Ka Nupepa Kuokoa, Volume XVI, Number 39, 29 September 1877 — Page 4

This text was transcribed by:	Puakea Nogelmeier
This work is dedicated to:	Ka'ano'ilani Fuller

Ka Nupepa Kuokoa

KE KILOHANA POOKELA NO KA LAHUI HAWAII.

KA NUPEPA KUOKOA. ME KE AU O KOA I HUIIA.

THE BEAUTIFUL LIFE.

Golden Sunbeams. p 152.

Hoomaikai kakou no ke ao nani nei,

Makana maikai na ke Lii;

Maluna ke ao me he hae uhi mai,

Malalo na puu uli e.

Ka la, me na manu, na pua maikai

Ke hui a hoonani mai.

E ku a mahalo i ke Akua e

No keia makana aulii.

Cho. Ke ao nani e! ma na home hookipa!

Ke aloha maikai ka i hoopuni mai!

Ke kahu kiai, alakai a hoomalu

A pio malie na lama oonei

Aole poina ke hui maanei

Na hoa alona maikai,

Memele pu no me kakou mamua'e,

Ano, mele e maluna'e,

Kaumaha kakou, a ke kanikau nei-

He leo pa nae mai o mai,

E pau ka uwe, a e hauoli e,

E hui pu hou auanei.

Cho. Ke ao nani e! &c.

A hui kakou ma na halawai nei,

E kuka a haipule pu,

E hai nahe e no na hoa maikai

I hala e ae i ke ao.

Ke ao nei lakou i na hoa oonei,

E ala a hoomakaukau,

E hana, e pule, e mau ke kiai

A pii ae a hui pu mau.

Cho. Ke ao nani e! &c

HAWAII.

HAAWINA KULA SABATI.

HELU 2. SABATI, OCT.14.

KUMU HANA-Paulo ma Ierusalema.

PAUKU BAIBALA-Oih.21:27-39.

27 A kokoke e pau kela mau la ehiku, ike ae la ka poe Iudaio no Asia ia ia, maloko o ka luakini, hoohaunaele ae la lakou i ka lehulehu, a hopu iho la ko lakou li ma ia ia,

28 Kahea aku la lakou. E na kanaka o ka Iseraela, e alu. Eia ke kanaka nana i ao aku i kanaka a pau mai o a o i ka mea ku e i kanaka, a me ke kanawai,a me keia wahi; e lawe mai no hoi ia i mau Helene maloko o ka luakini, a ua hoohaumia i keia wahi hemolele.

29 Kahea aku la lakou. E na kanaka o ka Iseraela, e alu. Eia ke kanaka nana i ao aku i kanaka a pau mai o a o i ka mea ku e i kanaka, a me ke kanawai, a me keia wahi; a lawe mai no hoi ia i mau Helene maloko o ka luakini, a ua hoohaumia i keia wahi hemolele.

29 (No ka mea, ua ike mua lakou me ia maloko o ke kulanakauhale, ia Teropima, no Epeso, kuhi iho la lakou ua kai mai o Paulo ia ia maloko o ka luakini.)

30 Ua pioloke ke kulanakauhale a pau, holo kiki mai la na kanaka a pau; hopu mai la lakou ia Paulo, kano aku la lakou ia ia mawaho o ka luakini; papani koke iho la i na puka.

31 I ko lakou imi ana e pepehi ia ia, lohe aku la ka lunatausani koa, ua haunaele o Ierusalema a pau;

32 A lawe koke ae la ia i na koa, a me na lunahaneri, a holo kiki aku la io lakou la; a ike mai lakou i ua lunatausani la, a me na koa, oki ae la ko lakou pepehi ana ia Paulo.

33 A hiki mai ua lunatausani la, hopu mai la ia ia, a kauoha aku la e paa ia i na kaulahao elua; ninau mai la. Owai keia? Heaha ka mea ana i hana'i?

34 Uwauwa aku la kekahi i kekahi mea a o kekahi i kekahi mea, iwaena o ka ahakanaka. Aole i hiki ia ia ke ike i ka oiaio, no ka haunaele, kauoha aku la ia, e alakai na ia maloko o ka pakaua

35 Aia ia iluna o na anuu, kaikaiia 'ku la ia e na koa, no ka anehenehe o ua ahakanaka la.

36 No ka mea, hahai aku la ka ahakanaka,, uwauwa aku la. E, e kai aku ia ia

37 A kokoke kaiia iloko o ka pakaua, i aku la o Paulo i ka lunatausani. E pono anei ia'u ke olelo aku ia oe? I mai la kela. Ua ike anei oe i ka olelo Helene?

38 Aole anei ou ka Aigupita, i ku iluna i na la mamua aku nei, a alakai ai i na kanaka eha tausani ma ka waonahele, he poe powa?

39 I mai la o Paulo. He kanaka Iudaio no wau, no Tareso i Kilikia, he kamaaina wau no kekahi kulanakauhale kaulana; ke nonoi aku nei au ia oe e ae mai ia'u e olelo aku i kanaka

Pauku Gula. "Aole i oi aku ke kauwa mamua o kona haku. Ina ua hoomaau lakou ia'u, e hoomaau no hoi lakou ia oukou" Io. 15:20.

Mahele 1. Ka haunaele ma ka luakini.

2. Ke kumu o ka haunaele.

3. Ka mea i emi ai ka haunaele

Mele.-Mele hou, 8-7.

Haunaele! hopu wale!

Kuhihewa no no Paulo,

Hahau ino, naaupo!

Akahele, noonoo pono,

Umi e i ka huhu.

Aloha kahi i kekahi,

Hoohalike me Iesu.

Pule no ka poe i hoomaau ia, i makau ole lakou, &c.

Na ninau a na Kumu.

Ua hiki Paulo ma i Ierusalema 75 mile mai Kaisareia mai. Ua hookipaia ma ka hale o Menasona, he hoahanau ia no Kupero mai. Uwe aloha no i na haumana a ia Iakobo, me na lunakahiko. A hai aku Paulo i na hana a ke Akua ma Asia uuku,i ka huli nui o ko na aina e, i ka hana ino ia mai. Olioli no lakou, Iakoba ma. He manao hopohopo nae ko lakou no ka hiki ana mai o Paulo i Ierusalema. Nui wale na Iudaio i manaoio ka i akoakoa malaila, me na Iudaio hoomaloka hoi, no ka mea, he wa Penetekoka ia, he ahaaina makahiki kahi i akoakoa'i ko kela, ko keia wahi. Ua lohe lakou, ua kue Paulo i ke kanawai o Mose, i ke oki-poepoe ana, &c, he kuhihewa nae ia Makau Iakobo ma i ke ala ana mai o ka haunaele no ia lohe hewa o na Iudaio. A i ole e haunala, a i akaka hoi, aole. Paulo i kue i ke kanawai o Mose, ua hoopuka lakou i kekahi mea a Paulo e hana'i, oia hoi kona hui pu me kekahi mau kanaka Iudaio eha, a e hana pu i kekahi mau mea e pili ana i kekahi hoohiki. Ua ae hoi o Paulo ia manao. Ua hui pu me lakou eha ma ka luakini no ka huikala pu ana. Mok. 21:16-26.

Pauku 27,28,30. Ka haunaele ma ka luakini. Ane pau na la 7 no ka hoohiki. Ka hoomaka no ia o ka haunaele. Owai ka i hoohaunaele i ka lehulehu? A aha lakou ia Paulo? Kahea lakou pehea? Hopu a kano ia ia mahea? I paa Paulo iloko, i hiki ia lakou ke hahau ia ia a make.

P 28,29 Ke kumu o keia haunaele. Heaha la ke kumu? I Ko lakou lohe ana, ua kue Paulo i ke kanawai o Mose, i ke oki-poepoe ana, i ka luakini, &c. 2 Ko lakou kuhi ana, lawe pu oia i kekahi Helene ia Teropima iloko o ka luakini, &c. 2 Ko lakou kuhi ana, lawe pu oia i kekahi helene ia Teropima iloko o ka luakini, ka mea hoohaumia i ka luakini. He mau kumu oiaio anei keia? Aole, he mau kuhihewa no. Aole kue Paulo i ke kanawai, i ka luakini. Aole kue Paulo i ke kanawai, i ka luakini. Aole i lawe pu i ka Helene ma ka luakini. Eia nae ke kumu oiaio o keia haunaele, ua huhu loa na Iudaio hoomaloko ia Paulo, no kona hoole ana, aole lakou e ola ma ke kanawai, ma ke oki poepoe ana, ma na mohai kahiko. O ka make a me ke ola hou ana o Iesu, me ka manaoio ia ia, oia wale no ka mea e ola'i Ina pela, no keaha kona hoohalike ana me na Iudaio ma kekahi mau mea? I Kor. 9:20.

Pauku 31-39. Ka mea i emi iki ai ka haunaele. Heaha ka mea i oki iki ai ka haunaele, a pakele Paulo i ka make koke?

1 Ka lohe ana o ka lunakausani koa, oia hoi Kelaudio Lusia, mok 23:36.

2 Lawe oia i na koa me na lunaheneri. He poe kiai lakou i ka luakini me na Iudaio, i ole e haunaele, a i haunaele, e kinai koke ia. Aia lakou ma ka Papu o Anetonia e ku kokoke ana i ka luakini. No Roma lakou.

3 Holo kiki na koa me ka lunakausani i kahi o ka haunaele. A o ke oki no ia o ka pepehi ana ia Paulo

4 Ka hoopaa ana ia Paulo i hiki i ka lunakausani ke ninau, ke hookolokolo ia ia i akaka ka oiaio ole o na kumu o keia haunaele.

5 No ka nui loa o ka uwaawa, ka haunaele, kauoha ka lunakausani e alakaiia Paulo i ka pakaua, ka papu o Anetonia e hookolokoloia. I ka ane make ana o Paulo i ka lehulehu, apo na koa iaia a kai malu aku.

6 Ka ae ana o ka lunakausani ia Paulo e haiolelo oia i ka lehulehu. I ke noi ana o Paulo i ka luna e ae i kana olelo ana, pehea ka pane mua ana? heaha ke kuhihewa o ka luna no Paulo? Owai oia ma kona manao? A pane Paulo pehea? p 37-39. Ka ae anei ia o ka luna i kaua haiolelo ana?

Mele.-Mele hou, 8-6.

Ua hana ino ia Iesu,

A pela na kauwa,

O Paulo me Petero pu,

Paa i na kaula paa.

Pela na hoahanau oonei,

Ua hoomaau ia mai;

I nui nae ke aho e,

Ma o ka pomaikai.

Na Ninau a ke Kahu.

Na makua. I ka puka ana o Paulo ma i Ierusalema, nowai lakou i hookipa? Heaha, a nohea Menasona? Hai mai Heb. 13:1-3. No keaha ko Paulo hele ana i Ierusalema ? I loaa ka ahaaina aha? Ehia ona hele ana ilaila mamua? Mahea ka mua? Gal 1:18 Mahea ka lua? Oihana 15:2, 3. Mahea ke kolu? Oih. 18:22. Aole nae i maopopo keia pii akolu ana. Manao kekahi poe, aole Paulo i pii i Ierusalema, aka i Kaisareia, a uwe aku i ka ekalesia malaila, a hoi hou i ka moku, a holo aku i Anetioka. ma keia hele ana o Paulo i Ierusalema, mahea ka hoomaka ana? Ehia makahiki mai ka wa i haalele ai oia ia Anetioka a hiki oia i Ierusalema? Eha paha. A puka oia ilaila, owai ka lunaolelo? Iakobo hea keia? Ua make Iakobo ke kaikuana o Ioane. Auhea Petero? Aia la i hea? Heaha ka Paulo hana mua? Nui loa anei na Iudaio ma Ierusalema ia wa? No hea mai? no keaha? Heaha ka lakou i lohe ai no Paulo? I akaka he lohe hewa keia, ua ao aku Iakono ma ia Paulo e hana pehea i oluolu na Iudaio ia ia? I ka ae ana o Paulo e hana pela, pakele anei oia i ka hana ino ia mai? I ka imi ana e hooluolu i ke kanaka, he mea aha ia? Pehea e kapono ai I Kor. 9:20 me Gal. 1:10?

Na keiki. Heaha ka wanana mamua a Agabo no Paulo ke hele oia i Ierusalema? Mok. 21:10,11. Ua hookoia anei ia wanana? Ae, ua hopuia Paulo, ua hoopaaia, ua hahau ino ia, a mai make no. Nawai i hana ino ia ia? Heaha ko Paulo hewa? Aole ona hewa. Ua kuhi na Iudaio, elua ona mau hewa, heaha ia mau hewa? He oiaio anei? Aole, he mau kuhihewa wale no. Heaha ke kumu io o ko lakou pepehi ana ia Paulo? Kona hoole ana, aole lakou e ola ma ke oki-poepoe ana, ma ka lakou mau mohai, mau pule, mau ahaaina.

A pehea oukou, ola anei ma ka pule, ma ka bapetizoia, ma ka hele i na halawai, i na kula Sabati? Aole, ke ole ka manaoio me ke aloha ia Iesu.

Ke kula a pau. Elua mahele i pau i na makua me na keiki, heaha ka mahele ekolu? Hai mai i na mea eono i emi ai ka haunaele a pakele Paulo i ka make koke.

Owai ka lunakausani? Nohea oia? Heaha kona kuhihewa no Paulo? Owai ka inoa o ka papu? Owai malaila? Heaha ka hana a ia poe koa?

Heaha ko kakou pakaua, me na koa kiai ia kakou? Hal 34:7.

Hai mai i ka pauku gula.

A lele mai na enemi,

A nui, kini, lehu e,

Na anela ke kiai mai,

Kokua no a pale ae.

Iesu ka Papu o kakou,

Papu paa loa a mau no,

E komo iloko na pokii,

A malu, maha, ola e.

Pule no na hoahanau, na keiki, &c.

Haawina no Sept. Oh. 22:17-30.

Ka Moolelo no na Kula Sabati mai ka wa kahiko loa mai.

He kumu manao nui loa keia, a hohonu hoi. Ma ka huli a imi a noonoo nui e hiki ai ke wehewehe ae. O ka inoa. Kula Sabati, aole i ikeia iloko o na moolelo Ekalesia iwaena o na oihana kula no na kanaka makua a no na kamalii a hiki i ka ceneturia 17 paha. Aole i lohe ko Hawaii nei lahui ia inoa a ahiki mai na Misionari iloko o ka mak. 1820.

I ka manawa i holo mai ai na Misionari mua i Hawaii nei, akahi no a lohe nui ia ia inoa, Kula Sabati ma Amerika. Iloko o ka mak. 1823 kuu lohe mua ana ia inoa. Ia manawa hoi ko'u komo mua ana iloko o ke kula Sabati, aole nae ma ke ano haumana, aka, ma ke ano kumu. Ke kula Sabati mua ia ma ia wahi.

Ua akaka, aole i ikea inoa, Kula Sabati iloko o ka Baibala. Aka, ua kakau ia ko ke Akua hoolilo i la hoano, ame kana kauoha ana, e hoomanao ia, e malamaia, a e hoano ia ia la. Ua akaka, he la kapu ia no Iehova, he la e hoomanao ai e hoomana ai ia Iehova, he la e hoomanao ai e hoomana ai ia Iehova, e ao ai, e kamailio ai, no na hana, na olelo a ke Akua.

Ua loaa ka Sabati mua ia Adamu ia laua me Eva. Heaha ka laua hana ma ia Sabati?

I Malia paha oia ma a mala o Edena ke kula Sabati mua. Laua na haumana a-o Iehova ke kumu He mau mea hou laua. Akahi no a hanaia. Ka lua ia o ka la o ko laua ola ana. Aole paha laua i naauao. Ua haawi mai no ke Akua i ke kanawai Mose, i ka oihana mahiai, i ke kanawai hookapu i ke kahi hua, a pela aku. Malama ua noho pu, Iehova me laua, e ao i ke ano o keia mau mea me ke kumu kula Sabati la.

Ai ko Iehova hai ana ku ma na la noa hana no laua ma ka mala, a hoi hou mai oia ma ka Sabati e ao hou mai ia laua. A pela mau a hiki i ke kahi la, hoea mai Iehova a kahea ia laua. Ua holo nae laua e pee. Ua hewa ua hookuli, ua makau. Hoopau o Iehovai ke kula Sabati ma ka mala o Edena, a kipaku ia laua iwaho.

2 Ke kula Sabati elua ua hoomaka paha ia malalo ae o na Kerubima i kukuluia ma ka puka o ia mala i mau keia. Laua no na haumana mua, A mahope iho, na keiki, Kaina, Abela ma, na keiki me na mopuna Iehova no kekahu o ia kula. A o Adamu, o Ewa o Seta, Enosa, Enosa, Noa, na kumu. Na kanawai mua ka haule ana o na moku mua na mohai, ko lakou ano, ea ano o ka hua a ka wahine, a pela aku, oia na mea i ao ia. Kalohe nae na haumana, hookuli, lilo, loa i ka hana. A hoohiki ke Akua e hoopau ia lakou a pau, koe o Noe ma wale no.

3 Aia paha iloko o ka Halelana ke kula Sabati hope o ka honua kahiko, ame ke kula Sabati mua o ka honua hou. 53 Sabati malaila. O Iehova, o Noa ke kumu. Pohihihi na Haawina kula Sabati, no ka mea, ua pau i ka nalowale. Ua pili nae i na mea i hanaia iloko o kela mau makahiki 1656 mai a Adamu mai. He mau wanana paha kekahi i weheweheia. He mau pule, he mau himeni, he mau ninau, he mau olelo hoolana a pela'ku.

4 Mahope iho o ka puka ana o Noa ma mawaho o ka halelana, ua hoomania paha ke kula Sabati malalo ae o Noa ma kahi e pili ana ai Aserata a hiki aka wa i hele ai kanaka Sinasa a hoomaka e kukulu i kulanakauhale, a i hale pakui a kiekie loa, a hookahuliia ka olelo, a hoopoehuehuia lakou io a ia nei. Pohihihi no na haawina kula Sabati malalo ae o Noa ma kahi e pili ana ia Aserata ahiki i ka wa i hele ai kanaka i Sinasa a hoomaka e kukulu i kulanakauhale, a i hale pakui a kiekie loa, a hookahuliia ka olelo, a hoopuehuia lakou io a ia nei.

Pohihihi no na haawina kula Sabati malalo ae o Noa ahiki i kona wa i make ai. Ua pili nae i ka ke Akua mau hana, na kanawai uku i haawiia mai, a i kekahi mau wanana, ma na himeni hoomaikai ia Iehova.

5 A make Noa, aole akaka he kula Sabati, ahiki i ka wa o Aberahama. I kona wa elemakule, ua kahea ke Akua ia ia e haalele i kona aina hanau, a e hele i Kanaana. Hoolohe no oia a hele ilaila. A lilo oia i mea nui. A hoohuli oia i kekahi poe kamaaina mamuli ona, a lilo lakou i poe ohua nona, 318 ko lakou nui. A oia paha kana poe haumana kula Sabati, a oia ke kumu. A komo no hoi kana mau keiki iloko o ia kula. He kumu maikai oia, a mahalo o Iehova ia ia, penei ; "Ke ike nei au iaia, e kauoha aku no ia i kana poe keiki, ame kona mau ohua mahope ona i malama lakou i ka aoao o Iehova, a e hana lakou ma ka pololei," Kin. 18:19. Mahuahua na mea a Aberahama i ao aku ai ma kana kula Sabati, no ka mea ua launa pinepine mai o Iehova me ia, a hai mai i na kanawai hou, i na wanana hou, a pela aku

6 O Ioba paha kekahi makua i hoohalike me ke kumu kula Sabati.

(Aole i pau.)

Make i aloha nui ia.

E oluolu oe a me kou kapena hookele, e hookomo iho makahi kaawale o ko kakou "Kilohana Pookela." I ka make ana o Keahimalaea wai I ike mai ai na kini ona, e noho ana, mai ka la hiki i Kumukahi a hiki i ka la welo i Lehua.

Ua hanau ia oia ma Kaholo apana o Hamakua i Hawaii i ka la 7 Oct M.H. 1860. He kaikamahine i aloha nui ia, e kona mau makua a me kona ohana, he hookipa i na malaihini hele, he kui-lima pu me kona mau hoa aloha. A ua make aku la oia i ka la 24 o Aug. ma ka hora 12, awakea i ka M.H 1877, o ka nui o kona mau la o ke ola ana ma keia honua, he 17 makua me na la keu, a lawe ia aku ia, e na lima menemene ole o ka make, ma kela aoao o ka moana-wai eleele, a waiho iho la, i kaukana nui o ke aloha ia makou, a o ko makuakane o keia kaikamahine, he kanaka kuonoonoo no Hamakua nei, he hookipa i na 'Lai a me ka poe hanohano, me ka maikai, he heahea i na malihini hele ke kipa aku, nolaila ke noho nei makou me ka u me ka minamina, me ko kaumaha paumako iaia.

A nolaila ua haku iho makou i wahi kanikau nona malalo iho nei. E kau mua au i wahi mele inoa nona a pau, kau aku au i ke kanikau.

O keahi nui,

O keahi enaena,

O keahi honua,

Ai aku la heahi, i ka piko o Awakea,

Loaa aku la ia Papa nui hanau moku,

Nei keolai naue ka honua,

Haalulu ka mauna, naka ka moana,

Olapa kauila, malamalama kumu lani,

Ahuale na aina, anapu ea i Tahiti,

I keahi a ka wahine.

PAU KA INOA, ALAILA, HAHAU KE KANIKAU.

Kanikau aloha keia,

Nou e Keahimalea,

Kuu kaikamahine,

Mai hele kui lua e Haili,

Mai ka pihe ua lua e Kaibalaoa,

Kuu kaikamahine,

Mai ka huikau lua e na lio,

Mai ke one kani e Waiolama,

Ke malama nei no au i ko aloha,

Auwe kuu kaikamahine,

Kuu kaikamahine hoi-e,

Kuu mea minamina ua hala-e,

Kuu kaikamahine mai ka papa, ka hulihuli o Wailuku,

Mai ka piina loa e Waianuenue,

Oia wahi hoi a kakou e noho ai.

Auwe kuu kaikamahine hoi-e,

Kuu kaikamahine mai ka wai au e Honolii,

He hi ke aloha na'u e hiipoi nei,

Kuu kaikamahine mai ke kula e Paukaa,

Kaa aku la oi i ke ala hoi ole mai,

Noho iho nei au me ka-u me ka minamina,

Auwe kuu kaikamahine,

Kuu kaikamahine hoi-e,

Kuu kaikamahine mai ka wai huihui o Kaieie,

Kuu kaikamahine mai ka la wela e a lea mai,

Aloha ia wahi, a kaua e noho ai,

Ua ae nei o Kaawaloa,

Auhea la hoi Malaea,

Ea aku nei ka uhane, i ka home lai o papa,

Hele aku nei ka uhane, i ka pali o Kahalii,

Auwe kuu kaikamahine e,

Kuu kaikamahine hoi-e,

M. POLAOLA.

Kanikau la he aloha,

Nou e Keahimalaea,

Kuu kaikamahine,

Mai ka hau ana o ka nahele,

Oia wahi a kana e noho ai.

Kuu kaikamahine mai ka ua lihilihi lehua o ka nahele.

Kuu kaikamahine,

Mai ka ua puolo lehua, a ka manu,

Kuu kaikamahine mai ka lehua ula i ke pili

I piliia e kaua ke anu me ke koekoe,

Aloha ia wahi a kaua e hele ai,

Kuu kaikamahine e,

Mai ka makani hulilua o ka aina,

E wehe mai ana i ka lau o ka ohia,

Wehe oe la i kapili kaawale,

Kaawale oe la, kaawale au,

Kuu kaikamahine hoi-e,

Kuu lei a-i o na pali o Hilo,

Mai ka wai au o Honolii,

Ke lii ke aloha na'u e hii nei,

Kuu kaikamahine mai ke one wali o Ohele,

Mele aku nei oe haalele i ka pili a kaua,

Auwe! kuu kaikamahine e!

Auwe! kuu kaikamahine hoi-e.

KIHEIKUHILANI.

Lole Makepono ke Kuike!

E LOAA NO IA MA KAHI O

KAKELA ME KUKE,

E LAA NA

AHINAHINA,

KALAKOA,

KEOKEO,

LEPONALO,

Pena, Aila, Aniani,

Na Mea Piula,

Kopa, Aila Honua,

Aila Homaloo

Kui Kakia, Pakeke,

Tabu, Kaula, Noho lio,

Hulu-palaki, na Pulumi

A he Agena no hoi no na Mokupuni o Hawaii nei no na

LAINAKINI-NAO,

LAINAKINI-MAOLI,

PALULE KALAKOA.

ALAPIA, KELEPA, KILISA,

Na Lole Kupono i ka wawae,

Palule Huluhulu,

Na Lole Huluhulu,

Na Lole no ka hoohehelo ana

Lipine, lihilihi, a me ia mea'ku

A HE

MAU MEA AI KAHI

Ka Palaoa, Kopaa,

Raiki, Pia, Hoohu,

Paakai Huaala,

Pia Kulina &c.

A HE

LAAU LAPAAU KAULANA LOA A Dr. JAYNES.

Laau Kunu,

Laau Hoomaemae Koko,

Laau hoopau naio,

Penikila, Huaale,

A ma na Laau Hamo, a pela'ku

814 3m 826

NU HOU! NU HOU!

Kukaepele i Hanaia ma Honolulu nei!

E FREDRICK VEHLING!

He kukaepele maikai loa keia!

Ua like kona ano me ke Kukaepele o ko na Aina e.

AOLE E NELE KA AINA WA A PAU

E kokua kakou i na hana mikiala kuloko o ko kakou aina hanau.

E hele mai e ike, a e kuaiia ma ka Hale Kuai o

A.L KAMIKA,

806 3m 831 Helu 44 ALanui Papu.

Hale Kuai Hou!

KE POLOAI aku nei ka mea nona ka inoa malalo nei, i ka lehulehu a pau, me ke noi pu aku i ko oukou lokomaikai, a hele mai ma ko'u Halekuai hou ma Honokaa, Hamakua, Hawaii, a e ike no hoi oukou i na Lole nani o kela a me keia ano, mai ko na kanaka makua a i ko na kamalii. Malaila no hoi na Noho Lio ano hou loa. E loaa no kela mau mea a pau me ka makepono loa. K. AMU.

Honolulu, Iulai 18,1877 816 3*m 827

HALE PAI KII O AHI.

EMI LOA NA KII!

MA ka Hale Pai Kii o Ahi, Helu 63, Alanui, Nuuanu, Honolulu. O ka uku o ke kakini Kii Pepa mamua, he $3.60, a i kela manawa ua hoemiia i $2.50. O ka uku o ke kii Aulani, he $3.00 mamua, ua hoemi loa ia a i ka $2.00 wale no. Emi loa maoli a makepono! Aole like pu mamua. E wiki mai oukou, oiai ka manawa kupono a ka lua e upu nei. I keia manawa, hanaia na kii maikai loa!

Hale Kamana Nui!

AIA no maloko o keia Hale maluna ae, a ma ka Helu 63, Alanui Nuuanu, e hanaia ai na pahu kupapau, na moe, na noho, na pakaukau, na pahu mae me na aniani ku, na mamalu a me ia mea aku la mea aku. E loaa no na pahu paina a me na pahu koa ma ke kumukuai oluolu a makepono loa, i ike ole ia mamua.

Hale Kumeka Kamaa!

MALALO o ka Hale Pai Kii, ua hoana okoala he keena humuhumu kamaa o kela a me keia ano a ka makemake e hialaai ai. E kipa mai a e ike oukou "I ka nani o Aipo." Malaila no e loaa ai na Pale Ili Noho Lio, no ke kumukuai haahaa a ka launa ole mai. E kipa mai a e kuai no oukou iho.

Hale Hana Kika Puhi!

Ma ke Keena makai o ka Hale Kamana. Helu 89, Alanui Nuuanu, he wahi e hana pakala nei na lau paka. I mau kika puhi maikai loa. He mau paka kika maikai, i kupono i ko na kanaka makemake, he ona hoi ka puhi. E hele mai oukou e kuai i ike maka. E hoohihi ana oukou. AHI

AKIU (PAKE)

AMARA! AMARA!!

E O'U makamaka, o ka opuuwai o ka Pakipika," Hawaii nei, a me na makamaka lii puakea, na kanaka maoli heahea a me ko'u lahui hoi, na keiki o ka Alua Pua, na mahi ko, ma hi laiki a me na poe mahi ai, o ka Mokupuni o Keawe, a me ko Maui o Kama, Molokai o Hina, Oahu nei o Kuihewa, a me Kauai o Mano, eia au ko oukou makamaka ua wehe ae au i hale Amara, alanui Moi, ma Polelewa, a e loaa ana ia oukou ke imi mai, Helu 81, a e hoolako la no ko oukou makemake o na mea hao lako mahiai, ke Kopala, Oo, Haro, a me na mea e ae, me ke kumukuai haahaa loa, a he hiki no ia'u ke hana hoa I na pipi nahaha, kaa lio, kaa kauwo lima, me ka uku oluolu loa, a me ka paa e like e like me ka'u palapala e hoopaa ai a aelike ai no ka manawa e oleloia ai. He hiki no ia'u ke kopili i ua ano waapa o ka poe e makemake ana me ka uku emi loa me oluolu o na maka o na malihini, ke ike i ka'u hana, me ka mino aka iho, aole loa e pukupuku ko maka, a hookeke na niho, ke ike i ka'u hana, a ua kamaaina no la oukou o k'au hana mau o ka humuhumu kamaa buti, a hana noho lio no na kau i hala, a he hiki no ia'u ke hana i na noulu hakihaki a uahaehae me ka maikai a me ka uku emi loa. No ka mea ua hiki mai ka manawa pomaikai e aho nui, e mahi ai, a ina hoi e lako ole i na mea hana, oia no ma ko'u wahi e loaa ai. Ua holo ke Kuikahi Paualike, he waiwai ka hopena ke hoomanawanui oukou e o'u makamaka, ina e molowa a pakaualelo, he neo ke loaa mai. Nolaila e nane mai a halawai me a'u i maopopo a holo ka hana a na amara, kamana, kumeka a Akiu, a hookahi wale no Akiu, aohe Akiu e ae o keia kulanakauhale e lawelawe nei ma keia mauoihana. Nolaila e malie mai i ko'u leo e hele mai e ike maka, he au pomaikai ko ko kakou Moi, i imi ai, a nona hoi ke kia hoomanao o ka "Hoolulu Lahui" AKIU (Pake).

Honolulu, Mar. 15, 1877.

He kapili kapuai lio emi loa kakahi ma kula Hale Amara. E nane mai i ike maka.

Papa! Papa!

ALLEN A ME ROBINSON,

Ua wehe ae nei maua i

PA KUAI PAPA!

MA KA

UWAPO o PAKAKA.

Na Papa Ulaula o na ano a pau

Na Papa Paina o na ano a pau,

Na Pili Hale Ulaula.

Na Pili Hale Keokeo.

Na Pepa Hoonani Hale.

Na Pepa Molina.

Na Pena a me na Aila Pena!

NA KUI O NA ANO A PAU!

Na Pani Puka a me

Na Pani Puka Aniani.

Na Pani Puka a me

Na olepelepe.

Na lako kukulu Hale

O NA ANO A PAU

E kuaiia ma ke

Kumukuai Haahaa Loa!

o keia Makeke.

ALLEN & ROBINSON

Honolulu, Aper 13, 1876 814 3m 263

Eia ma ka Hale Kuai o Wini!

NA EA,

NA OMAU A-I,

NA KULA PEPEIAO

NA OMAU HAO BUKALO,

NA MEA ANO HOU A EMI,

Buke Pakeke Ili a me na Eke Dala

Na Lei Piliali,

Na Lei Eleele,

a me na mea e ae he nui wale.

E HAAWI MAKANA IA ana i kela a me keia mea i kuai a hiki i ka

ELUA DALA.

E hele mai, e nana i keia mau mea maikai, a e loaa no e like me ka makemake.

Eia ma ka Hale Kuai o

756 2m WINI.

HALE KUAI MANUAHI!

NO KONA,

NO PUNA,

NO KOOLAU,

NO NAPALI,

NO MANA!

Eia ma Koloa nei ka mea Hou ano e kupaianaha,, a e nane nui mai oukou e na mamo a

MANOKALANIPO!

a e ike i na mea maikai o keia a me keia ano, ma ka

HALEKUAI O PENI!

Ua makaukau oia e kuai aku i

Na Lole o na ano a pau,

Na Papa o na ano a pau,

Na Lako kukulu hale,

Na mea hana kamana,

Na mea mahiai,

Na mea ai, mai na aina

e mai a me na mea a pau i makemakeia e ke

Kane, ka Wahine a me ke keiki-

Ke loaa mau mai nei keia mau mea ma keia moku kela moku, a no ka mea, ua hoopaeia mai ma Honolulu.

He au hou o ke Kuikahi!

Nolaila, e hiki ia'u ke haawi i keia mau pono ia oukou, ma ka kumukuai haahaa loa, i ike ole ia mamua aku nei.

E lulumi mai a hoao!

FRANK BINDT.

Koloa, Kauai, Aperila 14, 1877 802 1yr 835

Kuai Haahaa Loa!

E KUAIIA aku no ma ke kumukuai haahaa, ma ka Hale Kuai o H.M WINI,

Na Kula Pepeiao Ea a me na Kula kanikau, a me na kula e ae o kela a me kela ano.

Na Lei Kanikau no hoi a me na Lei e ae no Inohau ai e na Lede opiopio, e kinikohu ai ke nana aku i ke kau mai iluna. Na apo lima kanikau a me na mea e ae a pau no ke kumukuai haahaa loa. E wiki mai! 816

E.T. Halolani.

LOIO!

EIA HE $20,000 E MAKEMAKE ANA E hoaie aku ma ka ukupanee heahaa loa mai ka $200 aku a pii ae ma ka moraki ana i na aina. Ua hoomakaukau e no oia i na palapala aelike, hoolimalima, moraki a me na hooilina, a he hiki iaia ke hoomaikai i na aina loaa ole na Palapala Sila Nui.

Hale Oihana, aia ma ka "Real Estate Exchange" Helu 31, Alanui Papu, Honolulu, malaila oia e loaa ai i na kanaka a pau, ina he mau ai ka kuai a hoolimalima ko lakou, a e hoopaaia me ua uku ole 815 6m

KUAI HOOEMI LOA!

MA KA HALE KUAI LOLE O

C.C AKINA,

e ku la ma Kalopihi, Konala, Hawaii, he mau Lole Hou loa, ka makana o ke Kuikahi Panai Like. Ua kupono no na iwa o ka makaoi Apapaa o ua aina haaheo nei.

He kamaaina no hoi i oluolu ia oukou, nolaila, e kuai manuahi aku no au me ka emi malalo o ke kumu lilo. He mau lole nani loa, he Na Paikini, no ke au o ka Moi Kalakaua. Owau no o ko oukou makamaka oiaio.

303 6m 823 C.C AKINA.

[end]