Ka Nupepa Kuokoa, Volume XVII, Number 6, 9 February 1878 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XVII. HELU 6.}        POAONO, FEBERUARI 9, 1878.    {NA HELU A PAU 845.

 

ON THE ALPS.

Mocking Bird p 103.

1

Maluna no ke Akua oia mau,

A nana i pena'e

Na pua nani nei,

A onaona e,

Maluna no ke Akua oia mau.

2

Maluna no ke Akua oia mau,

A ani ahe mai,

A kahe no na wai,

A uliuli e,

Maluna no ke Akua oia mau.

3

Maluna no ke Akua oia mau,

A nana i kau mai

I na kukuna la,

A nani ke nana,

Maluna no ke Akua oia mau.

4

Maluna no ke Akua oia mau,

A nana i hana'e

Na mauna ihi e,

Na manu mele nei,

Maluna no ke Akua oia mau.

5

Maluna no ke Akua oia mau,

Ma ona i hua'i

Na hua i ala'i.

Na puu a kula nei,

Maluna no ke Akua oia mau.

6

Maluna no ke Akua oia mau,

E ku na kamalii,

A oli hoomaikai

I ke Lii maluna'e,

Maluna no ke Akua oia mau.

HAWAII.

KA

NANEA EEHIA

O KA HIWAHIWA OPIO

ABEONA

KE KEIKI

ALU O KO KE AUPUNI TEROGINA,

KA MEA I

HANAUIA ME KA UMAUMA AHI LAPALAPA O KA WIWO OLE, KA WALI WAIPAHE

Nana i kaili ka Puuwai Kupaa o ke

KAMA ALIIWAHINE

MARIADANE

KA

OPUU PUNAHELE LUA OLE A KA MOI MINOSA, O KE AUPUNI KUPUA O KARETE.

 

MOKUNA 1 - HELU 6.

            I KEIA manawa, o Abeona hookahi wale no ka mea e ala ana. Aole i hiki mai ka manawa no kona mau papalina e pulu ai i na kulu waimaka o ka luuluu. E noonoo ana ia no lakou iho. Ua maopopo iaia ua nalowale na manao@ana no ka pakele ana mai kona poe hoa pilikia ae, a noloila, ua kau aku maluna ona ka hana nui o ka imi ana i kahi e pakele ai ko lakou ola. No keia mau noonoo ana, ua hiki ole iaia ke noho i kahi hokahi, a holoholo iho la mai kahi kihi a i kahi kihi o ke keena paahao oiai kona maa hoa e hiolani ana iloko o ka nanea o na moe uhane no na home a me na makamaka.

            Oiai oia e holoholo ana, lohe aku la ia i ke kani ana mai o ka uwati o ke kaona i hora 12, a i ka lawe ana'ku o ka eheu makani i ke o o ke ke hope loa a nalo aku la mai ka lohe ana o kona mau pahu kani, hoomanao ae la ia, ua hala he hapalua o ka po, a he hapalua wale no koe nona, a iloko oia mau hora oia e noonoo ai a e hooko ai i kana mau hana no ko lakou pakele, mamua'e hoi o ka wehe ana ae o na ooliu a oku mai kaiao malamalama.

            Ia manawa, lohe aku la ia i kekahi koele nehe malie ma ka laka o ka puka, a holo nihi malie ae la na polohuku hao nunui a mawehe malie mai la ka puke, a ia manawa i lele ae ai ko Abeona hauli i ka ike ana'ku i na helehelena mohala o Mariadane i ke komo ana mai me ka amalama e paa ana i kona lima.

            "Ke ala nei no anei oe e ke keiki alii?" wahi ana me ka hawanawana.

            "Ae! me kahi manawa uuku no ke ola ana, ua manao iho nei au he mea makehewa wele no ka pili ana iho o na maka; " wahi a Abeona.

            "Alaila, e ukali mai ia'u, a e hehi malie loa me na kapuai mama;" wahi ana.

            Ua kahaha o Abeona me kaninau iho iloko ona no na koa a me na kiai o ka hale paahao, aka, aole iaia ia wahi, no ka mea, ua wehe hamama aku la o Mariadane i na ipuka a pau, a alakai aku la iaia a hiki i kahi a ke kehau po i peahi hou mai ai i kona umauma, a na hoku e kilohi hooipo iho ana ia laua mai ko lakou mau home kieki mai o ka lewa.

            "E ke alii," wahi a ke kaikamahine, "ano he mea hiki wale noia oe ke kau aku maluna o kou moku, a huli hoi aku no kou one hanau."

            "Aole!" wahi a ke koa opio. "Aole loa e haalele ko'u mau kapuni wawae nei ia Karete aia wale no a make mua ia'u keia kupua, a hoopakele ae i o'u mau hoa alo kai, a hoolanakila i ke aupuni o ko'u makua a me kona mau makaainana mai neia hana pepehi kanaka."

            "E ka mea nana i aihue aku nei i na koni a ko'u puuwai, ke hai paa aku nei au ia oe, o ko'u makemake nui kou noho ana me makou, aka, oiai he make hala ole ke noho nei nou, nolaila ua manao au e hookuu aku ia oe, a e noi pu aku hoi e hoomanao ia'u. Nolaila e pono oe e huli hoi aku i pakele ai kou ola," wahi a Maridane i pane mai ai me ka leo pihoihoi.

            Aka, o ka manao o ka poe i hanau ia he koa, aole loa e kuemi hope mamuli o na olelo a ka mea o ka aoao palupalu, nolaila, e like me ka ikaika o ke ko ana o ke aloha o ka ui onohi la o ke aupuni moana ao ko ia nei huli hoi, pela no ka ikaika o ko Abeona manao paa e noho pu me kona mau hoa alo pilikia, a i hookahi kona pilikia pu ana me lakou.

            No ko Maridane ike ana ua paa loa ko Abeona manao, nolaila, lalau mai la oia i ka lima o ke koa opio a haawi mai la i ka pahikaua. "Eia ko pahikaua nani," wahi ana, "a ka wahine kupua i aihue 'i mai kou kino ae oiai oe e kamailio ana me ka moi. Ke nonoi ae nei au i na lani e kokua mai ia oe ma kau pale ana aku i ka poino e kau ia mai ana maluna ou. A ano, e ukali mai ai'u, a na'u oe e alakai aku."

            Alakai aku la oia ia Abeona a hoea ana malalo o ka malu lulu pouli o kekahi wahi ulu laau, kahi hoi a ka mahina nani e uhi iho ana i kona konane nani me ka liula maluna o na lau me ka hoike malamalama ole ae i na mea a pau. Hele aku la laua a hoea aku la ma kahi aoao o ka ululaau, a ku ana laua nei i kahi o kekahi pa mabala kiekie e ku ana. Ua hihi ia e na mea hihi o kela a me keia ano, a ua loaa ka nanaina waoakua i na mea a pau a ka maka e ike aku ai.

            Nana aku la o Abeona h@ kahaha iho la kona mau noonoo ana. No ka mea, aole loa he wahi meheu ana e hoomaopopo aku ai e hiki ai na wawae kanaka ke pii aku, aole hoi puka e hiki ai i ke kino kanaka ke komo aku. Aka, ike aku la nae keia i ka hoopa malie ana'ku o Mariadane i kekahi apana mabala. I ka pa ana, aia hoi, o ka wehe hamama koke ae la no ia o kekahi puka, a i ko laua nei hehi ana maloko aku o ua pa nei, o ka holo koke ae la no ia o ua pani nei me ka ikaika a paa loa'e la e like me mamua.

            "Ano, eia kaua maloko mai o na poai o ka pa kahua weliweli. Maloko nei, ina e lalau aku ke kanaka mai keia ipuka mai, o ka uhi iho la no ia o na mana kupua, a punia ia kona kino me kekahi mau noonoo ano e, a e imi wale no ia i kahi e hemo ai a aole loa e loaa. E lalau ana oia a hiki i kona make ana, nole loa e loaa ana ; a o kahi mea kupanaha, aia ma ka waenakonu o keia wahi, e noho nei ke kupua. A ano, e hele aku oe e imi iaia e Abeona."

            "A pehea ia e loaa ai ia'u ina e puniaa ia mai ana ko'u ano me na hiona kupua?" wahi a Abeona.

            Ia laua nei e kamailio ana, aia hoi, ua lohe aku la laua i kekahi leo wawalo ano e, a hoomaopopo aku la o Abeona i ke ano leo kanaka i awili pu ia me ka holoholona.

            "O ka leo kela o ua kupua nei," wahi a Mariadane. Wehe ae la o@a mai kona pakeke ae he owili lopi silika a haawi aku la ia Abeona i kekahi kihi a kauoha aku la iaia penei:

            "E ukali aku oe i kela leo, o kou meheu hookahi wale iho la no ia e hiki ai imua o ke kupua, aohe meheu e ae. A oiai hoi ua paa kou manao e kaua aku me ke kupua, nolaila ke hookuu aku nei au e hookoia kou mau manao, a ke noi ae nei au i na lani e kokua mai ia oe a e hoolanakila ia oe maluna o kou enemi. Aohe a'u ikaika a aohe hoi he wahi mana e kokua ai ia oe, a aia wale no maluna o kou manaolana, kou koa wiwo ole, a me kou ikaika e lanakila ai maluna o ke kupua. Ano, e aloha oe e ke koa Abeona, a i lanakila io oe, na keia silika e alakai hou ia oe a hiki i keia wahi."

            "O ke aloha kou e ka ui mae ole. Ke hele nei au me ka puuwai kaumaha, aole no kou makau i ka make, aka, no ko'u eha, oiai o oe ka pahikaua mua loa i komo i keia puuwai, a ke ike nei au ua oi aku ka eha a me ka welenia mamua o ka makakila oi loa. Ke noi nei au mai hoopoina oe ia'u, no ka mea, ke ae mai oe e haawi mai i kekahi wahi hoomanao uuku ana no'u, alaila, o ke kokua hookahi no ia nana e hooikaika i ko'u mau ami, a e wela ai hoi ka inaina o ko'u puuwai. E lanakila io ai au, oiai e hoomanao mau ana au nou, a e ake ana e halawai me oe. Nolaila, e aloha oe, a e kali oe me ka hoolohe i ka lono no ka lanakila hala ole o ke keiki o Terogina maluna o ke kupua a na mana aupuni nui i wiwo wale ai me ka weliweli. Aloha, a e hui hou kaua mahope."

            O ka Abeona mau huaolelo pakika iho la ia imua o keia kaikamahine puukani, a oiai o ka mua loa keia o kona lohe ana i na olelo hoomaneoneo pepeiao o keia ano, a oiai hoi o ka ui hookahi o Abeona malalo iho o ka la ma kana ike, nolaila, ua haule iho la kona mau manao a pau malalo o ke aloha no ke keiki hiwahiwa o ka moana mai. He oiaio, e ka mea heluhelu, ina ua ike oe i ke aloha no kau ipo i ka wa o ka hooipoipo ana, ke hai aku nei au, he mea ole loa ia i ka wela ikiiki o ko Mariadane aloha no Abeona. Ma ia hope mai, m@ he la e kau mau ana ko Abeona mau helehelena imua o kona mau maka a ke holo ae na hoomanao ana nona, e holo pu ae ana me ke anu maele a puni kona kino, a naka haalulu hoi kona mau aakoko; a no keia mau haawina i haule aku maluna o keia nani mahie, ke puana ae nei ka peni a ko oukou makamaka e na hoa o ke KUOKOA i neia mau wahi lalani e imi ae nei i wahi e hemo ai, penei:

            "E kuu lia, ka hooilina o kuu aloha, Ina o ka'u mau huaolelo ia oe ua manao ia he oiaio ole - O, e kau mai i kou lima maluna o kou umauma - A e hoomaopopo iho i ka pana hooipo ae nou."

            Ua haalele aku la o Abeona ia Mariadane, a ua kai aku la kona mau kapuai wawae imua. E iho ana ilalo a e pii ana iluna, e kolo ana ma na wahi haiki a e hele ku ana ma na wahi akea. Iloko o ka pouli nui a me ka eehia ko Abeona hele ana, a e lohe mau ana ia i ka nui o ka leo o ua kupua nei. Na ia mea i hoonui loa ae i ko Abeona inaina, no ka mea, ua manao oia aole kuleana iki o na kupua e ola maluna o ka papalina o ka ilihonua.

            Hoomanawanui loa aku la keia iloko ok a pouli, e hooikaika ana i kona mau kapuai wawae e hele imua ma na pipee kuono, a ano poniniu mai la kona poo, a hoomaka mai la na maka e pouli. Ua ano maeele mai la kona kino a ua kokoke e maluhiluhi a noho iho la ia ilalo, aka, huki aku la nae o Mariadane i ka lopi silika, a hoomaopopo iho la keia, hoomanao ae la no ka mea ana i haalele aku ai mawaho, a hele hou aku la me ka manao koa e hoea aku imua o ke kupua a e halawai pu me ia ma ka paio ana.

            Hele mua aku la o Abeona a aole i liuliu, hoea aku la ia i kekahi wahi oneanea i pa ia a puni me ka pa kiekie, e uhi mai ana ka malamalama o ka mahina maluna me ka moakaka, a ia wa i ike aku ai ia i ke kupua. Weliweli io no. E holo puni ana oia me ka uwo nui, a e @ ana ke ahi mai kona maka a me ka waha me he lua pele ala.

            I ko ia nei ike ana'ku, huki koke ae la ia i ka pahikaua a puliki paa ae la me ka makaukau, a i ka ike ana mai o ua kupua nei iaia nei, ku mai la me ka nana pono he mau minute a pane mai la me ka leo weliweli. "Owai oe e keia komohewa ino? Ano e ale au ia oe, i hoopai no kou hookiekie nui wale."

            "Ua makaukau nou e ke kupua o ka po;" wahi a Abeona; a ia manawa i huki hoa aku ai o Mariadane i ka lopi silika, a holo hou ae la na koni paa a ka manaolana ma na wahi apau oko Abeona kino.

            Ia manawa koke, ua hoomaka iho la kekahi hoouka kaua hahana i like ole kona lua mamua aku.

            Holo mai la ua holoholona ino nei me kona ikaika nui io ia nei, me ka manao e onou mai i ka oioi o kona huelo a make koke iho keia, a ua pale wale ae la no nae ke koa opio a hala aku la. Huli hou mai la ao a me kona waha e hamama ana a holo mai la me he aha nui la, me ka makaukau a ale aku i na mea a pau imua o kona alo, aka no kona paukiki loa i ka holo, ua hala ae la ka ike a kona mau maka i ka lele aoa'ku o Abeona a ku aku la ma kahi aoao, a kaalo ana ka make a ua kupua nei a nalo wale aku la no.

            Aka, i ka huli hou ana mai o ua kupua nei, mo ka wikiwiki loa oia i wili ae ai i kona huelo oiai a hou mai la me ka ikaika nui. Pa mai la ma ka aoao o Abeona a haule aku la oia i lalo, a i ka ike ana mai o ka enemi ia mea, manao iho la ia ua make o Abeona, nolaila huli hou aku la ia me lele ana i ka piha i ka hauoli, a e hoomakaukau ana hoi e ale aku ia ia nei, aka, ua kuhihewa nae kona manao, a o kona kuhihewa hope loa ana ia. No ka mea, elike me ka hikiwawae o ka haule ana, pela no ka hikiwawae o ko Abeona ala hou ana'e, a holo aku la imua, hapai ae la i kana pahi a kiekie a pane aku la, "ano e make oe e ke kupua ino."

            Ika huli ana'e o ke kupua, me ka manao o ka manawa ia e ko ai kona makemake, a e ale aku i ke kino makamae o ka kakou lei, aia hoi, me he ala lele la o ka uila, pela ka oi o ka makakila a ke keiki Abeona o ka onou ana'ku, a haule aku la ia i ka honua me ka inu pu ana i kona koko ponoi. Ua oleloia, no ka ikaika loa o ka uhau alua ana a Abeona a kaawale ke poo o ke kupua mai ke kino mai, ua naueue ka papahele honua o ka mokupuni o Karete, a hiolo mai la na paia pa paa o ka pa o ua kupua nei, a kuhihewa iho la ka Moi a me na makaainana he olai mai ka lewa mai, a he hauoli ana hoi no na kupua o ka lewa i ka hoea hou ana mai o ka la e paina hou ai ko lakou hoa kupua o Karete; eia ka o ka lima a me ka pahikaua a ke pukonakona o Terogina, ka mea hoi nona ka puuwai ahilapalapa o ka wiwo ole, ka hiwahiwa imua o Mariadane.

(Aole i pau.)

PAPA HOIKE MANAWA

NO NA

Mea Kaulana iloko o ka Moolelo Hawaii.

            1850, Make iho la o James Young Kanehoa.

            Sept. Huli hoi mai na Keiki Alii i Hawaii nei, a o Kauka pu kekahi me laua.

            1851, Hookumuia ka Ahahui Misionari Hawaii.

            Iune, Hoomakaia ke kukulu ana o ka Hale Hookolokolo ma Honolulu.

            Hoomaka mua ia ke pooleta ma Hawaii nei.

            1852, Hoopae mua ia mai na pake lima hana ma Hawaii nei, maluna mai o ka moku Thetis, o Cassa ke kapena.

            Ian. 4, Hoopuka mua ia ka nupepa haole Weekly Argus.

            Feberuari, Hu ka pele iluna o Mauna Loa, a kahe aku i kai o Hilo, no na mile 7 wale no i koe, a hiki aku i ke kaona.

            Feb. 28, Hapai hou ia iwaena o ka Aha Kukakukamalu, no ke noi hou ana aku ia Amerika no ke Kuikahi Panailike.

            Aperila 2, Make o Kaliokalani he keikikane na Kapaakea a me Keohokalole.

            1853, Luku nui ia ko keia Paeaina e ka mai puupuu i kapaia ka hepera.

            Nov. 14, Ku mai ka mokuahi S. H. Wheeler mai Kapalakiko mai, a ua hooliloia i moku holo pili aina no keia Paeaina malalo o ka inoa o Akamai.

            Ku mai ka moku kalepa Ke Alii o na kai ma Honolulu nei.

            1854, Wawahiia ka papu o Lahaina ma ke kauoha a ke aupuni.

            Oct. 14, Hiki mai ka mokuahi Sea Bird, (oia o Kamehameha) no ka Ahahui Hooholo Mokuahi o Hawaii nei, a hooliloia no ka holo pili aina ana.

            Oct. 24, Ku mai ka mokuahi West Point (oia o Kalama) a hoolilo pu ia no ka holo pili aina ana.

            Dek. 15, Make o Kauikeaouli Kamehameha III, a lilo o Liholiho (oia o Kamehameha IV) i Moi.

            1855, Ian. 10. Hanau ke Keiki Alii William Pitt Leleiohoku na Kapaakea a me Keohokalole.

            Maraki 19. Hooikaika hou ia ka imi ana i ke Kuikahi Panailike me Amerika Huipuia no ka manawa elua, o Hen. W. L. Lee ke Komisina i hoounaia no ia hana. Iulai 20, kakau inoa ia k@ Kuikahi e Marey a me Lae, aole nae i hooiaioia.

            Make o Hikikoki makua o Molokai i ke 56 o kona mau makahiki.

            Iune 13, Make o Paki ma Honolulu, ke kahi alii kiekie o Hawaii nei.

            Iulai 7, Pau i ke ahi ka Hale Hoikeike o na hana hoolealea.

            Iulai 41, Waihoia ka pohaku kihi o ka Sailor's Home, oia ka Home o na luina ma Honolulu.

            Hoounaia ka palaea mua loa mai keia Paeaina aku he 463 mau barela.

            Aug. 11, Hu hou ka pele ma Mauna Loa, a kahe hou aku la ma ke ala e hiki ai i kai o Hilo me ka hooweliweli nui.

            1856, Feb. 5, Nahaha ka mokuahi Kalama ma Koloa, Kauai.

            Maraki, Pau ke kahe ana o ke a pele mai Mauna Loa mai. He elima wale no na mile i koe a hiki aku i kai o Hilo.

            Iune 2, Mare o Liholiho, Kamehameha IV  me Emma.

            Sept. 1, Weheia ka Home Luina ma Honolulu.

            1857 Wawahiia ka papu ma Honolulu, ma ke kauoha a ke aupuni.

            Make o Konia, wahine a Paki.

            Mei 28, Make o William L. Lee ka Lunakanawai Kiekie, i ke 36 o kona mau makahiki.

            Iulai 18, Make o Keoni Ana ke Kuhina Nui.

            Hookohuia o Victoria Kamamalu i Kuhina Nui.

            Holo o Limaikaika i Amerika Huipuia.

            Make o Adamu Kuakini ke Kiaaina o Hawaii.

            Make o Davida Malo makua, he kanaka naauao a he haku moolelo Hawaii kaulana.

            1858, Mei 20, Hanau Ka Haku o Hawaii.

            Mahi mua ia ka raiki e Kauka Poka ma Honolulu nei.

            Iulai 20, Lawe malu ia ke dala o Hale Dute kahiko.

            1859, Feb. Ilu hou ka pele o Mauna Loa a kahe aku la i kai o Wainanalii.

            Aperila 20, Make o Iona Piikoi i ke 50 o kona mau makahiki.

            Apr. 26, Waihoia ka pohaku kihi o ka hale o ka Ahahui Malu.

            Iulai, Hoopuka mua ia ke Kanawai Kivila.

            Sept. Hoomaka mua ia ke kukui ea aa (gas-light) ma Honolulu nei.

            Sept. 9, Make o William Pitt Kinau ma Kohala Hawaii i ka 17 o kona mau makahiki, na Leleiohoku mua me Ruta Keelikolani.        (Aole i pau.)

 

Ka Wati Nui Loua Ole.

            Aia ma Westminster Ladana Enelani keia wati nui. Ua kauia ia ma ka Hale Aha Olelo Aupuni. Ka bele i hookaiia'i na hora, oia ka bele nui i kapaia, Big Ben (Beni Biga.) Ua hanaia ka wati ma ka makahiki 1854.

            Ua hooheeheeia ka bele nui ma ka makahiki 1855.

            Penei ka nui o ka wati ; 22 kapuai kona ana waena ; 66 kapuai kona anapuni.

            Ua like ia me ka huila kaa aha? 175 kapuai ka loihi o ke kaula wili. Oia hoi keia, aia a wili a paa ke kaula iluna, a hoomaka e iho akahele na weta, (pauku kepau paha pauku hao paha,) iho liilii no a pau na kapua 175, alaila e wili houia.

            Elima no bele, ka bele nui, Big Ben, mawaena ma ka hale bele ; kona kaumaha, 13 tona me 11 haneri weta. Na bele uuku iho 4 tona ka mua, 1 tona 16 haneri weta ka lua ; 1 tona 10 haneri weta ke kolu, 1 tona ka ha. Eha haneri paona ka weta o ka hamare nana i hahau i ka bele hui, 800 paona ke kupono. Oia no ma kinohi, mahope iho, naha iki ka bele, a, nolaila hoemi ia na paona o ka hamare, (haku paha.)

            He luhi ka wili ana, (ke ki ana.) Ina wili ia ke kaula ma ka aoao kani kekona, 10 minute ka i lilo ilaila. Ina wili ia ke kaula ma ka aoao kani hora, 5 hora ka i  lilo ilaila. Ina wili ia ke kaula ma ka aoao kani hora, 5 hora ka i lilo ilaila, 5 hoi hora ke wili i ka hapa kani hapaha hora, 10 ka na hora i lilo ia mau wili elua. Elua hoi wili ana i ka hebedoma hookahi, 680 paona ke kaumaha o ka poka lewa (pendulum,) ka mea e lewa ana io ia e kani kekona ana. Elua kapuai ka loihi o na hua hora e kau ana ma ka maka o keia wati. Me keia anei ka wati nui e kau ana ma ka hale bele o Kawaiahao? Ina huiia na bele a pau ma Hawaii nei, mai Kau a Waioli, ua like anei ke kaumaha me ko keia bele nui o Big Ben?            HAWAII.

 

            Ua hiki mai nei ke kino make o Osemana Pasha ma Bukareseta mai no Moseko a e kanuia ana oia malaila.

MAIKAI KA HOI KA PAPA!

A ME

KA LAAU O KOU HALE!

NO HEA LA@

KAI NO HOI NO KAHI O

WAILA MA!

Nana aku no hoi ia la

Ohi ka lo o ka Laau o Makawao

I ka ua mea hoi o ka nani o

Na PAPA! Na PAPA!!

A ME

NA PONO KUKULU HALE

O NA ANO NO A PAU.

 

Aia ma ke kihi o na

ALANUI PAPU me MOIWAHINE!

HONOLULU

MALAILA E LOAA AI

E LIKE me ka MAKEMAKE

NO KE

KUMUKUAI MAKEPONO LOA!

 

PAPA, PAPA, PAPA,

Na Papa Huluhulu,

Na Papa Manoanoa,

Na Papa i kahiia,

Na Papa Kepa,

Papa Hole Keokeo,

Papa Hole Ulaula.

 

NA LAAU, NA LAAU!

Na Kua,

Na Kaola,

Na Aaho,

Na Molina,

Na Peapea,

Pine Huluhulu,

Pine i kahiia.

NA Papa a me na Laau Ulaula!

Pili ulaula,

Pili Keokeo,

Pani Puka,

            Pani Puka Aniani,

            Ipuka Aniani,

            Puka Olepelepe.

 

PENA O NA ANO A PAU!

Hulu Pena mai ka Liilii a ke Nui,

Aila Pena,

Aila Hoomaloo,

Waniti, Pate.

NA LAKO O KELA A ME KEIA ANO!
Na Ami Puka Hale.

Na Ami PUka Pa.

ANIANI!

Pepa Hale a me na Lihilihi

E LOAA NO MALAILA.

PAAKAI HELU 10 KAKAAKO me PUULOA

            No ke DALA KUIKE, e loaa no na mea a pau i haiia ae la, no ke Kumukuai Emi loa. O na kauoha a pau mai Hawaii a Niihau, e loaa'ku ana ia lakou, e hooko koke ia no ia me ka lawa pono.

E Kipa Nui  Ilaila, i ike i ka Oiaio

984 3m@