Ka Nupepa Kuokoa, Volume XVIII, Number 3, 18 January 1879 — KO LANAI MAU ANOAI. [ARTICLE]

KO LANAI MAU ANOAI.

Ma na la hope o ka mahina o Dekemaba o ka M.H. 1878 i aui kunewa malie aku la, ua wehe ia na puka wai o Kulanihakoi; a ua haule nui mai na paka ua koikoi e hoo-ma-u ana i ka papaa la o ko makou mokupuni kaulana a ke aiwaiwa Kaululaau i noho ai i na kau i hala oiai, mamua aku oia manawa ua nui ka maloo o ka aina, a no ia kumu i haalele iho ai kekahi poe ia Lanai, a holo aku la no ka mokupuni o Kamalalawalu, a o kekahi poe ke hoomakaukau nei no e hele aku ma ia huakai hele hookahi, aka, no ko ka lani haawi ana mai i keia pomaikai, nolaila, ua hauoli nui makou, a e pau wale ana paha ka manao hele o kekahi poe. O kekahi mea ano hou ma o makou nei, oia ka aina kalo o Maunalei e huli pono la i ka moku o Hina, ua lilo i mea ole ua hana ka wai i kana hana, nolaila au i haupu ae ai i keia mau wahi lalani mele malalo nei, "Ahu iho la ka pua wahawaha i Wailua Hao ke Koolauwahine i ke hoa la lilo" Ua oki au maanei. W. N. P. Kauhi Palawai, Lanai Januari 1879. Puni Kanawai. -- Aia ma ke kihi mauka o alanui Emma kekahi kuee mawaena o kekahi poe no ka mana a mana ole o kekahi alahele mawaena o kekahi apana aina. He mea hiki wale no ke hooponopono mua ia me ka oluolu a me ka nui ole o ka lilo, aka, no ka puni kanawai no o kakou Hawaii, ua ulu nui ke kuee, a ua hele imua o na Aha Hookolokolo he lehuhelu, a ke aneane aku nei ka lilo o na aoao elua i ka $100 a oi. O ke kumu hoopaapaa, aole paha he $15 ka huina, aia aku la nae i o loa ka moni o ka poe puni kanawai.