Ka Nupepa Kuokoa, Volume XVI, Number 21, 26 May 1877 — Mai ka Peni mai a ka Lunamakai L Severance. [ARTICLE]

MAI KA PENI MAI A KA LUNAMAKAI L SEVERANCE.

Hilo, Mei 11.- Ia W. C. Parker Esqi ke kakahiaka poaha, Mei 10, o ka hora 4 paha ia, ua ikeia ke kai maloko nei o ke kaikuono o Hilo, e pii a e emi kupanaha ana; a ma ka hora 5 ae, ua pii mai ma ke ano nalu ikaika, a pulumi aku i na hale e ku ana mamua o ke kaona, me ka lawe pu aku i na laau papa he nui a me ka pa pohaku manoanoa maikai o ka uapo. O ke kiekie o ke kai hoee ma ka makou hoohalike iho me ka pahu ipukukui ma ka uapo, he 12 kapuai a me 3 iniha maluna ae o ka hoailona o ke kai pii mau. Aka ma Waiakea, he waliwali ka poino. O na hale keia e ku ana he haneri iwilei ka mamao mai ka aekai aku a mai kapa aku o ka muliwai, ua kii mai ke kai a law aku. O ka uapo mokuahi, ka hale makeke kahiko, ko Poonahoahoa hale papaa, ka uapo hao o ka muliwai o Wailoa a me na hale noho e ku kokoke ana, ua laweia e ke kai iloko o ka wa pokole. He elima oal i make a he lehulehu i hoomahunehuneia. O ke kino make o kekahi wahine, loaa aku i na waapa mawaho ae o Honolii. Na na waapa o ka moku okohola Pakipika i ohi ae he eono mau kanaka e au ana iloko o ke kai. O ka moku okohola e ku ana ma kahi he 4 anana ka hohonu, i ka wa i emi ai ke kai, ili iho la ia, a i ka pii ana mai o ke kai, pokakaa ae la ia. Manao na mea a pau e nana aku ana iaia, e kauoia mai ana ia i kula nei. Ua hoomau ka pii a me ka emi ana o ke kai a po ia la. O na kanaka o Waiakea eia lakou ma ke kula kaumaha; ua pau na hale i ka nahaha, a ua nele maoli; o ko lakou mau lako hale ke au la i o a ianei o ke kai laula. O ke kiekie o ke kai i komo iloko o ka Hale Kuai o Konawe i ka hora 5 he 3 miha. Me he ema la, o ke kiekie o ke kai hooee i holapu ae ai ia Waiakea, ua 16 kapuai. I ka emi ana o ke kai, ua pahola pu aku maluna o Mokuola, a o ka halemai e ku ana maluna olaila, ua nalowale pu. Aohe kai hoee nui i like me keia mai ka 1837. Ua hookupu iho nei makou ko Hilo he $300, no lakou a me na apana lole pu. Ma ka mea hiki ia'u ke hai aku, me he mea la he 21 hale o Waiakea i poino a he 10 ma Hilo kaona, me ka helu ole ia o kekahi mau hale e ae i poino uuku. Ke manao nei au, he hana pono na ke aupuni ka haawi mai i ona mau kokua, e like me na kokua i haawiia i ka 1868. Hilo Mei 12.- Ua helu pono iho nei au i ka nui o ka poino a ua maopopo iau penei: 5 Ola i make. 7 i mahunehune. 37 hale i nahaha 163 kanaka i nele i na hale. Ua kanu aku nei na makai he 17 mau Lio a me na Kekake i make i ke kai hoee. Ua kohoia ka poino a hiki i ka $15,000. L SEVERANCE.