Ka Nupepa Kuokoa, Volume XVII, Number 34, 24 August 1878 — Page 4
| This text was transcribed by: | Malialani Cabaniss |
| This work is dedicated to: | Hawaiinuiakea School of Hawaiian Knowledge |
Ka Nupepa Kuokoa
KE KILOHANA POOKELA NO KA LAHUI HAWAII.
KA NUPEPA
Kuokoa me ke Au Okoa
I HUIIA.
No ka Makahiki 82. Eono Mahina, 81 Dala Kuike ka Rula
AUGATE 24, 1878.
HOOLAHA EUANELIO.
E halawai ana ka Ahahui Euanelio o Hawaii Hikiae ma ka Poalua elua o Sept. 1878. Hora 1 p.m. Ke kono ia aku nei na kahu a me na elele e eleu ae. Ma ke kauoha.
J.N. KAMOKU.
Kakauolelo Puula, Puna, Iulai 29, 1878.
871 5t
Over to Canaan I'm Going.
Goodly Pearls p 68.
1
Ia i ka @@@@ kuu naue
E hui pu ae me lakou,
Mai ko ke ao nei mau mauna
I kela ao nani ma o
Malaila kuu aina, kuu home,
Na Iesu i hoonani ae
Io i ka lani kuu naue
E hui a oli pu ae.
Cho.--E pa na lira lani no ʻ u
Ke komo aku au.
2
Io i ka lani kuu naue
I kahi e pomaikai ai
Io me na hoa aloha.
Malaila pu no e maha ʻ i.
Ua pio, ua pau kuu iini,
Kuu koko i koonei waiwai.
Io i ka lani kuu naue
E hui a oli pu ae.
Cho.--E pa na lira lani no ʻ u, &c.,
3
Io i ka lani kuu naue
Mai keia ao hooluhi ae.
No ke aha la kuu kanalua?
Iesu no kuu Hoa maikai.
Aole loa au e makau la ke alo moi ko ke ao nei.
Io i ka lani kuu naue
E hui a oli pu ae.
Cho.--E pa na lira lani no ʻ u
Ke komo aku au.
Io i ka lani kuu naue.
E hui a oli pu mau.
HAWAII.
Haawina Kula Sabati.
HELU 10 SABATI SEPT. 8, 1878.
KUMUHANA.
Ke kanaka aleha no Samaria. Pauku Baibala, Luka. 10; 30-37.
30 Olelo hou mai la o Iesu, i mai la, O kekahi kanaka e iho ana mai Ierusalema i Ieriko, a haule iho la iwaena o na powa, kaili ae la lakou i kona kapa, pepehi iho la, a haalele aku la ia @@, e waiho ana me ka aneane make.
31 A iho no kekahi kahuna pule ma ia alanui, a ike aku la ia ia, maalo wale ae la ma kekahi aoao.
32 Pela no hoi kekahi pua na Levi, i kona hiki ana ma ia wahi, hele ia a nana aku la maale ae la ia ma kekahi aoao.
33 Aka, o kekahi kanaka no Samaria, i kena hele ana, hiki aku la ia i kahi ona e waiho ana; a ike aku la ia ia, hu ae la kona aloha ia ia.
34 Hele iho la io na la a wahi iho la i kona mau eha e ninini ana i ka aila a me ka waena iloko, a kau ae la ia ia maluna o kona holoholona iho, a lawe ae la ia ia i ka hale hookipa, a malama iho la ia ia.
35 A a la ne. i kona hele ana ʻ ku, unuhi ae la ia i na denari elua, a haawi aku i ka mea nona ka hale, i aku la ia ia, E malama oe ia ia nei; a oi aku kau mea lilo, a hoi au na ʻ u e oku aku ia oe.
36 A o keia mau kanaka a ekolu, owai ia ka hoalauna, i kou manao, no ke kanaka i haule iwaena o na powa?
37 Hai aku la ia, O ka mea i hana lokomaikai ia ia. I mai la o Iesu, E hele oe a e hoohalike me ia.
Paulu Gula. Gal. 5; 14. Hoopaanaau.
Manao nui. Pono ke aloha a kokua i ka poe pilikia.
Mele. Him. 356. "E na hoahanau aloha." p. 1, 3.
Pule i hoopiha ia i ke aloha io i ka poe pilikia.
Ka Wehewehe me ka Ninau ana.
He olelo kike keia mawaena o na mea elua, oia hoi, kekahi kakaolelo me Iesu. He ano like, kakaolelo, kakauolelo, aole nae i like lea. Wehewehe no laua elua i na kanawai o Mose. Ua oi nae ka naauao o na kakaolelo. Na kakaolelo Hawaii, he poe naauao lakou mamua. He mau hoakaka o na ʻ lii no na kanawai, no na mea e pono ai ke aupuni. He mau hoiolelo. Ua pau ia inoa i keia wa, ka huaolelo, loio, kona pani. O kakauolelo, he olelo hou paha ia, no ka mea, aole ikeia ke kakau ana mamua.
O keia kakauolelo, he kanaka hooakamai, a manao oia e hoohihia ia Iesu ma kana ninau ana e like me na loio i keia manawa.
Kona ninau mua, e ke kumu, heaha ka ʻ u e hana ʻ i loaa ke ola mau loa? He ninau maikai, a ano nui ia, a kupono ia kakou a pau. He mea nui loa ke ola mau loa, a me ka mea e loaa ʻ i. Kuhi keia loio, ua akaka ia ia ka hana e ola ʻ i, oia hoi ke malama i ke kanawai. A ua malama oia i ke kanawai. I akaka kona kuhihewa, pane Iesu ma ka ninau ana, Heaha ka mea i kakau ia ma ke kanawai? Pane oia pehea? haipaanaau mai p. 27. Pane Iesu pehea? p. 28. Kuhi ka loio, ua malama oia ia mau kanawai. Nolaila, e ola mau ena oia. I akaka loa nae, ninau hou ka loio. Owai la hoi ko ʻ u hoalauna? me ka manao paha, e pane ana Iesu o ka Iudaio. Ina pela, ua aloha no oia i ka Iudaio me kona aloha ia ia iho. Ina he mea e ka hoalauna, ua paa ka waha o Iesu, ua hoohihia ia ola. Akamai nae Iesu i ka hoopau ana i keia kuhihewa ma ka hoopuka ana i keia olelo nane.
P. 30. He kanaka hele, mai hea a i hea? o Ieriko, he kulanakauhale ia he 15 mile ma ka hikina akau aku o Ierusalema. He aina mauna, he aina pohaku, he aina nahelehele, a paapu i na powa ka aina mawaena oia mau kulanakauhale. A o keia kanaka, ua aha ia oia e na powa?
P. 31. Owai ka i iho ma ia alanui? A i kona ike ana i ka pilikia o ka mea i powa ia, kokua anei oia ia ia?
P. 32. He pua na Levi kekahi, ua hele a kokoke i ka mea i powa ia, a ike maopopo i kona pilikia nui, ua aha nae oia? No keaha ko laua maalo ana, aole kali, a kokua i ka mea i powa ia? No ke aloha ole paha o laua i ka hoalauna me ko laua aloha ia laua iho; a no ka makau paha o powa like ia laua kekahi e kokua i keia hoalauna pilikia.
P. 33. Nohea keia kanaka kokua? Aole launa na Iudaio me ko Samaria. Aole aloha, he poe enemi mai ia Ezera mai. Enemi aku, enemi mai. Okoa nae keia kanaka Samaria, he aloha kona i ka Iudaio pilikia.
34-35. Ehia hana ana i ka mea i powaia? 1 Wahi a lapaau i na eha. 2 Kau iaia ma kona holoholona. 3 Lawe iaia ma ka hale hookipa. 4 Malama iaia malaila. 5 Waiho i ka hapaha me ka ona hale i mea hanai iaia. 6 Kauoha i ka ona hale e malama iaia me ka olelo e uku hou ke lawa ole keia i kona hoi ana mai.
P. 36. Heaha ka ninau a Iesu i ka loio? He ninau maalea keia e hoopahele ana iaia.
P. 37. Heaha ka haina a ka loio? Ua akaka e ia Iesu, aole hiki i ka loio ke pane okoa. A ma ia pane ana, ua hoahewa oia iaia iho. Aole oia i malama i ke kanawai. Aole oia e ola ana ma kana hana mua. Nolaila, paipai Iesu iaia e aha? Ua ne paha oia, aole paha. Ka pau keia o ko kakou lohe ana iaia.
Na Ninau Hoi Hope.
Ke kakauolelo, heaha ia? Ma ke aha ka like ole oia hua me kakauolelo? Owai ka olelo kahiko? Owai ka olelo hou? Heaha ke pani no kakaolelo? Heaha ka ninau hoao a keia loio ia Iesu? Oiaio anei kona makemake e ike i ka mea e ola ʻ i? Mahea i kakauia ai kekahi mau ninau like? Nawai i ninau? Heaha na pane? Pehea e ola ʻ i ke kanaka waiwai? me ka poe i walania ka naau i ka lohe ana i ka Petero mau olelo? me ke kiai hale paahao? Pehea ka Iesu pane ana i ka loio no ka hai ana i na kanawai, no ke ano o ka hoalauna, no ka mea e ola ʻ i.
Nohea keia kanaka aloha? Aha na Iudaio i na Samaria? Aha keia Samaria i ka Iudaio i powa ia/ Ma ke aha ka like ole o keia kanaka e me ke kahunapule a me ka pua a Levi? Owai kai hoapono ia e ka loio.
Heaha na manao pili? 1 Mai kuhihewa ua malamaia ke kanawai, aole ka.
2 Aloha a kokua i ka poe pilikia, ina he makamaka, he malihini, he enemi, me ka Iesu kauoha, Mat. 5:44, me Paulo, Roma 12:20.
3 Ka poe hana lokomaikai, lakou na hoalauna io no ka poe pilikia, naaupo, ilihune.
4 E hoole oe ia oe iho, e hapai i ke kea, a e hahai mau mamuli o Iesu ke makemake oe e ola.
Mele. Him 340. "He koa anei au," p 1, 2, 3.
Pule i mahuahua ka poe hana lokomaikai.
Haawina no Sept. 15, Luka 11:5-13.
No na Kula Sabati.
Ua ala kuu manao e kakau i kekahi mau mea e pili ana i na kula Sabati.
1 He oihana nui loa ka oihana kula Sabati. Aole i manao ia pela mamua ma ka makahiki 1781, ua manaoia he mea uuku keia hana, he hana haahaa loa, kupono no na keiki ilihune, weluwelu, naaupo, kolohe, lilo loa i ka hewa, a no lakou wale no. He kanaka i aloha i na keiki o ia ano, Robeta Raike kona inoa, manao oia e hoao e houluulu i kekahi poe keiki oia ano, a e ao ia lakou ma na Sabati, koho o ia i mau kumu wahine elua e kokua ia ia. Ma ka hoomaka ana nui ka hoomaloka, ka henehene ia, ka hooho ana, makehewa! pupule oe, aole e holo ana kau hana, he wanana kuhihewa no nae ia, he wahi poo wai. Malaila mai ke kahe ana o ka wai a manamana ae io a ia nei, a nui wale na lala liilii, na lala nui a laula loa, a kahe a kahe a kahe a nui ae a laula ae a lilo i moana nui.
O kela kula hookahi ma ka makahiki 1781, ua lilo ia i 14,000000 haumana me na kumu 2,000 000, oia hoi 7,000 000 haumana ma Amerika me ona mau kumu 1,000,000; a 7,000,000 haumana ma Europa a ma na wahi e ae, me ona mau kumu 1,000,000. Nui ke ano o na haumana mai na keiki uuku a i na kanaka makua, na elemakule, na luwahine; mai na keiki naaupo a i na kanaka naauao loa, i na luna aupuni, na lunakanawai, na loio na luna koa, na kiaaina, na kauka, na kahuna pule na ʻ lii, na moi, na Peresidena, na Emepera, ka poe ilihune, ka poe waiwai, ka poe haahaa, ka poe hanohano, ka poe kauwa, ka poe haku, e pili ana hoi i na lahui kanaka a pau. He poe haumana kekahi, a he poe kumu kekahi. Mai ka wa i hoomaka ia ai ke ao ana ma na Haawina Kula Sabati, like ma kela me keia aina a puni ka honua, nui ke ala ana o ka makemake e komo iloko o ke Kula Sabati. Ma keia wa, ua like ka huina o na Kula Sabati a pau me ke Kula Kahunanui i hoopihaia e na haumana e makemake nui ana e hoonaauaoia ma ka ke Akua olelo, ma ka Baibala. Nui na buke, na nupepa, e wehewehe ana, e hai naa i ke ano o na pauku Baibala, na mea pohihihi, na mea kahiko, na aina, na kulanakauhal, na hana kahiko. Ua paiia, ua imi ia, ua heluhelu ia e ka lehulehu haumana me na kumu. Pii loa ka naauao e pili ana i ka Baibala. Mahuahua mau no ka poe e komo ana iloko o na Kula Sabati ma Amerika me Beretania a me na wahi e ae.
(Aole i pau.)
HOOLELO O KA
AHAOLELO O 1878.
[Koena mai ka Aoao Ekahi mai.]
No na kula Hawaii me Beritania, 46,000.
No na kula Hawaii Aupuni 13,000.
No ke kula hoopololei ma Keoneula, 10,000.
Noi o Aholo e hookomo pu me na dala a Keaweamahi 10,226, hooholoia. Ma ke noi a ke ʻ Iri Ake, ua hooholoia na haawina i koe elike me ka bila.
KELA ME KEIA LILO.
Na ka Moiwahine Kapiolani, 6,000
Uku ana i ka poe i auhau papaluaia hooholoia $1,936,91.
Koena uku o na Lunakanawai apana no na makahiki 1876-7 $942,50.
No ke Kia Hoomanao o Kamehameha, 10,000.
Na lilo o ka Hooilina Moi i Kaleponi, 3,500.
No A.W. Bush, no ka lawe ana mai i na Samano, 500.
No H. Berger, ka Haku Himeni Kamehameha 500.
Uku Luna Duta o Kahului 250.
Koena o na auhau alanui o 1876-7 23,-646,80 Kukulu Papu ki aloha ma Kakaako 8,000.
Ma ke kapaeia ana o na rula, ua heluhelu mai o Hon. Malo he olelo hooholo. E hookomoia ma ka bila haawina na dala $1,000, i haawina no ke ʻ lii Kaeo, hooholoia.
Ma ke kapaeia ana o na rula, ua heluhelu mai o Hon. Aholo he olelo hooholo. E kohia na His Ex. Kapena, Dominis, na Hons. Nazareta, Kauai, Pilipo, i komite e hai aku i ke Alii ka Moi, ua pau na hana ano nui o keia hale, a ua makaukau ka Ahaolelo, e hookuu ma ka la 6 o Aug. 1878, hooholoia.
Ma ke noi a Hon. Kakela, ua hooholoia na pauku 2,3,4,5,6, o ka bila haawina, a ua hooholo loa ia hoi ka bila haawina elike me ia i hoololiia.
Ma ke noi a Hon. Kakela, ua heluhelu akoluia na bila malalo nei ma ke poo, a hooholo loa ia.
1--Bila kanawai, e hoololi ai i ka haawina 6, o ke kanawai kivila, e pili ana i ka oihana leta.
2--Bila kanawai, e hoololi ai i ka helu, a me ka ohi ana o na auhau.
Ma ke kapaeia ana o na rula, ua heluhelu mai o Hon. Kamauoha he olelo hooholo, e hookomoia ma bila haawina na dala $2,000 no ka poe wi ai ole o Kona Hema, hoopanee loa ia.
Ma ke noi a Hon. Kipikona, ua hoopanee ka hale a noho hou i ka la apopo hora 10.
LA HANA 76, Aug. 3, 1878.
Mamua o ka hoaponoia ana o ka moolelo o ka la i hala.
Ua nonoi mai ke ʻ lii Kaeo, e hapai hou i ka noonoo ana no ka haawina i haawiia nona ma ka bila haawina, hooholoia.
Ma ke noi a ke ʻ lii Kaeo, ua hoopanee loa ia ka haawina $1,000, i haawiia nona, a mahope, ua aponoia ka moolelo.
NA HOIKE O NA KOMITE.
Heluhelu mai ke komite malama ola i ka lakou hoike no ka bila kanawai i waihoia mai e Hon. Palohau. E pili ana i ka hoihoi ana i na mai lepera ma ko lakou wahi ponoi.
Ua manao ke komite, e hooholo i ka bila me ka hookomo ana i kekahi pakui mahope o ka pauku 1, o ka bila.
A ua manao ke komite, he mea pono e kukuluia na Halemai ma kela, a me keia mokupuni. E like me ka hoike malalo nei.
Ma Hawaii------2 Halemai.
Ma Maui, Molokai, Lanai, 1, Halemai
Ma Oahu 1, Halemai
Ma Kauai a me Niihau 1, Halemai
Ma ke noi a Hon. Kupau, ua aponoia ka hoike a ke komite.
Heluhelu mai ke komite hooiaio bila kanawai. Ua oluolu i ke Alii ka Moi ke kakau inoa ana i keia mau bila kanawai malalo nei.
1--He Bila Kanawai, e hoopau loa ai i ka pauku 2, mokuna 53, o ke kanawai karaima. E pili ana i ka Oihana Kinaiahi.
2--He Bila Kanawai e hoololi ai i ka pauku 498, o ke kanawai kivila.
3--He Bila Kanawai e hooponopono ai i ka hoopae ana mai i na ohua eemoku mai na aina e mai, a i na awa o keia aupuni.
4--He Bila Kanawai, e hoololi ai i ka pauku 1, o ke kanawai, e haawi ai i ka mana i ke Kuhina Kalaiaina. E lawe i ka aina a me ka wai i mea e pono ai na ohewai o Honolulu nei, i aponoia ma ka la 18, o Augate 1868, a i hoololi hou ia ma ka la 18, o Iulai 1874.
5--He Bila Kanawai, e hoololi ai i ka pauku 56, o ke kanawai kivila, oia ke kanawai i aponoia ma ka la 27, o Sept. 1876, a e hoololi hou ai i ka pauku 59, o ke kanawai kivila.
6--He Bila Kanawai, e hoololi ai i na pauku 3 me 4, o ka mokuna 79 o ke kanawai karaima, e pili ana i ka oihana aopalapala o ke aupuni.
7--He Bila Kanawai, e hoololi ai i ke kanawai e pili ana i na auhau alanui ma ka hana.
8--He Bila Kanawai, e hoololi ai i ke kanawai oki mare, oia ka mokuna 16, o na kanawai o 1870.
9--He Bila Kanawai, e hoomaopopo ai i ka hopu ana i na ʻ lii, a me na luina o na moku e holo ana i na aina e, ke hoolohe ole lakou i na kauoha.
10--he Bila Kanawai, e hoololi ai i ka pauku 350, o ke kanawai kivila.
Hoike mai ke komite wae i kohoia ʻ i e hele aky e hai i ka Moi, ua makaukau ka Ahaolelo e hookuu ia. Ua oluolu i ke Alii ka Moi. E hoopanee i ka Ahaolelo ma ka ho-a 12, o ke awakea Poalua Augate 6.
NA OLELO HOOHOLO ME NA BILA
Heluhelu mai o Hon. Kupau he olelo hooholo, he mea pono e haliu mai ka oluolu o a Kuhina, e hoihoi wale i na hoa o keia hale maluna o ka mokuahi "Likelike" me ka uku ole.
Ma ke noi a ke ʻ lii Kaeo, ua hoopanee ia ka olelo hooholo.
Aka, ua hoakaka mai no nae ke Kuhina Kalaiaina a ona hoi o ka "Likelike," ua oluolu no oia e hoihoi wale i na hoa me ka uku ole. Haawi na hoa i ka mahalo i ka His Ex. S. G. Wilder.
Kamailio hou mai ke Kuhina Kalaiaina, ina e oluolu ka mea hanohano o Koolauloa e kali no na pule elua, alaila, e hoihoi ia no oia maluna o ka mokuahi hou e ku mai ana.
Heluhelu mai ke Kuhina o ko na aina e, he olelo hooholo, ke haawiia nei i kanakolu ia hana a ke kakauolelo e hana ai i na hana i koe o ka Ahaolelo mahope iho o ka hookuu ana; hooholoia.
Ma ke noi, ua hapaiia na hana o ka la.
NA HANA O KA LA.
Heluhelu akolu ana o ka bila kanawai e papa ana aole e hiki i kekahi mea ke ku loio imua o na Aha Hoomalu a Apana me ka laikini ole.
Ma ke noi a ke Kuhina o ko na aina e ua heluhelu ia ka bila ma ke poo, a hooholo loa ia.
Heluhelu ekolu ana o ka bila kanawai e kokua ai i ka hooponopono ana o na alanui kaa mahu.
Ma ke noi a ka Loio Kuhina, ua heluheluia ka bila ma ke poo, a hooholo loa ia.
Heluhelu alua ana o ka bila kanawai e hoololi ai i ka pauku 1 o ke kanawai i aponoia ma ka la 6 o Iulai 1866, e hoopili ai i na kuleana aina, ke make kekahi mea me ka hooilina ole, a pilikana ole paha.
Ma ke noi a ka Loio Kuhina, ua hoopanee loa ia ka bila.
Ma ke noi, ua kapae ia na rule.
Heluhelu mai o Hon. Keau he olelo hooholo, e ae ia ka poe e hle mai ana e noi i ka Papa Ola, e holo i Kalawao e kokua i ka poe pilikia, no ka manawa elua pule wale no.
Ma ke noi a ke Kuhina o ko na aina e, ua hoopanee loa ia ka olelo hooholo.
Noi mai o Hon. Mahoe, e unuhi mai i ka pakui o ka bila kanawai, e hoihoi ai i na lepera ma ko lakou mau home; hooleia.
Ma ke noi, ua kapaeia na rula, a heluhelu mai o Hon. Kaoliko he olelo hooholo, e kauoha ia ke Kuhina Kalaiaina, e hoolaha aku ma ka ma na nupepa KUOKOA a me "Ko Hawaii Pae Aina" i na wahi e hoolulu ai na lio kalewa pai o Koolau mai a me na wahi e ae; hoopanee loa ia.
Kamailio mai ke Kuhina o ko na aina e, ua oluolu i na Kuhina ka poai ana ʻ ku i na hoa o keia hale. E paina aloha pu ma ka Hotele Hawaii ma ka hora 2, o ka auina la Poakahi.
Ma ke noi a ke Kuhina waiwai, ua hoopanee ka hale a noho hou i ka hora 10 a.m. o ka Poakahi.
LA HANA 77, Aug. 5, 1878.
NA HOIKE O NA KOMITE.
Waiho mai ke komite hooiaio bila kanawai, ua oluolu i ke Alii ka Moi e apono a e kakau inoa i na bila kanawai malalo nei.
1--He bila kanawai e hoololi ai i ka haawina 6 o ke Kanawai Kivila, e pili ana i ka Oihana Leta.
2--He bila kanawai e hoololi ai i na pauku 7 a me 8 o ka mokuna 79 o ke Kanawai Karaima, e pili ana i ka Oihana Aopalapala o ke aupuni.
3--He bila kanawaii e hooponopono ai i ka lawe ana i na ohua, a me ka ukana maluna o na ano kaa a pau.
4--He bila kanawai e hoololi ai i ke kanawai i aponoia ma ka la 13 o Mei, 1868, e hoomalu ai i ke ola a me ka waiwai mai ka hoopoinoia e na mea pahupahu, koe ka pauda.
5--He bila kanawai e hoololi ai i na pauku 998,999 a me 1,003 o ke Kanawai Kivila, e pili ana i na Komisina o na ala liilii a me na pono wai.
6--He bila kanawai e kokua ai i ka hana ana i na alanui kaa mahu.
Kamailio pu mai no hoi ke komite, ma ka la apopo, e waiho ia aku ai ke koena o na bila i kakau inoa ia e ka Moi, a me ka bila haawina pu hoi.
Heluhelu mai ke komite wae i waiho ia aku ai ka palapala hoopii a Tito, e noi mai ana e uku aku iaia i na dala 180, Ua halawai pu ke komite me ua Tito la, a ua hoopau oia i kana hoopii, nolaila, ke hoike aku nei ke komite, e hoopanee loa i ka palapala hoopii.
Me ke noi a Hon. Kaoliko, ua aponoia ka hoike a ke komite.
NA OLELO HOOHOLO ME NA BILA.
Waiho mai ka luna hoomalu o ke komite hoonaauao i kekahi leta mai a Geo. H. Dole mai o Kauai, E hoapono ana i ka palapala hoopii a D. Keaweamahi, e uku aku iaia i na dala 226, noi pu mai no hoi ka luna hoomalu o ke komite hoonaauao, e waiho pu ia keia leta iloko o ka moolelo o ka hale; hooholoia.
Heluhelu mai ke Kuhina o ko na aina e he olelo hooholo, ua mahalo nui keia hale i ka noho oluolu ana o keia aupuni me na aupuni nui, a ke hoike aku nei keia hale i
[E Nana ma ke Aoao Ekolu.]
RICHARD F. BICKERTON
[PEKETONA.]
LOIO a he KOKUA ma ke KANAWAI:
E HELE ANA OIA IMUA O NA AHAHOOKOLOKOLO a pau o keia Aupuni ma na ano hihia a pau, ina pau ma Oahu ei, a ma na Mokupuni e ae.
Ua makaukau mau oia i aka hana ana i na Palapala pili kanawai o kela a me keia ano.
Ua hiki no hoi iaia ke @@@ dala aku ma ka moraki ana ina aina ma ka ukupanee haahaa @@.
E hanaia na @@ me ka hikiwawe a me ka uku haahaa.
Keena hana Helu 23 Alanui Kahepa, @@@ puka ma @ aku o ka hale @@@ o Kauka M@@@@ 840 1y
A. MCWAYNE,
HALE KUAI LAAU LAPAAU, A ME NA WAIALA o na ano a pau me na SOPA ALA o na ano he nui wale. Ma ke kihi o Alanui Papu me Kalepa
840 1y
WMO SMITH,
LOIO,
WAILUKU, MAUI.
Ua waiho oia i na Oihana Aupuni a pau a ua makaukau e lawelawe i ka Oihana Loio me ka kuokoa ]840 6m
E.O. HALL & SON.
(E.O. HOLO MA.)
NA MEA KUAI I NA MEA MAHIAI, Na Lole, Na Pena, Na Aila, a me Na ano Lako e ae a pau he lehulehu wale.. 846 Kihi o Alanui Papu me Moi. 1y
LOLE MAKEPONO
Ke Kuike.
E LOAA NO IA MA KAHI O
KAKELA ME KUKE!
--E LAA NA--
Ahinahina, Kalakoa, Keokeo, Leponalo, Pena, Aila, Aniani,
NA MEA PIULA!
KOPA, AILA HONUA, AILA HOOMALOO, Kui Kakia, Pakeke, Tabu, Kaula, Noho Lio, Hulu Palaki, na Pulumi
--A HE--
AGENA NO HOI NO NA MOKUPUNI O HAWAII NEI NO NA Lainakini-nao, Lainakini Maoli, Palule Kalakoa, Alapia, Kelepa, Kilika, Na lole kupono i ka wawae, Palule Huluhulu, Na Lole Huluhulu, Na Lole no ka hoohehelo ana Lipini, Lihilihi, &c.
LIPINA, LIHILIHI, &C.
---A ME NA---
MAU MEA AI KANI
Ka Palaoa, Kopaa, Raiki, Pia, Hoohu, Paakai, Huaala, Pia Kulina, &c., A he Laau Lapaau Kaulana Loa A DR. JAYNES.
Laau Kunu, Laau Hoomaemae Koko, Laau Hoopau Naio, Penikila, Huaale
A ME NA LAAU HAMO, A PELA ʻ KU!
837 3m 839
PAPA! PAPA!
---NO---
ALLEN & ROBINSON
UA WHEE AE NEI MAUA I
PA KUAI PAPA
---MA---
KA UWAPO O PAKAKA
Na Papa Ulaula o na ano a pau.
Na Papa Paina o na ano a pau.
Na Pili Hale Ulaula.
Na Pili Hale Keokeo.
Na Pepa Hoonani Hale,
Na Pepa Molina.
Na Pena a me na Aila Pena!
NA KUI O NA ANO A PAU,.
NA PANI PUKA a me NA PANI PUKA ANIANI. NA PANI PUKA a me NA OLEPELEPE.
NA LAKO KUKULU HALE
O NA ANO A PAU!
E KUAIIA MA KE
KE KUMUKUAI HAAHAA LOA
O keia Makeke,
ALLEN & ROBINSON
Honolulu, Ian 1, 1878. 846 3m
PAPA, PAPA
MA MA KAHI O
LEWERS & DICKSON!
(O LUI MA.)
MA KE KAHUA KAHIKO MA
Alanui Papu a me Moi!
E LOAA AI NA
Papa Nouaiki!
o kela a me keia ano.
Na Papa Nani a Paa no ke Kukulu
ana i na Hale!
Na Pani Puka, Na Puka Aniani, Na Olepelepe, Na Pou, Na O-a, Na Papa Hele, Na Papa Ku, A me na Papa M@@@@@
NA PILI O KA HALE
O NA ANO A PAU.
Ne Pepa Hoonani, Na Pepa o na Wai a pau. Na Kui mai ke Nui a ka Makalii, Na Ami Puka, Na Ami Puka Aniani, Na Ami o na ano a pau. Na Aila Pena, o kela me keia ano, Na Aila Hoomaloo, he lehulehu wale, Na Aila e ae o na ano a pau.
NA WAIVANIKI
---A ME NA---
WAI HOOHINUHINU NANI!
o na ano a pau loa.
NA BALAKI ANO NUI WALE!
A ke hai ia aku nei ka lono i na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana
--NO KA--
UKU HAAHAA LOA!
E like me ka mea e holo ana mawaena o LAUA a me ka MEA KUAI
E hele mai! E na makamaka!!
A e lawa no hoi ko oukou makemake me ka oluolu a me ka maikai!
845 tf
KOPA KUKAEPELE
---A---
GLENN!
AOLE LUA NO KA HOOMAEMAE I KA ILI!
He mea hoopau i na eha, Na Ili Puupuu, A he hoomaemae i na mea ino, A he hoopau Lumatika, A he kopa auau no hoi
O keia Kopa ka oi aku o ka mea maikai I waihoia mai imua o kanaka.
Aole wale no ka Hoopau ana i ka Huehue Ili Poha, Wela la, Luluaina, a me na mea e ae o ka Ili; A ma ia holoi ana, o ka hoopalupalu pu kekahi i ka Ili, a keia
Laau Hoomaemae lua ole e hana ai.
O ka hoemi ana iho i na mai o ka Ili, a o ke pale aku i ka mai mai na lole e na Mai Lele, oia kekahi. O na ohana ame na poe makaikai, ina e hoolako lakou i keai
KOPA HOOMAEMAE LUA OLE !
ALAILA, UA LANAKILA LAKOU.
He hoopau i ka lehu o ke poo, A he Kopa no hoi e kaohi mai ai I ka lauoho mai ka hina ana.
Ua hooia nui mai na Kauka no ka maikai o keia Kopa!
E loaa no ma kahi o
M MCINERNY,
Kihi o na Alanui Papu me Kalepa.