Ka Nupepa Kuokoa, Volume XVII, Number 51, 21 December 1878 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XVII. HELU 51.

POAONO, DEKEMABA 21, 1878.

 

KA NUPEPA

Kuokoa me ke Au Okoa

I HUIIA.

NA OLELO HOOLAHA:  O na Olelo Hoolaha he 10 laina kakau lima, he Hookahi Dala no ka puka mua ana; elua puka ana, he $1.50; no hookahi mahina, he $2.00.

NA KANIKAU A ME NA MELE:  He 4 Keneka ka uku no ka lalani hookahi, ua like me $1.00 no 25 lalani.

            HOOLAHA MAU:  E hoomanao na makamaka a e hookomo mai i na olelo hoolaha mamua ae o ke awakea Poaha, i ole e kaukai ia aku a kekahi pule ae.

            E hoomanao e na lehulehu, aole e hoopukaia kekahi Olelo Hoolaha, Kanikau a me ke Mele, ke ole e hookaa mua ia mai ka uku.

 

KA

NANEA EEHIA

O KA HIWAHIWA OPIO

BABELA

KA MAMO MAKAHIAPO O NA

PUHAKA ALII NANI

ABEONA A ME MARIADANE,

KA WIWO LUA OLE NANA I KAILI

HAAHEO KA HULU MAMO GULA LELOLELO

MAKAMAE O KA IU O

GOMOHERA:

KA

OPUU ROSELANI OPIO I AHA MAKAHEHI

@A MALUNA O NA KUAHIWI, MAWAENA

O NA AWAWA, MALALO O NA LAU

LAAU, A HOEA I NA WAOAKUA,

A KE KUPUA O KA WAO

ALINOE-LUSIANA:

O KE KUKULU HIKINA LOA

O KA ILIHONUA NEI.

 

MOKUNA 1 – HELU 25.

            I KELA a me keia la i hoea mai, ua lawe pu mai i ka ukana kaumaha o ka hooi ia’aku o ka nawaliwali o ke alii.  O na o lauoho i like me ka eheu uliuli lipolipo o ka manu Ravena o ke kuahiwi, ua hoano e ia’e ia, a ike ia’ku la ka hoomaka ana mai o ka oili ana mai one omaka hakeokeo o ka hina.

            Oia iho la ke ano o ka manawa i hoakakaia no na mea e pili ana i na hiona kupanaha i uhi ia maluna o ka hale kakela alii o Abeona II.  Ua loohia ia oia i kekahi mai ano e, a e waiho nawaliwali loa ana maluna o kona wahi moe, a no ia mea, ua kaumaha na mea a pau.  I kekahi la nae, oiai e moe ana me ka nawaliwali, aia hoi, ua lohe ia aku la kona pane ana’e.

            “Auwe! aloha ino kuu aina!”

            Ua like ia mau mapuna olelo me he mau kui pine ala i onou ia’ku i ka puuwai o ka poe e kuku ana ma ka aoao o kona moe, a aole hookahi papalina o ia poe i nele ka hoopulu ia me na kulu waimaka o ka luuluu.

            Pau ae la no kona pane ana, waiho hou aku la iloko o ka mumule a me ke ano e.

            Nui ke kaumaha o na mea a pau, a e kau ana maluna o ka aina he hiona kanikau.  Elike me ke ano o ka la i olelo mua ia, he ino, ua uhi paa ia ka aina me ka hau anu maeele, a e kaalewa ana na ao uli panopano eleele ano kanikau o ka lewa luna.  Holo puni ae la ke anu maloko o kela a me keia puuwai, a me he la, o ka hailono no ia no ka ulia eehia maloko o ka lumi moe o ka hale alii o ka aina a Babela i aloha nui ai.

            Oiai nae i keia manawa kupikipikio, aia hoi, ua lohe ia aku la kekahi paiakuli mawaho aku o na paia o ka hale alii; me he la aia i ka mamao loa, aka i ka wa a ka ikaika o ke kikiao makani e hoomaha iki iho ai no kekahi mau minute, e lohe maopopo ia’ku ana, a holopuni ae la mao a maanei o ke keena alii, me he la he mau mapuna leo kanikau no ke alii pilihua e waiho ana maluna o kahi moe me ka nele i ka noonoo.  He mau leo ohe kahi e kani malie ana.  Lohe ia aku la ka leo o ka ole, a ukali ae la ke kani o na pahu, a hoala ia aku la ka nakulu wawalo o ka ululaau; a ia manawa i lohe ia aku ai maluna ae o na mea a pau ka halulu ona kapuai lio nui e nee papa mai ana me ke kokoke ana mai.

            “Heaha keia?” wahi a kekahi o na kaukau alii e kiai ana i ke alii pilihua.  “Ke lohe nei ko’u mau pepeiao he halulu kamumu ano like me ko ke kahua kaua!”

            “He oiaio kau,” wahi a kekahi, he kanaka opio kino ikaika me na onohi maka uila; a hopu ino iho la i ke kumu o kana pahi poniala pahu puuwai.  “E kiai aku mawaho, a e hai mai i ka lono,” wahi ana.

            “Alia! alia!” wahi a ke alii nui e kiai ana i ka moi; “ma ko’u hoomaopopo ana, ke hoike mai nei na mapuna leo, he mau makamaka lakou me na lono hauoli.  Aka; ina he mau enemi, alaila, ihea e loaa aku ai ko lakou moi i oi ae i ko Abeona kulana?  A! e inu au i ke koko o kahi o lakou a make aku me kuu moi!”  Ia manawa oia i holo aku ai me ka mama e nihi ana nae me he popoki ala, a haawi aku la i ka hawanawana kauoha i kela a me keia “E Hoomakaukau! a e makaukau!”

            O keia mau mea i lohe ia, e nee mai ana e aneane e komo iloko o ka puuwai o ke kulanakauhale alii, ua manaopaa ia e na kiai a me na alii o ke kakela alii, o ka hooko ia ana keia o ka lono i loaa mua i ko lakou moi, oia hoi ka manaopaa o na enemi mahope o ko lakou lanakila ana ma ke kahua kaua, e komo mai maloko o ke kapitala nui o ke aupuni a hookahulehia i ka noho alii o ka moi.  No ia mea ua pihoihoi ka manao o kekahi poe o lakou, oiai, aia ko lakou moi ke waiho nei me ka nawaliwali a me ka nele i ka noonoo, a pehea la oia e pakele ai, a e lilo ole ai kona kino alii i aloha nui ia i mea hana ino na ka poe hana ino.  Aole no nae lakou i hoohala i ka manawa kupono, no ka mea, iloko o ka manawa pokole loa, ua makaukau na mea a pau no ka halawai ana me na enemi, a e hooikaika no ka manawa hope loa e hoopakele ae i ka haulehia ana o ko lakou kahua ahi mai na kupuna mai; a e maluhia hoi ka waiho nawaliwali ana o ko lakou moi ma kahi moe.

            Me na puuwai pihoihoi a me na kino i makaukau e halawai me ka hopena, kakali iho la kela a me keia pakahi o na makaainana o ke alii malako mai ona poai o ke kulanakauhale.  Ke hele mai nei ka huakai nui, ua hoea maila mawaho oka ululaau, a ua ike ia aku la ka punohu ula o ka lepo iluna o ka lewa me he ao polohiwa ala o Kane, a hoomaopopo iho la lakou nei, he mau tausani lehulehu wale keia poe e holo mai nei, a he pomaikai ko lakou auhee aku i na heluna uuku o lakou iho e ku makaukau aku ana ma keia aoao, aole no nae i haule ko lakou mau manaopaa.

            Ke aneane aku nei ke alii i kahi o ka pawaliwali loa, ke hoomaka nei kona ohana e pilihua, a ua hakui mai la na pakaua waimaka kakaikahi o ke aloha a e kulu liilii iho ana ma ko lakou mau papalina.  Ua ulu ae la ka manao kanikau iloko o kekahi poe no ko lakou alii i aloha nui ia, no ka mea, ke hele oia, o ka hele pu ana no ia, oiai, aohe waiwai o ko lakou ola ana ke ole oia.

            Moe iho la ke alii me kona ano a pau iloko oka nawaliwali.  E kau ana maluna o kona mau hiohiona na ano mau o ke aloha i ike ia iloko one.  Kahea iho la na leo aloha, na leo hoomanaolana, a me na leo i maa mau i kona mau pepeiao, aka, ua lohe ole ia lakou.  Ua nele kona mau pahu kani i na hoene o ka lohe, ua pau kona hoomaopopo ana, a ua haalele iho la na noonoo kanaka a pau i ka waiho noonoo o kona kino nani a kamahao.  E hapai ikaika ia ana kona haupo umauma e ka pinapinai o na pana o ka puuwai, e hanu ikaika ana ka puka makani me he la ua paupauaho.  Ua hoomaka mai la ka lena ana o ka ili nani o kona kino ahi, a e pii mai ana ke anu ma kona mau wawae.  He oiaio anei oha hopena keia o ka mamo a Babela?  E nalo ana anei oia me ka haawi ole ana i kona aloha hope i kona ohana a me na makaainana aloha?  Aloha ino, ina pela io, aka, e kali no kakou a e hoomaopopo.

            Ua kokoke loa mai la ka malihini mawaho; a o kona ano ina he enemi a i ole he hoa’loha, na ka manawa e hoike mai.  Iloko o keia uluku o na mea a pau, ike ia aku la ka holo ana mai o kekahi mea hookahi, a i kona komo ana maloko o na palena o ke kulanakauhale, auwe! he mea e ka ulu ana ae o kekahi wawa leo nui a piha pu ae la ka lewa luna me ka wawalo o na leo hauoli.  Waiho iho la kela a me keia i kana pono kaua ilalo o ka ilihonua, haule iho la maluna o ko lakou mau kuli, a haawi ae la i na leo pule i piha me ke aloha.

            No keaha la keia?  No ka mea, ua lawe ia mai la ka lono hauoli e ka alihikaua nui o Abeona II, e kau ana ma kona lima ka hae kalaunu o ka lanakila i ka onohi o kala, a he lau oliva o ka hauoli malona o kona alelo.  Hiki mai la oia ma ka ipuka ponoi o ka hale alii, ua puni kona lio me ka hua, a e lelele ana oia i o a ia nei, me he la, ua piha pu oia i ka hauoli.  Kowelo ae la ka alihikaua i ka hae o ka lanakila, wehe ae la i kona papale, a me ka leo nui moakaka i piha i ka hauoli, pane mai la penei:

            “I kuu alii ka moi Abeona II, ka haku i aloha nui ia o keia aupuni a o na makaainana; ka mamo koko alii oiaio o ka aina; ano, ke hoike aku nei kau kauwa nei; ua haule iho la kou enemi malalo o ka ikaika a me ka kupaa o kou mau puali kaua, a i keia la, he mau tausani lehulehu ko lakou heluna e noho nei he mau pio nau no ke kaua.  Ua halawai iho la makou me na enemi he hebedoma i hala ae nei, a mahop iho o na la hoouka kaua hahana he elima, ua lawe pio ia lakou  He 5,000 ko lakou poe i make, a he 90,000 i lawe pio ia me na pono kaua a pau.  Noloko mai o 80,000 o ko’u mau koa e kuu alii he 200 i make, a ke u nei makou me ka minamina no lakou.  Ano!  ke ku aei au, a ke kali nei he 10,000 o na koa kaua lio ou e ka moi mawaho aku o ke kulanakauhale, me ka makaukau no kau mau kauoha.  O kou make ko makou makemake, a e hooko ai me ka hakalio ole.”
            O keia mau olelo, ua hoolohe ia e na mea a pau me ka malie loa, a i ka pau ana, ua hiki ole ia lakou ke uuni iho i ka hauoli, a ua pihoihoi ae la kela a me keia.  Poina iho la ko lakou mau noonoo ana no ke alii i loohia ia me ka mai, oiai, he lono keia e hiki ole ai ke umi i ka olioli.

            Aka, he mea e aku nae ko lakou piha ino loa i ka hauoli, i ka ike ana aku, e omaka ae ana na maka o ke alii a mohala malie ae la kona mau onohi.  Ua komo aku la ka lono hou iloko o kona mau pepeiao, a ua moni aku la, aka, o kona kamailio ana mai, aole pane mai.  He mino aka ke kau ana maluna o kona mau papalina, me he la, e kamailio ana oia me kekahi anela hoomalielie.

            Hoi ia aku la ka lono i na koa no ka mawaliwali loa o ke alii, a mamuli o ia lono, ua kulu iho la ka waimaka luuluu o kela a me keia.  “He oiaio anei, aole oia e lohe ana a e ike ana hoi i keia hopena lanakila o kona nohoalii maluna o kona mau enemi.  Ina oia e pauaho, alaila o makou pu no kekahi ae pauaho, a e ae aku i ka honua e ale ae i ko makou mau hopena ma keia ao!”  Pela ka olelo a na koa, a he hoike oiaio no ko lakou aloha no ka moi, a he hooia ana hoi no na hana aloha a maikai a ko lakou alii ia lakou.     (Aole i pau.)

 

Lulu Dala Luakini

 

            E lulu dala hou ana ka Ekalesia Makuahine o Kaumakapuli, ke hiki aku i ka la apopo Sabati la 22 o keia malama.  Nolaila, ke kahea hou ia’ku nei na Apana Ekalesia o Kaumakapili, e ala, e liuliu, e hoomakaukau, e lulu, a paa ma ka lima o ka mea hookahi, a naue like mai me na hipuu a ke aloha.  “I hookahi hipuu na kakou a pau.”

            Ke kono hou ia’ku nei ka Ahahui Makua, oia ka “Ahahui Poola” a ka Moi Kawaihau e hooipo nei, a me ka “Ahahui Opio Puuwai Lokahi,” a ka Moiwahine Kaleleonalani e hiipoi nei.  E ulele hou mai i ke kahua hookahakaha o olua.  Nawai la ka eha?  na ka makua paha, na ke keiki paha, na ke kane paha na ka wahine paha?

            Ke uwalo ia’ku nei ka Apana o na Lani a me na kuahiwi i kau ia e ka ohu, wehea na kiowai o Kulanikahoi, kuua mai na mano wai o uka, hookulukulu ia mai ka ua lani polua, hoaleale i ke kaha o Kaunalewa, hoohanini hoi i Mana.”            M. KUAEA.

 

            O KE ola ana me ka nele i na koni ana a ke aloha, ua ahona ka make.  Lapuwale na mea a pau a ke kanaka i manao nui ai no kona oluolu a pomaikai iho.  Ano e ka honua i na aole ka la!  I na aole keia wai hoomau kamahao, heaha la ka waiwai?  Ua like ka hanohano, ke kiekie ke kaulana a me ka ikaika me he mau momi la i okomo ia iloko o kekahi lei keleawe, ina aole i nohoalii ia ka puuwai me keia mea he aloha?  He maikai ke aloha no na mea a pau.

 

            KAUKA LESLIE MINER.  E loaa na i na makamaka i loohia ia i ka nawaliwali mai ma ke kino na lapaau maikai mai a Kauka Miner mai, nolaila, ke kahea ia aku nei na makamaka e hele koke mai, mai lohi a mai hookaulua, oiai o ka wa e loaa koke ai i ka mai, a loaa koku aku i ka laau lapaau a Kauka Miner oia wale no ka wa e pau koke ai.  Eia kekahi, he nui loa ka poe mai ana i lapaau iho nei, a ua pau loa i ke ola.  A he mahele olelo kupono hoi ke noho pu nei meia.

 

OELO HOOLAHA.

 

E IKE auanei na kanaka a pau, owau o ka mea @@@@ ka inoa mahalo nei, ke hoike aku nei au i ka lehulehu, ma @@@aloa o keia hebedoma, i haalele iho ai au i ke kaena o @@@@ nei kahi e loku mau ia ana e ka ua Kukalahale, no ka @@@ hoi ana aku i ko’u one oiwi (Kina), nolaila, ke kauoha @@@ nei na mea a pau i ale ma ko’u halekuai ma Kaiop@@@, K@@@ e hookaa koke ae ia Ah Kam ko’u hope, oia ka mea mana e oki i na ale a pau, a oia no hoi ka mea nana e hooponopono i na mea a pau o ko’u halekuai i oleloia maluna no @@@ hoi au e kaawale ana, nolaila, ke haawi aku nei au i @@@na hope loa i na makamaka a pau mai Hawaii a hiki i N@@@@.  Aloha oukou.      AH LONG.

            Honolulu, Oct. 5, 1878.          880tf

 

O WAU o ka mea nona ka inoa malalo iho ke hookapu @oa aku nei au i kuu aina hoolimalima i loaa mai ia’u mai ka Papa Hoonaauao mai, oia ke Ahupuaa o Makawao, ma ka mokupuni o Maui, aole a hookuu wale i na lio, pipi, hoki, kekake, hipa, kao a me ka puaa, ma luna oia Ahupuaa o Makawao, ua kapu loa, aole e hookuu wale i na holoholona i olelo ia maluna.  Ina o ka mea hookuu wale i kana mau holoholona me ke kuleana ole, a hopu ia no a e lawe ia i ka pa aupuni no ke komohewa.  A pela no na ano kanaka a pau, aole e ku wale i na mea a pau maluna o na Ahupuaa ia i oleloia maluna, a oka mea hoolohe ole i keia mau olelo, e hana ia e like me ke kanawai o ka aina.  E hoolohe i keia olelo hoolaha o pilikia auanei. P. AKANA LIILII.

            Makawao, Maui, Oct. 1, 1878.           881 tf

 

KO BIHOPA MA

BANAKO MALAMA DALA!

            E MALAMA NO MAUA I KE DALA O na kanaka maloko o ka Banako, penei:

            Ina hoomoe mai ke kanaka hookahi i na dala $300 a emi mai paha, alaila, e uku mana i eono hapahaneri ukupanee makahiki, mai ka la o ka lawe ana mai a hiki i ka la o kona ohi ana, ke waihoia ke dala hoomoe i ekolu malama a keu paha.  Aole ukupanee e halu ia no ka hakina o ke dala hookahi, aole no hoi no ka hapa malama.

            Ina ohi koke oia i kana dala, aole i hala na malama ekolu aole ukupanee.

            Ina i manao ke kanaka e ohi i kana dala, e pono ke hoike e mai oia ma ka Banako i kona manao ohi, i kanakolu la mamua o kona ohi ana, a o kana Buke kekahi ke laweia mai.

            Ma ke kikoo wale no a ke mea dala e haawi ai i kana, a o ka Buke kekahi ke laweia mai.

            Ma ka la mua o Sepatemeba i keia makahiki a i keia, e houluulu ai i ke dala, a e huipuia ka ukupanee me ke kumupaa o na dala i hoomoeia no na malama ekolu a keu, a mahuahua, ke kumupaa e loaa i ka ukupanee.

            Ina oi aku ke dala hoomoe mamua o $300, alaila, hooholo pu ka olelo.

            E weheia ka Hale Banako i na la hana a pau.

            851 tf  BISHOP & Co.

 

WAI HUI O O KA HAU.

MA KA

“BONANZA”

MA ALANUI HOTELE!

NO

JNO. W. CROWELL, (Kolowela.)

            E LOAA no i na keonimana a me na lede o keia kaona, kahi e hoomaalili ai i ka wela ikiiki o ka houpo, ke kipa aku ma ka hale inu wai hau huihui o Kolowela ma kahi i hoikeia maluna, ma o aku o ka halekuai o Grant a me Robertson ma Monikahaae, Honolulu.  E naue ae malaila i ike pono.

            (876 3m)

 

Ale ka Wai ke Ike Aku

I keaha la hoi?

I na Waiwai Nani ano Hou loa hoi paha o

ka Halekuai o

GOO KIM.

Nana aku no hoi oe, “hoonuanua i

Apua a Kalamaula.”

            OIA no hoi na Hainaka Silika Nunui Eleele a Ulaula, Pulu, Wai Gula a Wai Dala.  Na Hainaka liilii Lei A-i.  Na mamalu kane, wahine a me na Mamalu liilii kihi weluwelu o na kaikamahine.  Na uhi huihui nani nunui a liilii.  Na Kihei Silika lau ma kaekae.  Na Koloka kamalii nani a me na Koloka hoopumehana no na bebe.  Na Huluhipa lau a me na lole huluhulu holoku o na wahine.  Na Muumuu keokeo o na wahine lihilihi ma ke alo, a me na Palekoki.  Na Papale wahine Malina i hoopinanaia kekahi aoao, hele kela a kapakahi Manuia o Keokoi ka moku.  Na Papale Waiokila aiai, a ke kau mai ke poo, moa uakea lua keia ke pa iho ka la, a he nui wale na ano papale e ae i ike ole ia mamua.  Na Hulu Eheu Manu no na papale wahine, e kau ai ka iwa.  Na Kalakoa hou loa, na Makalena a me na lole Iliwai, na Puuwai Gula a me na Gula Pepaiao o na wahine.  Na Kamaa ano hou o na kane, wahine a me na kamalii, na Kuka Kanahai, na lole wawae a me na Palule o na ano he nui wale, a me na Pale Pakaukau.

            Na Hainaka Silika Hou loa o kela a me keia ano waihooluu like ole, nui a liilii, na Kalakoa Huluhipa ano hou loa, na Makalena o kela a me keia ano, na Moena Pake, Ti Inu a me na mea hou e ae he nui wale na, ano mai Kina mai.

            O keia mau waiwai, eia no ke ahu mai nei o na ano hou loa wale no, a me kekahi mau waiwai e ae he nui loa i hiki ole ke helu papa aku.  Ina aku no hoi a kapalulu hou mai, ma kela a me keia ku ana mai o ka mokuahi o na aina e.  Nolaila e komo hale no e na hoa o ka lu o ka la, e wae i ko oukou mau Iini aole no hoi makou e uiha iki, ke hele mai oukou e kuekaa i na waiwai ma no ke kuai a nana wale no paha.  E kuaiia aku no keia mau mea ma na kumukuai haahaa.  Ma na Poakahi a me na Poaono, oia na la e kuai hoopaki loa ia aku ai ua mau waiwai nei.

            858 tf  GOO KIM.

 

HALEKUAI PA.

KE OWAKA NEI ME KA PANIO

Na Waihooluu o na Pa,

O KUU

HALEKUAI HOU

ma ke

Alanui Nuuanu.

 

Ua hoonee ia ae nei ka Halekuai Pa e pili pu ana me ka Halekuai o Goo Kim, ma ke

alanui Nuuanu, aia ma ka puka elua o ka Halekuai ma ke kihi o ke alanui Chaplain, makai iho o ka pa o ka Moiwahine Ema.

 

Ke hoike ia aku nei i ka lehulehu, eia maloko oia Halekuai e loaa ai ia oukou na waiwai malalo iho:

 

Na Pa Nui a Liilii

Na Pa Huewai Lepo

Na Pika Wai, nui a Liilii

 

            Na Kiaha, o na ano waihooluu a pau

            Na Bola, o kela me keia ano

            Na Ipukukui Hele Po.

 

            Na Ipukukui Kau Hale

            Na Ipukukui Aila Mahu

            Na Ipuhao o na ano a pau.

 

            Na Ipu Ti

            Na Ipu Waiho Waihau

            Na Pa Waiholoi Maka, nui a liilii o na ano a pau loa, me na waiwai e ae he nui hiki ole ke hui pau aku.

 

Ke kahea ia aku nei no ka lehulehu e hele mai no oukou e ike maka, a e wae no oukou iho, a e kuai aku no au ia oukou me ke kumukuai makepono loa makua o ko na Halekuai Pa e aku o ko kakou kulanakauhale alii nei.                       Sam-wo-chung.

            Honolulu, Iulai 24, 1878.        869 6m

 

KO

G. WEST

MAU

HALE HANA KAA HOLO LEALEA!

Kaa Lawe Ukana,

Kapili Kapuai Hao,

ME KA

Hana Hou ana i na Kaa Nahaha.

 

E LOAA no i ka poe e makemake ana i na mea i hoikeia maluna ke hele ae ma Polelewa ma ewa iho o ka halekuai o Kakela me Kuke, a makai o Ainahou, mauka mai o ka Hale Date.  E hana ia na hana a pau me ka maikai wale no.  E hooko ia no hoi na kauoha me ka eleu, a me ka hikiwawae.   (876 3m)

 

He Nui Anei Kou Makemake i na

Mekini Humuhumu Lole?

Ina pela, alaila, e kipa mai no ma ka Halekau

o

KAKELA A ME KUKE.

A malaila oukou e ike ai a makaikai i na ano MEKINI a WHEELER a me WILSON, mai ke $40 a hiki i ke $50 ke kumukuai o ka mea hookahi.

            Ka MEKINI a SINGER,ma ke $50 pakahi, a me ke ano MEKINI a WILCOX me GIBBS, ma ke $30 a hiki i ke $50 ke kumukuai.

            I mea e pau ai ko oukou kanalua e na Makamaka no ke kupono o keia mau ano Mekini, e naue mai no me ke kuihe ole, a e ike no oukou iho.          862 tf

 

ANO NO I LOAA MAI NEI!

Na Kaa Lio Holo Lealea!

 

Na Kaa Lawe Ohua a me na kaa hole palua, mau mea hoikeike aku, mai ka Hale Hana Kaa mai o ka Hui o Cortland ma Nu loka.

            DILLINGHAM & Co.,

            876 tf  Na Agena kuai ma Hawaii nei.

 

NA HALEKUAI

KAHIKINA NUI!

MA

Alanui Papu, Helu 62,

A ME

LILIOKAWAI!

MA

Alanui Nuuanu, Helu 21.

Ua wehe hou ae nei au i ka Halekuai

KAHIKINA NUI!

E ku Haaheo nei ma

ALANUI PAPU!

A ke hamama mau nei no hoi na puka o

LILOIKAWAI!

MA KE

ALANUI NUUANU!

            E loaa no i na keonimana kauaheahe a me na Lede maka palupalu, a me na Opio puuwai waipahe o ke Kapitala hanohano o Honolulu nei, a me ko na mokupuni e ae, na mea a lakou i anoi nui ai, ke kipa mua mai ma ko’u mau Halekuai.  He kuai makepono i ike ole ia kona lua ma Honolulu nei, he hoopakika, hoopahee, a he manuahi nui hoi, no ka pono o ka poe ake i na nu paikini o kela me keia ano.  E loaa no ma ko’u mau Halekuai.

Mai ko 10-11 Ia Lepo Nalo    $1.00

Mai ka 11 la Kalakoa  $1.00

Kihei Huluhulu           $1.00

Palule Huluhulu          .75c

Palule Keokeo             .50c

Iliwai no ka Holoku    $3.00

Alapia no ka Holoku   $4.00

Paa Lole Kane             $5.00

Paa Lole Keiki                        $2.50

            A me na lole e ae he nui wale o na ano waihooluu like ole, e ahu mokaki mai nei ma ko’u mau Halekuai.  A ua hiki hou mai nei no hoi na lole nuhou loa o kela a me keia ano, maluna o ka moku kalepa “Discovery;” nolaila, e kipa nui mai, i ike pono i ka hana io o ka ua noe, a me ka loku a ka ua Kipuupuu o Waimea.

            875 3m            S. MAGIN.

 

MAIKAI KA HOI KA PAPA!

A ME

KA LAAU O KOU HALE!

NO HEA LA!

KAI NO HOI NO KAHI O

WAILA MA!

Nana aku no hoi ia la

            Ohi ka Io o ka Laau o Makawao

            I ka ua mea hoi o ka nani o

Na PAPA! Na PAPA!

 A ME

NA PONO KUKULU HALE

O NA ANO NO A PAU.

 

Aia ma ke kihi o na

ALANUI PAPU me MOIWAHINE!

HONOLULU

MALAILA E LOAA AI

E LIKE me ka MAKEMAKE

NO KE

KUMUKUAI MAKEPONO LOA!

 

PAPA, PAPA, PAPA,

Na Papa Huluhulu,

            Na Papa Manoanoa,

            Na Papa i kahiia,

            Na Papa Kepa,

            Papa Hole Keokeo,

            Papa Hole Ulaula.

 

NA LAAU, NA LAAU

 

Na Kua,

            Na Kaola,

            Na Aaho,

            Na A@@@@

            Na Peapea,

Pine Huluhulu,

            Pine i kahiia.

 

NA Papa a me na Laau Ulaula!

            Pili ulaula,

            Pili Keokeo,

            Pani Puka,

            Pani Puka Aniani,

            Ipuka Aniani,

            Puka Olepelepe.

 

PENA O NA ANO A PAU

 

Hulu Pena mai ka Liilii a ke Nui,

            Aila Pena,

            Aila Hoomaloo,

            Waniti, Pate.

 

NA LOKO O KELA A ME KEIA ANO:

            Na Ami Puka Hale,

            Na Ami Puka Pa.

            ANIANI!

 

Pepa Hale a me na Lihilihi

E LOAA NO MALAILA.

PAAKAI HELU 1 O KAKAAKO me PUULOA

            No ke DLA KUIKE, e loaa no na mea a pau i haiia ae la, no ke Kumukuai Emi loa.  O na kauoha a pau mai Hawaii a Niihau, e loaa’ku ana ia lakou, e hooko koke ia no ia me ka lawa pono.

E Kipa Nui Ilaila, i ike i ka Oiaio

            @8@ @@s