Ka Nupepa Kuokoa, Volume XV, Number 39, 23 September 1876 — Page 2
KA NUPEPA KUOKOA, ME KE AU OKOA I HUIIA.
Heluhelu aluaia ka pauku 17 o ka mokuna 41 o ke kanawai karaima e pili ana no na likini kuai waiona. Waihoia no ke kakau poepoe, a e heluhelu akoluia ma ka Poalua.
Heluhelu aluaia ka bila e hoololi ai i ka pauku 19 o ka mokuna 41 o ke kanawai karaima e pili ana i ka hoomahuahua ana i ke kumukuai o na laikini kuai waiona kukaa.
Noi ka Loio Kuhina e hoopanee loa. Hooleia. Nolaila, ua hooholoia ka bila no ke kakau poepoe, a e heluhelu akoluia ma ka Poalua. Hoopanee.
LA HANA 113.— Poaha Sepatemaba 14.
Halawai ka Ahaolelo e like me ka mau.
Hoike mai ke komite wae no ka noonoo ana i na bila e hoomahuahua ana i ke dute maluna o kekahi mau waiwai e noi mai ana, e hoopanee loa i na bila mua, a waiho mai he bila hou. Waihoia ma ka papa.
Hoike mai ke komite wae no ka noonoo ana i ka bila e hoeueu ai i na oihana kuloko o ke aupuni, e noi mai ana, e hooholo loa aku i ka bila e like me ka lakou mea i hoololi ai. Aponoia ka hoike, a ua waihoia ka bila no ke kakau poepoe, a e heluhelu akoluia ma ka Poakolu,
Heluhelu mai o Mr Kalaukoa, he olelo hooholo e kauoha ana i ke Kuhina o ko na aina e, e hoike aku i na aupuni o Beritania a me Rusia, e kuokoa ke aupuni Hawaii, aole e komo aku e kokua mahope o kekahi o laua, oiai laua e kaua ana. Oiai e noonooia ana, ua noiia, e hapai na hana o ka la.
NA HANA O KA LA.
Heluhelu akoluia ka bila e hooponopono ai i ka hana a me ka lawelawe ana ma na hihia karaima ma ke poo a hooholoia.
Heluhelu akoluia ka bila e hoohui a e hoololi ai i ke kanawai e pili ana i na palapala ganisi ma ke poo, a ua hooholoia.
Heluhelu akolu i ka bila e hoololi ai i ke kanawai e pili ana i ka pau ana o na hihia a me na hoopii mamuli o ka make, mare, a banekarapa ana paha o ka poe iloko oia mau hihia ma ke poo a ua hooholoia.
Heluhelu akoluia ka bila e wehe ai i ka pilikia o na konohiki ma ke poo a hooholoia.
Ma ke noi ua kapaeia na rula, a waiho mai o Mr Aholo he olelo hooholo, aole e oi aku ke kamailio ana o kela hoa keia hoa maluna o 5 minute. Hooholoia.
Heluhelu aluaia ka bila e hoololi ai i ka pauku 20, o ka mokuna 41 o ke kanawai karaima. Hooholoia no ke kakau poepoe a e heluhelu akoluia ma ka Poakolu.
Heluhelu aluaia ka bila e hoololi ai i ka pauku 21 o ka mokuna 41 o ke kanawai karaima. Hoihoi houia e ke'lii Kaai.
Heluhelu aluaia ka bila e hoopau loa ai i ke kanawai hookamakama. Hooholoia no ke kakau poepoe, a e heluhelu akoluia ma ka Poakolu.
Hoomaha ka Hale ma ka hora 12 awakea, a halawai hou ma ka hora 1 auina la.
Heluhelu aluaia ka bila e hoololi ai i ka pauku 174 o ke kanawai kivila, e pili ana i ka hoopai o na luna alanui. Hoopanee loaia.
Heluhelu aluaia ka bila e hoololi ai i ka pauku 168 o ke kanawai kivila, a e hoopau ana i na pauku 17l, 182 oia kanawai no. Hoopanee loaia.
Heluhelu aluaia ka bila e haawi ana i na metala hoohanohano no na makua hanau nui i na keiki, a ua hoopanee loaia.
Heluhelu aluaia ka bila e hoololi ai i ka pauku 1144 o ke kanawai kivila. Waihoia no ke kakau poepoe, a e heluhelu akoluia ma ka Poakolu.
Heluhelu aluaia ka bila e hoololi ai i ka pauku 1106 o ke kanawai kivila. Waihoia no ke kakau poepoe, a e heluhelu akoluia ma ka Poalua,
Heluhelu aluaia ka bila e hoololi ai i ka pauku 1423 o ke kanawai kivila, i hoololi ia i ka makahiki 1872. Waihoia e kakau poepoe, a e heluhelu akoluia ma ka Poakolu.
Heluhelu aluaia ka bila e hoololi ai i ka pauku 1, 2, o ke kanawai i aponoia ma ka la 29 o Iulai 1873, e hoole ana, aole e kohoia ka lunakanawai i luna hooiaio no na palapala kepa. Waihoia no ke kakau poepoe, a e heluhelu akoluia ma ka Poakolu.
Heluhelu aluaia ka bila e hoololi ai i ka pauku 780 o ke kanawai kivila, i hoololiia i ka 1868, e hoomahuahua ana i 36 mau lunamakaainana no ke aupuni Hawaii. Penei ka nui :
No ka mokupuni o Hawaii 10
No Maui a me na mokupuni e ae, 13
" " " Oahu 10
" " " Kauai 4
Huina nui 37
Waihoia i ke komite o ka Hale no ka la apopo.
Ma ke noi ua kapaeia na rula, a hoike mai ke komite wae no ka noonoo ana i ka bila e hookuu ana i na mai lepera, e hoihoi i ko lakou mau home e hoike mai ana, ua kapaeia ka bila mua a e noi mai ana e hooholo loa aku i ka lakou bila no ke kakau poepoe. Waihoia ma ka papa. Hoopanee.
MA KE KAUOHA.
HE KANAWAI
E hoomana aku ana ke Kuhina Kalaiaina o ke Aupuni Hawaii e haawi i na Laikini no ka lawelawe ana o kekahi poe i ke Oihana Banaco iloko o keia Aupuni.
No ka mea, ua ike maopopoia, i keia manawa ka lawelawe ana o ka Oihana Banaco e like loa me na Oihana Kalepa e ae i kukuluia ma keia aupuni, a ua loaa hoi ia mau Hui Kalepa he mau palapala ae, mai ke Kuhina Kalaiaina 'ku, aka, ke ku nei iloko o keia aupuni ka oihana Banaco, me ka loaa nui o na pomaikai mailoko ae o na waiwai o keia aupuni. A no ka mea hoi, ua manaoia he mea pono a kaulike ke koi ana aku e uku mai ka mea, a mau mea e lawelawe ana i ua oihana'la, i ka auhau Laikini, e like me na oihana kalepa e ae o ke aupuni. Nolaila. E kauohaia e ka Moi a me ka Hale Ahao-
lelo o ko Hawaii Pae Aina, i akoakoa
iloko o ka Ahaolelo Kau Kanawai o ke
Aupuni :
Pauku 1. E hoomanaia, a ma keia na hoomanaia no ke Kuhina Kalaiaina o ke Aupuni e haawi aku i ka mea, a mau mea e noi mai ana iaia ma ka palapala i laikini no ka lawelawe ia ana o ka Oihana Banaco iloko o keia Aupuni, no ka makahiki hookahi ke haawi aku ka mea a mau mea e noi mai ana iloko o ka lima o ua Kuhina nei, i na dala maikai he elima haneri, a no ka Waihona o ke Aupuni ia mau dala.
Pauku 2 O ka mea a mau mea e lawelawe ana i ka Oihana Banaco, i keia manawa, a mahope aku paha iloko o keia Aupuni, me ka loaa mua ole iaia, o ka palapala ae i olelo mua ia ma ka pauku akahi o keia kanawai e hoopaiia oia i na dala, aole emi iho i ka hookahi tausani, ke ku kona hewa imua o kekahi Ahahookolokolo Hoomalu a Apana o keia Aupuni.
Pauku 3. O ka inoa " Banaco" e manaoia ma keia kanawai, ua pili i ke kanaka a mau kanaka i lawe i ka hai dala, a i hoaie aku i kela mea i keia mea, a i loaa kona puka mamuli o ka ukupanee i auhau ia e oi aku ana mamua o ka ukupanee i haawi ia e lakou i ka poe mea dala ; a e pili hoi ia inoa i ka poe nona ka oihana kuai mai a kuai aku i na palapala kikoo dala i na aina e.
Pauku 4. E lilo keia i kanawai mai ka la'ku o kona aponoia aka.
Aponoia i keia la 15 o Sept. M H 1876. KALAKAUA R.
I kulike me ka Pauku 231 o ke Kanawai Kivila, e kukulu a e hookaawaleia ana kekahi pa no na holoholona aia
wale no ka Apana o Kona Hema, Mokupuni o Hawaii, ma kahi i kapaia o Lueu, ma ke Ahupuaa o Kalamawaiawa-
awa. W L MOEHONUA, Kuhina Kalaiaina. Keena Kalaiaina. Iulai 31, 1876. 770 2ts 772
I kulike ai me ka Pauku 232 o ke Kanawai Kivila, ka hoonoho a ke hookohu aku nei au ia S Kekumano, i Luna Pa no na holoholona aea wale no ka Apana o Kona Hema Mokupuni o Hawaii, ma kahi i hoolahaia ae la maluna.
S KIPI, Kiaaina o Hawaii. Keena Kiaaina, Iulai 31, 1876 770 3ts 772
I nu Luna KUOKOA o Honolulu.
Ke hoike ia aku nei ka lohe i na Luna Kuokoa a pau o Honolulu, ma ka la hope o Sepatemaba nei, e hoopaa ia ana, ka nupepa a ka poe i hookaa ole mai a hiki ia wa. E hoolohe oukou i keia me ka hookaulua ole. Ua hala ka manawa no ka noho ana makamaka e ka poe hookaa ole.
H. M. WINI.
Honolulu, Sepatemaba 23, 1876.
Ka Nupepa Kuokoa
— ME — Ke Au Okoa
I HUIIA. Published every Saturday $2 a year
HONOLULU. SEPATEMABA 23, 1876.
I KA POAHA aku nei o ka hebedoma i hala, ua pupuahulu ae ka lunamakaainana helu 2 o Honolulu e heluhelu i kekahi olelo hooholo aohe na kona noonoo i haku, aka i haku ia o kekahi mea e i mea hoohemahema ia ia, e noi aku ana i ke Kuhina o ko na aina e, e hoike aku ia Enelani a me Rusia ina laua e kaua ana, alaila, e ku i ka wa o Hawaii nei, a o kona mau moku kaua e like paha me Kilauea a me Pele e aoloolo ohua. a e hoopau ka holo moku kaua ana. Hu ae la ka aka a mamao ka iwi aoao.
KE HOOLAHA aku nei makou ma ka pepa o keia la, i na kanawai eiwa i loaa i ko ka Moi noonoo ana ka apono. He mau hoololi i na kanawai kahiko ka hapa nui o lakou. Hookahi o ia mau hoololi, e hoomahuahua ana i na lala o ka Papa Ola i elima mau lala, he ekolu o lakou he mau lala no ka Ahakukamalu mai o ka Moi, Hookahi hoi kanawai hou, e laikini ana i na Banako malama Dala ma ka $500 o ka makahiki. O kekahi o keia mau kanawai hou, e kau ana i ka hoopai i $500, no ka Papa Nana wehe ole i ka pahu balota i ka la koho, a ua hiki no i ka Loio Kuhina o ke aupuni ke hoopii ia Papa Nana imua o ka Aha Kiekie.
NA MEA HOU ANO NUI.
Ua ku mai ka mokuahi " Kulanakauhale o Nu Ioka" i ke kakahiaka Poaha iho nei me ka nu hou makamaka hou loa, ua like ke Kuikahi Panailike i kanawai i ka la 9 o Sepatemaba, oia ka la a ka Peresidena i kukala akea aku ai ma ka loa a ma ka laula o kona Repubalika nui. A o na ukana Hawaii a ka moku Lunalilo ka maka mua o na waiwai Hawaii i komo dute ole aku ma ke awa o Kapalakiko.
Ua hoi mai nei " ka wahine alualu wai liula" ka Pua Alii Pauahi mai ka laua huakai makaikai honua aku nei. Maikai kona ola kino a pela no kana alii kane. Ua ukali ae ke kaa alii ia laua ma ka uapo, a maluna olaila i hoihoiia mai ai a hiki i ko laua Home Haleakala. Na Muolaulani, ke alii hoi i hookamaaina iho me na hale no kekahi mau pu, i apo aloha aku i ka malihini. He ahaaina ka ke alii kamaaina i hoomakaukau e no ka hoi ana mai o ka malihini. Piha ia la i na makamaka i hele mai e ike.
Ua waiho ae o Kanealii, lunamakaainana o Wailuku i ka Poaha nei iloko o ka Hale Ahaolelo, he olelo hooholo, e hoihoi wale ka mokuahi " Kilauea" i n hoa o ka Ahaolelo me ka uku ole, a ua hooholoia. O keaha aku la auanei koe a lakou nei e hana mai ai. Kokoke lakou e koi mai e kuai i mau wahi palaka e uhi iho ai i ke kino, a loaa ka hoi ana o kuaaina. He keu a ka hilahila.
Ua pepehiia ma ke naoia ana o ka puu, kekahi kanaka ma Hilo, e ka wahine a ua make loa. He keu keia a ka hapa maikai ikaika nui wale, aka no ka nawaliwali no nae hoi kahi o ua kanaka nei.
Na Nu Hou Kuloko,
E hoopanee ana paha ka Ahaololo i ka Poakahi aenei, a i ole ia i ka Poalua aku paha.
He hoomalamalama kuikui ko loko o ka Pa Alii i ka po Poaha iho nei no ka hoomau ana i ka olioli Kuikahi Panailike.
Ma ke ahiahi Poalima aku nei, ua huli hoi mai Ka Mea Kiekie R. Keelikolani mai kana huakai pokole aku nei i ke kai opua me ke ola maikai.
He mau la wela loa iho nei ko keia malama i ikeia ma ke kulanakauhale nei, ke hele la ka mea ana wela a hiki i ke 93 degere ke kiekie o ka wela.
Ke konoia aku nei na Luna Kuokoa a pau, e hooili koke mai ka lakou mau dala uku pepa me ka hookaulua ole, o hoopauia auanei a nele oukou.
Ua ku mai ka moku kuna o Kale Lona mai Arita mai ma ka Poalua iho nei, me ka piha i ka iwi kohola, niho uwalo a me na waiwai kalepa e ae o ia laina.
MANAWA HOLO KILAUEA — Iloko o keia mau malama hope aku o ka makahiki, aole e holo kaapuni hou ana ke Kilauea ia Hawaii. No na mea i koe, e nana i ka papa kuhikuhi manawa holo o Kilauea.
Ua wehe aenei o Mr Isles he hale hoohainu ki ma ke Alanui Nuuanu makai iho o ka hale kuai o Kale Brenig a ma ka hale humuhumu lole iho nei o Mr Cambell.
Ma ka Poaono aku nei i hala, ku mai la kekahi moku me na pake he 330 no Hawaii nei. Eia ka mea apiki, he eha wale no oia poe he mau wahine, a o ka nui he poe kane.
KE KANAKA LAKI ! — O Kekila Baraunu ke kanaka laki ma ke koho balota iho nei o ka Poakahi e pani i ka hakahaka o ka Hon. S. M. Kamakau i make, no ka mea oia ka mea i 190 na balota, a o ka nui no lalo lilo.
Ua pahola ae kekahi lono, ua pau i ke ahi kekahi wahi hale pili mawaho mai o ka Halemai Moiwahine i ka po Poalua o kela pule mamuli o ka hanini ana o ka ipu kukui aila mahu. Eia nae ka mea haohao aole i ikeia ka pau ana a i loheia ae i ke ao ana.
Ua lohe mai makou, ua hoao kekahi kanaka kumakahiki o Wailuku e powa i kekahi pake, a ua lilo aku kekahi mau dala a ka pake. Ua hookolokoloia ua kanaka nei, a ua hookuuia no ka lawa ole o na ike e ku ai i ka hoopai aku.
LUI KAMANA.— Ma ka auina la Sabati aku nei, make iho la o Mr C. H. Lewes (Lui Kamana) nona kekahi hapa o ka Pa Kuai Papa o Lewes A me Dickson o keia kulanakauhale, i ka hapaha keneturia a oi ae o kona noho ana kamaaina no Hawaii nei. Ua panihakahakaia kona ola no ke $35,000, a e ili ana ia maluna o kona mau hooilina.
AHAHUI HOOMANAO LA KUOKOA.— E hoolohe mai ! E halawai hou ana keia Ahahui ma ka Hale Kaa Wai Helu 4, ke hiki aku i ka hora 7 1/2 o ke ahiahi Poalua e hiki mai ana. A ia wa, e hoomakaukau ai kela a me keia hoa e hoolei aku i kana makana. E huli nui ae a pau loa, malia e kohoia aku kekahi poe o oukou ma na komite lehulehu. Ua makemakeia na mea a pau e makemake ana e komo pu mai i ke kulaia ana i ka la 28 o Novemaba, e hele ae malaila.
Ua hoomakaia iho nei e kekahi mau ahahui mahiko e eli i auwai e lawe mai ai i ka wai mai na hahawai mai o Hamakuloa ma hope aku o Makawao a ua hiki paha ka wai i Haiku i kaia manawa, a ua aneane paha i keia wa a makou e kakau nei e hiki ae.
PAPA OLA HOU.— Ua lohe lauahea mai makou, ua kohoia na keonimana malalo iho i mau lala no ka Papa Ola hou : His Ex. W. L. Green, Peresidena, na lala. His Ex. W. R. Castle, Hon. S. G. Wilder, Hon. W. C. Parke a me Dr. R. Makibine.
Ua hoi mai nei ke Kanikela Farani mai kana huakai imi i na mea kaulana o Hawaii nei no ka hoikeike ana aku. He eono paha ona mau hebedoma i noho pu aku nei me ke Kauka Farani ma na kualapa o Hualalai. A iloko o ia manawa, ua ohi mai oia he elua haneri ano ili manu, mailoko mai o na manu Iiwi, Amakihi, Omao, Palila, Apapani, Elepaio, Ou, Oo, Akialoha, Kolea, Alala, Io a me ka nene. Ua makemake nui oia e loaa ona mamo, aohe nae hoi he loaa iki.
UA HALA — I ke ala hoi ole mai, o Iulia wahine mare a ka lunakanawai Apana o Puna, J W Kumahoa, i ke kakahiaka nui Poakolu, Sepatemaba 6 ma kahi noho malihini ma Kikihale, Honolulu, i ke 43 paha o ka nui o kona mau makahiki o ke ola ana. Ua holo pu mai oia me kana kane, a ua hala nae ke kano i Kauai, make iho la ka hoa make he wahine mahope aku nei. Me ka naau kaumaha ke kane e hele a nei nona, a ke hooluolu aku nei makou iaia iloko o kona wa kumakena. Aloha ino ka mea i hala e aku.
PILIKINO.— Eia na makamaka haole i hoi mai nei maluna o ka mokuahi " Kulanakauhale o Nu Ioka," ka Pua Alii Pauahi a me kana kane, J B Atherton a me kona kaikuahine, Kuke wahine, Mrs Samuela T Alekanedero, Jacob Brown jr., Robert Grieve, a me kekahi mau mea e ae.
I ka hiki ana aku o ka moku Lunalilo me na ukana Hawaii ma ka nuku o ke awa o Kapalakiko a lohe aohe i lilo ke Kuikahi i kanawai, aka o ke kuahauaia mai koe, e hoohuli hou iho ana ko i ala ihu i ke kai akea me ke kali mawaho, o ka lohe ia aku o ka lilo o ke Kuikahi i kanawai. Ia lohe ana no, e hooiho aku ana kela, komo i ke awa, a o ke komo wale no ia o kona mau waiwai Hawaii me ke dute ole.
MAKE I WALOHIA — Ma ka wanaao Poalima, Sepatemaba 8 1876, ua hala aku la o Miss Sarah Hall i ke ala hoi ole mai, a hoi aku la i ka ilina hope o na mea a pau. Ua wehe i ka pili me na makua, na ohana, a me na hoaloha. Ua hanau oia ma Kainalui, Kona Akau, Hawaii, i ka malama o Novemaba 1859, a ua hiki aku ka huina o kona mau makahiki i ka 16 me na malama he 10, a hiki i kona la i make ai. Ua loaa oia i ka mai fiva a me ia mai oia i waiho ai maluna o kahi moe a hala wale aku la. He kaikamahine keia i minamina nui loa ia e kona mau makua a me kona mau hoaloha, no kona oluolu a ua haalele iho oia ia lakou e kanikau aku ma keia kae o ka luakupapau. Ua hala o Sarah Hall I ke ala hoi ole mai, Hoi i ka ilina hope o ke kino Wehe i ka pili me na makua.
OWAI O S B. KANAKAOLE ?— E kani Amakihi mai nei malalo o ka malumalu o ka Baibala Hemolele, a " hapala ke kea nakeke ka ai," a e olelo mai nei, " aole au i manao e hoino aku i na nupepa nei, nana i pani i ka owaka ana o ka uila, a me ke ke'u ana o ka hekili, aka, ma kana mau hana, a me aa alakai naaupo a kona mau Luna Hooponopono, ua kau ka inoa o ka hoowahawahaia maluna o ke poo a me ka piko o ka nupepa." He hua nui kau e kapa nei" a m na alakai naaupo," a pela aku. O ka hua mua keia a na enemi e hoopuka ai i ke kahua kaua, aka, i keia enemi hoi, ua kahamaha mai nei ia me ka mahoi. O ke kumu o kona kapa ana mai he naaupo, oia ka hoolaha ana i kekahi mau hana i hana ole ia ma ka Hale Ahaolelo. He okoa ko oukou mea kakau moolelo a he okoa ko makou mau haku manao alakai. Aia la mahea o ka moolelo o ka Ahaolelo i hoolaha hewaia ai, ina he kanaka naauao io no, e hoike mai. O ka mea i nini ai na L. M. a i nene ili kapu loa ai i ka nupepa, oia no kona mau manao alakai e kapa ana i na L M. i makemake e " lalau lima nui i ke" dala a ka lehulehu, he " pakaha dala kiekie." Ia lakou i hooikaika ai e kohoia mai e lilo i L M he $250, wale no dala a lakou i aa ai e lawe no ko lakou uku, aole i $100. hou iho. Ma ke kau hea o na au aenei i hala ma kou ano pua moolelo mai ke kau mai i onouia mai, i ke kumukanawai o 1864 a hiki i keia au, i ike ai oe, ua ukuia na L. M he $350 no ke kau ? Ua hiki anei ia oe, ke pane mai e S B K. i keia ? Ke manao nei makou e hoka oe, a e kanu i kou hilahila maluna o kou lolo iho. O ko makou maau ole anei e keakea aku i ka aihue dala i ke akea, a hopuia makou, he mea ia no makou e haahaa ai ? Aole loa ! E hooho oiai no ka lahui e kokua ia oukou ma ko oukou hilinai ana e mahaloia ka ihiihi o ko kakou kumukanawai.
Ke kauoha aku nei ko makou mau Luna Kuokoa ma na mokupuni e ae, e hunona mai i ke koena o ko lakou mau aie.
Eia aku nei i Maui ka Puali Ana aina o ke Aupuni e hoopau ana i ka lakou ana hope no ia mokupuni.
Mai poina na makamaka o ko makou poe heluhelu i ka leha mau ana ae e nana i na olelo hoolaha e puka kinikini aku nei ma ko kakou Kilohana.
I ka hora 5 o ke ahiahi Poaha iho nei i holo aku ai ka mokuahi " Kulanakauhale o Nu Ioka" no na panalaau
o ka hema.
KOMO DUTE OLE.— O na waiwai mua
o Ameika i komo dute ole mai ma ke awa o Honolulu nei, oia no na waiwai o ka mokuahi " Kulanakauhale o Nu Ioka." Ua noiia mai makou e hai aku
ma ke akea eia no ka ohi ana o na dala auhau o ka makeke ia Napoliana, a eia no kona palapala hookohu ia ia kahi i paa ai, aole i laweia aku. Ua makemake pu no hoi ia e lohe pono ia aohe i helelei na kenikeni mai kona noho luna aupuni ana, a ua loaa mua no ia ia ke kuonoono mamua o ka loaa ana aku o keia oihana.
OLIOLI KUKAIKAHI PANAILIKE !
NA HURO EKOLU O KA AHAOLELO !
NA PU HE 21 O PUOWAINA !
KA HUAKAI KUKUI LEALEA !
Ua piha na kanaka a me na haole o Honolulu nei i ka olioli palena ole no ka lilo ana o ke Kuikahi Panailike i Kanawai, a no ia mea, ma ka halawai ana o ka Ahaolelo ma ka hora 9 A. M. o ka Poaha nei, ua hoike aku ke Kuhina o ko na aina e i ka Hale i ka lono pili aupani i loaa mai, ua lilo ke Kuikahi Panailike i kanawai ma ka la 9 o Sepatemaba. Ua pane hoomaikai mai ko ka hale ma ka haawi ana i ekolu mau huro.
Ma ka hora 12 awakea, ua haawi mai o Puowaina i na pu aupuni he 21, e hoike aku ana i ko ke Aupuni olioli nui no keia mea i imi nuiia no ka hapaha keneturia, a akahi no a loaa.
I ka hora 7 ahiahi, ua akoakoa he huina lehulehu o na kanaka Hawaii ma ka Hale Kaa Wai Helu 2 no ke kai kukui hookahakaha. A i ka makaukau pono ana, ua hele aku ka huakai ma keia mau alanui : Hele ma Alanui Hotele, a pii ma Alanui Nuuanu, a hiki ma ka hale noho o Hanale Kaaka ma Maemae, ilaila i haiolelo mai ai ke Kuhina noho o Amerika ma Hawaii nei, ka His. Ex. H. A. Pierce imua o ka huakai, e hoike ana i kona olioli no ka hooholoia ana o ke Kuikahi. A pau kana haiolelo ana, ua haawiia he ekolu mau huro ana, alaila, ua haiolelo mai ka Hon. H. A. P. Carter.
Pau na hana malaila, huli hoi ka huakai i ke kaona nia ke alanui Nuuanu ; huli ma ke alanui Kukui, iho ma ke alanui Papu ; huli ma alanui Beritania ; iho ma alanui Rikeke a komo i ka Hotele.
Ma keia wahi i hoolohe ai ka huakai i ka haiolelo a ke Kanikela Amerika Scott, e mahalo ana no hoi no ke ko ana o ke Kuikahi. A pau kana, alaila ua haawiia he ekolu mau huro.
Maanei i hooleiia ai he elima mau pahu mea hoopahupahu, a ua kaapa mai ua mau mea kani nei me he mau puhi ka-pa la, aka, he keu aku no hoi a ke kakani me ka paia kuli. O keia mau pahu, mai ko kaa lio aku no ia i hoopihaia e ke alakai o keia Kilohana, i kauohaia e hahai mahope o ka huakai kukui me ka hookakani mau aku i na wa a pau.
Pau na hana, iho ka huakai ma alanui Rikeke, huli ma alanui Moi, a komo iloko o ka pa o Aliiolani Hale. I ka hiki ana aku ilaila, e ku makaukau mai ana ka Moi e hookipa aku i ka poe i hui pu me ia ma keia olioli ana.
Maanei i haawi aku ai o Hon. Hanale Kaaka i na mahalo kiekie a me na hoomaikai palena ole ana maluna o ka Moi no ka holo ana o ke Kuikahi Panailike ma o Kona imi kino maoli ana ia i pomaikai no kona lahui.
A ma ke kono a ke Alii ka Moi, ua pane mai ke Kuhina o kona na aina e ma ka aoao o ke aupuni.
Alaila, ua haawi ia he eono mau huro no na haiolelo elua.
Mai anei aku i hoi 'ku ai ka huakai i ka Helu 2, a hookuu ia ae la ka huakai, a ua hoi aku kela a me keia me ka olioli. A pela i lilo ai keia Ku kahi i Kia Hoomanao mua no ke Au o ko ka Moi Kalakaua noho ai aupuni ana.
Ua hoomalamalama ia no hoi kekahi mau hale me na kuikui he noi, a o ka makou mau hale oi loa i mahalo ai, oia ka hala noho o Mr. Holo, a me ka halekuai o Dilinahama ma.
Mawaena hoi o na mea hana paia kuli, o ka hale kuai o Afona laua o Akaka ka oi aku, ke hele la a luluu na alapii i na mea hoopahupahu.
Nu Hou o na Aina e.
Ku mai ka mokuahi " Kulana-
kauhale o Nu Ioka."
Ma ke ku ana mai o ka mokuahi " Kulanakauhale o Nu Ioka" i ke kakahiaka nui o ka Poaha iho nei, iloko o na la holo 8 mai Kapalakiko mai, ua loaa mai ia makou na mea hou a hiki i ka la 13 o keia malama.
Ua hoi mai nei na Alii Pauahi a me kana kane mai ka laua huakai makaikai honua aku nei i Amerika a me Europa. No ke Kuikahi Panailike.
Ua kuahaua aku ka Peresidena o Ame-
rika Huipuia i ke Kuikahi Panailike ma
ke akea o ia lahui a ua lilo i kanawai ma ka la 9 o Sepatemaba nei. O na waiwai Hawaii a pau e komo aku ana ma ke awa o Kapalakiko mahope iho o ka la 9, e komo dute ole aku ana lakou.
Huro no ke Kuikahi Panailike ! No Amerika Huipuia.
He nui ka ikaika a me ka hahana o ke
aumeume ana o na aoao elua o Amerika Huipuia no ke koho balota luna aupuni mokuaina iho a me ke koho balota elele Peresidena ana. Ke hooikaika nei na aoao elua i ko laua mau ikaika a pau. He elua mau mokuaina e hoomaka ana ke koho ana i Sepatemaba nei, oia o Veremonota a me Maine. He mau mokuaina lilo mau no keia i ka aoao Repubalika, a me he mea la, e lanakila ana no ia aoao ma ia mau mokuaina i keia makahiki.
Ua make ka Peresidena o ka Ahaolelo olalo o Amerika Huipuia, o Mr. Kerr kona inoa, ma ka la 19 o Augate.
Ma ke koho balota o ka mokuaina o Akanasa, ua puka iho ka aoao Democarata. Aole i pau loa mai na lono o na apana koho balota a pau, aka ke olelo nei ka aoao Democarata, aole e emi ana ko lakou heluna oi malalo o he 40,000.
Ma ka la 2 o Sepatemaba, ua haalele iho o Don Carlos a me kona mau hoa hele ia Nu Ioka, a hoi aku no Europe.
Ua pau i ke ahi, ka halemai o na Geremania ma Kapalakiko.
He 124 ka nui o na kakauolelo mai loko ae o 800 i hoolimalimaia no ka Oihana Kaua a me kona mau huro, i hoopauia mamuli o ka hoolohe ana i ka manao Democarata o ka Hale Ahaolelo o lalo o Amerika Huipuia.
Na Peresidena Kalani i ka Emepera o Geremania.
WASINETONA, Sept. 5 — Ulysses S. Grant, Peresidena o Amerika Huipuia ia William, Emepera o Geremania, Moi o Perusia, a pela aku, a pela aku : I ka makamaka nui a maikai —Ua waihoia mai iloko o ko'u lima ma ka la 4 o Iulai kou palapala o ka la 9 o Iune, maloko olaila, e pahola mai ana oe i na hoomaikai ma ka puni ana o na makahiki he haneri o ka noho aupuni ana o keia aina mai ka la i ike muaia mai ai, a ua hookipaia mai na manao me ka piha i ka makemake. O ia hoomaikai ana no na holomua i hala o keia aina, a me kou manao maikai no ka hoomau ana aku, o ka noho ana hoalauna pu mau ana, a ua lilo ia i mea olioli kiekie no'u, no ka mea, ua puka mai ia hoomaikai mai ke poo mai o
ka emepire nona keia Repubalika iloko o ka haneri makahiki i hala, i noho launa makamaka ai a i kulike hoi na holo mua a me na pomaikai, a ua hoomau loa ia mai ia launa ana ma o ka holo mua like mau ana o na aina elua. O ko'u makemake nui
a me ka iini o ko'u puuwai e hoomauia keia launa like ana, e like la me ka hailona
a na aina elua i ike aku ai a ike mai iloko o ke keneturia mua o ko makou noho kuokoa ana, pela iloko o ke keneturia a hiki mai ana. Me ka manao e hooloihiia kou noho alii ana me ke ola maikai a oluolu, a ke pule nei au i ke Akua e malama mai ai oia ia oe e ka Moi iloko o kona malama laahia ana. U. S GRANT Peresidena HAMILTON FISH, Kuhina Nui. No Europa
Aole no i hookuuia na moa kakala o Europe e hakaka, oia o Enelani a me Rusia.
Eia malalo iho nei ka nui o ke aumoku kaua o Enelani ma ke Kaiwaenahonua, a ke akoakoa ia lakou a pau ma kekahi Kaikuono o Tureke : Hercules 14 pu 631 kanaka 5,234 tona. Devastation 4 340 4,407 Swiftsore 14 451 3,893 Invincible 14 451 3,774 Pallas 8 253 2,372 Research 4 166 1,253 Monarch 7 700 7,843 Triumph 14 600 4,892 Rapid 3 125 672 Battery 3 90 663 Torch 5 67 426 Helicon 2 73 837 Antelope 3 73 837 Cockatrice 2 46 269 Wizzard 2 40 270 Coquette 4 59 295 Express 4 69 300 Cruzier 5 88 752 Hibernia 16 121 2,530 Sultana 12 700 8,628 Rupert 4 300 5,144 Hotspur 3 250 3.487
He kaua nui kai hooukaia mawaena o na koa Tureke a me na koa Serevia, kekahi o kona mau apana aina kipikipi imua o kekahi wahi ikaika o na Serevia, oia o Alexanezina a me na koa Tureke ka make. He