Ka Nupepa Kuokoa, Volume XVII, Number 13, 30 March 1878 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XVII. HELU 13.} POAONO, MARAKI 30, 1878. {NA HELU A PAU 852.

 

Jesus Waits for Thee.

 

Colonial Singer, No., 4.

 

1

Hele ia Iesu,

Ke kali oia nou,

Ka mea auwana nei.

Hele ia Iesu.

2

Hele ia Iesu

I kala ia mai

Ka lawehala e,

Hele ia Iesu.

3

Hele ia Iesu,

He lama oia nou,

Ka mea luuluu e,

Hele ia Iesu.

4

Hele ia Iesu,

Ka mea makapo,

I ike paka e,

Hele ia Iesu.

5

Hele ia Iesu,

He malu oia nou,

A @alu maikai e,

Hele ia Iesu.

6

Hele ia Iesu,

A nana e kai ae

I kela home mau,

Hele ia Iesu.

 

HAWAII

 

KA

NANEA EEHIA

O KA HIWAHIWA OPIO

BABELA

KA MAMO MAKAHIAPO O NA

@UHAKA ALII NANI

ABEONA A ME MARIADANE,

KA WIWO LUA OLE NANA I KAILI

HAAHEO KA HULU MAMO GULA LELOLELO

MAKAMAE O KA IU O

GOMOHERA:

--KA—

OPUU ROSELANI OPIO I AHAI MAKAHEHI

IA MALUNA O NA KUAHIWI, MAWAENA

O NA AWAWA, MALALO O NA 'LAU

LAAU, A HOEA I NA WAOKUA,

EKE KUPUA O KA WAO

ALINOE-LUSIANA:

O KE KUKULU HIKINA LOA

O KA ILIHONUA NEI.

MOKUNA 1.---HELU 1.

 

@NA makamaka, ua hahai mai nei kakou ia Abeona a hiki i kona wa i nohoalii ai maluna o na lahui okoa ekolu, a me kona hoohui ia ana me Mariadine a me kona hoopau ana i kona hele ana na o a maanei e paio ai.  Ano, e hoomaka aku kakou e ukali mahope o kana mamo, ka makahiapo hoi o ko laua mau puhaka alii, oia o Babela.

            He mau makahiki pokole wale no mahope iho o ka hoohui ia ana o na ahi opio, aia hoi ua ulu ae la he mau opuu aaui, a ua hoohauoli nui ia na makaainana a puni na aiua.  Aole no nae i liuliu loa ia hauoli ana, aia hoi, ua kau mai la ke kaumaha kanikau maluna o ka aina a puoi.  No ka mea, i kekahi la maikai, ua lawe ia aku la na keiki a na ahi ana na kapa o kekahi muliwai no ka auau ana, ma kahi e kokoke ana i kekahi waonahele, a iloko o ka manawa a na kahu kiai a me na keiki e hauoli ana i ka auau, aia hoi, ua nalowale koke iho la o Babela a pau ka ike ia ana.  Ua noke ia i ka huli ma na wahi a pau e kokoke mai ana, aka, ua nalo loa, me ka loaa ole a lohe ole ia.

            I ka lohe ana o ka Moi a me kana wahine i keia mea, aia hoi, ua kuapupule iho la laua, a pela pu hoi me ka lahui.  Ua huliamahi na 'lii a me na makaainana e imi a puni ka aina, e pii ana ma na k@ahiwi a iho ma na awawa, e hele ana i ke ao a e hoomaha ole ana i ka po, aka, he mea kamahao loa, aole loa i loaa iki ke keiki ahi opio.

 

            I keia manawa a kakou e kamailio nei oia no ka piha ana o ko Babela mau makahiki elima, a o ka hoomaka ana hoi o kona mau ano e hoike ia imua o ka lehulehu.  Ua ulu malie ae kona kino me na helehelena a me ka oiwi kino i kulike loa me kona makuakane, a me he la, o ka puuwai koa, ua oi pakele loa ma ka hui ia ana ae o ke koa o ka makuakane a me ka waipahe o ka makuahine.  Ua lawe ia oia e na alii a me na makaainana i punahele a i hooilina no ko lakou hopena, a ua kuni paa ia ko lakou aloha nona, nolaila, mamuli o keia uha kaumaha, ua haulehia ko lakou mau manaolana, pau ka manao ana no na pono o ke ola ana, a hookuu aku la lakou ia lakou iho e hoonaauauwa ia ma ke kanikau kumakena ana a puni ka aina.  Ua nalowale loa ke alii opio a hiki i ka wa o kona mau makua i hapauea ai, a iloko oia manawa, ua hoopuni ia mai la ka aina e na koa o ke alii powa Kilae, a haulehia iho la ke aupuni o ka Moi Abeona malalo o kona mana, a holo aku la oia a me ke koena kakaikahi o kona mau makaainana iloko o na ululaau, a hoolilo iho la i na waonahele i home no lakou.

            Ano, e waiho kakou ia Abeona ma mahope me ke aloha nui, a e huli ae kakou no Babela.  Aia maloko o ka waoakua mamao loa o na kuahiwi o ke kukulu hikina, (ua oleloia aia malalo koke o kahi a ka la e puka mai ai) e noho ana kekahi kupua kupanaha, o Alinoe-Lusiana kona inoa.

            O keia Ahnoe, he oiwi hapa kino kanaka kona i like ole ka lua no ka nani a puni ka aina, a he mau helehelena hoi e hiki ole ai ke hoohalike ia me kekahi no ka ui molale waipahe.  Ua hele iho ke kino kanaka maoli a hiki i ka puhaka hoi ae, a he kino aku o kela holoholona hihiu kaulana o na aina e he Zebera (Zebra.)  He kanaka i piha i ka ike a me ka naauao, he puuwai aloha me ka oluolu.  O kona hale noho, oia no ke ana nui i hoonani ia me na nani a pau malalo o na kuahiwi, a aole loa mea hookahi i kau ia ka hanohano o ke komo ana aku malalo o kona malu.  Aole loa i ike ia a lohe ia kona hana ino ana i kekahi kino kanaka, a he kakaikahi loa kona ike ia e na maka o kanaka.  He mau pu-a holoholona kana e hele ana ma na kula mamao, a me na manu ai o kela a me keia ano, a ua lilo oia he Moi no na kuahiwi o ka hikina loa.

            I ka la o na mamo alii e auau ana, aia hoi, e kaalo ae ana oia malalo o ka malu o na lau laau, a haule mai la ka ike o kona mau maka maluna o ke keiki alii opio Babela, nona na makahiki kakaikahi elima wale no.  Holo puni ia ae la kona kino a nohoalii ia iho la e ka makahehi nui loa, a no ka hiki ole ke kaohi iho, ua aihue aku la ia i kana mea i makahehi ai a nalo loa aku la.  O ka nalo ana ia o Babela mai kona mau makua mai, i aihue ia e ke kupua Alinoe-Lusiana o ka hikina.

            Ua uwe no o Babela no keia mea ano e, aka, ua kamailio aku la nae ke kupua me ka leo nahenahe a me na huaolelo palupalu loa, a e like me ke ano mau o na keiki liilii, ua nalowale koke ae la kona makau, a hauoli ae la me ka lealea o ka naau.  Lawe loa ia aku la o Babela i ka home kuahiwi o ke kupua, a i kona hiki ana ilaila, ua paulehia loa ia aku la kona naau i ka nani o na mea a pau, ka nui o keia a me keia ano o na mea momona a me na mea ai ono, a me ka lehulehu o na mea hoohauoli.  Pela ke kupua i hoowalewale liilii ai iaia, e hoolilo ana iaia iho i makuakane a makuahine aloha no ke keiki ma na hana maikai a aloha; a aole no i liuliu loa, pau loa ae la na manao o ke keiki i kona mau makua ponoi, a lilo loa iho la ke kupua i mea nui iaia, me he la o kona makua ponoi.

            Pela laua i noho ai me ke kokoolua, me ka hoolilo ana o Alino @ i ka hapa nui o kona manawa ma ka haawi ana i kona ike a pau ma ka naauao a me ke kaua no kana keiki; a hala hope aku la na la opio, a kokolo malie mai la na la kanaka makua maluna o ke alii opio me na eheu o ka nani a pau, a me ka hiona koa a pau i like loa me ke kulana o kona makuakane Abeona i hoonele ia me ke keiki.  I kona hehi ana i na anuu o ke alahele kanaka makua, ua piha a ua lawa loa oia me ka makaukau ma na mea a pau a kona makua kupua i ao mai ai iaia.  No ka mea, o ka ike a pau, a me ke aloha a pau o ua kupua nei, ua kau mai la oia maluna o na hokua o kana keiki hanai, a ua hauoli mau ia e hana i na mea e hoohauoli ai i ka manao o ke alii opio.

            O kona akamai ma ka hookani ana i na mea kani, ua hoike ia ka wali mahie @a ka ukali ana mai o na manu o ka ululaau iaia i na manawa o pau ana e hookani ai i ka ohe, ka lira, a me na ano mea kani e ae a pau.  O kona makaukau ma na mea pili i ka mokomoko o ke kahua kaua, ua oi pakela aku mamua o kona makua ponoi, a ua olelo ia, o kana pahikaua ka mea nana i mohelehele ka ilihonua a loaa ai na mokupuni liilii a puni na moana kai hohonu.

            I keia manawa o na la kanaka makua o ke alii opio, aia hoi, i kekahi po lailai maikai, maluna o kona wahi moe maluhia o ka waoakua, ua hoike ia mai la imua ona ma ka hihio moeuhane, kona moolelo piha; mai kona aihue ia ana, ka noho ana o kona mau makua, a me na mea a pau e pili ana iaia iho a m@ kona mau pilikoko ponoi.  I ka omaka ana ae o ka pawa o ke ao e wehe ae i kona aahu aiai, a hoomaka ae la ka onohi la e pii a haalele iho i na ululaau a me na puu hauliuli iloko o ko lakou aahu kapa uliuli malalo, ua ala ae la ke alii opio, a e hoomanao ana i na mea i hoike ia mai imua o kona mau hoomaopopo ana ia po iho.  Hahai aku la ia ia na mea a pau imua o kona makua kupua, me ke ano pihoihoi a ulia me na manao ano e.  Hoolohe mai la kona makua kapua iaia a hiki i ka pau ana o kan@ moolelo, a pane mai la:

            "Ae, e kuu lei makamae.  Ua kali ae nei au no keia mau la i hala ae, no ka hoike ia mai o kena hihio imua ou a ano ke hoomaopopo nei au, ua hoea mai ua mea la.  O ka oiaio kena au i hai mai la, no na mea a pau e pili ana i kou moolelo."

            Ua hiki ole i ke keiki alii ke hoomaopopo iaia iho no ka oiaio a me ka ole o keia mea imua ona.  He mea hiki ole iaia ke ae koke aku, aole io ka oia kona makua; no ka mea, ua malama pono oia iaia iloko o ka maluhia no na makahiki loihi, mai kona mau la akahi no a hoomaka ae e noonoo a hiki wale mai i keia ua, a oia wale no kana makua i ike, a ua kuni paa ia ke aloha iloko o kona puuwai nona.  Noonoo iho la ia iloko iho ona; "he oiaio anei he mea e ko'u makua?  He oiaio anei aole au o kana keiki oiaio iloko o ke aloha a ke Akua i haawi mai ai ia maua?  Pela io paha, aka pehea la e hiki ai ia'u ke manaoio pela, oiai ua ao ia au e aloha iaia ma ke ano he makua oiaio no'u a ua paa ia mea iloko o'u."

            Aka, ua hoakaka piha mai la ke kupua iaia i oa mea a pau me ka hooiaio ana, a i kona lohe ana no ka lilo ana o @a nohoahi o kona makuakane ia hai, a me ka hopena kaumaha o kona mau makua, ua ulu ae la ka inaina iloko ona, a kokolo mai la na koni ana o ka manao koa o kona makua iloko o kona puuwai, a lawe ae la i ka hoohiki paa, e imi aku ana oia a hiki i ka wa ana e hookahulihia ai i ka powa nana i hana ino kona mau makua, a e hoihoi hou ia laua a noho i ke kahua mua, ko laua kuleana ponoi hjoi i imi ia ai ma ka hou o ka lae a me ka inu i ke koko.

            No keia mau kumu, ua hoopiha mau ia ka naau o ke keiki alii me ke kuko ano e i ke ao a me ka po.  I kona manawa e hele ai ma na kala no ke kiai ana i ka laua mau pu-a hipa a me na holoholona e ae, e noonoo mau ana ia me ka imi ana i wahi e hiki ai iaia ke hooholo iloko iho ona no ka hele ana aku e paio a lanakila maluna o ka enemi o kona mau makua.  I ka wa e pili ai kona mau lihilihi no ka hooluolu ana i ka po, e loaa mau ana ia i na hihio ano e, e pili ana i keia mau mea, a na ia mau kumu ihoa loa i ka wela o kona umauma e hooko i kana mau mea i kuko ai.

            I kekahi la, mahope iho o ko laua paina ahiahi, pane aku la ia i kona makua.  "E kuu makua—ua hooholo iho nei au e noi aku ia oe e ae mai ia'u e hele aku e paio me ka opu ino a lima pakaha wale hoi o ke kanaka nana i hoomainoino i ko'u mau makua.  A oiai hoi ua manao paha laua ua make au, noiaila, he mea pono ia'u e hoike aku, aole au i make, aka, ke oia nei no, a e o@ aku ana ma keia hope no ke kokua ana la laua iloko o na la hina o ko laua mau lauoho, a nawaliwali hoi o na ami."

            Ua kaumaha ke kupua no keia noi a ke keiki, aka, ua hooholo mua no nae ia i kona manao; a pane mai la:

            "E kuu keiki—ke ae aku nei au i kau no, me ke keakea ole aku.   Ua aihue au ia oe mai kou mau makua mai, no ko'u ike maa ana i keia mau mea i hoea mai  Ua ike au e haulehia ana kou mau makua, a ua kauoha ia au e na mana ike mua e a@hue ia oe, i loaa ai ko laua koo, ka mea hoi nana e hoonaueue ka papahele o ka honua, a kau ka weli o na enemi a pau ma na kihi eha o ka aina.  Nolaila, ke ae aku nei au e hele oe; aka, e hele nae oe o oe wale no.  Aole e hiki ia'u ke ukali aku mahope ou no ka mea, ua lawe au i ka hoohiki paa, e hookuu aku ia oe e hele hookahi paa, e hookuu aku ia oe e hele hookahi, i loaa ai ka lanakila ma ou hookahi la; a hooiaio mai na kanaka a pau i kou ikaika, kou koa, a me kou manaolana mamuli o ka'u mau ao ana a me na kuhikuhi ana.  O ka'u kokua wale no ia oe, oia no ke noi mau ana aku i ke kiai maluhia ana mai a ka mana lani ma kau huakai, a me ka haawi ana mai i na kokua a pau oiai oe e ola ana.  A i kau io mai ka lanakila maluna o kou mau hokua, e hoomanao mau iho oe i kou makua kino kupanaha nei, ka mea nana oe i aihue, aole no ka manao ino, aka, no ka makee a no ka pomaikai ou iho, kou mau makua, a me na makaainana i aloha ia laua, ka poe kupa  hoi no lakou ka aiaa."

            Ua kaumaha ke keiki alii no na olelo aloha a kona makua, a ua uwe laua me ke aloha oiaio mawaena o kahi a me kahi.  Ua hoohiki paa laua aole loa e poina kahi i kahi, @ e pule mau no ko laua pomaikai a hui hou.

            I ka wehe kai ao o kekahi la ae, haalele @ la o Babela i kona home ana i nono aloha ai mai na la uuku makalii mai a hiki i ke kanaka makua ana, me ka naau i piha mokumokuahua i ke aloha.  E hele ana kona mau kapuai wawae imua, aka o kona mau maka a me ka manao aia no ihope.  Ma kona kua, e kau kikepa ana kana kakaka me na pua maka wini kona makua kupua i haawi mai ai, a e uhi ana maluna o kona hokua ke kapa ili hulu o ka holoholona hihiu Leopadi o ka wa@nahele.  O kona mau kamaa, he ili Kanagaro, a o kona papale, ua hanaia mai ka ili mai o na laau.  O kona mau nanaina a pau, ua nani a kamahao, e hoike mai ana ma ka pulelo ana o na owili lauoho loloa ma kona mau poohiwi, he keiki oia no ke kuahiwi.

            Hele aku la keia a hala mai la na puu, a huna ia ae la kona home e na ohu ao o ke kuahiwi iloko o na kahiko kamahao a ano e.  A komo aku la keia iloko o ka ululaau ma kekahi aoao o ke kuahiwi.  E kahe ana kekahi kahawai nui a hohonu me ka ikaika o ka wai, e lawe ana i na lau a me na pua maluna o na aleale wai me ka mama loa.  No ka ikaika loa o ka wai, me ka owe leo nui ana a wawalo ka ululaau holookoa, ua manao iho la keia he mea pono e kali a maha ka ikaika o ka wai, alaila hoao aku e kau ma kela aoao o ke kahawai.  Noho iho la ia ilalo malalo o ka malumalu o na lau o ke kumu laau nui e ku kokoke ana ma kae o ke kahawai, me ka hoomanao ana ae ia hope me ke aloha.  Oiai keia e nanea ana, me ka hohai i ke kani hoolailai ana me ka honehone o ka leo o na manu inu wai pua wekiu, aia hoi, ua hoohikilele ia ae la ke ana iliwai like o kona puuwai i ka lohe ana aku i kekahi leo i ka pa-e ana mai.

            "Ahoha ino keia keiki.  He makau wale oia, a ua nele loa i kahi manao koa a me ka noonoo, oiai, ua hiki ole iaia ke kau ma kela aoao o keia wahi auwai uuku, a i ole he makau paha o pulu kona kino a hehee."

            Huli hikiwawe ae la keia me ke kahaha nui i kahi a ka leo i pa-e mai ai, a hikilele ae la i ka ike ana aku i kekahi luahine e ku mai ana.  Ua hele a weluwelu kona aahu, lepo kona kino, a ku i ka hoowahawaha kona ano a pau.  E paa ana oia he kookoo ma kekahi lima, a ma kekahi, he hua Pomegerane o ke kuahiwi.  O kona ano, he kupaianaha, a o na hiona i kau mai maluna o ke alii opio, he eehia ano weli a mao koke ae la no nae.

            Hake pono aku la na maka o ke keiki alii me ka hulili, e nalu ana iloko iho ona i ke ano o keia hiena, a me kana huakai.  Ike aku la keia i ka aa anapanapa o na onohi maka o ka luahine, a me ka oni o kona umauma, i like me he @g@ kumulau la i wela me ka inaina no ke komohewa ia aku o kona home waonahele.  He oiaio, aole no paha mea e ole ai ka lia o ka ili i ka ike ana aku i kekahi mea o keia ano iwaena o ka ululaau wa@kua mehameha Ioa.

(Aole i pau.)

 

HE 20,000 legue

 

MALALO O KE KAI.

 

-- NA MEA –

 

KUPANAHA O KA MOANA

 

KE ALA O KA MEA HUNA!

 

-- A o ka mea –

 

POHIHIHI O KA 1866.

 

Mahele II---Mokuna XXIII.

 

KA HOOPENA.

 

PELA iho la i pau ai keia holo moana ana malalo o ke kai.  E ninau mai ana paha ka mea heluhelu i ka holo ana o ka waapa ma ia po—ka holo ana o ka waapa i ka mimilo o hope o ka Nautilo, i ko Nede Lana, ko Kosila a me ko'u puka ana mai ke Kaikuono aku—aole hiki ia'u ke hoakaka.

            Aka, i kuu pohala ana ae mai kuu poniuniu i kuia ai kuu poo, aia hoi ua pae makou i kula, a aia au iloko o ka papai hale o kekahi kanaka lawaia kahi i moe ai, ma ka mokupuni o Lofodona (Loffonden Isle).  O kuu mau hoa hoi, ua palekana no laua, a e paa ana i kuu lima.  A apo aku apo mai makou ia makou iho me ke aloha olioli no ko makou pakele ana mailoko mai o na ino o ka moana.

            Ma ia manawa, aole e hiki ia makou ke manao e hiki koke ana i Farani, oiai he kakaikahi ka hiki mai o ka moku e holo ana mai ka aoao akau o Norewai a i ka hema, a o ka mea pono wale no, o ke kali i ka mokuahi holo malama mai Lae Akau mai.

            I ka noho ana ma Lofodona, ua hookipu maikai ia makou, me ka oluolu e ka poe kamaaina kaulana o ka aina.  No keia mea, ua pakui hou au i neia mau hana lokomaikai a na kumaaina, iloko o ka'u moolelo o ke kaapuni honua malalo o ka papaku o ka moana.  Aole kekahi mea i ike ia he oiaio, i kakau ole ia e a'u a e lilo ia i mea e pomaikai nui ai ke kanaka, a mailoko ae oia pomaikai, e loaa auanei he alanui i ka la hookahi.

            E manaoio ia ana anei au?  Aole au i ike.  Aka, o ka'u mea e hooia aku nei, oia no ko'u ike ana i na kai, na holo ana malalo i na malama he umi, a hala hoi ia'u he 20,000 legue ma ka kaapuni honua ana malalo o ke kai, a ma ia huakai i ike ia ai na mea kupaianaha he nui wale o loko o ka moana.

            E ninau mai ana paha ka mea heluhelu, pehea aku la ka Nautilo?  Ua pakele anei ia mai ka wiliau o ka mimilo nui.  A ke ola la no anei o Kapena Nimo.  Ke hoomau la ao anei oia i ka holo ana malako o ka moana?  A ua hiki paha oia i ka mimilo o Norewai?

            Hiki anei i na ale iloko o ka la hookaki ke lawe aku i kona moolelo a halawai me ia?  E poina ana auei au i ka inoa o keia kanaka?  Aole anei e hiki i ka moku i hoopiholo ia ai ke hai mai o Kapena Nimo ka mea nana i hoopiholo, ke hoohuoiia e kona aupuni?

            Ke manao nei au pela no.  A ke manao nei no hoi au, ua lanakila no kona moku ikaika maluna o na kai a me kona mau kaikuono weliweli, kahi hoi i pau ai na moku he lehulehu i ka make!  Ina aia no o Kapena Nimo ke noho la no iloko o ke kai me ke ola, alaila, e pau ana ko ka moana i ka enemi iaia, no ka mea, he kanaka naau aloha ole oia i ka mea e hoea ana imua o kona alo!  A e pau ana na mea kupaianaha o ka moana i ka hokai ia a nalowale e keia kanaka!  Pono e nalo keia kanaka, a e mau aku ka mea kakau moolelo o na mea o ke kai me ka maluhia!  Ua hoomaopopo lea au i kona mau ano iloko o na mahina he umi o ka noho pu ana me ia.

            A ke hoomanao nei au i ka ninau a Kekahuna iloko o 3,000 makahiki i hala aku nei,penei:

            "O ka mea ma kahi loihi a me kahi hohonu, owai ka mea e loaa ai?"  Elua wale no mau kanaka o na kanaka a pau e ola nei, e hiki ke hai i ka haina,

KAPANA NIMO &

M. ARONAKA.

 

            E na tausani poe heluhelu o ke KUOKOA, ke hookuu aku nei au i ka'u peni mai ka eku ana mahope o ka kakou moolelo o na mea pohihihi o ka papaku o ka hohonu, a ke noi nei au i ko oukou ahonui e kaana no oukou iho, oiai ua hiki mai kakou i kona hopena, a pela ia i kuu aku la ma kona ala me ka pau ole o na manao hoohihi nona; aka, he wa ko na mea a pau, a e noho kakou me ka makaala a me ka.       MAKAUKAU.

 

MAIKAI KA HOI KA PAPA!

 

-- A ME—

 

KALAAU O KOU HALE!

 

NO HEA LA@

 

KAI NO HOI NO KAHI O

 

WAILA MA!

 Nana aku no hoi ia la

            Ohi ka lo o ka Laau o Makawao

                        I ka ua mea hoi o ka nani o

 

Na PAPA!  Na PAPA!!

 

--A ME—

 

NA PONO KUKULU HALE

 

O NA ANO NO A PAU.

 

Aia ma ke kihi o na

 

ALANUI PAPU me MOIWAHINE!

 

HONOLULU

 

MALAILA E LOAA AI

 

E LIKE me ka MAKEMAKE

 

--NO KE—

 

KUMUKUAI MAKEPONO LOA!

 

PAPA, PAPA, PAPA,

 

            Na Papa Huluhulu,

                        Na papa Manoanoa,

                                    Na Papa i kahiia,

                                                Na Papa Kepa

                        Papa Hole Keokeo,

            Papa Hele Ulaula.

 

NA LAAU, NA LAAU!

 

Na Kua,

            Na Kaola,

                        Na Aaho,

                                    Na Molina,

                                                Na Peapea,

Pine Huluhulu,

                        Pini i kahiia.

 

NA Papa a me na Laau Ulaula!

 

            Pili ulaula,

            Pili Keokeo,

            Pani Puka,

                        Puni Puka Aniani,

                        Ipuka Aniani,

                        Puka Olepelepe.

 

PENA O NA ANO A PAU!

 

Hulu Pena mai ka Liilii a ke Nui,

            Aila Pena,

                        Aila Hoomaloo,

                                    Waniti, Pate.

 

NA LAKO O KELA A ME KEIA ANO!

 

            Na Ami Puka Hale,

                                    Na Ami Puka Pa.

 

ANIANI!

 

Pepa Hale a me na Lihilihi

 

E LOAA NO MALAILA.

 

PAAKAI HELU I O KAKAAKO me PUULOA

 

            No ke DALA KUKE, e loaa no na mea a pau i haiia ae la, no ke Kumukuai Emi loa.  O na kauoha a pau mai Hawaii a Niihau, e loaa'ku ana ia lakou, e hooko koke ia no ia me ka lawa pono.

            E Kipa Nui Ileila, i ike i ka Oiaio

@