Ka Nupepa Kuokoa, Volume XVII, Number 44, 2 November 1878 — Page 4
KA NUPEPA
Kuokoa me ke Au Okoa
I HUIIA.
No ka Makahiki. $2. Eono Mahina, $1 Dala Kuike ka Rula.
NOVEMABA 2, 1878.
E halawai ana ka Ahahui Lunakahiko o Maui, ma ka luakini Kaahumanu ma Wailuku Maui, ma ka Poalima elua o Nov. 1878. A ke kauoha ia aku nei na Ekalesia oia Ahahui, e makaala mai na hoa oia Aha; a e makaala pu no hoi. ko laila mau lunakahiko i maa mau i na hana, a hoomaopopo no hoi i ke ano e pili ma ia hana nui; mai koho i poe molowa, a hiamoe, a haalele wale iho i ka hana, me ke pau ole o ka hana i hele mai ai. A ke kauoha pu ia aku nei na ekalesia kahu ole, e hoomakaukau e koho i mau kahu no lakou a hele pu mai me na palapala kahea kahu. OBED. NAWAHINE. Kakauolelo o ka Aha.
Waihee Maui, Oct. 23, 1878.
I will Sing for Jesus
Colonial Singer, No. 110.
1 Mele au no Iesu,
Nana au i hana;
A oia no kau Alakai
I kuu auwana ana.
Cho.—E mele au no Iesu,
Mele au no Iesu,
Ka mea i hoola,
Hoola a mau loa.
2 Mele au no Iesu,
Oia kuu Palama,
A nana au e kiai mau.
A nana e malama,
Cho.—E mele au no Iesu, &c ;
3 Mele au no Iesu;
Mana kona inoa,
A oia no kuu mele e,
Kuu oli a mau loa.
Cho.—E mele au no Iesu, &c;
4 Mele au no Iesu,
Mele a mahalo,
I waena o na kini e
I ku ma kona alo.
Cho.—E mele au no Iesu, &c.
HAWAII.
To ARMS! To ARMS ! Ye Sol-diers !
Welcome Tiding p. 7.
1 Hamau ! hamau ! na koa!
Ke kani nei ka pu.
Hoolohe, ala, naue,
A kaua no Iesu.
Cho.—Ala'e! Ala'e ! na koa,
Ke paipai nei ka pu.
E naue me Iesu la,
A lanakila no.
2 Heaha la ke kaua ?
Owai na enemi ?
Ke ao, ko po, Satana,
Makena na kuu.
Cho.—Ala'e, ala'e, na koa, &c.
3 He kaua i na ino,
I koonei naaupo ;
He kaua no ka pono,
A no ke ola mau.
Cho.—Ala'e, ala'e, na koa, &c.
4 Aole me na pahi,
Aole me na pu,
Aole me ka pauda,
Ke kaua o kakou.
Cho.—Ala'e, ala'e, na koa, &e.
5 Ka olelo no ka pahi,
Ka paipai no ka pu,
Ka pule no ka pauda,
Ka boma me ka la.
Cho.—Ala'e, ala'e na koa, -&c.
6 He kaua koko ole,
He kau mana nae,
He kaua lanakila,
Auhea na enemi.
Cho,—Ala,e, ala'e, na koa, &c.
7 Ala'e ! ala'e ! hoolana !
Eia ae ka Iubile !
E paa ! e paa! Satana,
Ke kaula wahahee.
Cho.—Ala 'e, ala'e, na koa, &c.
8 No kakou nei ke ola,
Ka lei olino mau,
Ke mau a mau ke Kaua,
Ke kaua no Iesu.
Cho,—Ala'e, ala'e, na koa, &c.
HAWAII.
Haawina Kula Sabati.
HELU 7. SABATI NOV. 17, 1878.
KUMUHANA.
Zakaio, ka lunaauhau. Pauku Baibila. Luka 19; 1—10.
A KOMO ae la ia iloko o leriko, a mawaena ia i hele aku ai.
2 Aia ke kanaka i kapaia ka inoa o Zakaio, he lunaauhau nui, nui no hoi kona waiwai.
3 A imi ae la ia e ike ia Iesu i kona ano; aole hoi e hiki no ka paapu o kanaka, no ka mea, he poupou kona kino.
4 Holo ae la hoi ia mamua, pii ae la iluna ma ka laau sukomorea e ike ia ia, i kona hele ana'e malaila.
5 A hiki aku la o Iesu ma ia wahi, nana ae la iluna, a ike ia ia, olelo ae la ia ia, E Zakaio, e iho koke mai oe ilalo; no ka mea, ua pono ia'u ke noho ma kou hale i keia la.
6 A iho koke mai la oia ilalo, a hookipa ae la ia ia me ka olioli.
7 A o ka poe i ike ia mea, ohumu iho la lakou a pau, i ae la. Ua hele ia e hookipaia'e e ke kanaka hewa.
8 A ku ae la o Zakaio, i aku la ia i ka Haku, Eia, alikealike o kuu waiwai, e ka Haku, o ka'u ia e haawi aku ai no ka poe ilihune ; a ina i lawe au me ka hewa i ka kekahi, e pa-ha ka'u mea e uku aku ai ia ia.
9 Alaila olelo mai la Iesu nona, I neia la ua hiki mai ke ola ma keia hale, no ka mea, he mamo no hoi oia nei na Aberahama.
10 No ka mea, ua hele mai nei ke Keiki a ke kanaka e imi a e hoola i ka mea i nalowale.
Pauku Gula. p. 10. Hoopaanaau. Mele. Him. 237. E ka mamo a Davida, p. l, 2, 3, 4.
Pule i imi na haumana ia Iesu a loaa.
Ka Wehewehe, a Ninia ana. Ua hele mai Iesu mai ka akau a kokoke i Ieriko ma ka hema. Loaa mawaho ma ke alanui, he kanaka makapo. Kahea oia ia Iesu. "E Iesu ke keiki a Davida, e aloha mai oe ia'u." Aloha no Iesu, a haawi ia ia i ka ike Luk. 18; 35-43.
A ma hope iho, hele no Iesu a komo iloko o lenko me ka huakai e hele pu ana. E hele pu ana lakou i Ierusalema i ka ahaaina moliaola.
Ane 20 mile mai Ierusalema a leriko ma ka hikina akau mai e pili ana ia Ioredane. Ua hoohiolo ia Ieriko i ka wa ia Iosua, a kau ka poino maluna o ka mea i aa e kukulu hou. Ios. 6 ; 26. Ua aa nae kekahi i ka wa ia Ahaba, e kukulu hou, a ua hoopoino ia oia e like me ka wanana. I Na'Lii. 16 ; 34. Ua hewa ka mea nana i kukulu hou. Aka, aole paha i hewa ka noho ana iloko mahope iho. Aia malaila kekahi kula kaula i ka wa ia Elia me Elisai. Ua kapaia ia ke kulanakauhale pama, no ka nui o na laau pama (ano niu) malaila. Nui hoi na laau balesuma (laau ala) malaila.
P. 1, 2. Owai ka i komo iloko o Ieriko ? Owai kekahi kanaka nui malaila? Heaha kana oihana? He luna oia o na lunaauhau me he kuhina waiwai la ia kakou. He kanaka aha hoi oia? Owai kekahi lunaauahau i lilo e mamua i haumana na Iesu? a iluna olelo hoi ?
P. 3—4. Heaha ka Zakaio i imi ai ? Ua lohe pinepine paha oia na Iesu, no kana mau hana mana, aole nae oia i ike i kona kino, he kino kiekie paha, he ano alii, hanohano, ano anela, ano haa-haa paha. He mea nui nae oia, a kaulana loa. Iini loa oia e ike. Pela paha kakou, ina e hoea mai ana kekahi mea kaulana loa, aole anei kakou i makemake e ike ? Aole akaka, ua imi Zakaio e ike ia Iesu i loaa kekahi pono ia ia. He kanaka poupou nae oia. Nui ka huakai, kiekie kekahi poe. Hele wawae Iesu, aole maluna o ka lio, a maluna o ka manele hanohano, e like me na lii o keia ao. Nalo loa kona kino i ka poe poupou. Heaha kana i hana'i i ike oia ia Iesu ? Holo me me he keiki.la a pii i kekahi laau, aole manao i kona hanohano, a i ka akaaka i ka henehene ana mai o ka lehulehu. Ka ike ia Iesu kona makemake nui. He mea ole ia ia ka manao, ka olelo a hai. Pela anei na I haumana maanei ?
Ka laau sukomorea, me he laau kilika la ia, a o kona hua, me he hua fiku la ia. P. 5—6. A hiki Iesu ia laau ia, pehea kona maka ? Heaha kana kauoha ia Zakaio? E iho koke mai no keaha ? He olelo oluolu anei ia ? Haohao loa paha Zakaio. Aole ona manao, e ike ana Iesu ia ia, a e ae ana e hookipa ia ia ma kona hale. He kanaka hewa oia, aolo paha e makemake ana Iesu e noho ma kona hale. Aole kupono ia ia ke hookipa i keia mea hanohano, e like me Ieairo, ka lunahaneri. Hoolohe anei Zakaio i ka Iesu kauoha ? A hookipa ia ia me ke aha? Me ia anei ka oukou hana, e na haumana, hele koke mai i ka halawai, i ke kula Sabati, a hookipa ia Iesu, hoolohe, kula ma kana olelo me ka olioli? Aole anei he poe hoololohi kekahi, a kali mawaho, a kahea nui ia e komo mai ? Aole anei i haalele kekahi i na halawai, i na kula Sabati. no ka makemake ole, a olioli ole e hookipa ia Iesu?
P. 7. Ohumu ka kekahi poe no keaha i Owai ia poe? Na Parisaio paha. Ua hewa anei Iesu i kona ae ana e hookipaia e keia lunaauhau? Pela anei kekahi poe Parisaio mamua, ohumu no ko Iesu launa ana me na lawehala ? Ka inoa, ka pono ia o na haipule e launa pu me ka poe hewa, e ao aku, e paipai aku.
P. S. Malia paha ua kamailio e Iesu me Zakaio ma na mea e pili ana i ke ola, i ka lilo ana i haumana nana. A i kona lohe ana ua komo ka olelo iloko o kona naau, a mihi oia, a manaoio, a ae e hahai mamuli o Iesu. A i mea e maopopo ai ka oiaio o kona mihi, hoohiki oia e aha i kona waiwai
A e aha i ka waiwai ana i lawehewa ai?
Me he la. aole oia i kokua i ka poe ilihune mamua ; a me he la, ua lawehala oia i ka hai waiwai ma ka alunu, ma ka auhau hewa, auhau hooi. Ua akaka paha ia ia ke kanawai o Mose Puk. 22; 1, heluhelu,
P. 9. Heaha ka Iesu olelo no ka hale o Zakaio ? Me he la ua huli kona ohana a pau, me ka ohana o Ludia, me ka luna paahao, Oih. 16 ; 14, 15, 33. Ma ke ano aha oia i lilo ai he mamo na Aberahama ? ano kino, ano uhane. GaK 3 ; 7. He Iudaio maoli oia, a he Iudaio uhane hoi.
P. 10. Hele mai Iesu e imi ia wai? Owai ka poe i nalowale ? Ka poe hewa a pau ma na wahi a pau.
Mele. Him. 134. " He punawai i wehe ia'e," p 1.2, 3.
Na Ninau Hoi Hope.
1 Na keiki. Hai mai i na mea a oukou i lohe ai no Ieriko. Ua like anei ko oukou wahi me Ieriko? Ua like anei ka luakini, ke kula Sabati me Ieriko ? Aia anei Iesu?
Makemake anei oukou e ike ia Iesu? E pii ae oukou i hea i ike? I ka hale bele anei? i ka laau kiekie me ka niu anei? Pehea e ike ai ? Mahea hoi e ike maka aku ai ia Iesu?
2 Na makua. Hai mai i na hoailona no ka huli io, ka mihi ia me Zakaio. Ke haawi hapalua nei anei oukou i ko oukou waiwai i ka poe ilihune, i ko na aina e? Ke hoihoi aka nei anei oukou i ka waiwai a oukou i lawe hewa ai, aihue ai aie ai? Ua kaa anei na aie ? na nupepa, na himeni, na Baibala, na buke e, ko ke Akua mau hapaumi? E wiki e hookaa, e hoihoi.
Ke kula a pau. Heaha ka kakou e hana'i i ka poe i nalowale ?
Mele Sweet hour of Prayer Him. 274, p. 1, 2.
Pule no ka poe i nalowale.
Haawina no Nov. 24, Luka 21 ; 8—21.
Tick!. Tick! Tick! Ka wati i hoolalau.
Pehea? hiki anei i ka wati, ka mea noonoo ole, ke hoolalau ia kakou?
Ae, hiki no,
1 Ma ke kuhikuhi hewa ana o kona mau lima. Ala au i kekahi kakahiaka, a hoomakaukau no ka paina. Nana kuu maka i ka wati nui. Ka hora 7 ia ma ka nana'ku i na lima. E kani kekona ana no ia, e like me ka mau ana ; kuhi au, o ka hora 8 ka pono. Pau kuu paina ana, lilo wau i ka heluhelu nupepa ana, me ka manao, aole paha i hiki i ka hora 9, kuu hora hana. Aia ka'u mau keiki i waho e paani ana. A ia lakou i komo ai, olelo au auwe ! Aole ka oukou i hele i ka hale kula ! Pane mai lakou, aole i hiki i ka hora kula. Nana aku la au i ka wati aia ka na lima ma ka hora 9 ! Ua hewa paha ka wati. Ua make paha ; Aka e kani kekona ana no ia, tick, tick, tick, tick.
Aia la ihea ka hewa ? Hele au e nana pono, aia hoi! ua paa kekahi lima i kekahi lima, aole hiki ke hele, mau nae ke kani kekona ana.
E aho, i na ua make loa ka wati, wahi a ka'u wahine. Alaila aole kakou i hoopunipuni ia.; minamina loa au, wahi a kuu kupuna wahine makapo, ke kani ole ka wati. Aole o'u makemake i wati leo ole.
2 Pela nae kuu wati i kekahi manawa. Make no ia, a hoolalau no ia'u. I kekahi la, ua ae au e hele e paina awakea me kekahi makamaka o'u. Ma ia la, nana au i kuu wati, ka hora 12 ia.
Hele au i ka hale o kuu makamaka e paina awakea pu e like me kuu ae e ana. Aia hoi! Ua pau ka paina ana. Ua hala loa ka hora awakea. Hoi au i kuu hale, a nana i kuu wati, aia ka ia, e kuhikuhi ana i ka hora 12. Auwe! heaha keia? Hoolohe pono au, aole ka i kani. Ua make ia ka! Hoopunipuni hou ia au.
3 Ae au e ala ma ka hora eha o kakahiaka e hele pu me kuu hoa i kekahi kulanakauhale e ike i kekahi mea hou. Moe au a kali i kani ka wati i ka hora 4. Kani ka wati ia hora; Ala koke au. Aia ka ! ua ao loa* Ka hora 6 paha ia, ua hala kahiko kuu hoa. Heaha ka keia? Ua kani hewa ka kuu wati; ke kolu keia o kuu hoopunipuni ia ana e kuu wati.
Ma ka hoopili ana. 1. Kamailio mau no kekahi poe, a paipai no ka pono, no ke ola,
Ua maikai no ke kamailio ana. Aka o ka hana okoa ia, e kuhikuhi ana ia e ka make, e hoolalau mau ana. 2. Noho wale kekahi poe, aole olelo, aole paipai, aole papa, aole kuhikuhi i ke ala o ke ola, aole hooho, e holo o make. A hoohiamoe , hoolalau lakou i kanaka, i kamalii me ke ao ole aku. 3. Kamailio hewa kekahi poe, hoopaapaa i na huaolelo lapuwale, hoowalewale, hoolalau. He mau wati kani hewa lakou, a nui ka poe i hoopunipuni ia e lakou. E lilo kakou i mau wati kani pono kuhikuhi pololei. A. M. H.
Ke Kumu o ke Kukulu ana i na Aha Misionari.
He kanaka, he kumeka, no Besetani,. Wiliama Kele ka inoa, ulu ka manao aloha i na aina e iloko ona, a paa loa koaa manao e lawe i ka nuhou o ke ola i na aina e, henehene kanaka ia ia, a kapa ia ia he kanaka pupule naaupo.
Aole nae oia i nana i ko lakou henehene ana. I ka wa pono, holo oia ma kekahi moku i Hinedu ma Asia hema. A hoomaka oia e ao i na olelo o ka Hikina, a ma kona hooikaika loa ana, ua haiia ka olelo a ke Akua ma na olelo okoa he 40 ma Asia ma mua o kona make ana, oia hoi ka mak. 1834.
Ke kumu keia o ke kukulu ana i na Aha Misionari, ma Besetania, ma Farani, ma Tuizalani, ma Geremania, ma Norewai. A nui na Misioimi malalo ae o lakou. Nui hoi ka hana, ka huli ana mai, &c.
He haumana ma ke Kulanui. Williams College Samuela I Mila ka inoa, ua piha kona naau i ke aloha i ka poe Pegana, hoohiki oia e lilo i rnisionari no lakou.
Kuka pu oia me kekahi mau hoa ona, a loaa kekahi mau hoa, ua like ka manao me kona. Halawai malu lakou ma kekahi kula weuweu ma lalo ae o kahi pau maloo, halawai pinepine, kuka pu, haipule pu, no ko lakou lilo ana i mau misionari no na pegana. I kekahi manawa, ua hui o Mila me Opukahaia no Hawaii nei, a kuka pu me ia no na pegana ma kona aina. A hai aku oia i ko lakou ano naaupo loa, me kona aloha nui no ko lakou rnake ana me ka lohe ole ia Iesu ka mea e ola'i.
Ikaika loa ka mamo o Mila ma e hele e ao aku i na pegana. Hai aku lakou i ko lakou manao i kekahi mau lala o ka Aha misionari kuloko o Masakuloeka. Na ia Aha i kukulu i ka Aha misionari o Bosetona no na aina e.
He mea uuka ke kumu. he mea nui loa nae ka laau i kukulu ia maluna o keia kumu uuku. Ma ka mak. 1810 ke kukulu ana i keia Aha misionari. Ma ka mak. 1812, hoouna oia i na Misionari mua i Asia. Ma ka mak. 1819, hoouna mai oia i na misionari mua i Hawaii nei, oia hoi o Binemu ma Hopu ma. I keia manawa, nui na misionari malalo ae o keia Aha. Mai ka mak. 1812 a hiki i keia wa, ua kausani a oi aku paha na misionari. Ua haneri kausani a oi ae na hoahanau, ka poe iloko o ka hoomana kii mamua, aka, ua lilo lakou i poe hoomana ia Iehova.
Ka Papa Hawaii, he lala ia no kela Aha misionari nui ma Bosetona, e hoouna ana ia i na misionari i Maikonisia, a i Fatuhiwa.
HAWAII.
Ke kumu o ke kukula ana i ka Aha Pai Baibala.
Ma ka makahiki 1802, he kaikamahine kai loaa i kona kahunapule ma kekahi la. Ninau oia i ua kaikamahine nei, ua paa naau anei ia oe ke kuma olelo uia keia Sabati i hala iho nei? No Wale ma Bentania laua nei. Ma ke kamailio ana o ke kahuna me ke kaikamahine, ua ike ia, he hapa na baibala ma ka olelo Wale ma ia wahi. Nui na ohana i nele loa ; He kaikamahine makemake loa keia i ka baibala.
No ka nele ma kona wahi, hele oia i kela hebedoma. keia hebedoma ehiku mile, i kekahi ohana mea baibala i hiki ai ia ia ke heluheluhelu i na kumu olelo, a me kauwahi e ae o ka Baibala Wale.
Tomase Kale ka inoa o keia kahuna; Hele oia ma ka makahiki 1804 ia Ladana. A ma ka halawai o kekahi Aha, ua hoopuka oia i kona manao, e pai hou ia ka baibala ma ka olelo Wale, no ka hapa loa oia mau baibala. e hele ana kekahi kaikamahine i ehiku mile i kela pule keia pule i hiki ai ia ia ke nana a ke heluhelu i ka Balbala Wale. Kokua mai o Rev. Joseph Hu, me ka olelo, aole no Wale wale no e paiia ai ka baibala, aka, no ke ao nei apau.
Ka hoomaka koke no ia e kukulu i ka Aha Pai Baibala o Beritania. Ma ia manawa, ua hapa na baibala ma na wahi apau. Ua paiia ia ma na olelo 49 wale no. Mai laila mai ke pai nui ana o ka baibala a hiki i ka haneri miliona kope ma na olelo okoa elua haneri a oi aku paha.
Kiekie loa ke kumu kuai o ka baibala ma mua loa aku, 150 dala no ke kope hookahi. Ua emi loa nae ka uku i keia wa no ka hiki wawe o ke pai ana ma ka mana o ka mahu.
Aia ma Amerika Hui kekahi Aha Pai Baibala nui. Ua kukulu ia ma ka makahiki 1816, a ua kapaia. Ko Amerika Aha Pai Baibala ; Na ia Aha no i pai i na Baibala Hawaii. He mau hanei tausani dala i haawi aloha ia i kela makahiki keia makahiki, no ke pai a hoolaha ana i ka baibala ma kela a ma keia olelo. No ke kokua ana o keia aha, hiki ke kuai haahaa ia ka baibala. A o na dala i loaa ma ke kuai ana, ua hoihoi ia'ku no i na Aha Pai Baibala makua.
HAWAII.
No Na Puaa.
I na e heluhelu kakou i ka moolelo no na puaa mai ka wa kahiko mai, e ike kakou ma ka baibala ua hookapu ia ka ai ana i ka io puaa e ke Akua i ka wa ia Mose. Pela no a hiki mai i keia manawa, o kekahi poe kanaka, a ke manao nei au aole o ke Akua naaupo i ka hookapu ana i ka io puaa iwaena o ka poe Isaraela ; no ka mea, aole no he maikai ka io puaa, e like me ka io o na bipi, na hipa, na kao, a me kekahi mau holoholona ai weuweu e ae, i kapa ia ma ke kanawai o Mose, he mau holoholona maemae. Aole maemae ke ano o na puaa ; he ai i na mea pelapela, o kela a me keia ano, nolaila, ke papa mai nei na Kauka naauao, aole pono ke ai i ka io puaa.
O ka puaa no hoi he ano aea, aohe noho me kona kahu ke hoopaa ole ia. He maa ia i ka imi aku i na loi ai maikai malaila e hopiha ai i kona opu ; aole no hoi i loaa ia ia na mala uala a me na mala ipu o kela ano a me keia ano. He hele wale no hoi iwaena o na pua rose, a na kaikamahine palupalu o Haleiwa i kanu ai. Ehiku makahiki ka hoomanawanui ana o na kumu o ke kula Hanai ma Waialua me na puaa a kamaaina e kokoke ana i ka hale kula. Ua olelo oluolu aku ke kumu e malama i na puaa ; "Ua hoolaha ia ma ka puka pa oia kula e malama." Aka, me he mea la aole manao lakou i ka pomaika o ke kula, ua hookuu ia aku na puaa e hoopilikia i na mea kanu a lakou, i hoomanawanui ai e kanu.
Aole oia wale no; ua hookuu ia no hoi kekahi mau "puaa wawae elua" no Waialua, e hoohaumia ana i ka noho maemae ana o na keiki. No ia mea ua pilikia ka noho ana ma ia kula, a hiki i ka wa i kokua ia me ka makaala mau o kekahi mau makai. Ua hookomo ia kekahi mau " puaa wawae elua " ma Kawa ao ke komo hewa ana ma ua hale la. Ai ka hopu ia ana o kekahi puaa maoli i keia mau pule i hala iho nei, me ka maopopo ole paha ka mea nana na puaa la ua pehehi ia, a nolaila ua hoopii ia na mea i hopu, a ua uka ia he umi dala.
Nani ka hilahila ole o ka poe malama puaa i keia maa makahiki ehiku a keu! kaino e kokua ana i ka poe e imi ana e hoonaauao a e hapai ae i na home o Hawaii nei, mai ka noho huikau ana a i ka noho maemae ana, e like me ka Karisto makemake. Eia ka he hoopilikia.
E manao ana paha kekahi poe he oolea loa keia mau olelo maluna ae. Aka he pono anei ke oi aku ka manao no na puaa mamua o na uhane makamae o na kaikamahine o Hawaii nei ? He mea anei i ku i ka holo imua o na hana Hawaii ke hookuu ia aka na puaa o kela ano keia ano, e hoopiha i ko lakou mau opu ioe na pua rose nani o Hawaii nei? E aho ke noonoo kakou a hui pu kakou apau na makua a me na kumu, na kane a me na wahine, na kanaka opio a me na wahine opio, e kokua pu a hapai like ma keia hana kaumaha.
Kakaikahi na kumu naau missionari a makemake ana e komo ma keia hana, no ka paakiki maoli no o ia hana, a no ke kaumaha maoli o ia oihana. Nolaila he pono ia kakou e kokua i na kumu a me na haumana ma ia oihana maikai; E noi pu aku kakou i ka Haku e noho mai me na kumu e kokua pu, i huli mai na haumana ma ka pono iloko o Iesu. S. N. EMERSON.
OLELO HOOLAHA.
A. McWAYNE,
HALE KUAI LAAU LAPAAU. A ME NA WAIALA o na ana a pau, ma na SOPA ALA a na ano he nui wale. Ma ke kihi o Alanui Papu ma Kalepa.
840 1y
NA KAUKA
T. P. Tisdale a me C. L, Tisdale. HOMEOPATHISTS.
HALE OIHANA A ME KAHI NOHO AIA ma ke alanui Beritania, mawaena o ka Luakini o Kaukeano a ma ma ka pa hale o Kaleleonalani. A loaa no kekahi kauka o maua ma ke keena oihana i na wa a pau. O na poe a pau e makema ke ana ia maua, e mikala no maua me ke kaulua ole i ke ao a me ka po. T. P. TISDALE.
Honolulu. Mar. 23, 1878. 832 tf
E. STREHZ,
(AILUENE.)
MALAILA E LOAA AI NA ANO LAAU APAU: a me na wai hoomaemae o kela a me keia ano. E hamama mau ana ka ipuka ma na po Poaono pau. Ma ke kihi o alanui Papu a me Hotele, ma Monikahaae. (845 1y)
E. O. HALL & 8ON.
(E. O, HOLO MA.)
NA MEA KUAI I NA MEA MAHIAI, Na Lole. Na Pena, Na Aila, a me Na ano Lako e ae a pau he lehulehu wale.
846 Kihi o Alanui Papu me Moi. ly
LOLE MAKEPONO
Ke Kuike.
E LOAA NO IA MA KAHI O KAKELA ME KUKE! E LAA NA Ahinahina, Kalakoa, Keokeo, Leponalo, Pena, Aila, Aniani, NA MEA PIULA! KOPA, AILA HONUA, AILA HOOMALOO Kui Kakia, Pakeke, Tabu, Kaula, Noho Lio, Hulu Palaki, na Pulumi. A HE AGENA NO HOI NO NA MOKUPUNI O HA W AII NEI NO NA Lainakini-nao, Lainakini Maoli, Palule Kalakoa, Alapia, Kelepa, Kilika, Na lole kupono i ka wawae, Palule Huluhulu, Na Lole Huluhulu, Na Lole no ka hoohehelo ano Lipini, Lihilihi, &c.
LIPINE, LIHILIHI, &c. A ME NA Mikini Humuhumu MakeponoLoa! A HE MAU MEA AI KAHI Ka Palaoa. Kopaa, Raiki, Pia. Hoohu.
Paakai, Huaala, Pia Kulina, &c
A he Laau Lapaau Kaulana Loa A DR. JAYNES. Laau Kunu, Laau Hoomaemae Koko, Laau Hoopau Naio, Penikila, Huaale, A ME NA LAAU HAMO, A PELA'KU! 827 3m 839
PAPA! PAPA!
_NO_
ALLEN & ROBINSON!
UA WEHE AE NEI MAUA I PA KUHI PAPA MA KA UWAPO O PAKAKA Na Papa Ulaula o na ano a pau. Na Papa Paioa o na ano a pau. Na Pili Hale Ulaula. Na Pili Hale Keokeo. Na Pepa Hoonani Hale, Na Pepa Molina. Na Pena a me na Aila Pena! NA KUI O NA ANO A PAU. NA PANI PUKA a me NA PANI PUKA ANIANI: NA PANIPUKA ame NA OLEPELEPE, NA LAKO KUKULU HALE O NA ANO A PAU! E KUAIIA MA KE KE KUMUKUAI HAAHAA LOA O keia Makeke. ALLEN & ROBINSON
Honolulu, Ian. 1, 1878. 840 8m
PAPA, PAPA
AIA MA KAHI O
LEWERS & DICKSON!
(O LUI MA.)
MA KE KAHUA KAHIKO MA Alanui Papu a me Moi! E LOAA AI NA Papa Nouaiki! o keia a me keia ano. Na Papa Nani a Paa no ke Kukulu ana i na Hale! Na Pani Puka, Na Puka Aniani, Na Olepelepe, Na Pou. Na O-a, Na Papa Hele. Na Papa Ku. A me na Papa Moe nui loa.KA PILI O KA HALE O NA ANO A PAU. Na Pepa Hoonani, Na Pena o na Wai a pau, Na Kui mai ko Nui a ka Makalii. Na Ami Puka,Na Ami Puka Aniani, Na Ami o na ano a pau. Na Aila Pena, o kela. me keia ano, Na Aila Hoomaloo, he lehulehu walo, Na Aila e ae o na ano a pau. NA WAI VANIKI A ME NA WAI HOOHINUHINU NANI! o na ano a pau loa. NA BALAKI ANO NUI WALE!
A ke hai ia aku nei ka lono i na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana NO KA UKU HAAHAA LOA!
E like me ka mea e holo ana mawaena o LAUA a ine ka MEA KUAI.
E hele mai! E na Makamaka !!
A e lawa no hoi ko oukou makemake me ka oluolu a me ka maikai! 845 tf
KOPA KUKAEPELE
AOLE LUA NO KA HOOMAE- MAE I KA ILI!
He mea hoopau i na eha, Na Ili Puupuu, A he hoomaemae i na mea ino, A he hoopau Lumatika, A he kopa auau no hoi
O keia Kopu ka oi aku o ka mea maikai I waihoia mai imua o kanaka.
Aole wale no ka Hoopau ana i ka Huehue Ili Poha, Wela la, Luluaina, a me na mea e ae o ka Ili; A ma ia holoi ana, o ka hoopalupalu pu kekahi i ka Ili, a keia Laau Hoomaemae lua ole e hana ai.
O ka hoemi ana iho i na mai o ka Ili, a o ke pale aku i ka mai mai na lole e na Mai Lele, oia kekahi. O na ohana ame na poe makaikai, ina e hoolako lakou i keia KOPA HOOMAEMAE LUA OLE ! ALAILA, UA LANAKILA LAKOU.
He hoopaa i ka lehu o ke poo, A he Kopa no hoi e kaohi mai ai i ka lauoho mai ka hina ana.
Ua hoola nui mai na Kauka no ka maikai o keia Kopa!
E loaa no ma kahi o M. McINERNY.
Kuai o na Alanui Papu me Kalepa.