Ka Nupepa Kuokoa, Volume XVII, Number 7, 16 February 1878 — NA MEA HOU O NA PALI KOOLAU MOLOKAI. [ARTICLE]

NA MEA HOU O NA PALI KOOLAU MOLOKAI.

NO PELEKUNU. Ma ka po Sabati la 20 iho nei o keia mahina, ua pahola ae la kekahi kai hoee ikaika ma Pelekunu. Ua poino hookahi hale laau, a ua holopapa pu aku no hoi ke kai ma na aina kalo. NO WAILAU. Ma keia po hookahi no ua hoehu pu mai la no hoi ke kai i ko laila mau hale, a me na loi. Ua lawe aku la ke kai hookahi hale, aohe i ike hou ia kela hale a hiki i keia wa. O ka ona nona keia hale o Mr. Kahalekapu. O kekahi hale hoi me ka waapa ua hoonee ia aku iloko o ka loi, a ua nui no hoi ka poino ma na aina mahi kalo. NO HALAWA. Ua popoi mai ke kai me ka ikaika nui, a wawahi mai la i na pa pohaku o na hale. Ua kiola pu mai no hoi ke kai i kekahi mau laau nui, mai kahakai mai a hiki loa i kula nui, me he mea'la aole paha e mei malalo o ewalu kaulahao ka loihi mai kahakai mai a hiki i kahi a ke kai i hoi hou aku ai. ALBERT. P. PAKI. Lanikaula, Molokai, Jan, 26, 1878.