Ka Nupepa Kuokoa, Volume XVI, Number 49, 8 December 1877 — Page 4

This text was transcribed by:	Kahi Mcclellan
This work is dedicated to:	Kahoali'i

Ka Nupepa Kuokoa

KE KILOHANA POOKELA NO KA LAHUI HAWAII.

KA NUPEPA KUOKOA, ME KE AU O KOA I HUI IA.

CROWN OF GLORY.

------

Crown of Glory, p 3.,

Hana ma ka malawaina,

Hana no Iesu,

A ma o loaa ka lei la,

Ka lei haiamu

Cho. -- Lei maikai, lei o ka nani,

Ke hooleiia mai,

Lei mae ole, nani wale,

Kau a mau loa'e.

Hana me ka makemake,

Hana no Iesu;

Hana i kana mau kauoha,

Me ke aloha pu.

Cho. -- Lei maikai, &c.

Hana ma ko Iesu mala,

Hana no a mau;

He aloha mau no kona,

Aloha hoi kakou.

Cho. -- Lei maikai, &c.

Hana, hana, a hoike

I ka pono mau;

Paio, paio no ke ola,

No ka lei mao.

Cho. -- Lei maikai, &c.

Aia hoi, kokoke mai la

Iesu ke 'Lii e,

Nana e uku a hoolei la

I ka lei maikai.

Cho -- Lei maikai, &c.

Hawaii

HAAWINA KULA SABATI

HELU 12. SABATI, DEK 23, 1877.

KUMUHANA. -- Na Olelo Hope a Paulo.

PAUKU BAIBALA. 2Tim. 4:1--8.

KE kanoha aku nei au imua o ke aio o ke Akua a me ka Haku, o Iesu Kristo, o ka mea e hookolokolo ana i ka poe ola a me ka poe make i kona hiki ana mai, a i kona aupuni;

2 E hai aku oe i ka olelo; e hooikaika i kela manawa a i keia manawa; e hoakaka aku, e papa aku, e paipai aku, me ke ahonui wale, a me ke ao ana'ku.

3 No ka mea, e hiki mai ana ka manawa e hoolohe ole ai lakou i ka olelo pono; aku, me ka pepeiao maneo e hapuku lakou i na kumuao na lakou mamuli o ko lakou kuko iho.

4 A e haliu ae lakou i na pepeiao mai ka olelo oiaio aku, a e hoohuli ia'ku hoi ma na olelo lapuwale.

5 Aka, e kiai oe ma na mea a pau, e hoo manawanui i ka popilikia, e hana i ka oihana a ke kahuna hai euanelio, a e hooiaio loa aku i kau oihana.

6 No ka mea, ua makaukau au no ka ninini ia'ku, a ua kokoke mai nei ka manawa o'u e hele aku ai.

7 Ua paio aku au i ka paio maikai, ua hoopau no hoi au i ka manaoio:

8 Ma keia hope aku, e waiho mai ana no'u he lei o ka pono, ka mea a ka Haku a ka Lunakanawai hoopono e haawi mai ai ia'u i kela la; aole hoi ia'u wale no, aka, i ka poe a pau i makemake i kona ikea ana mai.

Pauku Gula. p 7, hoopaanaau.

Topika. Ke kali ana no ka Haku.

Na mahele. I Ke kauoha a Paulo, p 1, 2, 5.

2 Ka wanana no ka wa huli mai ka oiaio aku. p 3, 4.

3 Ka uku no ka poe pono. p 6-8.

Hoopaauaau, p 5-8.

Mele, Him. 371, 7-6. Leo, Hosana Kamalii.

E ake au e noho

Me na anela maikai,

A mele me lakou la

Ma kahi nani e;

E kau ka lei mae ole

Maluna o kuu poo;

He lira ma kuu lima,

E oli ia Iesu.

Me ka pauku ekolu. Pule i paio pono na koa o Iesu a hiki i ka hopena, i loaa ka lei o ka pono.

Na Ninau a na Kumu.

Haalele kakou ia Paulo mahea? Ehia makahiki i noho pio ai oia ma Roma? A pau na makahiki elua, ua hookuu ia anei oia? Nawai i hookuu?

Ka paa mua ana keia o Paulo ma Roma. Ka pau keia o ko Luka kakau ana i ka moolelo no Paulo. Ma na moolelo ekalesia e ae, ua kakau ia kekahi mau mea no na hana hope a Paulo, me ka manaoio, ua oiaio paha, aole nae i akaka lea ka oiaio. Aole nae he mea kue i ka oiaio, he mau me hoi e kokua ana i ka oiaio.

Eia ua mau mea nei. Ua hookuuia Paulo e Nero ma keia paa mua ana.

Mahope iho, hele Paulo ma ka Akau o Italia, e hai ana i ka olelo a ke Akua, a nui ka poe huli mai. Ma ia manawa, kakau oia i ka Episetole i na Hebera.

Mai Italia aku oia a Sepania, a Farani a Beretania, a haiolelo no, a nui ka poe i huli ma Beretania, a haiolelo no, a nui ka poe i huli ma Beretania. Nui ko Roma poe malaila, a huli mai no kekahi.

A hala na malama eiwa, holo Paulo mai Beretania a Kerete. Nui na pilikia i loaa aia ma ia holo ana. Noho oia a haiolelo, ma ia mokupuni. No ka lohe ana i na pilikia o na Iudaio, hoonoho oia ia Tito i Kahu Ekalesia ma Kerete, a holo mailaila aku a Anetioka, e hele haiolelo ana ma Suria, e hookupaa ana i na haumana. Malaila aku oia a Cilicia, a Galatia, a Kolosa, a Epeso, a Teroasa, a Pilipi, a Nicopoli ma Makedonia. Malaila oia i kakau ai i kana Episetole ia Tito. Nana Tito 3; 12. Kaahele oia ma Makedonia a puni. Alaila holo oia ma Korineto, a holo hou i Teroasa, a i Epeso, e ike ia Timoteo e noho ana ilaila.

Ma Epeso, ua hai mai paha ka Uhane e make ana oia ma Roma. A hiki oia i laila i ka wa e hooomaau ino ana o Nero i na Karisetiano. Aia no o Nero ia wa ma Heleue. Kona luna nae o Hetio, ua kuhikuhi ia o Paulo iaia, oia ke poo o na Karisetiano. Ka hopu koke ia no ia o Paulo a hoopaaia iloko o ka hale paahao ino loa. Haiolelo nae oia i ka poe hele e ike iaia, a huli mai no kekahi.

Iloko o ia paa elua ana, kakau Paulo i ka Episetole elua ia Timoteo, e kauoha ana iaia e hele mai i ona la. 2Tim. 4; 9-13, 21.

I ka hoi ana mai o Nero, lawe koke ia Paulo imua ona, hookolokolo pono olo ia, a hoahewaia e make. A no ka mea, he kanaka no Roma oia, ua aeia e make oia ma ke oki ana i ke poo i ka pahikaua, aole ma ka li ia ma ke kea. Ua hoopaaia i ke kaulahao, a alakai ia'ku i kahi e make ai. Iaia ma ke alanui, paipai no ola i na koa alakai e huli mai, a huli mai no ekolu koa. A hiki oia i na wai o Salevia, ekolu mile ia mai Roma aku, malaila i oki ia'i kona poo, ma ka la 29 o Iune, mak. 66, ka mak. 68 ia o ko Paulo ola ana.

2Tim. 4; 1, 2, 5. Ka Paulo kauoha ia Timoteo. Aia mahea Paulo? Mahea hoi Timoteo? Imua owai ke kauoha ana? p 1. Heaha hoi ke kauoha? p 1, 5. Heluhelu. Nana hoi, IHor. 16: 13.

P 3, 4. Heaha ka mahele elua? Heaha ke ano o keia poe e hiki mai ana? He mau pepeiaiao aha ko lakou? Pela anei kekahi poe i keia wa, haalele i na olelo oiaio, makemake e lohe i na mea hou, na mea hoolealea, hoakaaka, hoolalau? Heaha ka pule kupono? Hal. 17; 5.

P 6-8. Heaha ka mahele ekolu? Ua makaukau oia no ke aha? No ka ninini ia'ku paha o kona ola. Ua kokoke kona wa'e make ai. E oki ia'ua kona poo, a ma ia mea e ninini ia'i kona koko, kona ola. He paio aha ko Paulo? He holo aha hoi? Heaha hoi kana e hoopaa'i? Heaha ka mea e waiho ana nona? Nawai e haawi mai ia lei? Nowai hoi ia lei like? Ahea e ikeia ai Iesu? Nana Luka 12; 40. ITes. 4; 16, 17. Mat. 25; 31-33. Hoik. 20; 11, 12.

Mele Him. 340. 6-8. Leo --

He koa anei au?

He kauwa ua Iesu?

A ku haalulu a makau,

A wiwo wale no.

Me ka pauku 4, 5.

Na Ninau a ke Kahu.

Na makua. Ma kela pule, ua pau ka moolelo a'Luka i kakau ai no Paulo. Mahea Luka i waiho ai ia Paulo? Mahea i loaa'i ka moolelo hope no Paulo? Ma ia moolelo ua ahaia Paulo mai ka paa mua ana? Hai mai i na wahi a Paulo i hele ai mahope o ia hookuuia ana? Me kana mau hana, kakau Episetole ana. Ma ka hele hope ana i Epeso, hoonoho oia ia wai i Kahu Ekalesia ma Epeso? Owai ma Kerete? I kona haalele ana ia Epeso, hele oia ihea? Heaha ka ka Uhane i kuhikuhi ai iaia ke hele oia i Roma? A hiki oia i Roma, nawai oia i hopu a hoopaa iloko o ka hale paahao? Heaha ko Paulo hewa? Aohe ona wahi hewa iki. He alii hewa loa o Nero. Puhi oia ia Roma i ke ahi, a kauia ka hewa maluna o na Karisetiano i mea e make ai lakou no kona huhu loa ia lakou. He Karisetiano o Paulo, he luna nui no lakou. Nolaila, oia kekahi i hoohihia wale ia no ke puhi ana ia Roma i ke ahi. Oia ka mea i make ai oia ia Nero. Make oia pehea? No ke aha i ae ia'i e okiia kona poo i ka pahikaua, aole e li ia ma ke kea?

Na keiki. He mau kauoha ka Pauolo ia Timoteo, heaha ia mau kauoha? E hoakaka, e paipai, e papa, e ahonui, e ao aku, e kiai ma na mea a pau. Pili anei keia mau kauoha ia oukou? Ae, pono ia makou ke hoakaka 'ku i ka pono, papa i ka hewa, paipai e huli mai, ao aku i ka poe na aupo, ahonui, kiai, makaala, haipule, paio no ka pano. Ua paio maikai Paulo a hiki i ka hopena heaha kona uku ma ka lani? Ma ke aha e loaa'i ia oukou ka lei o ka pono? A hui pu me Paulo?

Ke kula a pau. Ka wanana hea a Paulo ma keia haawina i hookoia? Eia maanei anei kekahi? Owai ka poe makemake e hoopaapaa, a lohe i na mea hou, &e? Heaha ka pono no ia poe?

Hai mai i ka Pauku Gula.

Mahea Paulo i make ai? Mahea oia i kanu ia'i? Ma kahi i kukulu ia'i kekahi luakini nui Sana Paulo e Konesetine mahope loa iho, wahi a ka moolelo. Ma ka mak. ehia i make ai Paulo? Ehia hoi ona mau makahiki? Mahea oia i keia wa? Owai ke hiki e hui pu me ia a hooleiia i ka lei o ka pono? Ko kakou ano anei ia? Mele. Him. 369. Leo Pisgah.

Pii i ka mauna ia Pisega, &c.

Pauku akahi me ka lua.

Pule i hoohalike kakou me Paulo ma ka paio ana, i loaa ka lei o ka pono, &c.

Haawina no Dec. 30 Ka hoi ihope.

HOIKE HUI O NA KULA SABATI O

KEKAHA, MA KALAOA N KONA HAWAII

Ma ke kauoha a ke Kahu Kula Sabati, J. W. B. Kukapu. Ua hoohuiia na kula eha, o ka Ekalesia o Kakaha, ma ka luakini o Haleola Kalaoa N. Kona, i ka la 13 o Oct. nei, M. H. 1877. -- Ma na la mamua ae o ka hoike ana, ua koho ia o J. G. Hoapili i Komite nana e hoike i na Kula Sabati.

A ua loaa ka oluolu ia e ia, ma ka lawelawe ana ma ia hana maikai, iloko oia la. Eia na kula sabati i hui mai; I-Kula Sabati o Kobanaiki 2-Kula Sabati o Haleola, 3 Kula Sabati o Kaisaleia, 4-Kula Sabati o Napuu.

I ka niki pono ana i ka la i olelo ia no ka hoike, i ka hora S paha a oi, o ke kakahiaka, ua akoakoa mai na haumana me na kumu; a me ka poe makaikai pu, ma kahi i olelo ia no ka hoike. Ma ia wahi aku i hele kau liilii aku ai kela kula keia kula sabati a hiki ma kahi e hoomoaa'a ai, ma Kalaoa (akahi), a ma ia wahi i hoonohonoho pono ia'i ka huakai; penei: --Ka hoonohonoho ana o ka huakai.

(a) Ka mea iaia ka hae Hawaii, oia ka mua.

(e) Ka poe puhiohe iho, me na hookani pahu.

(i) Ke Kula Sabati o Haleola, me kona hae.

(o) Ke Kula Sabati o Kaisaleia, me kona hae.

(u) Ke Kula Sabati o Napuu. --

(h) Ke Kula Sabati o Kohanaiki me kona hae.

(k) Ka poe makaikai mahope loa mai.

I ka nana aku i na kula ua ku no i ka hanohano, oiai, me na aahu like ole na kula. I ke ka-i ana o na kula ue malama na kumukula, i na haumana mawaho mai. Ua ka-i aku ka huakai me ke kani ana o ka pahu, me na ohe, a hiki i ka luakini, a i ke komo ana o na kula iloko ua kaupuni ae la na kula elua puui, a hoonohonoho ia na kula ma na noho.

Ua wehe ia ka hana no ia manawa, ma ka himeni hui o. "Kai a naue i ka nani." Pau ia; --ua pule o Rev. G. P. Kaonohimaka, mahope olaila, ua ku mai ke Komite. Ka makua Luna Kanawai, J. G. Hoapili, e hoike i kona manao hoolena: penei.

E na keiki, e hoolohe i ko oukou mau makua no ka Haku, no ka mea, he pono keia. -- Pau ia:--He puhi ohe, me ka pahu Leo, Hoku o Betelehema; o ke alakai, o S. B. Kaalawamaka. I panai ia mai me na olelo pokole a ke Kahu Kula S. bat.

Mahope iho, lulu dila na Kula Sabati, no ka Pahu hookani me ka haawi ana mai o ka papa himeoi o Haleola, i himeoi lolu dala. Ma ko . G. Hoapili ano he Komite, ua lawelawe oia ma ia hana.

I ka pae ana aku o kona leo nahenahe ma ke kahea ana aku.

1 O ka apana o na Kumu Kula Sabaiti.

I ke kulu ana iho o na paka ua, haukawewe lua kela.

2 Ka apana o na mea kaui.

I ka ulele ana iho, ua like no a like,

3 O ka apana o na hoahanau, kulukulu no hoi lakou.

4. Ka apana o na hoahanau, kulukulu no hoi lakou. 5 O ka apana o na malahini, oia ka hope loa. Ke nana aku ia lakou, nioiu ka huila hao, paa ole i ke kahoi mai.

I ka hoouluulu pono ana ae i na hunahuna materia. Ua piha ke kiaha puaniki a ke aloha he kanalima dala $50.00:--Mahope iho olaila, ua mele mai ka papa pokii he himeni olioli;--Leo mele, "Mele oli ae, oli ae,"--pau ia hookuu ia ke anaina, no ka paina i paa aku ka houpo lewalewa, oiai he nui aku na hana i koe. I ka pau ana o ka paina, ua hea mai la ka leo o ka hele, a hoi aku la ke anaina, iloko no nana i koe.

I ka akoakoa ana o na mea a pau iloko, ia wa i hoolaa ia'i, ka pahu hookani na (Jehova Sabaota,) a no na hana maikai e ae.

Na ke Kula Sabati o Kohanaiki, i haawi mai i himeni, no ka hoomaka ana i na hana o ka Hoike:--Leo mele.

"Ke ola i ke Akua."--Alakai, o J. W. Haau, Puhi ohe a me, Pahu, "Leo puhi Aitioba," Alakai, o S. B. Kaalawamaka. Mahope iho kula sabati o Haleola, Himeni Hae Hoonani, aoao 9, "Mele aenei ma ka lani. Haawina kula no ka moolelo o Aberahama. Alakai. G. M. Paiwa

Kula Pokii o Haleola. Himeni Hae Hoonani Aoao 11 -- Ala ala kamalii. Haawina Kula, Na Kanowai he umi, Alakahi, Sam'l B. K. -- Ke Kula o Kohanaiki, Himeni Hae Hoonani Aoao 16.--Ku'u Baibala--Haawina Kula: Isaia; 28:15. Aia ke kahua ma Mat 24:45, me na pauku hoopaanaau, mai ka A, a i ka W, o J. W. H. K.--ke Alakai Ke Kula Sabati o Kaisareia, Himeni Robinagula Aoao 4, Alakai, Susana K. Kaelemaaute, Haawina Kula, no ka moolelo o Davida. alakai, Mr. John K. --

Ke Kula Sabati o Mapuu, Himeni Hoomana 232.--The Gospel Ship is sailing Haawina Kula Mat. 7:36-37, o A Kahu. kula ke Kumu, Puhi One a me ka Hookani Leo--Rusian March, o ke Alakai o S. R. Kaalawamaka. Pela iho la ka hooponopono ana o na hana o ka la, pau o nae ka manawa, aole i lawalu aku na hana i hoomakaukauia no ka Hoike. A na ke Kula Sabati o Kohanaiki i haawi mai i Himeni hookuu, Himeni haku, Ihi Ihi Ihihi no Iehova, Alakai J H --

Waiho mai ke Komite, o J G H. he mau olelo paipai i na Kula Sabati i kokua ia mai hoi e ke Komite, hai manao o na malihini, ka Luna Auhau Mr. Makainai, mahope, pule o Rev. G P. Kaonohimaka a hookuuia ke anaina.

I ka pau ana o na hana o ka la, ua hoohui ia ma ka Materemonio o ka mare, elua paa mare e Rev G P Kaonohimaka, he mau lala lakou no ke Kula Sabati, oia o J W H K.--Ke Kahu Kula Sabati, o ka Ekalesia o Kekaha, me Miss Rebeka Agina no laila no, ka lua o na paa mare, oia o G P Kaholoaa o Napoopoo S. Kona, me Mrs. Kaaua, o Kalaoa N. Kona.

I ka wa i makaukau ai no ka mare, ua kukulu ia na paa mare, ma kela aoao keia aoao, mamua iho o ka awai, me ke ku aoao aua mai o na lala o na Kula Sabati, o na kane ma ka aoao o na kane, o ua wahine no hoi ma ka aoao o na wahine, me ko lakou mau aahu like. Mahope iho o ka pau ana o ka mare, he olelo paipai ua J. G. H. imua o na paa mare, a me ka poe ku aoao. Hookuuia ke anaina me ka pule a Rev. G P Kaonohimaka.

A ma ka hora 7 1/2 P M oia ahiahi, na malama ia, ka paina ware, a na naue mai no kekahi poe ia ahiahi, e hauoli pu me na paa mare, a e lawe hoi i ka lakou mau makana a hoopiha i ka lua o ka inaina.

Ma ia po no, ua malama kekahi poe i Kula Baibala no lakou, ua kohoia o A. Kahukula i lunahoomalu no ia hana, pela ka hoomau ia ana oia hana a hiki i ka Poakahi, nana aku i na hana, ua ku i ka maikai a naauao na hana, me ka hauoli o ka manao.

Ma ke ahiahi Sabati, ua koho na Kula Sabati i Komite e hooponopono, a e imi i mea e holo mua ai na Kula Sabati o ka Ekalesia o Kekaha.

Eia na lala oia Komite, o J. W. H. K. no Kohanaiki, o G M P. no Haleole, o J. K. no Kaisareia, o A K. no Napuu, a ua kohoia o Rev G P K. a me S B K. i mau hoa kuka. I ka noho ana o ke Komite, na kohoia o G P Kaholoaa i Puuku waiho dala, no ka manawe.

Na Kumuhana.

1 Na ke Kahukula Sabati e hoolaha i ka manawa e hoike ai o na Kula Sabati, ekolu hoike o ka makahiki, Hooholoia.

2 E ukuia ke Kahukula Sabati i ekolu dala, no ka hoike mua o ka makahiki. Hooholoia.

3 E hoolakoia na Kula Sabati apau, e like me ko lakou hemahema, "mailoko mai o ka waihona dala o na Kula Sabati. Hooholeia.

He nui no na kumu hana i koe, aole i pau, aka, ua lawa au maanei.

Me ke aloha i kou Hookele a me na keiki ulele hua metala o kou Kupepa.

J W H KUKAPU

Kekaha N. Kona, H. Nov--1877.

Nu Hou o na Aina E.

Ma ke ku na mai o ka mokuahi Zealoudia i ka po Poalua iho nei, mai Kikane mai, ua loaa mai kekahi mau mea hou malalo iho nei;

Ua hoi mai nei o Kapena Mist mai kana huakai imi kanaka e hooulu ai i keia lahui, a i ole ia i mau lima hana no ko kakou mau pa hana paeli aina, aka, o ka hue, loaa o kana huakai, eia iho noia malalo nei i kakauia mai kona peni ponoi mai. "Haalele ia Honolulu, holo i Kikane, malaila, kuai i moku o Stom Bird ma ka inoa o ke aupuoi Hawaii maileila aku, holo ka moku no Rotumah a mailaila aku i ka mokupuni o Line, e hoolele aku ai ia eha mau olulo wahine i loaa aku e lana ana i ka moana. O ua moku la, e hiki mai ana ia i Honolulu nei iloko o ka malama o Feberuari me ka huina e hiki aku ana i ka 100 ka noi ke huiia na kane a me ka wahine. A ua hiki no ke hoouna hou aku i ka moku, e kii hou i ona mau kanaka, no ka mea, aohe me e keakea ai i ka loaa ana mai o ka huina kanaka a pau i makemakeia e ki aku, a lawe mai ianei."

No ka moku ana o ka waea olelo moe moaoa e moe nei mawaena o Ladaua a me Kikane, nolaila, aohe mau mea hou ano nui i loaa mai ia makou ma ka heluhelu ana i na nupepa o Kikane i loaa mai nei. Aka, he lono lauahea wale no kai hoea ae mai hea mai la, ua lilo pio ke kulanakauhale o Kersma Asia Uuku i na Rukioi. Ke kali nei makou e loaa pono ma na lono oiaio no keia mea hou ano nui mamua o ka lawe ana i mea oiaio loa.

Ua nineuia ko Conua Moltke manao no ka nopena o ke kana ma ka hikina, a ua hoopuka mai oia penei: "Ina e hiki ana i na Rukini ke hanai i puali kaua nui mai Bulagaria, aleile, e eo aua ia lakou, aka, eia ka ninau, ehia ka nui o ka puali kaua e hiki ai ia lakou ke hanai malaila me ka hoohainu ana i ka wai a me ka halihali ana aku i na launa ana olelo, oia na Tureke e pau ana i keia mau mea, ma keia, aohe i hoike ke kuhikuhi kaua nui o ke ao nei i kona manao maoli no ka hopena o keia kaua nui.

I keia manawa, ua nui loa ka hooikaika kino aua a ka Emepera wahine o Rusia a me kana mau kamalii opio ma ka ahahui e hoopomaikai aka ai i ka poe koa i hoehaia iloko o keia kaua. Malalo o na lilo o ko ka Emepera wahine a me kana kaikamahine po nei ke Duke wahine o Edinebon i kapiliia ai kekahi kaa ahi kaokao i hoopihaia i na mea laau lapaau a hoounaia aku i ke kahuakaua. I mea e hoomahuahua ia aku ai na kokua mai ko waho aku nei poe, na ka Emepera wahine ponoi maoli no e pane aku i na hoomaikai a me na mahalo ana i ka poe i haawi kokua nui mai no ka pomaikai o ua koa i hoehaia.

Ua mareia iho nei o Baron Edmund Roshschild o Pariso, ke keikikake a Baron Jamas i make, me Adile, he Kousini nona o ka lala oia ohana e noho nei ma Geremania. Ke hoomaka aku nei laua i keia manawa, e imi i ko laua pomaikai ma keia ao, me ke kumu waiwai he $20,000,000.

HOOLAHA!

O KA POE NONA NA INOA MALALO iho, he poe malama HALE INU KI a me KOPE ma Honolulu nei, ke hai aku nei makou, mahope ae o ka la mua o Augate 1877. aole no e haawiia ke Kika Mauuahi i ka poe inu Ki a Kope pahu.

Akoug, Nasau, Kwan Sway,

Aswau, Nam Gan, Kitchway,

Numtai, Neegee, Hop Wo,

Honolulu, Iulai 25, 1877. Nong Chuck. 818 6m

------

Richard F. Bickerton!

[PEKETONA]

LOIO a he KOKUA ma ke Kanawai!

E HELE ANA OIA IMUA O NA AHAHOO - kolokolo a pua o keia Aupuni ma na ano hihia a pua, ina paha ma Oahu nei, a ma na Mokupuni e ae.

Ua makaakau mau ola i ka hana ana i na Palapala pili kanawai o keia a me keia ano.

Ua hiki no hoi iaia ke hoaie dala aku ma ka maraki ana I na aina, ma ka ukupanee haahaa loa.

E hanaia no hoi iaia ke hoaie dala aku ma ka moraki ana I na aina, ma ka ukupanee haahaa ioa.

E hanaia na hana me ka hikiwawe a ma ka uku haahaa.

Keena Hana, Helu 23 Alanui Kalepa, elua puka ma o aku o ka hale kauka o Kauka Minuteole. 826 ly

HALEKUAI MEA ANIANI!

UA WEHE ae nei ka mea nona ka inoa malalo, he Halekuai Hou, ma ka aoao ma Ewa o ka Hale Barabora,-ma ke Alanui Nuuanu, makai iho o ka Halekuai o Gookim, e loaa no na i'a, na Pola nui a me na Pola liilii, na Pika wai, na Ipukukui, na Kiaha Aniani, a e kuaiia aku ana me ka makepono loa.

828 3m 840 SAM WO CHONG.

E KA POE MAI!

E ka poe Pilikia!

------

E nana mai oukou i keia. Ua loaa hou mai ka

Laau Lapaau Kaulana!

------

No ka hoomaikai ana i ke koko, a me na mai a pau.

E hele mai a ike aia ma kahi o A L KAMIKA Opio, Helu 44 Alanui Papu. 835 2ms 842

------

Lole Makepono ke Kuike!

E LOAA NO IA MA KAHI O

KAKELA ME KUKE,

------E LAA NA------

AHINAHINA,

KALAKOA,

KEOKEO,

LEPONALO

Pena, Aila, Aniani,

Na Mea Piola,

Kopa, Aila Honua,

Aila Hoomaloo

Kui Kakia, Pakeke,

Tabu, Kaula, Noho lio,

Hulu-oalaki, na Pulumi

A he Agena no hoi no na Mokupuni o Hawaii nei no na

LAINAKINI-NAO,

LAINAKINI-MAOLI,

PALULE KALAKOA

ALAPIA, KELEPA, KILISA,

Na Lole kupono i ka wawae,

Palule Huluhulu,

Na Lole Huluhulu,

Na Lole no ka hoohehelo ana

Lipine, lihilihi, a me ia mea'ku

------A HE------

MAU MEA AI KAHI

Ka Palaoa, Kopaa,

Raiki, Pia, Hoohu,

Paakai, Huaala,

Pia Kulina &c-

------A HE------

LAAU LAPAAU KAULANA LOA

A Dr. JAYNES

Laau Kunu,

Laau Hoomaemae Koko,

Laaua hoopao naio,

Penikila, Huaale,

A me na Laau Hamo, a pela'ku

827 3m 839

Papa! Papa!

------NO------

ALLEN A ME ROBINSON.

------

Ua wehe ae nei maua i

---MA KA---

UWAPO o PAKAKA.

------

Na Papa Ulaula o na ano a pau.

Na Papa Paina o na ano a pau.

Na Pili Hale Ulaula.

Na Pili Hale Keokeo.

Na Pepa Hoonani Hale.

Na Pepa Molina.

Na Pena a me na Aila Pena!

NA KUI O NA ANO A PAU!

Na Pani Puka a me

Na Pani Puka Aniani.

Na Pani Puka a me

oa Olepelepe.

------

Na lako kukulu Hale

---O NA ANO A PAU---

E kuaiia ma ke

Kumukuai Haahaa Loa!

o keia Mekeke.

ALLEN & ROBINSON.

Honolulu, A per 13, 1876. 827 3m 839

------

HALE KUAI MANUA HI!

------

NO KONA,

NO PUNA,

NO KOOLAU,

NO NAPALI,

NO MANA!

Eia ma Koloa nei ka mea Hou ano e kupalanaha, a e ua ue nui mai oukou e na mamo a.

MANOKALANIPO!

a e ike i na mea maikai o keia a me kela ano, ma ka

HALEKUAI O PENI!

Ua makaukau ola e kuai aku i

Na Lole o na ano a pau,

Na Papa o na ano a pau,

Na Lako kukulu ha'e,

Na mea hana kamana,

Na mea mahiai,

Na mea ai, mai na aina

e mai a me na mea a pau i makemakeia e ke

Kane, ka Wahine a me ke keiki

Ke loaa mau mai nei keia mau mea ma kela moku kela moku, a no ka mea, ua hoopaeia mai ma Honolulu.

He au hou o ke Kuikahi!

Nolaila, e hiki ia'u ke haawi i keia mau

pouo ia oukou, ma ka kumukuai

haahaa loa, i ike ole ia

mamua aku nei.

E lulumi mai a hoao!

FRANK BINDT.

Koloa, Kauai, Aperila 14, 1877. 802 1 yr 833

------

Eia ma ka Hale Kuai o Wini!

NA EA,

NA OMAU A-I,

NA KULA PEPEIAO

NA OMAU HAO BUKALO,

NA MEA ANO HOU A EMI,

Buke Pakeke Ili a me na Eke Dala

Na Lei Pilali,

Na Lei Eleele,

a me na mea e ae he nui wale.

E HAAWI MAKANA IA ana i keia a ua keia mea i kuai a hiki i ka.

ELUA DALA.

E hele mai, e nana i keia mau mea maikai, a elo-

aa no e like me ka makemake.

Eia ma ka Hale Kuai o

756 2m WINI.

------

Kuai Haahaa Loa!

E KUAHA aku no ma ke kumukuai haahaa, ma ka Hale Kuai o H. M. WINI,

Na Kula Pepeiao Ea a me na Kula kanikau, a me na kui

e ae o keia a me keia ano.

Na Lei Kanikau no hoi a me na Lei e ae no e linohau ai o na Lede opiopio, e kinikohu ai ke nana aku i ke kau mai luna. Na apo lima kanikau a me na mea e ae a pau no ke kumukuai haahaa loa. E wiki mai! 814

NU HOU! NU HOU!

------

Kukaepele i Hanaia ma Honolulu nei!

E FREDERICK VEHLING!

------

He kukaepele maikai loa keia!

Ua like kona aio me ke Kukaepele o ko na Aina e.

AOLE E NELE KA AINA WA A PAU

E kokua kakou i na hana mikiala kuloko

o ko kakou aina hanau.

E hele mai e ike, a e kuaiia ma ka Hale

Kuai o A. L. KAMIKA,

804 3m 831 Helu 44, Aianui Papu