Ka Nupepa Kuokoa, Volume XVIII, Number 18, 3 May 1879 — Page 2

Ma ke Kauoha.

Keena o ke Kiaaina o Hawaii, Hilo, Apr. 10, 1879.

                Ua hookohuia ka Hon. F.S. Lyman i keia la, i Kakauolelo ma ke Kiaaina o Hawai'i.
LIKELIKE 907 3t

Kuai o ka Aina Aupuni.

                E KUAI ia aku ana ma ke kudala akea ma ke alo o Aliiolani Hale i ka hora 12, awakea o ka Poaono, Mei 31, 1879, kela apana aina i ikeia ka Uniona Hotele, ma alanui Kalepa, Kumukuai $7,000 a maluna aku. O na kuhikuhi no na palena a me ka ili e loaa no ma keia Keena.
SAM'L G. WILDER,
909 3t Kuhina Kalaiaina

Kuai o ka Aina Aupuni.

                E KUAI ia aku ana ma ke kudala akea ma ke alo o Aliiolani Hale i ka hora 12, awakea o ka Poaono, Mei 31, 1879, i kela apana aina e waiho ia ma Kaluahole, Leahi, nona na eka he 19. Kumukuai $210 no ka apana a maluna aku.
SAM'L G. WILDER,
909 3t Kuhina Kalaiaina

            UA hookohu ia'ku i keia la, o Mr. Geo. Bell i. Agena no ka hoolalo ana i na palapala aelike o na ano a pau ma ka apana o Waimea, mokupuni o Hawaii.
THOS.BROWN, Luna Hooiaio Kope,
Keena Hooiaio, Aperila 24, 1879.
Aponoia: SAM'L G. WILDER,
909 3t Kuhina Kalaiaina.

            Ua hookohu ia aku i keia la o Mr. Geo. Bell i Agena Hooiaio no na palapala aelike paahana no ka apana o Kohala Hema, mokupuni o Hawaii, ma kahi o John Stupplebeen i waiho mai.
SAM'L G. WILDER,
909 3t Kuhina Kalaiaina.

            UA hookohu ia aku i keia la o Mr. D. S. Kahookano i Agena Hooiaio no na palapala aelike paahana ma ka apana o Kohala Akau, mokupuni o Hawaii, ma kahi o W. Merseburg i make.
SAM'L G. WILDER, Kuhina Kalaiaina.
Keena Kalaiaina, Aperila 28, 1879. 909 3t

            I KEIA la ua hookohu aku wau ia N. P. Nuuhiwa i Luna Pa Aupuni no ka apana o Wailuku, mokupuni o Maui, ma kahi o Mr. R. W. Kapohakui make aku nei.
JNO. O. DOMINIS, Kiaaina o Maui.
Lahaina, Aperila 28, 1879. 909 1m

KA NUPEPA
Kuokoa me ke Au Okoa
I HUIIA.
No ka Makahiki, $2. Eono Mahina, $1. Dala Kuike ka Rula.

MEI 3, 1879.

                HE mea maopopo eia no iloko o Honolulu i keia wa kekahi puulu kamalii mawaena o na makahiki he umi me ka umikumamalima e noho nei mawaho o ka palena o na kanawai o na makua. Ma na po aia no lakou ma na alanui kahi i akoakoa ai, a e auwana wale ana i kahi wa ma na alanui mawaho ae o ke kulanakauhale. O ka lakou mea e lealea ai, oia na olelo haumia a me na hana kolohe a lakou e lawelawe ai me ka ike ole ia e na maka o na makai. Ua ukali ia keia poe keiki e kekahi poe kamalii malalo iho e hoolohe ana i ka lakou mau olelo a e no ana i ka lakou mau hana. Owai na makua o keia poe keiki ? He poe keiki makua ole kekahi; a he makua no ko kekahi, aole nae hiki ke hoomalu. He mau makua mana ole ma ka hoomalu ana i ka lakou poe keiki; a he poe makua kolohe kekahi e kena ana i na keiki e aihue a e hoowalewale ia hai. Heaha ka hopena o keia poe kamalii ? He ninau keia i kupono ke noonoo ia e na kahu nana e malama ka maluhia o ka lahui. Ina e mau aku keia poe kamalii mamuli loaa ia kakou ma Honolulu nei kekahi puulu kamalii lapuwale loa, e like me ke kulanakauhale o Kapalakio i keia wa ; he poe hopo ole i ka powa a me ka pepehi kanaka. Aka, aole kumu e loaa ai keia poino ke lawelawe ole ia keia mea e hooponopono, i keia wa. He kanawai ko kakou, a he poe nana e hooko ke kanawai, a he kula hoopololei kahi e ao ia'i ka poe paakiki.
            Aole anei he mea pono ke hookapu ia ka hele wale ana o na kamalii ma na alanui i ka po, ke hele pu ole me ka makua a me ke kahu paha ? Heaha ke kuleana e akoakoa ai kamalii ma ka Nekina i ka po ? a me na wahi e ae no hoi o ke kulanakauhale ? Ke manao nei makou aohe kuleana. Aohe a lakou mau hana ma ia mau wahi. A ina pela, no keaha la e ae ia ai lakou e auwana wale iloko o na wahi ino, a lawelawe no hoi ma na mea lilo ai lakou ma keia mua aku i poe kue i ka maluhia o ka lehulehu ?

            I NA HOAAI O KE KUOKOA.— Ua loaa mai ia makou ka oukou mau leta kauoha makana e na makamaka, ua ike makou i ko oukou ake nui a paulehia i ka makou makana hanohano, a oiai, ua hao ia ae nei na kii i hiki mai a ua pau loa, aole he mea ma ko makou lima e waiho nei, nolaila, ua kauoha hou aku nei makou i mau kii hou no oukou e ko makou mau tausani hoaai o ko makou papaaina, aole oukou e nele ana; aka, e kali me ka hoomanawanui a me ka manaolana. E nana i ka makou hoolaha e puka mau nei ma ka pepa.

KE KII MAKANA.

                No ka makemake nui ia o ke Kii a makou i haawi ai i makana no ka poe hookaa mua i na DALA ELUA NO KA NUPEPA KUOKOA no 1879, ua pau loa i ka lawe ia ua mau makana 'la, a ua koe kekahi poe aole i lawa. No ia kumu, a i kumu hoi e hiki a ke pahola ia aku keia pomaikai a lawa pono ka makemake o na mea a pau. ua kauoha hou makou e hooili ia mai ona mau kii o ka MOIWAHINE o Enelani, e like ke ano me na mea i loaa mua mai nei. E hiki mai ana keia mau Makana iloko o keia mau pule ae.
            Ke manaolana nei makou mamua ae o ka la 30 o June e ike ia'i. Nolaila hoi, i kumu e loaa aku ai ka pomaikai i ko makou poe makamaka lawe i ke KUOKOA i nele i keia wa i ka Makana, e like me ko makou noi ia mai, ke hoakea ae nei makou i ka manawa e hookaa ai na dala elua no ka Makana, a o na mea a pau e hookaa ana i na DALA ELUA NO KA NUPEPA KUOKOA no 1879 mamua ae o ka la 30 o June e loaa no ia lakou keia KII MAKANA MAIKAI.

NU HOU KULOKO.

                18 PAONA AI $1.25.—Ua loaa mai ia makou kekahi leta mai Kohala mai, e hoike ana no ka pii ino loa o ka ai ma ia apana, ua loaa kahi pai ai nona na paona he 18 no $1.25.

                NA KUNI ILIO. —Ke hoike ia aku nei ka lohe i na mea ilio a pau i loaa na kuni, e hoopaa ae i na ilio, oiai, ua makaukau ke aupuni i keia wa e luku aku i na ilio i loaa ole ko lakou mau kuni.

                MAKEMAKE IA.—Ua noi ia mai makou e Mellis e hoike aku, ua makemake ia kekahi kanaka opiopio kupono a makaukau, i ike i na olelo elua. E ninau ma ka hale kuai 'California One Price Bazar" a ma kona hale noho.

            NA PAKA UA.—Ua haule iho na paka ua eloelo iloko o keia mau la iho nei ma ke taona, ua hoomaka koke ka ukele o na alanui, a ua hoohoihoi ia hoi ka mahiai no ka loaa ana he mau kulu wai no kona kihapai.

            KE AHI A KA WAHINE.—Ke pu-a mau mai nei na hana hooweliweli a ka Madame Pele o Kilauea. ma ka ike ia ana aku mai Keaiwa, e ho-a ana oia i kana imu ahi enaena, a ua hohola ae kona malamalama ma na paia o ka lewa, a hala loa aku i ka moana kai uli.

                KE KIALUA HOKUAO NO MAIKONISIA—E haalele ana ke kialua Hoku Ao i keia awa no Maikonisia ma ka la 10 o Iune e hiki mai ana, nolaila, e hoomakaukau na makamaka no ka lakou mau ukana no ka hoouna ana.

                HE MAKANA.—Ua makana mai ke Kula Hanai o Hilo i ka Papa Hawaii he 34 Buke Himeni hou Ka Lei Alii, a na ka Papa Hawaii e hoolilo aku ma ka haawi ana ma na Buke, a i ole ma ke dala. No ko ke Akua Aupuni.

                KA LEI ALII.—Ua makaukau keia Buke Mele Hou, me kona mau leo mele maikai e hookaau pu me na Kula Sabati o kakou a puni o Hawaii nei. E nana ae i ka hoolaha e puka aku nei i keia la, a e kii ae e kuai i ua mau buke la mamua o ka pau e ana. E loaa no ma ka Hale Kuai Buke o Wini a me Robikana, no ke kumu kuai he 75 keneta wale no.

            MAU HAOLE APUHI.—Ma ka lokomaikai o kekahi o na poo o ka oihana makai o kakou nei, ua hai ia mai makou i ka hoao ana o kekahi mau haole ekolu e lawe i ke dala a kekahi mau pake mauka o Kapalama, ma ko lakou lawe ana i ke kulana o ka maikai, aka, mahope iho o ka hooko ia ana o ko lakou makemake, ua lalau ia aku ua poe haole la e kekahi makai (kanawai,) a hului ia mai la i ka halewai.

                UA HALA.—Ma Kikihale, ua kii mai la na lima menemene ole o ka make ia Kekai w, i ka po o ka la 19 o keia malama. Ua loihi no na la o kona hoomanawanui ana i ke kau o ka pilikia, ua inu aku i ke ola i na Kauka mea ole nae ka loaa mai o ka oluolu o kona mai, he puu ma ka opu. Ua waiho iho ia i ka ukana kaumaha i kana kane a me ka ohana a pau e noho kumakena ana. O ka nui o kona mau la o ke ola ana ma keia ao 45 makahiki.

                KA LA HOOMANAO O KA NA-I AUPUNI—Ua hoopuka ae nei na komite o ka la 11 o Iune i na hana oia la, ma ke kahua Kapiolani Paka, a e malama ia ana e like me na lealea o ka makahiki i hala; nolaila, ua loaa ka manawa no ka poe hookomo i ko lakou mau lio no na lealea oia la, oiai, he malama okoa ke kaawale. E hoau hou ana paha ke Kate Lee i keia la hoomanao ae o ka na-i aupuni Kamehameha ka Nui.

                HOOPANEE IA NA MOOLELO.—Mamuli o ka loaa ole ana he kowa ia makou e komo ai na Moolelo Ahahui, ua hoopanee aku makou a keia pule ae, ao ka mea, o kahi i manao ia, ua uhi pu ia e kekahi mau manao kumau; a no ka loihi loa no hoi kekahi o na moolelo i haku ia, i komo ole ai ma kekahi mau hakina kolamu. E pono e hoopokole ia na moolelo ma ke kakau ana.

NO KA POAONO.

                O ka Poaono, oia kekahi o na la i kaulana iloko o na moolelo kuauhau alii o Beritania Nui, a iloko hoi o ia la, i make mau ai ka ohana alii o Enelani iloko o na makahiki he 167 i hala.
                Make o Williama III. i ka Poaono, Maraki 18, 1702; make ka Moiwahine Annie i ka Poaono, Augate 1, 1714; make o Keoki II, i ka Poaono, Iune 10, Okatoba 25, 1760; make o Keoki III, i ka Poaono, Ianuari 29, 1820; make o Keoki IV, i ka Poaono, Iune 26, 1830; make ke Duke o Kent i ka Poaono, Maraki 16, 1861; make ke kane a ka Moiwahine Vitoria i ka Poaono, Dekemapa, 14, 1861; make ke kaikamahine alii Alice i ka Poaono, Dekemapa 14, 1878.
            O ka Poaha hoi ka la make mau o ka ohana alii Tudor. Make o Henere VIII, a me me kana mau keiki ekolu. Edawada, Mere a me Elisabeta ma ka Poaha.

Hunahuna mea Hou.

E KA NUPEPA KUOKOA E; Aloha oe:—
            Ma ka malama i hala iho nei o Maraki, ua komo mai ma ke awa o Kealakekua he elima mau moku okohola. E ia ka mea oi aku o ka pomaikai o na kanaka, ma ke ku ana mai o keia mau moku, oia ko lakou lawe ana aku i ka lakou mau mea kuai; oia ka uala, maia, alani, a me na mea e ae, a hoolilo ma ka aila, ma ke kumu kuai haahaa loa; a ke a nei ma ko lakou mau ipukukui iho na aila o keia mau moku.
            Eia kekahi mea pomaikai loa o na kamaaina o keia apana, oia ko lakou lako ana i na pono kino aahu; oia hoi, lolewawae manoanoa maikai i kupono ke kuai ia ma ko kakou mau mokupuni nei, mai ke eono dala a pii aku i luna; aka i na e kuai ia ma keia mau moku, e loaa no ma ke ekolu, a eha dala no ka lolewawae manoanoa maikai.
            A pela no hoi na kuka maikai; e loaa no me ke kumu kuai haahaa loa e kupono ai no na keonimana, a ua lako loa na kamaaina o keia apana i na kapa o keia ano.
            A eia na keiki maka palupalu o ua "Konakaiopuikalai" nei, ke hookahakaha nei me na pono o keia mau ano. A ma ka malama o Aperila, ua huli hoi aku la ua mau moku nei, a ke nonoke ala me na ale hulilua o ka moana.
JOHN. KUALAU.
Napoopoo S. K. Aperila 15, 1879.

                HOOKAHAKAHA PO MAHINA— Ma ka po Poakolu iho nei, i puka ae ai na puali koa Princes Own a me na koa Kumau o ke aupuni, i hui pu ia aku me ka Puali Puhi Ohe, a hookahakaha ae la ma kekahi mau alanui o ke kulanakauhale oiai na hoku e imoimo iho ana a e kiola piha iho ana ke aliiwahine o ka po i kona nani; ua puka ae na makaikai a hookahi ka hookahakaha like ana me na keiki aahu panio; a o ka makamua keia o ka puka ana o na Puali Puhi Ohe, a hookahakaha ae la kekahi mau alanui o ke kulanakauhale oiai na hoku e imoimo iho ana a e kiola piha iho ana ke aliiwahine o ka po i kona nani; ua puka ae na makaikai a hookahi ka hookahakaha like ana me na keiki aahu panio; a o ka makamua keia o ka puka ana o na Puali no kekahi wa loihi i hala.

OLELO HOOLAHA.

                AHA Kikie o ko Hawaii Pae Aina, ma ka hooponopono waiwai. Mokupuni o Oahu, Hawaii Pae Aina, ss. Ma ka waiwai o WILLIAM MERSEBURGH i make. Olelo kauoha e koho ana i la e hooiaio ai ka palapala kauoha, a no ka hoolaha ana. No ka mea, ma ka la 29 o Aperila M. H. 1879, ua waihoia mai imua o ka Aha, kekahi palapala, i olelo ia, oia no ke kauoha hope loa o William Merseburgh i make aku la; a me ka palapala hoopii e noi ana e hooiaioia kela palapala kauoha a e hoopuka hoi ka palapala luna hooko ia George C.Williams & Kanoanoa Merseburgh ua waihoia mai e W.C. Parke. Nolaila, ua kauoha ia o ka Poalua oia ka la 27 o Mei M.H. 1879, ma ka hora 10 am ma ka rumi hookolokolo o ia Aha, ma Aliiolani Hale ma Honolulu oia ka la me ka hora, e hooiaio ia'i la palapala kauoha, a e hoolohe hoi no ia noi ana mai, a me ka poe a pau i pili, e kue ana ia palapala kauoha, a me ka hoopuka ana i ka palapala luna hooko. A ua kauoha hou ia, e hoolaha no ia mea no na pule ekolu iloko o ke "Kuokoa" he nupepa i pai ia a i hoolaha ia ma Honolulu.
                A ua kauoha hou ia, e hoopukaia na palapala kena no na hoike no ia palapala kauoha,a me na hooilina o ka mea make, kauoha i ka wa i oleloia.
Kakauia ma Honolulu, ko Hawaii Pae Aina, Aperila 29, 1879.
A. FRANCIS JUDD.
Ikea: Lunakanawai o ka Aha Kiekie.
A. Rosa, Hope Kakauolelo. 909 3t

            AHA Kiekie o ko Hawaii Pae Aina, ma ka hooponopono waiwai. Mokupuni o Oahu, Hawaii Pae Aina, ss. Ma ka waiwai o NAAMAU w, o Waikiki Oahu i make. Olelo kauoha e koho ana i ia e hooiaio ai ka palapala kauoha, a no ka hoolaha ana. No ka mea, ma ka la 28 o Aperila M. H. 1879, ua waihoia mai imua o ka Aha, kekahi palapala i olelo ia, oia no ke kauoha hope loa o Naamau w, Waikiki Honolulu Oahu i make aku la; a me ka palapala hoopii e nui ana e hooiaioia keia palapala kauoha a e hoopuka hoi ka palapala luna hooko no Kahuhu k, ua waihoia mai e Kahuhu k,. Nolaila, ua kauoha ia o ka Poakolu oia ka la 21 o Mei M. H. 1879, ma ka hora 10 am ma ka rumi hookolokolo o ia Aha, ma Aliiolani Hale, Honolulu oia ka la me ka hora, e hooiaio ia'i la palapala kauoha, a e hoolohe hoi no ia noi ana mai, a me ka poe a pau i pili, e kue ana ia palapala kauoha, a me ka hoopuka ana i ka palapala i na hooko. A ua kauoha hou ia, e hoolaha no ia mea no na pule ekolu iloko o ke Kuokoa he nupepa i pai ia a hoolaha ia ma Honolulu.
Kakauia ma Honolulu, ko Hawaii Pae Aina, Aperila 29, 1879.
LAWRENCE McCULLY,
Ikea: Lunakanawai o ka Aha Kiekie.
A. Rosa, Hope Kakauolelo. 909 3t

Hoolaha a ka Lunahooponopono
Waiwai.

                MA keia ke hoike nei, o ka mea nona ka inoa malalo iho, ua hookohu ia mai i lunahooponopono no ka waiwai o W. D. Pao o Honolulu i make, ke hoike ia aku nei i na kanaka a pau, e waiho mai i ko lakou koina mina ma ka moraki a kumu e ae paha ma ke keena o Kikila Baraunu, Loio a he kokua ma ke Kanawai, alanui Kaahumanu, Honolulu, iloko o na malama eono mai keia la aku, e hoole mau loa ia aku lakou; a o ka poe a pau i aie, ka waiwai o ka mea i make, e uku koke mai ia Kikikia Baraunu.
KANAKAOLE
Lunahooponopono waiwai o ka waiwai o W. D. Pao i make.
Aperila 22, 1879. 909 4t

HOOLAHA A KA LUNAHOOPONOPONO WAIWAI.

                MA ka waiwai o J. Eoakak no Waiohinu i make kauoha ole. E ike auanei na mea a pau, o maua o na mea nona na inoa malalo iho nei, ke hoolaha aku nei i ke akea i na mea a pau ma ka la 16 o Aperila i hala aku la. Ua hoonoho mai ka mea hanohano F. S. Lyman, kekahi o na Lunakanawai Kaapuni o ka Apana 3 o ko H P A ia maua i lunahooponopono no ka waiwai a pau o J. Boaka no Waiohinu Kau i make me ke kauoha ole ma ka la 20, o Dek. 1878, i haia aku nei, nolaila, ke hai ia aku nei ka lohe i na mea a pau i aie mai ia J. Boaka e hookaa koke mai, a o na mea hoi a J. Boaka i aie aku ai e hoike koke mai i ko lakou mau bila kupono, iloko o na malama eono o hoole loa ia auanei, ina he mau mea e paa ana i kekahi waiwai o J. Boaka ma ko lakou lima e hoihoi koke mai lakou ia ma waiwai ma ko maua lima.
AB. KALAULI, KEALALAINA K. BOAKA, Waiohinu Kau, Aperila 18, 1879. 909 1m

LIO NALOWALE.

                MAI ko'u wahi noho aku, ua hemo aku a auwana kekahi lio hulupala wahine, ma ka Poakahi o ka pule i hala. Apr. 14, 1879; a o ka mea a mau mea e loaa ai a hoihoi mai ma kahi o Theo. H. Davies, alanui Kaahumanu, e loaa no iaia ka uku kupono no kona luhi. A o ka hao ma kona ua, aole i hoomaopopo ia. O ka hao kuni, he ano kea ma ka a-i, e like me keia.
T. R. WALKER,
Honolulu Apr. 28, 1879. 909 1t

KA LEI ALII.
O keia inoa o ka Buke Mele hou no na
KULA SABATI
O
HAWAII NEI.

                UA hoomakaukau ia e ka Makua Rev. L. Laiana o Waimea, Hawaii, ka Haku Mele Kaulana. He 156 himeni me na ano mele nani o loko. Hoolaha ia e H. M. Wini, Honolulu. O ke kumukuai o keia Buke mele hou he 75 keneta. 909 4t

OLELO HOOLAHA.

HE AHA MELE NUI.

                E wehe ia na ana he Aha Mele maloko o ka Luakini o Kawaiahao, ma ka PO POAONO, MEI 3, M. H. 1879, Malalo o ka hooponopono ana a me ke alakai ana a ke Alii ka Hooilina Moi Liliuokalani. E kau aku ana imua o ia anaina ke KAHULI LEO LEA o ka Ua Tuahine o Manoa, MISS JULIAN WALANIKA. E hoike aku oia i ka ikaika o kona leo i oi pahiku ae i ko na au i hala. Ma ke ana ia ana o kona leo i keia wa, ua ike ia keia: Ma ka IKAIKA--- He 9 degere maka mea ana leo, Ma ke POHA ana--- He 7 degere oi i ke sila. Ma ke O ana --- He 4 degere oi i ke sila. E mele aku ana oia i kekahi mau leo mele i hana mau ia a hookuku mau ia ma Amerika, a i kaahele ia hoi e ko Europa a puni ka honua, oia keia "The Valley of Chamouni," A ME "SCENES THAT ARE BRIGHTEST."  Nawai la auanei ke eo, na ka ili keokeo paha na ka Hawaii paha. Na na pepeiao e hooponopono. E hui pu mai ana ma ia Aha Mele kekahi poe puukani o Honolulu nei, a me ko Manoa mau kahuli kani kuamauna. E hemo ana na puka i ka hora 7 ahiahi, hoomaka na hana i ka hora 7 1-2. UKU KOMO- No lalo, $1.00; na aoao me luna, 50 keneta na keiki, 25 keneta. Na Balota Komo e loaa no ma ke Keena Kuokoa, ko Hawaii Pae Aina, ma ka puka komo, a me na Komite. 908 2t

KA LA O KAMEHAMEHA,
KAPIOLANI PAKA.
Papa Kuhikuhi Hana- Iune 11, 1879.

                NA KOMITE HOOMAKAUKAU— Ka Ex Jno O Dominis, Franklyn S Pratt, Esq. Allen Herbert, Esq.
            PUUKU & KAKAUOLELO— Henry J Agnew.
            NA LUNAKANAWAI— Ad Mailliard, W C Wilder, Jas S Lemon.
            MANAWA— D W Clark, M. Eckart.
                HOOPONOPONO KAHUA— W R Buchanan.
            HOLO ANA— J T Chayter.
            KA LOIHI— Jas i Dowsett, Jr.
            ANA KAUMAHA— A W Bush.
            NA KOMITE HOOHANOHANO- Na Ex S G Wilder, J M Kapena, E Preston, S Kaai; na Hons C R Bishop, A S Cleghorn, H A Widemann, J I Dowsett, H N Kahanu, G Rhodes; na Esquires- A J Carwright, F Spencer, F Banning, M McInerny, J Perry, Col W F Allen. J A Hassinger, J Hoting, J M Davidson, Capt T Spencer, C Long, M Pico, Dr O S Cummins, G W Macfarlane, S Damon, E T O'Halloran, Sam'l Parker, F A Schaefer, Dr T Tisdale, C Afong, H. Macfarlane, W G Irwin, H L Sheldon, Col Z S Spaulding, Cecil Brown, B F Bolles, A Jaeger, J C Glade, Jas Campbell, H Cornwell, J Moanauli, H Turton, J Cummins, J S Walker, T C McDowell, G West, C T Gullick, R F Bickerton, J Makee, Dr F H Enders, Col C Spreckles, J H Paty, M P Robinson, Dr. J S McGrew, Capt John Ross, J H Black, Dr F Hutchinson, H Schmidt, A McWayne.

NA HEIHEI.

EKE A KAMEHAMEHA. $200

                Heihei kaa lio holo kiau, noa i na lio a pau, hookahi mile. O ka mea 2 oi ana iloko o 3. Uku hookomo, $15, e hoihoi ia ka uku hookomo a ka lio elua aku.

EKE A KA MOIWAHINE, $100

                Heihei holo no na lio a pau, hookahi mile. Uku hookomo, $15, e hoihoi ia ka uku hookomo a ka lio elua.

HEIHEI KUKINI, $35

                Noa i na mea a pau, 400 iwilei, ekolu a oi aku poe hookomo, $25 makana i ka mea eo mua, $10 i ka mea elua i Ulu hookomo $1.

EKE A KA POE MEKANIKA, $100

                Heihei kaa lio holo kiau, no na lio wale no a pau o Hawaii nei, hookahi mile, o ka mea 2 oi ana iloko o 3. Uku hookomo, $5, e hoihoi ia ka uku hookomo a ka lio elua aku.

KIAHA O HONOLULU, $250

                (Haawi makana ia e Mr. McInerny). o ke kumukuai he $50 me $200 mawaho ae i hui ia aku. Heihei holo no na lio a pau, 2 mile ka pahu hopu. Uku hookomo, $15, e hoihoi ia ka uku hookomo a ke kaa elua.

HEIHEI MIULA, $50

                Heihei holo, noa i na miula a pau, 1 mile ka pahpu hopu. Uku hookomo, $5, e hoihoi ia ka uku hookomo a aka miula 2.

EKE A KA LEHULEHU, $50

                Heihei o na kaa hoolimalima. 1 mile ka pahu hopu, noa i na lio a pau i komo ole i na hana o ka la, a i lo a ole he makana iloko o kekahi o na heihei. Uku hookomo, $2, e hoihoi ia ka uku hookomo a ka lio elua aku. E Hoike ae ka poe Heihei ma na Aahu o ka poe Heihei. O na rula o ka Hui Lahui o ko Amerika kahua heihei, e alakai ia ai na Lunakanawai i ka lakou mau olelo hooholo. O na hookomo ana no na heihei maluna ae, e hoike ia ma ke kakau ana me ka uku hookomo, ka inoa o ka lio, ka mea nona ka lio a me ke kahiko o ka mea nana e holo. E waiho ia aku me ke kakauolelo na hookomo ana mamua o ka hora 2 pm o ka la 2 o Iune, 1879, mahope aku o ia manawa, aole e lawe ia na hookomo ana.
 909 tf H. J. AGNEW, Kakauolelo.

            MA ke keena o ka Luna Kanawai Kaapuni, o ka Apana Elua o ko Hawaii Pae Aina. Ma ka waiwai o Keke k, no Kamalo, Molokai i make. Ua heluhelu ia a ua waiho ia ka palapala noi a J W Kalua, ka Lunahooponopono o ka waiwai o Keke k, no Kamalo, Molokai i make, e noi ana e hoapono ia kana moowaiwai a e hookuu ia mai ka oihana. Nolaila, ke kauoha ia aku nei na kanaka a pau ke pili, o ka Poakahi, oia ka la 19 o Mei1879, ma ka hora 9 am ma ka Hale Hookolokolo ma Lahaina, oia ka la a me kahi i koho ia no ka hoolohe ana i ua nonoi la, a me na mea kue ke hoike ia.
ABR. FORNANDER. Lunakanawai Kaapuni Apana 2, H P A.
Lahaina, Apr. 18, 1879. 908, 3t.

            MA ke keena o ka Luna Kanawai Kaapuni o ka Apana Elua o ko Hawaii Pae Aina. Ma ka waiwai o J Kaea k no Kuiaha, Hamakualoa, Maui, i make. Ua heluhelu ia a ua waiho ia ka palapala noi a J Puiwa Kaea k, e noi ana e hoonoho ia ia i Lunahooponopono no ka waiwai o J Kaea k, no Kuiaha, Hamakualoa, i make. Nolaila, ke kauoha ia aku nei na kanaka a pau ke pili, o ka Poalua, oia ka la27 o Mei 1879, ma ka hora 9 am ma ka Hale Hookolokolo ma Wailuku, oia ka la a me kahi i koho ia no ka hoolohe ana i ua nonoi la a me na mea kue ke hoike ia.
ABR. FORNANDER. Lunakanawai Kaapuni Apana 2, H P A.
Lahaina, Apr. 19, 1879. 908, 3t.

            MA ke keena o ka Lunakanawai Kaapuni o ka Apana Elua o ko Hawaii Pae Aina. Ma ka waiwai o Kalumaina k, no Wailuku, Maui, i make. Ua heluhelu ia a ua waiho ia ka palapala noi a Kamaka w, e noi ana e hooponopono ia ka waiwai o kana kane make, oia hoi o Kalumaina k, no Wailuku, Maui, i makeaku, a e hoonoho ia i kahu no ke keiki oo ole. Nolaila ke kauoha ia aku nei na kanaka a pau, ke pili, o ka Poalua, oia ka la 27 o Mei, 1879, ma ka hora 10 a m, oia ka la a me kahi i koho ia no ka hoolohe ana i ua nonoi la a me na mea kue ke hoike ia.
ABR. FORNANDER. Lunakanawai Kaapuni Apana 2, H P A.
Lahaina, Apr 18, 1879. 908 3t

            MA ke keena o ka Lunakanawai Kaapuni o ka Apana Elua o ko Hawaii Pae A. Ma ka waiwai o Piipii k, a me Kukue k, no Honuaula, Maui, i make. Ua heluhelu ia a ua waiho ia ka palapala noi a Hapaiwaa k, e noi ana e hoonoho iaia i Lunahooponopono no ka waiwai o Piipii a me Kukue k, no Ulupalakua, Honuaula, i make. Nolaila ke kauoha ia aku nei na kanaka a pau i pili, o ka Poalua, oia ka la 27 o Mei, 1879, ma ka hora 11 am, ma ka Hale Hookolokolo ma Wailuku, oia ka la a me kahi i koho ia no ka hoolohe ana i ua nonoi la a me na mea kue ke hoike ia.
ABR. FORNANDER. Lunakanawai Kaapuni Apana 2, H P A.
Lahaina, Apr 18, 1879. 908 3t

AUWANA A AIHUE IA PAHA.

                E UKU ia ka mea a mau mea nana e hoiho mai i kuu lio hulupala, nona ka hao kuni me IP. me ka eha ma ka a-i, aoao hema, ke hoihoi ae ia C.W. Clark & Son ma alanui Moiwahine. 1t

KALE KULIKA,

                LUNA HOOIAIO PALAPALA KUAI, Molaki, a me na palapala oia ano. LUNA HOOIAIO PALAPALA Aelike mawaena o na Haku me na Kauwa. Luna Haawi Palapala Ae Mare Ma ke kihi o alanui Moiwahine me Kaahumanu, kulanakauhale o Honolulu, ko Hawaii Pae Aina. 906 tf

RAIKI ILI ! RAIKI ILI !!

                UA hiki no ia'u ke haawi i na kumukuai kiekie ma keia Makeke no na Laike wae ole ia ka ili. A e kuai aku no hoi au i ka OKA RAIKI, BARANI ! No na Puaa a me na Lio, &c, &c, &c Na RAIKI nahaha ai a ka Moa.  E kuai aku no hoi i ka Raiki me na poe a pau e hele mai ana, e like me ka lakou makemake ma ka  HALE WILI RAIKI MAHU  Ma Honolulu, maki o Ainahou. 891 3m J. A. HOPPER

UA HOONEE IA.

                Ke hoike aku nei ka mea nona ka inoa malalo iho imua o ka lehulehu, ua hoonee aku au i ko'u mau waiwai, mauka iho o ka Halekuai Kukaa o Theo. H. Davies, Alanui Kaahumanu, Malaila hoi au e hoahu ai i na Waiwai Gula Nani Loa he nui, na mea hoonani i Kinohinohi ia, na mea Dala io maoli, &c. Na Daimana, na Wati Gula a me Dala, na Wati kau Hale, na Pine Omau Kukui, a me na Komo, na Maka Aniani, &c., &c. Na Lako Daimana he Nui Wale. Na Wati Hou a me na Wati Kau Hale, Hele no 2 Makahiki. Ua hana no hoi au he olelo hoopaa me Mr. E. Weller, mea hana wati, ka mea i hana pu me a'u iloko o ka hale hana hookahi, a ua ae mai oia, o na wati pakeke a pau, na wati kau hale a me na carometa i waiho ia aku e hana, e hooko ia me ka hakalia ole. Ua noho loihi au ma keia mau Pae Aina no kekahi mau makahiki, a ua paulele nui au, e hoolawa aku ka iini o ka mea anoi. O na Kauoha mai na Kuaaina, e Hookoia me ka Hikiwawe. Nui ka mahalo no na lokomaikai i loaa ia'u i ka wa i hala, a ke manaolana nei au, maka hooko pono ana ma ka'u hana, he mea ia e hilinai mai ai oukou maluna o'u ma keia mua aku.
MAX ECKART, Mea Hana Gula.
Kahua mua o D. N. Flitner, Alanui Kaahumanu, Honolulu.
            P.S. E hoomanao, o na Daimana maikai a anapu wale no ka'u i malama, oiai, o na kumukuai o kekahi mau Daimana e ae ke emi nei, a o na pohaku makamae, aole ma ko lakou mau kumukuai mau, aka, ke nee mua nei ma na kumukuai hou. 900 3m

HE MAU MEA NANI LOA
MA KA HALEKUAI
" CALIFORNIA
ONE PRICE
BAZAR."

                Ua loaa mai nei ia makou na Lole Nani Loa i iKe ole ia ka lua ma ke Aupuni Hawaii ; no na kumukuai haahaa lua ole i ike ole ia i na kau i hala. Oiai ua loaa ia makou keia mou Lole no ke kumukuai haahaa loa, nolaila, oia ke kumu o ko makou kuai ana no ke kumukuai emi loa i ku i ka hoopomaikai i ka lehulehu, oia na Lole Kalakoa nani o na ano a pau : Na Aahu Paina maikai loa, Na Kihei Huluhulu maikai loa, Na Kukaenalo a me na Keokeo, Na Lole Komo he nui wale o na Kane, Na Palule Olona no $1.00 Na Miki-lima Lopi Lilina o na Wahine, Na Lole Silika Eleele me ka Veleveta, Na Uhi Bela Laula 1-4, 7-4, 8-4, 9-4, 10-4, Na Huluhulu Keokeo o na ano like ole, Na Palule Keokeo Alu Lilina no $1.50 Na Lolewawae Ahina 60 keneta o ka paa Na Miki-lima ili o na Kane me na wahine, Na Uhi Moe, He maikai loa na Palemai no na Wahine a me na Kaikamahine. Na Paa Lole no na Keiki, Na Kamaa o na Keonimana a me na Lede. Na Lole Hinuhinu Mabela, Ka makou mau Lihilihi Silika Na Palemai Silika Marino o na Kane, Na Lole Wahine Keokeo me na hoonani. Ua hoemi loa ia ke Kumukuai o na Lihilihi a me na Papale Keiki, Na Zebera Berina maikai he 20 keneta wale no o ka Auneke. Na Kenila maikai loa he 15 Keneta o ka Auneke, Na Lina Lole maikai loa o na ano a pau, Na Pahi Koli Peni he nui wale. Na Papale Kane a me Wahine. Ua loaa mai ia makou na ano pahi he nui wale, aole mea like i ike ia mamua ma keia wahi. O ka poe kuai pahi e pomaikai ana lakou ke hele mua mai ma keia Halekuai a e wae no lakou iho. He lua ole ka maikai o na pahi a me ke emi o ko lakou kumukuai. O na waiwai a pau i loaa mai ia makou, ua kuai ia aku no ke kumukuai haahaa loa. E hele nui mai e nana a e wae, a e ike auanei oukou. O KA MAKOU OLELO MAKIA : E hoahu i na Waiwai Maikai, a e Kuai Emi Loa, Ma ka Halekuai California One Price Bazar. 905 3m 916 MELLIS & FISHEL.

Holaha Hoopau Mo raki.

                MA keia ke hoolaha ia kau nei, mamuli o ka mana kuai i waiho ia iloko o kekahi Palapala Moraki i kakahu i ai ka la 30 o Ianuari, 1877, hanaia mawaena o Mary Kaheiau o ka aoao mua a me A. J. Cartwright o ka aoao elua, a i kope ia iloko o ka buke 48 aoao 239 a me 240, ma ke keena kakau kope o ke aupuni ma Honolulu, i mea e hoopaa ai no ka hookaa ana i na dala $200 iloko o na makahiki elua mai ka wa i kakau ia ai, me ka ukupanee hookahi keneta o ka mahina, e hookaa ana i kela a me keia hapalua makahiki. Ke manao nei o A. J. Cartwrighti oleloia e hoopau i ka Moraki i olelo ia, a mahope o ka manawa i hoakaka ia ma ke kanawai, e kudala ia aku ka waiwai Moraki i oleloia ma Honolulu, no ka uhai ia ana o ka olelo aelike iloko o ka Palapala Moraki i oleloia. Penei na hoakaka ana: O keia apana aina a pau e waiho la ma PAUHULUHULU, Nuuanu, Honolulu, i oleloia, oia hoi ka aina i hoakakaia iloko o ka Palapala Sila Nui Helu 1895, Kuleana helu 74, a i haawiia ia Kahuai k hookahi eka me 53-100 ka ili, me na mea a pau e pili ana maluna o na aina la.
Kakauia i keia la 19 o Aperila, 1879.
R. F. BICKERTON,
907 4T Loio no A. J. Cartwright i oleloia.

            MA ke keena o ka Lunakanawai Kaapuni o ka Apana Elua o ko Hawaii Pae Aina. Ma ka waiwai o J K Kaianui no Waihee, Maui, i make. Ua heluhelu ia a ua waiho ia ka palapala noi a Kaiku w, e noi ana e hoonoho iaia i Lunahooponopono no ka waiwai o J K Kaianui kana kane i make aku nei. Nolaila, ke kauoha ia aku nei na kanaka a pau i pili, o ka Poalua, oia ka la 27 o Mei, 1879, ma ka hora 2 kahi i koho ia ka hoolohe ana i ua nonoi la a me na mea kue ke hoike ia.
ABR. FORNANDER. Lunakanwai Kaapuni Apana 2, H P A.
Lahaina, April 18, 1879. 908 3t

            MA ke keena o ka Luna Kanawai Kaapuni o ka Apana Elua o ko Hawaii Pae Aina. Ma ka waiwai o Akela pake no Wailuku i make. Ua heluhelu ia a ua waiho ia ka palapala noi a Tha W Everett, e noi ana e hoonoho ia i kekahi Lunahooponopono no ka waiwai o Akela pake no Wailuku, Maui, i make. Nolaila, ke kauoha ia aku nei na kanaka a pau ke pili, o ka Poakolu, oia ka la 28 o Mei 1879, ma ka hora 10 am, ma ka Hale Hookolokolo ma Wailuku, oia ka la a me kahi i koho ia no ka hoolohe ana i ua nonoi la a me na mea kue ke hoike ia.
ABR. FORNANDER. Lunakanawai Kaapuni Apana 2, H P A.
Lahaina, Aperila 18, 1879. 908 3t

Hoolaha Papa.

                MAI keia la aku a mahope aku nei, ke papa loa ia aku nei na mea a pau e hookuu wale ana i ko lakou mau bipi, lio, miula, a me Iakake maluna o kuu aina hoolimalima o Waaloa, e waiho ia ma Manoa, mokupuni o Oahu. A ina e loaa ia'u keia mau holoholona e komohewa ana maluna o kuu aina, e uku ka mea nona ia holoholona he hookahi dala no ke poo, a ina e hoopoino i na mea kanu, e uku oia e like me ka nui o ke poho. Kia kekahi, e kapu loa na kanaka a pau aole e hik i ke hele wale maluna o kuu aina me ke kuleana ole.
JOS. ARAISA.
Manoa, Aperila 21, 1879. 908 4t

Hoolaha a ka A gena Kanikela Amerika.

                KE hoike aku nei keia hoolaha, o na kanaka a pau he kuleana ko lakou i ka waiwai o J S SMITH, M D, ua kauoha ia lakou e hoike mai i na hooiaio i ka mea nona ka inoa malalo iho, iloko o na malama eono, mai ka la aku o ka puka ana o keia hoolaha, o hoole mau loa ia aku lakou; a o ka poe a pau i aie i kela waiwai, ua kauoha ia lakou e uku koke mai me ka hakalia ole ia THOMAS SPENCER,
Agena Kanikela Amerika
Hilo, Aperila 26, 1879. 908 1m

            MA ke keena o ka Lunakanawai Kaapuni, Apana Elua o ko Hawaii Pae Aina. Ma ka waiwai o Kaalae k, no Papaea, Hamakualoa, Maui, i make. Ua heluhelu ia a ua waiho ia ka palapala noi a Umi w, e noi ana e hoonoho iaia i Lunahooponopono no ka waiwai o Kaaiae k. no Papaea, Hamakualoa, Maui, i make Nolaila, ke kauoha ia aku nei na kanaka a pau i pili, o ka Poalima oia ka la 30 o Mei, 1879, ma ka hora 10 am, ma ka Hale Hookolokolo ma Makawao, oia ka la a me kahi i koho ia no ka hoolohe ana i ua nonoi la a me na mea kue ke hoike ia.
ABR. FORNANDER, Lunakanawai Kaapuni Apana 2, H P A.
Lahaina.April 18, 1879. 908 3t

            MA ke keena o ka Lunakanawai Kaapuni Apana Ekolu o ko Hawali Pae Aina, ma ka waiwai o S. Kipi, ao Hilo Hawaii i make. Ua heluhelu ia a ua waihoia ka palapala noi a Moses Kipi, e noi ana e hoonoho ia o W. H. Reed i lunahooponopono no ka waiwai o Samuela Kipi k no Hilo, Hawaii i make. Nolaila ke kauoha ia aku nei na kanaka a pau ke pili, o ka Poaono oia ka la 17 o Mei 1879, ma ka hora umi o kakahiaka, ma ka hale hookolokolo ma Hilo, oia ka la me kahi i koho ia no ka hoolohe ana i ua noi la a me na mea kue ke hoike ia.
F. S. LYMAN, Lunakanawai Kaapuni Apana Ekolu H P A.
Hilo, Hawaii, April 8, 1879. 907 3t

HOOLAHA PAPA.

                E IKE auanei na kanaka a pau loa. Owau o ka mea nona ka inoa malalo iho, ma keia ke hookapu aku nei au, a ke papa nei i na kanaka a pau aole e komo hewa aole hoi e lawe aku i na puaa bipi a me na lio i kuni la a i kuni ole ia paha; na manu o na ano a pau, aole hoi e oki i na laau o na aina i hoike ia malalo iho, a e waiho ia ma Hamakua, mokupuni o Hawaii, oia hoi keia. Opihilala, Kaalaea, Hauola, Paauilo, Koholalele, Kainehe, Kaawikiwiki, Kaao, Kekualele, Kukaiau, a me Manowaikohao. O ka poe kue i keia olelo papa, e hoopii ia lakou ma ke kanawai.
CHAS NOTTEY, 900 6M Mar. 1,

OLELO HOOLAHA

                OIAI ke makemake nei au e hoopaa i ko'u mau aina i ka pa, ma na Awawa o PALOLO a me MANOA, Nolaila, ke noi aku nei au i na mea a pau nona na aina e pili ana i ko'u ma ia mau awawa, e hele mai a e kuka pu me a'u no ia mea.
CHARLES LONG.
Helu 5. alanui Kalepa. 907 4 t

            KE papa ia aku nei na kanaka a pau o kela me keia ano. aole e hele a komohewa ma kuu aina i kapaia o Kaloheo e waiho la ma Kapaa, Kailua, Koolaupoko, Oahu. ua kapu pu hoi me ka hele ana o na holoholona maluna o na aina la. A ke hai pu ia aku nei no hoi ka lohe i na mea a paa, o na mea nana i hoolimalima mua i na aina ia, ua pau ko laua kuleana, a ua hoihoi mai ia'u. O Hoopii w oia ko'u hope ma keia mea. E hoolohe na mea a pau i pilikia ole. KELEAU. Kapaa, Kailua. Koolaupoko. Apr. 10, 1879. 906 4t

            E IKE auanei na kanaka a pau ma keia, ua lilo mai i na mea nona na inoa malalo iho, ma ka hooolimalima ka aina o Keei 2, Kona Hema, Hawaii, nolaila, ke hakapu a pepa loa aku nei maua i na mea holoholona a pau, aole e hookuu wale maluna o ua aina la. O ka mea hookuli e hoopii ia e like me ke kanawai.
KEANU.
PELIO.
Keei, S. Kona, April 12, 1879. 907 1m

            KE papa ia aku nei kanaka a pau e noho ana ma Waialae, Nui Waialae-iki, Wailupe, a me na wahi e pili ana, a me na kanaka e ae no a pau loa o kela a me keia ano. Ua kapu loa ke ki pu ana i na puaa ahiu na palahu, a me na kao e holo ana ma na wahi a pau o Maunalua. O ka mea kue a hoolohe ole i keia olelo papa, e hoopii ia no ma ke kanawai. Nolaila, e hoolohe o pilikia auanei,
Owau no METUSALA MAHUKA,
Honolulu, Oahu, Mar. 24, 1879. 908 4t

            KE papa ia aku nei na kanaka a pau aole e komohewa a lawe wale a hoopino i na mea ulu, a kukulu wale a hookuu wale paha i na holoholona a komohewa paha ma ke ano e a'e maluna o na aina ponoi a me na aina i hoolimalima ia e ka Hui Mahiko o Waihee, Maui. O ka mea hookuli ia keia hoopii koke ia no e like me na Kanawai o ka Aina, nolaila oka hoolohe oa ka pono o pilikia auanei.
JAMES MAKEE & Co.
Waihee, Maui, Sept. 7, 1878. 878 6m

OLELO HOOLAHA.

                UA lilo ia Airine Haalou Kahalelaukoa Ii ka loko i-a o "Hanaloa" a me ke kula i pili pu, ma Waipio, Ewa, a ke hookapu nei ia mau wahi, a o Sam. Kiwaha ka luna nana e malama.
A. F. JUDD, Kahu no Airine.
Honolulu, Sept. 9, 1878. 876 6m

AINA KUAI A HOOLIMALIMA.

                HE Kanalima Kumamaono eka aina ma Iwilei. (Makai iho o ka Halepaahao.) He Loko I-a, Aina Kalo, Aina kau Paakai, aina kula a me ke kai. A me kekahi mau eka aina ma Peleula, he aina kalo, aina kula a me ke kai. He oluolu ke kuai ana. E ninau ia J. H. CONEY, (Koni).
Honolulu. 868 tf

OLELO HOOLAHA.

                E MANAO ana o MR. CLAU SPRECKLES o Kaleponi, e hana i auwai nui ma ka mokupuni o Maui; no ka hookahekahe wai maluna o na mea kanu. O ka mea a mau mea paha e makemake ana eli i elima haneri kapuai a oi aku paha o keia auwai ma ka olelo aelike, a e aku ia aku no hoi no ka hana ma ka heluna o na kapuai kubita, a i ole ia ma ka heluna o na kapuai loa o ka auwai i eliia; ke noi ia 'ku nei lakou e ninau ia H. Schussler ma Haiku, Maui, a i ole ia William G. Irwin & Co., ma Honolulu, a e loaa ia lakou na hoakaka kupono.
CLAUS SPRECKLES,
888 tf H. SCHUSSLER.

            O WAU o ka mea nona ka inoa malalo iho, ke hookapu loa aku nei au i kuu aina hoolimalima i loaa mai ia'u mai ka Papa Hoonaauao mai, oia ke Ahupuaa o Makawao, ma ka mokupuni o Maui. aole e hookuu wale i na lio,pipi, hoki, kekake, hipa, kao a me ka puaa, maluna oia Ahupuaa o Makawao, ua kapu loa, aole e hookuu wale i na holoholona i olelo ia maluna. Ina o ka mea hookuu wale i kana mau holoholona me ke kuleana ole, e hopu ia no a e lawe ia i ka pa aupuni no ke komohewa. A peia no na ano kanaka a pau, aole e kia wale i na mea a pau maluna o ua Ahupuaa la i oleloia malama, a o ka mea hoolohe ole i keia mau olelo, e hana ia e like ke kanawai o ka aina. E hoolohe i keia olelo hoolaha o pilikia auanei.
T. AKAKA LIILII.
Makawao, Maui, Oct. 1, 1878. 991 tf

            Ma ke keena o ka Lunakanawai Kaapuni o ka Apana Elua o ko Hawaii Pae Aina. Ma ka waiwai o Moses Kapike no Kuiha, Hamakualoa, Maui, i make. Ua heluhelu ia a ua waiho ia ka palapala noi a Joseph F. Kapihe, e noi ana e kauoha ia ia i Luna Hooponopono no ka waiwai o Moses Kapihe, no Kuiha, Hamakualoa, Maui, i make. Nolaila, ke kauoha ia aku nei na kanaka a pau, ke pili, o ka Poalima, oia ka la 30 o Mei, 1879, ma ka hora 9 am, ma ka Hale Hookolokolo ma Makawao, oia ka la a me kahi i koho ia no ka hoolohe ana i na nonoi ia, a me na mea kue ke hoike ia.
ABR. FORNANDER, Lunakanawai Kaapuni Apana 2, H P A.
Lahaina, April, 18, 1879. 908 3t