Ka Nupepa Kuokoa, Volume XVII, Number 10, 9 March 1878 — Page 1

 

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XVII.  HELU 10. POAONO, MARAKI 9, 1878. NA HELU A PAU 849.

 

That will be Heaven for me.

Gospel Songs. P 24.

1

Aole no au la e ike e

Kuula me ka hora e kii ia mai.

Maopopo no nae o Iesu la me au,

A oia ka nani e no’u.

Cho. A oia ka nani e no’u-

Aoia ka nani e no’u-

Maopopo no nae o Iesu la me au,

A oia ka nani e no’u.

 

2

Aole no au la e ike e

Ke mele oluna e mele nei.

Maopopo no nae he mele no Iesu,

A oia ke mele lai no’u.

Cho. A oia ke mele lai no’u

A oia ke mele lai no’u

Maopopo no nae he mele no Iesu,

A oia ke mele lai no’u.

 

3

Aole no au la e ike e

Ke ano o kahi e noho ia.

Maopopo no nae malaila kuu Iesu,

A oia ka lani lai no’u.

Cho. A oia ka lani lai no’u-

A oia ka lani lai no’u-

Maopopo no nae malaila kuu Iesu,

A oia ka lani lai no’u.

 

4

E noho no au la me ke kiai,

Kiai i kuu Haku ke kahea mai

No ka pii ae i o e noho me Iesu,

A oia ka pono mau no’u.

Cho. A oia ka pono mau no’u-

A oia ka pono mau no’u-

No ka pii ae i o e noho me Iesu,

A oia ka pono mau no’u.

 

KA

NANEA EEHIA

O KA HIWAHIWA OPIO

ABEONA

KE KEIKI

ALII O KO KE AUPUNI TEROGINA,

KA MEA I

HANAUIA ME KA UMAUMA AHI

LAPALAPA O KA WIWO OLE,

KA WALI WAIPAHE

Nana i kaiki ka Puuwai Kupaa o ke

KAMA ALIIWAHINE

MARIADANE.

KA

OPUU PUNAHELE LUA OLE A KA

MOI MINOSA, O KE

AUPUNI KUPUA O KARETE.

 

MOKUNA 11-HELU 10.

UKALI aku la o Abeona ia lakou, a alakai ‘ku la lakou iaia nei i ka hale alii. O ka Moi i keia Manawa, ua hiki ole iaia ke noho malie, a e noke anna i ka walauu me ka leo nui i piha i ka inaina. Ua hoomakaukau oia i ka make no Abeona; o kona manao i hooholo ai, oia no ka hauhoa ia o Abeona i ke kaula a paa, a na kona lima ponoi no e lawe i ke ola me ka pahikaua. E holoholo ana oia io a ianei, a e a ana ke ahi o kona mau maka me ka wela inaina.

            Ike mai la ia i na koa i ka hele ana ako, a hoomaopopo mai la, o kona poe koa wale no, a aole hoi ke pio. Nui mai la kona leo i ke kahea ana mai, “E @ @hou e lawe mai i ke pio, a i hoi hou mai oukou me ka nele, alaila e make koke oukou a pau.”

            Hoomau aku la no nae lakou i ka hele ana imua, a no ia mea, piha loa ia’e la ka Moi me ka inaina, a holo mai la me ka manao e uhau mai i ke alii koa, aka, mamua o kona uhau ana’ku, aia hoi, ua lele aku la o Abeona imua, a pane aku la, “he oiaio anei ua oluolu i ka Moi e lawe i ke ola o ke kanaka e hooko ana i ke kauoha? Eia o Abeona imua ou, a ua makaukau e halawai me kou makemake ano.”

            Lele hope aku la ka Moi me ke kahaha, a haka pono mai la kona mau maka iaia nei, a i ka ike ana mai, uhau mai la ia me kana pahi me ka ikaika nui, aole nae i ko kona makemake, no ka mea, ua hemo ae la ka pahikaua a Abeona a ua pale ia’e la ka make, a lele mokaki aku la na apana o ka pahi a ka Moi ma o a maanei. “Ma o ka mana o na Lani, ua waiho wale kou kino me ke olohelohe, aka ke ae aku nei o Abeona e ola oe.” Wahi a ke koa opio.

            I keia Manawa, ua pioo ae la na mea a pau, a holo mai la na koa me ka makaukau e lawe koke ae i ko ia nei ola; ia Manawa koke i holo ae ai ka anapa o ka uila a lalapa iho la ke ahi maluna o ko ia nei poo, a nakulu nakolo hele ae la ka paapaaina leo nui o ka hekili ma na paia a puni o ka lewa. Naueue ae la na paia o ka pa alii, a haalulu na pou o ka hale, o ka Moi haule iho la oia ilalo me ka huna ana i kona mau maka i ka honua. Naholo aku la na koa ma o a maanei me ka pee ana, a haunaele ae la ke kulanakauhele no keia mea ano e.

            Na ka hekili i hoonaneue aku i na polohuku hao o na rumipaahao, a wehe hamama ia’e la ka ipuka o ka rumi i hoopaa ia’i o Mariadane, a holo mai la oia me ka makau nui a puliki mai la i na waewae o Abeona. O na hoa pio o Abeona, naholo mai la lakou mai ko lakou rumi paahao mai a hoopuni ae la i ko lakou haku me ka pihoihoi nui.

            “E hoopakele ae ia makou! E hoopakele ae ia makou;” wahi a Mariadane imua o Abeona me ka uwe waimaka ana.

            “Mai makau ia Abeona, aka, e makau i ka mana Lani, ka mea non aka inaina a kakou e hoomaopopo nei,” wahi a ke koa.

            No keia olelo a Abeona, lohe aku la na mea a pau, a haule iho la kela a me keia iluna o ko lakou mau kuli, a haawi o ka mea Mana Loa. O ka Moi pu kekahi i hui me kona mau koa a mihi no ko lakou mau hewa. Ano, e na makamaka, ke hoomaopopo nei kakou, ua lanakila ke koa Abeona meluna o na manao ino o ka Minosa a me kona lahui me ka hoouka kaua ole, a me ka eehia nui a kau ka weli maluna o ka aina holookoa.

            I ka pau ana o na hoomaikai, ku mai la ka Moi a me kona helehelena i piha me ka weliweli, kunu hoomaikai mai la iaia nei, huki ae la i kona kaei alii a haawi mai la ia Abeona, me ka pane ana mai me kona leo haalulu.:

            “Ano, i hoike no ko’u haawi pio ana aku ia’u iho a me ko’u pau malalo ou e ka elele o ka lanakila, ke haawi aku nei nu i keia kaei alii o ko’u aupuni.”

            “Aole i pio ke alii ia Abeona, aka, o kona mau manao kuhihewa, ua hookui ia e ka ikaika o ka pono o ka mea e ku aku nei imua ou, mamuli o na hoike ana o na ao o ka lewa i ka oiaio. A ano, ke hookuu aku nei au i kou noho’oa Moi e mau me ka hooni ole ia, me kou ae mua ana mai nae e maluhia ko’u kino a me ko’u mau hoa, a e pau ka luku ia ana o na makaainana o ko’u kupunakane.”

            O ka Abeona noi wale iho la no keia, a oia wale no kona makemake. Ua haalele aku oia i kona one hanau a me ka aina o kona kupuna e hele e hana i ka pono, a ua kokua mai na Lani iaia ma kana elele imi pomaikai. Ua ike ia kona ano a me kana mau hana, a me’he la, ua hanau mai no ke ola ia ia i mea nana e pepehi i keia kupua i noho lanakila no na makahiki loihi, a e hoopakele hoi i kona mau hoa kanaka, a e hoopau i na manao hopo o ka Moi.

            Maluna o ka hiona o ua Moi nei a me ka lahui, ua kau aku la ka manao weli nui no Abeona. Ua manao iho lakou no Abeona maoli ka mana, a nana hoi i kauoha aku i ka uila a me ka hekili a pahola ae maluna o ka aina; aka aia mahope mai o ia Manawa, ua hooholo iho la ka Moi a me na makaainana, malalo o ka hoohiki ana e malama maluhia ia lakou nei, a e hele lanakila, ia Manawa i hai aku ai o Abeona ia lakou, me ka hoakaka piha ana’ku, aole nona iho ka mana, aka, mai ka Lani mai, mamuli o ka aoao e kupaa ana mahope o ka pono a me ka oiaio. Ua hoolohe pono ia kana mau olelo, a ua moni ia me ka momona e ka Moi a me na mea a pau, a ua olelo ia ma na Buke moolelo o na la kahiko, ua lilo ka lahui o ka Moi Minosa i lahui makau i ke Akua, a me ka hoopiha i ka Manawa ma ka haipule, mahope iho o ke ao ana’ku a Abeona ia lakou. Nolaila, me he la, ua hiki ke kapaia keia keiki alii ma kekahi ano, he elele na ka “Lamaku!”

MOKUNA-III.

            E na makamaka, ua huli ae la na la o ka noho’na pioo ma na kaiaulu o ke aupuni o Minosa, a ua huli pu ke au o ke ano o ka noho ana o na kanaka. Ua lilo ae la o Abeona he mea nui imua o ko lakou mau maka, a he lei kalaunu malamalama hoi maloko o ko lakou naau.

            He mau la pokole wale no a ua maluhia hou kaaina mai na pioo ana a ke pukonakona i hoaleale ai, a nalo wale aku la. Ua like me he makani kona ikaika la e pulumi paukiki ana me na pakaua kaumaha ma kona mau sheu, i pane ia mai ma ke kukulu komohana, a pahola aku la me kona inaina nui maluna o ka papalina o ka aina hanau o keia oiwi, kahi hoi non aka inoa i kuluma ia, “O Kona kai ana iho o ka onohi malamalama i kona nani i ka mawehe ana’e o na poi ao kaalewa o ka lewa luna i ka lua o ka la; pela iho la ka hoohalike ana a ko oukou makamaka nei.

            Hala’e la keia mau mea a nalo aku la, aka, hookah nae mea i koe aole i nalo. Aia no ia ke hoolua’la i kahi moe o kekahi puuwai palupalu, ke hoolauwili ala ia loko me he makau la ua mau i ka iwihilo, e hoanaanau ana i na mapuna hoehaeha puuwai-oia-a-aloha wale. E ole hoi ke aloha he hua ohia memele no ka wekiu; he pua i poni ia e ke ala paoa nohenohea; he oiwi i hanau ia me ka onohi o ka nani maluna o kona mau hiohiona. Ua hiki-he mea maikai ke alo ha, -he ala-he mea momona-o kaua pu kai laila e ka iwapua rose Mariadane. Aole o oe wale kai make mahope o ka ui Abeona, aka, o Kahikina nei kahi, a ke iniki mai nei na hiohiona o na makamaka heluhelu ua kuluma pu no ka kakou a pau. O oe no nae ka mea i kuleana, oiai, o oe no ka pua mua nana i sila i ke aloha ma kona mau lehelehe, a he makahehi hoolaau wale aku no keia. Nau no, ua eh aka o loko, imi ia kahi e na ai, ka punawai puilani hoi e inu ai a ken aka ono-e maha’i ka maloo o ka puu.

            Ua makaukau na moku o ke Keiki Alii Abeona e huli hoi aku no kona home, a e haalele iho hoi i ka Moi Minosa a me kona lahui me na manao maikai a pau. Ua maopopo i na kanaka o ka aina keia mea, a ua minamina lakou me ke ake nui a me na kuko ana i ka po e hooloihi ia aku na la; e loihi ka hele ana mai o ka malamalama a me ka pouli o kela a me keia la, i loihi aku ai ko Abeona manawa e hoohanohano aku ai i ko lakou aina: aka, he mea kali ole ke au o ka Manawa, a he mea kahuli ole ka mea i hana ia mai kinohi mai a hiki i keia la; nolaila, ua lawe maikai mai la ka Manawa ia kakou a pau a loaa o Abeona ma e nanea ana maloko o na paia o ka hale alii nani o Minosa, i ka po mamua iho o kona haalele ana’ku ia aina malihini.

            I keia po mamua iho o ka haalele ana’ku o Abeona ia Minosa a kakou i kamailio ae la, ua haawi ia kekahi ahaaina hauoli nui maloko o ka hale alii e ka Moi, no ke aloha hope loa ia Abeona, a me ka haawi ana’ku iaia i ka hoike piha o na aloha a me ka hoohanohano ana. Ua wehe hamama i ana ipuka o ka hale alii, a ua ae i ana Lii a me na makaainana e kipa mai a e hui hauoli pu me ka opio alii. He mea hou keia i na makaainana, o ka ae ia o lakou e komo aku maloko o ka hale alii, oiai, mamua aku, he kapu loa ia wahi ia lakou, aka ua aui ke au o ka Manawa, a he au hou keia mamuli o Abeona, a he kumu nui ia a na makaainana i manao nui loa ai iaia.

            Ia po, mahope iho o ka hui aloha pu ana, a i ka Manawa hoi a ke anaina nui i komo aku ai iloko o na hora liilii o ka liula aumoe, a poina ia iho la na mea a pau o ka hauoli wale no ka mea e hoopiha ana i ka Manawa o kela a me keia, e ku ana o Abeona ma kekahi puka aniani, me kona aahu ahi o kona aupuni a ma na hiona a pau e haimalule ai ka puuwai o ka mea e ike aku ana iaia. Ua like me na hulu mamo lelo, pela kona mau papalina, a o kona hiona mai luna a lalo, ua nele ka lahui Hawaii i na huaolelo kupono no ka hoike ana’e. E kau ana ka meadala onohi daimana ma kona umauma, ka makana a ka Moi Minosa no kana mau hana maikai, a e anapa ana ka Lei Hoka hoailona alii o Terogina ma kona a-i.

            E huli ana kona mau onohi me ka nana makahehi ana i ka waiho mai o ka aina a me na puu hauliuli, me ka mohala o na pua nani o ke kihapai malalo o ka malamalama ui konane o ke aliiwahine o ka po. E makahehi ana i na mea i hoike ia mai imua o kona alo, a e ano haupu iki ae ana no kona aina hailau me na koni aloha; ia Manawa aia hoi, ua lele mai la kekahi wahi mea mai waho mai a pa maila ma kona papalina a haule iho la i ka papahele.

            Lele ino mai ka keia i hope me ka puiwa a nana iho la ilalo, a lalau iho la i ka mea e waiho ana i ka papahele. Nana iho la keia a hoomaopopo iho la; a e ka mea heluhelu, heaha la keia mea ia oe? E hai aku wau, o kaua wale no nae, mai punia loa ia oe e na kipona o ka hoohie, a hai wale aku ia hai. E ia no ia. He elele, he ukana na ke aloha. Ua ike iho la o Abeona he opuu rose ua wahi mea la i lele mai ai a pa keia, a i kona honi ana’e, he mea e ke onaona; no ka mea, ua hoope ia me ka wai o ka pua nona ke kulu onaona loa ma ia aina. Maluna o ua wahi elele la a ke aloha, e paa ana, he wahi apana pepa lilina, i pine ia a paa me ka pine gula. Wehe ae la o Abeona me ke kahaha, me ka pane ana iho. “Na wai ka elele o oe? e keia wahi opuu onaona o na hora liula o ka wehekaiao? He oiaio anei na ke kehau huihui oe i hoouna mai nei? A, he mea eheu ole ke aloha, aka, he mama no nae i ka lele!” Heluhelu iho la ia i na huaolelo i kakau ia maluna o ua wahi palapala nei i hoopeia me ke ala, a penei no ia:

            “E kuu Abeona.”-E ae mai ia’u e kapa aku ia oe o “kuu Abeona,” no ka mea, ke hilahila ole nei au i ka hai aku, ua lilo au nau. Ano, ke kali aku nei au ia oe malalo o ka malu o na pua rose ma ke kihi hikina o ka pa ana a ke noi aku nei au ano oe e hele mai ai, oiai, ke hoomaopopo iho nei au i ka nawaliwali o ko’u kino holookoa malalo o ke kaumaha o ka ukana luuluu o ke aloha ia oe. E hele mai i lohe ai oe i ka’u mau kameilio ana’ku a pau a ke hole oe i keia, alaila, aloha, aloha aloha mau loa, a n aka make e honi keia mau papalina. Owau no, me ka oiaio imua o ke ao holookoa.

MARIADANE.”

( Aole i pau. )

 

He Nuhou Hanohano mai Haiku mai a hiki i Wailuku.

            Aloha oe e ka Lunahooponopono o ka NUPEPA KUOKOA. He mau hebedoma liuliu wale i hala ae nei, ua hui ae la kekahi poe haole o na Waieha nei, e kukulu i Hai Uvea Olelo mai Haiku mai a hiki i Wailuku, ua lohe mai au elua mau kanaka maoli i lomo iloko o ia Hui hookah, oia hoi W. P. Kahale a me H. Kuihelani, eleu no hoi kea mau kanaka Hawaii, he mau haole na hea like, a ua paa pono loa ua hana la i keia wa, mai Haiku a hiki i ka malu Hekuawa o Wailuku. Malalo iho o ka hooponopono ana a C. H. Dickey, ka Peresidena oia hana ano nui. Ma ka la 21 o Feberuari i hala, mawaena o ka hora 9 a me ka hora 10 ka hoomaka ana o na huaolelo hanohano mai Haiku mai, penei ua mau huaolelo la.

HAIKU, FEB. 21, 1878.

I ke Alii ka Moi DAVID KALAKAUA.-

            SIR: : Ua paa pone ka uwea olelo mua mai Haiku a hiki aku i Wailuku, a ua makaukau i ka hoouna aku i na olelo. O keia ka palpala mua i hoounaia, ke lana nei ko makoumanao, aole keia o ka uwea hope, e ola loihi oe. Me ka mahalo.

            C. H. DICKEY..

            Peresidena o ka Hui Uwea.

            Nolaila, e na makamaka Hawaii a hiki i Lehua ua pau ka kakou olelo ana ma ka uwea ilelo i Amerika, eia ka i Hawaii nei, Kekali keia o na hua mua hanohano i loaa iloko oke Kuikahi Panailike, a ko kakou Lani iimi ai. Eia paha ka mea kupanaha loa, ualilo e keia hana ma ka pauku waena a koe aku ke poo a me ka hiu, ina hoi ha pela, o Maui ka oi; pela wale no o Maui ma nahana eleu a me ka holo imua. Eia hoi kea, o ka loihi mai Haiku a hiki i Wailuku, ia 15 mile ka loihi; ua hoomaka i aka wele ana o ka olelo mua iloko o ka Manawa ihaiia maluna iloko o ka minute hookah. Eia hoi keia, he emi lo aka lilo no ka hooli ana i ka manao maluna o ua uwea la, he lua keneta wale no, no ka huaolelo hookii, ua like me 12 keneta no eono huaolelo ina he 24 huaoleta ua like ia me 48 keneta pela aku; ua ma-u iho la ia wahi mea ou. Owau iho no me ke aloha.

J. HAOLE

Hiei Home, Wailuku, Mar. 1, 1878.

 

HE

20,000 LEGUE

MALALO O KE KAI.

NA MEA

KUPANAHA O KA MOANA

KE ALA O KA MEA HUNA!

Ao ka mea

POHIHIHI O KA 1866.

Mahele II – Mokuna XXI.

HALAWAI ME KAHI MOKU POWA.

IKA haalele ana o ka Nautilo mai ko makou makaikai ana i ka moku i holoaia pu ia me kona mau kanaka iloko o ka hohonu, a liuliu iki iho, lola ae la ka moku, alaila hoomanao ae la au ua lana ka makou i ka ilikai, alaila miki ae la au iluna o ka oneki, aia hoi e okukuu mai ana o’u mau hoa iluna, a haawi aku la au ia laua i ka huaolelo a ke aloha, “pehea olua?”

            Pane mai la o Nede Lana, “o ka i mai auanei kau a he pono, ua hele paha au a piha hoonaukiuki i ke Kapena o keia moku i ka lawe loa iwaho, aohe hookokoke iki aku i ka aina, i hiki ai ke holo aku, mai ka noho pio ana iluna o keia moku!

            A ke manao nei no au, e holo no kakou me ke kali ole no kekahi mea, oiai ua makaukau au no ka hookuu ana i ka waapa.

            A hamau aku la au me ka i ana aku, alia oe e hana pela, oiai, eia no ke Kapena ke nana pono nei i kekahi mea ana i ike ai. Aole i liuliu iho, kani ana ka pu. A nana pono aku la au i ke Kapena. @@

            A kahea aku la au, “e ke Kapena, heaha keia mea?” Aohe oia la pane mai.

            A pane mai la o Nede Lana, “he moku e ki poka mai ana. I ko’u nana ana aku ma ka ilikai, aia hoi, ike aku la au he mokuahi ua kokoke loa i ka Nautilo, he 6 mile paha ka mamao mai ia makou aku.

            A ninau hou aku la au ia Nede Lana, he moku aha la kela?

            Pane mai la o Nede Lana, “ma ka hoomaopopo ana i kona mau rigini a me ke kiekie o kona kia pokole, ua maopopo ia’u he moku kaua ia. A he makemake loa au e hele mai a kokoke loa ia kakou nei a ki poka mai i keia moku ino i poholo iho ai oia iloko o ke kai.”

            Pane mai la o Kosila, “heaha auanei kana wahi make e haawi mai ai maluna o ka Nautilo? Aole e hiki iaia ke hoouka kaua mai malalo o na ale o ka moana i na wa e emi ai ka Nautilo ilalo i kahi hiki olei ua moku kaua la ke uhai mai, a n aka Nautilo wale no ka make ma ia wahi.” A ninau aku la au ia Nede Lana, no ke aupuni hea la kela moku?

            Pane mai la o Nede Lana, “aole e hiki ia’u ke hai aku, oiai aole hae e maopopo ai kona aupuni.”

            A hala he hapaha hora o ko makou kiai ana me ka nana pono loa i ua moku nei, aia hoi, hoopii pono mai la oia imua o makou. A ma ka’u hoomaopopo iho, aole oia i ike mai ia makou mai ia wahi loihi mai, no ka mea, ua haahaa loa makou ilalo i ane like me ka ilikai.

            A i mai la o Nede Lana ia’u, “ina e kokoke mai ana kela moku io kakou nei i hookah paha mile ka mamao, alaila, o ko’u lehai no ia iloko o ke kai e au ai, a malia o ike ia mai, kii ia mai, alaila, o ko’u palekana no ia.”

            Aole au i ekemu aku ia Nede Lana, a hoomau aku la no au i ka nana ana i ka moku, ina he moku Amerika, Beritania, Farani a Rusia paha, alaila, he mea maopopo e kii ia mai ana no makou. Aka, o ka leo o ka pu kai nakolo ae iloko o ka lewa, a pa ana ka hope o ka Nautilo i i ka poka.

            A hooho ae la au me ka i ana, “Ke ki ia mei nei kakou i ka pu!”

            I mai la o Nede Lana, “ua ike ia mai la kakou he Laehaokela, nolaila ia e ki ia mai la i ka pu i make ai keia mea ino nui.”

            Kahaha! aole anei e hiki iaia ke manao ae he kanaka ko loko o keia wahi! i pane aku ai au. (Aole i pau.)

 

MAIKAI KA HOI KA PAPA!

A ME

KA LAAU O KOU HALE!

NO HEA LA?

KAI NO HOI NO KAHI O

WAILA MA!

Nana aku no hoi ia la

Ohi ka Io o ka Laau o Makawao

I ka ua mea hoi o ka nani o

Na PAPA! Na PAPA!!

A ME

NA PONO KUKULU HALE

O NA ANO NO A PAU.

 

Aia ma ke kihi o na

ALANUI PAPU me MOIWAHINE!

HONOLULU

MALAILA E LOAA AI

E LIKE me ka MAKEMAKE

NO KE

KUMUKUAI MAKEPONO LOA!

 

PAPA, PAPA, PAPA,

Na Papa Huluhulu,

Na Papa Manoanoa,

Na Papa i kahiia,

Na Papa Kepa,

Papa Hole Keokeo,

Papa Hole Ulaula.

 

NA LAAU, NA LAAU

Na Kua,

Na Kaola,

Na Aaho,

Na Molina,

Na Peapea,

Pine Huluhulu,

Pine i kahiia.

NA Papa a me na Laau Ulaula

Pili ulaula,

Pili Keokeo,

Pani Puka,

Pani Puka Aniani,

Ipuka Aniani,

Puka Olepelepe.

 

PENA O NA ANO A PAU!

Hulu Pena mai ka Liilii a ke Nui,

Aila Pena,

Aila Hoomaloo,

Waniti, Pate.

NA LAKO O KELA A ME KEIA ANO!

Na Ami Puka Hale.

Na Ami Puka Pa.

ANIANI!

Pepa Hale a me na Lihilihi

E LOAA NO MALAILA.

PAAKAI HELU I O KAKAAKO me PUULOA

            No ke DALA KUIKE, e loaa no na mea a pau i haiia ae la, no ke Kumukuai Emi loa. O na kauoha a pau mai Hawaii a Niihau, e loaa’ku ana ia lakou, e hooko koke ia no ia me ka lawa pono.

E Kipa Nui Ilaila, i ike i ka Olalo

654 3ms