Ka Nupepa Kuokoa, Volume XV, Number 35, 26 August 1876 — Page 4
KA NUPEPA KUOKOA. ME KE AU O KOA I HUIIA.
SWEET BY AND BY.
Signet Ring. p 90.
1 Ma o ae la he aina laelae,
A ke hoea mai la ano ;
A malaila Iesu i hana'i
I mau home maikai no kakou.
Cho.— Ao laelae ao laelae,
ao laelae ao laelae,
Kahi e hui a oli ai.
ao laelae.
Ao laelae ao laelae
ao laelae ao laelae
Kahi e hui a ola ai..
2 Ma o ae ma ia aina laelae
Kani a mau na mele maikai,
Pau e pau la ka lohe ana'e
I na leo haalou a uwe.
Cho.— Ao laelae ao laelae ao laelae ao laelae,
Kani a mau na mele maikai, &c.
3 I ka Haku aulii maluna'e
Ka hoonani hosana a mau
No ko ia la aloha maikai,
A no kona mau nani a pau.
Cho.— Ao laelae ao laelae ao laelae ao laelae,
Mililani hosana a mao, &c.
Hawaii.
HAAWINA KULA SABATI
[HOOPONOPONOIA E REV. L. LAIANA.]
Ka Hapaha Ekolu.
HELU 10 — SABATI, SEPT.3, 1876.
Kumuhana.— KA ONA.
Pauku Baibala.— Solomona 23 ; 29 — 35.
29 Ia wai la ka uwe ana ? Ia wai la ka poino ? Ia wai la ka hakaka ? Ia wai la ka nuka wale ana? Ia wai la na palapu loaa wale ? Ia wai la na maka ulaula ?
30 I ka poe e hoomau ana ma ka waina, I ka poe e hele ana e imi i ka waina i kawiliia.
31 Mai nana oe i ka waina i kona ulaula ana, I kona aleale ana ma ke kiaha, I kona hu ana a maikai.
32 Mahope iho, e nahu mai me he nahesa la, A e pa mai me he moonihoawa la.
33 E nana auanei kou maka i na wahine e, A e hai aku kou naau i na mea ino.
34 E lilo ana oe me he mea la i moe iho mawaenakonu o ka moana, E like hoi me ka mea i hoomoe ia ia iho ma kahi oioi loa o ke kia moku.
35 Pepehi mai lakou ia'u, aole au i eha, Hahaua mai lakou ia'u, aole au i ike iho Ahea la au e ala'i ? E iini hou aku no au ia mea.
Pauku hoopaa, p. 31, 32.
Mele — Him. 460. 8 — 6 Leo — Farewell.
1 Kakoo, e ke 'Lii mana e,
I pahikaua nau,
E o i kou mau enemi,
I lohe mai lakou.
2 E holo lanakila ae
Me kau olelo mau ;
Kau pahikaua mana nei,
E malu ai ke ao.
Pule no na aina naaupo, hoomanakii, ona rama, &c.
Na Ninau a na Kumu.
P 29. Ehia ninau iloko o keia pauku ?
Heaha ka ninau mua ? Ka lua ? Ke kolu ? Ka ha ? Ka lima ? Ke ono ?
P 30. Pehea ka pane ana ? He oiaio no anei keia pane ana ? He poe ike maka anei kekahi o oukou ?
P 31. Keaha ka mea papaia ? Ehia mea e pili ana i ka waina iloko o ke kiaha ? Ulaula — Aleale — Hu ae. No ke aha e nana ole ai oe i ka waina e mea ana pela iloko o ke kiaha ? No hea ke kuko ?
P 32. Heaha ka hope o ka nana ana i ka waina ? Hai mai ma Iakoba 1 ; 15. He oiaio anei keia hope ?
P 33. E nana auanei ka maka owai i na wahine e ? Ka maka o ka mea ona paha.
A o ka naau owai e hai ana i na mea ino ?
Ka naau o ka mea ona e hoopuka mai ana i na olelo namunamu ino iloko o ka wa ona.
P 34. Owai ka mea i like me ka mea e moe ana mawaenakonu o ka moana ? Ka mea ona paha iloko o ka hihio ino. Ua like hoi oia me wai ? He wahi pilikia loa paha ia e moe ai, ma kahi oioi loa o ke kia moku.
P 35. Owai keia mea i pepehiia a hahaua ia, me ka ike ole, me ka eha ole ? Heaha ka ninau a ka mea ona ? He ninau paha keia, he haina paha ? Ka olelo nae ia a ka mea ona. Aia a ala mai mailoko o ka ona, e imi hou, a inu hou, a ona hou no.
Mele — Mele ona. 8 — 7. Melekike.
1 Nowai la ka u u ana ?
No ka mea ona no.
Nowai hoi ka po poino ?
No ka mea ona no.
Nowai la ka nuku wale ?
No ka mea ona no.
Nowai hoi ka maka ula ?
No ka mea ona uo.
2 Nowai la ka hakaka la ?
No ka mea ona no.
Nowai hoi ka maka pehu ?
No ka mea ona no.
Ino wale ! e ka ona !
Hele pela i ka po !
Moo nanahu, niho awa !
Mai hoopili ia makou.
Na Ninau a ke Kahu.
Na makua,— Heaha ke kumuhana ? He mea kahiko anei ka ona ? Ma ke aha i ona ai o Noa ? Pehea ka poe hoole, aole he mea ona ka waina ? Koe lakou i ka mea i ike pinepine ia. Nui anei ka poe inu waina ? Nui wale paha, kane, wahine, ka poe hanohano, ka poe hookipa, a hookipa ia ma na ahaaina. A pehea ? He mea maikai anei ka inu waina ? Ehia ninau e pili ana i ka ino o ka inu waina ? Heaha hoi ia mau ino ? Hai mai i kekahi mau pauku e pili ana i ka inu waina, inu rama, i ka ona, &c. ? Sol. 31 ; 4. Isaia 5 ; 11, 12, 22. Kekahuna 10 ; 17. Sol. 20 ; 1. Isaia 28 ; 1, 7, 8. Hosea 4 ; 11. Epeso 5 ; 18. Ioela I ; 5. Sol. 23 : 28. 26 : 9. 1 Kor. 6 : 10. Luka 21 : 34. Roma 13 : 13. Gal. 5 : 21. Nahelu 6 : 3. Pehea ka mea i haawi i ka mea ona ia hai ? Habak. 2 ; 15,
Na keiki.— Owai ka poe kahiko i hoohiki e haalele loa i ka waina ? Ieremia 35 ; 6. Na mamo a Ionedaba. Pono anei ke lilo oukou i poe mamo na Ionedaba ma ka hoohiki e haalele loa i ka waina, me na mea ona a pau loa ? Ae, ko makou manaopaa no ia, aole e inu i ka waina, i ka rama, barani, gini, awa, okolehao, bia, pota, aole hoopa, aole hoao, aole lawelawe. Maikai loa ia. Nawai e kokua i hooko oukou i ko oukou hoohiki ana ? Hai mai i na pauku hoopaanaau.
Ke kula a pau.— Nui loa ka inu waina, inu rama, ona rama, heaha ka kakou e hana'i i hoopauia ? Pehea na aha puali inu wai, kinai pua, kinai haka, i keia wa ? Ane make paha; Heaha ka pono ? E hoala hou paha. O ka ona anei kekahi kumu o ka emi o keia lahui ? Ina pela heaha ka pono ?
Mele — Mele hou. 7 — 6. Leo — Hosana
Kamalii.
1 Kiaha waina ula,
Moonihoawa nae
He make hoi maloko,
Mai pa, mai lawe ae,
Mai nana e ka maka
Ke piipii a hu ae,
Mai ae ke onou ia,
Hoole a hoolei.
2 Iesu ke Kahu pono.
Kokua ia makou
E pale i ka waina,
Na mea ona a pau,
I ole e lawelawe,
I ole e hoao,
O kau mai na poino,
A kanikau a mau.
Pule a hookuu aku.
Haawina no Sept. 10, Sol. 31 ; 10 — 31.
HAPPY IN THY LOVE.
Royale Diadem. p 45.
1. Pau no kuu kaumaha e,
Pau i kuu Iesu la,
Maluhia, pomaikai,
Oli ia Iesu.
Cho.— Oia no kuu mele mau,
Ke aloha o Iesu ;
Pili ia ia, oli pu,
Oli ia Iesu.
2. Hewa au, mai make no,
Ola i kuu Iesu la ;
Hoomaikai a oli au,
Oli ia Iesu.
Cho — Oia no kuu mele mau, &c.
3. Hele au a auwana'e,
Imi kuu Iesu la,
Apo ia'u a kai maikai ;
Oli ia Iesu.
Cho.— Oia no kuu mele mau, &c.
4 Lilo au i keiki nau,
Oe kuu Kahu pono,
Ma kou pa paa au a mau ;
Oli ia Iesu.
Cho.— Oia no kuu mele mau, &c.
Hawaii.
HAAWINA KULA SABATI. Helu 11. Sabati Sept. 10 Kumu hana. Ka wahine noho pono. Pauku Baibala. Sol. 31 : 10 — 3l
10 Owai ka mea i loaa ia ia ka wahine noho pono ? He waiwai oia i oi aku i ko na momi.
11 Paulele ia ia i ka naau o kana kane, Aole e nele oia i ka loaa ole.
12 He maikai no kana e hana'i ia ia aole hoi he hewa, I na la a pau loa o kona ola ana.
13 Imi oia i ka huluhipa a me ke olona, Oluolu oia i ka hana me kona mau lima.
14 Ua like no ia me na moku kalepa.
Mai kahi loihi e mai i loaa'i ia ia kana ai,
15 I ka wanaao, ala oia a haawi i ka ai na ko kona hale, A me ka mea e maona ai na kana poe kauwawahine.
16 Noonoo oia i ka mahinaai a kuai lilo mai ; Me ka hua o kona mau lima, kanu iho no oia i ka malawaina.
17 Kaei oia i kona puhaka me ka ikaika, Hooikaika hoi oia i kona mau lima.
18 Hoao oia i kona waiwai i maikai ia ; Aole i pio kona kukui i ka po.
19 O aku kona mau lima ma kahi e kau ai ke olona, Lalau kona mau lima i ka mea milo lope.
20 O aku oia i kona mau lima i ka poe nele ; Kikoo oia i koni mau lima i ka poe ilihune.
21 Aole ona makau e anu ko kona hale ; No ka mea, pao kona hale i ke koma kapa ulaula.
23 Hana oia i na kapa hoalii nona iho ; O ke kilika a me ka mea ulaula, oia kona kahiko ana.
23 Ua ikeia kana kane ma na ipuka. I kona noho pu ana me na lunakahiko o ka aina.
24 Hana oia i ka lole olona maikai, a kuai aku ; Haawi oia i na kaei i ka poe kalepa.
25 O ka ikaika, a o ka hanohano, oia kona kahiko ana ; E hauoli oia i ka manawa mahope aku.
26 Oaka oia i kona waha ma ka naauao ; A o ke aloha oia ke kanawai o kona alelo.
27 Kiai oia i ka hele ana o kona hale, A o ka ai no ka palaualelo, aole oia e ai iho
28 Ku ae kana mau keiki a hoomaikai ia ia ; O kana kane hoi mahalo oia ia ia.
29 Nui na. kaikamahine i hana pono, A ua oi aku oe mamua o lakou a pau.
30 He hoopunipuni ke alohaia mai, he mea ole ka maka maikai ; O ka wahine hoi i makau ia Iehova, oia ke hiilaniia.
31 E haawi aku nana i ka hua o kona mau lima ; O kana mau hana, oia ke hiilani ia ia ma na ipuka. Pauku hoopaanaau, p 30.
Mele.— Him. 335, 7 — Leo Wailuku.
1 E na keiki a ke Lii,
Nauwe me ke mele ae,
Mele aku ia Iesu,
Mele i kona nani mau.
3 Oli e na pokii nei,
Naue i kahi o ke Lii,
Kahi noho no oukou
Ma ke aupuni o Iesu.
Pule no na wahine, makuahine, kaikamahine, &c.
Na ninau a na Kumu.
P 10. Heaha ka ninau ? Me he la, he kakaikahi ka poe e loaa ana o ka wahine aha ? I na loaa heaha ka waiwai ? Nana no hoi Sol. 12 : 4. 18 : 22. 19 : 14. 1 Kor. 11 : 7.
P 11. Pehea ka naau o ke kane ? Owai ka i nele ole i ka loaa ? Nohea ka loaa ?
P 12. Heaha ka ka wahine pono i hana'i i ke kane ? Mau anei kana hana ana pela ?
P 13. Heaha kekahi hana a ka wahine pono ? He hana aha me ka huluhipa a me ke olona ? Aole anei oia i ohumu no ka hana mau ?
P 14. Owai ka i like me ka moku kalepa ? Ma ke aha ka like ana ?
P 15. Heaha kana ma ka wanaao ? Me he la he haku wahine keia ?
P 16. Noonoo oia i ke aha ? Ma ke aha hoi e loaa'i na mea e kanu ai i ka malawaina?
P 17. Kaei oia i ke aha ? me ke aha ? no ke aha? A aha hoi i kona mau lima ?
P 18. Heaha kana e hoao ai ? no ke aha ? Pehea kona kukui ? hana anei a ao ka po ?
P 19. Heaha kana hana ma keia pauku ?
P 20. O a kikoo aku oia i kona lima i ka poe hea ?
P 21. Makau ole oia i ke aha ? no ke aha ? He lole hoopumehana paha keia.
P 22. Heaha kana i hana'i nona iho ?
Heaha hoi kona kahiko ana ?
P 23. Pehea hoi kana kane ? Ua hanohano oia, a hui pu me ka poe lunahooponopono ma na puka, kahi akea, kahi hookolokolo ma ia mau aina.
P 24. Heaha kana i hana'i i mea kuai aku i ka poe kalepa ?
P 25. Heaha kona kahiko ? E aha hoi oia i na manawa mahope ? no ke aha?
P 26. Oaka kona waha ma ke aha ?
Heaha hoi ke kanawai o kona alelo ?
P 27. Pehea oia i ka hele ana o ko kona hale ? Ka ai aha ana e ai ole ai ? Heaha ka ai a ka palaualelo ?
P 28. Pehea kana mau keiki ? A aha hoi kana kane ?
P 29. Nawai keia mau huaolelo mahalo ? Na ke kane paha a keia wahine pono.
P 30. Hai paanaau mai i keia pauku.
Heaha ke alohaia ? heaha hoi ka make maikai ? Ka wahine aha ke hiilaniia ?
P 31. E haawi aku ia ia i ke aha ? A na kekaha oia e hiilani ? ma hea ? ma kahi akea.
Mele. Ka Iesu kamaiki au. Hae Hoonani 4.
Na ninau a ke Kahu,
Na makua. Nowai keia Haawina ? Ua loaa anei kekahi Haawina mamua e pili ana i na wahine wale no ? No ka wahine aha keia Haawina ? No ka wahine mare e noho pono ana. Nui anei na wahine mare i keia wa, ua like ke ano me ka wahine ma keia Haawina ? Nui paha ma kauwahi, he hapa ma kauwahi. Ma ka nana'ku he hapa paha ma Hawaii nei. Noho maikai no kekahi poe wahine mare me na kane malamalama pono no, hanai pono i na keiki no kekahi manawa. A mahope iho, ano e, hele lalau, haalele i ke kane, malama ole i na keiki.
Na keiki. Hai mai i kekahi mau wahine maloko o ka Baibala. Owai ka wahine mua ? Ka makuahine oia Owai ? o kakou a pau. Mahea ka mare mua ana ? Heaha ke kanawai mare mua ? Kin, 2 ; 24. Owai ka wahine a Aberahama ? Owai ka wahine i mahuka a hoihoiia e ka anela ? Owai ka wahine a Isaaka ? Loaa mahea ? nawai i kii ? Heaha kekahi hana pono ole ana ? Owai ka wahine alohaia a Iakoba ? Ma ke aha i loaa'i ? Heaha kana oihana ? Owai ka makuahine o Mose ? Owai ke kaikamahine o Mose ? O wai ke kaikamahine i hoopili loa i kona makuahonowai wahine ? Owai ke kaikamahine i haalele i kona makuahonowai wahine ? Owai keia makua ? Owai ka makuahine o Samuela ? He wahine maikai, a he keiki maikai loa kana, he keiki hewa ole, owai ia wahine ? Owai ka makuahine o Ioane Bapetiko ? Hai mai i kekahi mau wahine maikai e ae a oukou i lohe ai. Pehea la oukou e lilo ai i mau wahine maikai ? Ma ka hele ana paha i na kula kaikamahine. Maikai wale no anei lakou a pau ke puka mai noloko mai o ia mau kula ? A maikai ole anei ka poe a pau i hele ole ia mau kula ? Ma ke aha e lilo ai oukou, e na kaikamahine, i mau wahine noho maikai, i mau momi maikai no na kane mare ? Ma ka pule paha, ma ka hoohanau houia e ka Uhane Hemolele, ma ka makau ia Iehova me ka malama pono ia ia.
Ke kula a pau. Hai mai i kekahi mau wahine noho pono ma Hawaii nei. No ke aha ka hapa o na wahine noho maikai ma keia pae aina ? Pehea la e mahuahua ai ia poe ? Pehea hoi e ulu hou ai keia lahui ?
Mele. " Hahai ia Iesu." Hae Hoonani 8.
Noho ma na la a pau.
Me ko Iesu ano,
&c.
Pauku 1, 2, 5.
Pule no na haumana, e hiki mai ka uhane e hoohanau hou mai, e hoopiha ia lakou i ka makau ia Iehova.
Haawina no Sept. 17, Kekahuna 12 : 1 — 14.
He kaahele ana e makaikai i ka
Hoikeike Nui.
[Kakauia e Rev. S. E. Bihopa]
Ma Albany ka paina awakea ana, ma ka muliwai Hudesona. Ma Westfield ka ka paina ahiahi, a huli ae i ka akau he 14 mile a hiki ma Easthampton, e kipa ai i ka Sabati, ma kapa komohana o ka Muliwai Konetikuta. Ma ia wahi he Kulanui kaulana o Williston Seminary. Nui na haole naauao ma Hawaii nei i hoomaka i ka imi naauao ma ia kula. Elua. a'u haiolelo ana ma Easthampton ; i ke ahiahi he wehewehe ana no ke aupuni o Iesu ma Hawaii. He naau ehaeha nae ko'u ma ia wahi, i ka nana ana'ku i ka ilina o ke keiki hiapo alohia, i make i kela makahiki.
Malaila no hoi ka ilina o Binamu wahine.
He nui na keiki Pake ma kela kulanui, he poe i waeia no ko lakou ano eleu e na luna aupuni o Kina, a i hoounaia malaila e imi naauao. Na ia aupuni e hanai malaila no na makahiki he 10, aole ma ia kula wale no. Ke kauliilii nei ia poe ma na kulanui he lehulehu o Nu Enelani. Ua launa au me kekahi ola poe opio, he helehelena maikai, he eleu. Ua mahalo na kumu a me na hoa.
Poakahi ae, ua holo no ma " Amherst College," he 10 mile ma ka Hikina ; he 55 mile nae ka holo puni ana ma na kaa-mahu.
Ko'u wahi noia i noho haumana ai i na makahiki 1843 — 46. Malaila no hoi ka hiapo i make ai. Ua noho au malaila a hiki i ka Poaono, e launa ana me ka hoa kula a me na hoaaloha o kuu keiki, ninaninau ana ia lakou, a e nana ana no hoi i kona mau wahi a pau e hele mau ai, a me kona keena kahi i make ai. Eha o na kumu o kuu wa opio e ola ana ma ia wahi, he poe elemakule, aohe nae he nawaliwali loa. Nui ke aloha i ka launa hou ana me ia poe makua.
Aia malaila ke keiki a Wini ma ka papa 2.
Nui na hale nani oia kulanui, he 300 na haumana, he 30 na kumu. Nui na keena i piha i na mea ano e o na aina a pau, na pohaku, na mea ola kupu, a me na kino o na mea ola hanu, e hoonaauao ai.
I ka Poaha, ua konoia au e inu ti me ka Peresidena, o Dr. W. A. Steams, a e hele pu me ia e haiolelo i na haumana ia ahiahi no ka ano o na mea ma keia Pae Aina Hawaii. Aole nae i ae mai ke Akua e hooko ia mau manao. Ia'u e hoomakaukau ana e hele e inu ti, loaa mai ka palapala a Mrs. Steams e hoopanee, no ke ano omaimai o ka Peresidena. Huli ae la au i kahi e, a hala ka hora, puiwa makou a pau i ka lohe ana, " Ua make emoole o Dr. Steams !"
Aole liuliu, hui au me kekahi poe kumu a kahe pu na waimaka no ia makua alohaia.
He 20 na makahiki o kana noho Poo ana malaila, a ua hoomaka iki kona palupalu.
Ua mahalo loa ia no kona naauao, kona aloha, a me kona ano haipule io. Ua make keia koa me ka hewa ole o kona aahu kaua.
Poaono ae, holo au i Bosetona, he 110 mile, a hiki aku i ka hora 3. Ua pau e nae kuu poe makamaka i ha haalele i na nale kuai. Ua loaa nae ia'u o Gilimana ma kona home ma Neuton, mawaho o kulanakauhale, a malaila i kipa ai a pau ka la Sabati. O Bona kekahi a'u i launa ai ma ia wahi, ma Lahaina ka noho ana oia mau haole mamua. Nui ko laua ninau ana no ko Maui poe. He nani na hale noho a me na luakini o Bosetona a me na wahi e puni ana. Ua manamana loa aku iwaho na lalani hale o Bosetona i kela a me keia aoao he 10 paha mile, ma kela keia alanui hao.
I kakahiaka o ka Poakahi, komo hou maua o Gilimana i kulanakauhale, he 20 minute ka holo ana. O kuu hele ana noia ma na keena o ka Papa Misionari, paa na puka i ka Poaono, a loaa ia'u ke Kakauolelo nui o Dr. N. G. Clark. O Rev. S C. Damon kekahi i komo pu mai ia manawa, a launa pu makou, e kuka pu ana no na pono Kristiano ma Hawaii nei. Ua launa iki no hoi au me Dr. Anderson. Ua elemakule no, ua wiwi iki ae kona kino, i ko kona kipa ana ma Hawaii 1863, aole nae i nawaliwali, he ikaika no, a he eleu. He 81 kona mau makahiki.
Aole i pau.
KA HUNT'S LAAU OLA
(HUNT'S REMEDY)
HE LAAU LAPAAU HOU, MAI AMERIKA MAI ! He Laau Maikai keia no Na mai pehu o ka opu, Na mai o ka puupaa a me ka opu mimi, Mimi-paa, Mimi-eha, Mimi-helelei, Ka lepo gravel iloko o ka opu-mimi, Ka mana ole, kapalili, hui ono ole ka ai. Na Mai Wahine, NAWALIWALI O KE KINO, LEPO ULA ILOKO O KA WAI MIMI, MANOANOA PAHA KA WAI E like me keokeo o ka huamoa, Like paha me na kaula silika keokeo, eleele, lenalena paha ; a i ole ua like paha me ka lepo i anaiia i na iwi keokeo, a i ka mimi ana, ua wela oioi ka mai, me ka eha nui o ke kikala a me ka puhaka.
HE NUI NA HOIKE e ola nei, ka poe i loohia i keia mau mai i haiia maluna ae, ua pau lakou i ke ola maikai, no ka inu ana i ka HUNT LAAU OLA. ("HUNT REMEDY)!"
UA HAAWI mua ia keia laau, e kekahi kahuna lapaau naauao, i ke kanaka mai pehu o ka opu, e noho ana me ka ohana a Mr. Hunt ; John Hunt kona inoa, he 45 kona mau makahiki, he kanaka nui poepoe, ua loohia i ka mai pehu. Ua haawiia kela me keia laau no keia mai, aole nae oluolu ; ua mahuahua mau kona pilikia, ua pau loa ke kino a me na wawae i ka pehu ; ua kokoke paa loa ka mimi ; kokoke pau loa ka hanu ana ; a ua mahuahua loa ka wai iloko o ke kino. Aole hiki iaia ke moe ilalo ma ka moe, nolaila, ua noho wale no iluna i ka po a me ke ao. Pela mau kona popilikia a hiki i kona hoao ana i keia laau, a ke kahuna i kuhikuhi mai ai. A i kona inu ana i keia laau, ua hoomaka koke ka oluolu. Ua paipai koke ia ka puupaa i ka laua oihana ; ua puka hou ka wai mimi a nui wale ; ua emi koke mai la ka pehu o na waewae ; a ua oluolu hou ke ake-mama i ka hanu ana ; ua oluolu a maikai ka io o na lala, a e hoi nui mai ana ke ola maikai, alaila, me ke kuhihewa, ua waiho oia i ka laau i kekahi mau la. Ua pono ole nae ka waiho ana ia manawa, no ka mea, aole i ola io maoli kona mai pehu. Ua molowa hou na puupaa i ka laua oihana, a ua mahuahua hou ka wai iloko o ka opu, a ua popilikia hou e like me mamua. Alaila, ua inu hou oia i ua laau la, a ma ka hoomanawanui ana, ua lanakila hou auanei maluna o ka mai, a ua ola io maoli, a ua hoomaka hou oia i kana oihana mawaho o ka hale.
Oia ka lapaau mua ana me keia laau ; a mai ia wa mai, (he 25 makahiki) ua hahanaia keia laau e like me ka hana ana o Mr. Hunt, a ua haawi na kahuna lapaau i keia laau i ka poe mai pehu a me na mai like.
Mai ia manawa mai, ua ikeia, e mahaloia hoi keia laau, mai o a o, e na kanaka, a ua inu ia hoi ma ke ao ana a me ke ao ole ana mai o na kahuna lapaau ; oia ka mea i hoola mai i na kanaka he nui, ka poe pilikia i ka mai pehu, a kokoke i ka make.
Na kuhikuhi no ka inu ana :
E INU I KE PUNA TI PIHA, a hala na hora 4, alaila, e inu hou. E mahuahua liilii nae a hiki i elua puna ti piha — a hiki hoi auanei i puna nui piha.
NO KE KEIKI hookahi makahiki a hiki i na makahiki eono, e haawi 5 kulu, a hiki i na kulu 20 ; eha hora nae mawaena o ka haawi ana.
KUMUKUAI, he - - $1.50 no ka omole.
DILLINGHAM & CO.,
762 3m 774 Na Agena no ka Pae Aina Hawaii.
Lole Makepono ke Kuike !
E LOAA NO IA MA KAHI O KAKELA ME KUKE, E LAA NA AHINAHINA, KALAKOA, KEOKEO, LEPONALO, Pena, Aila, Aniani, Na Mea Piula, Kopa, Aila Honua. Aila Hoomaloo, Kui Kakia, Pakeke, Tabu, Kaula, Noho lio, Hulu-palaki, na Pulumi.
A he Agena no hoi no na Mokupuni o Hawaii nei no na LAINAKINI-NAO, LAINAKINI-MAOLI, PALULE KALAKOA, ALAPIA, KELEPA, KILISA, Na Lole kupono i ka wawae, Palule Huluhulu, Na Lole Huluhulu, Na Lole no ka hoohehelo ana Lipine, lihilihi, a me ia mea'ku A HE MAU MEA AI KAHI Ka Palaoa, Kopaa, Raiki, Pia, Hoohu, Paakai, Huaala, Pia Kulina, &c A HE LAAU LAPAAU KAULANA LOA A Dr. JAYNES. Laau Kunu, Laau Hoomaemae Koko, Laau hoopau naio, Penikila, Huaale, A me na Laau Hamo, a pela'ku. 759 ly 811
ANOAI I KA LEHULEHU,
E kipa mai a e nana i kumaka ka ike i na waiwai nani i loaa mai nei iloko o na La Kulaia iho nei.
Penei ke ano o ua mau waiwai la :
Na wati a me na kaula gula, a na Ledee a me na Keonimana ! NA KAULA OPELE A NA LEDE NA KOMO GULA NANI O KELA A ME KEIA ano o na Lede a me na Keonimana ! NA KUPEE GULA, NA LIPINE GULA, Na gula pepeiao o na wahine ! e oaka ai i na pepeiao, a e hulali ai hoi na manamana lima, a e kilipohe ai hoi na ai. Na komo humuhumu gula a me ke kala, Na pihi pulima gula wahine a kane, Na laketa gula lei wahine nani, Na komo daimana o na Lede. Na kaula laketa, Na pine omau kihei, Na laketa aniani, Na huka gula wahine. NA LAKO HALE. NA PUNA, NA PAHI, NA KIAHA, KALA, NA APO KALA, NA KAWELE holoi lima, NA O DALA o kela a me keia ano, a me na mea nani e ae no he nui wale.
E kuaiia aku ana no ma ke kumukuai haahaa loa i ko na wahi e ae o ke taona nei.
UA MAKAUKAU NO HOI NA mea nani no kanaka makua a me na kamalii. Na Kamaa Paa Loa, e loaa no maanei e like me ka makemake ; a ina e loaa koke ka ino, he hiki no ke hoihoi mai. M. McINERNY.
Kihi o Alanui Papu a me Kalepa. 763 3m 774