Ka Nupepa Kuokoa, Volume XVII, Number 42, 19 October 1878 — Page 2
| This text was transcribed by: | Rob Escuadro |
| This work is dedicated to: | my tutukane John Halemano |
Ka Nupepa Kuokoa
KE KILOHANA POOKELA NO KA LAHUI HAWAII.
$20 MAKANA. $20
A ka Nupepa Kukoa e haawi ai no ka Hikimua ma ka Haina Pololei!
E haawi ana Ka Nupepa Kuokoa i ka Makana i olelo ia maluna ma na mahele elua; o ka mahele mua he $15, no ka helu akahi ia; a o ka mahele elua he $5, no ka helu elua ia; no na Kumumanao i oi aku mamua o na mea e ae a pau i hakuia maluna o na mea e ae a pau i hakuia maluna o keia ninau: PEHEA E HIKI AI KE HOOLAWA IA A PIHA KA LAHUI HAWAII ME NA HOME MAIKAI?
O ke Komite nana e nana a e hooholo i na Kumumanao i kupono ke lawe i na makana, oia keia: HIS EX. J.M.Kapena; Hon. A.F.Judd; Mr J.Lota Kaulukou; W.R.Kakela a me Rev.M.Kuaea.
Mai keia la aku a hiki i ka la hope o Dekemaba, oia ka wa e lawe ia mai ai na Kumumanao e imi ana i keia mau makana, mahope o ka la hope o Dekemaba, aole e lawe ia mai. He hiki i na mea a pau ke imi i keia pomaikai.
KA NUPEPA
Kuokoa me ke Au Okoa
I HUILA.
No ka Makahiki, $2. Eono mahina, $1 Dala Kuike ka Rula.
OKATOBA 19, 1878.
O KE AU O ka lai Hawaii e noho nei i keia wa, ua ano okoa loa ia i ko na wa i hala. He nui na hoike e maopopo ai au nee mua ka lahui iloko o na makahiki he kanalima i aui hope ae nei. Aka, nae o kahi i ano e loa ai ko kakou kulana iloko o keia mau makahiki, a ua lilo no hoi ia i mea e pahaohao ai kekahi poe, a e hopo ai no hoi kekahi, oia ke komo nui ana mai o na kanaka o na lahui e ae a noho pu me kakou.
Ke hoopiha loa ia nei ka aina i keia wa me na lahui o ko na aina e. A ke lawe nei lakou i na hana mau o ka aina, ka mahiai a me ka hanai holoholona, me he mea la e hookahua ana a noho paa iho maluna o ka aina. O na poe Pake a me ka poe Pukiki ka hapanui o kanaka i hele mai a noho me ka lahui iloko keia wa. Ua hele mai no ko na lahui e ae, aka, o ka nui o lakou no ka manawa wale no a huli hoi aku. Aka, ke hiki ka Pake a me ke Pukiki ia nei, o ka hookahua no ia a noho iho, aohe emo o ke kamaaina koke iho la no ia. He mea makehewa pahu ko kakou ninau ana no ka pono a me ka pono ole paha, ke pono ole io hoi, o keia komo nui ana mai o na lahui e ae ma na kaiaulu o Hawaii nei e noho ai; no ka mea, he mea hiki ole ke pale ia aku keia, Ma ka nana ana, me he mea la o ka Mana nui maluna o ka honua nei ka Mea i hiki ole ke pale ia kana mau hana, nana keia hana kupono, e hoohui ana a e hookomo ana i na lahui okoa kekahi m kekahi, no kekahi kumu nui a kakou i ike ole ai i keia wa, aka, e ike ia ana no ma keia hope aku. O keia hiohiona ano e o na lahui, aole i pili ia kakou wale no, aia no ma na aina e kekahi, a ua lilo no hoi keia i kumu hoopaapaa a i kumu hakaka no hoi iwaena o ko na aina e. Ke hoopaapaa nui nei kekahi poe o Amerika no ke komo nui ana o na Pake iloko o ko lakou aina, a no ka noho ana no hoi o ka poe Aferika malaila. Ke ake nei kekahi poe e kipaku a e hookapu i ka aina ia lakou. Aka, aole i hiki, a aole no e hiki ana. E nui ana paha na hoopaapaa i koe, a e hakaka ana no paha me ka hookahe ia o koko; aka o ka manao e hookapu i kekahi lahui i ke komo ana aku a noho me kekahi lahui e ae, me he mea la he kue ana ia i ke ao o ka manawa e ko like ana i na lahui a pau iluna. O na hapa holomua a pau o ka honua i keia wa, na uwea olelo, na kaa ahi me na ala hao maluna o na aina, na moku ahi nui mluna o na moana, ka holopono ana o na oihana kalepa mawaena o na aina nui a me na moku o ke kai. Ka holo nui ana o ka naauao a me ka holo mua o ka ike, he kokua nui keia mau mea a pau i ka hoohui lahui. A o kakou Hawaii kekahi iloko o keia au holo mua, aole hiki ia kakou ke pale i keia mau ulia ano e mai o kakou aku, e like me ka hiki ole i na lahui e ae ke pale no lakou iho.
He pono i ka lahui Hawaii ke hooikaika aole no ke pale ana aku ia hai, aka, no ke kukulu ana ia ia iho a paa. E imi i na hana kupono ia ia iho ke hana, a e lawelawe pono ia ma ia mau hana. E imi i ke kulana e hiki ai ia ia ke ku iluna iwaena o kona poe hoa kanaka o keia honua me ka hilahila ole. O ka ike a me ka hana ko kakou mea e pono ai i keia wa.
KE KEENA HOU O
"Maemae ke Kai i ka Pua o ka Hala!"
MAI kinohi mai, au komo mau ka iini iloko o makou e hooikaika me ka pauaho ole ma ka imi ana i na kumu e kuonoono ai ko makou mau makamaka; aole ma na ina i wale no a na Kolamu e hoolauna aku ai; aole hoi ma ke aloha puuwai hookahi wale; aole no ma ka pa leo haihai olelo o kahi mehameha wale; aka, ma ka hookipa ana ia lakou a lilo no makou, a o makou hoi no lakou. He mea na makou i ike maka ka makahehi nui ia o ke kino o ka NUPEPA KUOKOA; ua hookipa ia oia me ka manao makee e ka lehulehu, a ua malamaia kona kino me ka makahehi nui ia maloko o na waihona kapu o kona mau makamaka; nolaila, ua makemake a ua ulu ka iini iloko o makou e panai like ia mau hoike o ke aloha a na makamaka.
A ano, ua hauoli makou i ka hai aku i na tausani e lawe nei i ke "Kilohana Pookela o ka Lahui Hawaii," ua panee aku makou i ko makou Keena Lunahooponopono mai kahi mua iho nei a hiki i kekahi o na Lumi wehe olu e kau ae la maluna o ka hale uinihapa hou o Dilinahama ma, Helu 37, alanui Papu. Ua ko ka iini a me ka makemake i noho hamauleo ia'i iloko o na la he lehulehu o ke au i hala 'e.
A oiai ua hai ia ka puana a ka moe; ua huli ka lani a ua ko ka makemake; ke hookaulua ole nei makou i ka pahola laulaha ana aku i ka leo poloai i kela a me keia, mai na makamaka a me ka poe i hoomakamaka ole i ke KUOKOA; e kipa; e komo; e hooluana a e hookuonoono. No oukou keia mau paia; he Keena haihai olelo; kukakuka; a noonoo no ka pono a me ka holomua o Hawaii.
Maanei e hoolawa ia'i ke pakaukau me na lako heluhelu ma ka olelo makuahine o ke one oiwi nei a me ka olelo o ka aina e; a e pau ai ka makemake mai na Nupepa o ke au kahiko a hoea i keia au hou; na Nupepa kii hoonanea i na makamaka puni nana kii a me na Nupepa piha manao kii ole; na buke e hoolawa ia'i ka ono o ka puni heluhelu a imi i ka ike - o neia mau mea a pau, na ko oukou mau makemake ia e na makamaka, - a e like me ko makou ano mau; pela no ano; a pela no ma keia hope aku - o ka panai aku i na hookipa aloha me ka hoolaulea ana 'ku e like me ka hiki.
Ano, mahope iho o ka haawi ana aku i ke aloha hope i na hiohiona o ka home i kuluma mua ia e ka makou makakila iloko o na kau i kaalo hope ae la, ke haawi hou aku nei makou i ka poloai laulaha ana, e kipa, e luana, e hooluolu, a e ike ia MAEMAE KE KAI I KA PUA O KA HALA. Mai hopo!
KE KULA HANAI KAIKAMAHINE O KOHALA.
UA minamina makou no ka loaa ana mai o na lono kaumaha e pili ana no ke kula kaikamahine o Kohala. Ua lohe mai makou, ua loohia kekahi mau haumana i ka mai fiva; a no ka nui o ka mai a me ka poino o kekahi mau ola, ua hookuu ia ke kula, a ua hoi na haumana i ko lakou mau home. He mea kaumaha no keia; aka, aole keia he mea malihini; ua ike mua ia no keia ma na aina naauao. I kekahi wa ua komo ia kekahi mau kula e ka mai e like me keia kula a kakou, aua pahola ia aku la na poino o ka onawaliwali kino maluna o na haumana he nui, me ka ike pono ole ia o ke kumu i loaa mai ai ia ulia; me ka hoao ia no hoi e pale, a e hoomaha iho i ka popilikia e kau mai ana; aole nae he hiki. A mamuli oia ano i ike iho ai makou a lohe pono no hoi no ka hookuu ia o kekahi mau kula holookoa e hoomaha no kekahi wa, a hala aku ke kau o ka mai, alaila hoohui hou ia mai na haumana e hapai hou i na hana hoonaauao a holo mua no hoi me ka maalahi loa aohe mea nana e keakea,
Pela no hoi makou e manao nei no ke kula o Kohala. He kula kela i kaulana mua no kona maikai a no ka hoopomaikaiia no hoi o kona mau haumana; a no ka ikaika a me ka noeau o kona poe kumu a me na kahu. O keia hookuu ana a lakou i na haumana e hoi he mea pono loa ia oiai e hookaumaha ana ka mai ia lakou. A malia paha o imi ia ke kumu i puka ai ia mai ma ia wahi, a hookaawale ia mea, hoomaemae hou ia ke kahua, a lawe ia'ku ke ea mai, a ola hou na haumana. Alaila he pono e hoi hou mai na haumana a pau no ka lakou hana imi naauao. E like me ka makou i puana mua iho nei, aole keia he mea hou; ua ike ia no iloko o na kula hanai ma na aina naauao. Nolaila aole keia he kumu e paupauaho ai, aka, he mea keia e ao ana a e hooikaika mai ana ia kakou e makaala a e kiai me ka malama loa i na mea e pili ana i ko kakou ola a me ke ola o ka lehulehu.
A maanei, oiai e luku ana ka mai ahulau i kekahi mau kulanakauhale ma na aina e, he mea pono ia makou ke kau leo aku i ka lehulehu o ko makou poe heluhelu e makaala lakou i keia wa, a pela no hoi i na wa a pau, no ka malama ana i na rula o ke ola kino. O ka maemae o ke kino a me ka maikai o ke ea, oia kekahi mau mea kokua nui i ke ola maikai o ko kakou mau kino. A ua luku nui na mai ahulau ma na wahi ike ia ai ke ea ino a me ka noho pelapela o kanaka. He pono ia kakou e noho nei ma Honolulu e makaala loa ma keia mea. O ka waiho wale ana o na ilio make me na popoki a me na iole i make ma na alanui, he mea ino loa ia; ua like ia me ke kahea ana i ka mai e hele mai a e luku ia kakou. He pono e kanu ia na mea make a pau iloko o ka lepo, aole o ke kiola wale ma na alanui a me na pili pa. E malama pono no hoi i na kino me ka maemae kupono, aole e moe pu me ka lepo. A mai moe ma kahi i paa loa ke ea, oia kekahi mea hookumu i ka mai. 1 ka wa e hoopuka ai na mai ahulau, ma kahi ino o ke ea a ma kahi o ke kanaka e noho pelapela ana, mailala ka ikaika loa; no laila ua oi aku ke ola maikai ma na wahi kuaaina mamua o ko na kulanakauhale nui.
Ua Pololei ka Hoohalahala ana.
Ua hoolahaia ma ka Helu 40 o ke KUOKOA, ka hana kaulike ole a ka Luna Hoopuka o ka Nupepa Ko Hawaii Paeaina, mai ka peni mai a P.
Maloko oia palapala, ua hoike ae ka mea kakau, elua mau hana paewaewa maopopo (paona like ole) a ka Luna Hoopuka i hana aku ai ia ia. O ka mua; oia ka aua ana i kana nupepa, aole i haawaiia mai ia ia i noi aku ai; oiai ka lakou ope pepa e houna ia ana i Hawaii.
A o ka lua, ka haawiia ana o ka nupepa ia Roke, i kana hawanawana ana iho me ka loaa ole mai no ia P. ka mea nonoi mua.
I ko'u heluhelu ana i au mau kumu hoohalahala nei, i ka Luna H. o ka Paeaina, ua kahaha no hoi ko'u manao; i na he oiaio. Aka, ua iini au e loaa kekahi hoike, nana e hooia mai i ka oiaio oia hoohalahala a P. a i ka oiaio ole hoi. A oi emo, loaa iho la ka hoike maikai, nana e hoopau ae i ke kanalua o ko'u manao.
A o ua hoike la, oia no ua Luna Hoopuka la o "Ka Hawaii Paeaina," a me kekahi mea okoa.
Ma ka Helu 41 o "Ko Hawaii Paeaina," ua pane mai la ka Luna Hoopuka oia nupepa, no ua palapala nei. A maloko oia olelo pane, ua kokuaia nakumu hoohalahala a P. no ka hana kaulike ole a ka Luna Hoopuka o "Ko Hawaii Paeaina," ia ia.
A i mea e moakaka lea ai, e nana i keia mau mahele ana, no loko oia mau olelo pane a ka Luna H. o "Ko Hawaii Paeaina," ma ka Helu 41.
Olelo oia, (a) "Me ka ike no ona, aohe ia he la puka o ka nupepa o Honolulu nei, (e). Aole no he wahi pepa iki i haawiia i kekahi lawe pepa o Honolulu noi, (i). Koe wale no ka nupepa i noiia mai e hoouna na ke Kuhina Kalaiaina oiai oia ma Hawaii, (o). A me ka nupepa a Kapena Kaai no Kohala, (u). Auhea iho la ka nupepa i haawiia i ko Honolulu nei, a hoonele ia oia?"
E pane pakahi aku ana wau mamuli o keia mau mahele, a penei ka pane no ka mahele (a). He oiaio no, aole o ka Poaha ka la puka o ka nupepa "H.P.A.;" a ka Poaono ka la puka i kukala paa ia, e kau la ma ke poo o ke kolamu, ma ka aoao mua. Aka, ua haawiia no nae ka nupepa i kekahi mea a mau mea lawe pepa o Honolulu nei, ma ua la 'la; aole hoi i hoopololei ia a ma ka Poaono e haawi ai, ka la puka o ka nupepa.
Nolaila, he makepono ka hoohalahala ana a P. no ke kaulike ole o ka hana a ka Luna Hoopuka. A no ka haawiia o ka nupepa i kekahi ma ia la 26 o Sept. ua hiki au ke hooia me ka maopopo loa.
No ka mahele (e); Eia ka pane, ua haawi io ia ka nupepa i kekahi mea o Honolulu nei, aole i hoole ia. Nolaila he kohu ka hoohalahala ana. No ka mahele (i) & (o); Eia ka pane aku, ke hooia mai la oe i ka oiaio o ka P. i olelo ai, no kou haawi ana ae i ka nupepa ia Roke ia ia i hawanawana iho ai ia oe, oiai oia e nana aku ana me kona mau maka, a ike pono i ua hana kaulike ole la au. Au no hoi i olelo mai nei, i hoouna ia ia nupepa na ke Kuhina Kalaiaina, me ko ike maopopo no, ua holo ke Kuhina Kalaiaina ma ka Poakahi Sept. 23, a e ku mai ana i Honolulu nei ma ka po Poaono Sept. 28. A ma ka moku hea la oe i manao ai e hooili aku i ka nupepa i ke Kuhina Kalaiaina, oiai, aole i akaka ia oe kahi e loaa aku ai iaia, aohe ia he olelo oiaio; he olelo pale ia no kou manao aohe e hiki i ka lehulehu ke ike ia mea.
A na ia ike pono ana i hoehaeha i kona uhane, no kou hoonele ana ia ia, a haawi ka hoi i ka kela. He kaulike ole ia la, nolaila, he kohu ka hoohalahala ana. Ma ia haawi ana au i ka laua, a hoonele i kela mea noi, ua maopopo keia, he hoopili Kuhina ke ano, e kapa ia aku ai "he hoopili mea ai." Loaa aku la ka ia mea nonoi io lilo loa, he mau haneri mile ke kaawale, a o ka P. hoi ka e noho koke aku ana aole i haneri kapuai ke kaawale mai ka Luna Hoopuka mai, hoonele ia iho la, paewaewa maoli nohoi. Kai no hoi e ike i ka iki a me ka nui. Aole ka hoi pela au Hawaii Ponoi nei. U! Aloha wale!!.
"Haalele wale i Puna ke hoa'loha,
Aohe ike wale iho ia Malio;
I ka hapai ku ia e ke kualau,
E ka ua hele pu me ka makani."
No ka mahele (u). Eia ka pane; eia nohoi paha ua nupepa la au i haawi ai i kekao Honolulu nei, a hoonele lokoino ia P. aia a hoole paakiki mai oe, e hapai pu ia aku no ia mau mea apau, me ke koe ole iho.
He mau pane kekahi mawaho ae oia mau kumu hoohalahala; a no ka pili ole ilaila, aole a'u olelo nui ilaila; aka, he wahi mea iki no nae. Ua olelo ae oia, "aole nohoi oia i hoolawehala mai ia manawa, akahi wale no." Ae, akahi wale no hoi paha oe a olelo ia e P. "i ka hana pono ole;" no ka mea, akahi no hoi oe a hana aku iaia i ka hana ino loa, he hookae, a he hana ole i ke kaulike mawaena on a, a me kekahi mea nonoi pepa ma ia la 26 o Sepatemaba.
"Me k a-na au e a-na aku ai, pela no e a-na ia mai ai."
Ua koho wale aku oe i kekahi mea okoa, kekahi kumu oia hoohalahala ana; uamoakaka oa na kumu, aohe pohihihi. Elua paona like ole, kahi ou i kaupaona ia ai, a ike ia he mama.
Ma ka hope loa o kau pane, ua i ae oe "na ka lima hawahawa ole e wanana, & c." He pane pilikino ia, no kahi hana kahiko i hala. ma ia mea, ua nele oe i ka mea e pane pono ai, a au hookoke aku ka pane ana i kahi e pili ana i kona mau kina o na au i hala. He hoike ia o kou nawaliwali, ma na kumu i hoohalahala ia ai oe. Ua pau na kanaka apau i ka hewa, aohe mea pono ma ka honua nana e hana maikai me ka hewa ole. A i na paha o ka rula ia e ike me kau, alaila, na ka mea hana kaulike e noho Luna Hoopuka nupepa, aole na ka mea hana kaulike ole.
Ua hoino ko P. uhane i ka nupepa "Ko Hawaii Paeaina," no ka manawa akea loa; i na he 10, a he 5o paha makahiki e ola ai ka nupepa H.P.A. ke paa la no ia hoino ana. A i na he hookahi haneri makahiki e ola ai, ke paa 'la no, aole hemo. Oia hoino ana, aole ma ka wanana, aka, no ka manawa no apau o kona ola ana a hiki i kona hopena; oiai he hopena ko na mea a pau.
WIKELEFE.
Nuhou o ko na Aina e!
O keia mau lua huna i ike ia, he mau lua huna noi na iwi kupapau o na kanaka o Farani, he mau miliona ekolu ko lakou nui, au olelo ia iho ua paila ia a ua hoopuupuu ia hoi maloko o keia mau lua huna. A o keia poe iwi i hoakoakoa ia, oia no ka iwi o na kanaka naauao a kaulana hoi o Farani, iloko o na haneri makahiki mamua aku nei. O na iwi a me na ilipoo i hoakoakoa ia ma kahi kaawale o na lua huna me he mea la iloko o na makahiki mamua aku o ka makahiki 1784. Me ke kanalua ole ke olelo ae, o na iwi o na kupunawahine o keia poe Farani me he mea'la o ko lakou mau iwi pu kekahi iwaena o lakou.
HE MANA KA NAAUAO.
O keia ka hapa mua o ke kukulu manao ana a Rev.Henry Ward Beecher ke kahuna pule kaulana ma ka haiolelo ana.
Eia ka wehewehe a mr Beecher, penei: Ina ua hoomapopo ia ka naauao a me ke kumu o ka naauao, alaila, e hiki ke olelo ia, o ka naauao he mana kona.
KE KULEANA O NA KULA.
O ka home oia no hale kula kupono no na la opiopio o na keiki, oia no ka hale kula ma ka papa ekahi, kahi e ao ia ai e na makuahine, a hiki i ka wa e hiki ai i ke keiki e ike iaia iho i kona kupono a me ka ole a o kahi no hoi ia e alakai ia ai ma na mea e pili ana i ke aupuni Uhane. A ma ia hope mai au loaa ka naauao oiaio.
NA MEA O KA AE KAI O KA PAKIPIKA.
KAKAREMETO. - Ua hoouna aku na kamaaina o Kakarameto ma Geregarapa he $1,780 he mau dala kokua no ka poe e luku ia ala e ka mai fiva lenalena. A au mahelehele ia penei: He $667,50. i ke Kiaaina Lusiana, he $667.50 i ke Kiaaina o Misisipi; a he $445, i ke Kiaaina o Tennessee, a na kela a me keia kiaaina e puunaue aku na na poe i looohia i keia pilikia ma ko lakou mau moku aina iho.
SANTA CRUZ. - Ma ka auina la o nehinei, ua poino ia kekahi keiki kane ma kona haule ana mai ka pali kahakai mai oiai oia e lawaia ana o ke kiekie o kona wahi i haule ai he 40 kapuai, a ua haki ia kona pulima me kona uha. He mea kanalua kona ola ana.
Ua makana aloha aku na wahi kamaaina kakaikahi o Fresno he $725, no ka poe i pilikia i ka fiva lenalena.
He olai kai hoonaueue ae ma ka hema o Humbolt, aohe poino i ike ia.
HE MAU AHAHUI HOU. - Ua kukulu ia iho nei mai Kahana, Koolauloa Oahu, he mau Ahahui elua, Hui Manawalea, a he Hui Opio keikikane. Peresidena o ka Hui Manawalea, Mrs. Kamaka, hope Peresidena Mrs. Poopuu, hope elua, Kamehaiku, Kakauolelo, Mrs. Kaliwa, Puuku. Mrs. Palaie, Peresidena, o ka Hui Opio, Mr. Kaulahea, hope Peresidena, Kahiamoe, hope elua, Kaahanui Kakauolelo, Jno.Kamaka. Mai ka peni mai keia a J.l.K.Kealakuhilima.
KUAI.
E KUAI ia ana hookahi eka kalo a oi aku ma Niolopa, e o-o ana i ka malama o Okatoba.
871 tf E ninau ia J.H.CONEY, (Koni.)
AINA KUAI A HOOLIMALIMA.
HE Kanalima Kumamaono eka aina ma Iwilei. (Makai iho o ka Halepaahao.) He Loko I-a, Aina Kalo, Aina kau Paakai, aina kula a me ke kai. A me kekahi mau eka aina ma Peleula, he aina kalo, aina kula a me ke kai. He oluolu ke kuai ana. E ninau ia. J.H.CONEY, (Koni).
Honolulu, 865 tf
OLELO HOOLAHA.
AHA Kiekie o ko Hawaii Pae Aina, ma ka hooponopono waiwai. Mokupuni o Oahu, Hawaii Pae Aina. SS, Ma ka waiwai o HENRY OTIS BUCKLIN i make. Olelo kauoha e koho ana i la e hooiaio ai ka palapala kauoha, a no ka hoolaha ana. No ka mea, ma ka la 11 o Okatoba, 1878, ua waihoia mai imua o ka Aha, kekahi palapala i oleloia, eia no ke kauoha hope loa o HENRY OTIS BUCKLIN i make aku la; a me ka palapala hoopii e noi ana e hooiaioia kela palapala kauoha a e hoopuka hoi ka palapala Luna Hooko no James A.Hopper ua waihoia mai e J.A.Hopper. Nolaila, au kauoha ia, o ka Poalima oia ka la 27 o Dekemaba, 1878, ma ka hora 10 am. ma ka rumi hookolokolo oia Aha, ma Aliiolani hal Hale ma o Honolulu, oia ka la me ka hora, e hooiaio ia ai ia palapala kauoha, a e hoolohe hoi no ia noi ana mai, a me ka poe a pau i pili, e kue ana ia palapala kauoha, a me ka hoopuka ana i ka palapala Luna Hooko. A ua kauoha hou ia e hoolaha no ia mea no na pule ekolu, iloko o ka Pacific Commercial Advertiser a me ke Kuokoa he mau nupepa i pai ia a i hoolaha ia ma Honolulu. A ua kauoha hou ia, e hoopuka ia na palapala kena no na hoike no ia palapala kauoha a me na hooilina o ka mea i make, ma Amerika Huipuia a ma keia aupuni e hele mai a e kue i kela palapala kauoha i ka wa i oleloia.
Kakauia ma Honolulu, ko Hawaii Pae Aina, Okatoba 11, 1878. A.FRANCIS JUDD,
Ikea: Lunakanawai o ka Aha Kiekie.
A.Rosa, Hope Kakauolelo. 881 3t
AHA hookolokolo Kiekie o ko Hawaii Pae Aina, ma ka hooponopono waiwai. Ma ka waiwai o Alapai k o Kaneohe, Koolaupoko, Oahu, i make kauoha ole. Imua o ka Lunakanawai Kiekie Charles C.Harris. Olelo kauoha e hoolaha aku no ke noi ana mai e koho i lunahooponopono waiwai. Ma ka heluhelu a me ka waiho ana mai o ka palapala noi a J.Z.Kolopapela k o Kaneohe e hoike mai ana o Alapai k no Kaneohe, ua make kauoha ole ma Kaneohe, Oahu, ma ka la - o___, 1858. a e noi ana e haawi ia ka palapala hookohu lunahooponopono waiwai ia J.Z.Kolopapela. Ua kauoheia o ka Poakahi ka la 4 o Novemaba, 1878, oia ka manawa i koho ia no ka hoolohe ana i au noi la, imja o ua Lunakanawai la, ma ke keena hookolokolo o keia Aha ma Honolulu, a ma ia manawa a ma ia wahi no e hele mai ai na mea a pau i pili e hoike mai i ke kumu ina he kumu oiaio ko lakou, e ae ole ia ai ua noi la. A o keia olelo kauoha e hoolaha ia ma ka olelo Hawaii i ekolu pule ma ka Nupepa Kuokoa he nupepa ma Honolulu.
Kakau ia ma Honolulu, ko Hawaii Pae Aina, Okatoba, 1878
CHAS.C.HARRIS,
Ikea: Lunakanawai Nui o ka Aha Kiekie.
A.Roso, Ilope Kakauolelo. 881 3t
AHA Kiekie o ko Hawaii Pae Aina, ma ka hooponopono waiwai. Ma ka waiwai o CHAS. KANAINA i make. Kauoha e hoike i ke kumu ma ke noi o ka lunahooponopono waiwai e kuai i ka waiwai paa. Ma ka heluhelu a me ka waiho ana mai o ka palapala noi a W.C. Parke, lunahooponopono waiwai o ka waiwai o CHAS. KANAINA i make. E noi ana e haawiia ka mana e kuai i kekahi waiwai paa o ua mea make nei, a e hoike ana i kekahi mau kumu kupono ma ke kanawai, e kuai ia ai ua waiwai paa la. Ma keia, ke kauoha ia nei e hele mai ka poe i pili i ua mea make nei, a me na mea a pau i kuleana iloko o ka waiwai i oleloia, imua o keia Aha ma ka Poakahi, la 4 o Novemaba, 1878, ma ka hora 10 am. ma ke keena hookolokolo o keia Aha ma Honollu, ma ia manawa a ma ia wahi, e hoike ai i ke kumu e haawi ole i a ai ka mana e kuai i ka waiwai i oleloia. a ua kauoha hou ia, e hoolaha ia ke kope o keia kauoha, aole e emi malalo o na pule ekolu mamua o ka la i olelo ia e hoolohe ia ai keia noi, ma ka Pacific Commercial Advertiser a me ke Kuokoa he mau nupepa i paiia ma Honolulu.
Kakau ia ma Honolulu ko Hawaii Pae Aina, Okatoba 8, 1878.
CHAS.C.HARRIS,
Ikea: Lunakanawai Nui o ka Aha Kiekie.
A.Roso, Hope Kakauolelo. 881 3t
Hoolaha Papa.
KE HOIKE ia aku nei na AILA HONUA kupono ole, no lakou na kuhikuhi i hoike ia malalo iho. U ike ia ka pilikia nui, ma ka lawelawe ia ana, oia hoi ma ka hoomaemae kupono ole ia ana; no lakou na mahu i emi iho malalo o hookahi haneri degere Faranaheita O na mea a pau he mau aila ka lakou, ke papa ia aku nei ko lakou kuai ana, haawi ana a me ka hoolako ana i keia ano aila i na kanaka, me ka hoa o ole ia mamua a ike ia ka pono.
O ka hoopai no ka mea kue i ke kanawai, aole e emi iho malalo o na dala he Kanalima, aole hoi e oi aku maluna o na dala he Elima Haneri, a i ole e hoopaahao ia ma ka hana oolea aole e oi aku mamua o ka makahiki hookahi.
Eia na Aila i Olelo ia.
O ka Aila KOMETA, e a ana ma ke ana wela o na degere he 86 a hiki i ke 93. Faranaheita.
O ka Aila ALADINA, aneane e a ana ma na ana wela a pau.
O ka Aila ORIENATELA, e a ana ma na degere he 95.
O ka Aila DAYLIGHT, e a ana ma na degere he 91.
O Ka Aila LUSTRE, e aneane a ana i na degere a pau.
O Ka Aila a ka Hui EUREKA, e a ana i na degere he 84.
Kakauia i keia la 14 o Okatoba, 1878.
881 W.C.PARKE, Ilamuku.
E IKE auanei na kanaka a pau o kela a me keia ano, ke nana mai lakou i keia olelo hoolaha, ke hoike nei a ke hoolaha aku nei au ma ke akea, ua kapu oa na kanaka aole e hele a lalau wale i na mea a pau maluna o keia mau aina i hoike ia malalo nei. Aina o Waikoloa, Hokuula ma Waimea Kohala Hema, aina o Puuanahulu, Puuwaawaa ma Kona Akau, aina me ka wai o Muliwai ma Waipio, aina o Mooiki, Kalopa mauka, Holuokawai, Kaohe makai, a me na Aamana 2, e waiho la ma Hamakua, mokupuni o Hawaii. aole pepehi wale i na holoholona, puaa, pipi, lio, kao, hipa, Iakake, i kuni ia a kuni ole ia, aole no hoi e pepehi i na manu o na ano a pau, aole oki wale i ka wahie, ua kapu loa. A ina kue kekahi i keia olelo papa, alaila e hoopii no au e like me ke kanawai. Koe wale no ka poe i hele mai imua o'u ma ka hoolimalima, a me ka palapala ae mai ia'u aku. Eia kekahi, ina e loaa ana kekahi ilio. e hele wale ana maluna o na aina hana i hipa, kao, e ki ia no i ka pu a me ka hoopii pu ia o ka ona nana ka ilio, e like me ke kanawai. E lilo keia i kanawai i kona la e hoolaha ia ai ma ka nupepa.
F.SPENCER, (Pakana.)
Puuloa, Waimea, Hawaii, Sept.30, 1878. 881 lm
UA HOONOHO pono ia mai ka mea nona ka inoa malalo iho e Hon.S.L.Austin, Lunakanawai Kaapuni Apana 3 ma Hilo, Hawaii, i lunahooponopono waiwai no ka waiwai o I (pake, no Puueo, Hilo, Hawaii i make aku nei. Nolaila, ke hoike ia aku nei i na mea a pau, ina he mau koina ko lakou i ka waiwai o ka mea i make, e hookomo koke mai i ka lakou bila aie maloko o na mahina eono mai keia la aku, a hala ia manawa e hoole mau loa ia aku no. A oka poe a pau i aie mai ia I, e hookaa koke mai lakou ia'u, ina he mau waiwai ko I, malalo o ka malama ana a kekahi mea a mau mea paha, e pono e hoike koke mai ia'u, mai huna o pilikia auanei. G.W.A.HAPAI
Lunahooponopono Waiwai o I (pake) i make.
Hilo, Oct. 10, 1878. 881 4t
OWAU o ka mea nona ka inoa malalo iho, ke hookapu loa aku nei au i kuu aina hoolimalima i loaa mai ia'u mai ka Papa Hoonaauao mai, oia ke Ahupuaa o Makawao, Ma ka mokupuni o Maui. aole e hookuu wale i na lio, pipi, hoki, kekake, hipa, kao a me ka puaa, maluna oia Ahupuaa o Makawao, ua kapu loa, aole e hookuu wale i na holoholona i olelo ia maluna. Ina o ka mea hookuu wale i kana mau holoholona me ke kuleana ole, e hopu ia no a e lawe ia i ka pa aupuni no ke komohewa. A pela no na ano kanaka a pau, aole e kii wale i na mea a pau maluna o ua Ahupuaa la i oleloia maluna, a o ka mea hoolohe ole i keia mau olelo, e hana ia e like me ke kanawai o ka aina. E hoolohe i keia olelo hoolaha o pilikia auanei.
T. AKANA LIILII.
Makawao, Maui, Oct. 1, 1878 881 tf
E IKE auanei na kanaka a pau ma keia olelo hoolaha, no ekolu hebedoma i hala ae nei, ua kuai au me Tongchin (pake) o Waialua, i kekahi pipi kane ulaula, ua okiia na kiwi elua, a ua kuni ia no hoi me ka hao kuni ABW ma kekahi wahi o ua pipi la. I ka wa i lawe ia mai ai o au pipi la a hiki ma Kapalama ma ka po, ua hemo aku ua pipi la a nalowale me ka paa no nae o ke kaula ma ke poo. Nolaila, o ka mea a mau mea nana e hoihoi mai i au pipi la ia'u, e uku no au i $8.00. E loaa no au ma ko'u halekuai ma ke kihi ma Waikiki o ka huina o na alanui Moi me Nuuanu. F.C.ACHEONG
Honolulu, Oct. 17, 1878. 881 4t
EIKE auanei kanaka a pau o kela a me keia ano, owau o ka mea nona ka inoa malalo nei, ke papa aku nei au mai oukou i kuu wahine mareia Mrs. MAKAWELI, no ka mea, ua haalele kumu ole mai oia ia'u. A oiai no hoi ua hoopai ia oia imua o ka Lunakanawai Hoomalu o Hilo, no ka moekolohe, aole no hoi oia i hoi iki mai me a'u. Ina oukou e hoaie iaia, maluna no ona ko oukou poho. aole loa au e hookaa ana i kona mau aie. E hoolohe, o pilikia auanei. M.KALIULA.
Puumoi, Hilo, Oct. 1, 1878 881 4t
EIKE auanei na kanaka a pau o kela a me keia ano ke nana mai ma keia olelo hoolaha, owau o ka mea nona ka inoa malalo iho, ke papa aku nei au i na mea a pau, mai hoaie mai oukou i kuu wahine mare ia KAHAKULEI (w), no ka mea, ua haalele mai oia ia'u, a aole no hoi au e hookaa ana i kona mau aie. E hoolohe a malama i keia leo papa.
AHU (pake.)
Honolulu, Oct. 14, 1878. 881 4t*
OKA'U wahine mare ponoi, o ANAMAREAEA WILIKINA, ua heo aku oia mai ko'u poli aku, me ka haalele kumu ole mai ia'u a me ko maua wahi moe, a aia kela i manua kahi i lalao ei, nolaila, ke ao aku nei au ia oukou e ka poe waiwai, mai hoaie mai oukou i kuu wahine o poho oukou, aole no au e hookaa ana ia mau ale, a ke papa hou aku nei au i na mea a pau loa. aole e hookipa wale me kuu ae ole, oiai aole au i hemahema i ka malama iaia i ka ai a me ka ia, a me na pono aahu e linohau ai. O ka mea hookuli a lohe au a ike paha i ka mea a mau mea nana i hookipa wale iaia, alaila, na ke kanawai e ao iaia. PUU.
Pauwela, Hamakualoa, Maui, Sept. 13, 1878. 881 4t*
DR RODGES,
- OIA O -
KAUKA LOKEKE.
UA hoonee ae nei i kona keena oihana mai ka hale ae o Ailuene ma Monikahaae a iloko o ka Hale Mu, helu 54 Alanui Papu.
Ma keia hope e hoomakaukau ana ke Kauka i kona mau Laau ponoi a puunaue aku i ka poe kii mai.
O kona hale noho, aia no ma ka pa o ka Hotele Hawaii, ma kahi i noho mua ai. 881 tf
DR. F. LESLIE MINER.
HE Kauka Lapaau a me ke kokua ana i na wahine hanau keiki. Aia kona keena hana ma ka Hale Kuai Laau Lapaau o e. strehz, ma ke kihi o na alanui Papu me hotele.
881 ly
AUHEA KA POE
MAKEMAKEHANA!
UA makemake ia kekahi poe hana hoolimalima ma ka la a me ka mahina. Ua ae ia no na kamalii nunui a me na wahine; he oluolu ka hana. E ninau ia LALIKI
881 4t ma Kaneohe, Oahu
Ua Makemakeia
I HALE noho e kokoke ana i ke kulanakauhale nei, ma ka hoolimalima, e kekahi kanaka Hawaii me kona ohana.
E ninau ma ke keena o ke Kuokoa. 881 2t.
I KUU wa e kaawale aku ai mai ke aupuni aku, o Kakela a me Hatch na mea hooponopono i ka'u oihana.
Honolulu, Aug. 5, 1878 871 tf S.B.DOLE.
OLELO HOOLAHA.
He Nui Anei Kou Makemake i na Mekini Humuhumu Lole?
Ina pela, alaila, e kipa mai no ma ka Halekuai
- o -
KAKELA A ME KUKE.
A malaila oukou e ike ai a makaikai i na ano MEKINI a WHEELER a me WILSON mai ke $40 a hiki i ke $50 ke kumukuai o ka mea hookahi.
Ka MEKINI a SINGER.
ma ke $50 pakahi, a me ke ano MEKINI a WILCOX me GIBBS, ma ke $30 a hiki i ke $50 ke kumukuai.
1 mea e pau ai ko oukou kanalua e na Makamaka no ke kupono o keia mau ano Mekini e naue mai no me ke kuihe ole, a e ike no oukou iho.
862 tf
ANO NO I LOAA MAI NEI!
Na Kaa Lio Holo Lealea!
Na Kaa Lawe Ohua a me na kaa holo palua, i mau mea hoikeike aku, mai ka Hale Hana Kaa mai o ka Hui o Cortland ma Nu Ioka.
DILLINGHAM & Co.,
Na Agena kuai ma Hawaii nei.
876 tf
KE papa ia aku nei na kanaka a pau aole e komohewa a lawe wale a hoopoino i na mea ulu, a kukulu walea hookuu wale paha i na holoholona a komohewa paha ma ke ano e a'e maluna o na aina ponoi a me na aina i hoolimalima ia e ka Hui Mahiko o Waihee, Maui. O ka mea hookuli i kela hoopii koke ia no e like me na Kanawai o ka Aina, nolaila ka hoolohe loa ka pono o pilikia auanei.
JAMES MAKEE & CO.
Waihee, Maui, Sept. 7, 1878. 876 @
KO
WEST A ME CHAYTER
MAU
HALE HANA KAA HOLO LEALEA!
Kaa Lawe Ukana,
Kapili Kapuai Hao,
- ME KA -
Hana Hou ana i na Kaa Nahaha.
E LOAA no i ka poe e makemake ana i na mea i hookeia maluna ke hele ae ma Polelewa ma ewa iho o ka halekuai o Kakela me Kuke, a makai o Ainahou, mauka mai o ka Hale Dute. E hana ia na hana a pau me ka maikai wale no E hooko ia no hoi na kauoha me ka eleu, a me ka hikiwawe.
(876 3m)
E Kuai ia Ana.
HE 1,000 Hipa a me 8,000 Kao o ka Hui Hanai Kao o Kaupulehu ma Kona, Hawaii. E ninau ia H. Cooper (Kupa) o Kailua.
858 tf A.S.CLEGHORN & CO.,
NA HALEKUAI
KAHIKINA NUI!
- MA -
Alanui Papu, Helu 62,
A ME
LILOIKAWAI!
- MA -
Alanui Nuuanu, Helu 21.
Ua wehe hou ae nei au i ka Halekuai
KAHIKINA NUI!
E ku Haaheo nei ma
ALANUI PAPU!
A ke hamama mau nei no hoi na puka oi
LILOIKAWAI!
- MA KE -
ALANUI NUUANU!
E loaa no i na keonimana kauaheahe a me na Lede maka palupalu, a me na opio puuwai waipahe o ke Kapitala hanohano o Honolulu nei, a me ko na mokupuni e ae, na mea a lakou i anoi nui ai, ke kipa mua mai ma ko'u mau Halekuai. He kuai makepono i ike ole ia kona lua ma Honolulu nei, he hoopakika, hoopahee, a he manukini o kela me keia ano. E loaa no ma ko'u mau Halekuai.
Mai ka 10 - 11 Ia Lepo Nalo $1.00
Mai ka 11 Ia Kalakoa $1.00
Kihei Huluhulu $1.00
Palule Huluhulu .75c
Palule Keokeo .50c
Iliwai no ka Holoku $3.00
Alapia no ka Holoku $4.00
Paa Lole Kane $5.00
Paa Lole Keiki $2.50
A me na lole e ae he nui wale o na ano waihooluu like ole, e ahu mokaki mai nei ma ko'u mau Halekuai. A ua hiki hou mai nei no hoi na lole nuhou loa o kela a me keia ano, maluna o ka moku kalepa "Discovery:: nolaila, e kipa nui mai, i ike pono i ka hana io a ka ua noe, a me ka loku a ka ua Kipuupuu i Waimea.
875 3m S.MAGNIN.