Ka Nupepa Kuokoa, Volume XVII, Number 23, 8 June 1878 — NU HOU KULOKO. [ARTICLE]

NU HOU KULOKO.

Ua loaa mai ia makou kau kauoha e M. Kealakaa o Lanai, a ua hokoia aku kou makemake. O kau e Mose Kanalu o Laupahoehoe, Hilo, Hawaii, ua loaa mai nei ia makou a ua hookoia aku kou makemake. Ua holopono na hana o ka fair a ka Moiwahine ma ka po poaono o ka pule i hala. Ua lono mai makou he $2,000 a oi aku na loaa. HOOPOLOLEO.- O na kokua i haawiia mai e ka Ekalesia o Lihue Kauai, no ka luakini hou o Kauahaao, Waiohinu, Kau, Hawaii, he $32.60 aole he $25 e like me ka mea i puka aku i ka pule i hala. NO MAIKONISIA.- Ma ka la 10 o keia mahina e haalele mai ai ka moku Misionari Hoku Ao, ia Honolulunei no ka Paeaina o Maikonisia, malalo o kona Kapena hou I. Bray. Ma ka hora ekolu p.m. o ia la e malama ia ai he anaina haipule maluna o ka moku mamua ae o ka holo ana. ILI A NAHAHA.- Ua hiki mai nei ka lono no ka ili ana a nahaha o ka moku kuna hou o Reed a me Sisson, ma Honokaa, Hamakua, Hawaii, a he nui na waiwai o kekahi poe i poho maluna ona. Ua laki loa nae aohe ola i poino. Ma ke kakahiaka Poalua nei, ua hooleleia ke kii o ka Banako hou o Bihopa ma, e ka haole pai kii o Keiki. Aole no hoi e nele okula ka hulali o ke kii o ua hale 'la e like no me kona hiona. Ma ke kakahiaka Poaono o ka pule i hala, ua holo aku ka Moi iluna o ka mokukaua Geremania Leipzig, a ua haawiia mai na kipu aloha ana laia. Ua hoohala oia i kekahi mau hora maluna o ua mokukaua 'la, a huli hoi maila i ka honua nei. He nui ka maloo ma Waimea Kauai no ka haule wahi paka ua ole malaila no ka makahiki a keu. Ma kekahi mau kula, ua neoneo loa na bipi, a ma kekahi mau kula hoi, ke make mau nei na holoholona. O ke kiekie keia o ka maloo i ike ia ma ia hapa o ka Aina. Ma ka la 29 o ka malama i hala aku nei, ua ku mai ka moku kuna Storm Bird Kapena Jackson ma ka kakou nei awa, me na kanaka he 85 o na aina moana malalo aku nei o kakou i laweia mai nei i mau limahana. He 62 na kane a he 23 mau wahine a he poe kino ola maikai lakou a pau. Ma ke ahiahi Sabati aku nei i hala ua haalele maila ka mokukaua Geremania Leipzig i ko kakou nei awa, a holo akula ma kona alamoana e hiki aku i Iapana. Ua loaa mai ka lono ia makou, ua haule koikoi iho na paka ua ma Hamakua i Hawaii, a pela no hoi ma kekahi mau kua aku nei o kakou. O ke akenui io no ia o keia mau la makapehu ua, o ko lakou iho makawalu mai e hooma-u i ka ili honua panoa, a hiki hoi a holopono ko kakou mau hana mahi ai. NA IA KU.- Eia ma Waimea, Oahu, he nui loa na ia ku 1 ke Akule, 2 Weke, 3 Nehu, o ke kiekie aku nae o ka nui loa, oia ka Nuha, a ke lohe wale ia mai nei aia ma Kaiaka ke kahi he kupanaha aole mai mua mai akahi wale no, ke hoohikihiki nei na kaa lio, ku ke ahua hana kaa haawe. J. M. Sirita. HOOPANEE.- Ke hai houia aku nei, ua hoopaneeia ka huakai kaapuni ohi dala a ka elele. S. H. Haaheo no ka mokupuni o Hawaii no ko kakou Kilohana, a ma ka mokuahi o ka Poalua June 25. I keia ahiahi Poaono e weheia ai ka Aha Mele Nui e ka Puali Price's Own maloko o ka luakini o Kaumakapili, a o na pomaikai a pau no ka luakini hou oia ekalesia. Nolaila e ala e na makamaka, e hele i ike mama i na houhene a ia poe, a haawi hoi i ko oukou mau kokua no na hana maikai. MAKE MA KE ALANUI.- Ma ka lokomaikai o ka Ilamuku ua ike iho makou maloko o na palapala mai Waianae mai, ua loaa ke kino make o kekahi wahine ma kahakai o Mailiili, Lualualei. Ua manaoia mai Ewa ae kona hele ana, a loaa i ka ulia poino ma ke ala kahi i make ai; Ua ike ia ka inoa Kamahine i kakauia me ka inika ma kona lima hema. NA HAIOLELO.- E haawi ana o Rev. Koana i haiolelo makahiki a ka Papa Hawaii no na oihana kuwaho, ma Kaumakapili, i ka po Sabati, June 9. A o Rev. S C. Luhiau no na oihana kuloko ma Kawaiahao, i ka po Sabati June 16. E lulu dala ana ke anaina mahope o ia mau haiolelo, a ke kono ia aku nei na mea a pau e hele ae me ka makaukau. HE MAHAL PIHA.- Ano ke hoike aku nei au i ko'u mahalo piha, no na hookipa aloha oiaio ana i pahola ia mai imua o'u, e na luna nupepa, na kahu Ekalesia na hoa'loha a me na makamaka e ae o na Hono o Piilani, oiai ke kamahele ma ka huakai hele kaapuni ohi dala no ko kakou "Kilohana" ma ua moku la o Kama. He malihini loa ko oukou kamahele ma ka hapa nui oia mokupuni, aka, ua loaa nae na makamaka oiaio a lehulehu wale, a ua aie nui au i ko lakou lokomaikai. A ke haawi pu aku nei hoi au i ka mahalo, no ka Hon. S. G. Waila, oiai na kona lokomaikai i makana wale mai no'u i kekahi keena hope o kona moku nani, mamuli o ka hana a'u i hele ai e hooko. Owau no o ka oukou kauwahaahaa. S. H. Haaheo.