Ka Nupepa Kuokoa, Volume XVI, Number 2, 13 January 1877 — Page 4
| This text was transcribed by: | Reanne Shinsato |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
Jehovah Jireh.
Gospel Singer p 5.
1
A ala kue na hoa oonei,
A hoopuni mai na mea hookekee,
Ua paa nae Iesu la ke hee na mea e,
A nana kakou la e hoolako mai.
Cho —E hoolako mai, E hoolako mai,
Na Iesu kakou la e hoolako mai.
2
Kahea Iesu, he leo maikai,
E hoolohe e, a ku a hahai ;
Paulele, aloha, a hoopili ae,
A nana kakou la e hoolako mai.
Cho.—E hoolako mai, &e.
3
Lauwili kakou a auwana no,
Aloha lesu a kii i hoi hou,
Puukaua no oia, he hale waiwai,
A nana kakou la e hoolako mai.
Cho.—E hoolako mai, &e.
4
Ua hune a u, a kaumaha e,
Na Iesu no nae e hoona maikai,
A pau koonei ola, e hooho ae,
Na Iesu kakou la e hoolako mai.
Cho.—E hoolako mai, &e.
Hawaii.
Haawina Kula Sabati.
Helu 4.—Sabati, Ian.28.
Kumu Hana.—Elia ka Tiseba.
Pauku Baibala, I Na Lii I 7:1—16.
Olelo aku la hoi o Eha ka Tiseba no ko Gileada, ia Ahaba, Ma ke ola ana o Iehova ke Akua o ka Iseraela, imua ona e ku nei au, aole auanei he ua, aole hoi he hau i keia mau makahiki, ma ka’u olelo wale no.
2 Hiki mai la ka olelo a Iehova ia ia i ka i ana mai.
3 E hele oe mai kela kela wahi aku, a huli Likina ae, a e pee aku ma ko kahawai Kerita mamua o Ioredane.
4 Eia hoi keia, e inu oe i ko ke kahawai; a ua kauoha ae nei au i na manukoraka e hanai ia oe ilaila.
5 Hele aku lo hoi oia a hana e like me ka olelo a Iehova ; no ka mea, ua hele ia a noho ma ke kahawai Kerita mamua o Ioredane.
6 A lawe mai na manukoraka i ka berena a me ka io ia ia i kakahiaka, a i ka berena a me ka io i ke ahiahi ; a inu ae Ia hoi oia i ko ke kahawai.
7 Eia kekahi, i ka hala ana’e o na la, maloo iho la ke kahawai, no ka mea, aole na ma ka aina.
8 ¶ A hiki mai ka olelo a Iehova ia ia, i ka ana mai.
9 E ku ae, a hele oe i Sarepeta no Sidona, a e noho malaila : eia hoi, na kauoha ae nei au i kahi wahine kanemake malaila e hanai ia oe.
10 Ku ae la hoi, a hele ia i Sarepeta ; a hiki i ka puka o ke kulanakauhale, aia hoi, malaila ka wahine kanemake e ohi ana i ua lala laau ; a kahea aku oia i ka wahine, i aku la, Ke noi aku nei au ia oe e lawe mai i wahi wai uuku maloko o ka ipu, e inu au.
11 A i kona hele ana e lawe mai, kahea aku la oia ia ia, i aku la, Ke noi aku nei au ia oe e lawe mai na’u i kau wahi berena uuku maloko o kou lima.
12 I mai la ka wahine, Ma ke ola ana o Iehova o kou Akua, aole o’u popo palaoa, hookahi wale no piha o ka lima o ka palaoa wali ole, maloko o ka barela, a he wahi aila uuku iloko o kahi omole : eia hoi, e ohi ana au i na lala elua e hele au iloko, a e hoomoa’e ia na maua me kuu keiki, e ai mamua, a make.
13 I aku la o Elia ia ia, Mai makau oe; aka, e hele a e hna oe e like me kau olelo; aka, e hana mua oe i wahi popo palaoa uuku na’u, a e lawe mai i o’u nei, a mamuli e hana oe na olua me kau keiki.
14 No ka mea, ke i mai nei o Iehova ke Akua o ka Iseraela, Aole e emi iho ka barela palaoa wali ole, aole hoi e pau ae ka omole aila a hiki i ka la e haawi mai ai o Iehova i ka ua ma ka ili o ka honua.
15 Hele ae la hoi oia a hana e like me ka olelo a Elia ; a ai iho la ko kona hale i na la he nui.
16 Aole i emi iho ka brela palaoa wali ole, aole hoi i pau ae ka omole aila, e like me ka olelo a Iehova ana i olelo mai ai ma ka lima o Elia.
Pauku Gula. Iloko o ka wai e hoopakele mai oia ia oe i ka make. Ioba 5:20.
Pauku hailike p 5—9.
Mele.—HIm. 391, 8—6. Leo.
1
Pomaikai e, ka Haku e,
Na kauwa pono au,
Ooe ko lakou Alakai,
A maluhia mau
2
Maanei, a ma na aina e,
Nau lakou e hanai ;
Ma kahi ino, wela, mai,
Nau no e pale ae.
Pule no na kauwa a ke Akua, i malama ponoia iloko o na wa pilikia, &e.
Na ninau o na Kumu.
P 1. Elia, nohea? Heaha kana oihana? Heaha ke ano o kona inoa? Iehova kuu Akua. Tiseba, oia paha kona wahi noho. Tesebone kekahi inoa. Gileada, he aina ia ma ka hikina o Ioredane. Owai Ahaba ? Heaha ka Elia olelo ia ia ? Ma keaha ka hoohiki ana, aole he ua, aole hoi he hau ? no na makahiki ehia ? Luka 4:25. Iakobo 5:19. No kaha ka ua ole ? Ma keaha ka ua ole ?
P 2, 3. Heaha ka ke Akua kauoha ia Elia ? Mahea e pee ai ? Mahea Kerita ? No keaha e pee ai ?
P 4. Ma ke aha oia e inu ai ? A na ke aha e hanai ?
P 5, 6. Hoolohe anei Elia i ka ke Akua kauoha? Ehia lawe ana o na manukoraka i ka berena me ka io ma ka la ? Nohea keia ike a me ka noonoo o na manu ? He hana aha keia ? Nohea ko Elia wai ?
P 7—9. A maloo ke kahawai, kauoha ke Akua ia Elia e hele i hea ? Aia Sarepeta mawaena o Sidona me Turo, he wahi kulanakauhale uuku. Owai malaila nana oia e hanae ? Luk. 4:26.
P 10. A puka Elia i ka puka o ke kulanakauhale. Owai kana i ike ai ? e aha ana ? Heaha hoi kana noi ?
P 11, 12. Heaha kekahi noi e ae ? A pane ka wahine pehea? heaha wale no maloko o ka barela? heaha iloko o kahi omole aila? Heaha kana olelo no ka ohi ana i na lala laau elua ?
P 13. Pehea hoi o Elia i pane aku ai ? mai aha oe ? a e hana oe i aha nona ? a mahope iho e aha ?
P 14. Pehea la o Elia i hoolana’i i ka manao o ka wahine ?
P 15, 16- Ae, anei ka wahi i ka Elia olelo ? Pehea hoi ko koua hale? Pehea hoi ka palaoa uuku a me ka aila uuku ? Nani ka hana a ke Akua ?
Mele.—Him 319, 8. Leo.
1
Iehova no ke Akua mau,
Ka puuhonua no kakou,
Malaila mau e malu ai
Ko Iesu ekalesia nei.
3
Ua kahi mau kou muliwai,
I ola kou kauhale nei,
Mawaena ou ke Akua mau,
I ole ai e nauwe hou.
Na ninau a ke Kahu.
Na makua Heaha ka pauku gula? Pili ia ia wai ? Pehea ka pili ana ia Elia ? ia Iakoba ma i ka wa wi ? i ka poe Iseraela iloko o ka waonahele ? Pehea ke loihi o ka wi i ka wa ia Ahaba ka wa ia Parao ? Nohea ka ai i ka wa wi ia Iosepa? Nohea ka wai, ka io, ka berena ma ka waonahele?
Na keiki, Nohea ka berena a me ka io no Eha i ka wa ua ole a wi ? Pehea la e hiki ai i na manu ke hanai ia Elia ? Nawai i hana i na manu ? Nawai i hookomo i na manu iloko o ka halelana? Heaha ka Iesu olelo no na manu? Mataio 6:26, 10:29. Ua kauoha ia na manu e aha ia Iehova ? Halelu 148:1, 10. Heaha ko na manu ? Mat. 8:20. Na na manu kekahi i hanai ia Elia, nawai kekahi? He wahine kanemake aha keia ? He wahine manaoio i ke Akua.
Ke kula a pau. Heaha ke ano o Ahaba i haiia mai ma kela pule ? Ia ia e alii ana heaha k’pilikia nui i hooiliia mai ma ka aina ? Ka wi anei kekahi hoopai i hai e ia mamua ? Kan. 11:17. 28:23. Ma keaha i paa ai ka lani i ua ole mai ? Iak. 5:17. Ma keaha e loaa’i na mea e poino ai, a me na mea e pomaikai ai ? Ina nui loa ka ua heaha ka mea e pau ai ? Ina ua ole a maloo loa ka aina heaha ka mea e ua mai ai ? Pehea e loaa’i ka ua o ka uhane ? He manu aha ke Koraka ? mahea i kakau mua ia’i ? Kin. 8:7. Nawai i hoomakaukau i ai nana ? Iob. 38:41. Ka maka owai ka ke koraka e kiko ai ? Sol. 30:17. Heaha ka Iesu olelo no na manu koraka ? Luk. 12:24. heaha ka wanana no na koraka ma Isaia 34:11 ? Mahea i kakau ia’i kekahi mele loihi no ke koraka ? Mahea ka like ana o ko ke Akua malama ana ia Elia me kona malama ana ia Iakoba ma, ma Aigupita, me ka poe Iseraela ma ka waonahele? Mahea ke like ana o ko ke Akua hanai ana ia Elia me ka wahine, kanemake me kahi palaoa uuku me kahi aila uuku me ko Iesu hanai ana i ka lehulehu me na popo berena elima, me na ia elua ? Heaha ka aahu o Elia ?
Mele.—Him 324. 7. Leo.
1
Kau e kau i kou luuluu
Ma ka Haku kou Iesu,
Oia no kou koo paa mau
Ke hee ae na ao a pau.
2
Ma na ino pa huhu
E hoea kou Iesu,
A olelo olu no,
Owau no keia, mai makau.
Pule i hooiliia mai na pilikia ka mea hoala i ka weliweli a me ka mihi, i hooliloia hoi na pilikia, na mai na wi i mea e mihi ai, &e.
Haawina no Feb. 3. I Na Lii 18:5—18.
Aha Mele O Kaumakapili:—E like me na hoolaha, ua hookoio ia ae ka haawi ana o na keiki o Kawaihau i ka aha mele maloko o ka luakini o Kaumakapili i ka po Poaono aku nei i hala, i mua o ke anaina piha, no kokua ana i ka waihona o ka ahahui Hoola lahui o Kaumakapili. Ua maikai maoli a ku i ka makemake na mele i himeniia ma ia po, a ina he poe lakou i ao kumu ia, aole o lakou like Aohe mea hoohalahala i ka lakou mau mele ana, a ua makepono ka poe apau i hele aku i ike ku maka O Mrs Kamakau no na ka oi ma kana mele Italia O ka nui o na loaa ma ia po he $160.
Ka Haiolelo a ka Moi imua o na Poo La—Ianu. 7, 1877.
[Malalo iho nei e loaa ai i ko makou poe heluhelu ka haiolelo a ka Moi imua o kona mau makaainana i hooho@ia malalo o ka moa Poo La ;]
E ka Peresidena, a me na hoa o ka Hui Poola o ka kulanakauhale o Honolulu nei. Ua ae ae i ke noi a oukou ma o ko oukou Peresidena’la, e hele mai au e hoike aku i wahi manao hoolana imua o oukou no ka pono o ka oukou Hui. Ua hauoli au ia manao maikai ana a oukou, a me ka hoolaulea ana me ke Poo o ke Aupuni e hui pu me oukou ma ka oukou hana maika a pau.
O ko oukou hoohui ana ia oukou iho, malalo o ke kulana a me ke kahua o ka hoohui like ana i anaina hookahi ma na hana ku i ke aloha he mau manao kiekie no ia iloko o ko oukou mau puuwai, e hapai ae ana i ko kakou noho ana ma ke ano lahui a aupuni hoi, i ka pane-poo kiekie o ka naauao, a maluna iho no o oukou ka hoomaikai ia e ka poe maikai a pau, ke kela o ke kiekie a me ke kela o ka hanohano, o keia hooulu hana ana i waena o oukou iho.
O ko oukou inoa he “Poola,” he inoa hanohano a kiekie loa ia. Aole ia he inoa hou no keia mau la kokoke aenei. He inoa kahiko loa, a he mea kupaianaha a he mea kahaha no hoi i ka ninau iho pehea la i loaa mai ai a i ala hou mai ai o keia inoa i keia wa ? A pehea la i manao ai oukou e lawe i keia inoa i inoa no oukou ?
O keia inoa, he kapu kahiko ia no ko’u mau kupuna, i hala e aku, a no la i keia au o ko kakou noho ana, ke ola nei ia inoa a me ia kupu ma oukou la na makaainana.
O keia inoa i ka wa kahiko, ua kapaia o ke kapu “ Pooholewa-i-ka la.” A penei noia. No ke kapu o keia alii o Kauhiokalani ke alii o Hana kekahi o ko’u mau kupuna, holaila, ua menemene ia na alii oia lalani, aole e kau na kukuna o ka la maluna o ko lakou poo, a e huna i kahi malu ka pono. Aia a puka mai ka la i ka kakahiaaka, alaila, e hoolewa auanei ke poo o ua lii nei makai, a aia a huli makai ka la alaila hoololi mauka ke poo. Ua makau i ka la i ke kau ana o kona malamalama maluna o ke poo o na alii, aka ; i ka wa o ua mau alii nei e makemake ai e imi i pono no lakou, ua menemene ole ae lakou i na la ‘la a komo poo aku la iloko o na hana, i mea e lanakila ai kanoho ana ma ke ano aupuni, a ke ano noho ana, a meke ano maluhia.
Aole wale ma Hawaii nei ke ano o keia mea he “Poola,” aka, ma na wahi a pau o ka honua nei, ina wa a pau i hala a hiki wale ia kakou e noho nei i keia wa. Pela ka hoike o ka moolelo o ka honua nei.
Aia ma ka Palapala Hemolele kekahi mau moolelo, i piha i ka hoike ana i na ku. mu kiekei i loaa’i ia oukou keia inoa he “ Poola.” Aia maloko o na kanaka mua o ka honua nei, o Adamu ma laua o Ewa, i ko laua wa i kipaku ia aku ai mai ke kin@pui nani o Edena, a hele aku la laua malalo o ke kaumaha o ka hoohilahilaia no na hewa a laua i hana ai, aia hoi, ua hele aku la lana, ma ka ili o ka honua, e kahe kahou mai ko lana loe, e huli a hana, a e lilo i mau “ Poola” mua no ka lahui holookoa o ka honua nei.
O ka lua. O Kaina ma laua o Abela. I ko Kaina wa i pepehi ai i kona kaikaina, a kau ia mai ai ka hoopai maluna o kona poo e hele kuewa ia maluna o ka ili o ka honua nei, aia hoi na lilo oia i Poola, a ma o na la i ulu mai ai he lahui kanaka he nui, a i pomaikai ai ka honua nei.
O ke kolu. He Poola o Mose, a me ke anaina o ka Iseraela, i hele ai i ka waonahele a loaa aku kahi e maha ai ka poe i hooluhi ia.
O ka aha. He Poola o Zorobabela, kekahi o na alii o India, i hele ai iloko o ka ino, ka hoomanawanui, a me ka wela o ke poo i ka la, e noi aku ia Dariu ke alii o Paresia, e kukulu hou i ka luakini o Solomona a e hookuu ia na keiki a ka Iseraela mai ke kanahiku makahiki o ko lakou noho pio ana.
O ka lima. He Poola ko kakou Mesia, i hele mai ai e hoola i ka lahui kanaka o ka honua.
O ke ono. He Poola na haomana a Iesu. ka poe nana i hooikaika e hoolaha i ka Euanelio iwaena o ko ke ae nei.
O ka hiku. He poe Poola, na kumu, na kahuna a pau o kela Ekalesia keia Ekalesia, i ka lawe ana mai i ka pono o ke Akua Mana Loa iwaena o keia Pae Aina.
E huli ae hoi kakou a nana, ma o kakou o Hawaii nei, a nana i na Poola mua o ko kakou aupuni. Aole au e lawe mai ana ina kupuna kahiko aku, aka, e lawe mai au ia Kamehameha I, oia ko kakou Poola mua o keia mau la kokoke.
I kona holo ana ma Laupahoehoe a hahau ia ai kona lae i ka hoe, a mamalahoa ai kanawai, o kona lilo mua ana ia i Poola no ka mea, ua wela kona kua i ka la, a ua lepe ia kona lae i ka hoe.
Hoomaka oia e nai i ke aupuni mai Hawaii a Kauai, he poo wela ia nona i ka la, a o kona ili hoi i ke anu a ka ihe makini. Pau ke kaua, a noho maluhia iho la ka aina. Ua hoike oia i kana olelo ani, “E hele ka elemakule, ka luahine, ke keiki a moo i ke la, oia hoi, e lilo lakou a pau kona lahui kanaka i poe Poola, me ke kau ole o ka wela o ka make maluna o lakou.” Ua mahi oia ia Kuahewa, ke wela la no kona poo i ka la. Kukulu oia ia Kih@o a me na hana nui e @e. ke wela la no kona poo i ka la. A ma keia inoa hookahi, ua kiekie ke inoa o ka Hui.
O Liholiho Kamehameha II. He Poola o’a oiai, ua wela kona poo i ka lai ke kaua ma Kuamoo nei, ua hoohioloia na kapu. make na oihana hoomana o ka wa kahiko, a na loaa i ko Hawaii nei ka noho ana maluhia.
O Kamehameah III., he “Poola” ia, ua hele oia me kona kahu me Kaahumanu, a puni ka aina, e hoohuli ana i na kanaka i ka pono.
O Haalilio a me Rikeke, he mau “Poola” no laua,
O Kamehameha IV., he “Poola” ia, no ka mea, ua hele oia iwaena o na alanui o ke kulanakauhele o Honolulu, e noi hele ana i dale, i mea e kukulu ai i ka Halemai i pono no ka lehulehu.
He “Poola” o Kamehameha V., na hele aku oia iloko o ka wela o ka la, e kokua i ka poe o Kau i pau ai i ka Pele.
He “Poola” ka mea e noho nei ma ka Nohoalii, oiai ua holo oia i Amerika, meka wela o kona poo i ka la, no ke Kuikahi Panai Like, i pomaikai no ko kakou aupuni, a no oukou. O ka manao ana e hooulu e hoola hou i keia lahui kanaka, he hana no ia na ke poo wela i ka la. E wela ana hoi ko oukou poo ma ka oukou hana, a e wela ana hoi Ko’u ma ka’u hana.
He inoa hanohano keia no kakou a pau, a e lawe kakou i keia inoa, aole keia inoa e hoohilahila ana ia kakou, aka, he inoa e hanohano ai ; oiai e paa mau ana ko kakou lima i ka hana, e wela ana ko kakou mau poo, me ka luhi, me ke kahe ana o ka hou o ko kakou mau lae, no ka pono o ka noho ohana ana ; a o ka hui o keia hana maikai, o ka maha, o ka oluolu a me ka maluhia, me ka maikai o ka noho ana.
Aka hoi, ua haahaa keia inoa malalo o ke kiekie o ke kahua i kukuluia ai o keia Hui. Oia hoi, he hai e kokua aloha ana kekahi i kekahi. Ma keia ano, ua hauoli au i ko oukou lawe ana i kekahi apana nana A’u i manao nui loa ai, oia hoi o ka Hooulu a me ka Hoola ana i ka Lahui Hawaii.
Ma keia wahi, e na hoa o ka “Hui Poola,” ua puili mai oukou a ua aapo mai i ka iini nui a Kuu naau. A ke hilinai nei Au ma o oukou la a me ka oukou hana maikai la, e ulu hou ai, a e ola hou ai ka Lahui Hawaii.
E hoomau aku, a e onipaa mau aku, i ku paa ai ka “Hui Poola,” a i loaa like pakahi i na hoa o keia Hui, ke lei daimana o ka hoonaniia. He “Hui Poola” i aloha nui i kona lahui ponoi. He Hui i manoanoa a i apiapi i na hana maikai.
He leo na ka manu ia kakou.
E Ka Nupepa Kuokoa E ; Aloha oe :—
Ka manu liwi, nana e lu hoohelelei nei i na wai muo lehua, o ka uka iu ano la i Lihau.
E olu mai oe i ka leo a kahi manu opio nawaliwali, akahi hoi a hele aku ma ko oukou mau i puka hale; na kualono, na kahawai, a me na alanai kikeekee, mai Hawaii o Keawe a Kaoai o Manokalanipo.
E ike ia kakou Hoonupepa; o kipa hewa auanei ke aloha i ka iole, a miki hoi ke owau i ka hemahema-
Owau keia la o ka nupepa Kuokoa, o ka m. h. 1877.
O ko’u mua iho nei, e moe ana oia, moe kau, a moe hooilo, ua hana ka uluna o Welehu ka malama, a owau hoi auanei ke ulaula aku ana ko’u mau wawae; i ka malama mua o Ianuari. Owai la auanei ko’u makamaka nana e heahea mai, ae uhi mai hoi i ko’u olohelohe ana ? Ea ! Ea !!
O oe e Kauakanilehua o Hilo, e waiho ka helahela ana i ka laula o Keawe, a me lakou la aku no hoi, e pupue maila i keanu o Hauailiki; e awili paa mai oukou i wahi kahakahana Pa’u-pa’u no’u, oia hoi na dala elua no ka makahiki hou, e haawi mua aku no i ka Luna-Hooponopono, ae inu mua ae oukou i ka wai hau o Nuuanu, a na’u no hoi e lawe aku i ko oukou makemake ma o a maanei.
I ka malu ke Kuwawa o Wailuku, i Maui, ame kou mau hoa pa-na kui nahe olelo ana hoi’ oia o Makawao, ame Lahaina, e hawele kuilima like mai hoi oukou, i wahi kakaiapola no’u e lele aku ai, io oukou la oia no na dala elua.
Aole me ke koi wale aku. me ka makemake ole o loko. Ina he makemake ole, ua oki no ka oukou. Ina he makemake io.
Eia mai ko oukou lei lehua, a Laukiamanu i kei ai, a hiki aku.
Ia oe hoi e ke Taona, lai o ke aupuni Hawaii’ ka ua Kukala hale hoi o ka aina, a me kou mau hoa kuka; o na pono aupuni: oia o Waialua i ka Ehukai, a me na pali hauliuli o ke Koolau; e lawe kupoki mai hoi oukou i wahi laau no ko’u piko aai, aohe la aau e ola’i. Aia wale mai no ia oukou ka laau e ola ai; a e make ai, oia na pehu elua, e haawi mua aku no i ka Luna Hooponopono, a ola ae ka piko.
I ka limu kaha kanaka aku hoi o Manuakepa, i Kalanipo, a hoa kuili hoi o ka Pahapaha o Polihale. Ua ola au ia oe, ua hiki mua ae kau lei vabine, a’u i haaheo iho nei i ka la Karisimaka. A ua eo makou ia oe, e Kalanipo, no kou makaala.
Ia lakou la hoi ke kau leo ana ae, e uleulike mai hoi oukou e haawi i na dala elua i ka Luna Hooponopono, e Molokai, Lanai, a me Niihau. E wiki! E wiki!! e wiki kakou o hala e ka manawa. Aloha no,
J L. K.
Laie, Dek 30, 1877.
He manao paipai i ka poe lawe i ke Kuokoa mai ka Apana o Kaneohe nei a me Heeia.
Ia oukou e na hoa mai Kaneohe a Heeia i lawe like i ke kuikui malamalama, ka nupepa Kuokoa, e aia like mai a eleu mai kakou i ka lawe ana i kona kino holookoa, mai pi a ike makamaka ole, ke hele aku a kipa ma ko oukou mau home.
A ina oukou e ike mai a hookipa iaia, e hookipa me ke aloha walohia i ka hanai ana iaia me ka mea kupono.
O ka mea e hookipa ana me ka maikai a hanai pono e loaa no iaia ke kii hanohano o ka makua ‘lii M. Kekuanana. a o ka mea e hoemi i kona aloha, oia hoi he hapalua makahiki wale no alaila e haawi no lakou i ke aloha mamua ae o na hebedoma elua i ka malihini i hoiki ia aela maluna.
E haawi nae ma ka lima o ke kamaaina nana e alakai pono aku ma ko oukou mau i puka a Hale.
I ka L. H. ke aloha a me na keiki ulele hua kepau o ka hale pai.
Owau no o ko oukou makamaka.
J. M. Maawe
Kaneohe, Ianuari 8, 1877.
Ka Alia Balaki A Pinkhama !
—He Mea—
Ole Ka Wai I Keia Aila Hamo !
Palupalu Maikai na Ili Hooluu.
Ke noi haahaa ia’ku nei oukou, e hoao iho i keia
Aila Balaki, Hamohamo Palewai, Hoopalupalu Ili.
E kuai a e hoao i na Buti, Kamaa, Ili Kano Kaa, a ia na mea ili hooluu e ae paha i loaa ia oukou. Ua laua loa ka manao, ina oukou e hoao ana pela, e mahalo ana oukou, a hoomaikai aku auanei me ke kanalua ole Ina e hamo pinepine ia i keia
Aila Balaki Hoopalupalu Ili,
E mau no ka palupalu maikai o na ili, me ka nakaka ole. Aole hoi no ka wa ua wale no e pono ai keia Aila, aka, no ka wa la kekahi. He 50 keneta no ke tini.
Aila Inika Balaki Hoomau Ili a PINKHAM.
He mea maikai loa, i hanapaka maoliia no ka hoopalupalu ana i na ili kaa lio, na kaulawaha lio, na noho lio, a pela aku. E hoao oe—Kumukuai no ke kini 75 keneta.
Na Olelo Mahalo.
Hilo, Nov. 5, 1875.
Ua hoao pono wau i na Aila Hamo Kamaa e ae, a ua hoao pono no hoi i ka Aila Hamo Balaki a G. S. Pinkham ; a ua hiki ia’u ke olelo me ke kanalua ole, o keia Aila ka helu akahi, a me ka oi o ka maikai, o na Aila Balaki a pau a’u i hoao ai.
A. O. Forbes.
Ua hoao maua i na Aila Hamo Kamaa a G. S. Pinkham & Co., a ua oi aku ka maikai mamua o na Aila Hamo Kamaa mai na aina e mai.
R. A. Lyman,
S. Kipi.
Hilo, Nov. 10, 1875. Kiaaina o Hawaii.
Hilo, Nov. 10, 1875.
Ua hoao pinepine au i na Aila Hamo Kamaa a G. S. Pinkham & Co., a ua manao no au oia ka Aila Balaki Kamaa maikai mamua o na aila e ae a’u i hoao ai mamua, a he oiaio keia.
C. K. Hapai.
Hilo, Nov. 10, 1875.
No ko’u ike oiaio loa o ka Aila Hamo Kamaa a G. S. Pinkham he Aila maikai loa no ka Hoowaliwali i ka ili.
D. Kamai.
Hanaia e G. S. Pinkham & Co., ma Hilo, Hawaii.
E kuaiia aku no e Bolles & Co., Agena, ma Honolulu. 780 3m 791
Anoai I Ka Lehulehu.
E kipa mai ae nana,
i kumaka ai ka ike i na waiwai nani i loaa mai nei iloko o na La Kulaia iho iho nei.
Penei ke ano o ua mau waiwai la :
Na Wati a me na kaula Gula,
a ua Lede a me na Keonimana !
Na Kaula Opele A Na Lede
Na Komo Gula Nani O Kela A Me Keia
ano o na Lede a me na Keonimana !
Na Kupee Gula,
Na Lipine Gula,
Na gula pepeiao o na wahine!
e oaka ai i na pepeiao, a e hulali ai hoi na manamana lima, a e kilipohe ai hoi na a-i.
Na komo humuhumu gula a me ke kala,
Na pihi pulima gula wahine a kane,
Na lakela gula lei wahine nani,
Na komo daimana o na Lede.
Na kaula laketa,
Na pine omau kihei,
Na laketa aniani,
Na huka gula wahine.
Na Lako Hale.
Na Puna,
Na Pahi,
Na Kiaha, Kala,
Na Apo Kala
Na Kawele holoi @ima,
Na O Dala o kela a me keia ano, a me na mea nani e ae no he nui wale.
E kuaiia aku ana no
ma kekumukuai haahaa loa i ko na wahi e ae o ke taona nei.
Ua Makaukau No Hoina
mea nani no kanaka makua a me na kamalii.
Na Kamaa Paa Loa,
e loaa no maanei e like me ka makemake ; a ina e loaa koke ka ino, he hiki no ke hoihoi mai
M. Mcinerny.
Kihi o na Alanui Papu a me Kalepa. 798 3m 79@
Na Mea Hou O Hana — He oia mau no ka piipii kai o ka hui Wai hau me ka hui Pialu o Makaalae, he haku kole aku a haku kole mai, piha mau keia mau hoi i ka manao kiekie. E laua nei e? E hoopau ia mau hana, o hahai mai ka hone a me ka nele.
—He oia mau no ka na o Hana nei, a ke hauoli ne: ka poe mahiai, me ka manao lana kiekie e pomaikai ana, o kekahi hapa hoi aole he hauoli ae no ia mea, aia no ka hau oli o ka hiamoe o ka la, e aho noia; u kemu ka la, a me ka po, aloha wale keike. He oia mau no ka wi o Hana nei,koe wale no ka poe hana lima, iahona wale no i ke pai liilii o Koolau.
—Aneane paa ka wili mahu a A Unua Esg. i Feberuari nae paha e wili ai, Ina pela, e naue ana ke kini a ke Koolau i ke kaa a ka huila. O ka la hapenuia me Alana nei, he la maikai ia, ua paina kele mea keia mea ma kona wahi iho, ua ai ka pee hele wale iho no a haalele i ka waiwai i hoolakoia e ka poe loaa.
K. Ohua Hinano.
Wanaulua, Hana, Maui, Ian. 3 1877.
Lole Makepono ke Kuike !
E Loaa No Ia Ma Kahi O
Kakela Me Kuke,
—E Laa Na—
Ahinahina,
Kalakoa,
Keokeo,
Leponalo
Pena, Aila, Aniani,
Na Mea Piula,
Kopa, Aila Honua,
Aila Hoomaloo
Kui Kakia, Pakeke,
Tabu, Kaula, Noho lio,
Hulu-nalaki, na Pulumi.
A he Agena no hoi no na Mokupuni o Hawaii nei no na
Lainakini-Nao,
Lainakini-Maoli,
Palule Kalakoa,
Alapia, Kelepa, Kilisa,
Na Lole kupono i ka wawae,
Palule Huluhulu,
Na Lole Huluhulu,
Na Lole no ka hoohehelo ana
Lipini, lihilihi, a meia mea’ku
—A He—
Mau Mea Ai Kahi
Ka Palaoa, Kopaa,
Raiki, Pia, Hoohu,
Paakai, Huaala,
Pia Kulina &c
—A He—
Laau Lapaau Kaulana Loa
A Dr. Jaynes.
Laau Kunu,
Laau Hoomaemae Koko,
Laau hoopau naio,
Penikila,Huaale,
A me na Laau Hamo, a pela’ku
788 3m 709