Ka Nupepa Kuokoa, Volume XVII, Number 49, 7 December 1878 — Page 4
| This text was transcribed by: | Julia Steele |
| This work is dedicated to: | Puakea and Kau‘i |
Ka Nupepa Kuokoa
KE KILOHANA POOKELA NO KA LAHUI HAWAII.
KA NUPEPA
Kuokoa me ke Au Okoa
I HUIIA.
No ka Makahiki, $2. Eono Mahina, $1
Dala Kuike ka Rula.
DEKEMABA 7, 1878.
The Prince of my Peace.
Colonial Singer, No. 117. p. 98.
1
Laula me ke kai ke aloha.
Me e kuu mahaio ana‘e,
A pa mai ka poli mai one,
He onini hoolu maikai.
Cho. Ua kala mai no Iesu
I kuo mau hala a pau,
Ma on a kuu hilinai mau,
A nona mau no kuu maau.
2
Ua imi a noi no au la
I malu, i pau kuu makau.
Haliu Iesu a hoolohe,
A malu, a maha no au.
Cho.Ua kala mai no Iesu, &c.
3
Ua kau kona lima maluna
Olelo, e ola no au.
Hoopili no au a paulele,
A hu ae ka hauoli o‘u.
Cho.Ua kala mai no Iesu, &c.
4
E maalo ana kuu Haku,
Ke launa aloha mai nei.
Hoolohe i kana olelo,
Na‘u oe e hoomalu e.
Cho.Ua kala mai no Iesu, &c.
Hawaii.
Haawina Kula Sabati.
HELU 12. SABATI DEC. 22, 1878.
KUMUHANA.
Na olelo hope a Iesu. Pauku Baibala. Luka 24; 44-53.
44 Olelo mai la hoi oia ia lakou, Eia na olelo a'u i olelo aku ai ia oukou, i ko'u noho ana me oukou, e pono e hookoia na mea a pau i kakauia ma ke kanawai o Mose, a ma na kaula, a ma na haleu, no'u.
45 Alaila wehewehe iho la oia i ko lakou manao i hoomaopopo i na palapala hemolele,
46 A olelo mai la oia ia lakou Pela i palapalaia‘i, a pela hoi e pono ai ka Mesia ke make, a e ala hou mai i ke kolu o ka la, mai waena mai o ka poe make;
47 A e haiia‘ku hoi ka mihi a me ke kala ana i ka hala ma kona inoa mawaena o na lahuikanaka a pau, e hoomaka ana ma Ierusalema.
48 O oukou hoi na mea e hoike i keia mau mea.
49 Eia hoi, e hooili ana au maluna o oukou i ka mea a ko‘u Makua i olelo hoopomaikai iho ai; aku, e noho oukou ma Ierusalema, a hoolakoia mai oukou me ka mana noluna mai.
50 Alaila alakai oia ia lakou iwaho a hiki i Betania, hapai ae la i knoa mau lima, a hoomaikai mai la ia lakou.
51 Eia hoi kekahi, i knoa hoomaikai ana ia lakou, ua hookaawaleia‘e la ia mai o lakou ae, a laweia aku la ilona i ka lani.
52 Hoomana aku la lakou ia ia, a hoi mai la i Ierusalema, me ka olioli nui.
53 A, maloko o ka luakini lakou i kela la a i keia la, e hoolea ana, a e hoomaikai ana i ke Akua. Amene.
Pauku Gula. Aia hoi. "Owau no me oukou i na manawa a pau, a hiki ke hopena o keia ao." Mat. 28; 20.
Mele. Him. 166. Mamua o ka pii ana‘e. p 1,2,3.
Pule i laina pu mai Iesu.
Ka Wehewehe a Ninau ana.
Hoi aku la kela mau haumana elua mai Emausa a Ierusalema, a hui pu me na haumana i akoakoa ma kahi malu malaila. Hai koke mai lakou ia laua, ua ala hou Iesu, a ua ike ia e Simona. A hai aku laua, ua ike laua ia ia ma ka ai pu ana me ia, a nalo iho ia.
Ia lakou e kuka pu ana. Aia hoi, he mea kupanaha. Ua pani ia na puka a paa loa, aole wahi e komo ai. Ku koke nae he mea ano kanaka iwaenakonu o lakou, a olelo, aloha oukou. Makau loa lakou, a kuhi, he uhane ia, he knio uhane, aole he kino io. Pehea e hiki ai i ke kino io ke komo iloko o ka hale, oia, ua paa loa na puka a pau?
Ninau Iesu, no keaha ko oukou makau me ka haohao iloko o ka naau? Owau no keia o Ieus ko‘u kino io keia. Hele mai a haha i akaka. A hoike oia i kana mau lima me na wawae i hou ia i na kui. A noi aku i wahi ia. A i ka loaa ana, lalau oia a ai. A maopopo no, he kno maoli no kona. manao io no lakou me ka pihoihoi nae mamua. Makau paha lakou o hoahewa mai oia ia lakou no ka haalele ana ia ia i ka wa pilikia, a no ka manao kapkepeke. Hoopau nae Iesu i ko lakou makua me ka pihoihoi. A o ka piha no ia o ko lakou naau i ka olioli no kona ala hou ana, a launa pu hou ana me lakou. Ua halawai pu no Iesu me kekahi mau haumana mamua, me Maria ma. Aka, o ka halawai mua keia on a me ko lakou nui. Nana Io. 20; 19,20.
P. 44. Heaha na olelo mua a Iesu i olelo aku ai ia lakou? Pono ke aha ia ia mau olelo? Ua kakau ia mahea?
P. 45--46. Heaha ka Iesu i wehewehe ai? Na mea i pili ia ia ma na buke o Mose, ma na kaula, ma na Halelu, me ka hooko ia‘na. Nolaila, ua pono kona make ana, a me ke ala hou ana ma ke kolu a ka la.
P. 47, 48. Ehia mea i pono ke hai ia aku iwaena o na lahoi kanaka? E hoomaka ana mahea? Owai na hoike nana e hoike aku ia mau mea?
P. 49. Heaha ka Iesu e hooili mai ana maluna o lakou? Ka uhane Hemolele, ka mana mai luna mai. E kali lakou mahea a loaa ia mana? Ua hana anei lakou pela? Heluhelu Oih. 1; 13--14. pehea ka loihi o ke kali ana?
P. 50, 51. Aole Iesu i alakai koke aku i na haumana i Betania a pii koke aku i ka lani. Ua halawai pinepine peha oia iloko o na la he 40 mahope o kona ala hou ana. Oih. 1; 3--9.
Aole akaka kahi i halawai hope ai oia me na haumana, a pau, alakai aku i Betania. Ma Ierusalema paha, mahope iho o kela halawai ana ma Galilais Io. 21; 14. 1 Kor. 15; 4--7.
Mahea Betania? Heaha ke Iesu malaila? i kona hoomaikai ana i na haumana, ua aha ia oia? a lawe ia aku ihea?
P. 52--53 Pehea hoi na haumana? Hoi ihea me ke aha? Heaha ke kumu o ko lakou olioli? No ka manao ana paha, ua pau ko Iesu pilikia. Ua lanakila maluna o ka make a me ka lua kupapau. ua loaa iki hoi ka Uhane Hemolele. Ua maopopo iki kekahi mau mea pohipohi. Aole nae i pau loa ka naaupo. Nana Oih. 1; 6, 10, 11. Heaha ke Iesu kauoha hope? Mat. 28; 19, 20. Heaha ke lakou hana ma la luakini i kela la, i keia la? A hiki i ka manawa hea?
Mele. Him 114. "Pono mau ka la maikai." p 1,2,3.
Na Ninau Hoi Hope.
Heaha ke kumu hana? Heaha ka pauku gula? Owai ka i ike mua i ko Iesu ala hou ana? Ehia Maria i ike? I ka manawa hea i akoakoa ai na haumana, a ku koke Iesu iwaena o lakou? Ninau Iesu pehea? Pehea Iesu i hoopau ai i ko lakou makau me ka pihoihoi? Ua halawai pinepine anei esu me na haumana mahope o kona ala hou ana? Mamua o kona pii ana i ka lani? Hai mai i kekahi mau olelo hope a Iesu i na haumana? Mat. 28; 18--20. mar. 16; 15--18. Luka 24; 45--49. Io. 20; 21--23, 27--29, 21; 15--23. Oih. 1; 4--8. Owai ke i ike maka i ko Iesu ma keia ao mahope o kona ala hou ana? Owai kekahi mau mea i pii ola aku i ka lani me ka make ole? owai ka poe e pii ola ana i ka lewa me ka male ole ma keia hope aku? 1 Tes. 4; 16, 17. owai pu me na haumana a hiki i ka pau ana o keia ao?
Pehea la e hiki ai ia Iesu ke launa pu mau me na haumana? owai ke pani hakahaka o Iesu?
Ehia mea i pono ke hai aku i na kanaka, i na kamalii? ka mihi me ka manaoio. Pehea e hiki ai ia kakaou ke hai aku ia mau mea elua i na lahui kanaka a pau?
E na keiki, heaha ka Iesu mau olelo hope e pili ana ia oukou? Heluhelu Mat. 21; 15--16. Pono ia oukou ke hosana aku ia Iesu.
Mele. Him 93. "Hauoli e! ke ola nei." p 1, 3, 4.
Pule i hoolaha ia ku ke ola ma Iesu la ma na wahi a pau.
Haawina no Dek. 26, ka hoi i hope.
Ka La Wanana, Malama Wanana, heaha ka loihi?
HELU 5
Ma ka helu 4, ua hiki kakou i ka mak 1517, ka wa i ala mai ai Lutera a hoomaka e hoomaemae i ka ekalesia.
Puhi ka anela ehiku i kana pu, a hiki koke mai ka auwe ekolu. He pu auwe ia no ka aoao Pope, a no ka aoao Satana; aka, he pu hoohauoli ia no ka ekalesia oia io. Ka hoomaka hou ana no ia o ka wa e hai ia‘ku ai ke euanalio i na wahi a pau, a e lilo ai na aupuni o keia ao no Iesu Kristo.
Ua kauoha no Iesu i kana mau haumana, (oia hoi kana kauoha hope), e hele ae a hoohaumana i na lahui kanaka a pau. A ua hele ne no lakou me ko lakou mau hope a hai aku no i ka euanalio ma na wahi he nui wale, a ane pau paha na lahui a pau i ka lohe i ka Iesu olelo. Nui wale hoi ke poe i huli mai a komo iloko o ka ekalesia. Koino pono kekhi, a komo hewa kekahi.
I kekahi manawa, nui ke naaupo. A ala mai na enemi, na mea keakea, ala mai na kaua, a ma ke kaua i huli nui ai kanaka i ka aoao kirisitiano. Huli naaupo; Ala mai ka aoao Pope, a papa i ka heluhelu ana i ka baibala, pepehi i ka poe heluhelu. Nui na Pegana i hoohuli naaupoia, a hookomo naaupoia iloko o ke ekalesia Pope. A piha no ia ekalesia i na hewa he nui wale.
Ua uhi hou mai ka pouli maluea o ka honua. Ane nalo loa ka ike.
Ma na keneturia, 13, 14, 15, ua hoomaka e hee aku ka pouli, a mahuahua ka ike. Ua hoomakaukau ia ke ala no ke ala hou ana o ka ekalsia oiaio.
O Matina Lutera oia ke alakai nui o keia ala hou ana. He kahana Pope oia mamua. Aka, i ka loaa ana o ka baibala iaia, ua hookaakaa ia kona mau maka, a ua ike lea i na hewa, a me ka hooponoia ma ka manaoio, aole ma na hana, ua oki ka Pope ia ia mai ka ekalesia Pope aku, a kauoha aku, e imi ia oia, e hopuia, a e lawe paa ia‘ku io na la. Ua malamaia nae oia me kona mau hoa. Ke ano paha ia o ka lawe ia ana o na hoike elua i ala hou, i ka lani.
Ka hoomaka koke no ia o ka huli mai o kekahi poe he nui no mamuli o Lutera. Ke ano paha ia o ka hiolo ana o ke kulanakauhale, a make ehiku tausani kanaka i ke olai.
Ma na mok. 12, 13, o ka Hoikeana, ua aia mai na enemi e kue a hoopau i keia ala hou ana o ka ekalesia oiaio.
Aole i pau ka ekalesia oiaio mamua. Ua kuhi ka aoao Pope, ua pau loa. He kuhi hewa nae ia. Aole i pau; Aia no ia, ua pe ma na mauna, ma na awawa, ma na lua, ma na wahi malu. Oia ka wahine i hoaahoia i kala.
Me he wahine hapai la ia, e kali ana e hanau. Ka ekalesia oiaio aia e kali ana, e noonoo ana i hoomahuahua ia kana mau keiki. Ua hookoia kana pule i ka wa ia Lutera. Ua hanau ia ke keiki, keia ekalsia oiaio hou, Lutera ma. He ekalesia ikaika, e hoomalu ana i na lahui kanaka me ke kookoo hao, oia hoi e hoohuli ana i na aupuni mamuli o Iesu, e hoopau ana i na ino, i na hoomanakii, &c.
E lua no ano o ka hoomanakii, ka hoomakii maoli, ka hoomanakii ekalesia Pope. Satana k poo oia mau hoomana elua.
I ka wa e huli nui ana na Pegana ma ka ekalesia pope, ua noho malie no Satana. Aole i ala nui kona huhu, no ka mea, ua ano like no ia ekalesia me na Pegana kona poe ponoi.
Aka, ma keia ala hou ana o ka ekalesia oiaio, ua huhu loa o satana, ka deragona ulaula. He kookoo hao kona e hoopauia‘i kona aupuni ma keia ao, ka aoao Pegana, me ka aoao pope. Nolaila, ke makaukau oia e pepehi i keia keiki, i ka ekalesia oiaio hou. Ua kailiia‘ku nae ke keiki iluna i ka lani i kahi i malu ai na hoike elua mamua.
Ua like paha ia me ka hanaiia‘na o ka wahine ma ka waonahele. Ko ke Akua malama no ia i keia ekalesia oiaio no na la 1260, oia hoi 1260 mak. Hookahi la, hookahi makahiki.
(Aole i pau.)
Moolelo o ka Ahahui Euanlio o ka Mokupuni o Oahu.
Halawai ka Ahahui Euanelio o ka Mokupuni o Oahu ma Kaumakapili i ka la 8, 9, o Okatoba. M. H. 1878, hora 10 A.M.
Wehe ia na hana me ka Haiolelo a ka Lunahoomalu mua Rev. J. S. Kalana, ma Oihana 4: 11 12.
Eia na Kahu a me na Elele i hiki mai.
Ekalesia. Kahu. Elele.
No Kawaiahao. ----------- J. Kauwe.
Kaumakapili. M. Kuaea. Pala.
Kalihi & Moanalua. S. Paalohi. D K Malu.
Ewa ----------- -----------
Waianae ----------- Kekilo.
Waialua. ----------- Puaa.
Kahuku. J. Kekahuna. -----------
Hauula. ----------- Wahinemaikai.
Kahana. ----------- Kapua.
Waikane. J. Paikuli. S. Kailaa.
Kaneohe. ----------- S. K. Pokeo.
Waimanalo. S. Waiwaiole. Nailima.
Na makua misionari.--S.E. Bihopa, C.M. Hyde D.D. L. Smith.
Koho ka Aha ia M. Kuaea, i Lunahoomalu, S. Paaluhi i Kakauelelo.
Pule ka Lunahoomalu.
Koho ke Lunahoomalu i komite imi hana S. E. Bihopa, C. M. Hyde D.D. S Waiwaiole, komite imi haawina. C. M. Hyde D.D. J.N. Paikuli, J. Kekaliuna.
Koho ka Aha ia J.K. Iosepa, T. Puuohau, J.W.P. Kahalewai, Kalauao, Kapule Ulu, Kauwa, a me na haumana o ke Kula Kahunapule i mau hoa kuka no keia Aha.
Heluhelu mai o S.E. Bihopa, i ka hoike hapa a ke komite Imi hana.
1. I hapalua hora haipule ma ka hoomaka ana. 2. Na hoike Kihapai. 3. Na hoike o na komite. 4. Na palapala hoopii. 5. Heluhelu haawina. 6. Hoeueu i na ekalesia o Oahu nei. 7. Na ekalesia Kahu ole. 8. Na Kula Sabati. 9. Kula Kahunapule, a me na Kula Kaikamahine. 10. Hoole Wai on a. 11. Na Kahunapule e noho Kihapai ole ana. 12. Pono anei ka hoolilo aku i na dala mahina hou o kekahi ekalesia no ka hookaa ana i na aie oia ekalesia a no kekahi kumu a ae paha? Hoopono ia.
Hapai ka Aha i ke Kumuhana 2. Na hoike Kihapai.
Heluhelu mai o J. Kauwe i ka hoike o ka ekalesia o Kawaiahao.
J. Kekahuna i ko Kahuku.
J. N. Paikuli i ko Waikane.
S. Waiwaiole i ko Waimanalo.
Ma ke noi a J. S. Kalana, e hookuu aku ka Aha ia ia, no kekahi pilikia i kau mai maluna on a, no kekahi oihana aupuni.
Hookuu aku ka Aha ia ia. Hoopanee ka Aha a halawai hou i ka hora 1 P.M. Pule o J.W.P. Kahalewai. Halawai hou ka Aha i ka hora i hoopaneeia. Pule o Kanakokai. Heluhelu mai o S.K. Pokea i ka hoike o ka ekalesia o Kaneohe. S. Paaluhi i ko Kalihi & Moanalua. Hapai k Aha i ke kumuhana 3. No hoike o na komite.
Heluhelu mai o S. waiwaiole ke Kahu ku i ka wa no ka ekalesia o Kaneohe.
Heluhelu mai o J. Kekahuna ke Kahu ku i ka wa no ka ekalesia o Waianae.
Hioke a ke komite no ka hoopii o ka ekalesia o Ewa e hoopau ana i ka noho Kahu ana o Rev. J.S. Kalana no lakou.
Ua hele ko oukou komite a hoomaopopo i ka oiaio oia hoopii i mua o ka ekalesia holookoa, ma ka ninau ana ua hooia io ia mai aole na ka ekalesia ia hoopii, na ka Aha Luna wale no, nolaila, ua hoomau ia aku ko J. S. Kalana noho Kahu ana; aka, ma o na iho ua waiho aku oia i ka lawelawe ana no ia Kihapai a hiki i keia wa.
Rev. M. Kuaea } Komite.
Ka hoike o na komite hoeueu o na ekalesia o ka mokupuni o Oahau.
Heluhelu mai o S. waiwaiole i ka hoike o ke komite hoeueu mai Moanalua a Kaumakapili
Hoike waha mai o J.N. Paikuli ke komite hoeueu o na ekalesia, o Ewa, waianae Waialua. Hoike waha mai o M. Kuaea ke komite hoeueu o na ekalesia, mai Kahuku a hiki i waimanalo.
Hapai ka Aha i ke kumuhana 9. Na palapala hoopii. Heluhelu mai ke Kakauolelo he palapala Kahea o waikane, e noi mai ana i ke Kahu e noho hou me lakou no na makahiki 2, hoapono ka Aha ia palapala kahea me ka ao pu aku ia ekalesia, aole no na makahiki 2 o kona noho ana, e hoopau i kela mau makahiki 2, e hoomau aku i kona noho kahu ana no ia ekalesia.
Hapai ka aha i ke kumuhana 5. Heluhelu haawina.
Heluhelu mai o C.M. Hyde D.D. i kona haawina, Mele a Sol. 4:3.
Hapai ka aha i ke kumuhana 6. Hoeueu i na ekalesia o Oahu nei.
Ua kamailio nui ka aha no ia kumuhana, hooholo ka aha e kohoia i komite nana e noonoo a hoike mai i ka la apopo.
M. Kuaea }
S. Waiwaiole } Komite.
J.N. Paikuli }
Noi mai Ioela. Kauwe e hoopanee i keia aha a halawai hou i ka hora 9 a.m. o ka apopo, hookuuia me ka pule a P. Ulu.
LA HANA 2.
Okatoba 9, 1878, hora 9 A.M. Halawai ka Ahahui Euanelio ma ka luakini o Kaumakapili, ka Lunahoomalu ma ka noho. malama ia ka hapalua hora haipule.
Heluhelu mai ke kakauolelo i ka moolelo o ka la hana mua a hoaponoia.
Heluhelu mai o Wahinemaikai i ka hoike o ka ekalesia o Hauula.
Heluhelu mai o Kapua i ka hoike o ka ekalesia o Kahana.
Heluhelu mai o kakauolelo i ka hoike o ka ekalesia o Waianae.
Heluhelu mai o Puaa i ka hoike o ka ekalesia o Waialua.
Hoolohe ka aha i ka olelo paipai a Rev. S.C. Damon, D.D. He mau olelo waiwai a ku i ka momona kana i hoike mai ai i ka aha.
"E hee na kanaka Hawaii i ko lakou Waa, a e hoe na Haole i ka lakou Waa," a pela aku.
Pau kana olelo ana, koho ka Lunahoomalu ia S.E. Bihopa e pule.
Heluhelu mai o L. Smith i kona haawina, "o ka manaoio a me ka mohai a pela aku."
Heluhelu mai o Kuaea i ka hoike o ka ekalesia o kaumakapili.
Heluhelu mai o S. Waiwaiole i kona haawina.
"O ka hoino anei ka mea e nani ai ka haipule a ke Akua, e like me ka pauku ma II korineto 4:17?"
Hapai ka Aha i ke kumuhana 7, na ekalesia kahu ole.
Ma ke noi a S. waiwaiole, e hoopanee keia aha a halawai hou i ka hora 1 pm.
Pule o L. Smith. Halawai hou ka aha i ka hora i hoopaneeia, pule o Puaa.
Hapai hou ka aha i ke kumuhana 7.
Na ekalesia kahu ole, e hoomau aku i ko S. waiwaiole, noho kahu ku i ka wa ana no ka ekalesia o kaneohe.
J.N. Paikuli kahu ku i ka wa no ka ekalesia o Kahana.
J. Kekahuna kahu ku i ka wa no ka ekalesia o Hauula.
Rev. C.M. Hyde D.D. kahu ku i ka wa no ka ekalesia o Waialua.
S. Paaluhi, kahu ku i ka wa no ka ekalesia o Waianae.
M. Kuaea, kahu ku i ka wa no ka ekalesia o Ewa.
Hapai ka aha i ke kumuhana 8, na Kula Sabati.
Hooholo ka Aha e malama ia ka la 20 Oct. M. H. 1878. I la e pule ai na Kula Sabati o keia aha, e like me ka hoolilo ana o na aupuni nui i ka la 20 Oct. i la pule no na Kula Sabati o ke ao holookoa.
Hapai ka aha i ke kumuhana 9, Kula Kahunapule a me na Kula Kaikamahine.
Hooholo hou no ka aha, o ka lulu mahina hou o ka mahina o Feb. M. H. 1879, o na ekalesia a e haawi ia na loaa no na Kula Kaikamahine o keia mokupuni.
Hapai ka aha i ke kumuhana 11, na Kahunapule e noho kihapai ole ana.
Hooholo ka aha e waiho ia ma ka lima o kekahi komite ka noonoo ana.
C.M. Hyde, D.D. }
S. Waiwaiole } Komite.
S. K. Pokea }
Hapai ka aha i ke kumuhana 12. Pono anei ka hoolilo aku i na dala mahina hou o kekahi ekalesia no ka hookaa ana i na aie oia ekalesia a no kekahi kumu e ae paha?
Ua kuka ka aha, a hooholoia, aohe hewa ke hoolilo ia kekahi hapa oia dala no na pilikia o ka ekalesia, a mea e ae paha.
Koho ka aha i komite mahele i na dala $400, o na ekalesia o Oahu nei no ke Kula Kahunapule.
C.M. Hyde, D.D. }
S. Waiwaiole } Komite.
J. Kauwe. }
Eia ka lakou hoike.
No Kawaiahao $80.00
" Kaumakapili 80.00
" Kalihi me Moanalua 30.00
" Ewa 25.00
" Waianae 25.00
" Waialua 30.00
" Kahuku 20.00
" Hauula 10.00
" Kahana 10.00
" Waikane 35.00
" Kaneohe 30.00
" Waimanalo 25.00
Huina $400.00
Hoike mai o C.M. Hyde D.D. komite imi haawina.
E hoomau aku i ka poe i heluhelu ole i ka lakou haawina, oia keia.
1 Heaha la na oihana i hoike ia ma ka Baibala i kupono imua o ke Akua? Rev. H.H. Paleka
2 E wehewehe i ka Pauku ma Oihana 26; 28. Rev. S. Paaluhi.
4 Ma keaha la e lanakila ai ko Iesu nupuni i ko Satana, ma ka hai ana i ka olelo wale no paha, ma kona hana mana nui paha? J. Kekahuna.
5 He hoike maopopo anei ma ka Baibala Kauoha Kahiko e maopopo lea ai ke ala hou ana mai o na kino? J.N. Paikuli.
6 E wehewehe ia Oihana 1; 8. e pili ana i ka mana mai luna mai. S.E. Bihopa.
Ka hoike a ke komite hoeueu i na ekalesia o Oahu.
He mea nui ka hoeueu ana i na ekalesia, a eia na mea a ke komite i manao ai he pono ke hoeueu i na ekalesia.
1 Ke paipai aku nei keia aha i na kahu a me na ekalesia kokoke, elua a ekolu paha, e hapai i pule hoomau mawaena o lakou iho.
2 E hoomau ia ka hele papalua ana o na komite, J.N. Paikuli me J. Kekahuna, mai ka wai o Waimea a hiki i ka Lae o Makapuu, ma Koolau ae M. Kuaea me S. Paaluhi, mai Moanalua a hiki i Maunalua. S. Waiwaiole, H.H. Paleka, J.S. Kalana, mai Kapukaki a hiki i Keahuaohapuu.
M. Kuaea }
S. Waiwaiole } Komite.
J.N. Paikuli }
E hoomau ia aku no e na ekalesia o keia aha ka malama ana i ka hebedama mua o Ianuari M.H. 1879, i hebedoma haipule. A me ka Poaha hope o Feberuari i la haipule no na kula.
Ina e hoopanae keia aha e halawai hou ana i ka Poalua elua o Aperila, M. H. 1879, ma Moanalua, hora 10 am.
Ke mahalo aku nei keia aha i ka ekalesia o Kaumakapili i ko lakou malama maikai ana mai i na lala o keia aha ma na mea e oluolu ai ke ola kino.
Ma ke noi ua hoopanee ia ka aha me ka pule hookuu a ka lunahoomalu.
S. PAALUHI. Kakauolelo
OLELO HOOLALA
A. McWAYNE,
Hale kuai laau lapaau a me na waiala @
DR. RODGERS,
---OIA O---
KAUKA LOKEKE.
Ua hoonee ae nei i kona ohana mai ka hale ne a @
Ma keia hope e hoomakaukau ana ke Kauka i kona mau Laau ponoi a puunene aku i ka poe kii mai.
@
E. Strehz,
(AILUENE.)
MALAILA E LOAA AI NA ANO LAAU A pau; a me na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o alanui Papu a me Hotele, ma Monikahaae. ($45 1 y)
E.O. HALL & SON.
(E.O. HOLO MA.)
NA MEA KUAI I NA MEA MAHIAI,
Na Lole, Na Pena, No Aila, a me
Na ano Lako e ae a pau ke lehulehu wale.
846 Kihi o Alanui Papu me Moi. 1y
LOLE MAKEPONO
Ke Kuike.
E LOAA NO IA MA KAHI O
KAKELA ME KUKE!
---E LAA NA---
Ahinahina, Kalakoa,
Keokeo, Leponalo,
Pena, Aila, Auiani,
NA MEA PIULA
KOPA, AILA HONUA,
AILA HOOMALOO
Kui Kakia Pakeke,
Tabu, Kaula, Noho Lio,
Hulu Palaki, na Pulumi.
----A HE----
AGENA NO HOI NO NA MOKUPUNI O HAWAII NEI NO NA
Lainakini-nao,
Lainakini Maoli,
Palule Kalakoa,
Alapia, Kelepa, Kilika,
Na lole kupono i ka wawae,
Palule Huluhulu,
Na Lole Huluhulu,
Na Lole no ka hoohehelo ana
Lipini, Lihilihi, &c.
LIPINE, LIHILIHI, &c.
----A ME NA----
Mikini Humuhumu MakeponoLoa!
----A HE----
MAU MEA AI KAHI
Ka Palaoa, Kopaa,
Raiki, Pia, Hoohu,
Paakai, Huaala,
Pia Kulina, &c.
A he Laau Lapaau Kaulana Loa
A DR. JAYNES.
Laau Kunu,
Laau Hoomaemae Koko,
Laau Hoopau Naio,
Penikila, Huaale,
A ME NA LAAU HAMO, A PELA‘KU!
827 3m 839
PAPA! PAPA!
----NO----
ALLEN & ROBINSON
------
UA WEHE AE NEI MAUA 1
PA KUAI PAPA
----MA----
KA UWAPO O PAKAKA
--------
Na Papa Ulaula o na ano a pau.
Na Papa Paina o na ano a pau.
Na Pili Hale Ulaula.
Na Pili Hale Keokeo.
Na Pepa Hoonani Hale,
Na Pepa Molina.
Na Pena a me na Aila Pena!
NA KUI O NA ANO A PAU.
NA PANI PUKA a me
NA PANI PUKA ANIANI.
NA PANI PUKA a me
NA OLEPELEPE.
--------
NA LAKO KUKULU HALE
O NA ANO A PAU!
E KUAHA MA KE
KE KUMUKUAI HAAHAA LOA
O keia Makeke.
ALLEN & ROBINSON
Honolulu, Ian 1, @
PAPA, PAPA
AIA MA KAHI O
LEWERS & DICKSON!
(O LUI MA.)
--------
MA KE KAHUA KAHIKO MA
Alanui Papu a me Moi!
E LOAA AI NA
Papa Nouaiki!
o keia a me keia ano.
Na Papa Nani a Paa no ke Kukulu
ana i na Hale!
Na Pani Puka. Na Puka Aniani,
Na Olepelepe, N Pou, Na O-a,
Na Papa Hele, Na Papa Ku.
A me na Papa Moe nui loa.
NA PILI O KA HALE
O NA ANO A PAU.
Na Pepa Hoonani, Na Pena o na Wai a pau,
Na Kui mai ke Nui a ka Makalii,
Na Ami Puka, Na Ami Puka Aniani.
Na Ami o na ano a pau.
Na Aila Pena, o kela me keia ano.
Na Aila Hoomaloo, he lehulehu wale,
Na Aila e ae o na ano a pau.
NA WAI VANIKI
---A ME NA---
WAI HOOHINUHINU NANI!
o na ano a pau loa.
NA BALAKI ANO NUI WALE!
A ke hai ia aku nei ka lono i na makamaka a
pau, ua makaukau keia mau makamaka
o oukou e hoolawa aku ma
na mea a pau e pili ana
ma ka laua oihana
---NO KA---
UKU HAAHAA LOA!
E like me ka mea e holo ana mawaena o
LAUA a me ka MEA KUAI.
E hele mai! E na Makamaka!!
A e lawa no hoi ko oukou makemake
me ka oluolu a me ka maikai!
845 tf
KOPA KUKAPELE
----A----
@
AOLE LUA NO KA HOOMAEMAE I KA ILI!
-------
He mea hoopau i na eha,
Na Ili Puupuu,
A he hoomaemae i na mea ino,
A he hoopau Lumatika,
A he kopa auau no hoi
----------
O keia hopa ka oi aku o ka mea maikai
I waihoia mai imua o kanaka.
--------
Aole wale no ka Hoopau ana i ka Huehue
Ili Poha, Wela Ia, Luluaina, a me
na mea e ae o ka Ili;
A ma ia holoi ana, o ka hoopalupalu pu kekahi
i ka Ili, a leia
Laau Hoomaemae lua ole e hana ai.
----------
O ka hoemi ana iho i na mai o kai Ili, a o
ke pale aku i ka mai mai na lole e na
Mai lele, oia kekahi. O na ohana
âme na poe makaikai, ina
e hoolako lakou
i keia
KOPA HOOMAEMAE LUA OLE!
ALAILA, UA LANAKILA LAKOU.
-------
He hoopau i ka lehu o ke poo,
A he Kopa no hoi e kaohi mai ai
I ka lauoho mai ka hina ana.
--------
Ua hooia nui mai na Kauka no ka maikai o
keia Kopa!
E looa no ma kahi o
M. McINERNY,
@