona wahi e noho ana. A i ko'u hele ana aku a hiki, pane mai la kela, " E nana pono aku paha oe la i kela mea nui eleele." A ma ka huli pono ana i ke ano, ua maopopo, he moku nui ua piha i kekahi mau hora mamua koke iho no.
A pane hou mai la o Kosila, " Ua pono ka o Nede Lana i i mai nei ia'u, he moku me na likini no, e welo ana ma ka palekai. Ua paa na kia i ke okiia, a me he mea la, he mohai na kia i okia, i na ai ka lili o ka moana, aka, aole nae i pakele, ua holo a ia, a make pu me kona mau eemoku.
Ma ka ikaika o ka malamalama uila o ka Nautilo, ua ikeia aku elima mau kino kanaka, hookahi ma ka hoeuli kahi i pili ai, a he wahine a me ke keiki uuku e ku ana ma ka hale mahope, ua paa i na kaula. (Aole i pau.)
Ke Kau Ahaololo o M. H. 1876.
LA HANA 75 — Poaulua Augate 1.
Halawai ka Ahaolelo e like me ka mau.
Hoike mai ka hapa uuku o ke komite wae no ka noonoo ana i ka bila e hoololi ai ka pauka 235 o ke kanawai kivila, e pili ana i ka pa ana i na aina i mahi ia, e noi mai ana e hoopanee loa i ka bila. Waiho ia a noonoo pu me ka hoike a ka hapa nui o ke komite.
Hoike mai ke komite wae no ka noonoo ana i ka olelo hooholo e apono ana i ke Kuhina Waiwai no ka uku aku i na luna aupuni a me na lilo o na ahakaapuni no ka malama o Iulai e like me ka Bila Haawina o 1874, e noi mai ana e hooholoia ka olelo hooholo. Aponoia.
Heluhelu mai o Mr Waterhouse no ka manawa mua he bila e hoololi ai i ka pauku 64, o ke kanawai kivila.
Ma ke noi ua kapae ia na rula, a heluhelu alua ia ka bila. Waiho ia i ke komite o ka hale ma ka Poaha.
Heluhelu mua mai o Mr Waterhouse he bila e hoololi ai i ka pauku 66 o ke kanawai kivila, e pili ana i na palapala hoopaa o na luna kudala.
Ma ke noi ua heluhelu alua ia ka bila. Waiho ia i ke komite o ka Hale ma ka Poaha.
Mr Gay he olelo hooholo, e ninau ana i ke Kuhina Kalaiaina heaha ke kuleana o ke aupuni ma na ahupuaa o Kailua a me Kaneohe i kuai ia ia Hailaki. Hoihoi hou ia no ka halahu mawaho loa o na rula.
Heluhelu mai o Mr Birch he olelo hooholo e kauoha ana i ke kakauolelo, e hoihoi koke mai i na bila a pau i waiho ia no ke kakau poepoe, a oia ka hana mua o ka Hale o ka Poaha. Hooholoia.
Waiho hou mai o Mr Gay i kana olelo hooholo i hoihoi hou ia ai. Hooholoia.
Heluhelu mai o Mr Kalaukoa he olelo hooholo i $1,000 no ka hoomaemae ana i ke alanui kula, mai kela aoao aku o ke kahawai o Waikahalulu a hiki i ke alanui Liliha. Waiho ia i ke komite nana e noonoo nei i ka palapala hoopii e pili ana ia mea.
NA HANA O KA LA.
Heluhelu akolu ia ka bila e hoopau ai i ka pauku 480 o ke kanawai kivila, e hoopau ana i ke dala hookahi o ka auhau kino. Mahope o ka noonoo ia ana, ua hooholoia ka hoopaa ana i ka auhau kino.
Eia ka poe ae ma ka hoopau ana i ka auhau kino. Leleiohoku, Moehonua, Aholo, Kahuila, Kaiue, Kanealii, Kamauoha, Pilipo, Lilikalani, Birch, Halstead, Gay, Helekunihi, Barenaba, Kalaukoa, Aiwohi, Nawahi, Halemanu, Mahoe, Nahaku, Wana, Nakaleka, Mahelona, huiia he 23.
Eia ka poe hoole i ka auhau kino. Dominis, Kapena, Green, Walker, Kakela-opio, Kakela-makua, Waila, Ake, Naili, Gay Waterhouse, Naukana, Preston, hui ia he 13 poe hoole.
Heluhelu alua ia ka bila e hoololi ai i ka pauku 1 o ka mokuna 56 o ke kanawai karaima, e pili ana no ka haalele ana i na mea i mare ia. Hoopanee loa ia.
Heluhelu alua ia ka bila e hoololi ai i ka mokuna 40 o ke kanawai karaima, e pili ana no ka walaau po. Kakau poepoe ia.
Hoomaha ka Hale.
Halawai ka Hale ma ka hora 1 P. M
Heluhelu alua ia ka bila e hookau ai i na paahana malalo o na aelike ma na la koho balota. Waiho ia i ke komite wae. Hon. Gay, Aholo, Kapena, Barenaba, a me Mahoe na lala o ke komite wae.
Heluhelu alua ia ka bila e hoopau ai i ka mokuna 10 o na kanawai o 1870 e pili ana no ke oki mare. Waiho ia ma ka papa a hoi mai ka Hon Kauai ka mea nana ka bila i lawe mai.
Heluhelu alua ia ka bila e hoololi ai i na pauku 1, 2, 30, o ka mokuna 59 o ke kanawai karaima, oiai e noonoo ia ana. Ua waiho ia imua o ke komite o ka Hale. Noho o Kahanu ma ka noho. Heluhelu ia ka pauku, 1, 2, 3, 4, 5, a hoopau ia ke komite, me ka hai aku i ka Hale, ua hooholo loa ia ka bila no ke kakau poepoe ana. Aponoia. Hooholoia e heluhelu akolu ma ka Poaha e hiki mai ana.
Heluhelu alua ia ka bila e hooholo ai i ka mokumahu holopili aina. Waiho ia a noonoo pu me kekahi bila mokumahu e ae, ma ka Poaha.
Heluhelu alua ia ka bila e hoololi ai i ka pauku 49 o ka mokuna 55 o ke kanawai karaima. Waiho ia no ke kakau poepoe, a e heluhelu akolu ia ma ka Poaha.
Heluhelu alua ia ka hoololi no ka pauku 20, o ke Kumukanawai, mahope o ka noonoo ia ana, ua hooholoia ka hoololi no ke kakau poepoe ana, a e heluhelu akolu ia ma ka Poakahi.
Eia ka poe i makemake aole pono ke koho ia na lunakanawai i lunamakaainana, Moanauli, Martin, Aholo, Kahuila, Kaiue, Kaneali, Pilipo, Lilikalani, Birch, Naili, Halstead, Gay, Helekunihi, Kalaukoa, Aiwohi, Nawahi, Mahoe, Waterhouse, Nakaleka. Preston, Mahelona, Kaina, hui ia he 22.
EIA ka poe ae e noho no na lunakanawai i lunamakaainana iloko o ka Ahaolelo, Leleiohoku, Dominis, Kapena, Green, Moehonua, Walker, Kakela-opio, Kuihelani, Parker, Kahanu, Ake, Kamauoha, Barenaba, Halemanu, Nahaku, Wana, Naukana, hui ia he 17.
Heluhelu alua ia ka bila e hoololi ai i ka pauku 1, 3, o ke kanawai o 1868, e pili ana no ka lole a me kuai ana aku i ka pipi. Waiho ia no ke kakau poepoe, a e heluhelu akolu ia ma ka Poalua.
Heluhelu alua ia ka bila e hoololi ai i ka pauku 2 o ka mokuna 35 o ke kanawai hoopai karaima, e pili ana no ka maluhia Sabati. Hoopaneeia. Hoopanee ka Hale.
LA HANA 76.— Poakolu, Augate 2.
Halawai ka Ahaolelo e like me ka mau. Noi mai o Hon Kaai e hapai hou ia ka noonoo ana no ka bila e hoopaa ai i ka auhau kino, a e waiho ia ma ka papa. Hooholoia.
Hoike mai ka Loio Kuhina i na mea e pili ana i ka oihana makai o Honolulu, e like me ke kauoha a kekahi olelo hooholo ia e keia Hale.
Heluhelu mua mai o Mr Halstead, he bila e haawi ana i ka mana i ke Kuhina Kalaiaina e haawi aku i na laikini lapaau, Waiho ia no ka heluhelu elua.
Heluhelu mua hou mai no ia he bila e hoopau ai i ka pauku 259 o ke kanawai kivila. Hoihoi hou ia.
NA HANA O KA LA.
Noonoo ia ka Bila Haawina imua o ke komite o ka Hale. Noho o Mr Kalaukoa ma ka noho.
OIHANA KAUA. Ke ola o na koa $58,840
Kapae ia ka noonoo ana a hoike mai ka Oihana Koa.
OIHANA KALAIAINA. Uku Kuhina 10,000 Noi o Mr Birch. 8,000 " Nakaleka, 6,000 " Pilipo, 7,000 Hooholoia 8,000 Kakauolelo mua 4,000 Noi o Mr Pilipo 3,600 " Nakaleka 3,000 Hooholoia 4,000 Kiaaina o Oahu 3,600 Noi o Mr Kanealii 3,000 " Kuihelani 4,000 " Gay 5,000 Hooholoia 3,000 Kiaaina o Maui 3,600 Noi o Mr Barenaba, e hoopanee iki. " Kaai 4,000 " Lilikalani 3,000 Hooholoia 3,600 Kiaaina o Kauai 2,400 Noi o Mr Kanealii 2,000
Hooholoia 2,400 Kiaaina o Hawaii 3,600 Noi o Mr Kanealii 3,000
Hooholoia 3,600 Kakauolelo Kiaaina o Oahu, Hon. 800
" " Kaai 1,200 Noi o Mr Kanealii 1,000
Hooholoia 1,200 Koena uku Kakauolelo Kiaaina o Maui,
Hooholoia 150 Kakauolelo Kiaaina o Kauai 1000 Noi o Mr Lilikalani 800 " Kaai 950 Hooholoia 800 Kakauolelo Kiaaina Hawaii 1,200 Noi o Mr Kanealii 1000
Hooholoia 1,200 Lunapaahao Oahu 3,000 Noi o Mr Kanealii 2,400 Hooholoia, 3,000
Lunawai a Kakauolelo Makeke 3,600 Noi mai o Mr Preston, e hoohui i keia haawina me ka Luna Alanui, Luna o na Hana Hou a me ka Lunawai a Kakaolelo, Ka Uku 6000 Noi ka Loio Kuhina. Haawi ia keia haawina ma ka luna o kekahi komite wae.