Ka Nupepa Kuokoa, Volume XVI, Number 21, 26 May 1877 — Mai ka Peni mai a ka Hon. J. Nawahi. [ARTICLE]

Mai ka Peni mai a ka Hon. J. Nawahi.

Hilo, Mei 13. - E kuu Wini Aloha - Aole paha i piha pono na hora he umikumamalua mahope iho o ko kaua halawai ana i Mei 9, aia hoi, ua hiki mai la he nu hou weliweli loa. Oia hoi he Kai Hoee ma Hilo nei! A eia mai na wahi kii i kahaia mahope koke iho no o ka uhi ana o ua kai la, ke hoouna pu ia aku nei [Aia ma ka puka aolani o ka Hale Kuai Buke o Wini e ikaia ai na kii ekolu o kahi a ke kai hoee i ulupa ai i kana hana weliweli. L. H.] O ke kii mua, oia ke kulana o Ohele ma Waiakea mahope iho o ka pau ana o ke kai hoee. O ke kii alua, oia ke kulana o na kanaka pio i pakele mai mahope o ka luku ana a ke kai. O ke kii akolu, oia ke kahua o kahi i ku ai ka hale makeke kahiko. He elima mea i make. Hookahi kane, elua wahine a he elua mau keiki liilii. Ena mea i eha loa, a he 50 a oi aku poe i ola mahune. He 30 a oi aku mau hale i poino. He 15 mau holoholona i make, oia na lio a me na kekake. Aole home o ka nui o na kanaka. Aole ai e lawa ai no keia mau mahina aku e hiki mai ana. Aole paha e emi malalo o $25,000 ke poho i ili mai. He wa ua mai nei keia. Ke kokua nei na haole me na kanaka o Hilo nei me kahi mea e loaa ana, aka aole no e lawa ana. J. NAWAHI.