Ka Nupepa Kuokoa, Volume XV, Number 33, 12 August 1876 — Page 4
KA NUPEPA KUOKOA, ME KE AU OKOA I HUIIA.
JESUS GENTLE SAVOR.
Royal Diadem p. 109.
1 Iesu, kahu olu,
E hoolohe mai,
Kii i na kamaiki,
A kiai maikai,
Oe no ka Lama,
Laina alohi mau,
Kaikai ia makou la
I kou home ao.
Ref.— Kaikai, kaikai,
Iesu kahu olu,
Kaikai, ia makou la
I kou home ao.
2 Oli no makou la
Mai ke ao a po,
Ole i kau maha,
Ole i luuluu,
Oi nae ka oli,
Kei ka pomaikai,
Ke aloha oe,
A hoola mai.
Ref.— Kaikai, kaikai, &c.
3 Iesu Hoa aloha,
Paipai ia makou
E hoolohe pono
I na alelo au,
I mau ae ka oli
Ma na la a pau,
A kena kou leo
E pii i ke ao.
Ref,— Kaikai, kaikai, &c.
Hawaii
HAAWINA KULA SABATI
[HOOPONOPONOIA E REV. L. LAIANA.]
Ka Hapaha Ekolu. HELU 8 — SABATI, AUG. 20, 1876.
Kumuhana.— KA WAIWAI O KA NAAUAO. Pauku Baibala.— Solomana 3 ;— 19.
E KUU keiki, mai haalele oe i ko'u kanawai, E waiho hoi i ka'u mau kauoha ma kou naau.
2 No ka mea, oia ka mea e nui ai na la a me na makahiki o kou ola ana, A o ka malu hoi e haawiia ia oe.
3 I ole e haalele ia oe ka lokomaikai a me ke aloha ; E hawele ia mau mea ma kou a-i ; E kakau hoi ma ka papa o ka naau.
4 Pela e loaa'i ka lokomaikai a me ka ike oiaio, Imua o Iehova a me na kanaka.
5 E paulele ia Iehova me kou naau a pau ; Mai hilinai hoi ma kou naauao iho.
6 Ma kou aoao a pau ia ia no oe e nana aku ai, A nana no e hoopololei i kou hele ana.
7 Mai hooakamai oe ma kou manao iho ; E makau ia Iehova a e haalele i ka hewa.
8 Oia ke ola no kou mau olona, A me ka lolo no kou mau iwi.
9 E hoonani ia Iehova ma kou waiwai, A me na hua mua o na mea a pau i loaa'i ia oe :
10 Alaila, e hoopihaia kou waihona waiwai a hu, E hu ae kau mau mea kaomi waina i ka waina hou.
11 E kuu keiki, mai hoole oe i ke ao ia mai e Iehova ; Mai pauho oe i kona hooponopono ana mai.
12 No ka mea, o ka mea a Iehova i aloha'i oia kana i paipai mai, Me he makua la i ke keiki ana i makemake ai.
13 Pomaikai ke kanaka ke loaa ia ia ka naauao, A o ke kanaka hoi i makaukau i ka ike.
14 No ka mea, ua oi aku ka waiwai o ia mea mamua o ke kala, A o ke kuai ana hoi mamua o ke gula.
15 Ua maikai oia mamua o na momi ; A o na mea a pau au e makemake ai, aole e like me ia ka maikai.
16 Aia ma kona lima akau ka loihi o na la ; A ma kona lima hema ka waiwai a me ka hanohano.
17 O kona mau aoao he mau aoao oluolu no, Ua paa hoi kona mau alanui i ka maluhia.
18 Oia ka laau o ke ola no ka poe e hoopaa ana ia ia, Pomaikai hoi ka mea e apo ana ia ia.
19 Ma ke akamai i hookumu iho ai o Iehova i ka honua ; A ma ka ike i kau aku ai i ka lani.
Mele —" Mau ke aloha o Iesu," Robina Gula 3. Pauku 1 me ka 4.
A kau na ao ino, e mele no nae, &c.
Pule i hoolohe na keiki, a malama i na olelo paipai iloko o keia haawina, &c.
Na Ninau a na Kumu.
P 1. Mai haalele oe i ke aha ? E waiho i ke aha ma kou naau ? Kanawai, kauoha, like pu anei ? Owai keia keiki ? Owai ka makua ?
P 2. Ma ke aha e loaa'i na la, na makahiki a nui, a me ka maluhia ?
P 3. Heaha kau e hanai i ole e haalele ka lokomaikai a me ke aloha ia oe ? E hawele maoli anei i na kanawai ma kou a-i ? Ka papa o ka naau, heaha ia ? Ehia ano o na papa ? Papa pohaku, papa laau, papa naau, &c.
P 4. Pehea e loaa'i ka lokomaikai a me ka oiaio ? Imua owai ?
P 5. E paulele ia wai ? Mai hilinai ma keaha ?
P 6. Ia wai oe e nana aku ai ma kou mau aoao a pau ? A nana oe e aha ?
P 7. Mai aha oe ? E makau ia wai ? E haalele i ke aha ?
P 8. Heaha ke ano o keia pauku ? Ua hoohalikeia ka uhane me ke kino, he olona, he lolo, he iwi. Heaha ka mea e pono ai ke olona a me ka iwi ? Heaha ka mea e pono ai, a e ikaika ai ka uhane ?
P 9. Ma ke aha oe e hoonani ai ia Iehova ?
P 10. Heaha ke ano o keia pauku ? He mea hoohalike ka makau i ke Akua me ka hoonani ia ia me ka mea kaomi waina, he mea e loaa'i ka pomaikai o ka uhane ?
P 11. Mai hoole oe i ke aha ? Mai pauaho i ke aha ?
P 12. Hana ke Akua pehea i kana mea i aloha'i, a makemake ai ?
P 13. Owai kai pomaikai ?
P 14. Heaha ka mea i oi aku i ke kala me ke gula ?
P 15. Ua oi hoi ka naauao i ke aha ? He mea e ae anei au i makemake ai i like ka maikai me ka naauao ?
P 16. Heaha ma kona lima akau ? Heaha ma kona lima hema ?
P 17. Heaha kona mau aoao ? A me kona mau alanui ?
P 18. Ka laau o ke ola ia ia wai ? A owai hoi kai pomaikai ?
P 19 Ma ke aha ke Akua i hookumu ai i ka honua, a kau ai i ka lani ?
Mele —" Praise ye the Lord," Robina Gula 1. Pauku 1 me ke 3.
Hoomaikai ae, e na kula, na mauna, &c.
Na Ninau a ke Kahu.
Na makua.— Owai keia makua e ao ana i kana keiki ? Owai hoi ke keiki ? He mau makua hoi oukou, he mau kumu, he mau haku, a he mau keiki, he mau haumana, he mau ohua ko oukou, heaha ko oukou pono ? E aha aku i na keiki, i na haumana, i na ohua ? Ke ao nei anei ? Mahea ? Ma ka pule ohana anei ? Ma kahi mehameha anei ? Ua hoolako anei ia lakou i ka Baibala, i ka Nupepa, i na Haawina Kula Sabati, i na Himeni, &c. ? Ke alakai nei anei ia lakou i na halawai Sabati, i na kula Sabati ? Ke waiho nei anei i kumu hoohalike maikai imua o lakou i kela a i keia la ?
Na keiki.— Hai paanaau mai i na pauku 1, 2, 3, 4, 5, 6, 7, 8, 9, 10, l1, 12, 13, 14, 15, 16, 17, 18. Ua like keia naauao me ke aha ? Me ka pono io, me ka makau i ke Akua, a me ka malama pono ia ia. Ma ke aha e loaa'i keia naauao ? Ma ka iini, ma ke noi, ma ka hooikaika mau me ke kiai mau i ka waha, i ka naau, &c.
Mele —" Marching Home," Robina Gula 4. Pauku 1 me ka 2.
Ku a naue i ka home, e, &c.
Pule no na makua, kumu, haumana, keiki, ohua Haawina no Aug. 27, Sol. 6 ; 6 — 22.
HELU 9 — SABATI, AUG. 27, 1876.
Kumuhana.— KA HOOIKAIKA IO. Pauku Baibala.— Solomona 6 ; 6 — 22.
6 E ka mea hiamoe, e hele oe i ka anonanona, E nana i kona mau aoao a e hoonaauao iho.
7 Aohe alii iaia, Aole haku, aole hoi lunakanawai ;
8 Hoahu no ia i kana ai i ke kau, I ka wa e ohi ai, hoiliili oia i kana mea ai.
9 E ka mea hiamoe, pehea ka loihi o kou hiamoe ana ? Ahea la oe e ala mai ai mai ka hiamoe ana mai ?
10 He moe iki ae, he hiamoe iki ae, He pelu hou iki ae i ka lima a hiamoe :
11 A e hiki mai kou ilihune me he kanaka hele la, A me kou nele e like me ke kanaka kaua.
12 O ke kanaka aia, o ke kanaka hewa, Hele no oia me ka waha hoopunipuni.
13 Iimo oia me ka maka, ao aku oia me ka wawae, Kuhikuhi oia me kona manamanalima ;
14 He kolohe no ma kona naau, Noonoo ino oia i na la a pau, Hookonokono oia i ka hakaka.
15 Nolaila, e loohia koke mai oia e ka make ; E haihai koke ia oia, aole mea nana e hoola.
16 O keia mau mea eono, he mau mea e inaina mai ai o Iehova ; Ehiku hoi e hoopailua ai o kona naau.
17 O na maka kiekie, o ke elelo wahahee. A me na lima hookahe koko hala ole.
18 O ka naau e imi ana i na manao kolohe, A me na wawae e holokiki ana i ka hewa.
19 O ka mea hoike hoopunipuni e hana ana i ka wahahee,
A me ka mea hookonokono i ka hakaka mawaena o na hoahanau.
80 E kuu keiki, e malama oe i ke kauoha a kou makuakane, Mai haalele hoi i ke kanawai o kou makuahine.
81 E hawele mau oe ia mau mea ma kou naau, E nakii oe ia mau mea ma kou a-i.
22 I kou hele ana, ea, e kai aku ia ia oe ; I kou moe ana e kiai oia maluna ou ; I kou ala ana iluna, oia ke kamailio pu me oe.
Mele — Pap along the watch word," Robina Gula 5. Pauka 1 me ke 3. E u a hooikaika, &c.
Pule i pau ka hiamoe, i ala a hana mau, &c.
Na Ninau a na Kumu,
P 6. E ka mea hiamoe, e aha oe ?
P 7, 8. Pehea ka anonanona ? Aole ona aha ? Heaha nae oia i hana'i i ke kau, a i ka wa ohi ?
P 9 — 11. Heaha ka ninau i ka mea hiamoe ? Heaha kana pane ? Heaha hoi kona hope ?
P 12 — 15. O ke kanaka hewa, hele oia me ka waha aha ? Aha oia me ka maka ? Aha hoi me ka wawae ? A aha me ka manamanalima ? Heaha ma kona naau ? Aha oia i na la a pau ? A hookonokono i ke aha ? Heaha kona hope ?
P 16 — 19. Ehia mau mea a ke Akua e inaina mai ai a hoopailua ? 6, a 7 paha. 1 He maka aha ? 2 He olelo aha ? 3 Na lima aha ? 4 Ka naau aha ? 5 Na wawae aha ? 6 Ka mea hoike hoopunipuni. 7 Ka mea hookonokono i ka hakaka.
P 20 — 22. E alia oe i ke kauoha a ka makuakane a me ke kanawai o ka makuahine ? E hawele a nakii ia mau mea mahea ? A e aha oia ia oe i kau hele ana ? I kou ala ana ?
Mele —" Hills of Heaven," Robina Gula 24. Pauku 1 me ka 4.
Ma o ae he aina nani, &c. Na Ninau a ke Kahu.
Na makua,— Ehia mahele o keia haawina ? Eha paha. No wai ka mua ? No wai ka lua ? Heaha ke kolu ? Heaha ka ha ? Huli pono.
Na keiki,— Hai mai i na mea ehiku a ke Akua i inaina a i hoopailua'i. 1 Ka maka kiekie. 2 Ka olelo wahahee. 3 Ka lima hookahe koko. 4 Ka naau imi i na manao kolohe. 5 Ka wawae holokiki i ka hewa. 6 Ka mea hoike hoopunipuni. 7 Ka mea hookonokono i ka hakaka.
Ke kula a pau.— Na ke aha e ao i ka mea hiamoe ? Ka anonanona wale no anei ? Pehea ka nalomeli ? Me heaha la e hiki mai ai ka ilihune, ka nele i ka mea hiamoe ? Ina e paipaiia ka mea hiamoe, e ala, pane mai pehea ? Ka waha, ka maka, ka wawae, ka lima, pehea ko lakou kokua ana i ka hewa ? Heaha ka hoahele, hoamoe, hoakamailio i haiia mai ma keia haawina ? Hai mai ma Roma 12 ; 11.
Mele —" Ke 'Lii Imanuela," Robina Gula 31. Pauku 1 me ke 3.
Ka paio ka hana, ka paio a mau, &c.
Pule i pau ka hiamoe, i ala a hana mau.
Haawina no Sepatemaba 3, Solomona 23 ; 29 — 35.
E KA NUPEPA KUOKOA E ; Aloha oe :—
Ua ike iho nei au i ka pane a ka Luna o Kona Akau, ma kou Helu 30, o ka la 22 o Iulai nei. Ke hai aku la i ko'u kulana iloko o ka Hale Ahaolelo, a ke i aku la i ko Hilo, oia ka makamaka o lakou. E ole hoi, eia mai ko oukou makamaka oia nei, ke hookupu aku la i na huhui ana lu iho nei. Pehea la e lohe mai ai ka poe o Hilo i kana olelo kohu ole, ua ike no lakou la, aole o ka'u mau mea au e apa ae la ka'u mau hana o Hilo, o na hana a ke kanaka makua ko'u i hana ai, o kau no ka wati kuhikuhi lalau. O kau mau mea e kuhikuhi nei iloko o ka Hale Ahaolelo, ua pae wale no ma Kaa, ka aina kaulana i Keaau, Apana o Puna, i noke wale iho la no i ka noke i na Kuhina, aohe wahi a neeu ae, ua ike ia aku la ko lakou la hula ole. Ke i ae la, aole ka he hua " hoa," oia ke Kumukanawai. Ua pau paha na maka o ua luna la o Kona Akau, i ike ole iho ai na maka ona i ka pauku 47 o ke Kumukanawai, e olelo ana, " E hoohiki pakahi kela hoa keia hoa o ka Hale Ahaolelo." Aole no oe i ike, o lakou kekahi i hoohikiia e na Lunakanawai Kiekie, a ma ka kakou olelo akaka loa. Ma ka olelo Hawaii, ua oleloia ka poe iloko o kekahi anaina, he poe hoa lakou no ia anaina, e like me ka olelo maloko o ka pauku 43, " e noho no lakou mawaena o na'lii ;" aole i oleloia, " e noho lakou ma ka aoao o na'lii." Aia lakou iwaena kono o na alii. A ina pela ka olelo ana, alaila, he poe hoa oiaio lakou no na alii, oia kahi e noho ai ka poe kupono, aole i oleloia e noho lakou ma kapa, a oia ka e hui, nou wale iho noia manao. Ke olelo hou mai la no kuu kupono ole e noho Lunakanawai no ka Apana o Hilo, ae, e aho no ooe ko laila ke kupono la oe. Ua lohe paha oe, ua noho Lunakanawai loihi au ma ka Apana o Puna no na makahiki 15, a no kuu hele i ka nahele i ka hana pulu a me kuu hoi e noho i Haku no kalua o pele waiho mai au i ka oihana. A pau kuu noho ana ilaila, hoi mai au i kai o Puna, aole au i noi mai i ka oihana au e olelo mai la, i haawi wale ia mai no, haalele loa au. Aka ua olelo ikaika ia mai e lawe — a lawe au la. A heaha no la hoi kou mea i noi ole aku ai i ka poe i kuleana maia wahi nou hoi ia wahi. Eia kekahi kumu i hooili ia mai ai, o ko'u like kaheka la ua pau pono o lalo aole " nono" ka mea e piha ai i ke kai lana malie — a ua like ae ka huewai ka nono ole mau no ka wai ka piha, aka o ka hue maikai ke nono aku, he kunono nae o lalo a i ka wa e kii ako ai e inu, aole he wai ua emi e like me " palahemo" aole he mea maloko, ua neo. Ua lohe au nou maia mai. I kou wa e noho Kahunapule ana no Kaumakapili, ua lawe oe nou iho na kenikeni a ka poe ilihune A ke uwe nei lakou, a ma kau e olelo mai nei owau kai lokoino i ka poe ilihune o Hilo, ua nana au ia mea aole i pili mai ia'u ia mea, a nolaila, o kau pohaku i nou mai ai ia'u, ua hoi hou aku noia a pa i kou iho. Aole nae au e olelo nui aku ia oe ma ia mea aia hoopuka hou aku au, alaila, kuu pau aku au i kuu puuwai e lele loa. Ke olelo aku la oe i ko Hilo no kuu hoi puolo aku he Lunahelu no ka Apana o Puna, ua makapaa no ka ua luna la o Kona Akau he lunahelu kahiko no au no Puna, a pehea la ia e kapa iau wale aku la no, ae, hoonele no hoi lakou la ia oe, aole hoi i hooili ia'ku no hoi ia oe ka lunahelu o Kona Akau, aole paha e pili kela olelo me kanono ia oe, o ka lunahelu he helu wale iho no kaua, aia i ka luna ohi ke dala.
Aole au i pane mawaho o ka maua alanui i hele ai, no ka mea, o na hana iloko o ka Hale Ahaolelo, oia ka mana olelo, a o ke kuikahi oia kana i huhu ai — a ua mahui mai au i ke ahe ma-aa, ua palapala aku nei ka i ko Kona Akau i na e holo ke kuikahi alaila hume i ka malo. Malia no o na luna la o Kona Akau ke hume i ka malo, oia no ka ka mea e paakiki nei i ka hoole i ka hoole i ke kuikahi ua makau honua no ka o hume i ka malo, aloha ino no ka hoi, ke i mai la e haawi pio aku au ia ia, ooe no kai hoopio mai ia'u, aole oe i pane mai nei i na mea a'u i pane aku ai ma ka Helu 28 o ke Kuokoa, nui na mea i koe aole oe i pane mai, a no ka loaa paha o ko puu-ai, ke luai maila oe me ka manao e hemo, aole e hemo na moe kea, aka eia ka pono e moni mau oe i aila mahanahana i pahee, alaila hemo, ke i maila ua piha ka au i ka inaina no kuu pilikino aku ka ia ia. Ua noonoo iho nei au i ka'u mea i pilikino aku ia ia, aole au i ike — ua olelo au no na mea ana i hana ai ma ka Hale Ahaolelo, aole mawaho, koe nae kuu hoohalike no ke kai papau, a pela no na haanou hou iho nei no na nalu e ake e poi maluna o na Kuhina. Kali malie ia mai no e na Kuhina a neo iho na nalu. Oili aku no lakou la puku laelae aku no, a like wale iho uo me na ale o ke kai i kupikipiki o, a huahua ae i ko lakou hilahila iho, kainoa o ua luna la o Kona Akau kai pilikino mai ia'u, a ua ike na lehulehu mai Hawaii a Niihau, ua olelo oia ke noho nei no au me ka wahine manuahi a pulau keiki eha paha ko lakou nui. A heaha ka'u i pilikino aku ai ia ia ?
Eia ka'u hana ma ko'u hele ana iloko o ka nahelehele, he ike aku i ka poe pilikia a kokua aku, i ka wa a ke Akua i hoopai ai i ko Kau, ua holo mai lakou a hiki i ko'u wahi ma Kapualei a ma ka hale hookipa i Kaauea, ua wehe akea au a haawi wale i na mea ai, ai lakou a hele aku me ka uku ole — Eia ka'u i lohe ai nou i kou wa ma Kona, olelo pono mai kekahi ia'u nou, ua kanaha komo ana o kou lima iloko o kana umeke me kana ipukai, aole hookahi ana i kau, olelo mai kekahi poe oiaio a kupono o Kona Hema ia'u nou, aia hiki aku oe i ko lakou wahi ohaoha lakou ia oe hookipa no hoi, hanai ia oe e like me ke ano o ke kanaka kupono, aia hoi a hele mai lakou ma Kona Akau i kou wahi, i ke maila nae oe e hele mai ana kekahi ka oo elima pahu ka nui, oili mai oe mailoko mai o kou hale a ku ma ka puka pa, ninau aku la ia lakou, ua makemake paha oukou e kipa i ko'u wahi, ae maila lakou, olelo aku la oe, ua pilikia loa au e hele ana au i keia wa, hele aku la oe, a hele aku la lakou ma kahie, oia ko'u lohe pono i kau hana ma kuu wahi, ina pelu ka hana a kekahi kanaka, alaila, eia kona inoa he kanaka pi. Aole pela ka poe noonoo kupono. Eia ko'u ike ina e kipa kekahi haole i ko'u wahi a ai a makemake e uku mai, a haalele aku, e ake no oia e kipa au a ai ma kona wahi, alaila pau kona aie, pela kekahi poe haole e noho nei ma Honolulu nei, e ake lakou e hele au ma ko lakou wahi e ai ai, aka, aole o'u ae aku, a ina pela au e hana ai he puuwai eleele au ? A ina pela kau hana ana alaila puuwai keokeo oe ea ? Ae kupono io no oe pela, kohu io no — Puuwai laelae.
Eia ka'u ike maka, ma Kahehuna oia ka la 4 iho nei o Iulai, ma ka hora 3 oia la, ua kukulu ia he papaaina nui na na haole a me na Lunamakaainana, ua paina a pau haiolelo, a o ua o Pilipo kekahi i haiolelo maia la. Ua hai kela he pono ia Hawaii e hui aloha me Amerika, a e kui lima pu no hoi, a e lilo laua i mau hoa aloha a kuikahi like hoi, nana aku la au i na Amerika e lou iki mai ana ka aka, a o kekahi poe e hui pu ana meia ano namunamu iho la no ko lakou lohe ana aku, e hoohui ana ia Hawaii me Amerika, no ka noke ana iho paha kekahi ina ono o ka papa kaukau a ko'u ka puu hewa ka waha, a ke ike maila oukou e ko Kona Akau i keia aia nei i hana iho nei e haawi ana ia Hawaii ia Amerika, a me oukou wale aku la noia. Ke hooki nei au maanei, ke hea maila na puu o Puowaina ia'u. Me na keiki o ka Papa Pai ko, u welina, a me ka Lunahooponopono ka mahalo.
L KAINA.
[Ke hoopuka nei makou i keia olelo pane a L. Kaina, aka, ke hai aku nei makou o ka pau keia o ka hoopaapaa mawaena o laua me G. W. Pilipo ma ke Kuokoa, no ka mea, aole he kumu ano nui ka laua e kamailio nei, aole hoi e makemake makou e hoopiha wale i ka nupepa i na olelo pili kino.
L. H.]
Make i aloha nui ia.
E KA NUPEPA KUOKOA E ; Aloha oe :—
Ma kou ahonui a me ka lokomaikai piha o kou Kapena, e ae mai ia'u e hoike aku ia oe i keia wahi moolelo kaumaha a me ka popilikia, i haule hia iho maluna o'u, oia keia.
Aia oia ka la 14 o Iulai nei, ma ka hora 1 me 15 minute o ka auina la, ua lalau mai la na lima menemene ole, i ka'u wahine mare, oia o Mrs. Kai ; a ua manele ia aku la kona kino ma kela kae o ka lua kupapa, a ua haalele mai ia'u i na makua na kaikunane, a me kona pokii, na kupuna e uwe a e kumakena aku ma keia ao, ua hanau ia oia ma Laie-wai, Oahu, he kaikamahine i aloha nui ia, a he kupa, a he kamaaina no na pali hauliuli o ke Koolau, a make aku la oia i ka umikumamaiwa a oi o kona mau makahiki, he 6 mahina a me 14 la o kona loaa ana i ka mai, a kuu aku la kona luhi i ka opu ana ole o ka honua, kahi e hele nei o ko keia ao a pau i ka hopena awaawa o keia ola kino ana, ina ua make oia iloko o ka pono. " Pomaikai ka poe make, ke make iloko o ka Haku."
Ua hoohuiia maua ma ka berita o ka mare e Rev Kekahuna, i ka la 23 o Aug M. H 1875 ma Laie-wai Oahu, 10 mahina me 16 la, ka loihi o ko maua noho pu ana, a no ka uluku mai o ka manao i ke aloha, a ua haku iho a'u i wahi kanaenae nona malalo iho :
He kanikau aloha nou e Mrs Kai,
Kuu wahine o ke ahe lau makani o Laie,
Oia aina kupa a kaua i noho ai,
A he mau keiki papa hoi kaua no ka aina,
Aloha hoi ka pono a ka makua,
Aloha ke alo haliu i ka makani,
Aloha ia wahi a kaua e hele ai,
I piliia e kaua ke anu me ke koekoe,
Oia la kikiki wela la o Lanihuli,
I ka huikau kanaka la o Bianarode,
Oia wahi a kau e luana ai,
Me na hoa lolipua o ka aina,
Hookahi mea a loko e hana nei,
Ke lalawe mai nei ke aloha i ko'u kino,
Kuu hou pili la he wahine,
Auwe kuu wahine hoi — e.
Kuu wahine mai ka ihu o ka lio,
Aloha ia kula kanaka ole la e Malekahana,
Oia aina mehameha kanaka ole,
Oni ana ka lae o Kahipa i ke kula,
Halii mai ana ka ulu hala o Kahuku i ke kai,
Hone ana ka leo o ke kai i na pali,
Hoomaka aku kaua i Waialee,
Aloha ia kula la e Pupukea,
Ona makani paio lua la e Waimea,
Nana aku kaua o ke ehu o ke kai o Puaena,
Aloha ia aina makamaka ole,
Hookahi makamaka o ka hana o ke aupuni,
Hoomaha aku kaua i Kaukonahua,
Aloha ia wai luu poo ikiiki,
Aloha ka leo o kuu wahine i ka pane mai,
Auwe kuu wahine hoi — e.
Aloha ia kula loa a kaua i pili ai,
I ka ua nee mai la i ke pili,
Ua pili ke aloha la i kuu nui kino,
Aloha ia aina lepo ula la i ke kai,
Oia, ia hamau leo la o Ewa,
Aloha ke one kuhi lima laula oia aina,
Oia piina ikiiki la e Kapukaki,
A komo aku kaua i ka lai o Honolulu,
Aloha na alanui kikeekee o ke Kaona,
Aloha ka ia haaheo o ka aina,
Oia huikau kanaka lua la e Ulakoheo,
Hohohoi aku kaua i ka uka o Pauoa,
Oia Home a kaua i noho ai,
Me na makua o kaua,
Kuu hoa pili he wahine,
Awe kuu wahine hoi — e.
Kuu wahine i ka uka o Nuuanu,
Mai ke alanui kikeekee mai i ka pali,
E mapu mai ana ke ala o ka hala,
Oia ulu hala la o Kekele,
Aloha na pali hauliuli o ke Koolau,
Oia mau pali kamaaina ia kaua,
Hoi aku kaua i ke one hanau,
Me na kini lehulehu o kaua,
Haalele mai nei oe ia makou,
Hele aku la oe i ke alanui makamaka ole,
Nalo na maka, pau ka ike ana aku,
Aia paha ka uhane me ka mea kiekie loa,
Nana no i hana, a nana no i kii mai,
Koekoe ka po ua hala oe ka wahine,
Kuu hoa ohumuhumu o kahi pono iki,
Auwe kuu wahine hoi — e.
Ke kumakena nei ou nui papa,
Ke haaloulou nei ou mau mama,
Ke hooniponipo nei o kaina ia oe,
Ke kaawili nei ou kunane ia oe,
Ke ualo aku nei ou kupuna ia oe,
A me ou kini lehulehu a pau,
Auwe kuu wahine hoi — e.
IOELA. K. APUAKEHAU. Laie-wai Koolauloa, Oahu Iulai 17, 1876.
UA HOOHUI IA.— Ma ka hora 11 A. M. o ka la 4 o Iulai nei, ua hoohui ia ma ka berika mare o ke kaula gula, ke Keiki Lalawai o na pali hauliuli o Waimano & Waipio, Mr. J. W. P Laahiwa, me ka nani maka palupalu o ka ua Hoehaili o Waimea, ma ka home nani o ka wahine, ma Maunahie, Waimea. Na ka haku mele kaulana laua i hipuu, Rev. L Laiana, me na paa mare pu e haiamu ana ma na aoao o na mare, nana aku a ke anaina, aohe puu, aohe kee. Mahope o ka pau ana o keia hana, ua wehe ia ka ahaaina nui a na mea nona keia la. Ua hoonani ia ke kahua ahaaina me na lau lipolipo o ka Waokele i kui puia me na pua nani o na kihapai. Ua hele wale aku paoa i ke ala o ka mala o Edena, ua nui na la i hoomakaukau ai no na mea paina, o na ano ai Hawaii a pau, a me na mea ai haole he nui wale, ua hoopiha ia na makaikai a lawa he huina i hiki i ka 400 paha. Malaila pu ae o F. Pakana, Dr Nikola, Waiau Esq, Mr Kuikahi &c, ua hauoli piha ko Waimea nei no keia hana, a no ka hui olioli kekahi i ka la kuokoa o Amerika. E mahalo ia na mare, me ka laua o ka manao, e uhai ia ma ko olua meheu, he pomaikai, oiai olua, ua ao ia ma na kula kiekie, ke paa nae i ka mole o ka naauao. O ka hope loa o na hana oia la, he manao paipai na S H. Mahuka. E. H. U. WAIOMANUHELE. Waimea, Hawaii, Iulai 5, 1876.
KA HUNT'S LAAU OLA
(HUNT'S REMEDY)
HE LAAU LAPAAU HOU, MAI AMERIKA MAI ! He Laau Maikai keia no Na mai pehu o ka opu, Na mai o ka puupaa a me ka opu mimi, Mimi-paa, Mimi-eha, Mimi-helelei, Ka lepo gravel iloko o ka opu-mimi, Ka mana ole, kapalili, hui ono ole ka ai. Na Mai Wahine, NAWALIWALI O KE KINO, LEPO ULA ILOKO O KA WAI MIMI, MANOANOA PAHA KA WAI E like me keokeo o ka huamoa, Like paha me na kaula silika keokeo, eleele, lenalena paha ; a i ole ua like paha me ka lepo i anaiia i na iwi keokeo, a i ka mimi ana, ua wela oioi ka mai, me ka eha nui o ke kikala a me ka puhaka.
HE NUI NA HOIKE e ola nei, ka poe i loohia i keia mau mai i haiia maluna ae, ua pau lakou i ke ola maikai, no ka inu ana i ka HUNT LAAU OLA. ("HUNT REMEDY)!"
UA HAAWI mua ia keia laau, e kekahi kahuna lapaau naauao, i ke kanaka mai pehu o ka opu, e noho ana me ka ohana a Mr. Hunt ; John Hunt kona inoa, he 45 kona mau makahiki, he kanaka nui poepoe, ua loohia i ka mai pehu. Ua haawiia kela me keia laau no keia mai, aole nae oluolu ; ua mahuahua mau kona pilikia, ua pau loa ke kino a me na wawae i ka pehu ; ua kokoke paa loa ka mimi ; kokoke pau loa ka hanu ana ; a ua mahuahua loa ka wai iloko o ke kino. Aole hiki iaia ke moe ilalo ma ka moe, nolaila, ua noho wale no iluna i ka po a me ke ao. Pela mau kona popilikia a hiki i kona hoao ana i keia laau, a ke kahuna i kuhikuhi mai ai. A i kona inu ana i keia laau, ua hoomaka koke ka oluolu. Ua paipai koke ia ka puupaa i ka laua oihana ; ua puka hou ka wai mimi a nui wale ; ua emi koke mai la ka pehu o na waewae ; a ua oluolu hou ke ake-mama i ka hanu ana ; ua oluolu a maikai ka io o na lala, a e hoi nui mai ana ke ola maikai, alaila, me ke kuhihewa, ua waiho oia i ka laau i kekahi mau la. Ua pono ole nae ka waiho ana ia manawa, no ka mea, aole i ola io maoli kona mai pehu. Ua molowa hou na puupaa i ka laua oihana, a ua mahuahua hou ka wai iloko o ka opu, a ua popilikia hou e like me mamua. Alaila, ua inu hou oia i ua laau la, a ma ka hoomanawanui ana, ua lanakila hou auanei maluna o ka mai, a ua ola io maoli, a ua hoomaka hou oia i kana oihana mawaho o ka hale.
Oia ka lapaau mua ana me keia laau ; a mai ia wa mai, (he 25 makahiki) ua hahanaia keia laau e like me ka hana ana o Mr. Hunt, a ua haawi na kahuna lapaau i keia laau i ka poe mai pehu a me na mai like.
Mai ia manawa mai, ua ikeia, e mahaloia hoi keia laau, mai o a o, e na kanaka, a ua inu ia hoi ma ke ao ana a me ke ao ole ana mai o na kahuna lapaau ; oia ka mea i hoola mai i na kanaka he nui, ka poe pilikia i ka mai pehu, a kokoke i ka make.
Na kuhikuhi no ka inu ana :
E INU I KE PUNA TI PIHA, a hala na hora 4, alaila, e inu hou. E mahuahua liilii nae a hiki i elua puna ti piha — a hiki hoi auanei i puna nui piha.
NO KE KEIKI hookahi makahiki a hiki i na makahiki eono, e haawi 5 kulu, a hiki i na kulu 20 ; eha hora nae mawaena o ka haawi ana.
KUMUKUAI, he - - $1.50 no ka omole.
DILLINGHAM & CO.,
762 3m 774 Na Agena no ka Pae Aina Hawaii.