Ka Nupepa Kuokoa, Volume XVII, Number 27, 6 July 1878 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

KA NUPEPA

Kuokoa me ke Au Okoa

I HUIIA.

No ka Makahiki, $2.               Eono Mahina, $1

Dala Kuike ka Rula.

IULAI 6, 1878.          

Congregational Chorus.

Colonial Singer, No. 183.

1

E mele na anaina e,

E o na luakini nei

I na hosana oli ae,

Na haleluia hoomana'e;

E hui mele like ae

I keia mele hoomaikai;

Cho.    Leo Hooalii ana.

I mau tausani leo e,

Na leo hoomaikai

Ia Iesu ke Lii maluna'e,

Ka Haku e ola'i.

Ia Iesua ke Lii maluna'e,

Ka Haku e ola'e.

2

Ke mele e! hamau! hamau!

Ke mele lani kamahao

Na haku mele e a pau

Mai lalo ae a i ke ao.

E hui a hoomaikai pu

I ka Makua me Iesu.

Cho.    Leo, Hanare.

Hoomaikai i ke Akua mau,

Nona na pono nei a pau;

Hoomaikai hoi ia Iesu,

Ka Uhane Hemolele pu.

HAWAII.

Kaawina Kula Sabati.

HELU 3. SABATI IUNE. 21, 1878.

KUMUHANA.

Ka oihana a loane Bapetito.    Pauku Baiba

la Luk. 3 ; 15-22.

            15 A i ke kanalua ana o na kanaka, kukakuka iho la ka naau o lakou a pau, no loane, o ka Mesia paha ia?

            16 Olelo mai la o Ioane ia lakou a pau, i mai la, Owau no ke bapetizo nei ia oukou me ka wai ; aka, e hele mai ana kekahi, he oi aku kona mana i ko'u, aole au e pono ke wehe ae i na kaula o kona kamaa ; oia ke bapetizo ia oukou me ka Uhane Hemolele a me ke ahi.

            17 A o kona peahi aia no i kona lima, a e hoomaemae loa oia i kana huapalaoa, a e hoiliili i kana hua palaoa iloko o kona hale papaa, a e hoopau hoi oia i ka opala i ke ahi pio ole.

            18 He nui no hoi na mea e ae ana i hoike mai ai i na kanaka i kana olelo hooikaika.

            16 A o Herode ke alii kiaaina, ua aoia e ia no Herodia ka wahine a Pilipo a kona hoahanau, a no na mea hewa hoi a pau a Herode i hana'i,

            20 Hoohui hou no oia i keia mea ia mau mea a pau, a hana paa oia ia Ioane iloko o ka hale paahao.

            21 Eia hoi kekahi, i ka bapetizoia'na o na kanaka a pau, o Iesu no kekahi i bapetizoia ; a i kana pule ana'e, weheia mai la ka lani ;

            22  A iho mai la maluna ona ka Uhane Hemolele me ko ke kino ano o ka manu nunu, a pae mai ka leo mai ka lani mai, e i mai ana, O oe no ko'u keiki punahele, he oluolu loa ko'u ia oe.

            Pauku Gula. Luk. 1 : 15.

            Mele. Him. 415. "Ma ka wai o Ioredane." p. 1, 2.

            Pule i mihi pono na haumana.

            Ka hana a na kumu me na papa haumana.

            Ka wehewehe me ka ninau ana.

            No Iesu na Haawina mua elua, kona hanau ana, me kona wa opio.

            No Ioane Bapetite keia Haawina.  Oia ka elele, ka ahai olelo no Iesu.  Maraki 3 ; 1.  Oia hoi ka leo e kala ana ma ka waonahele.  Isaia 40 ; 3.  Owai na makua o Ioane ? Nawai i hai e, e hanau ana keia keiki ? Heaha hoi kona ano ? Luk. 1 ; 16.  Nawai i kapa kona inoa ? Luk. 1 ; 13.  Owai ka i hanau mua ia, Iesu ? Ioane ? Ehia malama mawaena o laua ? Heaha kana oihana? Luk. 1 ; 16, 17.  I hea oio i noho ai a lawe i ka oihana kahuna ? Luk. 3 ; 2.  Mahea oia i kaahele ai? Heaha hoi kana hana ma ka wai o Ioredane me ka ao ana ? Luk. 3 ; 3-5.  Heaha kana mau olelo i ka poe i hele hookamani e bapetizoia ? Luk. 3 ; 7-9.  Ehia poe oiaio i hele e ninau, a e bapetizo, me kana pane ana ?  3 ; 10-14.

            P. 15-18.  Kanalua na kanaka no Ioane, no ke ano e ana o kana hana, he mea nui oia, a oia paha ka Mesia a lakou e kali ana no ka hiki ana mai.  Pehea Ioane i pane aku ai?  Pehea hoi kona pane ana i kekahi poe e ae ?  Ioane 1 ; 6, 19-23.

            P. 19-20. Nui no na hana, na olelo hooikaika a Ioane, ua hookiia nae kana hana e Herode ke kiaaina.  Kekahi keiki keia a Herode ka nui.  Ua hoonoho ia oia i kiaaina no Galalaia me Perea ma ka aoao hikina o Ioredane.  Herode Anetipasa keia.  Ua aoia oia e Ioane no kona mau hewa.  Heaha kekahi hewa ?  Heaha hoi ka hope o ka Ioane ao wiwo ole ana ia Herode ?  Nana hoi, Mnt. 14 ; 1-11.  Mareko 6 ; 16-28.

            P. 21-22.  Mamua keia hana a Ioane ; mahope na hana ma ka pauku 16-20.  Ua hiki Iesu i ka mak. 30, ka wa kupono no ka lawe ana i ka oihana kahuna.  I hoohalike ia oia me na kanaka, me na kahuna e ae, na kaula e ae, na lii e ae, ua hoohaahaa oia ia ia iho, a hele io Ioane la e bapetizoia, ua like paha ia me ka poni ana i na kahuna, i na lii, i na kaula Iudaio.  Haohao loa loanea mamua, a hoole, ole kupono ia ia ke kauwa ke bapetizo i ka Haku.  ua ae nae ma ko Iesu koi ana.  nana Mat. 3 ; 13-15.  Ia ia e pule @na, heaha ka mea kupanaha ?  Heaha ka leo i lohe ia?  Mat. 3 ; 10-17.  Heaha ka hoailona i haawiia ia Ioane i mea e maopopo ai Iesu?  Ioane 1; 35-34.  Heaha kana olelo hoohaahaa ia ia iho, a hookiekie ia Iesu?  lo. 1; 2.  Mareko 1; 7.  Ioane 3; 27-31.  Aia mahea na olelo hope no Ioane? Mat. 11; 2-14.

            Mele.   Him. 171.  "Hele mai ka Uhane Laa." P. 1,2.

            Haauma no Iulai, 28 Luk. 4; 16-30.

"Hoku Ao" ma ka Ilikai no

na Pae Aina o Maikonisia.

            I ko makou holo ana a pae i ke awa, au koke hele aku la makou i loko o ka ulu niu, o wau a me S. P. K. a me S. Mile, kipa aku la he hale haole, a ua hookipa aku la kana wahine ia makou, a noho iho la iluna o na noho ; o ke kane, aole makou i ike, ia makou e nanea ana, hoea mai ana na wahi ewa a maua, a hookipa ia kula e kelii wahine o ua home nei, a nanea iho la makou.

            No ko makou ake nui no e ike i na hiona a me ka hale o ke alii nui, au noi ia aku ke'lii wahine e hookuu mai, a au ae ia maila.  Ia makou e hele aku nei, kani ana ka ulili a ke Kapena, a holo aku la i kahi o ke Kapena e ku ana.  Ia makou e holo aku nei, ua holo mama loa lakou la, owau me kekahi sela o J. Nolu kona inoa, holo lolohi aku la maua oia maua e holo nei, holo maila kekahi kanaka kamaaina, a olelo maila, "e laua nei! e laua nei !!" a ku iho la maua.  Heaha keia? "Te Atua o matou," auhea wahi a maua.  "Eia no hoi wahi ai ala, "kuhikuhi maila kela, a ike aku la maua, oia hoi; ekolu pohaku paakea, a penei ke ano o ua mau pohaku nei a me ko lakou mau ano o ka hana ia ana elua mau pohaku palahalaha i ano huina ha paha, a me he la, ua like paha me 3 kapuai ka huina halike ; o keia mau pohaku nae, ua hoomoe ia i lalo.  O kekahi pohaku hoi, ua ano huina kolu, a ua 5 kapuai paha kona loa, oiai, he kapuai paha iloko o ka lepo, a 4 kapuai maluna ae o ka lepo.  O keia pohaku, ua kukulu ia i luna, i waena konu o na pohahu elua, e moe'la i lalo, i hoomoe ia mao a maanei o ua pohaku nei e ku la iluna.

            I keia wa, i pii ae ai ua kanaka nei a luna o na pohaku e moe la i lalo, a mai laila ae, ai iluna o ka huina kolu ou a pohaku nei, e noke ana i ka hehi, e lele ana i Inna a i lalo, me ka olelo ana au pau ka mana o te Atua!  Ninau aku la au ia ia, o wai la hoi ke Akua oiaio? "o Iehova ke Akua, o Iesu ke kalahala." He Akua oiaio loa ia, ninau hou aku la au, ke hoomanao nei no anei ko Apemama nei poe i keia pohaku? aole.  Ua pau loa.  Ia makou nae e ku nei, piha maila i na kamaaina, a hookahi no hua olelo i ka waha.  Ke Atua aole mana, a no ka hiki ole ia'u ke olelo ma ka lakou olelo, aole au i paipai nui aku ia lakou, aka he wahi mea iki.  Haalele maua ia lakou, a holo aku la, a hui aku la me ko makou poe a pau.  A no ka hookau lua iki o ko makou hoi ana, au hoholo akula makou iloko kauhale, aole o kana mai ka nunui a loloa, a he kulanakauhale nui no hoi, a o kahi keia o ke'lii Pinoka.  Eia nae hoi kahi mea a ka na@u i hoahu ai : i ke komo ana aku i loko, aole i ike ia ka maemae, aole i hoouhi ia o loko i ka moena, a ma kahi no e moe ia ai paha, oia iho la no kahi moena, a o ka hale apuni, oia neo wale iho no, a i ahona i ka paa i ka ili, a pela no ka ike ani o ka maka i na ha. le a pau-  O na hale moe o ke'lii, he mau hale maikai, a ua like ke kulana o ka hale i uhi ia me na lauhola o Hawaii; o ka lua o ka hale, he hale laau, a ua uhi ia na lanai me ke pili laaau, a o ke kino o ka hale oluna me ka lau o ka lauhala, a he papahole a puni o lalo, me na puka aniani, a he hale maikai ke nana aku.  O ka loa o ua hale nei, he 30 kapuai, a he 18 ka laula, oiai, ua anana no wau me kou mau lima.  Aole makou i ike ia loko o ua mau hale nei, oiai; ua hele ke'lii, a me ia ike ole no a hoi ana makou.  I ka aui ana ae o ka hora 4 p. m. ua kau makou iluna o ka waapa. a huli hoi mai la, a hiki i "Hoku Ao" i ka hora 6.  O ka loihi o keia wahi a makou i holo ai, au like paha mai Kapunahou a ka hale pule o Kalihi, ke ole au e kuhi hewa.  He aina momona o Apemama a nui ka hua o na niu, a he mau kumu ulu ka'u i ike, aole i oi mamua o eha, a he loko wai nui, i hoopiha ia me ka wai ua, like paha kona nui me kela loi nui i Kamanuwai, e pili la kekahi aoao ma alanui Nuuanu, ke ana like ia kona mau aoao apau.

            I ka Poakahi, la 27 o Sept. ua loaa kahi makani maikai, a holo aku la makou, a o ka hora 10 me 10 minute ia o ka a. m. a ke holo nei no Maiana.  Ua lohe ia mai, mai ka malamamoku mai, he 60 mile ka loa mai Apemama a hiki i Maiana; aka, ia makou e holo nei, eia makou i ka Poalima o ka lua o ka pule o ka holo ana, aole nae i ike ia o Maiana, nui ka pohu o ka moana, ka hele ia a ikiiki i ka ua mea o ka wela, a o ko makou hou hele ia ma-o a maa nei i ka ua mea o ka wela, a loohia iho la makou i ka n@lulu a o ka mea kakau nei, kai hooniponipo loa aku no na la ekolu, a hoopailua ia mai e milu, a oia ia e kope nei i ka moolelo i keia la.  E noonoo nui e na hoa Hawaii no keia mea, elua pule me ekolu la me hapa, ike ia o Maiana.

            14 No Maiana a me kona mau mea hou.  Ua ike ia ka mokupuni o Maiana i ka wa ano kakahiaka, a ma mua ae o ka hora 12 ua kuuu ka heleuma i ke awa o Maiana, he mamao loa nae mai ka aina mai kahi i ku ai.  O Rev. W. N. Lono ka Misionari oia wahi, o kona aina hanau, o Keauhou i Kona, i ke "Kai malino a ehu," a he hoa @ula no ka mea kakau i ka wa o ke kula Kahunapule a Rev. W. P. Alexander i Wailuku, ua mahalo ke kumu a me na kamaaina, no ka noho oluolu a me ke ahonui i ka imi ana i pono no ka noho ana malihini me ka ohana nui : a ma muli o ka hea ana a ka Haku, ua lilo oia i mea hai aku i kana Euanelio no ka Paeaina o Maikonisia.  Mahope o ko makou kali loihi ana, e ake a ike i na maka, oiai, ua manao nui ia ke ano o ka noho ana, pehea, a pehea la? he mau minute koe, a hala ae ka hora 2 p. m. hui aloha pu iho la makou me W. N. Lono, a lulu lima aloha pu iho la makou, me na waimaka aloha.

(Aole i pau.)   

Leta a na Makamaka.

HOOKUI A MAKE LOA.

E KA NUPEPA KUOKOA E; Aloha oe:-

            Aia ma ke ahiahi anoano o ka liula, o ke Poakolu Iune 26 o keia makahiki no, oiai kekahi mau keiki e holoholo la Sabati ana, ma kahi o Henry Weeks ma Kona-waena nei.  Ua hookui aku la kekahi keiki o Ahakuna, kona inoa, i kekahi pauku laau e waiho ana ua pa pono ma kona umauma a he hapalua hola paha mahpe iho, ua make loa oia.  He 14 paha ka nui o kona mau makahiki, aloha ino ia hoa kamalii o makou.  Me ka Lunahooponopono ka mahalo.

W. C. KEKAULAILI.

South Kona, Hawaii, Iune 28, 1878.

MAHIKO HOU.

E KA NUPEPA KUOKOA E ; Aloha oe : - E oluolu oe e hookomo iho i keia wahi mea hou.  Aia ma ka la 22 o Iune 1878, ia'u i naue hele aku ai ma Makahaloa, ike aku la au i na keiki o Kina, e kuehu ana lakou ma ka hana ana, ma ku'u ike ana aku, me he mea la o ka oi hookahi keia  o ka pa makahiko nui ma Hawaii nei, ke haawi aku nei i ko'u mahalo piha no W.S. Akana, no kona hookele akamai ana ma ka hana ana, a o keia aina e mahiko ia nei, he aina maikai keia, he palahalaha maikai no ia, e waiho nei mai kai a hala iuka, ke ulu maikai nei ke ko, ua pomaikai no o Afona ka mea nona keia Hui mahiko.                      M. N. MAUNA.

            Kaupekuea Hilo, Hawaii.

KEKAKE HANAU HE KEIKI LIO.

E KA NUPEPA KUOKOA E; Aloha oe: - He wahi mea hou ka'u e hooili aku nei ma kahi kaawale o kou mau kolamu, oia hoi keia malalo iho.  Ma ka la 20 o keia mahina, hiki aku la wau ma Okala, a hookipa ia iho la e ko laila mau keiki lalawai, a ia makou ma ka papa aina, hai mai la lakou i keia mea hou, oia hoi keia.

            "He Kekake ko makou ua hanau iho nei i ke keiki Lio" no ko'u makemake e ike i ka oiaio, hele kino aku la wau e nana, a ku maka kuu ike ia mea e like me ka lakou hoike.  O ka lawa iho la ia o keia wahi mea hou, me kou Lunahooponopono ko'u mahalo, a me na keiki ulele hua kepau ko'u welina.                                                                                              IOSIA PALAU.

            Kuhua, Hilo Hawaii, Iune, 24 1878.

KANI HONE ANA MA LEO A KA MANU.

E KA NUPEPA KUOKOA; Aloha oe: -

            Ka hekili kani pohapoha lua i ka lewa o na lani; e uina nakolo ana hoi i na kukulu o ka honua, e naholo ana hoi ma na kaiaulu o na poai; o ke aupuni hoola, a Hooulu Lahui o D. Kalakaua.  "Ka makia hoi ia o kona Aupuni."  Eia ka leo kani, a ka nui manu o ka uka o Kahooleinapea la, ke kani uwalo mai nei ia'u.  Me he leo la no ke Kukuluaeo, a me ke kioea, e hai ana i kona inoa ponoi.  Kioea ! Kieoa !!

            Pela no hoi ka leo o keia mau manu; e pa e kolonahe mai nei i ko'u mau pepeiao.  (Poe lawe pepa ;) e i ana, me ka leo maopopo ia'u.  "I ka Nupepa KUOKOA ka makou; o ka hapa hope o keia makahiki e lawe ai, e kapae iki ae hoi makou ia i ala," pae aina.

            Eia hoi ka'u.  Aia no ia i ka mea i olu i ko oukou puuwai; o ka hoolohe wale aku no ka ke kauwa a oukou.  Ke kani mai nei nae keia nui manu.  Aohe lau oliwa i ka nuku, (dala.)  Aia ka a meheu iho ka pua o ka lehua, i ke kiko ia e na nuku o lakou; (heluhelu) alaila, kau mai ka lau oliwa i ka nuku, i pono oukou pela.  (Haawi kenikeni.)

            O ka rula o ke kiko o na manu i ka pua.  Aia a popohe mua ka pua i ka lala laau, alaila, kiko aku ka manu, e ko'u ka puu i ka wai a ka naulu.  Pela hoi kakou; e haawi mua ae kakou i ka lau oliwa; (dala,) i na luna o kakou; a me na luna hooponopono, alila, o ka inu wale no ia o kakou i ka wai o loko o ka pua, a momoni kahi kileo, a e holo ana hoi ke kuhikuhinia i ke kumu pepeiao, (heluhelu.)

            O ka nui o keia mau manu ma ka heluna 14.  A malalo aku au o lakou; luna lawe pepa.  A oia keia.  Pupuawa, J. Henry, Kuahiue, Mrs. Marry, Kaiwihaona, Miss Ruta, L. Kuhi, S. N. Kamauoha, J. L. Kuhi, Mr. Kaohumu, Keulana, Kalawaia, Makakoa, Naehu, K. Nakapapahau, Mrs. Ka. lua, Poopaa, P. S. Pono, J. Keawe, Linekona, Nihonui.

            He ma-u ia mau wahi manu; o ka uka wa-o kela la o Halona, e pili mai la i ka kaua kakele olelo ana, o na helu i hala aku la.  A pehea la hoi na apana e ae, ke emi iho nei paha, ke pii ae nei paha?  O makou mamua; eono no.  I keia wa hoi, na palua a oi.  I na penei na apana e ae; ua pii palua ka poe lawe, o ka hapa hope o ka makahiki, i ko ka hapa mua.  Me na keiki lawe akanihi i na hua kepau; ka mahalo.  Me na keiki owala, oniu huila hao ka iini hoomau.  Me ka Lunahooponopono ka walohio puuwai.   Owau no me ke aloha, noelo i ka iwi hilo.                                                                                                 J. L. K. KEALAKUHILINA.

            Lale-maloo, Koolauloa, Iune 24, 1878.

MAKE I WALOHIA.

            Me ka minamina, paumaka, ehaeha, a luuluu no hoi makou e pahola aku nei i ka lono walohia o ke kau ana mai maluna o makou i ka ukana kaumaha i ka hoi ana aku i na pilikoko, ma ke kakahiaka Sabati iho nei, Iune la 16. ua kii mai la ka elele menemene ole o ka make, a kaili aku la i ka hanu hope loa o John Atkins, a waiho iho la o ke kino kupapau i mea na kona mau makua a me na ohana e kanikau aku ai;

            Ua hanau ia o John Atkins ma Onouliiki South Kona, Hawaii, ma ka la 27, o Okat. M. H. 1844, a ua noho me ka maluhia a me ke kuonoono.  A hala wale aku la, iloko o na makahiki he 33 me na malama keu 7 me na la he 16, o kona ola ana ma keia ao.  Ua haalele iho oia mahope nei, he mau makua palupalu a he mau keiki hoi.

            He oluolu kona ano, a he hookipa i ka malihini kipa wale i kona home.  A ua mahalo ia mai oia e kekahi poe no kona heahea.  He makamaka maikai oia no ka lehulehu, a he hoa aloha oiaio hoi.  W. J. Y.

            Kalaealii, S. Kona, Hawaii Iune 28, 1878.

E hoolana i ka Manao, E mau ke Aho?

            Ka nu hou hope loa mai Nu loka mai no ka Buke Himeni Kula Sabati, Ka Lei Alii, eia no ia.  Ua hiki mai ke Poo oia Buke, oia hoi kona inoa Ka Lei Alii, me na hua nani loa.  Ina e makemake oukou ma Honolulu e ike ia Poo, e kipa ma ka hale o ka loio S. B. Dole, a nana e hoike ia oukou.

            Ua pau loa ka buke i ke pai mua ia me ka hooponoponoia o na hewa.  O ke pai tausani wale no i koe me ka hoopaa i wahi maikai loa a hoouna koke mai ma ke alanui hao a Kaleponi, a mailaila mai a Honolulu.  Ua kali loihi kakou i ka puka ana mai o keia buke maikai.  Ua ane paupau aho paha ka poe i haawi e mai i ke dala no ia buke, elike me ko waimea, ko Hilo, ko Kaumakapili, ko Kawaiahao &c, no ke kali a loihi loa, me ka ninau paha.  Auhea la ko kakou Lei Alii i hanaia e ka haku mele Hawaiia hoounaia'ku i Nu loka e pai ia ai? ua haule loa paha.  Aole ka i haule, o ka hoea mai koe.  I nui ke aho, e noho makaukau e apo koke ke puka mai.                                                                                                                                                LAIANA.

            Waimea, Hawaii, Iune 25, 1878.

NUHOU MA KAU NEI.

E KA NUPEPA KUOKOA E; Aloha oe: -

            I ka la 25 o keia malama iho nei, ua noho ka aha a ka L. K. apana e nana i ka hihia o Paakai k, no ka ona.  Ua hopu ia iho nei o Paakai me na palapala hopu elua a me elua makai, a ua heluhelu like ia imua o ka mea i hopu ia, a ua hookolokolo ia a hookuu ia.  Ka lua, ia la no, ua hookolokolo ia o Haaheo k, no ka hoopaa hewa ana i ka lio o Hoalike k, i ka Pa Aupuni, elua no makai, me elua palapala hopu no ia hihia hookahi no, ua hookolokolo ia, a ua hoopai ia o Hoaliku i na koina o ka aha $10. me $7.75 koina o ka pa aupuni.  Ke kolu, A. Hutchinsona kue ia Kaoeno k, no ka haalele hana, ua hoopaa ia o Kaoena k, i ka hale paahao, hookuu wale ia e ka makai nui, eia nae ua loaa o Kaoena, i na makai elua a me na palapala hopu elua, no ia hihia hookahi no.

            Eia ka ninau; Ua loaa no anei kahi hihia ma Honolulu, a me kau wahi e ae i hopu ia me na palapala hopu elua, me na makai elua, no ka hihia hookahi? Ina nole, ma Kau nei wale no.  Nuhou keia hana!  Aole mai na Lunakanawai mua mai, akahi wale no au a ike.                                                                                                                                                       GHARS. H. KUHIAU

            Kau Iune 27, 1878.

Hoike Ekalesia o Siloama Molokai.

            E ku'u mau makua o ka Euanelio a Iesu Karisto, na Kahunapule, a me na Elele o ka Ahahui Euanelio o ka Paeaina Hawaii i akoakoa ma Honolulu, no oukou kou aloha.

            E kala mai ia'u mamua o ko'u waiho ana aku i ka'u hoike no ka Ekalasia o Siroama, Panalau o na mai repero.  O ke kula o ka Ekalesia Siroama mai kona hoomaka ana, Dek. 23 m. h. 1866 a hiki i keia la, he 11 makahiki, me 7 malama, a e hiku makahiki malalo o ka malama ana a Rev. A. O. Porebe, Rev. S. W. Nueku, a me S. Heulu, 3 makahiki ma ka malama ana a Rev S. N. Holokahiki, a me Rev. E. Kekoa, 7 malama ma ka malama ana a G. H. E. Keaiaole, (Haiolelo,) hookahi makahiki ma ka'u malama ana me ke kokua pu o Rev. J. Kahuila i na malama hope iho nei.  Nolaila, o ka 4 keia o na Kahunapule kuwaho, akolu Kahunapule kuloko, hookahi haiolelo kuloko, a me na hoahanau 431 oia hoi 121 hoohiki manaoio, 310 komopalapala, elua luakini, hookahi piano luakini, elua hale kula, a me 41 mau nupepa "Kuokoa" a me Ko Hawaii Paeaina.

            Ke kulana o na hoahanau.  Elua ano o na hoahanau e noho nei; he poe hai pule, kupaa oiaio, a me ke aloha i ka pono, a me ia pono no a lakou i loaa ai ma ko lakou Ekalesia ponoi, au hali mai a kanu, a ulu, a oo ma Siloama nei, a o ko lakou mau kino kai waiho ma ka luakupapau o Kalewao aka, o ka lakou mau uhane ua noho pu me Karisto.  A o kekahi hapa hoi, he hua mimino, he ano e, hoihope, palaka, noho manuahi, hololua, muhee, kuai i ko lakou pono me kahi apana berena a ke Kahunapule Kakolika Damian a pela i komo ai i ka aoao Pope, ano like me Esau i kuai i kona pono pela keia poe.

            No ke Kula Sabati. - He Kahukula Sabati, a me na Kumukula Sabati, a me na haumana Kula Sabati 41.

            Ulu pono na hana o ke Kula Sabati i kekahi mau makahiki a emi i kekahi mau makahiki.

            No ka Luakini. - Ke kukuluia nei ka luakini hou i keia mau la, ua hoomaka ia i ka la 30 Mei 1878, a ke paa pono ae nei kona kino i ka hana ia.  He Hale pule maikai, ua koho iho nei makou ia Kini i komite noi dala luakini ma ke kulanakauhala o Honolulu, e oluolu e apo aloha mai ia ia.  E pule oukou no makou, owau no me ke aloha o Karisto.                    P. W. KAAWA.

            Kalaupapa Iune 17, 1878.

OLELO HOOLAHA.

RICHARD F. BICKERTON,

[PEKETONA.]

LOIO a ke KOKUA ma ke KANAWAI!

E HELE ANA OIA IMUA O NA AHAHOOkolokole a pau o keia Aupuni ma na ano hihia a pau, ina paha ma Oahu nei, a ma na Mokupuni e ae.

            Ua makaukau mau oia! ka hana ana i na Palapala; ili kunawai o kela a me kela ano.

            Ua hiki no hoi iaia ke hoaie dala aku ma ka moraki ana i na aina, ma ka ukupanee haahaa loa.

            E hanaia na hana me ka hikiwawe a ma ka uku haahaa.

            Keena Hana, Helu 23 Alanui Kalepa, elua puka ma o aku o ka hale kauka o Kauka Minuteole.                  840 1y

A. MoWAYNE,

HALE KUAI LAAU LAPAAU. A ME NA WAIALA o na ano a pau, me na SOPA ALA o na ano he nui  Ma ke kihi o Alanai Papu me Kalepa

@ 1y

WM. O. SMITH,

LOIO.

WAILUKU, MAUI.

Ua waiho oia i na Oihana Aupuni a pau a ua

makaukau e lawelawe i ka Oihana

Loio me ke kuokoa

E. O. HALL & SON.

(E. O. HOLO MA.)

NA MEA KUAI I NA MEA MAHIAI.

                        Na Lole, Na Pena, Na Aila, a me

Na ano Lako e ae a pau he lehulehu wale.

846                                                                  Kihi o Alanui Papu me Moi.                                                               1y

LOLE MAKEPONO

Ke Kuike.

E LOAA NO IA MA KAHI O

KAKELA ME KUKE!

-E LAA NA-

Ahinahina, Kalakoa,              

Keokeo, Leponalo,     

Pena, Aila, Aniani

HA MEA PIULA !

KOPA, AILA HONUA,

AILA HOOMALOO

                                                                                    Kui Kakia, Pakeke,

                                                                                    Tabu, Kaula, Noho Lio,

                                                                                    Hulu Palaki, na Pulumi.

-A HE-

AGENA NO HOI NO NA MOKUPUNI O HA-

WAII NEI NO NA

                                                                        Lainakini-nao,

                                                                        Lainakini Maoli,

                                                                        Palule Kalakoa,

                                                                        Alapia, Kelepa, Kilika,

                                                                                                            Na lole kupono i ka wawae,

                                                                                                            Palule Huluhulu,

                                                                                                            Na Lole Huluhulu,

                                                                                                            Na Lole no ka hoohehelo ana

                                                                                                            Lipini, Lihilihi, &c.

LIPINE, LIHILIHI, &c.

-A ME NA-

Mikini Humuhumu MakeponoLoa !

-A HE-

MAU MEA AI KAHI

Ka Palaoa, Kopaa,

            Raiki, Pia, Hoohu,

                        Paakai, Huaala,

                                    Pia Kulina, &c.

A he Laau Lapaau Kaulana Loa

A DR. JAYNES.

Laau Kunu,

            Laau Hoomaemae Koko,

                        Laau Hoopau Naio,

                                    Penikila, Huaale,

A ME NA LAAU HAMO, A PELA'KU!

827 3m 839

PAPA ! PAPA !

-NO-

ALLEN & ROBINSON

UA WEHE AE NEI MAUA 1

PA KUAI PAPA

-MA-

KA UWAPO O PAKAKA

                                                                                    Na Papa Ulaula o na ano a pau.

                                                                                    Na Papa Paina o na ano a pau.

                                                                                                            Na Pili Hale Ulaula.

                                                                                                            Na Pili Hale Keokeo.

                                                                                    Na Pepa Hoonani Hale,

                                                                                    Na Pepa Molina.

Na Pena a me na Aila Pena !

NA KUI O NA ANO A PAU.

NA PANI PUKA a me

NA PANI PUKA ANIANI

                        NA PANI PUKA a me

                        NA OLEPELEPE.

NA LAKO KULUKULU HALE

O NA ANO A PAU!

E KUAHA MA KE

KE KUMUKUAI HAAHAA LOA

O keia Makeke.

ALLEN & ROBINSON.                                                                  

            Honolulu, Ian. 1, 1878.                                                                                                                                               840 3m

PAPA, PAPA

AIA MA KAHI O

LEWERS & DIKSON !

(O LUI MA.)

MA KE KAHUA KAHIKO MA

Alanui Papu a me Moi!

E LOAA AI NA

Papa Nouaiki !

o kela a me keia ano.

Na Papa Nani a Paa no ke Kukulu

ana i na Hale !

Na Pani Puka, Na Puka Aniani,

            Na Olepelepe, Na Pou, Na O-a,

                        Na Papa Hele, Na Papa Ku,

                                    A me na Papa Moe nui loa

NA PILI O KA HALE

O NA ANO A PAU.

Na Pepa Hoonani, Na Pena o na Wai a pau.

            Na Kui mai ke Nui a ka Makalii.

                        Na Ami Puka, Na Ami Puka Aniani

                                    Na Ami o na ano a pau,

                        Na Alaila Pena, o kela me keia ano

            Na Aila Hoomaloo, he lehulehu wale.

Na Aila e ae o na ano a pau.

NA WAI VANIKI

-A ME NA-

WAI HOOHINUHINU NANI !

o na ano a pau loa.

NA BALAKI ANO NUI WALE

A ke hai ia aku nei ka lono i na makamaka a

pau, ua makaukau keia mau makamaka

o oukou e hoolawa aku ma

na mea a pau e pili ana

m ka laua oihana

-NO KA-

UKU HAAHAA LOA!

E like me ka mea e holo ana mawaena o

LAUA a me ka MEA KUAI.

E hele mai!      E na Makamaka!!

A e lawa no hoi ko oukou makemake

me ka oluolu a me ka maikai!

845 tf

KOPA KUKAEPELE

GLENN

AOLE LUA NO KA HOOMAE-

MAE I KA ILI!

He mea hoopau i na eha,

            Na Ili Puupuu,

                        A he hoomaemae i na mea ino,

                                    A he hoopau Lumatika,

                                                A he kopa auau no hoi

O keia Kopa ka oi aku o ka mea maika

I waihoia mai imua o kanaka.

Aole wale no ka Hoopau ana i ka Huehue

Ili Poha, Wela la, Luluaina, a me

na mea e ae o ka Ili;

A ma ia holoi ana, o ka hoopalupalu pu ke-

kahi i ka Ili, a keia

Laau Hoomaemae lua ole e hana ai.

O ka hoemi ana iho i na mai o ka Ili, a o

ke pale aku i ka mai mai na lole e na

Mai Lele, oia kekahi. O na ohana

âme na poe makaikai, in a

e hoolako lakou

i keia

KOPA HOOMAEMAE LUA OLE!

ALAILA, UA LANAKILA LAKOU.

He hoopau i ka lehu o ke poo,

A he kopa no hoi e kaohi mai ai

I ka lauoho mai ka hina ana.

Ua hooia nui mai na Kauka no ka maikai o

keia Kopa!

E loaa no ma kahi o

M. McINERNY.        

            Kihi no Alanui Papa ame Kalepa                                                                                                                                840 3m