Ka Nupepa Kuokoa, Volume XVII, Number 8, 23 February 1878 — He Luakini Pilikia!! [ARTICLE]

He Luakini Pilikia!!

E ike auanei na makamaka maikai a pau e noho ana mai Moanalua a hiki i Maunalua, o ka Poaha mua o Mar. e hiki mai ana, oia ka la 7, e hoomakaukau ia ana he ahaaina nui ma Kamoiliili, a e paina ana i ka la i hoike ia ae la maluna. O ke kumu oia ahaaina, no ka hana hou ana i ka hemahema oia luakini, no ka mea, ua olepe ia ae e ka makani ino i hala aku nei. Nolaila, o ka poe i komo io ke aloha iloko no ia pekela, he pono ke naue ae malaila e paina ai, me na lau oliwa a ke aloha, ke paipai ia aku nei na makamaka oiaio e hele mai e kokua pu ia hana maikai, ina e paa ia pakaua o ke aupuni Hawaii nei, he pono loa ia, a o ka poe e hiki ole ana ilaila, e hoomanao iho e na hoa, e hele aku ana au a me J. P. K. Kaneihalau, he pono no e waiho mai ma ko maua mau lima, i na aole e waiho ae ma ka lima o ke kahu, e hele aku ana i waena o na hoahanau a me ko'u hoa i koho ia no ia hana, J. P. K. Kaneihalau. E aloha auanei oukou. J. K. Joseph. W. H. Nailipelapela. } Komite. KA PAPAA LA MA MAUI. - ma na lono i loaa mai ia makou he mea e ka maloo o na kula a me na mahina ai o Maui. Ua lohe mai makou ua aneane haalele ia ka mahiko o Ulupalakua no ka pau loa o ke ko i ka maloo; a ina e mau aku ka papaa la o ia wahi he weliweli ka poino e ukali mai ana mahope. Pela no ma kekahi mau apana o Hawaii. Ma Oahu nei, ke make wale nei na holoholona ma na kula no ka ai ole, a ke maloo aku nei na kaupapaloi, ke hoi aku nei na wai i kuahiwi, a ua anenane maloo loa kekahi mau kumu wia. Heaha la auanei ka hopena o keia?