Ka Nupepa Kuokoa, Volume XVII, Number 43, 26 October 1878 — Page 4
KA NUPEPA
Kuokoa me ke Au Okoa
I HUIIA.
No ka Makahiki, $2. Eono Mahina, $1 Dala Kuike ka Rula.
OKATOBA 26, 1878.
Nearer my Home.
Colonial Singer, No. 120, p. 101.
1 He lei olino ka'u
E ike anei Mao, ma kela ao ;
No'u no ia lei.
Cho. : Kuu home mao, home mao,
Home lani mao;
Kokoke mai no kuu home ao,
Kuu home lani mao.:
2 E kupaa au a mau,
A naue ae Io i kela ao,
Ke ao maikai.
Cho. Kuu home mao, home mao, &c.
3 Iesu kuu Alakai
Ma keia ao; A, oia kuu Kiai,
Kuu Hoa mau.
Cho. Kuu home mao, home mao, &c.
4 O Iesu kuu Paku,
Kuu Kia ao, Kuu hoalauna pu,
Kuu Pono mau.
Cho. Kuu home mao, home mao, &c.
HAWAII.
Haawina Kula Sabati.
HELU 6. SABATI NOV. 10, 1878.
KUMUHANA.
Ka poe a Iesu i makemake ai. Pauku Baibala. Luka 18 ; 9—17.
9 Alaila olelo mai la oia i keia olelonane i kekahi poe i manao ia lakou iho he maikai, a hoowahawaha aku ia hai.
10 Hele ae la na kanaka elua i ka luakini e pule; he Parisaio kekahi, a he lunaauhau kekahi.
11 Ku aku la ka Parisaio oia iho no, a pule aku la penei, E ke Akua, ke aloha aku nei au ia oe, no ka mea, aole au e like me na kanaka e, ka poe hookaha, ka poe pono ole, ka poe moe kolohe, aole hoi me keia lunaauhau.
12 Elua ko'u hookeai ana i ka hebedoma hookahi, ua haawi hoi au i ka hapaumi o ko'u waiwai a pau.
13 A o ka lunaauhau hoi, ku mamao aku la ia, aole hoi i leha iki kona mau maka i ka lani, aka, papai iho la ia i kona umauma iho i aku la, E ke Akua, e aloha mai oe ia'u i ka mea i hewa.
14 Ke hai aku nei au ia oukou, Oia ka mea i hoi i kona hale me ka hoaponoia, aole kela ; no ka mea, o ka mea i hookiekie ae ia ia iho, oia ke hoohaahaaia ; a o ka mea i hoohaahaa ia ia iho, oia ke hookiekieia'e.
15 Alaila Uwe ae la lakou i na kamalii uuku ia ia e hoopa oia ia lakou ; a ike ka poe haumana, papa aku la lakou ia lakou la.
16 Aka, kahea mai la Iesu ia lakou e hele mai, i mai la, E ae aku i na kamalii e hele mai io'u nei, mai hoole aku ia lakou ; no ka mea, no ka poe me neia ke aupuni o ke Akua.
17 He oiaio ka'u e olelo aku nei ia oukou O ka mea aole i hoolauna i ke aupuni o ke Akua me he keiki uuku la, aole loa oia e komo ilaila.
Pauku Gula. p. 17, hoopaanaau. Mele. " Hahai ia Iesu." Hae Hoonani p. 8. p. 1, 2, 3.
Pule i hoohaahaa ia ka poe hookiekie.
Ka Wehewehe a Ninau ana. P. 9—14. Keia olelo nane, aole i kakauia ma na wahi e ae, ma Luka wale no.
P. 9. Nowai keia olelo nane? Owai la ia poe ? Maanei anei kekahi poe oia ano? Pela, ua hoowahawaha ia kanaka Hawaii, na Pake, na Negero e kekahi poe no Europa mai, no Amerika mai, e kuhi ana, he poe maikai a oi aku lakou.
P. 10. Ehia kanaka i hele i ka luakini e pule ? Ma ka hapa hea o ka luakini ? Ma ka pa, ka lanai i kapa ia ka pa o na wahine. Owai kekahi? A owai kekahi? He Iudaio no ka Parisaio; a o ka lunaauhau, he Iudaio paha, he kanaka e paha.
P. 11, 12. Hai mai i ka pule a ka Parisaio. 1 Ku oia iluna i ike ia, a hoomaikai i ke Akua no ke aha ? No kona like ole me wai? 2 Hai aku oia, i ehia hookeai ana ma ka hebedoma? Ka hapa aha o kona waiwai kana i haawi ai ? He ano pule anei ma keia mau olelo a ka Parisaio? Heaha kana i noi aku ai ? Aole oia i noi aku. Ma kona manao aole ona wahi hemahema iki. Ua hemolele loa. Kuhihewa loa, ea.
P. 13. Pehea ka lunaauhau ? Pehea ka maka ? Aha ma kona umauma ? He hoailona ia no keaha? Heaha hoi kana pule ? He wahi pule pokole, ea. Hiki i na kamalii ke pule me keia.
P. 14. Owai o laua nei ka i hoi aku i ka hale me ka hoapono ia ? E aha ia'na ka mea hookiekie ? E aha ia'na ka mea hoohaahaa ia ia iho? Heluhelu 1 Pet. 5; 5, 6.
P. 15. Ua kakau ia keia mau olelo no na kamalii ma Mat. 19; 13—15. Mar. 10; 13—16. E nana malaila. Owai ka i lawe ia io Iesu la? Nawai i lawe ? I aha Iesu ? I kau Iesu i kona lima ma ko lakou poo a hoomaikai mai. Ua maa na Iudaio ma ia mea, ka lawe ana i na keiki, me ka poe e ae imua o na makua, na kupuna, na kaula, e kau na lima, a hoomaikai mai. He mea nui Iesu, he mea aloha, he mea mana, e haalele loa ana paha ia Galilaia. A makemake keia mau makua e hoomaikai mai oia i ka lakou mau keiki uuku mamua o kona hele loa ana. Pehea nae na haumana? No keaha ko lakou papa ana? No ka manao he poe liilii lakou, aole kupono ke lawa ia io Iesu la, aole hiki ia lakou ke lohe a hoomaopopo i ka Iesu mau olelo. A he mea hoopilikia paha ia i ka Iesu mau hana, i kona hele ana paha. Pela anei kekahi poe maanei, papa, aole make e lawe i na keiki io Iesu, a iloko o kona aupuni?
P. 16. Pehea Iesu? Ua ukiuki oia i na haumana no ko lakou papa ana, a kahea aku e aha lakou? E ae e aha? Mai aha? No keaha? Me keia poe ka poe mahea? Ma keaha i like ai lakou ma ka lani me keia poe keiki uuku ? Ma ke kino anei ? Ma ka manao anei? Ma ke ano aha? Ma ke ano haahaa paha. Mai lawe kakou i keia pauku i mea e maopopo ai ua piha ka lani i na keiki uuku. Eia wale no ke ano, ua piha ka lani i ka poe ano haahaa, me na kamalii uuku ka poe akahai, hoolohe, maemae hoopili mau i ka Makua lani. Ua hana ke Akua i ke kulana o na keiki liilii ma kela
ao. E pule nae na makua ia Iesu, e hoomaikai, e hoola i ka lakou mau keiki.
P. 17. Heaha ka mea i hoole ia ? Ka mea hoolauna ole i ke aupuni o ke Akua me he keiki uuku la, Eia paha ke ano, Ina aole e ae kekahi e komo iloko o ke aupuni o ke Akua me ke ano haahaa, akahai, hoolohe me he keiki uuku la, a noho, a hana, a hoopomaikai ia malaila me ka mau ana oia ano, aole loa e hiki ia ia ke komo ilaila.
Heluhelu Mat. 18; 3—6.
Mele. "Ka Iesu kamaiki au." Hae Hoonani p. 4.
Na Ninau Hoi Hope.
Heaha ke kumu o ko Iesu hoopuka ana i kekahi olelo nane? Heaha hoi ia olelo nane ? Ka hapa hea ka i pili i ka poe iloko o ka pauku 9 ? He pule aha ka ka Parisaio? He ano pule anei ia ? Heaha ke ano o na Parisaio? Heluhelu Mat. 23; 13, 23,25
He poe pule lakou, hookeai, kokua hapaumi, pehea nae Iesu ma Mat. 5 ; 20? Nui anei na Parisaio maanei ? Nui no ka poe pule kokua, malia paha, he poe ano Parisaio kekahi.
Hai paanaau mai i ka pule a ka lunaauhau. Ka pule awai ka i hoapono ia ? He poe hewa anei kakou ? E pule kakou pehea? Ma owai la e aloha ia'i a e kala ia'i kakou ? Ua hele mai Iesu e hoola ia wai ?
Mahea kekahi pule haaha? Hal. 51; 1—4. Hai mai i kekahi poe i hookiekie ia lakou iho, a ua hoohaahaa ia ; a i kekahi poe i hoohaahaa ia lakou iho, a ua hookiekie ia. Pela anei ma ka la hope ?
He mau makua i lawe i na keiki liilii io Iesu la e aha oia ia lakou ? Pono anei i na makua maanei ke lawe aku i ka lakou mau keiki io Iesu la ? Ma keaha e lawe ai ? A no ke aha hoi ? Aloha anei Iesu i na keiki? A makemake no anei e hoomaikai, e hoola ia lakou ? Nawai i keakea i ke ola o na keiki? Ma keaha ke keakea ana ? Ma keaha e ola'i na keiki ? Me ke ano aha o na keiki ka poe ma ka lani ? Ina loaa ole ia ano i kekahi o kakou, hiki anei ke komo iloko o ka lani ? Heaha ko oukou ano ?
Mele. Him. 428. "He aloha ko Iesu," p. 1, 3, 5.
Pule no na keiki i hoola ia &c. Haawina no Nov. 17, Luka 19 ; 1—10.
Kumumanao.
PILIPI 3:2.
"E makaala oukou i na ilio, e makaala i ka poe hana ino, e makaala hoi i ka poe i okioki ia."
Hookahi no kauoha. E makaala, pili hoi keia makaala ana i ka poe ano like hookahi.
Na ilio, ka poe hana ino, ka poe i okioki ia, he ano hookahi no ko lakou a pau.
I. Na ilio. Elua ano o na ilio. 1 Na ilio maoli. 2 Na ilio nane, oia hoi ka poe ano ilio ma ka hoohalike ana. 1 Na ilio maoli. He ano maikai no ko kekahi mau ilio maoli. He hoa paani kekahi no na keiki. He hoapili aloha kekahi i ko lakou mau haku. He poe kokua kekahi ma ke
kiai hale, ma ka pale ana i na enemi, ma ka hoala ana i ka poe e hiamoe ana ma ka hale ke hookokoke mai ka poe kolohe, a ma ka malama ana, a ma ke alualu ana i na holoholona, pale aku i kekahi, a e hoihoi mai i kekahi.
A ua oi aku ka ilio ola mamua o ka liona make, wahi a ke Kahuna mok. 9; 4.
Aka, he ino ka nui o na hana a na ilio maoli. Eia kekahi mau hana ino. Aihue, kolohe, pepehi i na moa, i na hipa, hoopuiwa wale, walaau wale, hoohaunaele i na po lele a nahu mai i na keiki, i na kanaka, a hoohaunaele i na halawai, alualu ino i na holoholona, hoomahuahua i na ukulele, hoohaahaa i ka ohana ilalo e ai pu na ilio me na keiki, lele a nahu mai i na keiki, hoopau dala ma ka auhau, dala ia, hoopau ai, a nele na keiki i ka ai ole, hoala i ka hana me ka mokuahana ke pepehi ia kekahi ilio i aloha ia e ka hoa launa, hookonokono i ka ona e hoopunipuni i ka luna helu ke ninau oia, ehia au mau ilio? hookahi wale no. Elua ka ka pono. Ua huna ia kekahi no ka manawa: Ua haawi aku paha i kekahi hoa ma kahi e, no ka wa pokole.
Hana ino ea. Na ilio maoli, pau i ke aupuni, a i ka ai, kekahi mau dala, mai lilo ia mau dala i mea kokua i ko na aina e, i ke Kahu ekalesia, i mea kuai i ka lole, i ka ai, i na palapala no na keiki, no na makua paha.
E makaala ea, malama o poino, o hoopilikia ia e na ilio maoli.
II. Na ilio nane, oia hoi ka poe i hoohalike ia me na ilio hana ino.
1. Ua kapa na Iudaio i na kanaka e he poe ilio. Olelo Iesu ma Mat. 15; 26. Aole pono ke lawe i ka ai a na keiki, (a na Iudaio) a haawi aku na na ilio, na na kanaka e. 2. Ka poe hoomaloka, a ano pono ole.
Mai haawi aku i ka mea hoano na na ilio, wahi a Iesu ma Mat. 7;6.
3. Ka poe ino a pupuka. He ilio anei au, ninau Golia ia Davida, i hele mai oe i ou nei me ke kookoo? E alualu ana oe ia wai? mamuli o ka ilio make ? Ninau Davida ia Saula. No ke aha la e kuamuamu mai ai keia ilio make i kuu haku, i kuu alii; Ninau Abisai ia Davida no Simei. He ilio anei kau kauwa i hana aku ai au i keia mea nui? ninau Hazaela ia Elisai.
4. Ka poe enemi. Ua hoopuni mai na ilio ia'u, wahi a Davida. E hoopakele oe i ko'u uhane i ka lima o ka ilio. Hal. 22; 16 20.
5. Ka poe i hoi hope. E like me ka ilio i hoi hou aku i kona luai, pela ka mea naaupo e hoi hou ana i kona lapuwale, wahi a Solomona. 26;11.
6. Na kiai ao ole. Ua maopopo kona poe kiai, he poe ilio walaau ole ; oia, he poe ilio pololi wale, aole i ike i ka maona, wahi a Isaia 56; 10,11.
7. Ka poe manuahi. Aia mawaho na ilio, wahi a Ioane ma Hoikeana 22; 15, oia hoi ka poe ano moekolohe, aole ka moekolohe maoli, aka, o ka moe ana o ke kane mea wahine, me ka wahine mea kane paha, kane ole paha, a pela aku.
8. Ka poe alakai hewa, hoohali hewa, hoolalau. Oia ke ano o na ilio ma keia kumu manao. He poe Iudaio paha e paipai ana i na kanaka e, ma Pilipi e oki poepoe, e like me na Iudaio, i loaa ke ola. A oki poepoe ole ia, aole e loaa ke ola. Nolaila, aole lakou he poe oki poepoe oiaio, aka, he poe okioki ana, a ua okioki ia. E pani ana lakou i ka puka o ka lani i ole e komo iloko ka poe i oki poepoe ole ia me na Iudaio, oia hoi, e okioki ana lakou i na hoahanau ma Pilipi, e hoole ana, aole lakou e ola ke hoohalike ole lakou me na Iudaio, a e okioki ana lakou ia lakou iho ma keia alakai hewa ana ia hai. Aole lakou e komo aku ana iloko o ka lani. He poe i okioki ia lakou.
Heaha ke kauoha ? E makaala oukou no keia mau poe ilio. Pela hoi Iesu. "E malama hoi ia oukou no ka poe kaula hoopunipuni ke hele mai io oukou nei me ka aahu hipa ; aka, maloko, he poe ilio hihiu hae lakou. "
Ma ka hoopili ana.
1. Nui na ilio o keia mau ano i keia wa.
1. Na kumu Katolika. Eia ke ola ma ko makou ekalesia, aohe ola mawaho, ma ka ekalesia e ae, wahi a lakou.
2. Na kumu Moremona. Eia ke ola ma Uta, ma ko makou ekalesi. Ka ekalesia oiaio, oluolu kapu ole ka mare lehulehu, ka moe manuahi, maikai ko makou lani, nui na oli kino, na lealea kino malaila. Makou wale no ke komo ana malaila. Aole na ekalesia e ae. Huli mai, hui pu, ola pu me makou.
3. Na Kumu Mahomeda. Ko makou ekalesia ka oiaio, hoopunipuni ole, ma na pule e ola ai; nani wale ko makou Paredaiso, holo lio, kaua no, like loa ko laila mau lealea me ko ke ao nei a oi aku.
No makou wale no ia wahi, aole no na ekalesia e ae, huli mai a ola pu.
4. Na Kahuna Pegana. Nui wale ko makou mau Akua, wahi a lakou, pepehi, hoola, haawi i ka ai, i ka ua, i ke ola ma ke ao, lilo i mau akua malaila. Nani wale ko makou lani. No makou wale no, aole no hai, mai haalele kekahi i ko makou aoao, o poino loa.
5. Nui na kumu alakai hewa, a hoolalau i na kanaka i na kumu, i na kamalii.
Ka poe noho manuahi, e hoapono ana ia lakou iho e pili ana ia Aberahama, ia Iakoba, ia Elekana, ia Davida, ia Solomona o na alii o ka Isaraela, he poe ilio hae, ilio nahu, hana ino i ka ohana, alakai hewa i na keiki, hoomokuahana, hoala i ka lili, i ka huhu, i ka hakaka, i ka pepehi kanaka, pepehi kino, pepehi uhane ka poe hehi Sabati a hoapono ia lakou iho, ma ka olelo ana, he hana pilikia, he hele pilikia, he hana kahu Bibi, kahu hipa, kahu lio, he hana i kena ia, a pono ole ke hoole aku, he hana hoonanea, hoomaha i ke kino, e hele i uka, i kai e makaikai, e ike i na makamaka, e kipa ma ka hale leta e lawe i ka leta, he mea nui paha maloko, a pela aku.
Ka poe inu rama, inu waina, inu awa, puhi baka, nau baka, e hoapono ana ia lakou iho ma ka olelo ana, aole paha i hewa keia mau mea, he wahi kiaha rama uuku, he wahi kiaha waina uuku, hana Iesu i waina ma ke kahi ahaaina mare, inu waina ma ka papaahaaina a ka Haku, he mea hoopumehana hoi kahi kiaha rama i ke anu, he mea hooikaika kino hoi kahi kulu rama, kulu waina, kulu awa. Heaha hoi ka hewa i ka baka ? mai nau baka, mai kanu baka, mai kuai baka.
Aole anei malaila e loaa ai kekahi kokua mahina hou, a hanai kahu ? A pela aku ka poe pepa mea lealea, a hulahula, a hana keaka, a piliwaiwai, e hoapono ana ia lakou iho ma ka olelo ana, he hoopau manawa, he mea hoopau luhi, hoomaha kino, he mea kokua hoi i i ka poe ilihune, a i kekahi aha manawalea, he mea kuai i Piano, i Melodiana, he mea kokua i ka luakini hou e kukulu ia'na, i ka luakini kahiko e hana hou ia'na. Aole hoi i papa mai ka Baibala, mai pepalealea, mai hana keaka, mai hula. Ka poe hoomokuahana i na ekalesia, a malama ole i na ekalesia, kiai ole, paipai ole, ao ole aku, e waiho ana i na hipa e hoopauia e ka enemi.
Ka poe haku hana makau ole i ke Akua, malama ole i na kanawai o ke Akua, a hookaumaha i na paahana a hoohana ma na Sabati, a ae ole e hele i na halawai, i na Kula Sabati, a huhu, a hookuke aku ke aa e hele.
Ka poe e noho ana iloko o ka ekalesia me ka pono ole nae.
Ka poe i akiaki ia, elike me na kane mare, wahine mare i okiia no ko lakou hewa, a kii i palapala mare, a mare hou ia me ko lakou ano moe kolohe.
Ka poe akiaki, holoholo olelo, a hoala i ka hakaka. Nui na ilio, aole i pau i ka heluia, ua lawa nae keia poe. II. Heaha ke kauoha? E makaala, e malama, e ao o heowalewaleia, a alakai hewa ia e lakou, a hanainoia mai mahope, a uwe wale kakou i ka hope ino. E makaala mai hiamoe, mai hoolohe; mai ae wale aku. He poe maalea lakou nei i ka hoopahele ana i ka poe kiai ole. E hoakoakoa aku; E makau o lele mai lakou i ka wa hiamoe, a kiai ole, a hoopoino ia kakou. Mai wikiwiki e hui pu me lakou, a hele pu o hele pu ma ke ala palahalaha a paholo iho iloko o ke ahi o Gehena. Mai hoino wale nae ia lakou. Aka, e imi i ka mea e pono ai, malama paha, he hiki ke hoala i kekahi hapa o lakou, me ka makau me ka hoike ia lakou mai ke ahi mai; me ka inaina aku i ke kapa i pau maele i ko ke kino, Iuda p. 23. L. LAIANA.
Ka poe noho iloko o na hale lewa.
Ma ka nana'ku Ieremia 35; 6— 10, ua loaa kekahi poe i noho mau ma na hale lewa, oia hoi na mamo a Ionadaba, ke keiki a Rekaba. Oia ke kauoha a Ionadaba, aole e inu waina, aole e kukulu i mau hale paa, aka, e noho na mamo a mau loa aku. Ua hoolohe no lakou, a noho pela, noho auwana, noho ma kauwahi mau hale lewa, a pau na mea ulu, pau ka weuweu, pau ka ai, pau ka wai, alaila, e wawahi i na hale lewa, a e lawe aku me ona mau lako apau, maloko, mawaho, a e kukulu ia ma kahi e. Ua hana mau lakou pela a hiki i keia wa, ka poe uuku e koe ana, wahi a ka poe i ike. Pela ka noho ana o ka poe Arabia he nui wale. Loaa no ko lakou mau kau hale i ka poe malihini me na lako apau, oloko owaho. Ikeia ma kekahi la, a ma kekahi la, aia hoi, ua nalo, aole i ikeia kekahi mea uuku e koe ana. Pau loa na hale lewa, me ko lakou mau mea pili i ka nalo aku.
Ke ano ia o ko kakou noho ana ma keia ao. Ke noho nei iloko o na hale lewa.
Ma keia la, ua ike ia kakou e na kanaka, e hana ana i kela mea, i keia mea, me ka olioli. Maikai na hale, me ko lakou mau lako. Ma ka po, ua kuni ia na kukui, ua malamalama loa na keena, a ua piha hoi i na leo o ka poe e mele ana.
A hala he mau la paha, aia hoi ua ano e. Ua pio na kukui, ua pau na leo mele. Ua nalo aku ko lakou mau olioli. Aia lakou paha, kekahi hapa ke moe la ma na lua kupapau.
He alii o Peresia o Xerxes, he alihi kaua nui hoi oia, ua hele a kaua aku i ko Helene, me na koa he milionu paha. A hiki oia i Helene, nana oia i kona puali koa nui a nani, a o kona manao mua, e kaena, a mahalo; aka, ma kona hoomanao ana, aole paha e hala he haneri makahiki, a e pau e keia puali koa nani i ka make, lilo oia i ka uwe ana. He mea i lohe ia no kauwahi o na Iudaio, eia ia; i ke kukulu hale ana, he mea maa, ka waiho ana i kekahi keena me ka paa ole, i mea e hoomanao ai lakou, he poe malihini wale no lakou ma keia ao.
Ke ae nei anei kakou, he poe malihini kakou, elike me na kupuna ? He oiaio no, aohe wahi paa maanei. Aole paa na hale, na aina, na waiwai, ke ola ka olioli. Aia maluna ka waiwai paa. "No ka mea, ua ike makou, ina i wawahi ia ko makou hale kino lepo, o ka hale lewa, e loaa auanei ia makou ka hale na ke Akua, he hale hana ole ia e na lima, ua mau loa iloko o ka lani." AMERICAN MESENGER.
Koho i Haiolelo.
Aia ma ka la 22, o Sept. nei, M. H. 1878, oia ka la Sabati iho nei. Ua hui iho nei na wahi hoahanau kakaikahi o ka ekalesia o Keanae, e kuka e kahea i haiolelo no lakou, i mea nana e malama i ka maluhia o ke Sabati la o ke Akua.
A ua koho iho nei lakou i ka hapauea o Nahiku oia o J. Makukane, ua hiki kino mai no oia ia la, a ua ninau ia aku kona makemake a ua hai mai kela i hookahi dala nolaila, ua hooholo ia i hookahi dala no kela a me keia Sabati ana e hele mai ai a haiolelo ma ka luakini o Keanae ua hoomaka no ka lulu ana i wahi dala no ia hana, a ua loaa no na dala maikai eha i keia Sabati aole nae oia ka la 29 o keia mahina oia ka la i hookaawale ia'i no ia hana, a he manaolana ko'u e holo mua ana ia hana maikai, o ka poe nae i haawi iho nei i kela Sabati aku nei i hala nona kela mau heluna dala i hoike ia a e la maluna oia hoi keia. J. B. Kaakumoku he 50 keneta, H. K. Kahahai he 50 keneta, P. Lono 50 keneta, J. Hina he 25 keneta, B. B. Kalilimoku he 25 keneta, A. Hana (w) he 50 keneta, J. Kuluhiwa he 50 keneta, K. Makaena he 50 keneta, D. W. Napihaa he 50 keneta. Me ka mahalo. D. W. KALUA.
Honomanu, Sept. 24, 1878.
Aloha ino!
Heaha ? Ua hiki mai ko kakou Lei Alii. (Buke Himeni Kula Sabati) i Honolulu, ua paa pio nae ia ma ka Hale Dute, no ka hookaaoleia o ka aie maluna ona. Aie no ke pai ana, wahi ana, lawe ana mai Nu Ioka mai. He Buke nani keia, ka hiwahiwa ia o na Buke Himeni Hawaii apau. Pehea la e pau ai keia pilikia, keia aie i hookuuia mai oia a hoounaia i na Kula Sabati Hawaii, mai Kawaiahao a Hilo, a mai Kaumakapili a Koloa Kauai; i hookomoia hoi ia iloko o na Kula aupuni ? Loihi ke kali ana. E lana ka manao, kokoke e ko ana ka makemake. Nau na ka HAKU MELE.
OLELO HOOLAHA.
A. McWAYNE,
HALE KUAI LAAU LAPAAU, A ME NA WAIALA o na ano a pau, me na SOPA ALA o na ano he nui wale. Ma ke kihi o Alanui Papu me Kalepa.
840 1y
NA KAUKA
T. P. Tisdale a me C. L. Tisdale.
HOMEOPATHISTS.
HALE OIHANA A ME KAHI NOHO AIA ma ke alanui Beritania, mawaena o ka Luakini o Kaukeano a me ka pa hale o Kaleleonalani. E loaa no kekahi kauka o maua ma ke keena oihana i na wa a pau. O na poe a pau e makemake ana ia maua, e mikiala no maua me ke kaulua ole i ke ao a me ka po. T. P. TISDALE.
Honolulu, Mar. 28, 1878. 852 tf
E. STREHZ,
(AILUENE.)
MALAILA E LOAA AI NA ANO LAAU A pau; a me na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o alanui Papu a me Hotele, ma Monikahaae. (845 1y)
E. O. HALL & SON.
(E. O. HOLO MA.)
NA MEA KUAI I NA MEA MAHIAI, Na Lole, Na Pena, Na Aila, a me Na ano Lako e ae a pau he lehulehu wale.
846 Kihi o Alanui Papu me Moi. 1y
LOLE MAKEPONO
Ke Kuike.
E LOAA NO IA MA KAHI O KAKELA mE KUKE! E LAA NA Ahinahina, Kalakoa. Keokeo, Leponalo, Pena, Aila, Aniani, KOPA, AILA HONUA, AILA HOOMALOO Kui Kakia, Pakeke, Tabu, Kaula, Noho Lio, Hulu Palaki, na Pulumi.
AGENA NO HOI NO NA MOKUPUNI O HAWAII NEI NO NA Lainakini-nao, Lainakini Maoli, Palule Kalakoa, Alapia, Kelepa, Kilika, Na lole kupono i ka wawae, Palule Huluhulu, Na Lole Huluhulu, Na Lole no ka hoohehelo ana Lipini, Lihilihi, &c. LIPINE, LIHILIHI, &c. A ME NA Mikini Humuhumu MakeponoLoa ! A HE MAU MEA AI KAHI Ka Palaoa, Kopaa, Raiki, Pia, Hoohu, Paakai, Huaala, Pia Kulina, &c.
A he Laau Lapaau Kaulana Loa A DR. JAYNES. Laau Kunu, Laau Hoomaemae Koko, Laau Hoopau Naio, Penikila, Huaale, A ME NA LAAU HAMO, A PELA'KU !
827 3m 839
PAPA! PAPA!
-----NO-----
ALLEN & ROBINSON
UA WEHE AE NEI MAUA I PA KUAI PAPA MA KA UWAPO O PAKAKA Na Papa Ulaula o na ano a pau. Na Papa Paina o na ano a pau. Na Pili Hale Ulaula. Na Pili Hale Keokeo. Na Pepa Hoonani Hale, Na Pepa Molina. Na Pena a me na Aila Pena ! NA KUI O NA ANO A PAU, NA PANI PUKA a me NA PANI PUKA ANIANI. NA PANI PUKA a me NA OLEPELEPE. NA LAKO KUKULU HALE O NA ANO A PAU! E KUAIIA MA KE KE KUMUKUAI HAAHAA LOA O keia Makeke. ALLEN & ROBINSON
Honolulu, Ian. 1, 1878. 840 3m
PAPA, PAPA
AIA MA KAHI O
LEWERS & DICKSON!
(O LUI MA.)
MA KE KAHUA KAHIKO MA Alanui Papu a me Moi! E LOAA AI NA Papa Nouaiki! o kela a me keia ano. Na Papa Nani a Paa no ke Kukulu ana i na Hale! Na Pani Puka. Na Puka Aniani, Na Olepelepe, Na Pou, Na O-a, NA Papa Hele, Na Papa Ku, A me na Papa Moe nui loa. NA PILI O KA HALE O NA ANO A PAU. Na Pepa Hoonani, Na Pena o na Wai a pau, Na Kui mai ke Nui a ka Makalii. Na Ami Puka, Na Ami Puka Aniani, Na Ami o na ano a pau, Na Aila Pena, o kela me keia ano, Na Aila Hoomaloo, he lehulehu wale, Na Aila e ae o na ano a pau. NA WAI VANIKI A ME NA WAI HOOHINUHINU NANI! o na ano a pau loa. NA BALAKI ANO NUI WALE! A ke hai ia aku nei ka lono i na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana NO KA UKU HAAHAA LOA!
E like me ka mea e holo ana mawaena o LAUA a me ka MEA KUAI. E hele mai! E na Makamaka !! A e lawa no hoi ko oukou makemake me ka oluolu a me ka maikai!
845 tf
KOPA KUKAEPELE
--A--
CLENN!
AOLE LUA NO KA HOOMAEMAE I KA ILI ! He mea hoopau i na eha, Na Ili Puupuu, A he hoomaemae i na mea ino, A he hoopau Lumatika, A he kopa auau no hoi O keia Kopa ka oi aku o ka mea maikai I waihoia mai imua o kanaka. Aole wale no ka Hoopau ana i ka Huehue Ili Poha. Wela la, Luluaina, a me na mea e ae o ka Ili; A ma ia holoi ana, o ka hoopalupalu pu kekahi i ka Ili, a keia Laau Hoomaemae lua ole e hana ai. O ka hoemi ana iho i na mai o ka Ili, a o ke pale aku i ka mai mai na lole e na Mai Lele, oia kekahi. O na ohana ame na poe makaikai, ina e hoolako lakou i keia KOPA HOOMAEMAE LUA OLE ! ALAILA, UA LANAKILA LAKOU. He hoopau i ka lehu o ke poo, A he Kopa no hoi e kaohi mai ai I ka lauoho mai ka hina ana. Ua hooia nui mai na Kauka no ka maikai o keia Kopa! E loaa no ma kahi o M. McINERNY.
Kihi o na Alanui Papu me Kalepa.