Ka Nupepa Kuokoa, Volume XVII, Number 31, 3 August 1878 — Page 4
| This text was transcribed by: | Michael |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
KA NUPEPA
Kuokoa me ke Au Okoa
I HUIIA.
No ka Makahiki, $2. Eono Mahina, $1
Dala Kuike ka Rula.
AUGATE 3, 1878.
Brightly Gleams Our Banner.
Goodly Pearls, p 44.
1
Nana i ka bana
I olino mau,
Bana e kuhi ana
I ka home ao.
Naue ano koa,
Naue halelu,
Naue, e na hoa,
Me ke mêle pu.
Cho.-Nana i ka bana,
Bana o Iesu,
Bana welo nani,
Hahai no a mau.
2
Iesu no ka Luna,
Ke Lii no makou,
Ma kou bana nani
Naue olí no.
Nui ka haalele,
Hele a lalau-
Nau e paa i hele
Ma ke ala ao.
Cho.-Nana: ka bana, &c.
3
Nau e kiai pono,
Alakai maikai,
Pale i na ino,
I na enemi.
Nou mai no ka mana,
Me ka ikaika pu.
Uhi mai kou bana,
Bana o Iesu.
Cho.-Nana i ka bana, &c.
4
Bana kuhi pono
I ke ao ma o,
Kahi o na kini,
Kini mele mau.
Nau e kai imua,
Kai a pololei
I ka home lani
Home malu e.
Cho.-Nana i ka bana, &c.
HAWAII.
Kaawina Kula Sabati.
HELU 7 SABATI AU. 18, 1878.
KUMUHANA:
Ka wahine kane make no Naina. Pauku
Baibala. Luk. 7; 11-17.
11 Eia hoi kekahi, ia la ae, hele aku la ia i ke kulanakauhale, i kapaia o Naina ; he nui na haumana ana i hele pu me ia, a me na kanaka he nui loa.
12 A hookokoke aku la oia i ka ipuka o na kulanakauhale la, aia hoi, ua haliia mai la mawaho kekahi kanaka make, ke keiki kamakahi a kona makuwahine, he wahinekanemake ia ; a nui mai la ko ke kulanakauhale me au wahine la.
13 A ike ka Haku ia ia, hu ae la kona aloha ia ia, i mai la oia ia ia, Mai uwe oe.
14 Hele ae la Iesu a hoopa ae la i ka manele : ku malie iho la ka poe e hali ana. I ae la ia ! E ke kanaka hou, ke kauoha aku nei au ia oe, E ala'e.
15 Alaila noho mai la iluna au kanaka make la, a hoomaka mai la e olelo : a haawi ae la o Iesu ia ia i kona makuwahine.
16 A kau mai ka weliweli maluna o lakou a pau, hoonani aku lakou i ke Akua, i aku la, Ua puka mai nei ke kaula nui mawaena o kakou ; au ike mai ke Akua i kona poe kanaka.
17 Ua kui aku la kona kaulana, ma ludea a puni, a me ka aina a pau e kokoke mai ana.
Pauku Gula. p. 12.
Manao nui. Pono ke uwe me ka poe e uwe ana a kokua ia lakou.
P. 11. Ia la ae, oia ka la mahope iho o ko Iesu hoola ana i ke kauwa a ka lunahaneri. E kaahele ana Iesu ma Galilaia, e haiolelo ana, e hoola ana i ka poe mai, e hooluolu ana i ka poe kaumaha. Nui na haumana me na kanaka i hele pu e lohe i kana mau olelo, a e ike i kana mau hana mana. He kulanakauhale ma ka hema ae o Nazareta. Naina ka inoa. Ma ko Iesu ano Akua, ike oia he pilikia ilaila ; a nolaila paha kona naue ana ilaila me na haumana.
P. 12. Ua hoopuni ia ua kulanakauhanei i ka pa pohaku. I ka hookokoke ana i ka puka o ka pa, ua ike ia he huakai kanikau e hoolewa ana i ke kupapau mawaho o ka pa, no ka mea, aole pono ke kanuia na mea make iloko o ka pa. Ma ka ninau ana paha, au akaka, he kanaka ui keia kupapau, he keiki kamakahi a kona makuwahine, oia hoi he wahine kane make. E lawe ana ka huaki ia kupapau e kanu iho. E uwe nui ana ka makuwahine.
P. 13. Iesu keia Haku. Hu ae kona aloha i ka makuwahine, a papa aku, mai uwe oe. Manao oia e hana i ka mea e pau ai kona uwe ana.
P. 13. Eia ua hana nei, hoopa Iesu i ke manele, me ka olelo paha, e ku malie ka poe halihali. A ku malie no lakou me ka manao aha? E ke kanaka hou, wahi ana, ke kauoha aku nei au ia oe, e ala'e. Pehea nae e hiki ai i ka mea make, e ala'e?
P. 15. Ua ala nae ka mea make, a noho iluna, a hoomaka e olelo. Ua hemo wale ka hainaka ma ke poo, me na mea paa a pau, a lawe Iesu ia ia a hoihoi aku i kona makuwahine. Ka mana keia owai.
P. 16. Ua lohe paha na kanaka o Naina i ka Iesu mau hana, akahi nae a ike maka, Nolaila makau lakou, a mahalo hoonani i ke Akua, me ka olelo, ke kaula nui paha keia e puka mai ana. Akahi no a hooko ke Akua i kana olelo mua, e ike, a e kokua ia kakau. Nana Kau. 18; 15, 18.
P. 17. Hookaulanaia ka inoa, na hana mana, na hana aloha a Iesu ma na wahi a pau a puni Galilaia me Iudea, &c.
Ehia ano o Iesu i hoikeia ma keia mau pauku? Heaha a mahea Naina? He wahine aha malaila? Heaha kona kaumaha? No ke aha ko Iesu hele ana ilaila? Ma ke aha i hiki ai ka mea make ke ala? Hai mai i kekahi mau make e ae a Iesu i hoala ai? Mat. 9:25. loa. 11:43, 44. Ua kakauia anei keia hana a Iesu ma kahi e? Me Iesu anei Mataio in a ia wa ? He kanaka aha keia i make? Make anei na kanaka ui, na kamalii? Ina pela heaha ka pono? Ma ke aha kakou e hoohalike ai me Iesu?
Ma ka hele ana i na wahi pilikia, e uwe pu me ka poe e uwe ana, a e hauoli pu me ka poe e hauoli ana, e hooluolu i ka poe kanikau, e kokua i na wahine kane make me ka poe ilihune.
Ua hele Iesu i kekahi manawa e hoola i kekahi kaikamahine i make, hoomaloka nae kekahi poe, hoole aole hiki, ua make loa. Aole anei pela kekahi poe o keia wa, hoole, aole hiki ke hoohuliia, ke hoolaia na kaikamahine Hawaii no ke kolohe loa, a make loa iloko o ka hewa?
Ua hele Iesu i kekahi wa e hooluolu i kekahi mau wahine, ua make ke kaikunane, owai lakou? Pehea hoi ke kanalua ana o na wahine? Aole anei pela kekahi poe, hoole, aole hiki ke hoolaia ka poe iloko o na lua kupapau?
Nui ke kanalua, pehea e hiki ai i ka poe hookuli, hoomaloka, paakiki ke ala, a huli, a ola? Aia no ia Iesu ka mana e hiki ai. E pau ke kanalua.
Haawina no Aug. 25, Luka 7:40-50.
Leta a ua Makamaka.
E KUI LIMA PU KAUA E KE HOA.
E KA NUPEPA KUOKOA E; Aloha oe: -
Ka Opua hiki Kakahiaka i ka ili o ke kai, ka hoa kuwili haihai olelo o na po Kehau anu, Ka lei Pikake onaona i ka maka o ka Lehulehu, Ka hoa kaunu hiolani o na mea hou, Ka lei Lehua i na maka o ke hoa, ka NUPEPA KUOKOA; Nolaila ke puana ae nei au i keia wahi mau laina mele.
"Kaua pu no i laila,
I ka lawe NUPEPA KUOKOA,
I like i ka Wai liu-la,
O na hunahuna mea hou."
Ke kono aku nei au i ka poe aku i koe, aole hoi no ka poe, e lawe ana i kona kino; ua ike lakou i na hunahuna mea ai, Oiai, na leo e pa-e mau nei, i na wa a pau; nolaila, E o'u mau kui lima, E ala! E ala!! eia ka leo kahea a kuu mua, J. L. K. Kealakuhilima, i na hanau muli, lawe Nupepa ole, Ka lei hulu e kohu ai ka ohumu ana; i ka pea Heke luna o Haleakala, Nolaila, ke puana hou ae nei no au i keia wahi mau laina mele hou.
"Pehea la au e ke hoa,
E kahea hou ia mai ai,
E lawe Nupepa paha au,
I pa ole au i ka leo."
Me ke aloha pu no. H. M. K. WINI.
Papaikou, Hilo, July, 17; 1878.
He Pua Lehua i ka Wekiu.
E KA NUPEPA KUOKOA E; Aloha oe:-
Ka Iiwi polena o ka uka iu ano la i Kaana, ua ana iliwai like ia hoi na wai pua lehua i ka nui manu la o kanahele. Ua hele wale no oe a haiamu ke ala, me ke onaona i ko kino, me ou mau onohi hoi, me he mea ala, o ke kilikilihuna o ka po ahi-lele o Kamaile, kai hoonoho ia aku e ou mau kii onohi, ka hele a nonono ula weo, i na Poaono a pau, ke hoea mai oe, pili mai ke mele a lakou la.
Koiawe malie i ka lai,
Ka ua nono ula i ka moana,
Aole no au e pauaho ana,
I ka hana nani a ke "Kuokoa,"
Kilihuna i ka maka o Limaloa,
Konohiki lai o Mana,
He mana nui kou,
E upiki ana i ka hai puuwai,
Hoi mai kaua la e pili,
Eia wau ke "Kuokoa,"
Ko hoa kuwili mua.
E nana iki mai kaua i kekahi inau hana pono o Laie.
NO KA HUI LIHAUPUAIKAWAO.
Ke hoomau nei no keia hui i ka lakou hana. Eia ka mea nani a'u i mahalo ai, ma ia hui. Ua kau ia ka inoa o ka mea nona ke Kihei Apana, me ka makahiki i humu ia'i, iluna o ke Kihei Apana. I ka nana aku, me he mea ala, na na keiki o ka Hale pai, i hoonoho me na kepau penei, RAHELA; m. h. 1878. Ma kekahi mau kapa e ae no kekahi mau inoa. Aole au i ike, ke ulu hou mai nei ka kekahi hana o keia ano. (Humu Kihei Apana,) pela ka lohe.
HUI POKII KEIKI KANE.
Ka lakou mau hana; kanu uwala, ipuhaole, ipuala, ipu-pu, maia, ko, &c. Peresidena oia hui; S. M. K. Imaikalani, hope Peresidena, M. K. Kou opio. Ke kanu nei keia poe, a me lakou la ae ma na loi kalo i maloo, no ka nui o ka wela. O ka hapanui o na loi kalo; kai lilo i kula panoa.
HUI ALOEHUKAI
He hui kuai upena keia, Peresidena, K. H. Kaleohano, Hope Peresidena, D. W. Kamaka, L. W. K. Hiapoole, Kakauolelo, L. W. K. Amaka. Peresidena o ka poe lawaia; Kalimahaalulu o Kualakai, na kamaaina hoi ia Laie.
Ua makaukau na upena, o ka alo aku koe i ka lawaia, i ka ehukai. O keia na pua lehua i ka wekiu a'u e kaena nei, he mau hana e kuonoono ai ka noho ana.
He ma-u ia, hoonui aku i ka leo o ka poe heluhelu, e hui lokahi ko'u welina no na Keonimana o ka Hale pai, me na L. H. pu no hoi a pau.
NO KA WELA O KA LA.
Nui loa ka wela o kala ma Laie nei, o ka nui o na loi kalo i ike ia mamua, ua maloo i keia wa, a he kula lio. O ka hapakolu paha, a oi aku, o na loi kalo ke lilo nei i ke keiki niho wakawaka o ka lewa, e hoomaloo nei, me kona mau alelo manamana; a oi lua ole, e kikoo mai nei i na wahi puna alalo nei; a e hoolilo i mea ole. Kanu iho nei kahi poe i na lau uwala; me ka manao e ulu mai, pau hoi kau wahi pilikia malaila, aole nae he ulu.
NO KA WI.
Ke holapu mai nei keia wahi menehune maanei ; e aho iki hoi mamua aku nei, he hapalua ko ka pakeke ai paa, ke pinana loa ae nei i ke dala hookahi, pela ka ike iho ma ke pai, e kuai ia nei, elua pai piha ae kahi pakeke. Ke hoao nei hoi kahi poe i ka ka haole ai, he palaoa.
NO KA PA AINA.
No ka nui o ka maloo; ua hoala ia keia pa ma ka aina kalo, i mea kanu i ka uwala, ipu, maia, ma na wahi i maloo o na loi, ke hiki hoi ke ulu.
He mahalo piha ko'u, i ke komite paipai hana, no ka mea, aole eleu like na hoa hana pa; e hilinai ana kekahi ia Puna, e ka lele ana hoi kahi i Kau, owau maanei i kekahi la.
Ua leo iki kahi komite, K. H. Kaleohano, i ke kahea i na hoa hana; e uleu like mai. A ua hooikaika no kekahi poe; ma ia kani ana o ka o le a Makalelana, K. H. K. komite paipai. A ua paa i ka pule hookahi me ka hapa. O ka loihi o ka pa, 36 kaulahao a oi aku. He mau pu laau mai kuahiwi mai; me na kaola; ia S. M. Molena kahi hapa.
POE LAWE KUOKOA.
O ka nui o ka poe lawe "Kuokoa" pu me a'u ma Laie nei. I ka hapa hope o keia makahiki, 17. Aole au i ike aku i ka poe me i ala, K. H. Kaleohano, no ka mea, elua maua maanei, Owau no me ke aloha.
J. L. K. KEALAKUHILINA.
Laie Maloo, July 15, 1878.
Kaomi i ke Kino ka lini.
E KA NUPEPA KUOKOA E; Aloha oe:-
Ka opule moe one o Napuauhi, i huinahalike ia ko olua mau kino; i paele ku ia hoi i na wai ele a ka uliuli; me na kiko keokeo; e panio nanahe lua i ka poli o Haena. I kike ia mai la hoi ke koa, i ka laau pakuikui a ke keiki kamaeu Kuapakaa, lana hoi ma ka olalo, o ka wa i aui-aku la, i ka wa i kuapaio ai lakou me ke alii Keawenuiaumi, ia ia e kakele ana i na ale o ka moana. "He la ino keia" wahi ana, hoole lakou la, a au ino koke iho la: e like kana, (Kuapakaa.)
E olu hoohie mai kaua; me ka ipo moe poli la na ke aloha, e apa kahuli ana i ka lolo o kuu iwiw, a me na ami o ke kino. E ulele ana hoi kou kino, me ke kiani ana ma na welelau; ko kaua aina kulaiwiw, m@ ka la hoea mai i Kumukahi, a niau palamimo iho hoi malalo, o ka mole olu o Lehua.
Mai ko'u wa i noho ai, me ke kuwili malalo o kou mau paia ala; a me ka nohea lua ole o kou mau kii onohi. Oia ka hapa mua o keia makahiki, ke mau nei no ka iini ku hohonu, ka anoi lipolipo i ko'u nui kino, me he ohu pohina la, e uhi paapu ana i na kuahiwi; i ka wa a kaua noe, e kilikilihuna ana i ka lau laau.
Owau, a me o'u mau Haku, 18; (poe lawe pepa.) Hookahi kalaina a ka hauoli piha, ka ua mea o ka nani o ke"Kuokoa." O ka nani kamahao paha ia la; ke pakolu iho la ka poe lawe; o keia hapa hope, i ko ka mua. Oia, eono mamua. Ua umi wale iho paha ka ono, ka anoi, me ka manao e pau, aole nae. Ua kua maka okoa, lawe imua o ka wahine hele la o Kaiona, (KUOKOA). Ka iini a ka ui nohea o Gomohera, ka pili koolua o Mariadane.
O kou ano i kinohi, he nani moakaka ia, oiai hoi e like me ka hau o Maunakea, kalana keokeo. I ka wa e hoopili ia aku ai, na hua maderia metala; e na lima noeau o ka Halepai; a kau ia aku ma ka pela uwea, ia wa oe e hoohiamoe ia aku ai, he mau minute helu, a ea mai oukou; he lehulehu wale, ua panio ia na kino; me he mau kikola no ka Leobati. Aia ma ia mau kiko; he mau kiaha wai meri; na ono hoi o kela ano, keia ano, a oia ka'u e puana ae nei.
Ua ono i ko'u puu
E like me ka wai meri,
Momona i ko'u kileo,
Kuhikuhinia i kuu kino.
O kou mau kiko ma ka aoao, o ko makou kuleana ia, i pili@ana ai kakou; @ ka lihilihi kuku mau no ia o ko'u puuwai, e ake e ake no a ike i ka nani o ke "Kuokoa," mahia ae la keia koii a loko.
I ka wa i hiki mai ai oe i ko'u hale, e ani peahi ana Limaloa, konohiki la o Mana. Eia ka hale la, e kipa, e ai, a moe iho, ola na iwi o kamahele, ola pu hoi ka L. H. ua laahia i ka leo a ke aloha.
Pa-e mai la no hoi ka leo o na Haku; (poe lawe pepa.) "Homai ka'u Nupepa KUOKOA, o kau ia e puana ae nei.
E lawe oe la e ke aloha,
I ka ahihi lau palai o kanahele.
A hiki aku ke ala me ke onaona,
Ua mae ka ono ua kuhunia,
I ka lau apa ia e ka makemake,
E welina oukou e na keiki o ka Halepai; ka L. H. hoi me na hope, pau pu i ka anoai. AHAAINA HUI MANAWALEA MA LAIE-WAI.
Ma ka hora 12 awakea, o ka la 6 o July, Poaono. Ua malama hou ae keia hui; i ko lakou la i kukulu ai, e like me ka'u i hoike mua aku ai. Ua hoomaka ia ka hana ma ke kai ana o ka huakai a ka Hui opio keiki kane, mai ka hale noho mai o M. K. Kou opio, e kii ana i ka Hui manawalea, ma ka hale noho o Mr. R. Nakapaahu, kahi i hoonoho ia ai ka huakei, e na komite Mrs. Kaiha, Kou, Mrs. H. Hauhau, me Mrs. Haaheo, me ka Hui opio kaikamahine malaila.
HOONOHO ANA I KA HUAKAI.
M. K. Kou opio kakauolelo, ke alakai, paa Hae Hawaii, na hookani pahu, puhi ohe, Hui opio keiki kane, Peresidena o ka Hui Manawalea, Mrs. Kapo, Puuku, Kaahanui, ko lakou paa Hae keokeo aku, Mr. H. Hanakaea, i hana ia ma ke poo, e like me ko ka Hae Hawaii, i kau ia hoi na hua olelo, e like me nei. "A. H. Manawalea, Laie ka Home," Hui opio kaikamahine aku, ko lakou Peresidena mamu, Lucy Kahaulelio.
Ua kahiko piha ia keia mau Hui, me na aahu keokeo, i ano like me ka ohu pohina e uhi paa ana i na lau laau o ke kuahiwi, i ka wa e kupinai ana ka ua noe. Ma ke poo o ka Hui opio kaikamahine; he lau palai, i awili pu ia ka lei pua he-i.
I ka ike aku, a na kii onohi o ka lehuulehu, e haiamu ana ma ka malu kohaihai o Pihanarose, kohu like me ka hau o Maunakea ke aiai, e uhi halii ana i ke kula o Pahiahale, I ka wa a ka huaki, e kai ana i ka Hema, ano like no hoi me ka lalani opua, e haaheo ana i ka lewa.
Huli komohana, e kii ana i ka Peresidena o ka ekalesia, me kona ohana; a komo i ka luakini. Ua makaukau na mea ai malaila. Himeni Hui opio kaikamahine, pule o H. P. Rikeke, paina mua ka huakai, mahope ke anaina. NA HANA WA KA LUAKINI.
Ia H. K. Kuakaha, na hana oia wa. Ua koho ke komite o ka manawa, i keia poe inoa malalo; e hai manao, me ke kipona pu ia me na himeni; S. M. Molena, H. P. Rikeke, T. B. Kane, T. L. Kuhi, Mrs. Aulani, H. Hanakaea, Mrs. Kapo, H. K. Kuaha, Mrs. H. Napapale, Mrs. Kaahanui, Mrs. Kealohanui. He mau manao maikai, kai pahola ia e keia poe; e pili ana i na Hui, me ka maluhia na hana.
Hoopanee ka halawai, i kela July, hooholo ia; himeni, hookuu ia ka halawai, me ka pule a H. P. Rikeke, e welina oukou a pau loa; na keonimana hooponopono pepa. Owau me ke aloha. J. L. K. KEALAKUHILIMA.
Laie-Maloo, July, 1878.
MAKE HIKIWAWE. -Ma ke ahiahi o ka Poalima July 12 ua kii mai la ka mea mana loa i ka hanu hope loa o Elder J. Kaohimaunu ma Laie, a lawe aku la; a au waiho iho la oia he wahine, he keiki, e paiauma aku ana ma keia aoao o ka luakupapau. O ka nui o kona mau la o ke ola ana ma keia ao, he 57 mak, 6 mal, me 12 la, He kanaka oluolu oia he heahea he hookipa i ka malihini; a nona hoi keia wahi Kanaenae.
"Kani uina nakolo kapihe,
Uina nakolo ke auhe-e;
Pili kua waha ke Kaumaha,
Hii ka minamina ma ke alo,
Auwe! alala i Lanihuli,
Huli makou aole oe,
Aia paha oe i Manua."
K. H. K. KUAKAHA.
Laiewai, Koolauloa, Iulai 15, 1878.
MOOLELO O KA
AHAOLELO O 1878.
[Koena mai ku Aoao Ekahi mai.]
NA HANA O KA LA.
Heluhelu alua ana o ka bila kanawai e hoololi ai i ka mokuna 16 o na kanawai o 1870, e pili ana i ke oki mare.
Ma ke noi a Hon. Kamika, ua haawiia ka bila i ke komite hookolokolo.
Heluhelu alua ana o ka bila kanawai e hoomana ana i na haku hana e malama i na auhau pilikino o na paahana malalo o lakou. Ma ke noi a ke Kuhina o ko na aina e, ua haawiia ka bila i ke komite wae. Eia ke komite, Kuhina o ko na aina e, Loio Kuhina, Paniani, A. Kaukau a me Kanealii.
Heluhelu alua ana o ka bila kanawai e hoopau ai i ka pauku 5, mokuna 29, o 1872 e pili ana i na uku loio.
Ma ke noi a Hon. Kamika, ua hoopanee ia a noonoo pu me kana bila.
Heluhelu alua ana o ka bila kanawai e hoololi ai i ka pauku 1419 o ke Kanawai Kivila.
Mamua o ka ninau ana e hoopanee loa i ka bila e like me ka manao o ke komite, nonoi mai o Hon. Kaoliko, e kakauia na ae a me na hoole, hooholoia.
Ma ka ninau, ua hoopanee loa ia ka bila eia ka poe manao e hoopanee loa i ka bila, na lii Kipi, Kapena, Loio Kuhina, Waila, Bihopa, Kanoa, Kuihelani, Kahanu, Moanauli, na Hons. Malo, Hupau, Aholo, J. A. Kaukau, Kamika, Kakela, Kamauoha, Kauai, Nakaleka, Kupihea, he 19 ka huina.
Eia ka poe kokua i ka bila, ke lii Kaeo, na Hons. Keau, Paniani, Moanauli Jr., Kaoliko; Kaiaikawaha, Kaanaana, Kipikona, Kanealii, Hanuna, Nawahi, Mahoe, Pilipo, Kealawaa, A. Kaukau, Palohau, he 16 ka huina.
Heluhelu alua ana o ka bila kanawai e haawi ai i ka mana e hookaawale i na dala $100,000 no ka hookaa ana i ka aie lahui.
Ma ke noi a Hon. Kupau, ua hoopanee loa i ka bila.
Heluhelu alua ana o ka hoololi i manaoia no ka pauku 56 o ke Kumukanawai, e like me na hoakaka ana a ka pauku 80. Noi mai ka Hon. Kanealii, no ka hiki ana i ka hora 12, nolaila, e kapae na rula; hooholoia.
Mahope o ka noonoo ana, au hooleia ke noi e hoopanee i ka bila, nolaila, ua haawi ia ka bila i ke komite waiwai.
Ma ke noi a Hon. Aholo, ua hoopanee ka Hale a noho hou i ka Poakahi hora 10 am.
OLELO HOOLAHA.
RICHARD F. BICKERTON,
[PEKETONA.]
LOIO a he KOKUA ma ke KANAWAI!
E HELE ANA OIA IMUA O NA AHAHOOKOLOKOLO a pau o keia Aupuni ma na ano hihia a pau, ina paha ma Oahu nei, a ma na Mokupuni e ae.
Ua makaukuu mau ola i ka hana ana i na Palapala pili kanawai o kela a me keia ano.
Ua hiki no hoi iaia ke hoaie dala aku ma ka moraki ana ina aina, me ka ukupanee haahaa loa.
E hanaia na hana me ka hikiwawe a ma ka uku haahaa.
Keena hana, Helu 23 Alanui Kalepa, elua puka ma o aku o ka hale kauka o Kauka Minuteole. 840 1y
A. MoWAYNE,
HALE KUAI LAAU LAPAAU. A ME NA WAIALA o na ano a pau, me na SOPA ALA o na ano he nui wale. Ma ke kihi o Alanui Papu me Kalepa.
840 1y
WM. O. SMITH,
LOIO.
WAILUKU, MAUI.
Ua waiho oia i na Oihana Aupuni a pau a ua
makaukau e lawelawe i ka Oihana
Loio me ke kuokoa. [840 6m
E. O. HALL & SON.
(E. O. HOLO MA.)
NA MEA KUAI I NA MEA MAHIAI,
Na Lole, Na Pena, Na Aila, a me
Na ano Lako e ae a pau he lehulehu wale.
846 Kihi o Alanui Papu me Moi. 1y
LOLE MAKEPONO
Ke Kuike.
E LOAA NO IA MA KAHI O
KAKELA ME KUKE!
-E LAA NA-
Ahinahina, Kalakoa,
Keokeo, Leponalo,
Pena, Aila, Aniani,
HA MEA PIULA !
KOPA, AILA HONUA,
AILA HOOMALOO
Kui Kakia, Pakeke,
Tabu, Kaula, Noho Lio,
Hulu Palaki, na Pulumi.
-A HE-
AGENA NO HOI NO NA MOKUPUNI O HA-
WAII NEI NO NA
Lainakini-nao,
Lainakini Maoli,
Palulue Kalakoa,
Alapia, Kelepa, Kilika,
Na lole kupono i ka wawae,
Palule Huluhulu,
Na Lole Huluhulu,
Na Lole no ka hoohehelo ana
Lipini, Lihilihi, &c.
@IPINE, LIHILIHI, &C.
-A ME NA-
Mikini Humuhumu MakeponoLoa !
-A HE-
MAU MEA AI KAHI
Ka Palaoa, Kopaa.
Raiki, Pia. Hoohu,
Paakai, Huaala,
Pia Kulina, &c.
A he Laau Lapaau Kaulana Loa
A DR. JAYNES.
Laau Kunu,
Laau Hoomaemae Koko,
Laau Hoopau Naio,
Penikila, Huaale,
A ME NA LAAU HAMO, A PELA'KU !
827 3m 839
PAPA ! PAPA !
-NO-
ALLEN & ROBINSON
UA WEHE AE NEI MAUA 1
PA KUAI PAPA
-MA-
KA UWAPO O PAKAKA
Na Papa Ulaula o na ano a pau.
Na Papa Paina o na ano a pau.
Na Pili Hale Ulaula.
Na Pili Hale Keokeo.
Na Pepa Hoonani Hale,
Na Pepa Molina.
Na Pena a me na Aila Pena !
NA KUI O NA ANO A PAU.
NA PANI PUKA a me
NA PANI PUKA ANIANI.
NA PANI PUKA a me
NA OLEPELEPE.
NA LAKO KUKULU HALE
O NA ANO A PAU!
E KUAIIA MA KE
KE KUMUKUAI HAAHAA LOA
O keia Makeke.
ALLEN & ROBINSON.
Honolulu, Ian. 1, 1878. 840 3m
PAPA, PAPA
AIA MA KAHI O
LEWERS & DICKSON !
(O LUI MA.)
MA KE KAHUA KAHIKO MA
Alanui Papu a me Moi!
E LOAA AI NA
Papa Nouaiki!
o kela a me keia ano.
Na Papa Nani a Paa no ke Kukulu
ana i na Hale!
Na Pani Puka, Na Puka Aniani.
Na Olepelepe, Na Pou, Na O-a,
Na Papa Hele, Na Papa Ku,
A me na Papa Moe nui l@a.
NA PILI O KA HALE
O NA ANO A PAU.
Na Pepa Hoonani, Na Pena o na Wai a pau.
Na Kui mai ke Nui a ka Makalii,
Na Ami Puka, Na Ami Puka Aniani.
Na Ami o na ano a pau.
Na Aila Pena, o kela me keia a@@.
Na Aila Hoomaloo, he lehulehu wale.
Na Aila e ae o na ano a pau.
NA WAI VANIKI
-A ME NA-
WAI HOOHINUHINU NANI:
o na ano a pau loa.
NA BALAKI ANO NUI WALE:
A ke hai ia aku nei ka lono i na makamaka a
pau, ua makaukau keia mau makamaka
o oukou e hoolawa aku ma
na mea a pau e pili ana
ma ka laua oihana
-NO KA-
UKU HAAHAA LOA!
E like me ka mea e holo ana mawaena o
LAUA a me ka MEA KUAI.
E hele mai! E na Makamaka!
A e lawa no hoi ko oukou makemake
me ka oluolu a me ka maikai!
845 tf
KOPA KUKAEPELE
-A-
GLENN
AOLE NO KA HOOMAE
MAE I KA ILI!
He mea hoopau i na eha,
Na Ili Puupuu,
A he hoomaemae i na mea ino.
A he hoopau Lumatika,
A he kopa auau no h@
O keia Kopa ka oi aku o ku mea mai@@
I waihoia mai imua o kanaka.
Aole wale no ka Hoopau ana i ka Huehu
Ili Poha, Wela la, Luluaina, a me
na mea e ae o ka Ili;
A ma ia holoi ana, o ka hoopalupalu pu k@
kahi i ka Ili, a keia
Laau Hoomaemae lua ole e hana ai.
O ka hoemi ana iho i na mai o ka lii, a
ke pale aku i ka mai mai na lole e na
Mai Lele, oia kekahi. O na ohana
âme na poe makaikai, in a
e hoolako lakou
i keia
KOPA HOOMAEMAE LUA OLE!
ALAILA, UA LANAKILA LAKOU.
He hoopau i ka lehu o ke poo,
A he Kopa no hoi e kaohi mai ai
I ka lauoho mai ka hina ana.
Ua hooia nui mai na Kauka no ka m@@kai
keia Kopa!
E loaa no ma kahi o
M. McINERNY.
Kihi o na Alanui Papu me Kalepa