Ka Nupepa Kuokoa, Volume XV, Number 36, 2 September 1876 — Page 1
NUPEPA KUOKOA :
KE KILOHANA POOKELA NO KA LAHUI HAWAII.
BUKE XV. HELU 36. HONOLULU, POAONO, SPATEMABA 2, 1876. NA HELU A PAU 770.
MAIKAI KA HOI KA PAPA !
— A ME —
Ka Laau o kou Hale ! No Hea la ?
KA I NO HOI NO KAHI O WAILA MA ! Nana aku no hoi ia la, OHI KA IO O KA LAAU O MAKAWAO, i ka ua mea o ka nani o Na Papa, Na Laau A ME NA PONO KUKULU HALE O NA ANO NO A PAU, MA KE KIHI O Na ALANUI PAPU a me MOIWAHINE, Honolulu MALAILA E LOAA AI E LIKE ME KA makemake, no ke Kumukuai makeponoloa. PAPA, PAPA, PAPA Na PAPA huluhulu, Na PAPA manoanoa, Na PAPA i kahiia, Na PAPA kepa, PAPA holo keokeo, PAPA holo ulaula. NA LAAU! LAAU! NA KUA. NA KAOLA, AAHO, MOLINA, PEAPEA, PINE HULUHULU, PINE I KAHIIA, Na Papa a me na Laau Ulaula ! PILI ULAULA PILI KEOKEO, PANI PUKA, PANI PUKA ANIANI IPUKA ANIANI, OLEPELEPE. PENA O NA ANO A Pau Hulu Pena mai ka liilii a ka nui ! AILA PENA ! AILA HOOMALOO, WANIKI, PATE NA LAKO o kela a me keia ano. NA AMI-PUKA HALE, NA AMI-PUKA PA. ANIANI ! Pepa Hale me na lihilihi E LOAA NO MALAILA KA PAAKAI Helu 1, O KAKAAKO a me PUULOA No ke Dala kuike, e loaa no na mea a pau i haiia ae la no ke kumukuai emi loa.
O na kauoha a pau mai Hawaii a Niihau, e loaa'ku ana ia lakou, e hooko koke ia mai ana no ia me ka lawa pono.
E kipa nui ilaila, i ike i ka oiaio
761 3m 773
HE
IWAKALUA TAUSANI LEGUE
MALALO O KE KAI !
— NA MEA —
KUPANAHA O KA MOANA !
KE ALA O KA MEA HUNA,
— A O KA MEA —
POHIHIHI O KA 1866 !
MAHELE l.
MOKUNA XVIII NO VANIKORO.
I MAI o Nede Lana ia'u, " He kai ino loa ka hoi keia." " He ino ka hoi paha, aole kupono no ka moku nui e like me ka Nautilo nei."
Pane hou mai o Nede Lana, " Ua hele wale no paha ke Kapena a lehia i kona ala, oiai ke ike nei au i na apana akoakoa, he mau mea naehehe wale no ke pa iki aku no i ke kila."
Ma ka nana io ana aku no i ke kulana o kahi e hookomo ai, he ku maoli no i ka hooweliweli, aka, ma ka nana iho i ka holo a ka Nautilo, pakina lua kela iluna o na akoakoa. Aole hoi i kupono ma ke ala a na moku Asetolabe a me ka Zelee i hookomo ai, mamuli o ka ike ana i ke Dumont d'Urville hoike ana. A kau loa ia ae la ko lakou nei ihu o ka hookomo ana ma ka Akau, a hiki wale ma ka mokupuni o Murray, a mai laila ae hoi hou i ka Hema Komohana, e kupono ana ma ke awa hookomo o Kumebalana ; aka, aole makou i hiki aku ilaila, aka, komo e aku la no makou mawaena o kekahi mau mokupuni nui a me kekahi mau moku akoakoa i ike nui ole ia, mamua mai o ka mokupuni kai papau a me ke kowa o Mauvai.
A o ka mea kupanaha i ko'u manao, o ka hookole naaupo la o Kapena Nimo i ka moku ona ma kahi i ili ai o ka moku elua, o Dumont d'Urville, alaila, o ka make no la ia, aka, aile nae pela, ua hookele loa no oia me ka pololei a hiki ana makou mawaho ae o ka mokupuni o Giliboa.
O ka hora 3 no ia o ke ahiahi ; pii mai la ke kai a hohonu, a kokoke loa aku la ka Nautilo i ua mokupuni nei, a ike pono aku la au i na mea nani, oia hoi na laau paina wili, he elua mile ko makou mamao iwaho. A o ia hele ko makou, a kamumu ana ka iwikaele ia lalo. a o ke ku malie iho la no ia o ka Nautilo.
A i ku ae ko'u hana, ike aku la au ia Kapena Nimo a me ka malamamoku iluna o ka oneki, e u kamailio ana no ka ili ana.
A ike aku la nae au i ke ano oluolu o ko Kapena, alaila, pane aku la au, " he ulia iho nei keia." " Aole, he mea no ua ike mua ia," wahi a ke Kapena.
Pane hou mai o Nede Lana. " A o ia mea i ike mua ia, ua manao no paha oe, he pomaikai kou ke lilo i kanaka no keia aina, a ma ia wahi oe i holo ai."
A lohe nae o Kapena Nimo i ka'u mau olelo, anoe ae la kona helehelena, aole nae he pane mai, aka, i ka nana aku nae i kona ano, me he mea la e i mai ana, aohe mea nana e hookikina aku iaia, e hehi hou kona mau kapuai maluna o ka honua paa. A puana koke ae ia oia, " Aole e make ana ka Nautilo, e lawe hele aku ana no oia ia oe i keia wa iloko o ka hohonu o na mea kupanaha o ka moana. Aole o'u makemake e hoopau koke i ko kakou holo hanohano ana."
A pane aku la au, " Aia ka a kamumu ka iwikaele o ka Nautilo i keia kai akea, aole ka e make. Eia kekahi, aohe ikaika o ke au o ka Moana Pakipika ; a ina no hoi aole no e hoomama ae ana i ke kino o ka moku, alaiia, pehea la oia e lana ai iluna ?"
" Aole io no he ikaika o ke au ma ka Moana Pakipika, aka, o ke au ma ke kowa o Ioreta, e loaa no i kahi wa ka like ole, he iwilei a me ka hapa mawaena o ka iliwai o ke kai nui a me ke kai maloo. O ka la 4 keia o Ianuari, a iloko o na la 5, e piha ai ka mahina, a o ka wa no hoi ia e kai nui ai, alaila, o ka hemo no ia o kakou."
Ia pau ana ae no o keia mau olelo a ke Kapena, o ka iho aku la no ia ilalo o ka moku, me ka ukali pu ia aku e ka malamamoku, no ka nana ana i ka onioni a me ka ole. A ma ia nana ana, aole io no he oni o ka moku, me he mea la, " Ua kakia kuinao a ke akamai."
A pane mai la o Nede Lana, " Owai iho nei la kai pii mai io'u nei, mahope iho o ka hala ana aku nei o ke Kapena Nimo ?"
" Auhea oe e kuu hoa, e kali ae kaua a hiki mai ka la 9 ae nei la, alaila, o ka piha pono ana ia o ka mahina, alaila nui mai ke kai, a o ko kakou hemo no ka hoi ia me ka luhi ole."
" He oiaio hoi ia ?"
" He oiaio."
A pane mai la hoi o Kosila, " Aole no ka paha auanei e kiola koke ana, ke Kapena i ka heleuma a hiki i ka wa e ikaika mai ai ke au ?"
A lohe o Nede Lana i keia mau olelo a Kosila, pane mai la oia, " E ka haku, he pono oe e manaoio mai ia'u, i ka'u mea e kamailio aku ai ia oe, no keia apana hao, aole oia o holoholo hou ana maluna, a aole hoi malalo o ke kai, no ka mea, ua hanaia kona kino no lalo o ka papaku e kona kaumaha. Nolaila, i kuu manao, ua hiki mai ka wa e kaawale ai na hoa holo moana me Kapena Nimo.
" E Nede Lana, kuu makamaka maikai, aole o'u hopohopo no keia Nautilo puipui, e like la me kou, a ke lana nei no hoi ko'u manao, iloko o na la 4, e ike ai kakou i ka mea e hanaia ana e na wiliau o ka Pakipika.
" Eia hoi kekahi, ina e auhee ana kakou me ka manao e haalele i ka Nautilo, heaha la ka pomaikai e loaa ana ia kakou, oiai eia kakou ma na aekai o Papua. Mai pono ka holo, ina la hoi ua hanina ike aku kakou ia Enelani, a i ole la hoi o kekahi o kona mau panalaau, manao ae ke ola. Aka, ina e make io ana ka Nautilo, alaila, o ka welelau hope iho la no ia o ko kakou mau ola."
Pane hou mai la o Nede Lana, " Ua ike no hoi kakou i ka hooponopono ana no kakou, a aia hoi he aina, a he mau ululaau, a malalo o ia mau laau, he mau holoholona, e loaa ai ia kakou he mau io holoholona ; a no ia mau mea la ea, he makehewa loa au ke hele e hoao."
" Ua pono oe e Nede Lana, a ke like ko'u manao me kou. Aole anei e loaa mai ana he ae ana o Kapena Nimo ia oe, e holo kakou iuka, me ka haalele ole no hoi i na ano a pau o ka hehi ana maluna o na wahi oolea o ko kakou hokuhele," wahi a Kosila.
Pane hou mai o Nede Lana, " He hiki no ia'u ke noi i ke Kapena, aka aole nae paha kela e ae mai ana ia'u."
I mai hoi o Kosila, " Aole ka hoi oe i hoao, a hooleia mai ana la hoi, alaila, olelo oe pela. Nolaila, e aho e pono ia oe ke hoao, i ike ai kakou i ke ano paakiki o Kapena Nimo."
Ua hookuu laelae mai la ke Kapena i kuu noi, me ke kauoha ole mai, ina e hoi mai i ka moku nei, e paapu mai me ona wahi hoina ; aka, eia kana mea i hopohopo ai, aole ona makemake e haule iloko o na lima koko o na kamaaina. Nolaila, ua oi aku no ka noho pio ana maluna nei o ka Nautilo, oiai ua lako pono loa i na mea oluolu ai ke ola kino, me ka nele ole i kekahi mea.
Ma ka hora 8, hoomakaukau makou ia makou iho me na pu a me na koi liilii, a holo aku la makou iuka. He malie maikai loa ke kai ma in la, a e pa kolonahe ana ka makani mahope pono o makou. O Kosila a me a'u na mea hoe, a ia Fede Lana ka uli, nana iho aohe holo a kana mai.
Aole hiki ia Nede Lana ke uumi iho i kona hauoli. Me he paahao io la no, ua hoopaaia, a akahi no ka hemo, aohe olioli a koe aku, me ka i ana, " E ai io holoholona ana ka hoi kakou. Mai kuhi mai nae olua, e hoowahawaha ana au i na io ia o ka Nautilo, he ono maoli ae la no i na io holoholona."
Pane ae la hoi o Kosila, " Kii wale mai la no ka hoi ka ae o ko'u waha i ka ia la kamailio mai i na io holoholona. Ho-a aku ke ahi, a lanahu iho, alaila, kau aku iluna o ke ahi aa maikai, moa ae kela, aohe ono mai a koe."
(Aole i pau).
Ke Kau Ahaolelo o M. H. 1876.
LA HANA 86 — Poakahi, Augate 14
Halawai ka Ahaolelo e like me ka mau. Heluhelu mai o Mr Preston he hoopii mai na loaa mai o ka oihana kinai ahi o Honolulu e noi mai ana e noonoo hou ia ka haawina no ka oihana kinai ahi o Honolulu. Waiho ia a noonoo pu me ka Bila Haawina.
Heluhelu mua mai o Mr Preston he bila e hoololi ai i ka pauku 1106, o ke kanawai kivila. Waiho ia no ka heluhelu alua.
Hoolaha mai o Mr Pilipo he bila e hooponopono ana no ke koho lunamakaainana ma ka la koho balota.
Heluhelu mua mai o Mr Preston he bila e hoololi ai ka pauku 1141 o ke kanawai kivila. Waiho ia no ka heluhelu elua.
Heluhelu mai o Mr Pilipo he olelo hooholo, e hilinai ole ana i ke Kiaaina o ka mokupuni o Oahu no ka hoomau wale ana i kekahi makai kiai kulanakauhale o Honolulu, me ke akaka ole o ka hewa i hoopau ia ai. Hoopanee loa ia, he 28 ma ka ae, a he 3 ma ka hoole Ma ke noi ua kapae ia na rula, a hoike mai ke komite wae no ka noonoo ana i ka bila e haawi ana i ka medala hanohano ano no na makua hanau nui i na keiki. Waiho ia ma ka papa.
NA HANA O KA LA.
Heluhelu alua ia ka bila e hoololi ai i ka pauku 431 o ke kanawai kivila, i hoololi ia ma ka makahiki 1868, e pili ana i ka hookupa ana. Hoopanee loa ia.
Heluhelu alua ia ka bila e hoololi ai i ka pauku 498 o ke kanawai.kivila, e pili ana i na apana auhau o ke aupuni &c Waiho ia ma ka papa.
Heluhelu alua ia ka bila e hoohui a e hoololi ai i ke kanawai no na hoike.
BILA HAAWINA
Noonoo ia ka Bila Haawina imua o ke komite o ka Hale. Noho o Mr Martin ma ka noho lunahoomalu.
Kokua oihana malaila a me na eemoku. 65,000 Noi o Mr Helekunihi 35,000 " Pilipo e kapae " Birch 22,000
I ka ninau ia ana no ka hoopanee loa i ka haawina no ka hoopae lima hana, ua kakau ia na ae me na hoole. He 7 wale no poe e hoole i ke kii ana i na pake i Kina, o nele auanei na kanaka i ka hana ole. Na Mr Kahuila, Kanealii, Pilipo, Kalaukoa, Aiwohi, Nawahi, a me Mahoe, hui ia e 7 wale no, poe makemake haawi lima hana i na kanaka Hawaii.
O Ke koena aku o na lunamakaainana i hui ia me 13 alii, like me 32 poe makemake e kii i na pake iwaho, nolaila, ua hoole ia ka hoopanee loa, a ua hooholo ia he 22,000
Noi mai ke Kuhina o ko na aina e, no ka hoohoihoi eemoku 25,000 Noi o Mr Kanealii e kapae loa. " Kaai 50,000
Mahope o ka noonoo loihi ia ana, ua hoopanee ia ke komite a nana hou ma ka la apopo. Hoopanee.
LA HANA 87 — Poalua Augate 15
Halawai ka Ahaolelo i ka hora 10 A M. aka, no ka lawa ole o na hoa i hiki mai, nolaila, ua hoopanee ka Hale a halawai hou i ka hora 1 P M
I ka akoakoa hou ana i ka hora 1, ua komite ka Hale no ka noonoo ana i ka Bila Haawina. O Mr Mahelona ma ka noho.
No ka hoohoihoi eemoku $50,000 Mahope o ka hoopaapaa loihi ana i komo ai o Messrs Kanealii, Nahaku, Nawahi, Aholo, Kauai a me Pilipo, ma ka aoao kue, a me Messrs Kaina, Rhodes, Green a me Cleghorn ma ka aoao ae, ua hoole ia ka hoopanee loa. Hooholo ia ka haawina $50,000. Noi o Mr Pilipo aole e hoololi ia ekahi dala no kekahi hana e ae. Hoopau ia ke komite.
Ma ke kapae ia ana o na rula ua hoola na mai ke'lii Kaai he bila e hooponopono ai i na helu ana o ke poho no ka lawe ana i ka wai no na hana mahiai.
Ma ke kapae hou ia ana o na rula, ua waiho mai o Mr Aholo he olelo hooholo e noi ana i $1,000 i koe no na lilo o ka Ahaolelo o 1876. Hooholoia.
Hoopanee ka Hale.
LA HANA 88 — Poakolu Augate 16
Halawai ka Ahaolelo e like me ka mau.
Heluhelu mua mai o Mr Kaai he bila e oili ana no ka wai o na auwai, a hawai paha. Waiho ia aku malalo o na rula no ka heluhelu elua.
Hoolaha mai o Mr Pilipo he bila e hoomaopopo ai, o ka pono koho balota, he pono pili paa loa ia na ke kanaka.
Heluhelu mua mai o Mr Pilipo he bila e hooponopono ai i ke koho balota lunamakaainana ma ka la koho. Waiho ia no ka heluhelu elua.
Heluhelu mua mai ke Kuhina Waiwai aupuni no e hooponopono ana i na dala o ke aupuni no ka uku ana i na aie. Waiho ia no ka heluhelu elua.
Noi o Mr Nakaleka e hapai hou no ka noonoo ana no ka olelo hooholo e hookaawale hou ana i $1,000 uo na lilo o keia Ahaolelo. Hooholoia.
Waiho ia ka olelo hooholo ma ka papa a hoike mai ke komite o na bila e helu ma ka la apopo.
Hoike mai ke komite pai, ua pai ia ka bila e hooponopono ai i ka lawelawe ana i na hana ma na hihia karaima. Aponoia.
Heluhelu mua mai o Mr Preston he bila e hoololi ai i ka haawina 51 o ka mokuna 26 o ke kanawai kivila. Waiho ia no ka heluhelu elua.
NA HANA O KA LA.
Heluhelu akolu ia ka bila e hoomalu ana i na manu oo, iiwi, mamo, a me na akakane na ke'lii aole e pepehi ia. Waiho ia i ke komite wae, Kaai, Aholo, Kahanu, Nahaku, a me Wana.
Heluhelu akolu ia ka bila e hoololi ai i ka pauku 500 o ke kanawai kivila, e pili ana i ka uhi ana i ka auhau. Hooholo ia ka bila me ka hoololi.
Heluhelu alua ia ka bila e hoohui a e hoololi ai i ke kanawai no na mea hoike. Waiho ia oia ka hana ma ka Poakahi.
Heluhelu alua ia ka bila e hoololi ana ke kanawai e pili ana i na hihia i koi ia ma kekahi waiwai. Waiho ia oia ka hana ma ka Poakahi.
Heluhelu alua ia ka bila e kauoha ana ina e kuai ia ana na aina aupuni, alaila e kuai ia ma ke kudala, oiai e hoopaapaa ia ana, ua hoomaha ka ka Hale.
Halawai ka Hale ma ka hora 1 P. M
BILA HAAWINA.
Noonoo ia ka Bila Haawina imua o ke komite o ka Hale. Noho o Mr Naili ma ka noho.
Ma ke noi, ua hapai hou ia ka noonoo ana no ka oihana kinai ahi o Honolulu Hooholoia.
Oihana Kinai Ahi o Honolulu 8.000 Noi o Mr Preston 10,000 " Kaai 5,000 I ke aupuni a i ka hui hoopaa poho, 5,000
Hooholo ia 10,000 Na agena o ka hale leta o Kapalakiko
Hooholoia 800 Noi o Mr Aholo e hoihoi ia malalo o kela a me keia lilo o ka oihana leta Hooholoia.
Telegarapa o na moku ma Honolulu Hooholoia. 832
Oihana wai o Honolulu 25,000 Noi o Mr Kanealii 15,000
" Barenaba e kapae.
Hooholoia 25,000
Na buke aupuni, Hooholoia 500
Haawina ku i ka wa no ka wahine a ka mea hanohano J W Lonoaea 400 Noi o Mr Nakaleka e kapae.
" Helekunihi 400 " Barenaba e haawi ia keia haawina no ke kukulu ana i hale kupapau i wahi e waiho ai kona kino lepo. Hooholoia e kapae loa. Mokumahu hou 100,000 Noi o Mr Nakaleka e hoopanee a noonoo pu me na bila e pili ana no ka mokumahu holo pili aina. Hooholoia.
OIHANA WAIWAI. Uku o ke Kuhina 10,000 Noi o Mr Nakaleka 6,000
Hooholoia 8,000 Luna Buke Helu, Hooholoia 4,000
Luna Dute Nui 6,000 Noi o Mr Nakaleka 5,000
" Lilikalani e haawi i keia haawina a me na haawina 4 iho mahope o ke komite wae, a e lawe keia mau oihana, oia hoi, Luna Dute Nui, Hope Luna Dute Nui, Kiai oihana me ke awa, Luna hale papaa, a me Kakauolelo Buke Helu. Hooholoia.
Na kokua kiai ma Honolulu a me na awa e ae 2,400 Noi o Mr. Nawahi e waiho aku i keia haawina i kela komite no i koho ia ae nei Hooholoia
Kela me keia lilo o ka oihana dute l,500 aole hoi a hoololi ia kekahi hana e ae. Hooholoia 1,500
Luna dute ma Kawaihae hooholoia 300.
Kuna dute ma Kealakekua, hooh. 100
Waapaa ka hale dute, hooholoia 880
Dala Halemai i na lilo i manao ia 4,000
Hoopau ia ke komite me ka hai aku i ka Hale, ua hooholoia kekahi mau haawina e like me ia apono ia ana o ka hoike.
Hoike mai ka Peresidena i na lala o ke komite wae no ka noonoo ana i na haawina e pili ana i na luna dute, Lilikalani, Waterhouse, Kauai, Halstead, a me Kaai. Hoopanee. LA HANA 89 — Poaha, Augate 17.
Halawai ka Ahaolelo e like me ka mau.
Hoike mai ke komite o na Ahahookolokolo no ka noonoo ana i ka bila e hoololi ai i ka pauku 4 o ke kanawai e pili ana i ke kuai ana i ka awa, i apono ia i ka 1870, ua waiho mai he bila hou, me ke noi mai e noonoo loa aku no ke kakau poepoe ana a o ka bila mua ua kapae ia. Apono ia ka hoike.
Hoike mai ka hapa nui o ke komite wae no ka noonoo ana i ka haawina no ka hana hou ana i na hale aupuni, 15 00 e noi mai ana, e hooholo loa aku. Waiho ia ma ka papa a lawe mai ka hapa uuka i ka lakou hoike.
Hoike mai ke komite wae no ka noonoo i ka bila e haawi ai ka mana i ke Kuhina Kalaiaina, e haawi aku i ka laikini lapaau no kekahi kanaka, e noi mai ana, ua hooponopono iki ia ka bila e noi mai e hooholo loa aku no ke kakau poepoe. Waiho ia ma ka papa.
Ma ke noi ua kapae ia na rula, a hoike mai ke komite hooiaio bila kanawai, o na bila he 14 i hooholo ia no ka apono ana mai o ka Moi, ua nana akahele ke komite ua ike ia he 5 wale no bila i mahele pono ia ma ka olelo Beritania a me ka olelo Hawaii. Nolaila, ke noi aku nei ko oukou komite e koho ia i komite hou mua e noonoo pono i na hemahema o ka unuhi ana Apono ia a waiho ia na bila 9 i ke komite wae, Leleiohoku, Loio Kuhina, Halstead, Waterhouse, a me Kaai.
Heluhelu mai o Mr Birch he olelo hooholo e kauoha ana i na bila a pau i hooholo ia no ke ka kakau poepoe, e waiho mua ia aku i ke komite hooponopono bila kanawai, mamua o ke kakau poepoe ia ana. Mahope o ka hoopaapaa loihi ia ana, ua hoihoi hou ia ka olelo hooholo.
Ma ke noi ua kapae ia na rula, a hoike mai ka hapa uuku o ke komite wae i koho ia no ka noonoo ana i ka haawina 15 00, no ka hana hou ana i na hale aupuni, e nui mai ana e hooholo loa, me na huaolelo e haawi ana i ka mana i ka luna o na hana hou, e ninau aku i ka mea hiki ke hana ia hana, aia apono ia ka hana e ka luna o na hana hou, alaila, uku ia ke dala. Waiho ia a noonoo pu me ka haawina no ia mea.
Heluhelu mua mai o Mr Pilipo he bila e hoomaopopo ana o ka pono koho balota o ke kanaka koho, he pono pili paa loa ia no ke kanaka. Waiho ia no ka heluhelu elua. Hoolaha mai o Mr Kalaukoa he bila e hooponopono ai no ka hae o ke aupuni.
Hoolaha mai ka Loio Kuhina he rula hou ma kahi o ka rula 62. Hoomaha ka Hale. Halawai hou ka bila ma ka hora 1 P M.
BILA HAAWINA.
Noonoo ia ka Bila Haawina imua o ke komite o ka Hale. Noho o Mr Kalaukoa ma ka noho lunahoomalu.
Dala Halemai (na loaa i manaoio.)
Hooholoia 4,000 Uku o na luna helu aole oi aku i 5 pauku,
Hooholoia 14,000 Uku o na luna ohi, aole oi i ka 5 pauku,
Hooholoia l2,000 Aie Aupuni e uku ia ana, Hooholoia 90,000 Nana ma ka Aoao Eha.