Ka Nupepa Kuokoa, Volume XVII, Number 5, 2 February 1878 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XVII. HELU 5.} POAONO, FEBERUARI 2, 1878. {NA HELU A PAU 844.

 

KA

NANEA EEHIA

O KA HIWAHIWA OPIO

ABEONA

KE KEIKI

ALII O KO KE AUPUNI TEROGINA,

KA MEA 1

HANAUIA ME KA UAMAUMA AHI

LAPALAPA O KA WIWO OLE,

KA WALI WAIPAHE

Nana i kaili ka Puuwai Kupaa o ke

KAMA ALIIWAHINE

MARIADANE

-KA-

OPUU PUNAHELE LUA OLE A KA

MOI MINOSA, O KE

AUPUNI KUPUA O KARETE.

_________

 

MOKUNA 1 - HELU 5.

 

MAMULI o ka paakiki loa o ko Abeona manao, ua ae aku la kona makua i kana koi, me ka puuwai i piha i ke kaumaha a me ka luuluu, a ua olelo iho oia, "Aole loa au e kala iaʻu iho ma keia ae ana o'u i kau koi e kuu keiki, a me he la he hoopai papalua ke kauia mai ana ma luna o'u, ma ka hopena."

            O ke kauoha a ka Moi, e hoomakaukau ia ko ke Keiki Alii haalele ana mai, ua hookoia e na makaainana me ke kaumaha, no ka mea, ma na pea mahope loa aku o na kuahiwi a hoea i na aekai o ka aina, ua lilo he muliwai hookahi ke kahe ana, oia no ke aloha huliamahi o na makaainana mahope o Abeona.  Ua noi aku lakou i ka Moi, e ae ia lakou e holo ma kahi o ke alii opio, aka, ua hoakaka mai la nae oia ia lakou no ka Abeona mau olelo kupaa a kuemi hope ole.

            Nolaila, i ko lakou ike ana, aohe e noho o Abeona me lakou, ua hooikaika pauaho ole lakou e lako pono oia ma kana huaki.  O ka moku, he moku nani a nui no hoi, a o na kanaka, he poe manao koa wale no i maa i ka aukai.

            Mamua ae o ko Abeona haalele ana iho i ka aina, ua hoomakaukau iho la ia no ka noho ana o kona mau kanaka i holo pu mai ai mai Terogina mai, a ua lawa ko lakou makemake no ke kuonoono o ka noho ana.

            I ka aenane ana e makaukau na mea a pau no ka Abeona huakai aumoana elua, ua wae ia mai la na kanaka opio eono, a oia nei no hoi ka ehiku, a o na kaikamahine opio no hoi ehiku. Nani ke kaumaha o na ohana o keia poe, aole he mau huaolelo o Hawaii nei, e hiki ai ke hooakaka piha ia.

            I ka la a Abeona i makaukau ai e haalele iho i ka aekai o ka aina o kona makuakane, ua huliamahi mai la ka lahui e ike i kona holo ana.  A i ka minute hoi mamua iho o kona hehi ana'ku iluna o ka oneki o ka moku, aia hoi, me ke poo e kulou ana ilalo i ka ili honua a me na waimaka e hoike mai ana i ka luuluu o kona naau, lalau mai la ka Moi i ka lima o kana keiki, a umii iho la me ka haalulu, a me ka leo aloha i pane mai ai i keia mau huaolelo:

            "E kuu keiki aloha, kuu minamina a o ka hooilina o ka'u no a pau--ano, ke hai aku nei au ia oe, ua hoomakaukau au i na pea o kou moku, he mau pea eleele nae, he hoike ana no ka hailona o ke kanikau; a ke manao nei au, ua kupono ia mea, oiai he huakai kau e hele nei i ike mua ia he poino ka hopena, he make weliweli hoi.  A oiai no hoi, ua kaumaha loa ia au, mamuli o keia haalele ana mai nei ou ia'u, a oiai hoi @oo hoea aku ko'u wahi waa kino nei i ka aneane ana o ka piha o na la no ke ola ana o keia kino nawaliwali a hapauea, a ke manao nei no hoi au, aole paha e loaa ana ia'u ka pomaikai o ka ike ana i ka huli hoi ana mai o ka moku a hai mai i ka lono o kau huakai.  Aka, e like me ka loihi o ko'u wa e ola ai, e hooikaika mau ana au e pii aku a hiki i ke kiekiena o kela kuahiwi i kela a me keia la, e kiai ai i ike aku i ka huli hoi ana mai o kou moku maluna o ka ilikai moana. A e kuu Abeona, ina e kau mai kekahi ulia o ka pomaika maluna ou, a e pakele oe mai ka make mai a ke kupua, alaila, e wehe ae oe i keia mau pea o ke kanikau, a hoolei aku iloko o ka opu o ka moana, a e kau oe i na pea nani, i anapa'i ke pa mai na kukuna o ka la, i ike aku ai au i kahi mamao, a i maopopo ai ia'u a me na makaainana, i ka hoailona o kou lanakila, a i haawi aku ai makou i na hookipa hauoli ana i ike mua ole ia ma keia aina, a e haalulu ai hoi ka papa hele o ka honua, a naka na ao kaalelewa o ka lani maluna.  Aka, i oluolu i na lani e kaili aku ia oe e kuu mea makamae mai ka poli pumehana'ku o kou makua, e ulupaia nei e ka luuluu nou, alaila, e kauohaia kou mau kanaka luina, e humu paa loa ia na pea kanikau, a e pakoluia ke eleele, i ike aku ai makou ke hoea mai, a haawi aku i ko makou hopena na ka make, mamua o ka hoaa ana mai o ka lono walohia, e hooia mai ana i ka hopena a'u e manao nei nou. A ano, ke noi nei au i ke aloha a me ka lokomaikai o ka Mana Lani, e ukali a e kiai maluhia mai ia oe a me ka poe e hele pu ana me oe, a ke pakele oe a o oukou a pau, o ke ko ana ia o ka'u a me ka ka lahui mau puana ana; a ina no hoi e pilikia, e hoopakeleia kou uhane, a e hui kaua ma kela ao nani, kahi o ke ola a me ka hauoli mau loa."

            No keia mau olelo a ka Moi, ua ae koke aku la o Abeona, me ka hooia ana'ku imua ona no ka hooko pono ia o keia mau kauoha hope loa a kona makua.  A mahope koke iho no, ua kau aku la o Abeona iluna o ka moku, me ka puana ana ae paha i keia mau lalani,

            "Ke ku nei au e hele - -e,

              E imi i ko oukou pono,

              O ke aloha ko oukou a pau."

Lu ia ae la na pea uli kanikau, a me he la, na ke ahe hanu kaumaha o kela a me keia o na makaainana, i hoolawa mai i ke ahe lau makani nana i hoopiha'e i na pea, a neen aku la ka halelana, me kana ukana makamae maloko o kona opu. A i ko lakou niau ana aku nae a nalo loa aku la na puu o ka aina i ka liula koliuliu mahope, ua pa mai la ka makani ma ka hikina, a oiai hoi no ke komohana ko lakou ihu, ua pahee pakika aku la ko lakou moku maluna o na ale kahulihuli o ka moana, a me he la e noho ana lakou ma kekahi huakai hauoli hoohala manawa.

            Mamua ae o ka puu ana ae o na kuahiwi hauliuli o Kareke, maluna o na ao mamao, a oiai hoi lakou nei ma ka moana, ua lawa pono ka moana ia lakou no ka hoopiha ana i kela a me keia hora no ka hoohauoli ana ia lakou iho.  Aka, i ka hiki ana mai o ka manawa, a kau aku la ka ike a ko lakou mau onohi maluna o ia mau puu, aia hoi, me he la ua hoopili ia aku ka hau o ke kukulu akau loa ma ko lakou mau papalina, a holo puni ae la ke anu hui a paapu ke kino.  Ua nalo aku la na manao hauoli, a ulu mai la ke kaumaha.  Aka, o ka kakou koa wiwo ole, aole oia pela.  Ma kahi o ke kaumaha, ua hauoli ae la oia, no ka mea, ua ake nui kona manao, e hiki aku i kahi o ka huakai e ku ai i ka pahu hopu, a e halawai pu me ke kupua aikanaka, a e hookoia kona mau iini ana, a i ole, e ko hoi ka makemake o ke kupua.

            Holo aku la ko lakou nei moku a kokoke, he mau mile paha he umi ke kaawale mai ka aina mai, aia hoi, ua piha loa ia ae la ko lakou nei mau puuwai me ke kahaha i ka ike ana aku i kekahi kanaka nui e ku mai ana iuka o ka aina. O kekahi wawae ma kahi aoao o ke awa e komo aku ai, a o kekahi ma kahi aoao. E paa ana ia i kekahi ihe nui, a iaia e ku ana, ua nalo aku la kekahi kihi a me luna loa o kona poo maloko o na ao o ka lewa.

            Ninau ae la o Abeona, "heaha keia mea a kakou e ike aku nei?"

            O ke kapena o ua moku nei, ua maa a ua kamaaina hoi i keia wahi, no ka mea, nana no i lawe mau i na moku i kela a me keia makahiki me na kanaka a kaikamahine opio, nolaila, ua pane mai la oia i ke alii.

            "E kuu haku, o kela au e ike aku la, oia no ka pilikua Telisa, ke kiai hoi o ke aupuni o Karete.  Aohe malihini kipa malaila ke ole e loaa ka ae mua ia e ia."

            Oiai laua nei e kamailio ana, ua kokoke loa aku la ka moku, a me ka puoho laua i lohe aku ai i ka leo o ua pilikua nei i ka halulu ana ae ma na paia o ka lwea, i ka ninau ana mai.

            "Mai hea mai oukou e na malihini?"

            A i ka pau ana ae o kana mau kamailio ana, me he la he hapa hora paha mahope iho akahi no a pau ae ka nakulu ana a me ka naueue ana o ka moana.

            "Mai ka hikina mai, me na mohai na ke kupua o ke aupuni Karete o Minosa" wahi a ke kapena.

            "E kipa lanakila mai!" wahi a ua pilikua nei, a nakulukulu hou ae la na paia o ka lwea luna, a naueue hoi ka moana me ka aleale o ke kai.  Kipa aku la ko lakou nei moku, a hele aku la ua pilikua nei ma kona ala, e hoomau ana i kana hana, o ke kaapuni mau ana i ua aupuni la i kela a me keia la me ke kiai mau ana i ka poe komohewa mai.

            I ko lakou nei hiki ana aku i kahi ku moku, a lohe ia aku la ka ukana o ka moku, aia hoi, ua kii mai la na koa i aahu ia me ko lakou mau kapa oia kulana i na pio, oia hoi na poe opio he umikumamaha, a o Abeona pu kekahi mawaena o lakou.  Malalo o ke alakai ana a keia poe koa i makaukau me ka lakou mau pono kaua, ua ukali aku la ke koa wiwo ole o Terogina me kona poe a komo iloko o ka pa alii, a lawe loa ia aku la a ku ana imua o ke alo o ka Moi Minosa. He Moi kuoo a okalakala ka Moi Minosa. O ka pilikua kiai me kona ikaika a me kona puuwai paakiki a pau ke hui pu ia, he keleawe wale no ia imua o ke kulana o keia Moi, a ua kupono ke kapaia aku he Moi me ka puuwai hao kila.

            Nana mai la ua Moi nei me na maka makue ia lakou nei mai kona nohoalii mai; a ina paha he kanaka me ka puuwai i awili pu ia me kekahi wahi kulu waipahe iki o ka olu, ina la paha me kona ike ana mai i neia mau pua roselani e mohala mohaha aku ana, a me ka opuu Abeona hoi me kona oiwi a me na hiona liula o ka nani, e mawehe iki ae ana la hoi kona puuwai a kauoha mai i keia poe opio e hele lanakila; aole hoi e hihi, he kanaka i hanau ia aole he kanaka, a nolaila, ua makapo kona mau maka a me kona puuwai, a ua kuli hoi na pepeiao i keia mea he aloha--kekahi hoi o na momi makamae a ke Akua i makan mai ai i keia kino lepo nei.

            Pakahi ko lakou nei hele ana aku imua o ua Moi nei, a o kana hana ka nana ana mai i ka momona kupono no ka hoolawa ana aku i ka makemake o kana kupua a me ka ole.  Ua hele aku na kaikamahine opio imua ona me ka makau, e uwe ana me ka haaloulou, me na waimaka e maoli ana ma na papalina o lakou a pau, e hookiheahea ana i ka papalina o ka makuahine honua me na kahawai o ko lakou mau leo uwe kanikau, aka, aole oia i ano eha aku kona naau no ia mau waimaka, aka, kauoha wale aku la no ia i kona mau koa e hookaawale aku ia lakou ma kahi kupono, no ke kali ana i ka manawa e lawe ia aku ai imua o ke kupua.  Pela pu no hoi me na keikikane opio, ua kau pu aku no maluna o lakou ka haawina o ka makau a me ka weliweli, a uwe kanikau ae la lakou.

            Aka, e ka mea heluhelu, ka ike nei au i ke kii o ka kakou hiwahiwa, a ke makahehi nei me na iini paulehia o ka liula. I ka hiki ana mai i kona manawa, ua kau mai la na ouohi o ka Moi maluna ona me ke kahaha, no ka mea, ua ike mai la oia i kona ano.  Aia maluna o kona mau nanaina ke kuni paa o ka wiwo ole, e hulili anapa ana ka uwila o ke ahi koa maloko o kona mau onohi hauliuli, a o kona mau lehelehe, ua hoike mai la ka makaukau e hoolei mai i na huaolelo paio.

            No keia mea, ua pane mai la ka Moi i ka i ana mai: "E ke kanaka opio," me ka leo huhu, "aole anei ou wiwo iloko iho ou no ka hoomaopopo iho e pau aku ana oe i ke ale ia e ke kupua weliweli o ko'u apuni nei?"

            "Ua haawi au i ko'u ola no ka haawina maikai," wahi a Abeona i pane aku ai; "a nolaila ua makaukau au no ka make me ka wiwo ole a me ka hauoli. Aka, o oe e ka Moi Minosa, aole anei oe i wiwo iho a weliweli hoi iloko iho ou? Ka mea hoi i kela a me keia makahiki e ae nei a e kokua nei e hookoia keia kareima eleele nui wale o ka haawi ana 'ku he ehiku mau kaikamahine opio a me ehiku mau kanaka opio na keia holoholona ino aikanaka? Aole anei e haalulu iho kou mau ami a e paakiki hoi ke koko o kou mau aa e ka Moi hana ino ke nana iho i ka ike o kou mau noonoo ana iloko o kou puuwai? Au e noho mai nei me kou nani Moi a pau, maluna o ka noho kalaunu o kou aupuni nei, ke hopo ole nei au i ka pane aku imua ou mau maka e ka Moi Minosa, he kupua oi aku oe o ka weliweli a me ka hana ino mamua o kela kupua au e hanai mau nei me na kino kanaka a na mana lani i makana mai ai. A! e Minosa, e hoomanao oe i keia olelo a Abeona, "aia maluna o kou hale ka uhi eleele o ke kanikau no keia mau ola au e luku nei, a o ko lakou maemae a me ka make kumu ole, oia no kou make lapuwale iloko o ka hewa awahia nui loa.  O keia kaena, na ka mana lani e hoike mai. "

            "Aha! pela iho la ka kou manao a me kau olelo no'u?" wahi a ka Moi Minosa me ka piha i ka inaina nui. Ua manao ia e lawe koke i ko Abeona ola ia manawa, aka, noonoo ae la ia ua oi aku ka maikai o kona lawe ola ia ana'ku a haawi aku i ke kupua, nolaila kauoha aku la ia i na koa ona; "e lawe aku i na pio a e hoopaa ia lakou no ka aina kakahiaka nui o ke kupua, a o keia kanaka pakike ka mea mua nana e hoomaneoneo kona puu no ka aina kakahiaka."

            Iloko o keia manawa mai ke komo ana mai o Abeona, aia ma ka aoao o ua Moi nei e ku ana kekahi kaikamahine opio nani; ka mea hoi nona ka nani nohenohea a Abeona i ike mua ole ai mamua'e. Aia ma kona mau papalina ka lelo momi o ka hua apala memele, a o kona mau lehelehe ua like me ka wai meli momona na kilohi ana.  O kona mau maka, oia no na hiona hoku imo hooipo o ka lwea, a o kona hanu, o ke ala iniki hooipo a ka pua magenolia.  E pulelo kalole ana kona mau owili lauoho uliuli, a e wehe olu mai ana na lihilihi ooi o kona mau onohi. O kona kulana mai ka piko o kona poo a hiki i ke kapuai o kona mau wawae, hookahi wale no haina, oia ka hopuna oiaio o ka huaolelo "Nani!" O keia nani, oia no ka mea no na ka inoa olu waipahe Mariadane!

            I ka halwai mua ana o ko laua mau onohi maka, me ka oioi o Terogina, ai hoi, ua halawai koke ae la no na aokaalewa o ko laua mau puuwai, a me he la ua hipuu koke ia iho la ia manawa hookahi.  Ua makahehi mai la ka hoku lamalama o na aekai o Karete i ka opuu roselani Abeona o na kuahiwi waonahele o Terogina, a ua panina ia'ku la no hoi ia makana e na awihi hoolu ana a ke keiki nona ka puuwai ahilapalapa.

            Mae ae la ka ula o na papalina o ke kaikamahine alii a haalulu kona umauma i ka ike ana mai i ka huapiku o ka aina waonahele; a punia ia'e la hoi na aakoko o ke keiki koa e ke anu maeele ano waikoloa i ka awihi lihi ana'ku i ka onohi daimana o ke aupuni kupua o ka moana kai hohonu.

            I ka lawe ia ana'ku o Abeona e na koa e hooko ana i ke kauoha a ka Moi, a i kona hemo ana'ku iwaho, aia hoi, ua haule koke iho la o Mariadane maluna o kona mau kuli a kukuli hoohaahaa aku la imua o kona makua me ke noi uwe waimaka ana'ku e hoopakele ae ia Abeona a me kona mau hoa.

            O na hooikaika ana apau a Mariadane, he me hoonuinui wale no ia i ka inaina o ka Moi, a me ka nuku pu ana mai i kana kaikamahine no ka makemake ana e hoopakele i keia kanaka opu ino a manao hookiekie imua ona.

            Lawe ia'ku la o Abeona ma a hoopaa ia'ku la iloko o ka rumi paahao, a kauoha aku la ke kiai e hiamoe koke lakou, no ka mea, aia i ke kakahiaka nui loa lakou e kii ia mai ai a lawe ia'ku imua o ke kupua.  Pani ia mai la ka ipuka a holo ae la na laka hao nunui a paa loaʻe la ka puka.  Mamuli o ka uwe nui loa, ua mania ia ka poe paahao, a aole no i liuliu loa, haule iho la lakou iloko o ka pauhia hiamoe.        (Aole i pau.)

           

PAPA HOIKE MANAWA

-NO NA-

Mea Kaulana iloko o ka Moolelo

Hawaii

            Sept. Pae mai ka huakai imi aina o Amerika.

            Oct. 8, Haawi mai la o Kamehameha III i ke Kumukanawai mua loa i kakauia no na kanaka o keia Pae Aina.

            1841, Mei 5, Make o Kapiolani ma Kaawaloa, Hawaii.

            Mei 21, Pae mai ka huakai eiwa o na Misionari.

            Hoomaka ia ke kula no na kamalii misionari ma Punahou, (oia hoi ke Kulanui o Oahu i keia manawa.)

            1842, Ianuari, Make o Hoapili Wahine (oia o Kalakaua.)

            Iulai 8, Holo o Haaliho a me Rikeke, ma Farani, Enelani a me Amerika me ke ano he mau Komisina, no ka imi ana i ke Kuokoa o ke Aupuni Hawaii.

            Iulai 21, Paa ka luakini o Kawaiahao.

            Sept. 21, Pae mai ka huakai umi o na misionari.

            Oct. 19, Ku mai ka moku Victoria mai Nu Ioka  mai, me ke kipa ana ae ma Valeparaiso a me kalao.  O Rev. S. C. Damon a me kana wahine na eemoku.

            1843, Jan. 18, Hoopukaia ka helu mua loa o ka nupepa Ka Hoa'loha, ma Honolulu nei.

            Na Amerika i ae mua mai i ke Kuokoa o Hawaii nei.

            Feb. 25, Lawe pio ia o Hawaii nei e Lo Keoki, a huiia ka hae Beritania iluna.

            Iulai 31, Hoihoi hou ia mai ka Ea o keia Pae Aina e Adimarala Toma.

            Kukuluia ka Ahahui Malu ma Honolulu nei,

            Sept. Make o Batimea Puaaiki ka makapo.

            Nov. Hookohuia o Dr. G.P.Judd i Kakauolelo no ke aupuni, no na hana pili i kona Aina e.

            1844, Ae mai la ke aupuni o Beleguima i ke Kuokoa o Hawaii nei.

            Iulai 15, Pae mai ka huakai umikumamakahi o na misionari mai Bosetona mai, maluna o ka moku Globe.

            Hoounaia ke silika mua loa mai keia Pae Aina aku - he 197 na paona.

            Make o Haalilio ma kona ala e huli hoi mai ana i Hawaii nei.

            1845, Maraki, Hookohuia o R.C, Wyllie i Kuhina no ko na Aina e.

            Aperila 2, Koho muaia na lunamakaainana, mawaena mai o na kanaka kupa o ka aina, mamuli o ke Kumukanawai i haawiia i Okatoba 1840.

            Pae mai o Rikeke me ke kino kupapau o Haalilio.

            Make ke Kuhina Nui o Kekauluohi ma Honolulu.

            Hookohuia o Keoni Ana i Kuhina Nui.

            Hoouna muaia ke kofe mai keia Paeaina aku he 248 na paona.

            1846, Feb. 11, Hookohuia na Komisina no ka hooholo ana i na pono.

            Maraki 20, Make o Wini ma Lahainaluna.

            Hoihoi hou ia mai ka $20,000 o ke Aupuni Hawaii nei i laweia ai e Kapena Lapelake iloko o ka makahiki 1839. Na Adimarala Hamelina o ke aumoku kaua Farani i hoihoi mai.

            1847, Nov. 7, Make o Rikeke, ke Kuhina Ao Palapala.

            Make o Kuakini ke Kiaaina o Hawaii.

            Hiki mua mai na Moremona ma Honolulu nei, ma ke alahele no Kaleponi.

            1848, Make o Leleiohoku mua, ka R. Keelikolani kane, ke Kiaaina wahine o Hawaii.

            Make o Mose Kaikioewa he keikikane na Kinau a me Kekuanaoa.

            Make o Kaiminaauao.

            Hooiaioia ke Kuikahi mawaena o Hawaii nei a me Hamebuga.

            Pae mai ka huaki umikumamalua o na misionari.

            Pahola ikaika mai la ka mai ulalii iwaena o ka Lahui Hawaii.

            Hoomaka mua ia ka imi ana i ke Kuikahi Panailike me Amerika, a o J.J. Jarvis ke Komisina i hoounaia ma ka aoao o ke aupuni Hawaii no na manawa elua, aka ua haule wale. I ka la 26 o Okatoba 1849 hiki aku la oia imua o ka Peresidena Bukanana, a i ka malama o Nov. 23, oia makahiki no, hiki oia imua o Mr. Clayton, a ua hoi nele mai oia.

            1849, Hanainoia ka papu ma Honolulu e ka Adimarala Teromelina o ke aumoku kaua o Farani.

            Hoouna mua ia ka bipi miko mai keia Pae Aina aku - he 158 mau barela.

            Sept. 11, Holo na Keiki Alii o Liholiho a me Lota i Amerika, a o kauka (Dr. G. P. Judd) ka mea i ukali mahope o ka laua huakai.

            Make o Keliiahonui, he alii oia no Kauai.

(Aole i pau.)

 

MAIKAI KA HOI KA PAPA!

-A ME-

KA LAAU O KOU HALE!

NO HEA LA!

KAI NO HOI NO KAHI O

WAILA MA!

Nana aku no hoi ia la

            Ohi ka Io o ka Laau o Makawao

                        I ka ua mea hoi o ka nani o

 

Na PAPA! Na PAPA!!

-A ME-

NA PONO KUKULU HALE

O NA ANO NO A PAU.

 

_________

 

Aia ma ke kihi o na

ALANUI PAPU me MOIWAHINE

HONOLULU

MALAILA E LOAA AI

            E LIKE me ka MAKEMAKE

-NO KE -

KUMUKUAI MAKEPONO LOA!

 

______

 

PAPA, PAPA, PAPA,

 

            Na Papa Huluhulu,

                        Na Papa Manoanoa,

                                    Na Papa i kahiia,

                                    Na Papa Kepa,

                        Papa Hole Keokeo,

            Pana Hole Ulaula.

 

_______

 

NA LAAU, NA LAAU!

 

Na Kua,

            Na Kaola,

                        Na Aaho,

                                    Na Molina,

                                                Na Peapea,

Pine Huluhulu

            Pine i kahiia,

 

NA Papa a me na Laau Ulaula!

 

            Pili ulaula,

            Pili Keokeo,

            Pani Puka,

                        Pani Puka Aniani,

                        Ipuka Aniani,

                        Puka Olepelepe.

 

______

 

PENA O NA ANO A PAU!

 

Hulu Pena mai ka Liilii a ke Nui,

            Aila Pena,

                        Aila Hoomaloo,

                                    Waoiti, Pate.

 

NA LAKO O KELA A ME KEIA ANO!

 

            Na Ami Puka Hale,

                                    Na Ami Puka Pa.

                        ANIANI

 

Pepa Hale a me na Lihilihi

            E LOAA NO MALAILA.

PAAKAI HELU 10 KAKAAKAO me PUULOA

 

            No ke Dala Kuike, e loaa no na mea a pau i haiia ae la, no ke Kumukuai Emi loa. O na kauoha a pau mai Hawaii a Niihau, e loaa'ku ana ia lakou, e hooko koke ia no ia me ka lawa pono.

           

            E Kipa Nui Ilaila, i ike i ka Oiaio

084 @Jms