Ka Nupepa Kuokoa, Volume XVII, Number 43, 26 October 1878 — Page 2

Page PDF (1.92 MB)

Ma ke Kauoha.

                KE hoike ia aku nei i ka lehulehu, e wehe ia ana ka pa o Iolani, Halealii i ka po o ka la 15 o Novemaba, mamua iho o ka la 16 o Novemaba, ka la hanau o ka Moi. O ka poe hea inoa a pau, a me ka poe e hooili ana i na Mele Kahiko no ka Moi, e hele ae ma ia ahiahi mamua iho o ke kani ana o ka o-le kapu, oia ka hora 7 p.m.
            O na inoa a pau i hooili ia, a me na inoa i hea ia, e hoolaha ia no ma na nupepa, me na inoa o ka poe nana i hea a me ka poe nana e hooili ana i na inoa, e hoike ia no ia malalo o na mele i hea ia, ai hooiliia no lakou.
C. H. JUDD,
Puuku o ka Moi.
Oct. 18, 1878. 882 4t

            E kudala akea ia ana ma ka hoolimalima na Aina Aupuni malalo iho no na makahiki he umi ma ka la 15 o Novemaba, hora 12 o ke awakea, ma ke alo iho o Aliiolani Hale.
            Apana 1. Aia ma Hilo Akau, Hawaii, kekahi apana aina mawaena o Humuula a me Waipunalei, e pili ana i ka aina o Awawaiki a me kekahi, a ua kuhikuhiia na palena malalo iho.
            E hoomaka ana mawaena o ke kahawai o Kaawalii ma ke kai, a e holo ana ma ka pilikai i aneane e hookahi mile, a hiki i ke kahawai o Waipunalei; alaila moe aku la ma ka aoao o Waipunalei e like me ke kuhikuhi ma ke kii, he ekolu mile ke kaawale; a mai laila aku, moe aku la mawaena o ke kahawai o Kaawalii e pili pu ana me Humuula, a hiki i kahi i hoomaka ai; o ka nui he 900 eka. Maluna aku o $200 ka uku hoolimalima no ka makahiki.
            Apana 2. Aia ma Hamakua, Hawaii, he apana aina, mawaena o Opihilana a me Paauilo i kuhikuhi ia malalo iho:
            E hoomaka ana ma ke kihi akau o Paauilo a moe aku la ma ke kahakai mawaena o ke kahawai a moe aku la ma ke kai: Akau 70 degere, Komohana 550 kapuai, Akau 50 degere, Komohana 780 kapuai, Akau 62 degere, Komohana 600 kapuai, Hema 76 degere 4 sekona, Komohana 795 kapuai a hiki ma ka palena o Opihilala 947; alaila, moe aku la ma ka palena o Opihilala i olelo ia, Hema 11 degere 40 minute, Komohana 3160 kapuai; alaila moe aku ma Opihilala he 1277, Hema 70 degere 45 minute, Hikina 2250 kapuai a hiki iwaena o ke kahawai o Paauilo, ilaila moe aku la mai waena aku o ke kahawai i olelo ia (i aneane e 3160 kapuai ke kaawale) a hiki i kahi i hoomaka ai; o ka nui he 297 eka. Maluna aku o $175 ka uku hoolimalima no ka makahiki hookahi.
            E ike ia no na kii a me na kuhikuhi no keia mau aina ma ke keena o ke Anaaina Aupuni.
            He hookaa ma ka hapaha makahiki ma ke kuike.
SAM'L G. WILDER. (Waila.)
Kuhina Kalaiaina.
Keena Kalaiaina, Sept. 3, 1878. 882 tf

$20 MAKANA. $20

                A ka Nupepa Kuokoa e haawi ai no ka Hikimua ma ka Haina Pololei !
            E haawi ana KA NUPEPA KUOKOA i ka Makana i olelo ia maluna ma na mahele elua ; o ka mahele mua he $15, no ka helu akahi ia ; a o ka mahele elua he $5, no ka helu elua ia ; no na Kumumanao i oi aku mamua o na mea e ae a pau i hakuia maluna o keia ninau : PEHEA E HIKI AI KE HOOLAWA IA A PlHA KA LAHUI HAWAII ME NA HOME MAIKAI? O ke Komite nana e nana a e hooholo i na Kumumanao i kupono ke lawe i na makana, oia keia : His Ex. J. M. Kapena ; Hon. A. F. Judd ; Mr. J. Lota Kaulukou ; W. R. Kakela a me Rev. M. Kuaea.
            Mai keia la aku a hiki i ka la hope o Dekemaba, oia ka wa e lawe ia mai ai na Kumumanao e imi ana i keia mau mokuna, mahope o ka la hope o Dekemaba, aole e lawe ia mai. He hiki i na mea a pau ke imi i keia pomaikai.

E Hamau ka Pono.

E KA NUPEPA KUOKOA E; Aloha oe:—
            E ahonui kou oluolu, e hoike ae i ka puana a ka moe; nona kela mau huaolelo e kau ae la maluna.
            He oiaio, ua loaa keia kukulu manao noloko mai o ka ike pono, i ka hana a kekahi mau makua o ka apana o Hilo nei. Oiai na opio o keia home, e noho ana malalo iho o ka malawaina o ka maluhia; e huli ana hoi i ke kulana o ka noho oluolu ana. Aka, hoopii mai la nae lau'la i kekahi mau huaolelo oiaio ole me ka manao e huki, aku i ka manaolana maikai, o ka makou mau makua-ao, a e lilo hoi ko makou noho ana maikai, i mea e haulehia ai malalo o ka laua nei mau hana hoopakaawili wale no.
            Nolaila auhea olua e na makamaka mai hana olua i ka mea e hoino wale ai, i ka inoa maikai o ke Kulahanai o Hilo. A mai hana hoi i ka mea e hoopiha ai i ka naau o ka lehulehu i ka hoino. E waiho hoi i ko olua mau manao huhu, e poi hoi ko olua mau lehelehe i ka holoholoolelo ana.
            Ua lawa ko'u manao ma keia mea, no ka mea. Ke hea mai nei ke Kahuli leo nahenahe o ka uka ia'u, e hoi e pili me ka liko Lehua o Mokaulele. A oia ka'u e i ae nei.
"E hoi au e pili,
Me Sweet pua Iliahi,
I pulu i ka ua noe,
I ka liko o ka Awapuhi. "
                Me ke aloha i ka Lunahooponopono o ke " Kilohana Pookela o ka Lahui Hawaii. Me na keiki lawe poahi hoi o ka Hale Pai KUOKOA ka mahalo piha. O wau no me ke aloha. K. M. K. NAMAKANI.
Boarding School, Hilo, Oct. 17, 1878,

            PAUMA WAI:—-Ma ka Poalima aku nei i hala, ua hoao ia ka hiki kupono o ka mahu pauma wai a L. Makale, a ua ike ia ka hiki kupono; o ka nui o na galani wai ana i huki mai ka lua mai he 45 galani i ka hora.

            NA OLELO HOOLAHA—Ke puka aku nei ma ka pepa o keia la ka olelo hoolaha a ke keiki Pelekane Walakahauki e pili ana i kona hale kuai hou, a me na olelo hoolaha pili loio, mai poina hoi ka lehulehu i ka alawa ana'e ma na kolamu o na olelo hoolaha o ka kakou pepa.

            HE LEO UWALO Ke poloai ia'ku nei na Luna o ka NUPEPA KUOKOA a me ka poe e ae, ina he mau koena aie ko lakou no ko kakou NUPEPA, e hookaa koke mai ia makou ma Honolulu nei. A oiai hoi eiwa wale no helu i koe alaila pau keia makahiki; nolaila, ua makemake makou e hoomaka no ka makahiki hou me ke koe ole o kekahi mau mea keakea.
            E hoolohe i keia, e na makamaka, a e maliu mai i ka leo uwalo aku, i mea e nui ole ai ka hana mahope.
Honolulu Oct. 26, 1878.

KA NUPEPA
Kuokoa me ke Au Okoa
I HUIIA.
No ka Makahiki, $2. Eono Mahina, $1 Dala Kuike ka Rula.

OKATOBA 26, 1878.
                O KA ninau e pili ana no ka hoolaukanaka hou ana i keia mau kaiaulu o kakou, he mea kamahao ia, a he mea no hoi i noonoo nui ia e ka poe naauao iwaena o kakou. He ninau keia i komo loa iloko o ka puuwai o ka Hawaii oiaio. A he nui no hoi na manao pili e hoolala ana ma hai o keia ninau, e hili ana no ke ala a me ka nee mua ana o ka lahui kahiko o ko kakou nei pae moku. O kekahi hemahema o ka hoopae ana mai i ko na aina e iloko o na kau i hala, ke manao nei makou e ike ia ma ka lawe ia ana mai o na kane wale no, a he kakaikahi loa na wahine. O ka noho pu o kane me ka wahine oia ke ano maoli o ka noho ana o na lahui kanaka a pau, a ma kahi i kue ia'i keia rula inoino. O kekahi mea ano nui i nana iki ia, aka, aole paha i hoolawa piha ia ka noonoo, oia ke ano o na lahui i lawe ia mai iloko iho nei o keia mau makahiki. Aohe like na lahui o ka home e noho mai nei. Ua aneane like kekahi, a o kekahi nae, ua okoa loa; aohe wahi lihi launa iki. A iwaena o ia mau lahui ano like ole, aole maopopo ka hoomaika loa o ka hoohui ana.
            Ma ka wehe ia ana mai o ka ipuka e komo mai ai na Pukii me na ohana o lakou, a e hookahua a kamaaina iho me kakou, ke manao nei makou ua loaa kekahi meheu maikai iki ae o ke alanui hooulu lahui. O ka lahui Pukiki, he lahui mikiala ia ma ka hana. A o na hana i maa ia lakou, oia ka mahi ai a me ka hanai holoholona, a oia no na hana kahi i hookahua ia'i na pomaikai pili kino o na aupuni e ae o ka honua nei. Eia kekahi, o ka hookuina o ka lahui Pukiki me ko Hawaii, he hookuina maikai ia ma ko kakou ike maka ana. Ma na wahi a lakou i hoohui ai me ka lahui kahiko, ua ike ia ka pono, ua ulu mai na ohana, he koko ikaika, he makaukau i ka hana.
            He poe malama no hoi lakou i ka maluhia; he poe hoolohe kanawai, ke ole makou e kuhihewa ma keia mea. A oia kekahi mea nui i pono ai keia aina, a me na aina no a pau. O keia ano malama i ka maluhia me ka hoolohe i na kanawai o ka aina, he hua ia i ike ia iwaena o na lahui mikiala mau ma na hana kino. A o keia iho la kekahi ano i ike ia iwaena o ka lahui Pukiki.
            He lahui hookuonoono no hoi ma na pono kino. Ua hui pu lakou i ka ikaika ma ka hana me ka malama pono i na wahi loaa. A malaila kekahi hemahema nui o ko kakou lahui ponoi iloko o na wa i hala. O ka lahui Pukiki, he lahui imi loaa, me ka hoolilo pono. Ma ia mau kumu he nui ka poe naauao i noonoo he poe kupono lakou no ka hooulu lahui ma na kaiaulu o Hawawii nei.

            MA ka " Hawaii Pae Aina" o ka pule i hala, i ike ai makou i kekahi mau manao i oi aku mamua o ke kupono e hoopuka ia; a ke manao nei makou aole no i nele ko ka lehulehu hoohuoi ana me ke kahaha nui ma ko lakou heluhelu ana ia manao, a ma ia mea e ike ia'i ua hoohaahaa loa ia ka "Nupepa Hawaii Pae Aina" malalo iho o ke kulana kupono. No na mea e pili ana i na manao hoino no makou i hoopukaia ma ka hapa mua oia manao, aole a makou kamailio malaila, o ka lehulehu ka hoike oia mea.
            A no na mea hoi e pili ana i ka manao pepa i hoopuka ia ma ka Helu 38 o "Ko Hawaii Pae Aina," e pili ana i ka Oihana Loio, ua waiho ia'ku kekahi mau olelo pane e pili ana ia mea, a e apono ole ana no hoi ia manao, a me kona mau alakai ana, aole no hoi i apono ka lehulehu ia mea.
            O ka makou olelo hope ma keia e hoike aku ana makou i ko makou minamina i ka " Nupepa Hawaii Pae Aina," ma ka hapala ana mai ia makou me na huaolelo awahua o ka inaina a me ka manao ino, me ka olelo ana. "O ka nupepa i loaa ia makou ma ia ahiahi, ua like ka loaa ana ia makou me ka loaa ana i kela kanaka i pii ai maluna o ka pa a i kapa ia e ka Haku he powa."
            Ke nana iho ka lehulehu ma kela mau olelo, e ike ia auanei ka oiaio o ka makou i hoopuka ai ma ka Helu 41, o ke KILOHANA POOKELA o ka lahui Hawaii, no ka mea, o na olelo oiaio oia pauku a ka Hawaii Pae Aina i lawe hapa mai ai, me kona manao paha aole e hiki i ka lehulehu ke ike ia mea, penei no ia. "O ka mea e pii ae ma kahi e, he aihue ia a me ka powa." Nolaiia, auhea ka hoino i oi aku i keia, o ke kapa ana i kekahi mea, he aihue a he powa. Aohe a makou mau olelo pela ma ko makou mau kalai manao ana, aole no hoi makou i kapa aku i ka Hawaii Pae Aina, a me kona hookele he aihue a he powa, ina ua puka ke KUOKOA no ka manao e hooili aku i ko makou poe heluhelu ma na mokupuni e, a ua loaa hoi i ka hookele o ka Pae Aina, ka makou pepa alaila, aole makou e kapa aku ia ia me keia mau huaolelo awaawa, no ka mea, ua puka ka pepa, a he mea makehewa ka aua ana. Pela no i loaa'i ia makou ka nupepa, aole ma ke kii malu, aole hoi ma kekahi ano e ae e pili ana ma ia alanui, o keia mau hana a Ko Hawaii Pae Aina ka mea nana e hooiaio i ka mea a makou i olelo mua ai, he waihona ia pepa no na olelo hoino a me na haikaika ana, ua mahalo ole ia e ka poe maikai.

KE KEENA HOU O
"Maemae i ke Kai ka Pua o ka Hala!"

                MAI kinohi mai, ua komo mau ka iini iloko o makou e hooikaika me ka pauaho ole ma ka imi ana i na kumu e kuonoono ai ko makou mau makamaka; aole ma na inai wale no a na Kolamu e hoolauna aku ai; aole hoi ma ke aloha puuwai hookahi wale; aole no ma ka pa leo haihai olelo o kahi mehameha wale; aka, ma ka hookipa ana ia lakou a lilo no makou, a o makou hoi no lakou. He mea na makou i ike maka ka makahehi nui ia o ke kino o ka NUPEPA KUOKOA ; ua hookipa ia oia me ka manao makee e ka lehulehu, a ua malamaia kona kino me ka makahehi nui ia maloko o na waihona kapu o kona mau makamaka; nolaila, ua makemake a ua ulu ka iini iloko o makou e panai like ia mau hoike o ke aloha a na makamaka. A ano, ua hauoli makou i ka hai aku i na tausani e lawe nei i ke "Kilohana Pookela o ka Lahui Hawaii," ua panee aku makou i ko makou Keena Lunahooponopono mai kahi mua iho nei a hiki i kekahi o na Lumi wehe olu e kau ae la maluna o ka hale uinihapa hou o Dilinahama ma, Helu 37, alanui Papu. Ua ko ka iini a me ka makemake i noho hamauleo ia'i iloko o na la he lehulehu o ke au i hala 'e.
            A oiai ua hai ia ka puana a ka moe; ua huli ka lani a ua ko ka makemake; ke hookaulua ole nei makou i ka pahola laulaha ana aku i ka leo poloai i keia a me keia, mai na makamaka a me ka poe i hoomakamaka ole i ke KUOKOA; e kipa; e komo; e hooluana a e hookuonoono. No oukou keia mau paia; he Keena haihai olelo; kukakuka; a noonoo no ka pono a me ka holomua o Hawaii.
            Maanei e hoolawa ia'i ke pakaukau me na lako heluhelu ma ka olelo makuahine o ke one oiwi nei a me ka olelo o ka aina e; a e pau ai ka makemake mai na Nupepa o ke au kahiko a hoea i keia au hou; na Nupepa kii hoonanea i na makamaka puni nana kii a me na Nupepa piha manao kii ole; na buke e hoolawa ia'i ka ono o ka puni heluhelu a imi i ka ike—o neia mau mea a pau, na ko oukou mau makemake ia e na makamaka—a e like me ko makou ano mau; pela no ano; a pela no ma keia hope aku—o ka panai aku i na hookipa aloha me ka hoolaulea ana 'ku e like me ka hiki.
            Ano, mahope iho o ka haawi ana aku i ke aloha hope i na hiohiona o ka home i kuluma mua ia e ka makou makakila iloko o na kau i kaalo hope ae la, ke haawi hou aku nei makou i ka poloai laulaha ana, e kipa, e luana, e hooluolu, a e ike ia MAEMAE I KE KAI KA PUA O KA HALA. Mai hopo!

Na Mea Hou o ka Lai a Ehu.

                Iloko aku nei o ka malama o Sept. loaa aku o Manoanoa k, iloko o ka nahelehele ua make a ua ino. Penei kahi moolelo e pili ana nona; Ua noho pu no keia kanaka i kahi o kanaka, a no kekahi manawa, ua nalowale honua oia me ka ike ole ia. I kekahi la, hele aku la o Paina i ka mahiai, honi aku la oia i ka ea ino a i kona hele ana 'ku e ike pono, loaa aku la ke kino make o Manoanoa, ua palahe.
            I ka loaa ana 'ku, e paa ana no na huluhulu ma ke kua, he mau huluhulu moe po no nona, a o ka umeke poi no, e paa ana no ma kahi lima, i ka huli ia ana 'ku o ka umeke, aohe ai oloko, ua hele a maloo oloko. He mea maopopo, he make pololei ko keia kanaka elemakule, nona ka heluna makahiki i hiki aku i ke 80 a oi aku. Eia hoi aohe ana mau keiki, e hiki ai e malama ia ke ola o keia elemakule, i pono wale no i ke aloha mai o kekahi poe, a mai make ole no pana ina e noho loa ia no eia i kahi o kanaka.
            Hoike Kula Sabati.—Sept. 6, he hoike Kula Sabati hui ko ka lai a Ehu, mai Napoopoo mai a hiki i Makalawena, ma Heluai i Kahaluu kahi i hui ai, imua o ka Ahahui Euanelio o Hawaii Komohana ka hoike ia ana. Ma keia hui ana, aohe i hui pu mai me makou ke Kula Sabati o Kona waena, ua haule i hope ia kula, ua palaka a nanea wale paha ke kahu Kula Sabati.
            Ua maikai no na hana ma ia la, ua lana hoi ka manao a hauoli no na pokii, ua hauoli pu hoi ka manao no na kumu-papa a me na kahukula sabati apana, ua eleu a ku i ka mahaloia.
            Ua weheia na hana o keia la me ka himeni hui i keia leo: " Amelika." a me ka pule ana a Rev. Bingham. A mahope iho o keia, he mau himeni a me ka haiolelo a J. G. P. Hoapili Esq. i kakauia ma ka pepa, a ua mahalo kuu naau i kela kumumanao i hakuia, ina paha me au ke kope o kela kumumanao, ina ua hoouna aku au no ka NUPEPA KUOKOA. Aka, e kali ke ahonui o ka nupepa, malie o loaa mai ia'u ma keia mua aku, alaila, e hoouna uku no au.
            He ona! He ona!!—Oct. 5. ua ikeia aku kekahi kanaka o Keahinui k., kona inoa e walaau hele ana ma ke alanui, ua ona i ka papipi, a he kohu pupule ke ike aku ia ia ia manawa. Ua ku i ka pelapela kana mau hana a pau, aia oia e holo ana maluna o ka lio me ka manao ole ae i kona mau wahi huna.
            Eia kekahi mea manaonao loa ana i hana ai. Ma ka la i hai ia maluna, ua make iho la o Nawaa luahine, a i ka make ana, kii aku nei ua Keahinui nei e hoihoi i kona hale, aua mai kekahi poe aole make lawe, ua oki no malaila a hiki i ka wa e kanu ai, aole ae iki o keia kanaka ona, lalau oia i ka mea i make a kauo aku i waho, a no ka nui o ka poe i paa, a ua pakele mai lilo i ka mea i uluhia e na uhane eepa.
                I keia mau la no, ke inu liilii mai nei na kanaka ma na hale o lakou, a aia na kane na wahine e ona ana maloko o na hale o lakou.
            Paina luaau.— Sept. 27, ua malama ae kekahi mau makua mea keiki he paina luau no ka laua kamalei, he mau mea ai uuku no ka i hoolakoia, i kupono no no ka hapa uuku i naue mai. O Meriata Pilialoha ka mea nona ka la hanau. "Ua oi aku ka la hanau mamua o ka la e make ai."
            Ahaaina a ka Haku.—Oct. 6, ua malama ia ka papa aina a ka Haku ma ka Ekalesia Huiia o Kailua a me Helani. Na Rev. J. Waiamau i malama ka papa ahaaina ma Kailua, a na Rev. G. Puuloa hoi i malama ka papa ahaaina ma Helani.
            Ma ka papa ahaaina ma Kailua, uuku wale no na hoahanau i hiki mai e malama i ka ahaaina a ka Haku, o ke koena o na hoahanau, ua noho aku ma na hale o lakou.
            No ka wi.—Ua ano ola iki ae kekahi poe o ua Kona nei i keia manawa, ke ai mai nei i na uala a kekahi poe me kahi ipu-aimaka, a o ka poe hoopalaleha no, ke holo nei lakou i Kohala i kumakahiki, me ka manao paha he loaa wale mai. A ke manao nei keia poe e hele nei, o Kohala ko lakou home hope loa, a kuu aku ka luhi. D. ALAWA. Holualoa, N. Kona, Hawaii, Oct. 11, 1878.

            HOOLEI IA ILOKO O KA PA PUAA.— Ua loaa mai ia makou kekahi lono kaumaha mai Pauoa mai, no ka hoolei ia ana o kekahi kanaka iloko o ka pa puaa, he kanaka lolo ka ua kanaka la, a no ka uluhua paha o ka poe nana e malama ia ia, ua hoolei ia ma kahi kupono ole. Pela mai o Kaehukulani o Pauoa ia makou. Auhea na hoa o ka Ahahui Hoola Lahui oia apana, e kokua ae.

            MAI KOHALA MAI.—Mai ka peni mai a G. W. Kalohai o Halaula Kohala Hawaii makou i ike ai, ekolu mau hui malaila, o ka mua, hui mahiko o Halaula, 2 ka hui Makua o Kohala, 3 ka hui o Kohala Plantation.

            KA MAKE ANA O KAHALEPOULI.—Ua lohe mai makou ma ka la 18 o keia mahina ma Kapaa Kauai, ua make o David Kahalepouli Piikoi, oia ka lua o na keiki o ka hui Kawaihau i make. Aloha no.

            MAI A KAWAIULAILIAHI MAI.—Ma ka leta a S. D. W. Kawaiulailiahi o Kanahena makou i ike ai, u pepehi ia kekahi pake hana, a Kapena Makee & Co ; e kekahi luna hana, a i kona wa i manao ai e hele e hoopii imua o ka Lunakanawai apana o Honuaula, ua loaa mai i ka haku hana, a pepehi hou ia iho la. E hoohalahala pu mai ana no hoi no ke ano o ka hoohana ana a na luna hana oia mahiko.

            KE KUNA " MARIONA."—Ma ka hora 9 o ka po Poano o ka pule i hala Oct. 19, ua haalele aku ke kuua "Mariona" ia Koloa no Honolulu nei, a no ka pohu, nolaila, ua hookaulua ia oia ma ka moana no na la eono, a no ka haohao ia no ke ku koke ole mai, nolaila, ua hoouna ia ka mokuahi " Mokolii" e huli, a loaa aku malalo o Kalaeloa, mai laila ke kolo ia ana mai a komo i ke awa o Kou nei.

            HOOMA HUKA IA:—Ua lohe pono mai makou; ma ka Poaha o ka pule i hala, ua hoomahuka ia kekahi mau wahine elua mauka o kahawai o Kalihi e kekahi mau keiki no olaila, o Ohiape ka inoa o kekahi wahine no Lahaina mai a o Pupuka kekahi no Kalihi no, kii mai nei hoi ka makuakane o ke kaikamahine o Lahaina, hiu aku ana kela noho ka i wao, eono la ka loihi o ka noho ana iloko o ka nahelehele.

            NA HANAU.—-Iulai 5. ma Holualoa, hanau o Kaholo (w) na Lono (k) me Kauhane (w.)
Augate 1, ma Puapuaaiki, hanau o Makahai (w) na Kialoa (k) me Kunui (w.)
Augate 12, ma Holualoa, hanau o Naliiilianuekoluikauaopuna (k) na D. Kahao (k) me Ipupaka (w.)
                NA MAKE:—Iulai 18. ma Holualoa, make o Moeakeawe (w).
Iulai 26, ma Paupuaanui, make o Kamakolu (w).
Augate 4, ma Holualoa, make o Naihe (k).
Sept. 2, ma Puapuaaiki, make o Manoanao (k).
Sept. 2, ma Palaueka, make o Kealaehu k.

            MARE—Sept. 30, mare ia e Rev. J. Waiamau o Adamu Kaiewe opio (k) me Sera Kekaulike Ikaika, ma ka home noho o ke kahunapule kahi i hoohui ia'i.
D. ALAWA.

OLELO HOOLAHA.

                MA ke keena o ka Lunakanawai Kaapuni o ka Apana 2 o ko Hawaii Pae Aina. Ma ka waiwai o Napua k no Manoa, Oahu i make. Ua heluheluia a ua waiho ia ka palapala noi a Kimo k e noi ana e hooponopono ia ka waiwai o Napua k, no Manoa, Oahu i make kauoha ole, a e hooholo ia i na hooilina. Nolaila, ke kauoha ia aku nei na kanaka a pau ke pili, o ka Poakahi oia ka la 18 o Novemaba 1878, ma ka hora 9 am ma ka hale hookolokolo ma Makawao, oia ka la a me kahi i koho ia no ka hoolohe ana i ua nonoi la a me na mea kue ke hoike ia. ABR. FORNANDER.
Lunakanawai Kaapuni Apana 2, H P A. Lahaina, Oct. 16, 1878. 882 3t

            MA ke keena o ka Lunakanawai Kaapuni o ka Apana 2 o ko Hawaii Pae Aina. Ma ka waiwai o Kaohia k no Hamakuapoko, Maui i make. Ua heluheluia a ua waiho ia ka palapala noi a F. Hoopii, ka lunahooponopono no ka waiwai o Kaohia k, no Hamakuapoko, Maui i make, e noi ana e hoapono ia kona moo waiwai, a e hookuu iaia mai ka oihana a e hooholo ia ka waiwai i na hooilina. Nolaila, ke kauoha ia aku nei na kanaka a pau ke pili, o ka Poakahi, oia ka la 18 o Novemaba 1878, ma ka hora 11 o kakahiaka, ma ka hale hookolokolo ma Makawao, oia ka la a me kahi i koho ia no ka hoolohe ana i ua nonoi la a me na mea kue ke hoike ia.
ABR. FORNANDER. Lunakanawai Kaapuni Apana 2 H P A. Lahaina, Oct. 17, 1878. 882 3t

            MA ke keena o ka Lunakanawai Kaapuni Apana 2 o ko Hawaii Pae Aina. Ma ka waiwai o Mahulu k no Kaupo, Maui i make. Ua heluhelu ia a ua waiho ia ka palapala noi a P. Kamai, ka lunahooponopono no ka waiwai o Mahulu k, no Kaupo, Maui i make, e noi ana e hoapono ia kona moowaiwai a e hookuu iaia mai ka oihana a e hooholo ia ka waiwai i na hooilina. Nolaila, ke kauoha ia aku nei na kanaka a pau ke pili, o ka Poaha oia ka la 21 o Novemaba 1878, ma ka hora 9 am ma ka halekula o Mokulau, Kaupo, oia ka la a me kahi i koho ia no ka hoolohe ana i ua nonoi la a me na mea kue ke hoike ia. ABR. FORNANDER,
Lunakanawai Kaapuni Apana 2 H P A. Lahaina Oct. 17. 1878. 882 3t

            MA ke keena o ka Lunakanawai Kaapuni o ka Apana 2 o ko Hawaii Pae Aina. Ma ka waiwai o Pilipo Hanuna no Hana, Maui i make. Ua heluheluia a ua waiho ia ka palapala noi a J. K. Hanuna, e noi ana e hooponopono ia ka waiwai a Pilipo Hanuna, no Hana, Maui i make, a e hooholo ia i na hooilina. Nolaila, ke kauoha ia aku nei na kanaka a pau ke pili, o ka Poaha oia ka la 21 o Novemaba 1878, ma ka hora 10 o kakahiaka, ma ka halekula ma Mokulau, Kaupo, oia ka la a me kahi i koho ia no ka hoolohe ana i ua nonoi la a me na mea kue ke hoike ia. ABR. FORNANDER.
Lunakanawai Kaapuni Apana 2 H P A. Lahaina Oct. 17,1878 882 3t

            MA ke keena o ka Lunakanawai Kaapuni o ka Apana 2 o ko Hawaii Pae Aina. Ma ka waiwai o Naala k no Hamakualoa, Maui i make. Ua heluheluia a ua waiho ia ka palapala noi a Hanaloa w, e noi ana e hoonoho iaia i lunahooponopono o ka waiwai o Naala k no Hamakualoa, Maui i make. Nolaila, ke kauoha ia aku nei na kanaka a pau ke pili, o ka Poakahi oia ka la 18 o Novemaba 1878, ma ka hora 10 am, ma ka hale hookolokolo ma Makawao, oia ka la a me kahi i kohoia no ka hoolohe ana i ua nonoi la a me na mea kue ke hoike ia. ABR. FORNANDER,
Lunakanawai Kaapuni Apana 2 H P A. Lahaina Oct. 17,1878. 882 3t

            MA ke keena o ka Lunakanawai Kaapuni Apana 2 o ko Hawaii Pae Aina. Ma ka waiwai o Kanihooi k no Wailuku, Maui i make. Ua heluhelu ia a ua waihoia ka palapala noi a D. Kailianu, e noi ana e hoonoho iaia i lunahooponopono no ka waiwai o Kanihooi k no Wailuku, Maui i make. Nolaila, ke kauoha ia aku nei na kanaka a pau ke pili, o ka Poaha oia ka la 14 o Novemaba 1878, ma ka hora 9 1/2 am, ma ka hale hookolokolo ma Wailuku, oia ka la a me kahi koho ia no ka hoolohe ana i ua nonoi la a me na mea kue ke hoikeia
ABR. FORNANDER, Lunakanawai Kaapuni Apana 2 H P A. Lahaina Oct. 15,1878. 882 3t

            MA ke keena o ka Lunakanawai Kaapuni Apana 2 o ko Hawaii Pae Aina. Ma ka waiwai o Kaamoku k no Hana, Maui i make. Ua heluhelu ia a ua waiho ia ka palapala noi a Kahaulelio w, e noi ana e hoonoho iaia i lunahooponopono no ka waiwai o Kaamoku k, no Hana, Maui i make. Nolaila, ke kauoha ia aku nei na kanaka a pau ke pili, o ka Poaono oia ka la 30 o Novemaba 1878, ma ka hora 10 am, ma ka hale hookolokolo ma Lahaina, oia ka la a me kahi i koho ia no ka hoolohe ana i ua nonoi la a me na mea kue ke hoike ia.
ABR. FORNANDER, Lunakanawai Kaapuni Apana 2 H P A. Lahaina Oct. 17, 1878. 882 3t

            MA ke keena o ka Lunakanawai Kaapuni o ka Apana 2 o ko Hawaii Pae Aina. Ma ka waiwai o M. P. Peenahele no Hana, Maui i make. Ua heluhelu ia a ua waihoia ka palapala noi a J. K. Hanuna a me Iulia K. Peenahele, na lunahooponopono o ka waiwai o M. P. Peenahele no Hana, Maui i make, e noi ana e hoapono ia ko laua moo-waiwai a e hookuu ia laua mai ka oihana, a e hooholo ia ka waiwai i na hooilina. Nolaila, ke kauoha ia aku nei na kanaka a pau ke pili, o ka Poaha oia ka la 21 o Novemaba 1878, ma ka hora 11 am. ma ka halekula ma Mokulau, Kaupo, oia ka la a me kahi i koho ia no ka hoolohe ana i ua nonoi la a me na mea kue ke hoike ia. ABR. FORNANDER,
Lunakanawai Kaapuni Apana 2 H P A. Lahaina Oct. 17. 1878. 882 3t

HOOLAHA A KA LUNAHOOPONOPONO WAIWAI.

                NO ka mea, ua koho ia ka mea nona ka inoa malalo iho i Lunahooponopono Waiwai, ma ka la 12 o keia malama no ka waiwai o ka mea Hanohano W. L. Moehonua o Honolulu i make aku nei; ke hoolaha aku nei ma ke akea i na mea a pau a ka mea make i aie aku ai, e waiho mai i ka lakou mau bila, i hooiaio pono ia iaia, iloko o na malama eono mai keia la aku, o hoole loa ia lakou; a o na mea a pau i aie i ka mea i make, ke noi ia aku nei e uku koke mai iaia. CHAS. T. GULICK,
Lunahooponopono Waiwai o ka waiwai o ka mea Hanohano W. L. Moehonua i make. Honolulu, Oct. 18,1873. 882 4t

HOOLAHA A KA LUNAHOOPONOPONO WAIWAI.

                OIAI, ua hoonoho ia mai ka mea nona ka inoa malalo e Hon. S. L. Austin, Lunakanawai Kaapuni Apana 3 o Hilo, Hawaii; ma ka la 3 o Augate, 1878, i lunahooponopono waiwai no ka waiwai o Pakeokeo k o Laupahoehoe, Hilo, Hawaii i make aku nei, nolaila, ke hai ia aku nei ka lohe i na mea a pau, ina he mau koina ko lakou i ka waiwai o ka mea i make, e hookomo koke mai i ka lakou mau bila aie i hooiaio ia maloko o na mahina eono mai keia la aku, o hoole ia auanei, a o ka poe a pau i aie mai ia Pakeokeo k e hookaa koke mai lakou ia'u. A ina he mau waiwai ko ka mea i make malalo o ka malama ana a kekahi mea a mau mea paha; e hoike koke mai ia'u o pilikia auanei. S. W. PA.
Lunahooponopono Waiwai o Pakeokeo k i make. Hilo, Oct. 26, 1878. 882 4t

HOOLAHA A KA LUNAHOOPONOPONO WAIWAI.

                E IKE auanei na kanaka a pau, o ka mea nona ka inoa malalo iho, ua hoonoho ia mai e ka Hon. Abr. Fornander Lunakanawai Kaapuni Apana 2, i lunahooponopono no ka waiwai o Kikele k, o Kahakuloa, Maui i make. Nolaila, o ka poe i aie iaia a me ka poe ana i aie aku ai, e hoike koke mai lakou ia'u iloko o na malama eono, o hoole mau loa ia.
K. KEKAHA.
Lunahooponopono o ka Waiwai o Kikele. Lahaina, Oct. 8,1878. 882 4t*

HOOLAHA PA AUPUNI.

                EIA iloko o ka Pa Aupuni o Koholaloa, Apana o Honolulu, 4 Lio 1 Pipi. E kuai kudala ia ana ke hiki aku i ka la 29 o Oct. hora 12 awakea Poalua. Lio k puakea laekea iki 4 w keokeo hema hao ano e. Lio k ulaula kalekoa, laekea nui 3 w keokeo uha mua hema KlP, uha hope hema KU me keia hua J maluna. Lio w eleele laekea iki ma ka ihu, ak A hema hao ano e. Lio w lokia wiwi me ke keiki w ulaula hao ano e. Pipi w ulaula ua okiia kahi pepeiao hem lY ano powehiwehi ke kuni A. B. KAAUKUU.
Luna Pa Aupuni o Koholaloa. Oct 24, 1873. 1t*

KO
JNO. T. WATERHOUSE
(WALAKAHAUKI)
HALEKUAI HOU.

                UA wehe hou ae nei au i ka Halekuai a Dilinahama ma i noho mua iho nei, oia hoi ka Hale Pohaku o Kaimana e ku nei ma ke alanui Alii. Malaila e loaa ai i ka lehulehu na mea hao, pa, bola, ipukukui a me na mea a pau e pili ana ma ia laina. 882 2t
David K. Maleka.
Loio a he Kokua ma ke Kanawai.

            UA makaukau au e lawelawe i na hana a pau ma keia Oihana imua o na Aha Apana o ka mokupuni o Hawaii. E loaa no au ma ka hale hookolokolo ma Hilo, a e hooko ia no na kauoha mai na wahi a pau o ka mokupuni me ka hikiwawe loa. 882 1y oc26

Ua Makemakeia

                I HALE noho e kokoke ana i ke kulanakauhale nei, ma ka hoolimalima, e kekahi kanaka Hawaii me kona ohana. E ninau ma ke keena o ke Kuokoa. 881 2t.

OLELO HOOLAHA.

                AHA Kiekie o ko Hawaii Pae Aina, ma ka hooponopono waiwai. Mokupuni o Oahu, Hawaii Pae Aina, ss. Ma ka waiwai o HENRY OTIS BUCKLIN i make. Olelo kauoha e koho ana i la e hooiaio ai ka palapala kauoha, a no ka hoolaha ana. No ka mea, ma ka la 11 o Okatoba, 1878, ua waihoia mai imua o ka Aha, kekahi palapala i oleloia, oia no ke kauoha hope loa o HENRY OTIS BUCKLIN i make aku la; a me ka palapala hoopii e noi ana e hooiaioia keia palapala kauoha a e hoopuka hoi ka palapala Luna Hooko no James A. Hopper ua waihoia mai e J. A. Hopper. Nolaila, ua kauoha ia, o ka Poalima oia ka la 27 o Dekemaba, 1878, ma ka hora 10 am. ma ka rumi hookolokolo, oia Aha, ma Aliiolani Hale ma Honolulu, oia ka la me ka hora, e hooiaio ia ai ia palapala kauoha, a e hoolohe hoi no ia noi ana mai, a me ka poe a pau i pili, e kue ana ia palapala kauoha, a me ka hoopuka ana i ka palapala Luna Hooko. A ua kauoha hou ia e hoolaha no ia mea no na pule ekolu, iloko o ka Pacific Commercial Advertiser a me ke Kuokoa he mau nupepa i pai ia a i hoolaha ia ma Honolulu. a ua kauoha hou ia, e hoopuka ia na palapala kena no na hoike no ia palapala kauoha a me na hooilina o ka mea i make, ma Amerika Huipuia a me keia aupuni e hele mai a e kue i kela palapala kauoha i ka wa i oleloia.
Kakauia ma Honolulu, ko Hawaii Pae Aina, Okatoba 11, 1878. A. FRANCIS JUDD.
Ikea. Lunakanawai o ka Aha Kiekie.
A. Rosa, Hope Kakauolelo. 881 3t

            AHA Hookolokolo Kiekie o ko Hawaii Pae Aina, ma ka hooponopono waiwai. Ma ka waiwai o Alapai k o Kaneohe, Koolaupoko, Oahu, i make kauoha ole. Imua o ka Lunakanawai Kiekie Charles C. Harris. Olelo kauoha e hoolaha aku no ke noi ana mai e koho i lunahooponopono waiwai. Ma ka heluhelu a me ka waiho ana mai o ka palapala noi a J. Z. Kolopapela k o Kaneohe e hoike mai ana o Alapai k no Kaneohe, ua make kauoha ole ma Kaneohe, Oahu, ma ka la -- o -----, 1858, a e noi ana e haawi ia ka palapala hookohu lunahooponopono waiwai ia J. Z. Kolopapela. Ua kauohaia o ka Poakahi ka la 4 o Novemaba, 1878, oia ka manawa i koho ia no ka hoolohe ana i ua noi la, imua o ua Lunakanawai la, ma ke keena hookolokolo o keia Aha ma Honolulu, a ma ia manawa a ma ia wahi no e hele mai ai na mea a pau i pili e hoike mai i ke kumu ina he kumu oiaio ko lakou, e ae ole ia ai ua noi la. A o keia olelo kauoha e hoolaha ia ma ka olelo Hawaii i ekolu pule ma ka Nupepa Kuokoa he nupepa ma Honolulu. Kakau ia ma Honolulu, ko Hawaii Pae Aina, Okatoba, 1878
CHAS. C. HARRIS.
Ikea: Lunakanawai Nui o ka Aha Kiekie.
A. Rosa, Hope Kakauolelo. 881 3t

            AHA Kiekie o ko Hawaii Pae Aina, ma ka hooponopono waiwai. Ma ka waiwai o CHAS. KANAINA i make. Kauoha e hoike i ke kumu ma ka noi o ka lunahooponopono waiwai e kuai i ka waiwai paa. Ma ka heluhelu a me ka waiho ana mai o ka palapala noi a W. C. Parke, lunahooponopono waiwai o ka waiwai o CHAS. KANAINA i make. E noi ana e haawiia ka mana e kuai i kekahi waiwai paa o ua mea make nei, a e hoike ana i kekahi mau kumu kupono ma ke kanawai, e kuai ia ai ua waiwai paa la. Ma keia, ke kauoha ia nei e hele mai ka poe i pili i ua mea make nei, a me na mea a pau i kuleana iloko o ka waiwai i oleloia, imua o keia Aha ma ka Poakahi, la 4 o Novemaba, 1878, ma ka hora 10 am. ma ke keena hookolokolo o keia Aha ma Honolulu, ma ia manawa a ma ia wahi, e hoike ai i ke kumu e haawi ole ia ai ka mana e kuai i ka waiwai i oleloia. A ua kuoha hou ia, e hoolaha ia ke kope o keia kauoha, aole e emi malalo o na pule ekolu mamua o ka la i olelo ia e hoolohe ia ai keia noi, ma ka Pacific Commerciai Advertiser a me ke Kuokoa he mau nupepa i paiia ma Honolulu.
Kakau ia ma Honolulu ko Hawaii Pae Aina, Okatoba 8, 1878. CHAS. C. HARRIS. Ikea: Lunakanawai Nui o ka Aha Kiekie. A. Rose, Hope Kakauolelo. 881 3t

Hoolaha Papa.

                KE HOIKE ia aku nei na AILA HONUA kupono ole, no lakou ua kuhikuhi i hoike ia malalo iho. Ua ike ia ka pilikia nui, ma ka lawelawe ia ana, oia hoi ma ka hoomaemae kupono ole ia ana; no lakou na mahu i emi iho malalo o hookahi haneri degere Faranaheita. O na mea a pau he mau aila ka lakou, ke papa ia aku nei ko lakou kuai ana, haawi ana a me ka hoolako ana i keia ano aila i na kanaka, me ka hoao ole ia mamua a ike ia ka pono.
            O ka hoopai no ka mea kue i ke kanawai, aole e emi iho malalo o na dala he Kanalima, aole hoi e oi aku maluna o na dala he Elima Haneri, a i ole e hoopaahao ia ma ka hana oolea aole e oi aku mamua o ka makahiki hookahi.
            Eia na Aila i Olelo ia. O ka Aila KOMETA, e a ana ma ke ana wela o na degere he 86 a hiki i ke 93 Faranaheita. O ka Aila ALADINA, aneane e a ana ma na ana wela a pau. O ka Aila ORIENATELA, e a ana ma na degere he 95. O ka Aila DAYLIGHT, e a ana ma na degere he 91. O ka Aila LUSTRE, e aneane a ana i na degere a pau. O ka Aila a ka Hui KUREKA, e a ana i na degere he 84.
Kakauia i keia la 14 o Okatoba, 1878.
881 tf W. C. PARKE, Ilamuku.

            E IKE auanei na kanaka a pau o kela a me keia ano, ke nana mai lakou i keia olelo hoolaha, ke hoike nei a ke hoolaha aku nei au ma ke akea, na kapu loa na kanaka aole e hele a lalau wale i na mea a pau maluna o keia mau aina i hoike ia malalo nei. Aina o Waikoloa, Hokuula, ma Waimea Kohala Hema, aina o Puuanahulu, Puuwaawaa ma Kona Akau, aina me ka wai o Muliwai ma Waipio, aina o Mooiki, Kalopa mauka, Holuokawai, Kaohe makai, a me na Aamana 2, e waiho la ma Hamakua, mokupuni o Hawaii. Aole pepehi wale i na holoholona, puaa, pipi, lio, kao, hipa, Iakake, i kuni ia a kuni ole ia, aole no hoi e pepehi i na manu o na ano a pau, aole oki wale i ka wahie, ua kapu loa. A ina kue kekahi i keia olelo papa, alaila e hoopii no au e like me ke kanawai. Koe wale no ka poe i hele mai imua o'u ma ka hoolimalima, a me ka palapala ae mai ia'u aku. Eia kekahi, ina e loaa ana kekahi ilio, e hele wale ana maluna o na aina hanai hipa, kao, e ki ia no i ka pu a me ka hoopii pu ia o ka ona nana ka ilio, e like me ke kanawai. E lilo kela i kanawai i kona la e hoolaha ia ai ma ka nupepa. F. SPENCER, (Pakana.) Puuloa, Waimea, Hawaii, Sept 30, 1878. 881 1m

            UA HOONOHO pono ia mai ka mea nona ka inoa malalo iho e Hon. S. L. Austin, Lunakanawai Kaapuni Apana 3 ma Hilo, Hawaii, i lunahooponopono waiwai no ka waiwai o I (pake) no Puueo, Hilo, Hawaii i make aku nei. Nolaila, ke hoike ia aku nei i na mea a pau, ina he mau koina ko lakou i ka waiwai o ka mea i make, e hookomo koke mai i ka lakou bila aie maloko o na mahina eono mai keia la aku, a hala ia manawa e hoole mau loa ia aku no. A o ka poe a pau i aie mai ia I, e hookaa koke mai lakou ia'u, ina he mau waiwai ko I, malalo o ka malama ana a kekahi mea a mau mea paha, e pono e hoike koke mai ia'u, mai huna o pilikia auanei. G. W. A. HAPAI,
Lunahooponopono Waiwai o I (pake) i make. Hilo, Oct. 10, 1878. 881 4t

            OWAU o ka mea nona ka inoa malalo iho, ke hookapu loa aku nei au i kuu aina hoolimalima i loaa mai ia'u mai ka Papa Hoonaauao mai, oia ke Ahupuaa o Makawao, ma ka mokupuni o Maui, aole e hookuu wale i na lio, pipi, hoki, kekake, hipa, kao a me ka puaa, maluna oia Ahupuaa o Makawao, ua kapu loa, aole e hookuu wale i na holoholona i olelo ia maluna. Ina o ka mea hookuu wale i kana mau holoholona me ke kuleana ole, e hopu ia no a e lawe ia i ka pa aupuni no ke komohewa. A pela no na ano kanaka a pau, aole e kii wale i na mea a pau maluna o ua Ahupuaa la i oleloia maluna, a o ka mea hoolohe ole i keia mau olelo, e hana ia e like me ke kanawai o ka aina. E hoolohe i keia olelo hoolaha o pilikia auanei. T. AKANA LIILII.
Makawao, Maui, Oct. 1, 1878. 881 tf

            E IKE auanei na kanaka a pau ma keia olelo hoolaha, no ekolu hebedoma i hala ae nei, ua kuai au me Tongchin (pake) o Waialua, i kekahi pipi kane ulaula, ua okiia na kiwi elua, a ua kuni ia no hoi me ka hao kuni ABW ma kekahi wahi o ua pipi la. I ka wa i lawe ia mai ai o ua pipi la a hiki ma Kapalama ma ka pa ua hemo aku ua pipi la a nalowale me ka paa no nae o ke kaula ma ke poo. Nolaila, o ka mea a mau mea nana e hoihoi mai i ua pipi la ia'u, e uku no au i $8.00. E loaa no au ma ko'u halekuai ma ke kihi ma Waikiki o ka huina o na alanui Moi me Nuuanu. F. C. ACHEONG.
Honolulu Oct. 17,1878. 881 4t*

            E IKE auanei na kanaka a pau o kela a me keia ano, owau o ka mea nona ka inoa malalo nei, ke papa aku nei au mai hoaie mai oukou i kuu wahine mare ia Mrs. MAKAWELI, no ka mea, ua haalele kumu ole mai oia ia'u. A oiai no hoi ua hoopai ia oia imua o ka Lunakanawai Hoomalu o Hilo, no ka moekolohe, aole no hoi oia i hoi iki mai me a'u. Ina oukou e hoaie iaia, maluna no ona ko oukou poho, aole loa au e hookaa ana i kona mau aie. E hoolohe, o pilikia auanei.
M. KALIULA. Puumoi, Hilo, Oct. 1, 1878. 881 4t*

            E IKE auanei na kanaka a pau o kela a me keia ano ke nana mai ma keia olelo hoolaha, owau o ka mea nona ka inoa malalo iho, ke papa aku nei au i na mea a pau, mai hoaie mai oukou i kuu wahine mare ia KAHAKULEI (w), no ka mea, ua haalele mai oia ia'u, a aole no hoi au e hookaa ana i kona mau aie. E hoolohe a malama i keia leo papa. AHU (pake.) Honolulu. Oct. 14, 1878. 881 4t*

            O KA'U wahine mare ponoi, o ANAMARAKA WILIKINA, ua heo aku oia mai ko'u poli aku, me ka haalele kumu ole mai ia'u a me ko maua wahi moe, a aia kela i manua kahi i lalao ai, nolaila, ke ao aku nei au ia oukou e ka poe waiwai, mai hoaie mai oukou i kuu wahine o poho oukou, aole no au e hookaa ana ia mau aie, a ke papa hou aku nei au i na mea a pau loa, aole e hookipa wale me kuu ae ole, oiai aole au i hemahema i ka malama iaia i ka ai a me ka ia, a me na pono aahu e linohau ai. O ka mea hookuli a lohe au a ike paha i ka mea a mau mea nana i hookipa wale iaia, alaila, na ke kanawai e ao iaia.
PUU.
Pauwela, Hamakualoa, Maui, Sept. 13, 1878. 881 4t*

DR RODGES,
-----OIA O-----
KAUKA LOKEKE.

                UA hoonee ae nei i kona keena oihana mai ka hale ae o Ailuene ma Monikahaae a iloko o ka Hale Mu, helu 54 Alanui Papu.
            Ma keia hope e hoomakaukau ana ke Kauka i kona mau Laau ponoi a puunaue aku i ka poe kii mai.
            O kona hale noho, aia no ma ka pa o ka Hotele Hawaii, ma kahi i noho mua ai. 881 tf

DR. F. LESLIE MINER.

                HE Kauka Lapaau a me ke kokua ana i na wahine hanau keiki. Aia kona keena hana ma ka Hale Kuai Laau Lapaau o E. Strehz, ma ke kihi o na alanui Papu me Hotele. 881 1y

AUHEA KA POE
MAKEMAKEHANA!

                UA makemake ia kekahi poe hana hoolimalima ma ka la a me ka mahina. Ua ae ia no na kamalii nunui a me na wahine; he oluolu ka hana. E ninau ia LALIKI 881 4t ma Kaneohe, Oahu.

E. KEKOA LOIO! LOIO!

                NO na Aha Apana a me Hoomalu, ma ka mokupuni o Hawaii. 882 3m oc26