Ka Nupepa Kuokoa, Volume XVI, Number 14, 7 April 1877 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

MAIKAI KA HOI KA PAPA!

A ME

Ka Laau o kou Hale!

No Hea la?

KA INO HOI NO KAHI O

WAILA MA!

 

Nana aku no hoi ia la,

OHI KA IO o KA LAAU o MAKAWAO

i ka ua mea o ka nani o

Na Papa, Na Laau.

A ME

Na PONO KUKULU HALE

O NA ANO NO A PAU,

MA KE KIHI O

Na ALANUI PAPU a me MOIWAHINE,

Honolulu

MALAILA E LOAA AI E LIKE ME KA

makemake no ke

Kumukuai make pono loa

 

PAPA, PAPA, PAPA

Na PAPA huluhulu,

Na PAPA manoanoa,

Na PAPA i kahiia,

Na PAPA kopa,

PAPA hole keokeo.

PAPA hole ulaula

 

NA LAAU! LAAU!

NA KUA,

NA KAOLA,

AAHO,

MOLINA,

PEAPEA,

PINE HULUHULU,

PINE I KAHIIA,

 

Na Papa a me na Laau Ulaula!

PILI ULAULA,

PILI KEOKEO,

PANI PUKA,

PANI PUKA ANIANI

IPUKA ANIANI.

OLEPELEPE!

PENA O NA ANO A Pau

Hulu Pena mai ka liilii a ke nui

AILAPENA!

AILA HOOMALOO,

WANIKI, PATE.

NA LAKO

o kela a me keia ano.

NA AMI-PUKA HALE,

NA AMI-PUKA PA

ANIANI!

Pepa aale me na lihilihi.

 

E LOAA NO MALAILA

Paakai Helu 1

O KAKAAKO a me PUULOA

 

            No ke Dala kuike, e loaa no na mea a pau i haiia ae la no ke kumukuai emi loa

            O na kauoha a pau mai Hawaii a Niihau, loaa'ku ana ia lakou, e hooko koke ae mai ana no ia me ka lawa pono.

E kipa nui iiniia, i ike i k oiaoa

 

HE

IWAKALUA TAUSANI LEGUE

MALALO O KE KAI!

NA MEA

KUPANAHA O KA MOANA!

KE ALA O KA MEA HUNA,

A O KA MEA

POHIHIHI O KA 1866!

MAHELE II.

MOKUNA IV.

 

            Ma ka la 29 0 Ianuari, nalowale aku la ka mokupuni o Kilona malalo o ka huinaaouli, a o ka holo o ka Nautilo, he iwakalua mile i ka hora, a komo aku la ma ke kowa e kaawale ai o Maldives a me Laccadives, a kaalo ana makou mawaho o ka mokupuni o Kilton, he aina na ka maderepori i hoohu maluna o ka ilikai, a i ike mua ia no hoi e Vasco de Gama, i ka A.D. 1499, a oia hoi kekahi o na mokupuni he 19 o ke Kai Mokuliilii o Laccadive, e waiho la mawaena o ka 10˚ a me 14˚30' Latitu Akau, a me 69˚ 50' 72" Lonitu Hikina.

            O ka 7,500 legue keia i hala mai kahi i hoomaka mai ai ka makou holo ana mai na kai mai o Iapana, oili ae la hoi ka Nautilo ma ka ilikai, a i ke au ana ae o na maka ma o a maanei, aohe aina i ike ia.  O ka ihu o ka Nautilo ia wa, A.A. Hikina, oia hoi ke ala e holo pololei ai i ke kai o Omana, mawaena o Arabia a me ka anemoku o Inia, a o kahi e kuono ana iloko, ua kapaia ke Kaikuono o Peretia.

            Ma keia wahi i hele mai ai o Nede Lana a ninau mai la ia'u i kahi e holo nei ka Nautilo. Pane aku la au, "E holo ana no paha ma kahi a ke Kapena e makemake ai e lawe ia kakou."

            I mai la o Nede Lana, "Ina e lawe ana ke Kapena ia kakou ma kahi ana i makemake ai, alaila, i ka nana aku, aole no paha e liuliu, a o ko kakou hoi hou no ia iwaho, oiai aole he kowa ma ia wahi aku, e hiki ai ke holo loa aku.'

            Pane aku la au, "Heaha la hoi ka ke Kapena i olelo ai, ina kakou e ike ana i ke kaikuono o Peresia,, alaila, he mea maopopo, e holo loa aku ana ka nautilo i ke kaiula, a malaila aku i ke kowa o Babelamanadeba, malaila e loaa ai ia kakou e koma loa ai iloko."

            I hou maila no o Nede Lana, "Eia paha ka mea pohihihi, aole o ke Kaiula ke ala e hiki ai ke hoi hou i Europa."

            I aku no hoi au, "Aole no paha wau i olelo aku nei ia oe, e hoi hou ana kakou i Europa."

            Ninau hou mai no o Nede Lana, "A pehea la kou manao ana i ko kakou wahi e holo ai?"

            Pane aku no au, "I ko'u manao, e hoi hou ana ka Nautilo ma ka Moana Iniana, mahope iho o ka makaikai ana i na kapakai o Arabia a me Aigupita, a malaila aku a hiki loa i ka Lae Hope."

            "Ina pela, o ko kakou hiki akahi ana paha ia i ka Lae Hope?" wahi a ka ninau a Nede Lana.

            "Ae, he mea kaumaha a ehaaha hoi no ko'u naau, ka ike koke ana aku i ka hopena o ko kakou holo ana malalo o ke kai, oiai aole e hiki i ka lehulehu ke hana e like me keia," i pane aku ai o Kapena Nimo.

            Ma ka la 3 o Feberuari, hiki ma ke kai o Omana, me ko makou ike ole i ka Poai Olu Hema.

            Aole i emo mahope iho o ka hiki ana i keia kai, ike ia akula o Muscat, kekahi kulanakauhale o ka aina o Omana.

            He mea kamahao no hoi ia'u ka ike ana aku ia aina malihini, i kona hoopuniia ana me na pohaku nui eleele, a maluna iho i kukuluia ai kona mau hale keokeo, na papu hoi a me na luakini.  Aka, ua like ia ike ana me he mea la i ka hihio, no ka mea, ua luu koke iho la no ka Nautilo iloko o na ale o ia wahi o ke kai o Omana, a o ka pau no i ao ka ike ana aku i ua mau hale nei.

            A hala hope ae la ia makou na kapakai o Arabia, no na mile eono ka loihi, ikeia aku la kekahi mau hale nunui, ua hiolo.

            A ma ka la 5, komo makou iloko o ke kaikuono o Adena, malaila e komo aku ai na wai o ka Iniana, a komo loa aku no hoi i ke Kaiula.

            Ma ka la 6 mai hoi, hoolana malie iho la ka Nautilo maluna o ka ilikai, a ike ia na papu nui o uka, i kukulu hou ia e ko Beritania, iloko o ka AD 1839.

            Owau nae iloko o ia manawa ua hoopiha loa ia au i ke kuko, ma ka manao hoi e komo loa ana la makou iloko, a pau la hoi ka makaikai ana, alaila no la hoi ia holo loa, eia ka auanei aole i like ko ke Kapena manao me ko'u.

            Ma ka la 7 ae, komo makou iloko o ke kowa o Babelamanadeba, a o ke ano o ia inoa ma ka olelo Arabia, ka "puka o na waimaka."

            He 20 mile ka laula, he 32 mile ka loa, a i ko'u nana pono loa ana aku, aole mea i ike ia aku e like la me ka mokupuni o Perim, ka mea a ke aupuni o Beritania i kukulu ai i mau papu. He nui wale hoi na moku ahi Beritania o ka laina o Sueka a i Bomabe, a mai Palakaka a i Melebona, a mai Boubona a i Maurita. A ma ke awakea o ua la nei, komo ana makou iloko o ke Kaiula.

            No ka holo loa o ka Nautilo, oia hoi maluna o ka ilikai a me ka luu iloko o ka hohonu, ua kamaaina iki au i na ea o luna a me ko lalo o keia kai.

            Ma ka la 8 hoi, ike ia aku la e makou o Mocah, he kulanakauhale kahiko, ua pau na hale i ka hiolo, a ua hiolo pu no hoi me kona mau pa, mamuli o ke ki poka ia ana.

            I kinohi, he kulanakauhale nani keia, he nui a hanohano hoi. He 14 papu e malama ana i kona mau pa.

            A mai laila aku makou a komo aku la iloko o na kapakai o Aferika, a malaila i hoomaka aku ai ka mahuahua loa o ka hohonu o ke kai.  Aliali me he aniani la ke aiai o ke kai, nolaila, ua nani na nahele akoakoa ke nana aku ia loko o ke kai.  Ma na pohaku nui maloko o ke kai o ia mau wahi, ua ulu ia e na limu, a he mea nani okoa no ia i ka nana aku e maewa lua mai ana.

            Aia hoi ma na kapakai hikina o na wahi nei, kahi oi loa o ka nani o na mea nani o loko o ke kai.  Aole nae i emo, hiki ana ka Nautilo ia wahi, a ike iho la makou i na pukoa nani a ka pele i hoou ai mailoko ae o ke kai, a puka iwaho, no eono pauai ke kiekie maluna ae o ka ilikai.

            Ma ka la 9, kaa loa aku la ka Nautilo i hahi palahalaha loa o ke Kaiula, me ka lana malie ana maluna o ka ilikai.

            Aia nae ia mana, pii ae la o Kapena Nimo iluna o ka papa hele, a owau aku no hoi.  Ia ike ana mai no nae o ua Kapena nei ia'u, ninau koke mai la no oia ia'u no ko'u manao no keia mau kai a ka Nautilo i holo ai.

            Pane aku la  au, Ua nui no na mea kupanaha a'u i ike ai, a ke manao nei au, ua kupono ka hanaia ana o keia ano moku, no na huli ike ana i na mea iloko o ka hohonu.

            Hoomanao ae la au i ka manawa o ka iseraela i hele iloko o ke Kaiula a me ka luku ia ana o Parao ma e ke kai i poi ai maluna ona a mo kona puali kaua.

            Kamakamailio iho la nae maua me ke Kapena no ia mea, aka, ma ke emi ana iho o ka Nautilo ilalo, ua ake loa aku la ko'u manao e ike pono i kahi a ia poe i hele wawae ai malalo o ke alakai ana a Mose. Aole nae e hiki ke hoomaopopo iho, no ka loihi loa o ka manawa, nolaila, ua paa loa i ke one-ae.

            (Aole i pau.)

 

MOKU KUNA "KEKAULUOHI"--Oia ka inoa o kekahi moku kuna a ka Hui o Allen & Robinson i kuai iho nei ma Kapalakiko, a ua ku mai nei ma Honolulunei i ka Poakahi iho nei.  I ka nana aku, ua like ia me na moku pailata o Kapalakiko.  E hooliloia ana oia i moku holoholo pili aina.

 

NA PALAPALA I KE KUOKOA.

He hoopailua i ka pane a Laupuluki

e kokua ana i ke kuhihewao

KA HAWAII

 

            E Mr. Lunahooponopono, e ae mai i kauwahi o kau nupepa, e hookowa iki ae no ka'u wahi ukana maina e hooili aku ai maluna ona, a nana hoi ia e paa hele aku ma na wahi a pau ana e hele ai, ia lakou la ka nana mai.

            Aole no au i manao e hoopilikia ikou opu ahonui, a e hookaumaha wale i kou kino ikaika, a e hoohaiki i kou mau kolamu maikai, a e hoouluhua i na tausani make nana i kou mau aoao momona.  Aka, ua koi ia mai au e kakai pu aku i ka panea Laupuluki, i kakauia ma kou Buke 15 Helu 50 Aoao 4 M. H. 1876 i naue aku la. Ua hoohewa mai nei kela ia'u no kuu hoohepa i ka inoa Laupaina, ke i ae nei loko, aole ia oe ia wahi, aia no i ka mea e mele ana, he inoa komo ole hoi kahi o ka ai wahi a ka olelo.  Ina ua hewa au ma keia kakau ana, o wai hoi keia hepa e kapala mai nei malalo o ka inoa Laupuluki, ina ua moku kuu lima akau noia kakau hoohepa ana, ua moku aku la kona mau lima elua, ina he wahi malamalama iki no ke a-a 'la i kuu hoa, ua manao au ua kuikahi no kaua ma ia manao kue ou.

            Mr. W.H.K. Laupuluki e, ua ike au i kou mau manao kue no kuu hoolaha ana ia Kumukahi no kana mau hana uso ole, me kuu manao ia ia wale no la ia wahi puolo; eia no ka i ua hoa nei kekahi.  Ua manalo paha oe he mea hewa ka hoolaha ana i na mea nao hou i ka ike makaia i waena o oukou, a me ke ao holookoa, ke i ia 'ku nei oe, aole aole loa no.

            Kou mahalo piha no Kumukahi. E Laupuluki e ua lawe mai nei oe no kau mau mea i ike ai no Kumukahi, i ka lapaau ana i ka kakou keiki mai ka malama o Nov me Dec M.H. 1875 i hala i ao wale kala, a me kamalam o Ianuari a me Feb M.H. 1876. Oia mau haina au e mahalo mai nei, aole o'u wahi kuleana iki malaila, ma ko'u ike maka malaila au e kamailio ai penei, ma ka malama o Maraki la 6, loaa mai ia'u he leta mai a J.W. Kamaihoi mai laila mai, a he leta mai a P. Wahiawa mai ia G.W. E. Keamohuli, o na olelo ma loko ua like a like ole ma kau wahi.  No ka ike ana i na olelo maia mau leta, nolaila ku au a lawe aku he awa he puaa a me Kumukahi, no kau olelo aole au ma Tacoma kahi i hana ia a oia ano, nolaila e nana oe ma ka Nupepa Kuokoa, Buke 15 Helu 27 Aoao 3 Pauku 3 ko'u hiki ana aku ilaila.  Pauku 4 ka hana ana o Kumukahi i ka awa a me ka Puaa he hailona ia Pauku 5, ka lapaau ana, Pauku 6 ka hoonohonoho Akua ana.

            Pauku 7 kokakou ae ana aku i ko Kumukahi manao, ua oki i kokoe wale ana, aole wahi mea a paa iho, Pauku 8. hiki kakou i Uvini pe.

            E Laupuluki, maikai no kou lilo ana i Loio no ka Kumukahi mau hana ku i kou mahalo, kooia, paleia, uhiia, a nalo kana mau hana.  Ke hai aku nei au ia oe, aole e nalo.  Ua lono ia ka pihe kumakena, ua hapa ka hae o ka lanakila, ua kau ka lipina kanikau, ua paa i na kiko kalakoa o ke poho palaki inika kamaa eia i @ lima, e ke hoa, e hookaawale ae ia oe iho ma ia kulana, inoa oe e ku pu me ia, ua makaukau au e hapala aku i na lae o olua, o ka eleele inika ka lakou'la e nana mai. Ke i mai nei Hoaa, ka haku moolelo o ke alo alii o Honolulu City.

            "Ia W.H.K. Laupuluki.--ha!

            Kokua i kuhihewa o ka hawaii--ho!

            E hele ae ma Heha--ha!

            Pekuia'ku ma Huha--ho!

            He moku hoe ole.--ha!

            Pokakaa lae i ka moana,--ho!

            ika moana o ke kuhihewa.--ha!"

           

            E ka makamaka e moho mai la ia uka iuiu, ke haawi aku nai au i keia mau ninau ia oe; no na kumu au i kue nui ai Heaha ka hailona a kauka Kumukahi i hailona aku ai ma kona aoao i lapaau ai oia? 2. Heaha ka Kumukahi hana iluna o ka mai? 3. Heaha ka makana ia Davida, Mrs. Kamahiai, Keawehaku, Kani, mai a Kumukahi mai no kana hana ana? 4. Heaha ka Kumukahi hana a me kana mau olelo imua o kakou apau? 5. Heaha ko kakou mea i bilivi ai a hahai aku mamuli o kana alakai ana i Uvini-pe? 6. O kana olelo wanana, ina e ko ana, owai ka i makemake? 7. Owai ka i mahalo no Kumukahi, i na i ola ka mai o Kumukahiki, e kaekae na maka o Maalo a hoea ae he lua dala malaila?

            E Laupuluki, he mau ninau keia e pili ana no kou kue no ka Kumukahi mau hana; e hai mai i na haina ku i ka oiaio o kou aoao, i na i ku i ko Kumukahi hoomanamana, maanei ia. Ina i nele, e ui aku ia lakou la, a i ole e kuailo mai.

            Ke i mai nei oe, no ka huakai imi ola ke kumu i lilo ai i hoomanamana. Mahea kahi o ke o ka im ana'ku? Ma kahi no a Kumukahi i alakai ai ia kakou i ka wai o ke ola hoopunipuni ea! ke i mai nei oe, no kuu liki i o'u kaikuahine, oia ke kuhihewa i loaa mai ia Kumukahi mai, a no kuu hoolaha ana paha i na hana a Kumukahi, nolaila, ke i mai nei oe no o'u kaikuahine, o kana hana ana me ka hoopunipuni, aole maanei a hiki i keia la, o ka pono a me na olelo maikai oia ka'u e hahai nei, aole o kela mea au e hapala mai la.

            E ke keiki i ao ia i ka ike no na aoao elua, ike io no, akamai, noonoo, o kou kokua ana i na hana kohu ole, me ka manao e nalo malalo o ka inoa Laupuluki, aole e nalo ua ike-a. E ke keiki paa laau a eli-eli Taramu o ke kaikuono o Quarter Master Harbor, ua hele paha a opili i ka loku a ka ua nui o ka hooilo, na hoopala olalo o ua ailana la.  Aloha oe.

            E hoomaha, e hookuu i ka mahu, aia a pane ia mai.  Alaila, e hoopaa i nui ka ikaika. Me ke aloha.

            J.D.N. KALAUOKEPAINA

Port Gamable, Saw MI Feb. 13, 1877

 

He Eehia he welina 'loha no Mrs.

Louis Keoahu i hala aku.

 

            He wahine pili mau oia me ke kane ma na huakai a pau, kakaikahi wale no ka hele hookahi ana o kekahi o laua.  Ua piliia mai Maui a Kauai, mai Kauai a Maui eni, ua pili'ku nei i ke kaapuni ia Hawaii AD 1875, a pela no hoi i ka Ahaolelo o ke kau o ka AD 1876 iho nei, a hiki wale i ka hoihoi ana o ka moku mahu Kilauea i na lunamakaainana, ua hoi pu, a ma Makena lele mauka, a hiki ma Hana ma ka la 6, Oct a ma ka la 9 ka hoomaka no ia o ka mai.  @ a me ke kunu, a he wela maloko o ka opu, ua mau no ka mai a ma ka la 22 o Nov. ua hemo he keiki, aole nae maua i hoomaopopo ua hapai, ma ka malama o Dek. ua hoomaka mai ka pehu malalo mai o na kapuai, he pehu o olea, o ka pau no ia o ka hele ana.

            Ua lilo na malama eha ana i waiho ai i ka mai i kula e hoomakaukau ai.  e hoomakaukau ai no kona hopena. Ua pule pinepine maua i ke Akua, e noi ana e hoole ia ia mai keia mai--a e lawe'ku hoi ke ike oia ua lawa ke ola o ka uhane--Ua wela kaua pule me he ahi la, a ua oluolu no hoi kona manao, oluolu oia i ka poe hele mai a pule pu meia.  ua ninau pinepine aku au ia ia no na mea e pili ana i ke ola o kona uhane.  Ua pane mai oia ua makaukau au.

            Ma ka la Sabati Feb.11--ua maule oia ma ka wanaao, a i ka pohola ana mai, hawanawana mai la ia'u, ina e hala ka hora 9 o keia la (Sabati), ua aloha ke Akua ia kakou, alaila, aole au e make i keia la, apopo kahoi au make: pela io no, ua oluolu oia ia la, a ua uwe pu me na poe i hele mai e ike ia ia.  Ia po ana iho, ua kau mai ka pouli o ka make maluna ona, a ua aumeume a hiki i ke ao ana, ua pohola iki mai, olelo mai la ia'u e lawe iwaho e hoauau ai, ua lawe ia; a olelo hou mai la e hoihoi iloko, ua hookoia, mahope o ka pau ana i ka hoauauia; ua kau hou mai la ka pouli o ka make maluna ona Ia manawa ko'u pule aku la no ia i ke Akua no kona hele aku.  A pau ka pule ana, ninau aku la au ia ia, "Ua makaukau anei oe e hele aku?"

Ae. "Pehea aole anei ou aloha ia makou a pau?" "He aloha au ia oukou a pau. e malama oe i kuu makuahine, no ka mea, aole ona wawae, a nona hoi au i make ai i ko'u aloha ia ia." i pai mai ai oia.

            "Ua ike ani oe e ola ana kou uhane, no ka mea, ua ae ole ke Akua e hooia ia oe mai keia mai ou, a ua makauakau oe e hele aku me ka haalele mai ia'u" "Ae, ua makaukau ko'u uhane no ke ola mau loa." Aloha oukou, e hai aku no hoi oukou i na poe e ike iho ana i ko'u kino, me ia mau olelo hope loa, hapai ae la i ka lima hema, a mea mai la ia'u e nee aku a pili, a po mai la a puili aku la i ka puili hope loa ana. a ninau mai la--"Auhea o Kunewa."  Ua hele, ia manawa komo mai la o Kunewa, ka halia ae la no ia honi a hiamoe kau a hooilo aku la.

            Auwe! Ua hiamoe i ka hiamoe o ka poe pono--Owai ka mea e hiki ke kaupaonaa i ka nui o ka ehaeha i kau ia maluna o kana kane--Uahala oia, ua pau ka luhi, kaumaha, ua pau ka o a me na hoomanawanui pu ana i na hoino a o keia ola ana ua hoomaha oia i kona mau luhi a pau, ua hoomalooia kona mau waimaka.  e nana mai ana me ka hauoli. Ia'u e nahu nei i ka aahu eleele o ke kanikau--mehe la e hawanawana iho ana me ka leo nahenahe--E papa e hoomaloo i kou waimaka no'u--Eia au ma kahi, aole hoopalau, aole mare.  E ukali ia'u a loaa ia nei i maha pu kaua.  Aloha ka wahine, ka hoa pili, hoa hele, hoa poai o na moku,--Ua moku ka pili, ua kaawale, ua haalele ia'u a me na keiki me na makua, na lehulehu a pau e kanikau aku ma keia aoao o ka muliwai Eehia.

            H. WAHINEALOHA.

 

Na hana a Lunakanawai o ka Apa-

na o Hamakua Hawaii.

 

E ka Nupepa Kuokoa e; Aloha oe:

            E hoike aku oe i na hana a ko makou Lunakanawai, mai ke kai nu o Puna i ka uluhala, a puehu aku i Lehua i ka wai a ka paoo; penei no ia: mai ka malama mai o Dekemaba o ka makahiki i hala, a hiki mai nei i na la o keia makahiki hou, he nui na hookolokolo ana ma ko makou Hale Hookolokolo ma Waipio; a eia ka hana a ua Lunakanawai nei, Hoopuka mua oia i ka palapala hopu, a laweia mai ka poe i hopuia imua ona, alaila, eia no kana hana mua: Nuku aku oia, me ka olelo aku, "E hoopai ana au ia oukou, ina e laweia keia hihia imua o'u, no ka mea, ninau aku nei au ia oukou, hoole mai nei oukou, a peka aku,"--i hoike no keia, e ninau mai oukou ia R P K ko makou loio.  Eia ka lua, Ina e hookolokolo ana oia i ka poe i hoopiiia mai, alaila, ina oia e hoopai ana, olelo ae la oia, "Ke hoopai nei au ia oukou me ka hoopai oluolu, ke hoopii ole oukou, aka, ina oukou e hoopii ana, alaila aole keia o ko oukou hoopai, hiki no ia'u ke hoopai hou aku ia oukou, no ko oukou hoopii hou ana aku,"--I hoike no keia, e ninau mai oukou ia J K K., kekahi o ko makou mau loio, a pela aku.

            O makou o na kanaka o ka apana o Hamakua nei, ua pili wale ka manao. Ina e hoopaiia ana makou no kekahi hewa i hoomaopopoia e na loio, e hemo ana no ke hoopii hou aku i kekahi Aha e aku, aole nae e hiki ke hoopii, no ka makau no i ka huhu o ua Lunakanawai la; a ina e hoomanawanui i ka makau, a noi aku i ka papalapala  hoopii, o ka huhu koke mai la no ia, a hoole mai la no, aole e loaa ka palapala hoopii, a o ka nele iho la no ia o ka hoopii.

            Maanei, ke hooili nei au i ko'u mau manao a pau maluna ou e ke Kilohana Pookela o ka Pae aina Hawaii a nau ia e huai pau aku imua o ko makou Kiaaina maikai ma Hilo, oia hoi ka

            HIS EX. S. KIPI

            Kiaaina o Hawaii

            Me ka mahalo:

            He wahi manao ko'u e oi aku nei i kou lokomaikai, e oluolu oe e heluhelu iho i na manao o keia wahi nane huna, me kou hoomaopopo iho no hoi i ka manaoio maoli o kau kauwa, a e ike pono auanei oe, ua hoopilikia mau ia na makaainana o ka Moi e noho nei ma keia Apana.

            Eia kekahi mea a'u i hoomaopopo ai; aole he hooko pono ia o ka manawa hookolokolo o keia Lunakanawai.  Ina oia e hai mai i ka manawa hookolokolo, "apopo hora 9," aole auanei kela e hiki mai i ua manawa la ana i olelo ai; i Hamakua no kela e noho mai ai a hiki paha i ka hora 4 o ke ahiahi alaila, hiki mai la i kahi wa; aole no hoi he la hookolokolo i hookolokoloia i ka manawa i kauohaia ai e ua Lunakanawai nei.  Eia hoi ka mea apiki, o ka poe keia i hoopiiia, i kahi wale no o ka Ilamuku e noho ai, me ka paina ole o kakahiaka, he keu o ka pololi, i ka ua mea he apa o ka Lunakanawai.

            A no ka mea, ma keia mau kumu, he hiki ia oe ke noonoo pono, ono ka mea, o oe no ka mea mana maluna o keia mau oihana, mai kaukai oe a loaa h ou, he hoike hou, e like me keia, no ka mea, ua lohe mua no i na haa a keia Lunakanawai.  Aole no keia o ka oihana kupono iaia nei, aia no o ka oihana kumukula, i iliki iho hoi paha ia i ka hili i na haumana, anoai o mahalo ia mai oia e ke Kahukula Nui ma ia hana.

            Aole no i pau ko'u manao no keia, aka, ke ikuwa e mai nei hoi ka moe, a o ke ao keia. Me ka mahalo.

            T.F.GENESIS

Hamakua, Hawaii, Ian. 24, 1877