Ka Nupepa Kuokoa, Volume XVII, Number 19, 11 May 1878 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

 

Nupepa Kuokoa:

KE KILOHANA POOKELA NO KA LAHUI HAWAII

 

BUKE XVII. HELU 19.}   POAONO, MEI 11, 1878.  {NA HELU A PAU 858.

 

KA NUPEPA

Kuokoa me ke Au Okoa

1 HUIIA.

NA OLELO HOOLAHA: - O na Olelo Hoolaha he 10 laina kakau lima, he Hookahi Dala no ka puka mua ana; elua puka ana, he $1.50; no hookahi mahina, he $2.00.

NA KANIKAU A ME NA MELE: - He 4 Keneta ka uku no ka lalani hookahi, ua like me $1.00 no 25 lalani.

            HOOLAHA MAU: - E hoomanao na makamaka a e hookomo mai i na olelo hoolaha mamua ae o ke awakea Poaha, i ole e kaukai ia aku a kekahi pule ae.

            E hoomanao e na lehulehu, aole e hoopukaia kekahi Olelo Hoolaha, Kanikau a me ke Mele, ke ole e hookaa mua ia mai ka uku.

 

 

KA

NANEA EEHIA

O KA HIWAHIWA OPIO

BABELA

KA MAMO MAKAHIAPO O NA

PUHAKA ALII NANI

ABEONA A ME MARIADANE,

KA WIWO LUA OLE NANA I KAILI

HAAHEO KA HULU MAMO GULA LELOLELO

MAKAMAE O KA IU O
GOMOHERA:

- KA -

OPUU ROSELANI OPIO I AHAI MA@

IA MALUNA O NA KUAHIWI, MAWAENA

O NA AWAWA, MALALO O NA LAU

LAAU. A HOEA I NA WAOAKUA,

E KE KUPUA O KA WAO

ALINOE-LUSIANA:

O KE KUKULU HIKINA LOA

O KA ILIHONUA NEI.

 

MOKUNA 1 ---- HELU 3.

 

I KA hala ana aku o keia leo kanaka hanehane i hoea ano e mai, e kau hou mai la na lia ano e maluna oia nei, o ka manawa no ia i hoi hou mai ai ka mana o ka luahine, a komo ae la maloko o ko ia nei mau aa. Na ia mana i alakai hou i ko ia nei noonoo, a ku ae la o Babela iluna a hele aku la, me ka maopopo iaia o kana mau ha@a e hana aku ai, a me kahi e loaa o Agasa, ke kanaka kukulu moku a ka laau kamailio i kauoha mai ai iaia e hele aku.

            Hele aku la no nae keia a i ka iho ana ma kekahi aoao o na kuahiwi, komo ana keia iloko o kekahi kulanakauhale. Lawe pololei aku la kona mau wawae iaia a hoea ana imua Agasa, ke kanaka kamana. Kahaha mai la na kanaka i ko ia nei ano aahu, a maholo i ka ui a me ka nani o ke kulana. I ka hiki ana imua o ua Agasa nei, pane aku la keia.

            "I hele mai nei au e kauoha aku ia oe, e kukulu emoole oe i moku no'u me na hoe he kanalima."

            "Kahaha!" wahi a Agasa. "He oiaio ua hiki mua mai kau elele io'u nei, a ua hai mai e hiki mai ana he alii opio, ka Moi nui o keia mua aku, a e kauoha mai ana e hanaia i moku nona me na hoe he kanalima. No keia mea, ua hoomaka au i ka hana, a he mau la pokole wale no koe, e paa ana."

             E hoomanao kakou e na makamaka, o keia elele i hiki mua io Agasa la, aole no ia he mea e, aka, o ka mana o ka luahine. No ka ia nei mau hana aloha ana ia ia, ua ukali mau mai la kona mana mahope oia nei.

            He mau la wale no nae ko ia nei kali ana, ua paa ae la ka moku, a i ka makaukau ana o na mea a pau, aia hoi, ua kauoha hou mai la no ka mana o ka lua@ @ia nei e hele hou aku imua o ke @ laau kamailio. No keia mea, ua @ no keia, a ua hele aku la a hiki @ imua o ua kumu laau kamailio nei. @ keia e ku ana, pane ka leo mai@ mai o kekahi lala mamua pono oia @

            "E uhai ae ia'u, a e lawe aku a koli i ku no ka ihu o kou moku."

            I ko ia nei lohe ana i keia mau huaolelo, o kona lalau aku la no ia a uhai ae la i ua lala nei. Lawe aku la a ia Agasa, kauoha aku la e hana e like me ka mea i oleloia. I ka hana ana o Agasa, ua kahaha loa iho la ia, no ka mea, me he la kekahi mana okoa i alakai kona mau lima, a i ka paa ana o ua kii nei, hoomaopopo iho la ia, he kii wahine opio ui loa ka. Aole loa i hiki iaia ke kaha i na kii nani o keia ano mamua aku. E paa ana ua wahine nei ma kona lima akau he palekaua, a e kuhi ana ka lima imua me he la e olelo ae ana e hele imua. O na maka he olu, a o kona mau lehelehe me he la e mawehe ae ana no ka pane mai. A ina aole i ike ia he kii, e manao maoli iho ana no o Babela me Agasa ma he wahine ola maoli no, no ka like loa.

            I ka paa ana, noonoo iho la o Babela i kana mea e hana hou aku ai. E hele hou aku paha imua o ke kumulaau kamailio a e ninau hou aku no kana mau mea e hana aki ai. Aka, oiai keia e noonoo ana no ia mea, ua pae ae la kekahi leo nahenahe ano wahine opio mailoko o ua kii nei, i ka pane ana ae.

            "E kuu alii, he makehewa ia, e ninau mau ia'u, a owau kou kuhikuhi i na wa a pau."

            Kahaha loa iho la keia no keia mea, a piha ae la kona puuwai me ka hauoli. No keia mau olelo a ke kii, nolaila, pane aku la keia.

            "E ke kaikamahine ui a ke kumulaau leo o Dodona, oiai ua oluolu ia oe e pane mai ia Babela, a e haawi mai i kau mau kokua ana, e ae mai oe e nminau aku au. E hai mai ia'u ihea e loaa ai ia'u he kanaha kumaiwa kanaka opio ikaika, koa a wiwo ole, a aa e hele imua o ke kahua kaua, i hiu p@ ae me a'u nei a loaa ke kanalima nana e apo aku i na hoe o ka moku he kanalima a hoe i kahi i manao ia?"

            "E hai aku imua o ka lehulehu i kou inoa a me kou moolelo, a e kauoha aku i na kanaka koa a pau e akoakoa mai imua o@. E hooko i ka'u, a e hooko ia no ka@;" wahi a ka leo.

            No keia kauoha, ua haawi koke aku la keia i ka lono imua o na kanaka penei:

            "I na makamaka maikai a pau, Aloha – Owau o Babela, ka mamo a Abeona, o ka puhaka o Mariadane, ka mea i nele i ka makua a me ka home – ke noi aku nai e akoakoa mai na kanaka koa o ka aina imua o'u, a e hai aku no au i ke kumu o keia noi."

            Mai kela a me keia pea o ka aina, kahi i lawe ia aku ai keia lono, ua huliamahi mai la na kanaka, na wahine a me na keiki. Imua o lakou, ua hai aku la keia i kona makemake, a me ke ano o kana huakai i manao ai. E like me ka huliamahi ana mai o na kanaka e lohe iaia, pela no ko lakou huliamahi ana ma ka makemake e ukali iaia nei ma ka huakai au moana. Ua kuhi ae la lakou i na lima i ka lani, a hoohiki mai la e ukali ia ia nei a hiki i ke kihi hopena o ka honua me ka ukali ana iaia ma ke ola a ma ka make.

            E hoomanao hou ae kakou e na makamaka i na hana mana a ka luahine. Aia no ia ke noho ala ihope loa, aka, ke hele nei kona mana mamua pono o ko Babela ala. Ke hoomakaukau nei i ka Babela huakai, ke alaki nei ia Babela ma na hana ana, a ke hoopuni nei i na kanaka me kona mana e huliamahi lakou mahope oia nei. O keia mau hana aloha a kokua a keia luahine, mamuli wale no o ko ia nei mihi ana no kana mau oleo pakike, a me ka ae ana e kokua iaia, a hapai a pae ma kekahi aoao o ka muliwai, no ia mea, aole i poina keia luahine iaia, aka, ua hoomanao mau a kokoua i na manawa a pau.

            Ua makemake nui io no na kanaka opio puni kaua a pau o ka aina e hele pu me ke koa opio kaulana, aka, oiai he kanalima wale no kona makemake, nolaila, ua wae ae la keia he kanaha kumaiwa a oia nei no hoi ke kanalima. Ma ka ia nei wae ana, aole no i poina ka luahine, ua alakai oia ia Babela ma ka wae ana i na kanaka ikaika kupono no ka hele ana ma keia huakai. Mawaena o na kanaka a ia nei i wae ai, o Heculisa kekahi, ke kanaka i olokea ia me na olona o ka ikaika, i oleloia hoi nana i paa ka lani iluna a kau i ka lewa. O Katoa a me Poluta, na keiki i oleloia he mau mahoe i hanau ia mailoko mai o ka huamoa no laua na ikaika papalua i ko ke olai. O Terusa kekahi, ka mea nona na aahuki wikani nana i uhae ka iwiaoao o ke kupua Minotua. O Lainesia kekahi, ka mea nona na maka ooi o ka ike, he hiki iaia ke nana i na mea o loko o ka pohaku ala paa moe wai o na kahawai, a e ike i na mea huna a pau o ka moana kai hohonu. A o Oplare kekahi, ka mea nona na lima polinahe, kaulana ma ka hookani  ana i ka lira a me ka hapa; ka mea i oleloia, mamuli o kona leo a me kana mau uhene ana, ua ala ae la na holohona hihiu hae o ka nahele ma ko lakou mau wawae hope a kunou hoomaikai mai la me ka haa ana, a helelei mai hoi na pua o na laau a mae mai ko lakou omaka ana ae e mohala, no ka lea loa o kona leo me kana pila.

            Mawaena nae o keia poe, hookahi o lakou he kaikamahine ui nohea lua ole. O Atalanita kona inoa, ka mea i oleloia, ua kupaa kona mau kapuai me ka luli ole iwaenakonu o ka ikaika o ka waipuilani ma ka moana, a no ka mama me ka palamimo loa o na kapuai o keia ui, ua hiki iaia ke hehi maluna o na opikapika ale, a kau aku maluna o kahi a me kahi. Ua hanai ia oia maloko o na ululaau e like me Babela, na kekahi Bea kupua, a ua lilo kona manao nui mamuli o ke kaua, a me ka hele ana ma o a maanei o ka honua. Ua oi aku kona aloha i ke ano noho ana o ke koa mamua o ke kui a me ka lopi. Aka, o ka oi nae paha o keia poe a Babela i wae ai, oia no na keiki elua a ka makani o ke kukulu akau. Ua oleloia he mau eheu ko laua, a i ka manawa e pohu ai ka moana, he hiki ia laua ke peahi, a ala mai la ka makani e like a e pa ana o ka eheu o ko laua makuakane. He mau kaula no hoi kekahi mawaena o lakou, he hiki ke hai mai i na mea e hoea mai ana, a e hana ia ana paha i ka la e hiki mai ana, a i ka pule a makahihi paha.

            Ua koho  aku la o Babela ia Tipara i kanaka iaia ka hoeuli, no ka mea, he kanaka oia i kamaaina i na hoku a pau o ka lewa, a oia ko lakou panana. O Lainesia ke kiai mamua, no ka mea, he hiki iaia ke ike mamao loa, a aole loa e loaa aku ka palena o ka ike a kona mau maka.

(Aole i pau.)

 

MOOLELO O KE KAU

Ahaolelo o 1878.

 

LA HANA 4, Mei 3, 1878.

Halawai ka hale ma ka hora 10 a.m. e like me ka hoopanee ana. Peresidena Hon. G. Rhodes ma ka noho. Pule ia e ka Rev. M. Kuaea. Heluhelu ia ka moolelo o ka la i hala, apono ia.

            Heluhelu ia he palapala hoopii mai Hilo, e hoomoe ia i alanui hao no ia apana.

            He noi e hoemi ia ka uku o ka Moi, na Kuhina, a me kekahi mau luna aupuni e ae.

            He noi e kue ana i ka hoopae ana mai i na lima hana.

            He noi i $45,000 no ke alanui pali o Nuuanu.

            He hoololi e nana ia ka olelo hooholo, no na hora e noho ai ka hale; oia hoi mai ka hora 1 p.m. a i ka hora 5 p.m. o kela a me keia la. Mahope o na hoopaapaa ikaika ana, ua haule.

            Hoolaha mai ka Hon. D. B. Mahoe, e waiho mai ana oia he bila kanawai, e hoololi ai i ka pauku 1423 a me 513 o ke Kanawai Kivila.

            Hoolaha mai ka Hon. D. Malo, e waiho mai ana oia he  kanawai e hoololi ai i ka pauku 31 o ke Kumukanawai.

            Ma ka hoololi a ke lii C. R. Bishop, ua ae ia aku ka Loio Kuhina e waiho mai a nana ia, ke kanawai e hoopau ana i na pauku 3 a me ka 8 o ke Kanawai e pili ana i ke oki mare. Ua hooholo ia ka bila no ka heluhelu elua.

            Waiho mai ke Kuhina Waiwai i ka bila no na lilo o ka Ahaolelo, a nonoi mai e heluhelu ia.

            Kue mai ke lii Bihopa, no ke pai ole ia ana o ka bila.

            Hoolaha mai ka Hon. W. O. Smith, e lawe mai ana oia he kanawai e kokua ai i ka hoonoho ana i Aha Hookolokolo Hoomalu ma Wailuku Maui.

            He noi e haawina nio ka hoakea ana i alanui ma kela a ma keia apana.

            He hoololi no ka pauku 21 a me 22 o ke Kumukanawai.

            He olelo hooholo n@ ka Hon. R. F. Bickerton, e noi ia ka Peresidena e hookawale ia i wahi maikai no na kakau moolelo o na nupepa. Hoopanee ia.

            Hoike mai ka Hon. D. B. Mahoe mai ke Komite Kuikawa, he pane i ka haiolelo a ka Moi.

            Waiho mai ka Hon. D. Malo he oleo hooholo, o na lii a pau i ike ole ia ko lakou hoohikiia ana, aole lakou e manaoia he mau hoa no ka ahaolelo.

            Kokua mai kekahi mau hoa i ka olelo hooholo.

            Kamailio mai ke lii Bihopa, he hauoli nui oia i ka ike ana i na lunamakaainana no ko lakou hilinai nui ma ka hoohikiia, aka, oiai he pa@ mau no ka Hale o na lii, ma ia mea, ua like ole me na hoa lunamakaainana i kohoia, aole no hoi i kupono iki ke hoohikiia na lii, e like me ka hoolaha ana a ka Aha Kiekie.

            Hoopanee ka Hale.

 

LA HANA 5, Mei. 4, 1878.

Halawai ka Ahaolelo ma Aliiolani Hale ma ka hora 10 a m e like me ka hoopanee ana. Peresidena Hon. Godfrey Rhodes ma ka noho. Puleia e ka Rev. M. Kuaea. Heluheluia ka moolelo o ka la i hala a aponoia.

 

NA PALAPALA HOOPII.

            Heluhelu mai o Hon. A. Kaukau he palapala hoopii mai Waimea, Kauai mai, e noi ana e hookaawaleia i puu dala no ka halepaahao malaia. Waihoia i ke komite o na hana hou.

            Heluhelu mai o Hon. G. B. Palohau he palapala hoopii no Puna mai, e noi ana ua koho pono ia ka Hon. Kekino. Kue mai na Hon. Nazareta a me Nawahi.

            Heluhelu mai ka Hon. D. Malo he palapala hoopii mai Molokai mai, e noi ana e hoonoaia na barota ma Kalaupapa, Molokai. Waihoia i ke komite hookolokolo.

            Waiho mai ka Hon. J. K. Kaoliko he palapala hoopii mai Koolaupoko mai, e noi ana e hookaawaleia i $4.000 no ka palekai o Waiahole. Waihoia o ke komite o na hana hou.

            Waiho mai ka Hon. K. Kamauoha he palapala hoopii mai Kona Hema mai, e noi ana e hookaawaleia i puu dala no ke alanui aupuni oia apana. Waihoia i ke komite o na hana hou.

            Waiho mai ka Hon. S. Paniani he palapala hoopii mai Hilo mai, e noi ana e lapaau wale na kahuna Hawaii me ka laikini ole. Waihoia i ke komite o ka Papa Ola.

HOIKE A KE KOMITE.

            Hoike mai ka Hon. W. M. Gibson he palapala hoopii i waihoia i ke Komite Waiwai me ka nonoi mai e hoihoi hou ia i ke komite o na aha hookolokolo.

            Noi mai ke Kuhina Waiwai e kapae i na rula, no ka heluhelu ana mai i ka olelo hooholo, e hookaawaleia i $15,000 no na lilo o keia Kau Ahaolelo.

            Noi hou mai ke Kuhina Kalaiaiua e kapae hou ia na rula, a e heluhelu aluaia ka olelo hooholo.

            Noi mai ka Hon. L. Aholo e kakau poe@ia ka olelo hooholo.

            Noi hou mai ke Kuhina Kalaiaina e hooholo loa ia ka olelo hooholo ma ka heluhelu ekolu ana, hooholoia.

            Kokua mai ke alii Kaai i ke noi a ka Hon. L. Aholo, hooholoia e kakau poepoe ia.

NA OLELO HOOHOLO.

           Hoolaha mai ka Hon. J. Keau, e lawe mai ana oia he bila kanawai e auhau ai i ke poo pipi hookahi i .25 keneta. Waihoia i ko komite Waiwai.

            Heluhelu mua mai ka Hon. J. Keau i ka bila kanawai, e hoopau loa @ i ka pauku 480 o ke Kanawai Kivila.

            Waiho hou mai ka Hon. J. Keau he olelo hooholo, e hookaawaleia i $2,000 no ke alanui Liliha. Waihoia i ke komite o na hana hou.

            Waiho mai ka Hon. J. N. Kapahu he olelo hooholo, e hookaawaleia kekahi puu dala no ka hana ana i paipu wai no Waiohinu.

            Heluhelu mai ke lii Kuihelani, e lawe mai ana oia he bila kanawai e hoololi ai i ka pauku 780 o ke Kanawai Kivila, i hooholoia i ka la 22 o Iune 1868.

            Heluhelu mai o Hon. W. O. Smith he bila kanawai e hoopau ai i ka mokuna 58 o ke Kanawai o ka 1876. Waihoia i ke komite.

            Heluhelu hou mai o W. O. Smith he bila kanawai e hoololi ai i ka pauku 892 o ke Kanawai Kivila.

            Hoolaha mai ka Hon. R. F. Bickerton, e lawe mai ana oia he bila kanawai, e hoopau ai i ka mokuna 16 o ke Kanawai o ke kau o 1876, a e hoala hou ia ka pauku 670 o ke Kanawai Kivila.

            Waiho mai ka Hon. W. H. Halstead he olelo hooholo, e hoikeia mai ka nui o na dala o ka Oihana Kepa. Hooholoia.

           Heluhelu mai ka Hon. J. N. Kaiaikawaha, e kauohaia ke Kuhina Waiwai e uku ae mai ka waihona o ke aupuni, i na $1,400 no ka hale hookolokolo o Waialua. Noi hou mai nae e hoihoi hou ia.

            Waiho hou mai oia i ka olelo hooholo e hookaawaleia $1,400 no ka hale hookolokolo o Waialua. Waihoia i ke komite o na hana hou.

            Heluhelu mai o Hon. J. S. Kaanaana he kanawai e hoololi ana i ka pauku 513 o ke Kanawai Kivila.

            Noi mai ka Hon. J. Nakaleta e kapae loa ia. Ma ka ninau ana ua hooholoia.

            Hoolaha mai o Hon. W. R. Castle, e lawe mai ana oia he hoololi no ka Rula 62 o ka Hale.

            Hoolaha mai ka Hon. J. N. Kapahu, e lawe mai ana oia he bila kanawai, e hoomana ana i na Lunakanawai Hoomalu a me na Aha Apana. E hookolokolo kivila ia na hihia hoeha a me hoopaahao hewa. Heluhelu mai no noi oia i ka bila kanawai e hoololi ana i ka pauku 1423 o ke Kanawai Kivila.

            Hoolaha mai ka Hon. J. Kauai e lawe mai ana oia he bila kanawai, e hoololi ai i ka pauku 12 o ka mokuna 56 o ke Kanawai Hoopai Karaima.

            Waiho hou mai oia he olelo hooholo, e hoolokoia na lunamakaainana i 50 poo leta pakahi. Haule.

            Waiho mai ke lii W. T. Martin, he olelo hooholo, e kauoha ia ka Papa Ola e hoolako ia ka apana o Kau i na laau lapaau. Waiho hou mai oia he olelo hooholo, e hookomo ia ma ka bila haawina i 1,500 no na alanui o Kau.

            Waiho mai ka Hon. Kakau, he olelo hooholo, e hoolako ia na hoa me na nupepa KUOKOA, "Ko Hawaii Pae Aina," a me na nupepa haole, mailoko ae o na lilo o keia Ahaolelo.

            Kue mai ke lii Kaai, a me Hon. Kupau, ma ka ninau ia ana, ua hoopanee loa ia ka olelo hooholo.

            Waiho mai ka Hon. Kekino, he olelo hooholo, e hookaawale ia i $2,000 no ka hale hookolokolo ma Puna. Waiho ia i ke komite i na hana hou.

            Waiho mai ka Hon. J. N. Kaiaikawaha he olelo hooholo, e hookaawaleia i $1,000 no ka hana ana i alahaka no Anahulu.

            Hoolaha hou mai oia e lawe mai ana he bila kanawai no na Hui Panihakahaka.

            Waiho mai ka Hon. J. S. Kaanaana e hookaawaleia i puu dala no ka hale hookolokolo ma Ewa. Waihoia i ke komite o na hana hou.

            Waiho mai ka Hon. J. Nawahi he olelo hooholo e kohoia i mau kanaka akamai e nana i na ipuhao mahu o na Hui Mahiko, @ ikeia ka paa a me ka ole, a i ole ai hoi e loaa ka poino i kekahi mau ola.

            Noi mai ka Hon. W. O. Smith e waiho i ke komite o na hana hou. Hoololi mai ka Hon. W. M. Gibson, e waihoia i ke komite Kalepa a me Mahiai.

            Kue mai ka Hon. D. Malo i ka olelo hooholo. Kokua mai ke lii S. K. Kaai. Ma na ninau ia ana, ua hooholo loa ia.

            Waiho mai ke lii Kaai he olelo hooholo, e kauoha ana i ke Kakauolelo o ka Hale, ma ka loaa ana o na $15,000 e hooliloia ma ka hana kupono wale no i keia Hale ma ke ano pakiko. Hooholoia.

            Hoolaha mai ka Loio Kuhina, e lawe mai ana oia he bila kanawai ma kahi o ka bila mua i heluhelu ia ma nehinei, a e heluhelu ia ana ma ka Poakahi.

            Waiho mai ka Hon. J. Nakaleta, he olelo hooholo, e kauoha ana i ka Loio Kuhina e hoopii i ke Kuhina Kalaiaina a me ka "Papa Nana" o Kalaupapa.

                        Noi mai na Hon. R. F. Bickerton, a me W. O. Smith, e waiho i ke komite o na Aha Hookolokolo. Kokua mai ka Hon. J. Nawahi i ka olelo hooholo, e lawe ka hale a noonoo a e kena aku i ka Loio Kuhina e hana koke.

            Kokua mai ke lii Kaai. Ma ka ninau ia ana, ua hooholoia.

            Waiho mai ke lii Kaai he olelo hooholo, e uku ia na luna o keia kau e like me ke kau i hala.

            Noi mai ke lii C. R. Bishop, e hoakaka mai ke kakauolelo i ka uku o ua mau luna la.

            Heluhelu mai ka Hon. J. K. Kaoliko, he bila kanawai, e hoololi ai ka pauku 2 o ke Kanawai i apono ia ma ka la 22 o Iune, makahiki 1868.

            Hoolaha mai Hon. J. S. Kaanaana e lawe mai ana oia he hoololi no ke Kanawai o ka 1870 pauku 3, o ka mokuna 14.

            Noi mai ka Hon. L. Aholo, e hoopanee ka hale a halawai hou ma ka hora 10 a.m. Poakahi. Hooholoia.

            Hoopanee ka hale.

 

 

MAIKAI KA NOI KA PAPA!

- A ME -

KA LAAU O KOU HALE!

NO HEA LA?

KAI NO HOI NO KAHI O

WAILA MA!

 

Nana aku no hoi ia la

Ohi ka Io o ka Laau o Makawao

I ka ua mea hoi o ka nani o

NA PAPA! NA PAPA!!

- A ME -

NA PONO KUKULU HALE

O NA ANO NO A PAU.

 

 

Aia ma ke kihi o na

ALANUI PAPU me MOIWAHINE!

HONOLULU

MALAILA E LOAA AI

E LIKE ma ke MAKEMAKE

- NO KE -

KUMUKUAI MAKEPONO LOA!

 

 

PAPA, PAPA, PAPA,

Na Papa Huluhulu,

Na Papa Manoanoa,

Na Papa i kahiia,

Na Papa Kepa,

Papa Hole Keokeo,

Papa Hole Ulaula.

 

 

NA LAAU, NA LAAU!

Na Kua,

Na Kaola,

Na Aaho,

NA Molian,

Na Peapea,

Pine Huluhulu,

Pine i kahiia.

 

NA Papa a me na Laau Ulaula!

Pili uluaula,

Pili Keokeo,

Pani Puka,

Pani Puka Aniani,

Ipuka Aniani,

Puka Olepelepe.

 

 

PENA O NA ANO A PAU:

Hulu Pena mai ka Liilii a ke Nui,

Aila Pena,

Aila Hoomaloo,

Waniti, Pate.

NA LAKO O KELA A ME KEIA ANO!

Na Ami Puka Hale,

Na Ami Puka Pa.

ANIANI!

Pepa Hale a me na Lihilihi

E LOAA NO MALAILA.

PAAKAI HELU I O KAKAAKO m@ PUULOA

            No ke DALA KUIKE, e loaa no na mea a pau i haiia ae la, no ke Kumukuai Emi loa. O na kauoha a pau mai Hawaii a Niihau, e loaa'ku ana ia lakou, e hooko koke ia no ia me ka lawa pono.

            E Kipa Nui @, i ike i ka O@

@