Ka Nupepa Kuokoa, Volume XV, Number 35, 26 August 1876 — Page 1
NUPEPA KUOKOA :
KE KILOHANA POOKELA NO KA LAHUI HAWAII.
BUKE XV. HELU 35. HONOLULU, POAONO, AUGATE 26, 1876. NA HELU A PAU 769.
MAIKAI KA HOI KA PAPA !
— A ME —
Ka Laau o kou Hale ! No Hea la ?
KA I NO HOI NO KAHI O WAILA MA ! Nana aku no hoi ia la, OHI KA IO O KA LAAU O MAKAWAO, i ka ua mea o ka nani o Na Papa, Na Laau A ME NA PONO KUKULU HALE O NA ANO NO A PAU, MA KE KIHI O Na ALANUI PAPU a me MOIWAHINE, Honolulu MALAILA E LOAA AI E LIKE ME KA makemake, no ke Kumukuai makeponoloa. PAPA, PAPA, PAPA Na PAPA huluhulu, Na PAPA manoanoa, Na PAPA i kahiia, Na PAPA kepa, PAPA holo keokeo, PAPA holo ulaula. NA LAAU! LAAU! NA KUA. NA KAOLA, AAHO, MOLINA, PEAPEA, PINE HULUHULU, PINE I KAHIIA, Na Papa a me na Laau Ulaula ! PILI ULAULA PILI KEOKEO, PANI PUKA, PANI PUKA ANIANI IPUKA ANIANI, OLEPELEPE. PENA O NA ANO A Pau Hulu Pena mai ka liilii a ka nui ! AILA PENA ! AILA HOOMALOO, WANIKI, PATE NA LAKO o kela a me keia ano. NA AMI-PUKA HALE, NA AMI-PUKA PA. ANIANI ! Pepa Hale me na lihilihi E LOAA NO MALAILA KA PAAKAI Helu 1, O KAKAAKO a me PUULOA No ke Dala kuike, e loaa no na mea a pau i haiia ae la no ke kumukuai emi loa.
O na kauoha a pau mai Hawaii a Niihau, e loaa'ku ana ia lakou, e hooko koke ia mai ana no ia me ka lawa pono.
E kipa nui ilaila, i ike i ka oiaio
761 3m 773
HE
IWAKALUA TAUSANI LEGUE
MALALO O KE KAI !
— NA MEA —
KUPANAHA O KA MOANA !
KE ALA O KA MEA HUNA,
— A O KA MEA —
POHIHIHI O KA 1866 !
MAHELE 1.
MOKUNA XVIII
NO VANIKORO.
MA KA la 27 o Ianuari, A. D. 1827, Haalele oia i Kalakaka, a holo aku la i Vanikoro.
Mahope iho o na ku ana o ka moku Recherche ma kekahi mau awa o ka Moana Pakipika, ua ku aku la oia mamua pono o Vanikoro, ma ka la 7 o Iulai, 1827, oia hoi ke awa, o Vanou kahi a ka Nautilo e ku nei i keia wa.
A ua ohi oia i na ukana o na moku ili. Na pu kuniahi, kaulahao, panana, a me ka wati, a ma ia wati, ua kau ia he mau huaolela, " Bargin m'fait" he hoailona no ka hale hooheehee hao ma Brest ma ka A. D. 1785. No keia mau mea, aole he mea e kanalua ai, no ka make ana o La Perouse ma.
Noho liuliu loa o Dillon ma Vanikoro, a hiki i ka malama o Okatoba, haalele oia ia Vanikoro a holo aku la oia i Nu Kilani a malaila a hiki hou i Kalakaka ma ka la 7, o Aperila, 1828. A ma keia la no, hoi loa oia i Farani ; a i kona hiki ana, ua hookipa maikai loa ia oia e Kale X., ka Moi o Farani.
Ia Kale X., e hoolohe ana i na hoike ana a Kapena Dillon no na mea ana i ike ai o na moku ili. O ka wa no ia i hoomakaukau ai o Dumont d'Urville, me ka lohe ole i ka Kapena Dillon wahi i holo ai e huli i na moku i haohao ia.
Iloko o ia holo ana, halawai aku la oia me kekahi moku okohola, a hai ia mai la ia Dumont d'Urville, ka loaa ana o kekahi medala a me ke kea o St. Louise i kahi poe hupo o Louisieda a me ka Nu Kalekona. A hala 2 mahina mahope iho o ka haalele ana o Kapena Dillon ia Vanikoro, ku aku la o Dumont d'Urville ma ke awa o Hobata Taona (Hobart Town) akahi no ia a lohe i ko Kapena Dillon hiki ana malaila e huli ai i na moku nalowale, a lohe hou mai la oia, i ka ike ia ana o kekahi mau kua hao a me kahi mau mea e ae no na moku ili mai, iwaena o na kamaaina o ka mokupuni ma ka latitu hema 8 o 18', a ma ka lonitu hikina 156 o 30'. Aole nae he hilinai loa aku o ia nei ia mau lohe, ake loa no keia e hele ma na wahi a pau a Kapena Dillon i hele ai.
Ma ka la 10 o Feberuari, 1828, hiki aku la oia mawaho ae o Tikopia, a lele i uka, imi aku la oia i alaka ia i maheleolelo, a loaa, alaila, ua lawe ia ia mea i alakai e hiki ai i Vanikoro ; a ma ka la 12 ae, ike ia aku la ka aina, aka, holo kalewa wale no lakou nei, a hiki i ka la 20, kuu ka pohaku ma ke awa o Vanou. Ma ka la 23, lele na'lii i uka e huli ai i loaa na lono oiaio no na moku make ; aka, aole ae mai o na kamaaina e lawe ia lakou nei i ua wahi ino nei. No keia hoole ana o na kanaka, manao iho la na malihini, ua hana ino maoli ia no ka o La Perouse, a oia ke kama o keia hoole ana aole e alakai ia lakou nei, me ka manao e hoopai'a ana lakou i ka pau ana o La Perouse ma i ka make ; aka, he mau manao ulu wale keia.
Aia ma ka la 26 ae, loaa mai la he mau makana mai na kamaaina mai, me ka hoole loa mai, aole o lakou maka'u no na mea i olelo ia maluna, oiai aole loa no i hana ia kekahi hana lokoino e like me ia i olelo ia maluna ; a ua alakai ia malaila kekahi o na malihini.
Aia malalo o ke kai ekolu a eha paha anana ka hohono, e waiho mokaki ana na kaulahao, he heleuma he 1,800 paona, he pu keleawe a me na mea e ae he nui wale, a ua pau i ka ohi ia e Dumont d'Urviile me kona mau luina.
Mahope o ka loaa ana o keia mau mea, ninaninau pono aku la o Dumont d'Urville i kamaaina no La Perouse, a hahai'a mai la. I ka hiki ana mai o La Perouse me kona mau moku elua maanei, ua make ia mau moku ma keia kuanalu, a mahope iho, ua hana hou oia he wahi waapa a maluna o ia waapa oia i nalo loa ai a hiki i keia wa.
Aia hoi ke aupuni o Farani, ke hopohopo la, o loaa ole ke ala a Kapena Dillon i hele ai. No ia hopohopo, ua hoouna hou ia he moku o Beonaise malalo o ke alakai a Leogoarant de Tromlin, i Vanikoro. A hala he mau mahina mahope iho o ka hoolele ana o Dumont d'Urville ia Vanikoro, ku aku la o Beonaise malaila ; aole nae he mau lohe hou ae, o na mea kahiko wale no a Kapena Dillon i hoolaha ai ; aka hoi, hookahi mea ano e iki, oia hoi ka manao ana o na kamaaina hupo, e kukulu i he hoomanao no La Perouse. O keia iho la ka'u mau mea i hahai aku ai ia Kapena Nimo.
" Pela iho la i ike ole ia ai e kekahi mea, kahi i make ai ke kolu o na moku, oia hoi kahi waapa ;" i pane mai ai o Kapena Nimo. A ae aku la no hoi au. A kono mai la o Kapena Nimo ia'u e hele maua ma ka rumi nui ; a hiki maua malaila, alaila, hoemi ia iho la ka Nautilo iloko o ke kai, he mau iwilei malalo o na ale paialewa o ka moana.
Ia emi ana, holo aku la au a nana ma na puka aniani, i ike ia na mea o lalo ; a ma ia nana ana, ua ike ia na mea nani o lalo o ka papaku, na ia a me na holoholona liilii hana akoakoa — a o kekahi mau mea a'u i ike aku, oia no na ukana o na moku make, e waiho mokaki mai ana me ka nalowale ole, na heleuma, na pu, na poka a me ka hope o ka moku ; a oiai e nana ana i keia mau mea, pane mai la o Kapena Nimo ia'u me ka leo kaumaha, " Ua holo mai o La Perouse ma ka la 7 o Dekemaba, 1785, me kona mau moku elua, La Bousole a me Asetolabe. A ku mua oia ma ke Kaikuono o Botani, a hele makaikai aku la i na mokupuni o Kaledonia a me Ferenele, a mai laila aku holo loa i Sana Keruza a hiki ma Namouka, kekahi o ka pae moku o Hapai. A mai laila aku ka holo ana a ili a make ma na kuaau ike ole ia o Vanikoro. O ka moku Bousole ka mea mua i ili, a holo aku hoi ka moku Asetolabe me ka manao e kokua ; aka, papapau pu i ka ili. O ka mua i ili ai, aole i emo, o ka pau no ia i ke okaoka, a o ka lua o ka moku, he mau la kona paulupa ia ana o ka makani, a hoi aku la oia iloko o ka luahuna o ka moana e like me kona mua.
O na'lii a me na kanaka o keia mau moku, ua hoe lakou i uka o ka aina e noho ai, me ka hookipa oluolu mai o na kamaaina i na poe olulo. Ia noho ana ma ka aina, hana iho la lakou, i waapa me kekahi mau lako o na moku mua i loaa mai ia lakou. A i ka holo ana, ua noho no kekahi poe ma ke ano hoohili ia Vanikoro, a o kekahi hoi, ua ano omaimai, a oia poe ka i holo pu me La Perouse maluna o ka waapa. Ia holo ana, ua lawe lakou i ka ihu e hiki ai na mokupuni o Solomona, a malaila lakou i pau loa ai i ka make ma ke kapakai komohana o ua mokupuni nei mawaena o na Lae o Hoopunipuni (Deception) a me Oluolu."
No keia mea, ninau aku la au ia Kapena Nimo, pehea oe i ike ai ?
Hoike mai la kela ia'u, he pahu tini, a maloko o laila, he mau pua pepa, ua hele a lena ; aka, he hiki no nae ke heluhelu ia.
O keia mau palapala, oia no na olelo ao a ke Kuhina o na aumoku ia La Perouse, a ma hai o ka palapala ua kau inoa ia e Louis XV.
A puana hou ae la o Kapena Nimo, " He make nani keia no na poe holo moana, waiho na kino iloko o na hale ilina akoakoa, ka lua malu ; a ke manao nei no au ia'u a me ko'u mau hoa holo moana, aohe no he lua kupapau e ae, eia wale no, o na ilina akoakoa.
MOKUNA XIX. KE KOWA O TORESA.
Ma ka po o ka la 27 a o ka la 23 paha o Dekemaba, haalele ka Nautilo i na kapakai o Vanikoro, me ke kuupau ana i ka holo. O ka ihu ia wa he hema komohana, a iloko o na la ekolu, hala ia makou na legue 750, ke kaawale mai ka pae moku o La Perouse a me ka lae hikina hema o Papua.
Ma ke kakahiaka nui o ka la 1 o Ianuari, 1868, pii pu mai la o Kosila me a'u ma ka oneki.
A pane mai la o Kosila, " E ke kumu e ae mai anei oe ia'u, e haawi aku au i ka pomaikai makahiki hou ia oe ?"
" Ke apono nei au i kou manao maikai, a ke hoomaikai aku nei au no ia mau mea. Eia nae ka'u ninau ia oe, heaha la ke ano o ka 'pomaikai makahiki hou,' malalo o ko kakou mau ano i keia wa ? Ke manao nei anei oe, o ka makahiki ka mea e lawe ana ia kakou a hiki i ka hopena o ko kakou noho pio ana, a o ka makahiki paha ka i nana mau mai ia kakou iloko o keia holo moana ano e ?"
A pane aku la o Kosila, " Ua hiki ole ia'u ke hai aku i ka haina e ke kumu. He mea maopopo nae e ike ana kakou i na mea hou i ike mua ole ia. Ina malama elua i hala ae nei, ua ike kakou na mea kupanaha loa ; a ina e hoomau hou aku ana kakou i ka hele ana imua, alaila, aole au i ike i ka hopena. Aka, ma ko'u manao maoli ea, aole e loaa ana ia kakou na mea mua, a ke makemake nei au o na mea maikai e pomaikai ai oe e ke kumu, a nolaila o ka loaa ana ia kakou o ka pomaikai makahiki hou, kekahi mea nui, a iloko o laila, e hiki ai ia kakou ke ike i na mea a pau."
Ma ka la 2 o Ianuari, hala ia makou na mile he 11,340, oia hoi 5,250 legue Farani, mai kahi i hoomaka mai ai ka holo, ma na kai o Iapana. Mamua o ke kau pono ana o ka ihu o ka Nautilo mawaho pono ae o na kapakai weliweli o na kai akoakoa, ma ke kahakai akau hikina o Auseterelia, kii ka Nautilo he mau mile mawaho ae o na palekai o kahi i make ai ka moku o Kuke ma ka la 10 o Iune, 1770.
Iloko o keia wa o ka Nautilo e ku ana mawaho, kupu ae la ka makemake ia'u e hele e ike i ke kohola, he 360 legue ka loa ; a ma ke poi mai o na nalu o ke kai me ka ikaika loa, ua hiki ole ia'u ke aa aku e hele e ike. A ia wa no ua luu iho la ka Nautilo iloko o ka hohonu, a pela i pau ai ko'u ike ana aku i na paia akoakoa kiekie o ke kohola. Pau ae la ko'u nanea ana ma neia mea a hoi ae la au a hoonanea iki iho la i ka nana ana i na ano ia he nui wale i hei mai i ka upena, oia hoi ka makele a me kekahi mau ano ia e ae he lehulehu wale, no keia mau ia i loaa mai ia makou, ua lawa mau makou me na mea makamaka hou. A o kekahi mau mea e ae malama ia i mea hoikeike.
Elua mau la mahope iho o ka hala ana o ke kai akoakoa, ike aku la makou i na kapakai o Papua oia hoi ka la 4 o Ianuari. Hai mai la o Kapena Nimo i kona manao ia'u, he makemake loa oia e holo ma ka moana Iniana ; ma ke Kowa o Toresa e komo aku ai.
O ke akea o ke Kowa o Toresa ua aneane e hiki i ke 34 legue, aka ; he lehulehu nae na mokupuni, na moku liilii, na kohola e poi ai ka nalo, a me na pukoa, e ane hiki ole ai i ka Nautilo ke komo : no keia mea, ua lawe o Kapena Nimo i na akamai a pau a me ka makaala loa ma ke komo ana ma na ala kikeekee ; a o na luina no hoi kekahi poe makaala loa ma na mea a pau a ke kapena e pane aku ai, malaila wale mai no na sela.
Oiai makou e hookomo ana, pii aku la au a me o'u mau hoa elua, ma ka oneki. Aia hoi mamua mai o makou ka hale o ka mea ku hoe, a hoomanao ae la au o Kapena Nimo la kekahi e kuhikuhi ana i ke ala e komo aku ai ka Nautilo. Aia hoi imua o'u ka palapala aina o ke Kowa o Toresa, a ka mea ana moana kaulana oia hoi o Vincendon Dumoulin. O keia a me ka Kapena King, na palapala aina maikai loa, ua hoakaka pono loa ia na mea nui a me na mea liilii, na wahi papau a me kahi hohonu o keia kowa ; a o ka'u hoi ka hoakaka pololei loa. Ia makou e komo nei, ke poi nei na aie ma na wahi a puni o ka Nautilo. I ke ea ana mai o na ale, mai ka hema hikina mai a i ka akau komohana, ma ka 2 1/2 mile, a haki aku la iluna o ka pukoa, a pela iho la i ike ia ai ia wahi, ma kela a ma keia wahi.
(Aole i pau).
Ke Kau Ahaolelo o M. H. 1876.
LA HANA 82.— Poakolu, Augate 9.
Halawai ka Ahaolelo e like me ka mau.
Hoike mai ke komite pai, ua pai ia ka bila e hoakaka ai i ke ano a e hoomaopopo ai i ke ano o na palapala kii a me na palapala e pili ana i na ahahookolokolo.
Heluhelu mua mai o Mr Mahoe he bila e hooponopono ana i ka oihana leta, a e hoonoho ana i na Luna Makai i mau luna leta ma na apana. Ma ke noi ua kapae ia na rula, a heluhelu alua ia ka bila ma ke poo. Waiho ia i ke komite wae, Green, Mahoe, Kakela-opio, Nakaleka, Kaiue Heluhelu mai o Mr Kalaukoa he olelo hooholo e ninau ana i ke Kuhina Kalaiaina, he oiaio anei, ma ka la Sabati e holoi nei na paahao i ko lakou mau lole. Hoole ia.
NA HANA O KA LA.
Heluhelu akolu ia ka bila e hoololi ai i ka pauku 1 & 3, o ke kanawai i apono ia, ma ka la 22 o Iune 1868, e pili ana i ka pepehi a me ke kuai ana i na pipi. Hooholoia.
Heluhelu akolu ia ka hoololi i manao ia no ka pauku 20 o ke Kumukanawai e papa ana i na lunakanawai, aole e koho ia i lunamakaainana iloko o ka Ahaolelo Hoihoi hou ia e kakau poepoe.
Heluhelu alua ia ka bila e hoonoho ana i kauka lapaau ma Kalawao. Waiho ia i ke komite wae, Barenaba, Aholo, Halstead Wana, a me Waila.
Heluhelu alua ia ka bila e hoololi ai i ka pauku 3, o ka mokuna 50 o ke kanawai karaima, e pili ana i na palapala bila. Waiho ia ka bila me ka hoololi no ke kakau poepoe a e heluhelu akolu ia ma ka Poaono.
Heluhelu aina ia ka bila e hoololi ai i ke kanawai e pili ana i ka auhau holoholona, i apono ia ma ka makahiki 1870. Oiai e noonoo ia ana, ua hoomaha ka Hale ma ka hora 12.
Halawai hou ka Hale ma ka hora 1 o ka auina la. Mahope o ka noonoo ia ana ua hoopanee ia ka bila. Eia ka poe e makemake ana e hoemi i ka auhau o ka lio i hapalua dala, Martin, Aholo Kanealii, Kamauoha, Pilipo, Kauai, Birch, Naili, Halstead, Helekunihi, Kalaukoa, Aiwohi, Nawahi, Halemanu, Nakaleka, Mahelona, hui ia he 16. Eia ka poe makemake ole ana e hoemi ia keia auhau, Kaiue, Barenaba, Waterhouse. Nahaku, a me Naukana, hui me 12 alii, like me 17.
BILA HAAWINA.
Noonoo ia ka Bila Haawina imua o ke komite o ka Hale. Noho o Mr Pilipo ma ka noho lunahoomalu.
Noi ke Kuhina o ko na aina e, e hapa ia ka noonoo ana no ka haawina.
Na alanui a me na alahaka no na mokupuni a pau. Mahope o ka hoopaapaa ia ana, ua hoihoi hou ke Kuhina o ko na aina e, i kana noi i noi mai ai. Hapai ia ka noonoo ana no ka Oihana Kinai Ahi o Honolulu 10,000 Noi o Mr Kanealii 8,000, a na ka poe waiwai o Honolulu nei e uku i ka hapalua o keia haawina.
Hooholoia 8,000 Mahele olelo a me unuhi, 300 Hooholoia 300 Na lilo no ka oihana wai 5,000 Noi o Hon Green 3,200 Hooholoia Hooholo mokumahu pili aina 10,000 " Mokumahu Pele, na lilo no ka holoholo ana, 8,000
Oiai e noonoo ia ana, ua hoopau ia ke komite me ke noi aku i ka Hale e like me na mea i hoike ia maluna. Aponoia. Hoopanee ka Hale.
LA HANA 83.— Poaha, Augate 10
Halawai ka Ahaolelo e like me ka mau. Hoike mai ke komite pai, ua pai ia ka bila e hooponopono ana i ka lawe ana mai a me ke kuai ana aku i ka opiuma, a me ka bila e hooponopono ai no ka mahele ana i ka wai ma na ahupuaa, o Waihee, Waiehu, Wailuku, a me Waikapu.
Hoike mai ke komite no ka noonoo ana i ka haawina o na alanui a me na alahaka o na mokupuni a pau e noi nui ana penei e hoonohonoho ai : Na alanui a me na alahaka o Hawaii 7,000
" Mokupuni o Maui, Molokai a ma Lanai 6,000 Na alanui me na alahaka o Oahu 5,000
Kauai 2,000
Huina nui o ka haawina $20,000 Waiho ia ma ka papa.
NA HANA O KA LA
Heluhelu alua ia ka bila e hoohoihoi ana i ka hooulu ana i ka lahui Hawaii ma ka haawi ana i na metala hoohanohano no na makua i hanau nui i na keiki
Waiho ia i ke komite o ka Hale. Noho o Mr Barenaba ma ka noho lunahoomalu no ke komite. Noonoo pakahi ia na pauku. Oiai e noonoo ia ana, ua hoomaha ke komite ma ka hora 12.
Halawai hou ke komite ma ka hora 1 auina la, mahope o ka ninau ia ana, ua waiho ia i ke komite wae. Hoopau ia ke komite o ka Hale, ua waiho ia i ke komite wae. Aponoia. Eia na lala o ke komite, Aholo, Kalaukoa, Lilikalani, Wana, Kamauoha.
BILA HAAWINA.
Noonoo ia ka Bila Haawina imua o ke komite o ka Hale, Mr Kauai ma ka noho. Noi o Mr Nahaku e hapai hou ia ka noonoo ana no ka oihana kinai ahi o Honolulu. Hooleia.
Noi ke Kuhina Kalaiaina e hapai hou ia ka noonoo ana no ka hoike a ke komite wae e pili ana no ka haawina o na alanui a me na alahaka no na mokupuni a pau. Hooholoia.
Noi o Mr Kalaukoa, e mahelehele ia ma na apana auhau kela haawina keia haawina. Mahope o ka noonoo ia ana, ua hooholoia, penei keia haawina : Na alanui & na alahaka o Oahu 6,000 hooholoia " " " Kauai,
Mokumahu Pele na lilo no ka hooholo ana 8,000 Noi o Mr Nahaku 6,000 " Barenaba 7,000 Hooholoia 7,090 Hana hou ana i ka mokumahu Pele 5,000 Noi o Mr Mahoe 4,000 " Kalaukoa e kapae Hooholoia 5,000 Na heleuma me na mouo. Hooh. 2,000 Kii ana i ke awa o Honolulu 5,000 Noi o Mr Helekunihi e kapae.
" Birch e pakui mai i mau huaolelo, a e heluhelu ia keia haawina penei : Eli ana i ke awa o Honolulu (aole nae e hoolilo ia no kekahi hana e ae) 5,000 Noi o Mr Aholo 3,000
Mahope o ka hoopaapaa ia ana, ua hoike mai o Mr Mahoe, ua hookaawale ia no i keia kau Ahaolelo he 1,000, no keia haawina, aole nae i eli ia ke awa. Aka, ua hoolilo wale aku no na Kuhina i ke dala, no kekahi mau hana okoa, a aole i eli ia ke awa, pela ka lakou mea i hoike imua o keia Hale i ka ninau ia ana, ua hooholo ia he 5,000. Eia ka poe i hooholo loa i keia haawina.Gay, Halemanu, Waterhouse, Nahaku, Preston, Kaina, hui me 15 alii, like me 21. Eia ka poe hoole, Aholo, Kahuila, Kaiue, Kanealii, Kamauoha, Pilipo, Lilikalani, Birch, Naili, Halstead, Helekunihi, Barenaba, Kalaukoa, Aiwohi, Nawahi, Mahoe, Wana, Naukana, Nakaleka, Mahelona, hui ia he 20 wale na poe aloha i ka lahui, oia keia haawina, me ka manao e hoemi mai i keia haawina.
Hana hou ana i na uapo 10,000 Noi o Mr Aholo e waiho i ke komite wae. Hooholoia e waiho i ke komite wae. Hale lamalama no Honolulu 1,500 Noi o Mr Nawahi 1,000 " Pilipo 1,200 " Barenaba e kapae. Hooholoia 1,500 Haua hou ana i ka hale lamalama ma Honolulu 800 Noi o Mr Kalaukoa e kapae. " Mahoe 600 Hooholoia 600 Hale lamalama o Lahaina 500 hoo